အခန်း (၂၆) ဂိုဏ်းအား အမြစ်ပြတ်ချေမှုန်းခြင်း

မျက်စိတစ်မှိတ်အတွင်းမှာပင် အရိပ်ရုပ်သေးသောင်းချီ၍ ပေါ်ထွက်လာပြီး တောင်ပံနတ်နန်းဂိုဏ်း တပည့်များ၏ အထက်တွင် တည်ရှိနေကြရာ ထိုမြင်ကွင်းမှာ လွန်စွာ ခန့်ညားထည်ဝါလှပေသည် ။

ဤမြင်ကွင်းကို မြင်လိုက်ရသောအခါ ချန်ချင်းနှင့် ရှယွီချင်းတို့ကို နေရာ၌ပင် ကွပ်မျက်ရန် တောင်ပံနတ်နန်းဂိုဏ်း ဘိုးဘေးအား ဟစ်ကြွေးတောင်းဆိုနေကြသော တပည့်တစ်သိုက်မှာ ချက်ချင်းပင် ရေငုံနှုတ်ပိတ်သွားကြတော့သည် ။

သူတို့အားလုံးမှာ ပါးစပ်အဟောင်းသားနှင့် ဆွံ့အနားမလည်နိုင်အောင် ဖြစ်သွားကြပြီး တစ်ခွန်းမျှပင် မဟနိုင်တော့ဘဲ သင်္ချိုင်းကုန်းကဲ့သို့ တိတ်ဆိတ်သွားကာ အပ်ကျသံပင် ကြားရမတတ် ဖြစ်သွားရလေသည် ။

"..." ဂိုဏ်း၏ ဘိုးဘေးနှင့် ဂိုဏ်းချုပ်ပင် ဖြစ်လင့်ကစား သူတို့၏ မျက်နှာအမူအရာမှာ တပည့်များနည်းတူ မခြားမနားပင် ဖြစ်နေတော့သည် ။

"ဒါတွေက ဘာတွေလဲ" တောင်ပံနတ်နန်းဂိုဏ်း ဘိုးဘေးသည် အရိပ်ရုပ်သေးများနှင့် ပတ်သက်၍ ခိုင်မာသော နားလည်မှု မရှိပေ ။ သူသည် သတိဝင်လာပြီးနောက် ဘေးနားရှိ တောင်ပံနတ်နန်းဂိုဏ်းချုပ် လူဝူယန့်ဘက်သို့ လှည့်၍ မေးမြန်းလိုက်သည် ။

"တင်ပြပါတယ် ဘိုးဘေး ၊ ဒါတွေအားလုံးက ရုပ်သေးတွေလို့ ထင်ရပါတယ် ၊ ရုပ်သေးတစ်ရုပ်ချင်းစီရဲ့ အစွမ်းက..." လူဝူယန့်မှာ ဝေခွဲမရသလို တုံ့ဆိုင်းနေသည် ။

"ဘာနဲ့ တူတာလဲ ၊ မြန်မြန်ပြောစမ်း" ဤကဲ့သို့သော အချိန်တွင် လူဝူယန့်မှ မူနေသည်ကို မြင်သောအခါ ဘိုးဘေးမှာ စိတ်မရှည်စွာဖြင့် တိုက်တွန်းလိုက်သည် ။

"ဒီရုပ်သေးရဲ့ ကျင့်ကြံခြင်းအဆင့်က ဝိညာဉ်ဖြစ်ပေါ်ခြင်းအဆင့်နဲ့ ညီမျှပါတယ်..."

