အခန်း (၃၄) ငရဲနဂါး

အခွင့်အလမ်းနည်းပါးသည်ဆိုစေဦးတော့ ကောင်းကင်အဆင့် ဆိုသည့် ဂုဏ်ပုဒ်က ရှိနေသည်သာဖြစ်ရာ မည်မျှပင် ရာခိုင်နှုန်းနည်းပါးပါစေ ရရှိလာမည့် ရတနာမှာ သိပ်တော့ အဆင့်မနိမ့်နိုင်ဟု ချန်ချင်း တွေးလိုက်မိသည် ။

"သခင်လေးချန် ၊ ဒီကျင့်စဉ်သုံးခုထဲက ဘယ်တစ်ခုကို ရွေးချယ်မလဲခင်ဗျာ" ချန်ချင်းက ရွှေခေါင်းလောင်းအရှင်သခင်ခန္ဓာကျင့်စဉ်ကို ပြန်ချထားသည်ကို မြင်သောအခါ လီစီဖန်က ရှေ့သို့တိုးကာ မေးမြန်းလိုက်သည် ။

"ဒီ 'ကိုးကမ္ဘာလျှပ်စီးပညာ' ကိုပဲ ရွေးပါ့မယ် ၊ ဒါက ကျွန်တော့်ရဲ့ ဝိညာဉ်အမြုတေပါရမီနဲ့ ကိုက်ညီတယ်လေ" လီစီဖန် သံသယမဝင်စေရန် ချန်ချင်းက ကိုးကမ္ဘာလျှပ်စီးပညာကို ကောက်ယူလိုက်ရင်း ပြောလိုက်သည် ။

နောက်မှ ရှယွီချင်းအား ဆန်းကြယ်ရေခဲအနုပညာကို သင်ကြားပေးမည့်ကိစ္စအတွက်မူကား ဤလောကကြီးမှာ အလွန်ကျယ်ပြောလှရာ ဤကျင့်စဉ်မှာ ချင်းချန်ဂိုဏ်းတစ်ခုတည်းတွင်သာ ရှိနေသည်ဟု မည်သူက အာမခံနိုင်ပါမည်နည်း ။ အခြားနေရာများတွင်လည်း မိတ္တူများ ရှိနေနိုင်သည် မဟုတ်ပါလော ။

အရေးကြီးဆုံးအချက်မှာ သူသည် ကျင့်စဉ်ကို ခဏမျှသာ ကောက်ယူကြည့်ရှုခဲ့ခြင်းဖြစ်ရာ မည်သည့်အချိန်တွင် ခိုးယူသင်ကြားနိုင်ပါမည်နည်း ။

ချန်ချင်းအနေဖြင့် အမှန်အတိုင်းပြောလိုလျှင်ပင် လူတိုင်းက သူ့ကို ယုံကြည်ကြမည်မဟုတ်ပေ ။

"ကောင်းပါပြီ ၊ ဒါဆိုရင် ကျင့်ကြံဖို့အတွက် လေ့ကျင့်ရေးခန်းမကို ကြွပါ သခင်လေးချန်" လီစီဖန်၏ ဆိုလိုရင်းမှာ ရိုးရှင်းပါသည် ၊ ချန်ချင်းအနေဖြင့် ကိုးကမ္ဘာလျှပ်စီးပညာကို အပြင်သို့ ယူဆောင်သွား၍မရဘဲ ကျင့်စဉ်နန်းဆောင်အတွင်းရှိ လေ့ကျင့်ရေးခန်းမတွင်သာ မိမိအလိုရှိသရွေ့ ကျင့်ကြံနိုင်မည်ဖြစ်သည် ။

"ရပါတယ် ၊ အကြီးအကဲလီ လမ်းပြပေးပါ" ချန်ချင်း ခေါင်းညိတ်လိုက်သည် ။ ချင်းချန်ဂိုဏ်း၏ လေ့ကျင့်ရေးခန်းမကို အသုံးပြုကာ မိမိမှတ်သားထားသော တိအဆင့်ကျင့်စဉ်ပေါင်းများစွာနှင့် ဤကောင်းကင်အဆင့်ကျင့်စဉ်သုံးခုကို အပြီးတိုင် စိတ်ကြိုက်ပေါင်းစပ်ပြီး မိမိအပိုင်ဖြစ်အောင် ပြုလုပ်ရန် အခွင့်အရေးကောင်းပင် ဖြစ်သည် ။

