အခန်း (၄၀) ဒါကိုမှ ပထမဆုံးအကြိမ် ဆေးဖော်စပ်တာလို့ ပြောတာလား
သူသည် ချင်းချန်ဂိုဏ်း၏ ဆေးဖော်စပ်ဆောင် သို့ ရောက်ရှိလာသည် ။
လျိုဝူသည် ချင်းချန်ဂိုဏ်းတွင် အတော်ဆုံးဖြစ်သော ဆေးဆရာ တုယွမ် ကို ရှာဖွေပေးခဲ့သည် ။
လျိုဝူထံမှတစ်ဆင့် တုယွမ်သည် အဆင့်ငါးဆေးဆရာ ဖြစ်ပြီး ဆေးဖော်စပ်ဆောင်အတွင်းရှိ အရာအားလုံးကို တာဝန်ယူထားသူဖြစ်ကြောင်း ချန်ချင်း သိရှိလိုက်ရသည် ။
"သခင်ကြီး ၊ သူ လုပ်ဆောင်ပေးရမယ့် ဘယ်အရာကိုမဆို အမိန့်ပေးနိုင်ပါတယ်"
"တုယွမ်က သခင်လေးချန်ကို ဂါရဝပြုပါတယ်"
တုယွမ်သည် ချင်းချန်ဂိုဏ်းအတွင်း မကြာသေးမီက ဖြစ်ပျက်ခဲ့သော ကြီးကျယ်သော အဖြစ်အပျက်ကို ကြားသိထားပြီးဖြစ်သည် ။
လျိုဝူက ချန်ချင်းအား သခင်ကြီးဟု ရိုသေစွာ ခေါ်ဆိုနေသည်ကို မြင်ရသဖြင့် လက်ရှိ ချင်းချန်ဂိုဏ်းမှာ ချန်ချင်းထံတွင် အညံ့ခံထားပြီးဖြစ်ကြောင်း သူ သိရှိသည် ။
သူ၏ဂိုဏ်းချုပ်ပင်လျှင် အညံ့ခံထားရသည်ဖြစ်ရာ တုယွမ်အနေဖြင့် မည်သို့လျှင် ဦးမညွှတ်ဘဲ နေဝံ့ပါမည်နည်း ။
"အရာအားလုံးအတွက် အကူအညီပေးပါဦး ဆေးဆရာတု" ဟု ချန်ချင်းက ယဉ်ကျေးစွာ ပြောလိုက်သည် ။
"မပြောပါနဲ့ခင်ဗျာ ၊ ဒါဟာ ကျွန်တော့်အတွက် ဂုဏ်ယူစရာပါ" တုယွမ်က စကားနည်းနည်းသာ ပြောဆိုပြီး ချန်ချင်းအား ဆေးဖော်စပ်ဆောင်အတွင်းသို့ ဖိတ်ခေါ်လိုက်သည် ။
ရှယွီချင်းနှင့် လျိုဝူတို့မှာလည်း နောက်မှ ထပ်ကြပ်မကွာ လိုက်ပါလာကြသည် ။
လျိုဝူ လိုက်ပါလာခြင်းမှာ ဆေးဖော်စပ်ဆောင်အတွင်းရှိ တစ်စုံတစ်ယောက်က မျက်စိမရှိဘဲ ချန်ချင်းအား စော်ကားမိကာ ချင်းချန်ဂိုဏ်းအတွက် ဘေးဒုက္ခ ယူဆောင်လာမည်ကို စိုးရိမ်သောကြောင့်ဖြစ်သည် ။
တစ်သောင်းပုံ တစ်ပုံမျှသာ ဖြစ်နိုင်ချေရှိစေကာမူ လျိုဝူမှာ ထိုစွန့်စားမှုကို မလုပ်လိုပေ ။
စကားပုံရှိသည့်အတိုင်း 'သတိဟူသည်မှာ ဘေးကင်းခြင်း၏ အမိအဖ' ပင် မဟုတ်ပါလော ။