"ဒီရုပ်သေးရဲ့ ကျင့်ကြံခြင်းက ဝိညာဉ်ဖြစ်ပေါ်ခြင်းအဆင့် ကျင့်ကြံသူတစ်ယောက်နဲ့ ယှဉ်နိုင်တယ် ဟုတ်လား" လူဝူယန့် စကားမဆုံးခင်မှာပင် ဘိုးဘေးက အလျင်စလို ကြားဖြတ်ပြောလိုက်သည် ။

လူဝူယန့်က ခေါင်းယမ်းလိုက်ပြီး ပြင်ဆင်ပြောကြားလိုက်သည် ။ "ဝိညာဉ်ဖြစ်ပေါ်ခြင်းအဆင့် အထွတ်အထိပ်နဲ့ ယှဉ်နိုင်တာပါ"

"ဝိညာဉ်ဖြစ်ပေါ်ခြင်းအဆင့် အထွတ်အထိပ်" ဤစကားကို ကြားလိုက်ရသောအခါ ဘိုးဘေး၏ ခန္ဓာကိုယ်မှာ ယိုင်နဲ့သွားပြီး ဝေဟင်ထက်မှ ပြုတ်ကျလုနီးပါး ဖြစ်သွားရသည် ။

မိမိ၏ ကျင့်ကြံခြင်းမှာလည်း ဝိညာဉ်ဖြစ်ပေါ်ခြင်းအဆင့် အထွတ်အထိပ်သာ ရှိသေးကြောင်း သူ မေ့မထားပေ ၊ သို့သော် ချန်ချင်းက သူနှင့် အဆင့်တူသော ရုပ်သေးများကို သောင်းနှင့်ချီ၍ ချက်ချင်း ဆင့်ခေါ်နိုင်ခဲ့သည် ။

ဘိုးဘေးအနေဖြင့် နောက်ဆုံးအချိန်အထိ သူ၏ ဝိညာဉ်ချီများအားလုံးကို အသုံးပြု၍ တိုက်ခိုက်လျှင်ပင် အရိပ်ရုပ်သေး နှစ်ရုပ်ကို ပျက်စီးအောင် ပြုလုပ်နိုင်ရန် မသေချာပေ ။

အားကိုးရာမဲ့မှုနှင့် ကြောက်ရွံ့မှုတို့မှာ ဘိုးဘေး၏ တစ်ကိုယ်လုံးကို လျင်မြန်စွာ ဖုံးလွှမ်းသွားတော့သည် ။

ထိုခံစားချက်မှာ စကားဖြင့် ဖော်ပြ၍ မရနိုင်ပေ ။

ရှယွီချင်းဘက်သို့ ပြန်ကြည့်လျှင် ချန်ချင်းက သူမအား အရိပ်ရုပ်သေးများစွာ ရှိကြောင်း ကြိုတင်ပြောပြထားသော်လည်း "များစွာ" ဆိုသည်မှာ မိမိအလိုရှိသလို သောင်းနှင့်ချီ၍ ဆင့်ခေါ်နိုင်ခြင်းကို ဆိုလိုခြင်းဖြစ်ကြောင်း သူမ လုံးဝ ထင်မှတ်မထားခဲ့ပေ ။

ယခုမူ ရှယွီချင်း၏ ရင်ထဲမှ အပူထုပ်မှာ ကင်းစင်သွားပြီ ဖြစ်ပြီး ချန်ချင်းသည် အဘယ်ကြောင့် တောင်ပံနတ်နန်းဂိုဏ်း၏ အာဏာကို မကြောက်ဘဲ ဂိုဏ်းအား အမြစ်ပြတ်ချေမှုန်းပစ်မည်ဟု ပြောရဲရခြင်းကို နောက်ဆုံးတွင် နားလည်သွားခဲ့ပြီ ဖြစ်သည် ။

အကယ်၍ ရှယွီချင်းသာ ဤအရိပ်ရုပ်သေး တစ်သောင်းကို ပိုင်ဆိုင်ထားပါက သူမသည်လည်း ဤကဲ့သို့ ယုံကြည်မှု ရှိနေမည်သာ ဖြစ်သည် ။

တစ်ချိန်တည်းမှာပင် သူမ တစ်ခုကို နားလည်သွားသည် ၊ ဝူမင်းဆက်အတွက် တကယ့်ခြိမ်းခြောက်မှုမှာ အာဏာရှိဝန်ကြီးချုပ် ချန်ရှုန်း မဟုတ်သလို မြို့ပြင်ရှိ သံချပ်ကာမြင်းတပ် တစ်သိန်းလည်း မဟုတ်ဘဲ ချန်ချင်းသာ ဖြစ်နေသည် ။

