အခန်း (၂၇) သန့်စင်သော ခန္ဓာကိုယ်

အမှန်အတိုင်း ပြောရလျှင် လူဝူယန့် ၊ တောင်ပံနတ်နန်းဂိုဏ်း ဘိုးဘေးနှင့် အခြားသူများမှာ ရှယွီချင်းကိုပါ သတ်ပစ်လိုကြသည့်အတွက် ချန်ချင်းအနေဖြင့် သူတို့ကို ကျေးဇူးတင်ရပေမည် ။

မဟုတ်ပါက ချန်ချင်းအနေဖြင့် ထိုလူများကို သတ်လိုက်ရုံမျှဖြင့် ဇနီးသည်ကို အလိုလိုက်ခြင်း ဆုလာဘ်အား ရရှိနိုင်မည် မဟုတ်ပေ ။

ချန်ချင်းသည် နောက်ထပ် စနစ်သတိပေးချက်ကို ကြည့်ရန် နှိပ်လိုက်သည် ။

"ဇနီးကို အလိုလိုက်ခြင်း အောင်မြင်သည် ။ အိမ်ရှင်အတွက် ကျပန်းဆုလာဘ် ရရှိသည့်အတွက် ဂုဏ်ယူပါသည် ။ သောင်းချီသော ဓားသခင် သန့်စင်သော ခန္ဓာကိုယ် +၁"

သန့်စင်သော ခန္ဓာကိုယ် ဟုတ်လား ။

ချန်ချင်း မှတ်မိသလောက်ဆိုလျှင် ဤလောကတွင် ထူးခြားသော ခန္ဓာကိုယ် အမျိုးအစားပေါင်း သုံးထောင် ရှိပေသည် ။ ထိုအထဲမှ တစ်ခုကို ပိုင်ဆိုင်ထားရုံဖြင့် ပါရမီရှင်များထဲမှ ပါရမီရှင် ဖြစ်လာနိုင်ပြီး ခန္ဓာကိုယ် ကြံ့ခိုင်မှုမှာ သူတစ်ပါးထက် သာလွန်ရုံသာမက ကျင့်ကြံခြင်း အရှိန်ကိုလည်း မြှင့်တင်ပေးကာ စွမ်းအားကြီးသော ပါရမီများကိုလည်း ပိုင်ဆိုင်စေနိုင်သည်...။

သန့်စင်သော ခန္ဓာကိုယ် ဆိုသည်မှာ ထိုခန္ဓာကိုယ် အမျိုးအစား သုံးထောင်ထဲတွင် ထိပ်တန်း အဆင့် တစ်ရာအတွင်းရှိသော စွမ်းအားကြီးမားလှသည့် အမျိုးအစား ဖြစ်သည် ။

ချန်ချင်းသည် စိတ်ထဲမှ မနေနိုင်ဘဲ မေးမြန်းလိုက်သည် ။ "စနစ် ၊ ဒီ သောင်းချီသော ဓားသခင် သန့်စင်တဲ့ ခန္ဓာကိုယ်က ခန္ဓာကိုယ် အမျိုးအစား သုံးထောင်ထဲမှာ ဘယ်အဆင့် ရှိသလဲ"

စနစ်က ချက်ချင်းပင် ပြန်လည်ဖြေကြားသည် ။ "အိမ်ရှင်ကို တင်ပြရလျှင် သောင်းချီသော ဓားသခင် သန့်စင်သော ခန္ဓာကိုယ်သည် ခန္ဓာကိုယ် အမျိုးအစား သုံးထောင်စာရင်းတွင် အဆင့် (၁၇) ရှိပါသည် ။ ၎င်းသည် ဓားကျင့်ကြံသူများအတွက် အကောင်းဆုံးသော သန့်စင်သော ခန္ဓာကိုယ် ဖြစ်ပါသည်"

'အဆင့် (၁၇) တောင်လား ၊ ဓားကျင့်ကြံသူတွေအတွက် အကောင်းဆုံး သန့်စင်တဲ့ ခန္ဓာကိုယ်ပဲ'

စနစ်၏ အဖြေကို ကြားရသောအခါ ချန်ချင်းသည် တံတွေးကို ခက်ခဲစွာ မျိုချလိုက်မိပြီး ရင်ထဲတွင် ဝမ်းသာပီတိများ လျှံတက်လာတော့သည် ။