ချန်ချင်းနှင့် ရှယွီချင်းတို့ စတုတ္ထထပ်မှ ဆင်းလာသည်ကို မြင်သောအခါ ရှယွီချင်းက အမြန်ရှေ့သို့ တိုးလာသည် ။

သူမသည် 'ကြာပန်းကိုးခုကျမ်း' ဟုခေါ်သော တိအဆင့်အလတ်စားကျင့်စဉ်ကို ကောက်ယူလိုက်ပြီး လီစီဖန်အား ပြောလိုက်သည် ။ "အကြီးအကဲလီ ၊ ကျွန်မ ရွေးချယ်လိုက်တဲ့ကျင့်စဉ်က ဒါပါပဲ"

"မင်းသမီးနဲ့ သခင်လေးချန်တို့ ကျွန်တော့်နောက်ကနေ လေ့ကျင့်ရေးခန်းမကို လိုက်ခဲ့ကြပါ" လီစီဖန်က လက်ကိုမြှောက်၍ ဖိတ်ခေါ်လိုက်သည် ။

"ကောင်းပါပြီ"

လမ်းခုလတ်တွင် ။

'ကြာပန်းကိုးခုကျမ်းလား'

ချန်ချင်းသည် ရှယွီချင်းလက်ထဲရှိ ကျင့်စဉ်ကို တစ်ချက်ကြည့်လိုက်သည် ။ ဤကျင့်စဉ်မှာ ရေခဲဓာတ်ဖြစ်ပြီး စုစုပေါင်း ကိုးဆင့်ရှိကာ မိမိ၏ဝိညာဉ်စွမ်းအားကို ကြီးမားသော ရေခဲကြာပန်းအဖြစ် ပြောင်းလဲနိုင်ကြောင်း သူ ရှင်းလင်းစွာ မှတ်မိနေသည် ။ အဆင့်တက်လေလေ ရေခဲကြာပန်း၏ အရွယ်အစားမှာ ဆတိုးကြီးမားလာလေလေ ဖြစ်သည် ။

အကယ်၍ ကိုးဆင့်မြောက် မဟာပြီးပြည့်စုံခြင်းအဆင့်အထိ ကျင့်ကြံနိုင်ပါက ရေခဲကြာပန်းတစ်ပွင့်တည်းနှင့်ပင် မိုင်ပေါင်းထောင်ချီကို ချက်ချင်းခဲသွားစေနိုင်ပြီး သက်ရှိသန်းပေါင်းများစွာကို အရှင်လတ်လတ် မြေမြှုပ်ပစ်နိုင်ပေသည် ။

၎င်းမှာ ရှယွီချင်း ကျင့်ကြံရန် တကယ်ပင် သင့်တော်သော ကျင့်စဉ်ဖြစ်သည် ။

'ငါ့မိန်းမက အမြင် တကယ်ရှိတာပဲ'

ချန်ချင်း သူမကို အလွန်ချီးကျူးမိသည် ။

သို့သော်လည်း သူ၏လက်ထဲရှိ ဆန်းကြယ်ရေခဲအနုပညာနှင့် နှိုင်းယှဉ်ပါက ကြာပန်းကိုးခုကျမ်းမှာ များစွာ နိမ့်ကျနေပါသေးသည် ။

ထို့နောက် လီစီဖန်၏ လမ်းပြမှုဖြင့် သူတို့နှစ်ဦးမှာ သီးခြားလေ့ကျင့်ရေးခန်းမများအတွင်းသို့ အသီးသီး ဝင်ရောက်သွားကြတော့သည် ။

လီစီဖန်မှာမူ တစ်ဖဝါးမှမခွာဘဲ တံခါးအပြင်ဘက်တွင် စောင့်ကြပ်နေသည် ။

【ဇနီးကို အလိုလိုက်ခြင်း အောင်မြင်သည် ။ အိမ်ရှင်အတွက် ကျပန်းဆုလာဘ် ရရှိသည့်အတွက် ဂုဏ်ယူပါသည် ။ နှစ်တစ်သောင်းသက်တမ်းရှိ ဝိညာဉ်အိမ်မွေးတိရစ္ဆာန် : ငရဲနဂါး +၁ ။ မှတ်ချက် - ဝိညာဉ်အိမ်မွေးတိရစ္ဆာန်သည် အိမ်ရှင်အပေါ် ၁၀၀ ရာခိုင်နှုန်း သစ္စာရှိပြီး တစ်သက်တာလုံး ပေါင်းစည်းထားကာ သစ္စာဖောက်မည်မဟုတ်ပါ ။ အကြွင်းမဲ့ နာခံမှု ရှိပါသည် ။】