မကြာမီ ချန်ချင်းသည် တုယွမ်၏ ဦးဆောင်မှုဖြင့် သူတစ်ဦးတည်းအတွက် သီးသန့်ဖြစ်သော ဆေးဖော်စပ်ခန်းသို့ ရောက်ရှိလာသည် ။
ချန်ချင်း ပတ်ဝန်းကျင်ကို ဝေ့ကြည့်လိုက်ရာ ဆေးဗီဒိုများမှာ တံတိုင်းများအလား တည်ရှိနေပြီး ဆေးဘက်ဝင်အပင် အမျိုးအစားပေါင်း ထောင်ချီ၍ ရှိနေသည် ။
ဆေးဖော်စပ်ခန်း၏ အလယ်ဗဟိုတည့်တည့်တွင်မူ လူနှစ်ရပ်စာခန့် မြင့်သော ဧရာမ ဆေးဖိုကြီး တစ်ခုကို ချထားပြီး ၎င်းအပေါ်တွင် 'တောက်လောင်သောမီးအိုး' ဟု ကမ္ပည်းထိုးထားသည် ။
ချန်ချင်းသည် ဤဆေးဖိုမှာ တိအဆင့် နိမ့်ပါးအဆင့်ရှိသော မှော်ရတနာဖြစ်ကြောင်း ချက်ချင်း သိရှိလိုက်သည် ။
"ဒီဆေးဖိုက ကျွန်တော် မတော်တဆ ရရှိထားတဲ့ အရာပါ ။ သခင်လေးချန် အနေနဲ့ ဒီအခန်းထဲမှာရှိတဲ့ ဆေးဘက်ဝင်အပင် အားလုံးအပါအဝင် စိတ်ကြိုက် အသုံးပြုနိုင်ပါတယ်" ဟု တုယွမ်က သဘောထားကြီးစွာ ပြောကြားလိုက်သည် ။
"ကျေးဇူးတင်ပါတယ်" ဟု ချန်ချင်းက တိုတိုတုတ်တုတ် ပြန်လည်ဖြေကြားလိုက်သည် ။
ထို့နောက် သူသည် ဆေးဖိုဆီသို့ လျှောက်သွားလိုက်ပြီး သူ၏ ဦးနှောက်ထဲရှိ ကုဋေပေါင်းများစွာသော ဆေးနည်းများထဲမှ အဆင့်ခြောက်ဆေးနည်း တစ်ခုကို ရွေးချယ်လိုက်သည် ။
ဤသည်မှာ ချန်ချင်းက စနစ်ကို မယုံကြည်ခြင်း သို့မဟုတ် ဘေးကင်းရန် ကြိုးစားနေခြင်း မဟုတ်ပေ ။ သူ၏ နတ်ဘုရားအာရုံဖြင့် အခန်းတစ်ခုလုံးကို ဖြန့်ကြက်ကြည့်ရှုပြီးနောက် ဤအခန်းရှိ ဆေးဘက်ဝင်အပင်များ၏ အရည်အသွေးမှာ အမြင့်ဆုံး အဆင့်ခြောက်ဆေးလုံး ဖော်စပ်ရန်အတွက်သာ လုံလောက်ကြောင်း သူ သိရှိသွားသောကြောင့်ဖြစ်သည် ။
ချန်ချင်းက အကွာအဝေးတစ်ခုမှနေ၍ ဆေးဗီဒို ရာပေါင်းများစွာကို တစ်ပြိုင်နက်တည်း ထိန်းချုပ်ဖွင့်လှစ်ကာ ဆေးဘက်ဝင်အပင် အမြောက်အမြားကို ထုတ်ယူနေသည်ကို မြင်သောအခါ အဆင့်ငါးဆေးဆရာဖြစ်သော တုယွမ်မှာ အံ့အားသင့်ခြင်းကို မထိန်းနိုင်တော့ဘဲ "သခင်လေးချန် ထုတ်ယူနေတဲ့ ဆေးပင်တွေကို ကြည့်ရတာ သူက အဆင့်ငါးဆေးလုံးတွေကို ဖော်စပ်ချင်နေတာပဲ"