ဤအရိပ်ရုပ်သေး သောင်းချီနှင့် နှိုင်းယှဉ်ပါက သူတို့မှာ သမုဒ္ဒရာထဲမှ ရေတစ်စက်မျှပင် မရှိကြောင်း ပြောလျှင် ပိုမည်မဟုတ်ပေ ။

ဤသည်ကို တွေးမိသောအခါ ရှယွီချင်းသည် ထိုစဉ်က ချန်ချင်းနှင့် လက်ထပ်ရန် သဘောတူခဲ့သည်မှာ ကံကောင်းလှသည်ဟု ရုတ်တရက် ခံစားလိုက်ရသည် ၊ မဟုတ်ပါက သူ စိတ်ဆိုးသွားလျှင် ဝူမင်းဆက်တစ်ခုလုံးတွင် သူ၏ အမျက်ဒေါသကို မည်သူ တောင့်ခံနိုင်မည်နည်း ။

ချန်ချင်းသာ သူမ၏ ခင်ပွန်းအဖြစ် ရှိနေပြီး သူသာ ပုန်ကန်ခြင်း မပြုပါက ဝူမင်းဆက်၏ ကြီးကျယ်သော ရည်မှန်းချက်နှင့် နှစ်ပေါင်းထောင်ချီ တည်တံ့ခိုင်မြဲမည့် သာယာဝပြောမှုမှာ မခက်ခဲတော့ကြောင်း သူမ ပို၍ ယုံကြည်သွားသည် ။

ဤအချက်ကို သဘောပေါက်သွားပြီးနောက် ရှယွီချင်း၏ ရင်ထဲတွင် အတင်းအဓမ္မ လက်ထပ်လိုက်ရခြင်းကြောင့် ဖြစ်ပေါ်နေသော နာကျည်းချက်နှင့် မကျေနပ်ချက် အကြွင်းအကျန်လေးများမှာ လေထဲတွင် ပျောက်ကွယ်သွားတော့သည် ။

ရှမျိုးနွယ်စု၏ အုပ်ချုပ်စိုးမိုးမှု ထာဝရ တည်တံ့စေရန် မိမိကိုယ်ကို စတေးလိုက်ရခြင်းမှာ တန်ပါသည် ၊ အလွန်တန်လှပါသည် ။

ထို့အပြင် ချန်ချင်းနှင့် လက်ထပ်ရခြင်းမှာ စတေးမှုတစ်ခုဟု ရှယွီချင်း မယူဆတော့ပေ ။

သူမ တွေးတောနေစဉ်မှာပင် ဘိုးဘေး၏ အသံမှာ မလှမ်းမကမ်းမှ ထွက်ပေါ်လာသည် ။ "ကျန်းဟန်က တောင်ပံနတ်နန်းဂိုဏ်း တစ်ခုလုံးကို ဦးဆောင်ပြီး စီနီယာ့ထံမှာ ခစားဖို့ ဆန္ဒရှိပါတယ် ၊ စီနီယာအနေနဲ့ ကရုဏာသက်ပြီး ကျွန်တော်တို့ကို အသက်ချမ်းသာခွင့် ပေးပါဦး"

ဘိုးဘေးကိုယ်တိုင် ဒူးထောက် အရှုံးပေးလိုက်သည်ကို မြင်သောအခါ အခွင့်အရေးသမား တပည့်များမှာလည်း အလိုအလျောက်ပင် လိုက်လုပ်ကြတော့သည် ။

"စီနီယာ ကရုဏာသက်ပြီး ကျွန်တော်တို့ကို အသက်ချမ်းသာခွင့် ပေးပါဦး"

"စီနီယာ ကရုဏာသက်ပြီး ကျွန်တော်တို့ကို အသက်ချမ်းသာခွင့် ပေးပါဦး"

...

