အခန်း ၂၄။ မင်းလည်း ထိုက်တန်လို့လား။

တောင်ပံနတ်နန်းဂိုဏ်း၊ ဂိုဏ်းခန်းမဆောင်။

"မကောင်းတော့ဘူး၊ မကောင်းတော့ဘူး" တပည့်တစ်ဦးသည် ခန်းမထဲသို့ လဲကျမတတ် ပြေးဝင်လာပြီး ကြမ်းပြင်ပေါ်တွင် မှောက်လျက်သား လဲကျသွားသည်။

"ဘာတွေ မကောင်းတာလဲ၊ ဘာလို့ ဒီလောက်တောင် ပျာယာခတ်နေရတာလဲ၊ ဒါက ဘယ်လို အမူအကျင့်မျိုးလဲ" ဂိုဏ်းချုပ် လူဝူယန့်က မကျေမနပ် ပြောလိုက်သည်။

သူ၏စိတ်ထဲတွင် ဂိုဏ်းချုပ်ဖြစ်သူ သူရှိနေသရွေ့ မည်မျှပင် ကြီးမားသောကိစ္စဖြစ်ပါစေ ကောင်းကင်ကြီး ပြိုကျနိုင်ပါမည်လောဟု တွေးတောနေမိသည်။

"ဂိုဏ်း... ဂိုဏ်းချုပ်ကို သတင်းပို့ပါတယ်၊ အကြီးအကဲ လင်းထျန်းကို ကူညီဖို့ သွားခဲ့တဲ့ မဟာအကြီးအကဲနဲ့ တခြားသူတွေအားလုံး... အားလုံး အသတ်ခံလိုက်ရပါပြီ"

ထိုတပည့် စကားပြောလိုက်သည်နှင့် တပြိုင်နက် ခုနက အေးဆေးတည်ငြိမ်နေသော လူဝူယန့်၏ မျက်နှာပေးမှာ သိသိသာသာ ပြောင်းလဲသွားကာ သူ၏ ဂိုဏ်းချုပ်ပလ္လင်ပေါ်မှ ထိတ်လန့်တကြား ထရပ်လိုက်ပြီး "မင်း... မင်း ဘာပြောလိုက်တာလဲ၊ အကြီးအကဲ လင်းနဲ့ တခြားသူတွေ အကုန်လုံး... အကုန်လုံး သေကုန်ပြီ ဟုတ်လား"

"ဂိုဏ်းချုပ်ကို ပြန်လည်ဖြေကြားရရင် ဒီကိစ္စကို ကျွန်တော်မျိုး ကိုယ်တိုင် မြင်တွေ့ခဲ့တာပါ၊ ဘယ်လိုမှ မမှားနိုင်ပါဘူး" ထို့နောက် ထိုတပည့်သည် ဖြစ်ပျက်ခဲ့သမျှ အဖြစ်အပျက် အစအဆုံးကို အကျဉ်းချုပ် တင်ပြလိုက်သည်။

"အဲဒီရုပ်သေးက တကယ်ပဲ ဝိညာဉ်ဖြစ်ပေါ်ခြင်းအဆင့် ကျင့်ကြံခြင်း ရှိတာလား" လက်နက်ပညာရှင်တစ်ဦး၏ အဆင့်အတန်းက မြင့်မားနေသရွေ့ သူတို့ ဖန်တီးထားသော ရုပ်သေးများသည် လူသားမျိုးနွယ် ကျင့်ကြံသူများထက် မနိမ့်ကျနိုင်ကြောင်း လူဝူယန့် ကြားဖူးထားသည်။

သို့သော် ဝိညာဉ်ဖြစ်ပေါ်ခြင်းအဆင့်နှင့် တူညီသော ခွန်အားရှိသည့်အပြင် ဂိုဏ်းအကြီးအကဲ ဒါဇင်ကျော်ကို တစ်ဖက်သတ် သတ်ဖြတ်နိုင်သော ရုပ်သေးမျိုးကိုမူ လူဝူယန့်တစ်ယောက် သူ၏ ဘဝသက်တမ်းတစ်လျှောက် တစ်ခါမျှ မကြုံဖူးခဲ့ပေ။