ယခုမူ ဇာတ်လိုက်ကို ရင်ဆိုင်ရန် သူ၏ အသာစီးရမှုမှာ နောက်ထပ် အမှတ်တစ်ခု တိုးလာခဲ့ပြီ ဖြစ်သည် ။

သူသည် ကျင့်ကြံခြင်းကို မြှင့်တင်ရန် သောင်းချီသော ဓားသခင် သန့်စင်သော ခန္ဓာကိုယ်ကို အသုံးပြုရန် မစောင့်နိုင်အောင် ဖြစ်နေသည် ။ ယခု သူပိုင်ဆိုင်ထားသော ထိတ်လန့်ဖွယ် ကောင်းလှသည့် ဉာဏ်အလင်းပွင့်မှု စွမ်းအားနှင့် ဆိုလျှင် အားစိုက်မှု တစ်ဝက်ဖြင့် ရလဒ် နှစ်ဆ ရရှိမည်မှာ သေချာလှပေသည် ။

ဤသို့ တွေးတောရင်း ချန်ချင်းသည် စနစ်မျက်နှာပြင်ကို ပိတ်လိုက်ပြီး ချန်အိမ်တော်သို့ ပိုမိုမြန်ဆန်သော အရှိန်ဖြင့် ပြန်လာခဲ့သည် ။

ချန်ချင်း အရှိန်မြှင့်လိုက်သည်ကို သိရှိသဖြင့် ရှယွီချင်းသည် သူ့ကို ပိုမိုတင်းကျပ်စွာ ဖက်တွယ်ထားပြီး ခေါင်းကို သူ၏ ရင်ခွင်ထဲသို့ နက်နက်ရှိုင်းရှိုင်း တိုးဝင်ထားလေသည် ။

ချန်ချင်းသည် လမ်းတစ်လျှောက် ပြင်းထန်သော လေတိုက်နှုန်းကြောင့် ရှယွီချင်း၏ ဦးခေါင်း မထိခိုက်စေရန် သူ၏ လက်မောင်းဖြင့် ကာကွယ်ပေးထားလိုက်သည် ။

"..." ဤသည်ကို သတိပြုမိသောအခါ ရှယွီချင်း၏ နှုတ်ခမ်းထက်တွင် ချိုမြိန်သော အပြုံးတစ်ခု ပေါ်လာတော့သည် ။

တစ်ချိန်တည်းမှာပင် ချန်ချင်းသည် တစ်ချက်ခုတ် နှစ်ချက်ပြတ် ဖြစ်ကာ သူအလိုရှိသော အရာကို ရရှိခဲ့သည် ။

"ဇနီးကို အလိုလိုက်ခြင်း အောင်မြင်သည် ။ အိမ်ရှင်အတွက် ကျပန်းဆုလာဘ် ရရှိသည့်အတွက် ဂုဏ်ယူပါသည် ။ အဆင့်ငါး ကောင်းကင်ယွမ်ဆေးလုံး အလုံး ၅၀"

...

တစ်ချိန်တည်းမှာပင် ။

မည်သူမည်ဝါဖြစ်ကြောင်း မသိရသော စွမ်းအားကြီး ပညာရှင် သို့မဟုတ် အင်အားစုတစ်ခုက တောင်ပံနတ်နန်းဂိုဏ်းအား အမြစ်ပြတ် ချေမှုန်းလိုက်ကြောင်း သတင်းမှာ သတင်းပေးများမှတစ်ဆင့် အရေးကြီး ပုဂ္ဂိုလ်များစွာ၏ နားထဲသို့ ပျံ့နှံ့သွားခဲ့သည် ။

ထိုအထဲတွင် ဝူမင်းဆက်၏ ဧကရာဇ် ရှချန်းလည်း အပါအဝင် ဖြစ်သည် ။

"မင်း... မင်း ဘာပြောလိုက်တာလဲ ၊ တောင်ပံနတ်နန်းဂိုဏ်း အသတ်ခံလိုက်ရတယ် ဟုတ်လား" ရှချန်းသည် ဤသတင်းကို ကြားလိုက်ရသောအခါ တုန်လှုပ်သွားပြီး နဂါးပလ္လင်ပေါ်မှ ချက်ချင်း ထရပ်လိုက်သည် ။