ချန်ချင်းသည် ဤကဲ့သို့သော အခွင့်အရေးသမား အမူအကျင့်များကို အလွန်တရာ ရွံရှာပြီး တုံ့ပြန်ရန်ပင် ပျင်းရိနေသောကြောင့် စိတ်ထဲမှ သတ်ဖြတ်ရန် အမိန့်ပေးလိုက်သည် ။

အရိပ်ရုပ်သေး သောင်းချီတို့မှာ တစ္ဆေများကဲ့သို့ မှောင်ရိပ်ထဲမှ တိုးဝှေ့လာပြီး တောင်ပံနတ်နန်းဂိုဏ်း တပည့်သောင်းချီ၏ နောက်ကျောဘက်သို့ ချက်ချင်း ပေါ်လာကာ သူတို့၏ လက်ဝါးများကို ဓားသွားများအဖြစ် ပြောင်းလဲလိုက်ကြသည် ။

လက်တစ်ဖက်က ဆံပင်ရှည်များကို ဆွဲမလိုက်ပြီး ကျန်လက်တစ်ဖက်က လည်ချောင်းကို လှီးဖြတ်ကာ အားဖြင့် ဆွဲထုတ်လိုက်ရာ ဦးခေါင်းနှင့် ခန္ဓာကိုယ်မှာ ချက်ချင်းပင် တခြားစီ ဖြစ်သွားတော့သည် ။

ဂိုဏ်းချုပ်နှင့် အကြီးအကဲများ အပါအဝင် တောင်ပံနတ်နန်းဂိုဏ်း တပည့်သောင်းချီတို့မှာ အသက်တစ်ရှိုက်စာအတွင်းမှာပင် သေဆုံးကုန်ကြသည် ။

ထိုအချိန်မှစ၍ တောင်ပံနတ်နန်းဂိုဏ်းဟူသော အမည်မှာ ကွယ်ပျောက်သွားခဲ့ပြီ ဖြစ်သည် ။

ချန်ချင်းသည် အထောက်အထားများ ဖျောက်ဖျက်ခြင်း မပြုဘဲ အလောင်းအားလုံးကို ထိုနေရာ၌ပင် ထားရစ်ခဲ့ကာ မှောင်မိုက်သော ကမ္ဘာထဲသို့ ပျောက်ကွယ်သွားတော့သည် ။

သူသည် မိမိ၏ ရန်သူဖြစ်ရခြင်း၏ အကျိုးဆက်ကို လောကရှိ လူအားလုံး သိစေလိုသည် ။

ပုန်းကွယ်နေရန်လား ။

အဘယ်ကြောင့် ပုန်းကွယ်နေရမည်နည်း ။

ဇာတ်လိုက်မှာ ကျင့်ကြံနေဆဲ ဖြစ်ပြီး မိမိလက်ထဲတွင် မသေနိုင်သော ခန္ဓာကိုယ်နှင့် စနစ်ရှိနေသည် ၊ အနည်းငယ်မျှ မောက်မာခြင်း မရှိလျှင် ဤအဆင့်အတန်းနှင့် ထိုက်တန်ပါမည်လော ။

သူသည် သနားစရာကောင်းသော ဘဝကို ရှင်သန်ရန် ပြန်လည်မွေးဖွားလာခြင်း မဟုတ်ပေ ။

"ဟူး..." အညစ်အကြေး ချီများကို မှုတ်ထုတ်လိုက်ရင်း ချန်ချင်းက ရှယွီချင်း၏ ခါးကို ဖက်လိုက်ပြီး ပြောလိုက်သည် ။ "ဇနီးလေး ၊ အခု တောင်ပံနတ်နန်းဂိုဏ်း ပျက်စီးသွားပြီဆိုတော့ တို့တွေ ပြန်ပြီး အေးအေးဆေးဆေး နားနားနေနေ နေလို့ရပြီ"