"ဘယ်... ဘယ်လောက်လဲ"

ချန်ချင်းမှာ ဇနီးသည်နှင့် လေ့ကျင့်ရေးခန်းမတစ်ခုတည်းတွင် အတူမရှိသဖြင့် ဆန်းကြယ်ရေခဲအနုပညာကို ချက်ချင်းမပေးနိုင်ကာ ဆုလာဘ်မရနိုင်တော့ဟု နောင်တရလုနီးပါး ဖြစ်နေချိန်တွင် ဖြစ်သည် ။

ရှယွီချင်းအား တိအဆင့်အလတ်စားကျင့်စဉ် ရရှိရန် ကူညီပေးခြင်းကြောင့် ရရှိလာသော ဆုလာဘ်ကို မြင်လိုက်ရသည့်အခါ သူ ချက်ချင်းပင် မှင်တက်သွားတော့သည် ။

"နှစ်တစ်သောင်းသက်တမ်းရှိ ဝိညာဉ်အိမ်မွေးတိရစ္ဆာန်"

ချန်ချင်း အကြိမ်ကြိမ် အတည်ပြုကြည့်သည် ၊ သူ အမှန်တကယ်ပင် အဖတ်မမှားခဲ့ပါ ၊ ၎င်းမှာ နှစ်တစ်သောင်းသက်တမ်းရှိ ဝိညာဉ်အိမ်မွေးတိရစ္ဆာန် အစစ်အမှန်ပင် ဖြစ်သည် ။

'ငါ မှတ်မိသလောက်ဆိုရင် နှစ်တစ်ထောင်သက်တမ်းရှိတဲ့ မိစ္ဆာသားရဲတစ်ကောင်က မြို့တစ်မြို့ကို သုတ်သင်နိုင်ပြီး နှစ်တစ်သောင်းသက်တမ်းရှိတဲ့ မိစ္ဆာသားရဲက နိုင်ငံတစ်ခုကိုတောင် ဖျက်ဆီးနိုင်တယ် ။ အခုက နှစ်တစ်သောင်းသက်တမ်းရှိ ဝိညာဉ်အိမ်မွေးတိရစ္ဆာန် ၊ ပြီးတော့ ငရဲနဂါးမျိုးနွယ်စုက ဖြစ်နေတာ...'

အရာရာကို လွယ်ကူစွာရနေသော ချန်ချင်းပင်လျှင် သူ၏စိတ်ကူးဉာဏ်မှာ အကန့်အသတ်ဖြစ်သွားရသည် ။

"လောကကြီးကို ဖျက်ဆီးနိုင်ခြင်း" ဆိုသည့် စကားလုံးမှာ သူ၏စိတ်ထဲသို့ ချက်ချင်းပေါ်လာသည် ။

"ဒီစနစ်က ငါ့ကို တကယ်ပဲ အံ့သြစရာတွေ ပေးနိုင်တာပဲ"

မိမိ၏အင်အားမှာ များစွာတိုးတက်လာသဖြင့် ချန်ချင်းမှာ အတိုင်းထက်အလွန် ဝမ်းသာနေတော့သည် ။

"ဟူး... ဟား... ဟူး..." သူသည် အသက်ကို ပြင်းပြင်းရှူလိုက်ပြီး စိတ်လှုပ်ရှားမှုများကို တည်ငြိမ်အောင် ထိန်းလိုက်သည် ။

ချန်ချင်း တင်ပျဉ်ခွေထိုင်လိုက်ပြီး အချိန်မဆွဲတော့ရန် ဆုံးဖြတ်လိုက်သည် ။ ဦးစွာ တိအဆင့်ကျင့်စဉ်ပေါင်းများစွာနှင့် ကောင်းကင်အဆင့်ကျင့်စဉ်သုံးခုကို မဟာပြီးပြည့်စုံခြင်းအဆင့်အထိ အမြန်ဆုံး နားလည်သဘောပေါက်အောင် အရင်ပြုလုပ်မည်ဖြစ်သည် ။

တစ်ဖက်တွင်လည်း ရှယွီချင်းမှာ ကျင့်စဉ်ဖော်ပြချက်အတိုင်း ကြာပန်းကိုးခုကျမ်းကို ကြိုးစားပမ်းစား ကျင့်ကြံနေတော့သည်... ။