'အဆင့်ငါးဆေးလုံးကို ဖော်စပ်မယ် ဟုတ်လား'
ရှယွီချင်း၏ မျက်ခုံးအစုံမှာ အနည်းငယ် တွန့်ချိုးသွားသည် ။ ချန်ချင်းက လွန်ခဲ့သော မကြာမီကမှ ဤသည်မှာ သူ၏ ပထမဆုံးအကြိမ် ဆေးဖော်စပ်ခြင်းဖြစ်သည်ဟု ပြောဆိုခဲ့သည်ကို သူမ ရှင်းလင်းစွာ မှတ်မိနေသည် ။
မည်သူမဆို ပထမဆုံးအကြိမ်တွင် အဆင့်ငါးဆေးလုံးမှ စတင်၍ ဖော်စပ်နိုင်ပါမည်လော... ။
ရှယွီချင်းမှာ ချန်ချင်း၏ အတွေးကို လုံးဝ နားမလည်နိုင်တော့ပေ ။
လျိုဝူမှာမူ ဘာမှ မပြောဝံ့ပေ ။ ဆေးပင်အနည်းငယ် ဖြုန်းတီးမိခြင်းမှာ ဘာမှ မဟုတ်ပေ ။ သခင်ဖြစ်သူ ချန်ချင်းသာ ပျော်ရွှင်ကျေနပ်နေမည်ဆိုလျှင် လုံလောက်ပါပြီ ။
ပွင့်ပွင့်လင်းလင်း ပြောရလျှင် လက်ရှိ ချင်းချန်ဂိုဏ်းရှိ အရာအားလုံးမှာ ချန်ချင်း၏ အပိုင်ပင် ဖြစ်သည် ။ သူသည် ဆေးဖော်စပ်ဆောင်တစ်ခုလုံးကို မီးရှို့ပစ်လျှင်ပင် လျိုဝူအနေဖြင့် မကျေမနပ်ဖြစ်ရန် အကြောင်းမရှိဘဲ 'ကောင်းကောင်းရှို့တယ် ၊ ပြင်းပြင်းရှို့တယ်' ဟုပင် ချီးကျူးနေဦးမည် ဖြစ်သည် ။
ချန်ချင်းသည် ဝိညာဉ်သစ်သားကို မီးညှိ၍ ဆေးဖော်စပ်ရန် ပြင်ဆင်နေသည်ကို မြင်သောအခါ ။
ရှယွီချင်းသည် တုယွမ်၏ ဘေးသို့ တိုးကပ်သွားပြီး တိုးတိုးလေး မေးမြန်းလိုက်သည် ။ "ဆေးဆရာတု ၊ တစ်ယောက်ယောက်က ပထမဆုံးအကြိမ် ဆေးဖော်စပ်တဲ့နေရာမှာ အဆင့်ငါးဆေးလုံးကို ရွေးချယ်လိုက်မယ်ဆိုရင် ဘာအကျိုးဆက်တွေ ရှိနိုင်မလဲ"
"ဆေးဖော်စပ်ခြင်းက ကြည့်ရင်တော့ လွယ်သလိုရှိပေမဲ့ တကယ်တော့ ဗဟုသုတတွေ အများကြီး လိုအပ်ပါတယ် ။ အမှားအယွင်း အနည်းငယ်လေးက ဆေးဖို ပေါက်ကွဲတာမျိုးအထိ ဖြစ်စေနိုင်ပြီး ဆေးလုံးအဆင့် မြင့်လေလေ ပေါက်ကွဲမှုစွမ်းအားက ပိုပြီး ထိတ်လန့်စရာကောင်းလေလေ ဖြစ်ပါတယ်"
"အကယ်၍ အဆင့်ငါးဆေးလုံးသာ ပေါက်ကွဲခဲ့ရင် ဒီဆေးဖော်စပ်ဆောင် တစ်ခုလုံး မြေလှန်သွားနိုင်ပါတယ်"
စကားဆုံးသည်နှင့် တုယွမ်သည် အချက်အလက်များကို ဆက်စပ်မိသွားပြီး အသက်ကို ပြင်းပြင်းရှူလိုက်မိသည် ။