"အရှင်မင်းကြီးကို တင်ပြပါတယ် ၊ အစေခံအနိမ့်ဆုံးကနေ အကြီးအကဲတွေ ၊ ဂိုဏ်းချုပ်နဲ့ တောင်ပံနတ်နန်းဂိုဏ်း ဘိုးဘေးအထိ တစ်ဂိုဏ်းလုံးက လူတစ်သောင်းကျော်ဟာ ချွင်းချက်မရှိဘဲ ခေါင်းနဲ့ ကိုယ် တခြားစီ ဖြစ်ပြီး သေဆုံးသွားခဲ့ကြပါတယ်" လျှို့ဝှက်အေးဂျင့်က ပိုမိုအသေးစိတ်ကျစွာ တင်ပြလိုက်သည် ။

ရှချန်းသည် တုံ့ဆိုင်းနေပြီး လက်ကို မြှောက်လိုက် ချလိုက် လုပ်နေကာ နဂါးပလ္လင်ပေါ်သို့ ဖြည်းညှင်းစွာ ပြန်ထိုင်လိုက်သည် ။

ခဏမျှ စဉ်းစားပြီးနောက် ဤကိစ္စ၏ နောက်ကွယ်တွင် မည်သူ ရှိနေသည်ကို သူ ခန့်မှန်းရမခက်ပေ ။

"သူပဲ ဖြစ်ရမယ်"

လျှို့ဝှက်အေးဂျင့်၏ ထူးဆန်းသော အကြည့်ကို သတိပြုမိသဖြင့် ရှချန်းက လက်ဝှေ့ယမ်းလိုက်သည် ။

"ဒီလက်အောက်ငယ်သား နှုတ်ထွက်ခွင့်ပြုပါဦး" လျှို့ဝှက်အေးဂျင့်မှာ ချက်ချင်းပင် ပျောက်ကွယ်သွားတော့သည် ။

"တို့တွေအားလုံး သူ့ကို အထင်သေးခဲ့ကြတာပဲ" ရှချန်းက ဘေးနားရှိ နိုင်ငံတော်ဆရာကြီး ရှောင်ဟဲအား ပြောလိုက်သည် ။

ရှောင်ဟဲမှာ ငေးမှိုင်နေဆဲ ဖြစ်ပြီး အတော်ကြာမှ သတိပြန်ဝင်လာကာ "မှန်ပါတယ်... မှန်ပါတယ်... တစ်ညတည်းနဲ့ ဂိုဏ်းတစ်ခုလုံးကို အမြစ်ပြတ်အောင် လုပ်နိုင်တဲ့ ဒီလိုနည်းလမ်းတွေက တကယ်ကို ထိတ်လန့်စရာ ကောင်းလှပါတယ်"

ရှချန်းအနေဖြင့် ချန်ချင်းကို အမြန်ဆုံး တိုက်ခိုက်ပြီး ပြဿနာကို အစကတည်းက နှိမ်နင်းပစ်ရန် သူ အစောပိုင်းက ပေးခဲ့သော အကြံပြုချက်ကို လက်မခံခဲ့သည်မှာ လွန်စွာ ကံကောင်းလှသည်ဟု ရှောင်ဟဲ တွေးမိသည် ။

မဟုတ်ပါက ဝူမင်းဆက်မှာ ရှမျိုးနွယ်စု၏ အုပ်ချုပ်မှုအောက်တွင် ရှိတော့မည် မဟုတ်သလို ဤအစီအစဉ်ကို ရေးဆွဲခဲ့သူဖြစ်သော သူ၏ ကံကြမ္မာမှာလည်း ခန့်မှန်းရ မခက်ပေ...။

"ဒီနေ့ကစပြီး တို့တွေ သူ့ရဲ့ ရန်သူ မဖြစ်စေရဘူး" ရှချန်းက ပြတ်သားစွာ ဆုံးဖြတ်လိုက်သည် ။