အချိန်များ တဖြည်းဖြည်း ကုန်ဆုံးသွားသည်နှင့်အမျှ ။

ချန်ချင်းနှင့် ရှယွီချင်းတို့ ထိပ်တန်းပါရမီများ နိုးထလာသည့်သတင်းမှာ တောမီးကဲ့သို့ ပျံ့နှံ့သွားတော့သည် ။

ကောင်းကင်လျှို့ဝှက်ချက်နန်းဆောင်နှင့် ဇာတ်ကြောင်းသိသူများ၏ ပါးစပ်မှတစ်ဆင့် ဝူမင်းဆက်တစ်ခုလုံးနှင့် အင်အားစုအသီးသီးသို့ ပျံ့နှံ့သွားခဲ့သည် ။

ဤအထဲတွင် ဝူဧကရာဇ် ရှချန်းလည်း အပါအဝင်ဖြစ်သည် ။

"မင်း... ငါ့ကို နောက်တစ်ခါ ပြန်ပြောစမ်း ၊ ရှယွီချင်းမှာ ဘယ်လို ဝိညာဉ်အမြုတေပါရမီ ရှိတာလဲ" ရှချန်းသည် စာပွဲရှေ့ရှိ လျှို့ဝှက်အေးဂျင့်ကို မျက်လုံးပြူးကြည့်ကာ အကြိမ်ကြိမ် အတည်ပြုမေးမြန်းနေသည် ။

"အရှင်မင်းကြီးကို တင်ပြပါတယ် ၊ မင်းသမီးလေးက ချင်းချန်ဂိုဏ်းမှာ ပါရမီနိုးထခြင်းကို သွားရောက်လုပ်ဆောင်ခဲ့ပါတယ် ။ စမ်းသပ်ကျောက်တုံးမှာ 'ကောင်းကင်အဆင့်အထွတ်အထိပ် ရေခဲဝိညာဉ်အမြုတေ' လို့ ပြနေပါတယ်" ဤသည်မှာ လျှို့ဝှက်အေးဂျင့်အနေဖြင့် ထိုအဖြေကိုပင် စတုတ္ထအကြိမ်မြောက် ထပ်ခါတလဲလဲ ပြောနေခြင်းဖြစ်သည် ။

"ကောင်းကင်အဆင့်အထွတ်အထိပ် ရေခဲဝိညာဉ်အမြုတေ ၊ ကောင်းတယ် ၊ ကောင်းတယ် ။ ငါ့ရဲ့အဖိုးတန်သမီးလေးက နှစ်ပေါင်းတစ်ရာ ၊ မဟုတ်ဘူး နှစ်ပေါင်းတစ်ထောင်မှာ တစ်ယောက်ပေါ်ခဲတဲ့ တုနှိုင်းမဲ့ပါရမီရှင် ဖြစ်နေလိမ့်မယ်လို့ ထင်မထားခဲ့ဘူး" ရှချန်း၏ မျက်နှာတွင် ဝမ်းသာပီတိများ အထင်အသား ပေါ်လွင်နေသည် ။

သူသည် နိုင်ငံတော်ဆရာကြီး ရှောင်ဟဲဘက်သို့ လှည့်ကြည့်ကာ မေးလိုက်သည် ။ "ဆရာကြီး ၊ ချန်မိသားစုနဲ့ ရှယွီချင်းတို့ရဲ့ လက်ထပ်ပွဲကို ငါ ဒီလောက်စောစော သဘောမတူခဲ့သင့်ဘူးလို့ ထင်လား"

ချန်ချင်းက တစ်ညတည်းနှင့် တောင်ပံနတ်နန်းဂိုဏ်းကို အမြစ်ပြတ်ချေမှုန်းနိုင်ခဲ့ခြင်းမှာ အံ့သြစရာကောင်းသော်လည်း ဤကောင်းကင်အဆင့်အထွတ်အထိပ် ဝိညာဉ်အမြုတေဆိုသည်မှာ အနာဂတ်တွင် သေချာပေါက် အထွတ်အထိပ်ပညာရှင် ဖြစ်လာမည့် အလားအလာကို ကိုယ်စားပြုနေသည် မဟုတ်ပါလော ။