'ပထမဆုံးအကြိမ် ဆေးဖော်စပ်တာ ၊ ပြီးတော့ အဆင့်ငါး...' သူသည် တံတွေးကို မျိုချလိုက်ပြီး ရှယွီချင်းအား မဝံ့မရဲ မေးမြန်းလိုက်သည် ။ "မင်းသမီးလေး... မင်းသမီးလေး ပြောနေတာ သခင်လေးချန်ကို မဟုတ်ဘူးမလား"
ရှယွီချင်းက နှုတ်ခမ်းပါးလေးကို စေ့ကာ ခေါင်းညိတ်ပြလိုက်သည် ။
"ဒါ... ဒါကတော့"
တုယွမ်၏ ခန္ဓာကိုယ်မှာ တုန်ယင်သွားပြီး လျိုဝူ၏ ဘေးသို့ အမြန်သွားလိုက်သည် ။ "ဂိုဏ်းချုပ် ၊ ဒါက မဖြစ်နိုင်ဘူး ၊ ဒါဟာ သိပ်ကို အန္တရာယ်များလွန်းတယ်"
"ကိစ္စမရှိပါဘူး ၊ ငါ ဒီမှာ ရှိနေတာပဲ" လျိုဝူက လက်ကိုမြှောက်၍ တုယွမ်၏စကားကို ဖြတ်လိုက်သည် ။ သူသည် ချန်ချင်း၏ စိတ်အားထက်သန်မှုကို မပျက်ပြားစေလိုပေ ။
တစ်ချိန်တည်းမှာပင် သူသည် မည်သည့်အချိန်တွင်မဆို ဆေးဖိုပေါက်ကွဲမည့် အန္တရာယ်ကို ကာကွယ်ရန် စိတ်ပိုင်းဆိုင်ရာ ပြင်ဆင်ထားလိုက်သည် ။
သူသည် ဆေးဖော်စပ်ဆောင်ကြီး အမှန်တကယ် ပျက်စီးသွားသည်ကိုတော့ မမြင်လိုပေ ။
သူတို့ သုံးဦး၏ စိုးရိမ်ပူပန်မှုများကို ချန်ချင်း သိရှိသည်မှာ သဘာဝပင်ဖြစ်သည် ။ သူသည် အလျင်စလို ငြင်းခုံနေခြင်း မပြုဘဲ လုပ်ဆောင်ချက်ကသာ စကားလုံးများထက် ပို၍ အားကောင်းကြောင်း ခိုင်မာစွာ ယုံကြည်ထားသည် ။
သူသည် ဆေးဘက်ဝင်အပင်များကို ဆေးဖိုအတွင်းသို့ အစီအစဉ်တကျ ထည့်သွင်းလိုက်ပြီး တောက်လောင်နေသော ဝိညာဉ်သစ်သား၏ မီးတောက်ကို သူ၏ ဝိညာဉ်စွမ်းအားဖြင့် ထိန်းချုပ်ကာ ဆေးပင်များကို အရည်ပျော်စေရန် စတင်လိုက်တော့သည်... ။
အစပိုင်းတွင် တုယွမ်သည် ရှယွီချင်းနှင့် လျိုဝူတို့ကဲ့သို့ပင် ချန်ချင်း၏ ပထမဆုံးအကြိမ် ဆေးဖော်စပ်မှုမှာ မတော်တဆမှု ဖြစ်လာမည်ကို စိုးရိမ်နေခဲ့သည် ။
သို့သော် တဖြည်းဖြည်းနှင့် တုယွမ်သည် တစ်စုံတစ်ခု ထူးခြားနေသည်ကို သတိပြုမိလာသည် ။ ချန်ချင်း၏ ဆေးဖော်စပ်မှု နည်းစနစ်မှာ ပထမဆုံးအကြိမ် လုပ်ဆောင်နေသူတစ်ဦးနှင့် လုံးဝ မတူဘဲ အလွန်တရာ ကျွမ်းကျင်လွန်းနေသည် ၊ ကျွမ်းကျင်သည်ထက်ပင် သာလွန်နေသည် ။