"အရှင်မင်းကြီး အမိန့်အတိုင်းပါ" ရှောင်ဟဲက ဦးညွှတ်လိုက်သည် ။

သူလည်း အပြည့်အဝ သဘောတူပေသည် ။

ထို့နောက် ရှချန်းသည် ဒုတိယမင်းသား ရှချေအား စာကြည့်ဆောင်သို့ ခေါ်ယူရန် တစ်စုံတစ်ယောက်ကို အမိန့်ပေးလိုက်သည် ။

ဤအချိန်တွင် ရှချေသည်လည်း တောင်ပံနတ်နန်းဂိုဏ်းတစ်ခုလုံး အသတ်ခံလိုက်ရကြောင်း သူ၏ လူယုံထံမှ သိရှိလိုက်ရပြီ ဖြစ်သည် ။

"ဘယ်လိုဖြစ်နိုင်မှာလဲ ၊ ဒါက ဘယ်လိုဖြစ်နိုင်မှာလဲ" ရှချေသည် သူ၏ အခန်းထဲတွင် အဖြေရှာမရဘဲ ဟိုဟိုဒီဒီ လျှောက်နေသည် ။

"ဘိုးဘေးကော ၊ တို့ တောင်ပံနတ်နန်းဂိုဏ်းရဲ့ ဘိုးဘေးကော ဘယ်လိုဖြစ်သွားလဲ" ရှချေက ရှေ့သို့ တိုးလာပြီး ထိုလူ၏ အင်္ကျီရင်ဘတ်ကို ဆွဲကိုင်ကာ အသည်းအသန် မေးမြန်းလိုက်သည် ။

"ဒုတိယမင်းသားကို တင်ပြပါတယ် ၊ တောင်ပံနတ်နန်းဂိုဏ်း ဘိုးဘေးရဲ့ အလောင်းဟာလည်း အဲဒီအထဲမှာ ပါဝင်ပါတယ်..."

ဤစကားကို ကြားလိုက်ရသောအခါ ရှချေ၏ ခန္ဓာကိုယ်မှာ ကြောက်လန့်တကြား ပျော့ခွေသွားပြီး ကုလားထိုင်ပေါ်သို့ လဲကျသွားကာ တစ်ခဏချင်းအတွင်းမှာပင် အိုမင်းသွားသလို ခံစားလိုက်ရသည် ။

တောင်ပံနတ်နန်းဂိုဏ်း၏ ထောက်ပံမှု မရှိဘဲ ပလ္လင်ကို လုယူရန် ကြိုးပမ်းမှုမှာ လွန်စွာ ခက်ခဲသွားပြီ ဖြစ်ကြောင်း သူ ကောင်းကောင်း သိသည် ။

ထိုစဉ် ပြင်ပမှ အသံတစ်ခု ထွက်ပေါ်လာသည် ။ "ဒုတိယမင်းသား ၊ အရှင်မင်းကြီးက စာကြည့်ဆောင်ကို လာဖို့ အမိန့်ရှိပါတယ်"

ရှချေက ထူးလိုက်ပြီး ထိုအထိန်းတော်နောက်သို့ နာကျင်စွာဖြင့် လိုက်ပါသွားခဲ့သည် ။

မကြာမီမှာပင် အထိန်းတော်က တံခါးဝ၌ စောင့်နေစဉ် ရှချေသည် စာကြည့်ဆောင်တံခါးကို တစ်ဦးတည်း တွန်းဖွင့်၍ ဝင်သွားခဲ့သည် ။

ညနက်သည်အထိ အစီရင်ခံစာများကို ဖတ်ရှုနေသော ရှချန်းကို သူ မြင်လိုက်ရသည် ။

"သားတော်က ခမည်းတော်ကို ဂါရဝပြုပါတယ်" ရှချေက ဦးညွှတ်လိုက်သည် ။

"ဒီနေ့ကစပြီး ချန်ချင်းကို ဒုက္ခပေးဖို့ ဘယ်သူ့ကိုမှ ထပ်မလွှတ်နဲ့တော့" ရှချန်းက ရှချေကို ကြည့်ပင် မကြည့်ဘဲ ပြောလိုက်သည် ။

