အခန်း (၂၉) ဧကရီ ဖြစ်လာမည့်လမ်းကို ကြိုတင်စတင်ခြင်းလား

"ဇနီးလေး ၊ မင်းကိုယ်လေးက တကယ်မွှေးတာပဲ ၊ ဘယ်လို အမွှေးအိတ်မျိုး သုံးတာလဲ" ချန်ချင်းသည် သူ၏ နှာခေါင်းကို ရှယွီချင်း၏ လည်တိုင်နားသို့ တိုးကပ်လိုက်ပြီး ရုတ်တရက် မေးမြန်းလိုက်သည် ။

"ကျွန်မကြောင့် ရှင် နိုးသွားတာလား" ရှယွီချင်းက ပြန်လည်မေးခွန်းထုတ်လိုက်သည် ။

"ဇနီးလေး ၊ ကိုယ့်ကိုယ်ကိုယ် အပြစ်တင်ဖို့ မလိုပါဘူး" ချန်ချင်းက ရှင်းပြသည် ။ "ကိုယ်က တခြားသူတွေထက် အိပ်ပျော်လွယ်တယ် ၊ ဒါကြောင့် အကြာကြီး အိပ်စက်ဖို့ မလိုဘူးလေ"

ဤစကားကို ကြားရသောအခါ ရှယွီချင်းမှာ စိတ်သက်သာရာ ရသွားသည် ၊ မိမိ၏ လှုပ်ရှားမှုလေးများကြောင့် ချန်ချင်း နိုးသွားသည်ဟု သူမ ထင်မှတ်နေခဲ့ခြင်း ဖြစ်သည် ။

"ဇနီးလေးက ကိုယ့်မေးခွန်းကို မဖြေရသေးဘူးနော်" ချန်ချင်းက ယခင်အကြောင်းအရာကို ဆက်ပြောသည် ။

"ကျွန်မ ဘယ်အမွှေးအိတ်မှ မသုံးပါဘူး" ရှယွီချင်းက ငြင်းဆိုလိုက်သည် ။

"အမွှေးအိတ် မသုံးဘူးလား ၊ ဒါဆိုရင် ဒါက မင်းရဲ့ ကိုယ်သင်းနံ့ပေါ့ ၊ ဒါကြောင့်မို့လို့ ဒီလောက် မွှေးနေတာကိုး"

"ယားတယ် ၊ လိုက်ပြီး နမ်းမနေနဲ့တော့" ရှယွီချင်းမှာ ထူးဆန်းသော ခံစားချက်ကြောင့် တွန့်လိမ်သွားသည် ။

ချန်ချင်းက ထိုနေရာတွင်ပင် ရပ်တန့်လိုက်ပြီးနောက် ပြောလိုက်သည် ။ "ဇနီးလေးရဲ့ ကိုယ်သင်းနံ့ကတော့ လိပ်ပြာတွေ ထွက်ပေါ်လာမယ့် ရာသီရောက်ရင် သူတို့တွေ ဝတ်ရည်တောင် မစုပ်ဘဲ မင်းနားမှာပဲ ဝိုင်းနေကြတော့မှာ စိုးရတယ်"

"ရှင်ပြောသလောက်လည်း မပိုပါဘူး" ထိုသို့ ပြောလိုက်သော်လည်း ရှယွီချင်းက သေချာစဉ်းစားကြည့်သည် ။ အမှန်စင်စစ် ထိုရာသီရောက်လျှင် လိပ်ပြာများသည် သူမ၏ ဘေးနားတွင် ဝဲပျံနေတတ်ပြီး သူမအပေါ်တွင် နားလေ့ရှိပေသည် ။

အပြန်အလှန် စကားအနည်းငယ် ပြောဆိုပြီးနောက် ရှယွီချင်းသည် ချန်ချင်းဘက်သို့ လှည့်လိုက်သည် ။

နီးကပ်သော အကွာအဝေးတွင် မျက်လုံးချင်း ဆုံမိသောအခါ ရှယွီချင်းမှာ ချန်ချင်း၏ အကြည့်အောက်တွင် ရှက်ရွံ့တုံ့ဆိုင်းသွားရသည် ။