သူ၏ နည်းစနစ်များမှာ နက်နဲလှပြီး အပူရှိန်နှင့် အချိန်အခါကို ထိန်းချုပ်မှုမှာလည်း တိကျသေချာလွန်းလှသည် ။
သူ့အား ကြည့်ရှုနေရရုံမျှနှင့်ပင် တုယွမ်အတွက် များစွာ အကျိုးရှိလှပြီး နှစ်ပေါင်းများစွာ သူ့အား ဒုက္ခပေးနေသော အတားအဆီး မှာပင် ပွင့်ထွက်သွားမည့် လက္ခဏာများ ပြလာတော့သည် ။
"အံ့သြစရာပဲ ။ တကယ်ကို အံ့သြစရာကောင်းလိုက်တာ" တုယွမ်က မအောင့်နိုင်ဘဲ ရေရွတ်လိုက်မိသည် ။
'အံ့သြစရာ ဟုတ်လား'
ဆေးဖော်စပ်ခြင်းအကြောင်း နားမလည်သော ရှယွီချင်းနှင့် လျိုဝူတို့မှာ ထိုစကားကြောင့် ဇဝေဇဝါ ဖြစ်သွားကြပြီး ဘာတွေက အံ့သြစရာကောင်းနေသလဲဆိုသည်ကို မသိရှိကြပေ ။
ရှယွီချင်း တုံ့ပြန်ရန် မစွမ်းသာမီမှာပင် တုယွမ်က သူမဘက်သို့ လှည့်လာပြီး စိတ်လှုပ်ရှားနေသော မျက်လုံးများဖြင့် အတည်ပြုမေးမြန်းလိုက်သည် ။ "မင်းသမီးလေး ၊ သခင်လေးချန်က တကယ်ပဲ ပထမဆုံးအကြိမ် ဆေးဖော်စပ်တာဆိုတာ သေချာရဲ့လား"
"ဟုတ်ပါတယ် ၊ သူကိုယ်တိုင် ပြောခဲ့တာပါ ။ ဒီမတိုင်ခင်က သူ တစ်ခါမှ ဆေးမဖော်ဖူးပါဘူး" ရှယွီချင်းက ချန်ချင်း သူမကို လိမ်ညာမည်ဟု မယုံကြည်သဖြင့် ခေါင်းညိတ် အတည်ပြုလိုက်သည် ။
ထို့နောက် သူမက မေးလိုက်သည် ။ "တစ်ခုခု ပြဿနာ ရှိလို့လား"
"ပွင့်ပွင့်လင်းလင်း ပြောရရင် သခင်လေးချန်ရဲ့ ဆေးဖော်စပ်မှု အဆင့်အတန်းက ကျွန်တော့်ထက် အဆပေါင်းများစွာ သာလွန်နေပါပြီ ။ ဒါဟာ ပထမဆုံးအကြိမ် ဆေးဖော်စပ်တဲ့သူ မဟုတ်ပါဘူး ၊ သူဟာ ဆေးဖော်စပ်ခြင်းလမ်းစဉ်ရဲ့ စစ်မှန်တဲ့ ဆရာကြီး တစ်ဦးပါပဲ" ဟု တုယွမ်က ရင်ထဲမှ လှိုက်လှိုက်လှဲလှဲ ပြောကြားလိုက်သည် ။
ဆေးဖော်စပ်ခြင်းလမ်းစဉ်၏ ဆရာကြီး တဲ့လား ။
အဆင့်ငါးဆေးဆရာတစ်ဦး၏ ပါးစပ်မှ ဤကဲ့သို့သော စကားမျိုး ထွက်ပေါ်လာခြင်းမှာ မည်မျှ တန်ဖိုးကြီးမားကြောင်း ရှယွီချင်း သိရှိသည် ။