"ခမည်းတော် ၊ ဘာကို ဆိုလိုတာလဲ ၊ သားတော် နားမလည်ပါဘူး" တောင်ပံနတ်နန်းဂိုဏ်း ပျက်စီးသွားသည့်အတွက် ရှချေမှာ အလွန် စိတ်ပျက်နေပြီ ဖြစ်သည် ။ ယခုကဲ့သို့ ညနက်သန်းခေါင်တွင် ခမည်းတော်က ခေါ်ယူပြီး သစ္စာဖောက်အရာရှိ၏ သားကို ရန်မမူရန် ပြောသည်မှာ သူ့ကို ပို၍ စိတ်အနှောင့်အယှက် ဖြစ်စေသည် ။

"ဒုန်း"

ရှချေသည် မိမိကိုယ်ကို မထိန်းချုပ်နိုင်ရုံသာမက ပြန်လည်မေးခွန်းထုတ်ရဲသည်ကို မြင်သောအခါ ရှချန်းက လက်ထဲရှိ စုတ်တံကို စားပွဲပေါ်သို့ အားဖြင့် ဆောင့်ချလိုက်သည် ။ "မင်းလို မိုက်မဲတဲ့သား ၊ တောင်ပံနတ်နန်းဂိုဏ်း တစ်ခုလုံး ပျက်စီးသွားတာကို မင်း မကျေနပ်သေးဘူးလား ၊ တို့ရဲ့ ရှမျိုးနွယ်စုကိုပါ သတ်ပစ်လိုက်မှ မင်း ပျော်မှာလား"

"တောင်ပံနတ်နန်းဂိုဏ်း ဟုတ်လား" ရှချေ၏ ဦးနှောက်က အလျင်အမြန် စဉ်းစားလိုက်ပြီးနောက် မျက်လုံးများ ပြူးကျယ်သွားကာ မဝံ့မရဲ မေးလိုက်သည် ။ "ခမည်းတော် ၊ ဆိုလိုတာက... တောင်ပံနတ်နန်းဂိုဏ်း ပျက်စီးသွားတာက ချန်မိသားစုနဲ့ ပတ်သက်နေတာလား"

ရှချန်း မဖြေကြားမီမှာပင် ရှချေက ချက်ချင်း ငြင်းဆိုလိုက်သည် ။ "ဘယ်... ဘယ်လိုဖြစ်နိုင်မှာလဲ ၊ ချန်မိသားစုက ဝူမင်းဆက်မှာ သြဇာအာဏာ ရှိတယ်ဆိုပေမဲ့ ဂိုဏ်းတစ်ခုလုံးကို ရင်ဆိုင်နိုင်လောက်အောင် မသန်မာပါဘူး ၊ တောင်ပံနတ်နန်းဂိုဏ်းကို ဖျက်ဆီးဖို့ဆိုတာ ပိုတောင် မဖြစ်နိုင်သေးတယ်"

"အဲဒီဂိုဏ်းကို ဖျက်ဆီးလိုက်တဲ့သူက ချန်ချင်းလို့ ပြောရင်ကော"

"..." ရှချန်း၏ စကားတစ်ခွန်းက ရှချေကို ဆွံ့အသွားစေသည် ။

ရှချန်းသည် ဤကဲ့သို့သော ကိစ္စမျိုးကို နောက်ပြောင်မည်ဟု သူ မယုံကြည်ပေ ။

"တော်ပြီ ၊ ဒီနေ့ကစပြီး မင်းရဲ့ အမှားတွေကို ပြန်လည်ဆင်ခြင်ဖို့ မင်းရဲ့ အိမ်တော်ထဲမှာပဲ တစ်နှစ်ပတ်လုံး ပိတ်ထားမယ် ၊ နန်းတော်ထဲကနေ မထွက်ရဘူး ၊ အကယ်၍ နောက်တစ်ကြိမ် မိုက်မဲစွာ ပြုမူဦးမယ်ဆိုရင် ငါတို့ရဲ့ သားအဖတော်စပ်မှုကို အမှုမထားဘဲ မင်းကို မျိုးနွယ်စုထဲကနေ နှင်ထုတ်ပစ်မယ်ဆိုတာ မင်းကို ငါ မညှာတော့ဘူး" ရှချန်းသည် နဖူးကို လက်တစ်ဖက်ဖြင့် ပွတ်ရင်း ကျန်လက်တစ်ဖက်ဖြင့် ရှချေကို အမြန်ထွက်သွားရန်နှင့် သူ့ကို ထပ်မံ ဒေါသမပွားစေရန် အမိန့်ပေးလိုက်သည် ။