"ဘာဖြစ်လို့လဲ ဇနီးလေး" ချန်ချင်းက ဘာမှမသိသလို ဟန်ဆောင်၍ မေးမြန်းလိုက်သည် ။

ရှယွီချင်းသည် စိတ်ကို တည်ငြိမ်အောင် ထိန်းလိုက်ပြီး အတည်အပေါက် ဟန်ဆောင်ကာ အကြောင်းအရာ ပြောင်း၍ လေးနက်စွာ ပြောလိုက်သည် ။ "ခင်ပွန်း ၊ ရှင်နဲ့ ဆွေးနွေးချင်တာ တစ်ခုရှိတယ်"

"ဇနီးလေး ၊ အားမနာဘဲ ပြောပါ ၊ ဇနီးလေးနဲ့ ပတ်သက်တာမှန်သမျှ ဒီခင်ပွန်းက အစွမ်းကုန် လုပ်ဆောင်ပေးပါ့မယ်" ချန်ချင်း၏ သဘောထားမှာ ပြတ်သားလှပေသည် ။

ဤစကားကို ကြားရသောအခါ ရှယွီချင်း၏ ရင်ထဲတွင် မလွဲမသွေ တုန်လှုပ်သွားရသည် ။ ချန်ချင်း၏ သူမအပေါ် ထားရှိသော စိတ်ရင်းစေတနာကောင်းကို ရှယွီချင်း အမှန်တကယ် ခံစားလိုက်ရသည် ။

"အမှန်အတိုင်း ပြောရရင် ခင်ပွန်း ၊ ကျွန်မလည်း ကျင့်ကြံချင်တယ်" လွန်ခဲ့သော ရက်အနည်းငယ်အတွင်း ဖြစ်ပျက်ခဲ့သည့် အဖြစ်အပျက်များကို ကြုံတွေ့ပြီးနောက် ရှယွီချင်း၏ ကျင့်ကြံလိုစိတ်မှာ ပိုမိုပြင်းပြပြီး ပြတ်သားလာခဲ့သည် ။

အထူးသဖြင့် ချန်ချင်းနှင့် တောင်ပံနတ်နန်းဂိုဏ်းတို့၏ တိုက်ပွဲကို မြင်တွေ့ခဲ့ရပြီးနောက် သန်မာသူကိုသာ အလေးထားသော ဤခေတ်ကာလတွင် ရပ်တည်နိုင်ရန် နောက်ခံအင်အားနှင့် ဉာဏ်ပညာရှိရုံမျှဖြင့် မလုံလောက်ဘဲ မိမိကိုယ်တိုင် သန်မာနေမှသာ ဖြစ်မည်ဟူသော အချက်ကို ရှယွီချင်း ပိုမိုရှင်းလင်းစွာ သဘောပေါက်သွားခဲ့သည် ။

ရှယွီချင်းမှာ ငယ်စဉ်ကတည်းက အလိုလိုက် ခံခဲ့ရသူ ဖြစ်ပြီး ဧကရာဇ်မင်းမြတ်ကလည်း သူမအား အထူးအလေးပေးကာ သတ်ဖြတ်တိုက်ခိုက်ခြင်းများတွင် ပါဝင်စေလိုခြင်း မရှိပေ ။ ထို့ကြောင့် သူမသည် ကျင့်ကြံခြင်းနှင့် ပတ်သက်သော ကိစ္စရပ်များကို လုံးဝ ထိတွေ့ဖူးခြင်း မရှိခဲ့ပေ ။

ကျင့်ကြံခြင်းကို ထားဦး ၊ ရှယွီချင်းသည် သူမ၏ ပါရမီကိုပင် စမ်းသပ်ဖူးခြင်း မရှိဘဲ ဝိညာဉ်အမြုတေ ရှိမရှိကိုပင် မသိရှိပေ ။

ထို့ကြောင့် သူမသည် ချန်ချင်းအား သူမ၏ ဝိညာဉ်အမြုတေ ပါရမီကို စမ်းသပ်ပေးရန် တောင်းဆိုလိုခြင်း ဖြစ်သည် ။