လျိုဝူမှာလည်း ဂိုဏ်းချုပ်တစ်ဦးအနေဖြင့် တုယွမ်က တစ်စုံတစ်ယောက်ကို ဤမျှအထိ ချီးကျူးသည်ကို တစ်ခါမျှ မတွေ့ဖူးပေ ။
ချန်ချင်းမှာမူ သူတို့၏ စကားဝိုင်းကို အာရုံမစိုက်ပေ ။
ဆေးဖိုအတွင်းရှိ အညစ်အကြေးများမှာ ပြာအဖြစ် လုံးဝ လောင်ကျွမ်းသွားပြီး ရွှေရည်ကဲ့သို့သော ရွှေရောင် ဝိညာဉ်ရည်စက်လေးများသာ ကျန်ရှိတော့သည်ကို သူ မြင်တွေ့လိုက်ရသည် ။
ချန်ချင်းသည် ဝိညာဉ်သစ်သားများကို ထပ်မံထည့်သွင်းကာ မီးရှိန်ကို မြှင့်တင်လိုက်သည် ။
အသင့်တော်ဆုံး အချိန်တွင် သူက အော်ဟစ်လိုက်သည် ။ "ပေါင်းစည်းစေ"
နောက်တစ်ခဏတွင် တောက်လောင်နေသော ဆေးဖိုအတွင်းမှ ပြင်းထန်သော အဖြူရောင် ချီလှိုင်းတစ်ခု ထွက်ပေါ်လာပြီး မွှေးကြိုင်လှသော ဆေးရနံ့များ လွင့်ပျံ့လာတော့သည် ။
ရနံ့ကို အနည်းငယ်မျှ ရှူရှိုက်လိုက်ရုံနှင့် လူကို လန်းဆန်းတက်ကြွသွားစေသည် ။ သူ၏ ချီပင်လယ်မှာလည်း လှုပ်ခတ်သွားတော့သည် ။
"အောင်မြင်ပြီ ။ အောင်မြင်ပြီ ။ ဆေးလုံး ပေါင်းစည်းခြင်း အောင်မြင်သွားပြီ" တုယွမ်၏ စိတ်လှုပ်ရှားမှုမှာ သူကိုယ်တိုင် အဆင့်ငါးဆေးလုံးကို အောင်မြင်စွာ ဖော်စပ်နိုင်ခဲ့သည်ထက်ပင် ပိုမို ကြီးမားနေတော့သည် ။
မည်သို့ပင်ဖြစ်စေ သူသည် သမိုင်းဝင် အခိုက်အတန့် ၊ ဒဏ္ဍာရီတစ်ခု မွေးဖွားလာခြင်းကို ကိုယ်တိုင် မြင်တွေ့ခဲ့ရခြင်း မဟုတ်ပါလော ။
ဤမျှ ငယ်ရွယ်သော အဆင့်ငါးဆေးဆရာမျိုးကို တစ်ခါမျှ မကြားဖူး ၊ မမြင်ဖူးခဲ့ပေ ။
"ဆေးလုံး ပေါင်းစည်းတာ အောင်မြင်သွားတာလား" ရှယွီချင်းမှာ မယုံကြည်နိုင်လောက်အောင် ဖြစ်နေသည် ။
ပထမဆုံးအကြိမ် ကြိုးစားမှုမှာတင် အဆင့်ငါးဆေးလုံးကို အောင်မြင်စွာ ဖော်စပ်နိုင်ခြင်းမှာ ဆေးဆရာလောကတွင် မည်သို့သော ပါရမီမျိုးဟု သတ်မှတ်ရပါမည်နည်း ။
မီးခိုးများ ကင်းစင်သွားသည်နှင့် တုယွမ်သည် အခြားသူများထက် လျင်မြန်စွာ ချန်ချင်း၏ ရှေ့သို့ ချက်ချင်း ရောက်ရှိသွားသည် ။
သူက အလျင်အမြန် မေးမြန်းလိုက်သည် ။ "သခင်လေးချန် ဆေးလုံး ဘယ်နှစ်လုံး ဖော်စပ်နိုင်ခဲ့သလဲဆိုတာ မေးလို့ရမလား"