"ဒါက..." ရှောင်ဟဲအနေဖြင့် မည်သည့်ဘက်ကိုမှ မထိခိုက်စေမည့် အဖြေကို စဉ်းစားနေစဉ်မှာပင် ။

နန်းရင်ပြင်တွင် ဒူးထောက်နေသော လျှို့ဝှက်အေးဂျင့်က ထပ်မံတင်ပြလိုက်သည် ။ "အရှင်မင်းကြီးကို တင်ပြပါတယ် ၊ တော်ဝင်သမက် ချန်ချင်းကလည်း ပါရမီနိုးထခြင်းမှာ ပါဝင်ခဲ့ပါတယ်"

"သူက ပါရမီစမ်းသပ်ပြီးသား မဟုတ်ဘူးလား ။ ငါမှတ်မိသလောက်ဆိုရင် တိအဆင့်ပဲလေ ဟုတ်တယ်မလား" ရှချန်းမှာ အနည်းငယ် ဝေခွဲမရဖြစ်သွားပြီး ရှောင်ဟဲကို ကြည့်လိုက်သည် ။

ချန်ချင်းသည် မိမိ၏ပါရမီကို ဖြုန်းတီးပြီး တစ်နေ့လုံး ကာမဂုဏ်၌သာ ပျော်ပါးနေသည်ဟု သူ မကြာခဏဆိုသလို ဆူပူကြိမ်းမောင်းခဲ့ဖူးသဖြင့် ဤအချက်ကို သူ ရှင်းလင်းစွာ မှတ်မိနေသည် ။

ရှောင်ဟဲက လက်အုပ်ချီကာ ပြောလိုက်သည် ။ "အရှင်မင်းကြီး မှတ်မိတာ မှန်ပါတယ် ။ တော်ဝင်သမက်ဟာ တကယ်ပဲ တိအဆင့်အလတ်စား ရေဝိညာဉ်အမြုတေ ပိုင်ဆိုင်ထားတာပါ"

"အရှင်မင်းကြီးကို တင်ပြပါတယ် ၊ တော်ဝင်သမက် စမ်းသပ်ပြီးတဲ့နောက်မှာတော့ စမ်းသပ်ကျောက်တုံးက 'ကောင်းကင်အဆင့်အထွတ်အထိပ် လျှပ်စီးဝိညာဉ်အမြုတေ' လို့ ပြနေပါတယ်" လျှို့ဝှက်အေးဂျင့်က အမှန်အတိုင်း တင်ပြလိုက်သည် ။

"လျှပ်စီး ၊ လျှပ်စီး ဝိညာဉ်အမြုတေ ။ ကောင်းကင်အဆင့်အထွတ်အထိပ်" ရှချန်းသည် နဂါးပလ္လင်ပေါ်မှ ချက်ချင်း ထရပ်လိုက်တော့သည် ။

ရှောင်ဟဲ၏ မျက်နှာအမူအရာမှာလည်း မယုံကြည်နိုင်လောက်အောင် ပြောင်းလဲသွားသည် ။

"သတင်းက တကယ်မှန်ရဲ့လား" ရှချန်း အကြိမ်ကြိမ် အတည်ပြုသည် ။

"ဒီလက်အောက်ငယ်သားက အသက်နဲ့လဲပြီး အာမခံပါတယ် ၊ စကားလုံးတိုင်းဟာ အမှန်တွေပါ" လျှို့ဝှက်အေးဂျင့်က သူ၏ရပ်တည်ချက်ကို ဖော်ပြလိုက်သည် ။

"ကောင်းပြီ ၊ မင်း အရင်ထွက်သွားလို့ရပြီ" ရှချန်း လက်ဝှေ့ယမ်းလိုက်သည် ။

"ဟုတ်ကဲ့ပါ ၊ လက်အောက်ငယ်သား နှုတ်ထွက်ခွင့်ပြုပါဦး"

လျှို့ဝှက်အေးဂျင့် ထွက်သွားပြီးနောက် ရှချန်း၏ အကြည့်မှာ ရှောင်ဟဲထံသို့ ပြန်ရောက်လာသည် ။ "ဆရာကြီး ၊ ကျုပ်ကို ပြောပြစမ်းပါ ၊ ဘာကြောင့် တိအဆင့်အလတ်စား ဝိညာဉ်အမြုတေကနေ ရုတ်တရက် ကောင်းကင်အဆင့်အထွတ်အထိပ် ၊ ပြီးတော့ ပိုပြီး ရှားပါးတဲ့ လျှပ်စီးဓာတ် ဝိညာဉ်အမြုတေအဖြစ် ပြောင်းလဲသွားရတာလဲ"