'ဒါက သူမရဲ့ အနာဂတ်မှာ ကောင်းကင်ဘုံ ကံကြမ္မာ ဧကရီ အဖြစ် နန်းတက်ဖို့အတွက် လမ်းခင်းပေးနေတာလား'

ချန်ချင်းက စိတ်ထဲမှ တွေးတောလိုက်ရင်း နှုတ်မှမူ "ပြဿနာ မရှိပါဘူး" ဟု သဘောတူလိုက်သည် ။

"ကျေးဇူးတင်ပါတယ် ခင်ပွန်း" ရှယွီချင်းမှာ ဝမ်းသာအားရ ပြုံးလိုက်သည် ။

"ဒါပေမဲ့..." ချန်ချင်းက စကားကို ရပ်လိုက်ပြီး သူမအား တမင်တကာ ရင်ခုန်အောင် ပြုလုပ်လိုက်သည် ။

"ဒါပေမဲ့ ဘာဖြစ်လို့လဲ" ရှယွီချင်း၏ အပြုံးများ ပျောက်ကွယ်သွားပြီး ဇဝေဇဝါဖြင့် မေးလိုက်သည် ။

"အကယ်၍ ဇနီးလေးက နှစ်ပေါင်းသန်းချီမှ တစ်ယောက်ပေါ်တဲ့ ကျင့်ကြံခြင်း ပါရမီရှင် ဖြစ်နေပြီး အနာဂတ်မှာ ကိုယ့်ထက် ကျင့်ကြံခြင်းအဆင့် မြင့်သွားရင် ဒီခင်ပွန်းကို ရက်ရက်စက်စက် စွန့်ပစ်သွားမှာ မဟုတ်ဘူးမလား"

ချန်ချင်း၏ သနားစရာကောင်းပြီး မခံချင်စရာကောင်းသော အမူအရာကို မြင်သောအခါ ရှယွီချင်းမှာ သူ ဟန်ဆောင်နေခြင်းဖြစ်ကြောင်း ကောင်းကောင်း သိသဖြင့် ရယ်ချင်စိတ်ကို မနည်းအောင့်ထားရသည် ။

အဓိကမှာ သူမသည် မနေ့ညကပင် ချန်ချင်း၏ တစ်ကိုယ်တည်း ဂိုဏ်းတစ်ခုလုံးကို အာဏာပြ ချေမှုန်းခဲ့သည်ကို ကိုယ်တိုင် မြင်တွေ့ခဲ့ရပြီး ယခုအမူအရာနှင့်မှာ ကွာခြားချက် ကြီးမားလွန်းနေသောကြောင့် ဖြစ်သည် ။

မသိသူများဆိုလျှင် ချန်ချင်းမှာ အန္တရာယ်ကင်းပြီး သနားစရာကောင်းသော လူငယ်လေးတစ်ယောက်ဟု အမှန်တကယ် ထင်မြင်သွားနိုင်ပေသည် ။

"အကယ်၍ ခင်ပွန်းက ကျွန်မကို မယုံဘူးဆိုရင် ရှယွီချင်း အနေနဲ့ ကျိန်ဆိုရဲပါတယ် ၊ အကယ်၍ အနာဂတ်မှာ ခင်ပွန်းအပေါ် သစ္စာဖောက်တဲ့ ကိစ္စတစ်ခုခု လုပ်မိရင် မိုးကြိုးငါးချက် ပစ်ချခြင်း ခံရပါစေ..."

"ဟေး" ဤသည်ကို မြင်သောအခါ ချန်ချင်းသည် သူ၏ လက်ချောင်းလေးဖြင့် ရှယွီချင်း၏ နှုတ်ခမ်းပါးလေးကို ညင်သာစွာ ဖိလိုက်ပြီး ပြုံးလိုက်သည် ။ "ဇနီးလေးမှာ ဒီလို စိတ်ထားရှိတာနဲ့တင် ဒီခင်ပွန်းအတွက် လုံလောက်ပါပြီ ၊ ဒီလို အဆိပ်သင့်စေမယ့် ကျိန်ဆိုမှုတွေ လုပ်ဖို့ မလိုပါဘူး"