"ကောင်းပြီ၊ ငါကိုယ်တိုင် လှုပ်ရှားမှ ရတော့မယ် ထင်တယ်၊ ဝိညာဉ်ဖြစ်ပေါ်ခြင်းအဆင့်နဲ့ ညီမျှတဲ့ ရုပ်သေးတစ်ရုပ်ပဲ ရှိတာပါ၊ ဒီနေ့ သူတို့ကို ပြန်မသွားနိုင်အောင် ငါလုပ်ပြမယ်၊ အသက်တစ်ချောင်းအတွက် အသက်တစ်ချောင်းနဲ့ ပြန်ပေးဆပ်ရမယ်" လူဝူယန့်သည် ပြတ်သားသော အကြည့်များဖြင့် သူ၏ ထိုင်ခုံမှ ထရပ်လိုက်သည်။

"ဂိုဏ်းချုပ်ကို သတင်းပို့ပါတယ်၊ တစ်ရုပ်တည်း မဟုတ်ပါဘူး၊ ဒါဇင်ပေါင်းများစွာ ရှိနေတာပါ၊ ပြီးတော့ သူတို့က အရင်က မြို့တော်ကို သွားခဲ့တဲ့ တပည့်တွေရဲ့ ဦးခေါင်းတွေကိုလည်း သယ်လာကြပါတယ်" ဟု ထိုတပည့်က အလျင်အမြန် ဖြည့်စွက်ပြောလိုက်သည်။

"မင်း... ဘယ်နှစ်ရုပ်လို့ ပြောလိုက်တာလဲ" လူဝူယန့်၏ ခန္ဓာကိုယ်မှာ ယိုင်နဲ့သွားကာ သူ နားကြားမှားသလားဟုပင် သံသယဝင်သွားမိသည်။

"မဟာအကြီးအကဲနဲ့ တခြားသူတွေကို သတ်ပြီးတဲ့နောက် အဲဒီသခင်လေးက ရုပ်ချင်းတူတဲ့ ရုပ်သေး ဒါဇင်ပေါင်းများစွာကို ထပ်ပြီး ဆင့်ခေါ်လိုက်တာပါ" ဟု ထိုတပည့်က ဘာမှမဖုံးကွယ်ရဲဘဲ အမှန်အတိုင်း ရှင်းပြလိုက်သည်။

"ဝိညာဉ်ဖြစ်ပေါ်ခြင်းအဆင့် ရုပ်သေး ဒါဇင်ပေါင်းများစွာ ဟုတ်လား..." လူဝူယန့်သည် သူ၏ ထိုင်ခုံလက်ရန်းကို အားပြုကာ ဂိုဏ်းချုပ်ပလ္လင်ပေါ်သို့ ပြန်လည် ထိုင်ချလိုက်ရပြီး ရှေ့တိုးမရ နောက်ဆုတ်မရသော အကျပ်အတည်းထဲသို့ ရောက်ရှိသွားတော့သည်။

"ဂိုဏ်း... ဂိုဏ်းချုပ်၊ သူတို့ ကျူးကျော်ဝင်ရောက်လာပါပြီ" ထိုအချိန်တွင် အခြားသော တောင်ပံနတ်နန်းဂိုဏ်း တပည့်တစ်ဦးမှာ အပြေးအလွှား ဝင်လာပြန်သည်။

"ကောင်းပြီ၊ ငါသိပြီ" ကောင်းချီးဖြစ်လျှင် ရှောင်လွှဲ၍မရသလို ဘေးအန္တရာယ်ဖြစ်လျှင်လည်း ဖုံးကွယ်ထား၍မရမှန်း လူဝူယန့် သိလိုက်သည်။

ယခုအချိန်တွင် လူဝူယန့်၏ အမြင်အရ အကောင်းဆုံး ရွေးချယ်မှုမှာ ချန်ချင်းနှင့် ပြန်လည်သင့်မြတ်ရန်သာ ဖြစ်သည်၊ အကြောင်းမှာ နှစ်ဖက်စလုံး၏ ခွန်အားကွာဟချက်မှာ မကြီးမားလှသလို အစောပိုင်းက သူထင်ထားသကဲ့သို့ တောင်ပံနတ်နန်းဂိုဏ်းအနေဖြင့် ချန်ချင်းကို အနိုင်ကျင့်နိုင်သည့် အခြေအနေမျိုး မဟုတ်တော့ပေ။