"အင်း" ရှယွီချင်းသည် ချန်ချင်း၏ ဤကဲ့သို့ ရင်းနှီးသော ထိတွေ့မှုကို ကျင့်သားရနေပြီ ဖြစ်သောကြောင့် ရုန်းကန်ခြင်း မပြုတော့ပေ ။ ထို့ပြင် ပြုတ်မကျစေရန် သူ၏ ခန္ဓာကိုယ်ကို တက်ကြွစွာ ပြန်လည်ဖက်တွယ်ထားရာ အရာအားလုံးမှာ သဘာဝကျနေပေသည် ။

ချန်ချင်း သက်ပြင်းချရခြင်းမှာ လူအများအပြားကို သတ်ဖြတ်ပြီးနောက် စနစ်မှ မည်သို့သော ဆုလာဘ်များ ပေးမည်ကို အလွန် မျှော်လင့်နေသောကြောင့် ဖြစ်သည် ။

နဂါးထောင်ချောက်အစီအရင်ကို အသုံးချခဲ့သည့် အချိန်မှစ၍ ယခုအထိ အနီရောင်အစက်လေးများ မှိတ်တုတ်မှိတ်တုတ် ဖြစ်နေသော စနစ်မျက်နှာပြင်ကို စစ်ဆေးရန် အချိန်မရသေးပေ ။

ချန်ချင်းသည် အလွန်တရာ စိတ်လှုပ်ရှားစွာဖြင့် စနစ်မျက်နှာပြင်ကို ခေါ်ယူလိုက်သည် ။

"ဇနီးကို အလိုလိုက်ခြင်း အောင်မြင်သည် ။ အိမ်ရှင်အတွက် ကျပန်းဆုလာဘ် ရရှိသည့်အတွက် ဂုဏ်ယူပါသည် ။ တိအဆင့် အဆင့်နိမ့် စင်္ကြာခုနှစ်ခု ပျံလွှားဓားမြှောင် +၁"

'တိအဆင့် ဟုတ်လား'

ချန်ချင်း၏ မျက်နှာတွင် အံ့အားသင့်သော အရိပ်အယောင်များ ပေါ်လာသည် ၊ ထိုနဂါးမှာ တိအဆင့် လက်နက်တစ်ခုနှင့် တန်ကြေးရှိနေသည် ။

စူးစမ်းလိုစိတ်ဖြင့် ချန်ချင်းက အသေးစိတ်အချက်အလက်များကို ကြည့်လိုက်သည် ။

"စင်္ကြာခုနစ်ခု ပျံလွှားဓားမြှောင် - စိတ်စွမ်းအားဖြင့် ဓားမြှောင်ကို ထိန်းချုပ်နိုင်သည် ။ စိတ်စွမ်းအား ပိုမိုအားကောင်းလေ တိုက်ခိုက်မှုအကွာအဝေး ပိုမိုဝေးကွာလေ ဖြစ်သည် ။ မိုင်ပေါင်းထောင်ချီ ဝေးကွာသော ရန်သူကို သတ်ဖြတ်ခြင်းမှာ စိတ်ကူးတစ်ခုမျှသာ ဖြစ်သည် ။ မှတ်ချက် - စင်္ကြာခုနစ်ခု ပျံလွှားဓားမြှောင်သည် သွေးချီများကို ဝါးမျိုခြင်းဖြင့် အဆင့်မြှင့်တင်နိုင်သည် ။ ဓားမြှောင်ရှိ ကြယ်ပွင့်တစ်ပွင့် လင်းထိန်လာတိုင်း ခွဲထွက်နိုင်ပြီး နောက်ထပ် ပျံလွှားဓားမြှောင် တစ်လက်ကို ထိန်းချုပ်နိုင်မည် ဖြစ်သည်"

'သွေးချီဝါးမျိုပြီး အဆင့်မြှင့်တင်နိုင်တာလား'

မိမိ အဖတ်မမှားကြောင်း အတည်ပြုပြီးနောက် ချန်ချင်းသည် စင်္ကြာခုနစ်ခု ပျံလွှားဓားမြှောင်ကို အမြန်ထုတ်ယူလိုက်ပြီး နောက်ကွယ်ရှိ တောင်ပံနတ်နန်းဂိုဏ်း ရှိရာဘက်သို့ ဝှေ့ယမ်း ပစ်လွှတ်လိုက်သည် ။