ရှချန်းအနေဖြင့် ဤအချက်ကို မည်သို့မျှ နားမလည်နိုင်ပေ ။

"အရှင်မင်းကြီး ၊ ကျွန်တော်မျိုး ရှေးဟောင်းကျမ်းစာတစ်စုံမှာ ဝိညာဉ်အမြုတေ နှစ်မျိုး ပိုင်ဆိုင်ထားတဲ့ ပါရမီရှင်တစ်ယောက်အကြောင်း ဖတ်ဖူးပါတယ် ၊ သူက ဝိညာဉ်အမြုတေ နှစ်မျိုးလုံးကို တစ်ပြိုင်နက် ကျင့်ကြံနိုင်ပါတယ်" ရှောင်ဟဲက ပြန်လည်အမှတ်ရကာ ပြောလိုက်သည် ။

"ဝိညာဉ်အမြုတေ နှစ်မျိုး ။ ဆိုလိုတာက သူဟာ တိအဆင့်အလတ်စား ရေဝိညာဉ်အမြုတေတင်မကဘဲ ကောင်းကင်အဆင့်အထွတ်အထိပ် လျှပ်စီးဝိညာဉ်အမြုတေကိုပါ ပိုင်ဆိုင်ထားတာပေါ့"

ရှောင်ဟဲ၏စကားကို နားလည်သွားသော ရှချန်းမှာ ပါးစပ်အဟောင်းသား ဖြစ်သွားရသည် ။

ဗဟုသုတ ကြွယ်ဝလှသည်ဟု မိမိကိုယ်ကို ယူဆထားသော သူပင်လျှင် ထိပ်တန်းကျင့်ကြံခြင်းပါရမီ နှစ်မျိုးလုံး ပိုင်ဆိုင်ထားသော ချန်ချင်း၏ အနာဂတ်မှာ မည်မျှအထိ ထိတ်လန့်စရာကောင်းမည်ကို စိတ်ကူးကြည့်ရန်ပင် ခက်ခဲနေတော့သည် ။

"ကျုပ်တို့က သူ့ကို အထင်သေးခဲ့မိတာပဲ ။ သူက ရှယွီချင်းနဲ့ လက်ထပ်လို့ ကံကောင်းတာမဟုတ်ဘဲ ရှယွီချင်းကသာ သူ့ကို လက်ထပ်ရတာ ပိုပြီး ကံကောင်းနေတာပဲ..."

ရှချန်းအနေဖြင့် ဤအမှန်တရားကို လက်ခံရန်မှတစ်ပါး အခြားမရှိတော့ပေ ။

သူတို့နှစ်ဦးကို ခွဲခွာစေရန် မည်သည့်အတွေးမျှ မဝင်ရဲတော့ပေ ။

မိမိ အိုမင်းသွားပြီဖြစ်ကြောင်း သူ ဝန်ခံလိုက်ရသည် ။

သူသည် သက်ပြင်းချလိုက်သည် ။ "ဒီနောက်ပိုင်း မျိုးဆက်သစ်တွေကတော့ တကယ်ကို ပါရမီရှင်တွေ ပိုများလာတာပဲ"

...

ချင်းချန်ဂိုဏ်းသို့ ပြန်သွားလျှင် ။

ဤအချိန်တွင် လေ့ကျင့်ရေးကွင်း၌ ပြင်းထန်စွာ တိုက်ခိုက်နေကြသော တပည့်များ ၊ အပျင်းတစ်နေကြသော တပည့်များ ၊ သို့မဟုတ် ဆရာမမြင်သည့်အချိန်တွင် ဝါးတောထဲ၌ ချစ်တင်းနှောနေကြသော တပည့်များပင် ဖြစ်စေဦးတော့... ။

အားလုံးမှာ ချွင်းချက်မရှိဘဲ လုပ်လက်စများကို ရပ်တန့်ကာ ကောင်းကင်ယံသို့ မော့ကြည့်လိုက်ကြသည် ။

သူတို့သည် ကောင်းကင်ယံတွင် နေမင်းကိုပင် ကွယ်သွားစေလောက်အောင် ကြီးမားလှသော ပျံသန်းနေသည့် သင်္ဘောကြီးများကို မြင်တွေ့လိုက်ကြရလေသည် ။