ထို့နောက် ချန်ချင်းနှင့် ရှယွီချင်းတို့သည် အိပ်ရာမှ အသီးသီး ထလိုက်ကြသည် ။

【ဇနီးကို အလိုလိုက်ခြင်း အောင်မြင်သည် ။ အိမ်ရှင်အတွက် ကျပန်းဆုလာဘ် ရရှိသည့်အတွက် ဂုဏ်ယူပါသည် ။ စတုတ္ထအဆင့် အလှအပဆေးလုံး အလုံး ၅၀】

ချန်ချင်းသည် ဆုလာဘ်များ ရယူရန် ဤအခွင့်အရေးကို လက်လွတ်ခံမည် မဟုတ်ပေ ၊ ထို့ကြောင့် ရှယွီချင်းအား အင်္ကျီလဲလှယ်ရာတွင် ကိုယ်တိုင် ကူညီပေးလိုက်သည် ။

ရှယွီချင်းကလည်း ချန်ချင်းအား အင်္ကျီလဲလှယ်ရာတွင် ပြန်လည်ကူညီပေးသည် ၊ ကွာခြားချက်မှာ သူမတွင် စနစ်မရှိသဖြင့် ခင်ပွန်းကို အလိုလိုက်ခြင်း ဆုလာဘ်များကို မရရှိနိုင်ခြင်းပင် ဖြစ်သည် ။

"ဇနီးလေး ၊ ကိုယ် ရုတ်တရက် သတိရလိုက်တယ် ၊ အရင်က အလှအပဆေးလုံး တစ်ပုလင်း မတော်တဆ ရထားတာ ရှိတယ် ၊ မင်း စိတ်ဝင်စားမလားလို့" ချန်ချင်းက မေးလိုက်သည် ။

'အလှအပဆေးလုံး'

ရှယွီချင်းသည် ဤဆေးလုံးမှာ မည်မျှ အဖိုးတန်ကြောင်း ကောင်းကောင်း သိသည် ။ ၎င်းမှာ နန်းတွင်းရှိ မိဖုရားများ လုယက်လိုကြသော ရတနာဖြစ်ပြီး ရွှေတစ်ထောင် ပေးလျှင်ပင် ရှာရခက်လှသော အရာဖြစ်သည် ။

ရှယွီချင်း မှတ်မိသလောက်ဆိုလျှင် ပထမအဆင့် အလှအပဆေးလုံး တစ်လုံးသည် နုပျိုမှုကို တစ်နှစ်တာ ထိန်းသိမ်းပေးနိုင်ပြီး လေလံတင်လျှင် အနည်းဆုံး ဝိညာဉ်ကျောက်တုံး သောင်းချီ တန်ကြေးရှိပေသည် ။

ဒုတိယအဆင့် အလှအပဆေးလုံးမှာ ပို၍ပင် ရှားပါးပြီး ဆေးဆရာ၏ ဆေးဖော်စပ်မှု စွမ်းရည်ကို စမ်းသပ်ရုံသာမက ဆေးဖော်စပ်သည့် ပစ္စည်းများမှာလည်း ရှားပါးပြီး ရှာရခက်လှသည် ။ ၎င်းကို သောက်သုံးပြီးနောက် နုပျိုမှုကို ငါးနှစ်တိုင် ထိန်းသိမ်းပေးနိုင်ကာ အသက် ရှစ်ဆယ် ကိုးဆယ်အရွယ်ရှိသူ၏ အရေပြားကိုပင် ပြန်လည် နုပျိုလန်းဆန်းစေနိုင်သည် ။

"အကယ်၍ ခင်ပွန်းမှာ ပိုနေတဲ့ အလှအပဆေးလုံးတွေ ရှိရင်..." ရှယွီချင်းက စကားတစ်ဝက်ဖြင့် ဆက်ပြောရန် ရှက်နေမိသည် ။

အမျိုးသမီးတစ်ဦးအနေဖြင့် သူမသည်လည်း ထာဝရ နုပျိုနေလိုသည်မှာ သဘာဝပင် ဖြစ်သည် ။

ချန်ချင်းသည် စနစ်ကျောပိုးအိတ်ထဲမှ လတ်လတ်ဆတ်ဆတ် ရရှိထားသော အဖြူရောင် ကျောက်စိမ်းပုလင်းထဲရှိ အလှအပဆေးလုံးများကို ချက်ချင်း ထုတ်ယူလိုက်သည် ။