ရှချေသည် တုံ့ဆိုင်းနေသော်လည်း ဤအချိန်တွင် ရှချန်းကို ဆန့်ကျင်လျှင် ရာထူးမှ ဖယ်ရှားခံရမည်ကို သိသောကြောင့် "သားတော် အမိန့်အတိုင်း လိုက်နာပါ့မယ်" ဟု ပြန်လည်ဖြေကြားလိုက်သည် ။

သူသည် လှည့်ထွက်သွားပြီး ငေးမှိုင်နေသော မျက်လုံးများဖြင့် မိမိတစ်ဦးတည်း ကြားနိုင်သော အသံဖြင့် ရေရွတ်နေသည် ။ "ဘယ်လိုဖြစ်နိုင်မှာလဲ... ဘယ်လိုဖြစ်နိုင်မှာလဲ..."

ရှချေ ထွက်သွားသည်ကို မြင်သော်လည်း ရှချန်းမှာ စိတ်မအေးနိုင်သေးဘဲ တင်းကျပ်စွာ စောင့်ကြည့်ရန်နှင့် တစ်စုံတစ်ခု မှားယွင်းပါက ကိုးဆက်သော ဆွေမျိုးများပါ အပြစ်ပေးခံရမည်ဟု ခြိမ်းခြောက်အမိန့်ပေးလိုက်သည် ။

ချန်အိမ်တော်သို့ ပြန်ရောက်သောအခါ ။

"ဇနီးကို အလိုလိုက်ခြင်း အောင်မြင်သည် ။ အိမ်ရှင်အတွက် ကျပန်းဆုလာဘ် ရရှိသည့်အတွက် ဂုဏ်ယူပါသည် ။ ဉာဏ်အလင်းပွင့်မှု စွမ်းအား +၅၀"

"ဇနီးကို အလိုလိုက်ခြင်း အောင်မြင်သည် ။ အိမ်ရှင်အတွက် ကျပန်းဆုလာဘ် ရရှိသည့်အတွက် ဂုဏ်ယူပါသည် ။ နတ်ဘုရား လှုပ်ရှားမှု အဆောင် ၁၀ ခု"

...

ချန်ချင်းသည် ရှယွီချင်းကို မျက်နှာသစ်ပေးခြင်းနှင့် အိပ်ရာထဲသို့ သိပ်ခြင်းတို့ကို ပြုလုပ်ပေးပြီးပြီ ဖြစ်သည် ။ ထိုလုပ်ငန်းစဉ်များမှတစ်ဆင့် လာမည့် ကျင့်ကြံခြင်းအတွက် လိုအပ်သော အရင်းအမြစ်များကို ဇနီးသည်အား အလိုလိုက်ခြင်း ဆုလာဘ်များမှ ရရှိခဲ့သည် ။

"ဘယ်ကို သွားမလို့လဲ" ချန်ချင်း လှည့်ထွက်သွားသည်ကို မြင်သောအခါ ရှယွီချင်းက မေးမြန်းလိုက်သည် ။

"အနီးအနားမှာ ကျင့်ကြံမလို့ပါ" ချန်ချင်းက ပြန်လည်ဖြေကြားသည် ။

ရှယွီချင်းက အင်းဟု အသိအမှတ်ပြုလိုက်သည် ။

ထို့နောက် ချန်ချင်းသည် မလှမ်းမကမ်းသို့ လျှောက်သွားကာ တင်ပျဉ်ခွေထိုင်ပြီး ချီများစုစည်းကာ ကျင့်ကြံခြင်းကို စတင်လိုက်သည်ကို သူမ မြင်တွေ့လိုက်ရသည် ။

ရှယွီချင်းသည် နားနားနေနေ နေရန် မျက်လုံးများကို ပိတ်လိုက်သည် ။

သူမ၏ မျက်တောင်များမှာ အနည်းငယ် တုန်ယင်နေသည် ။

ခဏအကြာတွင် သူမ၏ ပါးစပ်လေး အနည်းငယ် ဟသွားပြီး တိုးညှင်းစွာ ပြောလိုက်သည် ။ "အကယ်၍ ရှင် ပင်ပန်းနေရင်... အိပ်ရာပေါ်မှာ လာအိပ်ပါ" ။