ထိုအပြင် သူသည် ပြင်ဆင်မှု နှစ်ခုကိုလည်း ပြုလုပ်လိုက်သည်မှာ "တပည့်တွေအားလုံးကို အသင့်ပြင်ထားဖို့ အမိန့်ပေးလိုက်၊ ငါ့ရဲ့ အမိန့်ကို အချိန်မရွေး နားထောင်ကြ၊ ပြီးတော့ ဂိုဏ်းစောင့်စီရင်ထုံးကို ဖွင့်လိုက်တော့"

ဂိုဏ်းစောင့်စီရင်ထုံးမှာ တောင်ပံနတ်နန်းဂိုဏ်း၏ အပြင်းထန်ဆုံးသော ဝှက်ဖဲဖြစ်ပြီး ဂိုဏ်းတစ်ခုလုံး၏ ခွန်အားကို အသုံးချကာ ဖွင့်လှစ်ရခြင်းဖြစ်သည်။

အကယ်၍ ချန်ချင်းက ပြန်လည်သင့်မြတ်ရန် ဆန္ဒမရှိပါက ဂိုဏ်းစီရင်ထုံးနှင့် သူ၏ ကိုယ်ပိုင်ခွန်အားကို ပေါင်းစပ်ကာ ရင်းနှီးရမှု အနည်းငယ် များပြားသော်လည်း ချန်ချင်းနှင့် သူခေါ်ဆောင်လာသော ရုပ်သေးဒါဇင်များကို ဖြေရှင်းရန် ခက်ခဲမည်မဟုတ်ဟု လူဝူယန့် ကြံစည်ထားသည်။

"ဟုတ်ကဲ့ပါ" တပည့်ဖြစ်သူက သဘောတူကာ ဂိုဏ်းခန်းမဆောင်မှ အလျင်အမြန် ထွက်ခွာသွားသည်။

လူဝူယန့်သည်လည်း ချန်ချင်းကို တွေ့ဆုံရန် နောက်မှ ထပ်ကြပ်မကွာ လိုက်ပါသွားတော့သည်။

မကြာမီတွင် နှစ်ဖက်စလုံး တွေ့ဆုံကြသည်။

ကြားရခြင်းနှင့် မြင်ရခြင်းမှာ တစ်ခြားစီပင် ဖြစ်သည်။

လေထဲတွင် လွင့်မျောနေသော အရိပ်ရုပ်သေး ဒါဇင်ပေါင်းများစွာကို ကိုယ်တိုင် မြင်တွေ့လိုက်ရသောအခါ လူဝူယန့်၏ နှလုံးသားမှာ အမှန်တကယ်ပင် တည်ငြိမ်မနေနိုင်တော့ပေ။

၎င်းတို့၏ ပုံပန်းသဏ္ဍာန်က ပေးစွမ်းသော ဖိအားမှာ ထိုအဆင့်ရှိ လူသားမျိုးနွယ် ကျင့်ကြံသူများ ပေးစွမ်းသည်ထက် များစွာ ပိုမိုကြီးမားနေသည်။

ထို့နောက် လူဝူယန့်၏ မျက်လုံးများသည် ပျံသန်းနေသော ဓားတစ်လက်ကို စီးနင်းကာ ရှယွီချင်းကို သူ၏ ရင်ခွင်ထဲတွင် ပွေ့ပိုက်ထားသည့် ချန်ချင်းထံသို့ လျင်မြန်စွာ ရောက်ရှိသွားသည်။

"သခင်လေးချန်၊ ငါတို့ကြားမှာ ဘယ်လို နားလည်မှုလွဲတာတွေပဲ ရှိရှိ၊ အခု မင်း ဒီလူတွေကို သတ်လိုက်ပြီဆိုတော့ အကြီးမားဆုံး အာဃာတတွေတောင် ပြေပျောက်သွားသင့်ပါပြီ၊ ငါ့ရဲ့ စံအိမ်မှာ ကောင်းမွန်တဲ့ လက်ဖက်ရည်တွေ ရှိပါတယ်၊ ငါတို့နှစ်ယောက် ထိုင်ပြီး အေးအေးဆေးဆေး စကားပြောကြရင် ဘယ်လိုလဲ" လူဝူယန့်က သူ၏ အဆင့်အတန်းကို နှိမ့်ချ၍ ပြောလိုက်သည်။