သူသည် ၎င်းတို့ကို ရှယွီချင်းအား အကုန်လုံး ပေးလိုက်သည် ။

ချန်ချင်း၏ မသေနိုင်သော ခန္ဓာကိုယ်တွင် ထာဝရ နုပျိုခြင်း ပါဝင်ပြီးသား ဖြစ်သဖြင့် ဤဆေးလုံးများကို သူ မလိုအပ်ပေ ။

၎င်းတို့ကို ပေးလိုက်ခြင်းဖြင့် ဇနီးသည်ကို အလိုလိုက်ခြင်း ဆုလာဘ်များကို ရယူကာ ပိုမိုအားကောင်းသော မှော်ရတနာများနှင့် လဲလှယ်ခြင်းက ပို၍ ကောင်းမွန်ပေသည် ။

ရှယွီချင်းသည် အလှအပဆေးလုံး ပုလင်းကို လက်နှစ်ဖက်ဖြင့် ဂရုတစိုက် ယူလိုက်ပြီး ဖွင့်ကြည့်လိုက်ရာ အနည်းဆုံး အလုံး သုံးဆယ် လေးဆယ်ခန့် ရှိနေသည်ကို မြင်သောအခါ အံ့အားသင့်စွာ ရေရွတ်လိုက်သည် ။ "ဒီလောက်တောင် များတာလား"

"ခင်ပွန်း ၊ ဒီအလှအပဆေးလုံးတွေက ဘယ်နှစ်ဆင့်လဲလို့ မေးလို့ရမလား" ရှယွီချင်းက ချန်ချင်းကို မော့ကြည့်လိုက်သည် ။

"စတုတ္ထအဆင့်" ချန်ချင်းက ပြန်လည်ဖြေကြားသည် ။

"စတုတ္ထအဆင့်" ရှယွီချင်းမှာ လွန်စွာ တုန်လှုပ်သွားသဖြင့် လက်ကလေးများ တုန်ယင်သွားကာ ဆေးပုလင်းမှာ လွတ်ကျလုနီးပါး ဖြစ်သွားသော်လည်း ကံကောင်းထောက်မစွာဖြင့် အချိန်မီ ပြန်ဖမ်းလိုက်နိုင်သည် ။

ရှယွီချင်းက စိတ်ထဲမှ အကြမ်းဖျင်း တွက်ချက်ကြည့်သည် ၊ စတုတ္ထအဆင့် အလှအပဆေးလုံး တစ်လုံးတည်းပင် အနည်းဆုံး အဆင့်မြင့် ဝိညာဉ်ကျောက်တုံး တစ်သိန်း တန်ကြေးရှိပြီး နုပျိုမှုကို နှစ်ပေါင်း တစ်ရာတိုင် ထိန်းသိမ်းပေးနိုင်သည် ။

မြို့တော်ရှိ လေလံရုံများတွင်ပင် ထိုဆေးလုံးမျိုးကို မြင်တွေ့ရရန် မလွယ်ကူပေ ။

ထို့နောက် သူမသည် ဤဆေးလုံးများကို အလွယ်တကူ ထုတ်ပေးနိုင်သော ချန်ချင်းကို ကြည့်လိုက်သည်...။

'မနေ့ညက ဖြစ်ပျက်ခဲ့သမျှဟာ သူပိုင်ဆိုင်တဲ့ အရာတွေရဲ့ အစွန်းအဖျားလေးပဲ ရှိသေးတာပဲ'

ရှယွီချင်းသည် ချန်ချင်း မည်မျှအထိ သန်မာနေသည်ကို ဆက်လက် မတွေးရဲတော့ပေ ၊ အဘယ်ကြောင့်ဆိုသော် ၎င်းမှာ သူမ၏ စိတ်ကူးယဉ်နိုင်မှု နယ်ပယ်ကို ကျော်လွန်နေပြီ ဖြစ်သောကြောင့် ဖြစ်သည် ။

"ရှယွီချင်း အတွက် တစ်လုံးပဲ လိုအပ်ပါတယ် ၊ ကျန်တာတွေကိုတော့..."