ရှယွီချင်းသည် စူးစမ်းချင်သော်လည်း သူမသည် အလိုက်သိစွာဖြင့် မေးခွန်းများစွာ မမေးမြန်းပေ ။

ချန်ချင်းသည် သူမအား နာကျင်အောင် ပြုလုပ်မည်မဟုတ်ကြောင်းသာ သူမ သိထားရန် လိုအပ်သည် ။

သူတို့ သိကျွမ်းခဲ့သည်မှာ မကြာသေးသော်လည်း ရှယွီချင်းသည် ဤအချက်ကို ထူးထူးခြားခြား ယုံကြည်နေမိသည် ။

ခဏအကြာတွင် စင်္ကြာခုနစ်ခု ပျံလွှားဓားမြှောင်မှာ တောင်ပံနတ်နန်းဂိုဏ်း ပျက်စီးရာနေရာသို့ ရောက်ရှိသွားပြီး ဓားသွားမှာ မတ်တပ်အနေအထား ဖြစ်နေသည် ။

ချက်ချင်းဆိုသလိုပင် ရေစီးကြောင်းကဲ့သို့သော သွေးချီမြောက်မြားစွာမှာ ၎င်းထံသို့ စီးဝင်သွားပြီး စင်္ကြာခုနစ်ခု ပျံလွှားဓားမြှောင်၏ ဝါးမျိုခြင်းကို ခံလိုက်ရသည် ။

မြေပြင်ပေါ်ရှိ သွေးအားလုံးမှာ အငွေ့ပျံသွားပြီး အလောင်းများမှာလည်း မျက်ဝါးထင်ထင်ပင် ပိန်လှီသွားကာ အရေပြားနှင့် အရိုးသာ ကျန်တော့သည် ။

ထို့နောက် သွေးချီစုပ်ယူခြင်း ပြီးဆုံးသွားသော စင်္ကြာခုနစ်ခု ပျံလွှားဓားမြှောင်မှာ ချန်ချင်း၏ လက်ထဲသို့ ပြန်ရောက်လာသည် ။

ချန်ချင်းက ဓားရိုးကို ကိုင်ပြီး ဓားသွားကို ကြည့်လိုက်ရာ ကြယ်ပွင့်နှစ်ပွင့် လင်းထိန်နေပြီ ဖြစ်သည် ။

မူလက လင်းထိန်နေသော တစ်ပွင့်အပါအဝင် ဆိုပါက ချန်ချင်းသည် ယခုအခါ စင်္ကြာခုနစ်ခု ပျံလွှားဓားမြှောင် နှစ်လက်ကို တစ်ပြိုင်နက်တည်း စိတ်စွမ်းအားဖြင့် ထိန်းချုပ်နိုင်ပြီ ဖြစ်သည် ။

သူသည် ဤဆုလာဘ်ကို အလွန်ကျေနပ်မိသည် ။ သူသည် ၎င်းကို လွှတ်လိုက်ပြီး စနစ်ကျောပိုးအိတ်ထဲတွင် ခေတ္တ သိမ်းဆည်းလိုက်သည် ။

ယခုအချိန်သည် စင်္ကြာခုနစ်ခု ပျံလွှားဓားမြှောင်အတွက် အချိန်ဖြုန်းနေရမည့် အချိန်မဟုတ်ပေ ။

ချန်ချင်းတွင် ဖွင့်ရန် ကျန်ရှိနေသေးသော ကြီးကျယ်သော ဆုလာဘ်တစ်ခု ရှိသေးသည် ။

ဘိုးဘေးတစ်ယောက် ၊ ဂိုဏ်းချုပ်တစ်ယောက်နှင့် တောင်ပံနတ်နန်းဂိုဏ်း တပည့်သောင်းချီတို့ကြောင့် မည်သို့သော အရည်အသွေးရှိ ဆုလာဘ်မျိုး ရရှိမည်ကို သူ အလွန် မျှော်လင့်နေမိတော့သည် ။ ။