... ရှယွီချင်းမှာ စကားပင် မဆိုနိုင်တော့ပေ။

သူမ မသက်ပြင်းမချဘဲ မနေနိုင်တော့ပါ၊ ဤကမ္ဘာသည် သန်မာသူကို အမှန်တကယ်ပင် ဦးစားပေးလွန်းလှသည်။ အကယ်၍ ချန်ချင်းတွင် လုံလောက်သော ခွန်အားမရှိပါက လူဝူယန့်က ဤကဲ့သို့ နှိမ့်ချလာပါမည်လော။

သူသည် တောင်ပံနတ်နန်းဂိုဏ်း တပည့်များကို အမိန့်ပေးကာ သူမနှင့် ချန်ချင်းအား ဓားများဖြင့် အပိုင်းပိုင်းအပြတ်ပြတ် ခုတ်ထစ်ရန် စောစောစီးစီးပင် လုပ်ဆောင်လောက်ပြီး ဖြစ်လိမ့်မည်။

သူမသည် အခြားသူများ၏ နောက်ကွယ်တွင် ထာဝရ ပုန်းကွယ်နေ၍ မရနိုင်မှန်း တွေးမိကာ ကျင့်ကြံလိုစိတ်များ တဖွားဖွား ပေါ်ပေါက်လာမိသည်။

ချန်ချင်းမှာမူ လူဝူယန့်က သူ့ကို လက်ဖက်ရည်သောက်ရင်း စကားပြောရန် ဖိတ်ကြားသည်ကို ကြားသောအခါ အေးစက်သော မျက်နှာပေးဖြင့် "ငါနဲ့ လက်ဖက်ရည်သောက်ဖို့လား၊ မင်းလည်း ထိုက်တန်လို့လား" ဟု ဆိုလိုက်သည်။

မင်းလည်း ထိုက်တန်လို့လား... မင်းလည်း ထိုက်တန်လို့လား...

ဤစကားလုံး လေးလုံးမှာ လူဝူယန့်၏ စိတ်ထဲတွင် အကြိမ်ကြိမ် ပဲ့တင်ထပ်နေတော့သည်။

သူ၏ အပြုံးမှာ ခဲသွားကာ ပျောက်ကွယ်သွားတော့သည်။

သူ့ကို နောက်ဆုံးအကြိမ် ဤသို့ ပြောရဲခဲ့သူမှာ မည်သူဖြစ်ကြောင်း သူ မမှတ်မိတော့သော်လည်း ထိုသူ၏ သင်္ချိုင်းမျက်က်ပင်များမှာ ယခုအချိန်တွင် သူ၏ အရပ်ထက်ပင် ပိုရှည်နေလောက်ပြီဖြစ်ကြောင်း သူ အသေအချာ သိသည်။

"သခင်လေးချန်၊ မင်း တကယ်ပဲ ပါရမီရှိတယ်ဆိုတာ ငါ ဝန်ခံပါတယ်၊ ဒါပေမဲ့ ပါရမီကို အကြောင်းပြုပြီး မောက်မာတာကတော့ ကောင်းတဲ့ အကျင့်မဟုတ်ဘူး၊ မင်း နားလည်ထားရမှာက ဒီကမ္ဘာမှာ လူထက်လူ ရှိသလို ကောင်းကင်ထက် ကောင်းကင် ရှိတယ်ဆိုတဲ့ စကားပဲ"

လူဝူယန့်သည် ချန်ချင်းအနေဖြင့် တောင်ပံနတ်နန်းဂိုဏ်းနှင့် တကယ်ပဲ စစ်ခင်းချင်သလားဆိုသည်ကို သေသေချာချာ ပြန်လည် စဉ်းစားရန် ဖျောင်းဖျနေခြင်းဖြစ်သည်။

"သတ်စမ်း"