ရှယွီချင်း၏ စကားကို ချန်ချင်းက ကြားဖြတ်ပြောလိုက်သည် ။ "အကယ်၍ ဇနီးလေးက ကိုယ့်ကို ခင်ပွန်းတစ်ယောက် ၊ မိသားစုဝင် တစ်ယောက်အနေနဲ့ တကယ် သတ်မှတ်တယ်ဆိုရင် အားလုံးကို လက်ခံပေးပါ"

နောက်နေတာလား ။ ဇနီးကို အလိုလိုက်ခြင်း ဆုလာဘ်က လက်တစ်ကမ်းမှာ ရှိနေတာကို ချန်ချင်းအနေနဲ့ ဘယ်လိုလုပ်ပြီး လက်လွတ်ခံနိုင်မှာလဲ ။

"ဒါ... ဒါဆိုရင်လည်း ကောင်းပါပြီလေ" ချန်ချင်းက ဤမျှအထိ ပြောလာသဖြင့် ရှယွီချင်းအနေဖြင့် လက်ခံရန်သာ တတ်နိုင်တော့သည် ။

သူမသည် ဦးစွာ အလှအပဆေးလုံး တစ်လုံးကို ထုတ်ယူကာ သောက်သုံးလိုက်ရာ နှစ်ပေါင်းတစ်ရာ နုပျိုမှုကို ရရှိသွားခဲ့သည် ။

ထို့နောက် သူမက ချန်ချင်းကို မေးလိုက်သည် ။ "ခင်ပွန်း ၊ ရှင်ကော တစ်လုံးလောက် သောက်မလား"

"မလိုပါဘူး ၊ ဒီအလှအပဆေးလုံးတွေ အားလုံးက ဇနီးလေး တစ်ယောက်တည်း အတွက်ပဲ" ချန်ချင်းက ယဉ်ကျေးစွာ ငြင်းဆိုလိုက်သည် ။

အကယ်၍ တစ်လုံး လျော့သွားပါက နောက်ထပ် သူရရှိမည့် ဇနီးကို အလိုလိုက်ခြင်း ဆုလာဘ်၏ အရည်အသွေးနှင့် ပမာဏမှာ လျော့နည်းသွားနိုင်ပေသည် ။

ရှယွီချင်းကလည်း ချန်ချင်းသည် ဤဆေးလုံးများကို ယခင်ကတည်းက သောက်သုံးပြီးသား ဖြစ်လိမ့်မည်ဟု တွေးကာ ထပ်မံ၍ တိုက်တွန်းခြင်း မပြုတော့ပေ ။

ရှယွီချင်းက အလှအပဆေးလုံးများကို သူမ၏ ဟင်းလင်းပြင်လက်စွပ်ထဲသို့ ထည့်လိုက်သည်ကို မြင်သောအခါ ။

ချန်ချင်းသည် စနစ်မျက်နှာပြင်ကို စိတ်အားထက်သန်စွာ ဖွင့်လိုက်ပြီး ဤစတုတ္ထအဆင့် ဆေးလုံး ၅၀ ကို ပေးလိုက်ခြင်းကြောင့် မည်သို့သော ဆုလာဘ်မျိုး ရရှိမည်ကို ကြည့်လိုက်သည် ။

စနစ်မျက်နှာပြင်မှာ သူ၏ မျက်စိရှေ့တွင် ပွင့်လာသည် ။

စာသားတစ်ကြောင်း အလိုအလျောက် ပေါ်ထွက်လာသည် ။

【ဇနီးကို အလိုလိုက်ခြင်း အောင်မြင်သည် ။ အိမ်ရှင်အတွက် ကျပန်းဆုလာဘ် ရရှိသည့်အတွက် ဂုဏ်ယူပါသည် ။ ကောင်းကင်အဆင့် အဆင့်မြင့်ရှိ လျှပ်စီး ဝိညာဉ်အမြုတေ +၁】 ။