တုယွမ်၏ ခန့်မှန်းချက်အရ ထိုဆေးပင် ပမာဏနှင့်ဆိုလျှင် သူသာဆိုပါက အနည်းဆုံး အဆင့်ငါးဆေးလုံး သုံးလုံးခန့် ဖော်စပ်နိုင်မည် ဖြစ်သည် ။
ချန်ချင်းသည် သူ၏ လက်ငါးချောင်းကို ဖြန့်လိုက်ရာ ရွှေရောင်အလင်းများ ဝင်းလက်နေသော ဆေးလုံး ခုနစ်လုံးမှာ သူ၏ လက်ဝါးပေါ်တွင် ဝဲပျံနေသည် ။
"ဒါ... ဒါတွေက ဆေးကမ္ပည်း တွေလား" ဆေးလုံးများပေါ်တွင် စီးဆင်းနေသော ရွှေရောင်ပုံစံများကို ရှင်းလင်းစွာ မြင်လိုက်ရသောအခါ တုယွမ်၏ မျက်လုံးများမှာ ကြေးခေါင်းလောင်းများအလား ပြူးကျယ်သွားတော့သည် ။
အကြိမ်ကြိမ် အတည်ပြုပြီးနောက် ထိုအရာများမှာ ဆေးကမ္ပည်းများ ဖြစ်ကြောင်း တုယွမ် သေချာသွားခဲ့သည် ။
ဆေးလုံးများ၏ အရည်အသွေးကို များသောအားဖြင့် အနိမ့် ၊ အလတ် ၊ အမြင့် နှင့် အထွတ်အထိပ် ဟူ၍ လေးဆင့် ခွဲခြားထားသော်လည်း ၎င်းတို့အပြင် ဆေးကမ္ပည်း ဟူသော နောက်ထပ် အဆင့်တစ်ခု ရှိသေးသည် ။
ဆေးကမ္ပည်း ဆိုသည်မှာ ဆေးလုံးတစ်လုံး ရရှိနိုင်သော အမြင့်ဆုံး အရည်အသွေးကို ဆိုလိုခြင်း ဖြစ်လေ့ရှိသည် ။
"ဆေးပင် ပမာဏ တူတူပဲကို ကျွန်တော် ဖော်စပ်နိုင်တာထက် နှစ်ဆကျော် ပိုများတဲ့အပြင် အားလုံးက ဆေးကမ္ပည်းအဆင့်တွေ ဖြစ်နေတယ်..." တုယွမ်၏ ဆေးဆရာတစ်ဦးအနေဖြင့် ရှိထားသော ဂုဏ်ယူမှုလေးမှာ ရက်စက်စွာ နင်းခြေခံလိုက်ရသလို ခံစားလိုက်ရသည် ။
'လူ့အထက်တွင် လူရှိပြီး ကောင်းကင်အထက်တွင် ကောင်းကင်ရှိသည်' ဟူသော အဓိပ္ပာယ်ကို သူ နက်နက်ရှိုင်းရှိုင်း နားလည်သွားခဲ့ပြီ ဖြစ်သည် ။
သူသည် သက်ပြင်းချလိုက်သည် ။ "တကယ်ကိုပဲ နောက်ပိုင်းမျိုးဆက်တွေက ပိုပြီးတော့ ထူးချွန်လာကြတာပဲ"
စကားပြောနေစဉ်မှာပင် တုယွမ်သည် ရုတ်တရက် အသက်ရှူရပ်မတတ် ဖြစ်သွားပြီး ငုံ့ကာ ချန်ချင်း၏ လက်ထဲရှိ ဆေးလုံးများကို အနီးကပ် ကြည့်ရှုစစ်ဆေးလိုက်သည် ။
သူသည် အံ့အားသင့်စွာ အော်ဟစ်လိုက်သည် ။ "မဟုတ်သေးဘူး" ။