ချန်ချင်းသည် လူဝူယန့်နှင့် စကားများစွာ ပြောနေရန် ပျင်းရိနေပြီဖြစ်သည်။ သူ ဤနေရာသို့ လာသည်မှာ လူဝူယန့်နှင့် ပြန်လည်သင့်မြတ်ရန် မဟုတ်ဘဲ ဂိုဏ်းကို အမြစ်ပြတ် ရှင်းလင်းရန် ဖြစ်သည်။

သေခါနီး လူတွေအတွက် ဘာလို့ စကားတွေ အများကြီး ပြောနေရဦးမှာလဲ။

"မင်းကတော့ ကျေးဇူးကန်းလိုက်တာ" ချန်ချင်းက အသိအမှတ်မပြုသည်ကို မြင်သောအခါ လူဝူယန့်လည်း ဒေါသထွက်လာပြီး "မင်းက တကယ်ပဲ တောင်ပံနတ်နန်းဂိုဏ်းက မင်းကို ကြောက်နေတယ်လို့ ထင်နေတာလား၊ စီရင်ထုံး၊ ဖွင့်စမ်း"

လူဝူယန့်၏ "စီရင်ထုံး၊ ဖွင့်စမ်း" ဟူသော အသံမှာ ကောင်းကင်နှင့် မြေပြင်အနှံ့ ပဲ့တင်ထပ်သွားသည်နှင့် တပြိုင်နက် တောင်ပံနတ်နန်းဂိုဏ်း တပည့် သောင်းနှင့်ချီတို့သည် ၎င်းတို့၏ ဝိညာဉ်စွမ်းအားများကို စီရင်ထုံးကျောက်တုံးများအတွင်းသို့ တပြိုင်နက်တည်း ထည့်သွင်းလိုက်ကြသည်။

နောက်တစ်ခဏတွင် စီရင်ထုံးကျောက်တုံးများမှာ တစ်လုံးပြီးတစ်လုံး လင်းထိန်လာကာ ကျောက်တုံးတစ်ခုနှင့်တစ်ခု ချိတ်ဆက်သွားပြီး ကြီးမားသော စီရင်ထုံးပုံစံတစ်ခု ဖြစ်ပေါ်လာသည်။

စီရင်ထုံးပုံစံတစ်ခုလုံး လင်းထိန်သွားသောအခါ အလင်းတန်းများသည် ကောင်းကင်ယံသို့ ထိုးတက်သွားပြီး ကောင်းကင်ထက်တွင် ပို၍ကြီးမားသော စီရင်ထုံးပုံစံတစ်ခုကို ရေးထိုးလိုက်ကာ တောင်ပံနတ်နန်းဂိုဏ်း တစ်ခုလုံးကို လွှမ်းခြုံသွားတော့သည်။

"ဒီစီရင်ထုံးကို နဂါးရေစင်စီရင်ထုံးလို့ ခေါ်တယ်၊ ရွှမ်အဆင့် အလယ်အလတ် စီရင်ထုံးပဲ၊ မင်းကို အမြစ်ပြတ် ရှင်းလင်းဖို့အတွက်တော့ လုံလောက်တာထက်တောင် ပိုသေးတယ်" လူဝူယန့် စကားပြောပြီးသည်နှင့် လေထဲတွင် ဝိညာဉ်စွမ်းအား အမြောက်အမြား စုစည်းလာကာ ပေဒါဇင်ပေါင်းများစွာ မြင့်မားသော နဂါးရေစင် ပုံရိပ်ယောင်များအဖြစ် ပြောင်းလဲသွားသည်။

"နဂါးရေစင်စီရင်ထုံး ဟုတ်လား..."

ချန်ချင်း မှတ်မိသလောက်ဆိုလျှင် သူသည် မကြာသေးမီကမှ တိအဆင့် အဆင့်မြင့် စီရင်ထုံးဖြစ်သည့် "နဂါးထောင်ချောက်စီရင်ထုံး" ကို ရရှိထားသည်။

'ငါ့ရဲ့ လက်ရှိ ဉာဏ်အလင်းပွင့်ခြင်း စွမ်းရည်နဲ့ဆိုရင် စီရင်ထုံးတွေကို နားလည်နိုင်မလား သိချင်မိတယ်'

ချန်ချင်းသည် အရိပ်ရုပ်သေးများကို လှုပ်ရှားရန် အလျင်မစလို အမိန့်မပေးသေးပေ။ နဂါးရေစင်စီရင်ထုံးမှာ အပြည့်အဝ အသက်ဝင်ခြင်း မရှိသေးပေ။ ချန်ချင်းသည် စမ်းသပ်ကြည့်လိုသော ဆန္ဒဖြင့် သူ၏ စနစ်အိတ်ထဲကို ဖွင့်လိုက်ပြီး နဂါးထောင်ချောက်စီရင်ထုံးကို ရွေးချယ်ကာ စတင် လေ့လာလိုက်သည်။

သူ မျက်လုံးကို ခဏမျှသာ မှိတ်ထားပြီးနောက် ချက်ချင်းပင် ပြန်ဖွင့်လိုက်သည်။

အခြားအကြောင်းကြောင့် မဟုတ်ဘဲ တိအဆင့်သို့ ရောက်ရှိနေပြီး ကောင်းကင်အဆင့်နှင့် အလွန်နီးစပ်နေသော ဤနဂါးထောင်ချောက်စီရင်ထုံးကို သူသည် အတော်အသင့် နားလည်သွားပြီ ဖြစ်သောကြောင့်ပင်။

ချန်ချင်းသည် သူ၏ လက်ရှိ ဉာဏ်အလင်းပွင့်နှုန်းမှာ ထိတ်လန့်စရာကောင်းလိမ့်မည်ဟု တွေးထားခဲ့သော်လည်း ဤမျှအထိ ဖြစ်လိမ့်မည်ဟု မမျှော်လင့်ထားခဲ့ပေ။

တိအဆင့် အဆင့်မြင့် စီရင်ထုံးတစ်ခုကို မျက်စိတစ်မှိတ်အတွင်းမှာပင် အတော်အသင့် နားလည်သွားခြင်းမှာ။

အကယ်၍ ဤအချက်ကိုသာ သိသွားကြလျှင် မိမိကိုယ်ကိုယ် ပါရမီရှင်ဟု ဂုဏ်ယူနေကြသော စီရင်ထုံးဆရာများမှာ အရှက်ရသွားကြပြီး ဤလမ်းစဉ်အပေါ် ယုံကြည်မှုများ ပျောက်ဆုံးကာ အားငယ်သွားကြပေလိမ့်မည်။

မြင့်မားသော ဉာဏ်အလင်းပွင့်ခြင်း စွမ်းရည်ရှိခြင်းမှာ အမှန်တကယ်ပင် မိမိလိုချင်ရာကို လုပ်ဆောင်နိုင်ပေသည်။

"နဂါးရေစင်စီရင်ထုံး ပြီးပြည့်စုံသွားပြီ၊ ဒီနေ့ကတော့ မင်းတို့နှစ်ယောက် သေမယ့်နေ့ပဲ" အခြေအနေက ဤအဆင့်သို့ ရောက်ရှိလာပြီဖြစ်ရာ လူဝူယန့်အနေဖြင့် ရှယွီချင်းကို ဤကိစ္စမှ ဖယ်ထုတ်ထား၍ မရနိုင်တော့ပေ။

လက်ရှိ တော်ဝင်သမက်ကို သတ်ခြင်းကပင် တော်ဝင်မိသားစုကို ပြစ်မှားမိနေပြီဖြစ်ရာ မင်းသမီးတစ်ပါးကို ထပ်တိုးသတ်ရမှာကို သူ ကြောက်နေပါဦးမည်လော။

ထိုအချိန်ကျလျှင် ဝူအင်ပါယာက အမှန်တကယ် စုံစမ်းလာလျှင်တောင် လူကသေပြီး မီးကငြိမ်းသွားပြီဖြစ်ရာ မည်သို့ ရှင်းပြမည်ဆိုသည်မှာ သူ၏ နှုတ်ထွက်စကားပေါ်တွင်သာ မူတည်တော့သည်။

သူ မသိလိုက်သည်မှာ ဤဆုံးဖြတ်ချက်သည် ချန်ချင်းအတွက် ကြီးမားသော လက်ဆောင်တစ်ခုကို ပေးအပ်လိုက်ခြင်းဖြစ်ပြီး စနစ်မှာလည်း လှုပ်ရှားစပြုလာခြင်းပင် ဖြစ်သည်။