အခန်း (၉၄) နောက်တစ်ယောက်က အရင်ရောက်နှင့်နေပြီ

ပတ်ဝန်းကျင်တစ်ခုလုံးမှာ ထူးဆန်းတဲ့ တိတ်ဆိတ်မှုတွေ ဖုံးလွှမ်းသွားသည်။ ယဲ့ချင်းယွမ်ဟာ မှင်သက်နေရာကနေ သတိပြန်ဝင်လာတဲ့အခါ မျက်နှာတစ်ခုလုံး ဇဝေဇဝါ ဖြစ်သွားသည်။

"ဘာ... ဘာဖြစ်သွားတာလဲ"

"ဆရာပိုင် ဘာလို့ အဲဒါကို စောစောက မပြောခဲ့တာလဲ"

တောက် သူဟာ အစကတည်းက ထောင်ချောက်ထဲ ဆင်းပေးလိုက်မိတာပဲ အဲဒီလူယုတ်မာက သူ့နောက်ကို တစ်လျှောက်လုံး လိုက်နေခဲ့တာဖြစ်ပြီး သူ့ရဲ့ တကယ့်ရည်မှန်းချက်က နဂါးအမွေအနှစ်ဆီ အရင်ဦးအောင် ဝင်ဖို့ပဲ။ သူဟာ မသိလိုက်ဘဲ သူတစ်ပါးအတွက် လှေကားထစ် လုပ်ပေးလိုက်ရတာလား တကယ့်ကို ကောက်ကျစ်တဲ့ကောင်ပဲ။

ယဲ့ချင်းယွမ်ဟာ စိတ်ထဲကနေ ကျိန်ဆဲရင်း အထဲကို အတင်းဝင်ဖို့ ကြိုးစားလိုက်သည်။ ဒါပေမဲ့ သူ့ရဲ့ ခန္ဓာကိုယ်တစ်ခုလုံးကို မမြင်ရတဲ့ အကာအကွယ်တစ်ခုက ပိတ်ဆို့ထားပြီး အမွေအနှစ်နေရာရဲ့ ဝင်ပေါက်ဆီကို ခြေတစ်လှမ်းတောင် တိုးလို့မရတော့ပါဘူး။ အကြိမ်ကြိမ် ကြိုးစားကြည့်ပြီးတဲ့နောက်မှာတော့ သူ ထိတ်လန့်သွားသည်။ ဒီအမွေအနှစ်နေရာဟာ တစ်ကြိမ်မှာ လူတစ်ယောက်တည်းကိုပဲ အထဲဝင်ခွင့်ပြုတာဖြစ်ပြီး အခုတော့ သူဟာ အပြင်မှာ ပိတ်မိနေပါပြီ။

"ဒါ... ဒါ ဘယ်လိုဖြစ်နိုင်မှာလဲ"

နောက်တစ်ကြိမ်ပါပဲ သူ ခက်ခက်ခဲခဲ ရှာထားတဲ့ အမွေအနှစ်ဟာ ဘယ်သူမှန်းမသိတဲ့ လူတစ်ယောက်ရဲ့ လက်ထဲကို ထပ်ပြီး ရောက်သွားပြန်ပါပြီ။ ယဲ့ချင်းယွမ်ရဲ့ စိတ်ဓာတ်တွေဟာ အကြီးအကျယ် ပြိုလဲသွားသည်။

သူ့မိဘတွေ ချန်ထားခဲ့တဲ့ အထူးမြေပုံ ရှိနေတာတောင် လျှို့ဝှက်နယ်မြေထဲရောက်ပြီး ပထမနှစ်ရက်ကလွဲရင် သူ ဘာမှ ကောင်းကောင်းမွန်မွန် မရသေးပါဘူး။ အရင်က တွေ့ခဲ့တဲ့ နတ်ဘုရားအဆင့် အမွေအနှစ်နေရာတုန်းကလည်း အကြောင်းအမျိုးမျိုးကြောင့် ဘာမှ မရခဲ့သလို အခု အကြီးမားဆုံး အခွင့်အရေးကြီးကလည်း သူ့နောက်ကို အချိန်အကြာကြီး လိုက်နေတဲ့ လူယုတ်မာတစ်ယောက်ရဲ့ ကြားဖြတ်လုယူခြင်းကို ခံလိုက်ရပါပြီ။

"ချင်းယွမ် အရမ်းလည်း စိတ်မလှုပ်ရှားပါနဲ့ဦး။"

"ငါ ထင်တာမမှားရင် အဲဒီလူမှာ မင်းရဲ့ရင်ဘတ်ကလို နဂါးဘုရင် အမှတ်အသား မရှိလောက်ဘူး။"

"အဲဒီကောင် အရင်ဝင်သွားလည်း ဘာဖြစ်လဲ နဂါးမျိုးနွယ်စုရဲ့ အမှတ်အသားမပါဘဲ အထဲမှာရှိတဲ့ အင်အားကြီး နဂါးတွေရဲ့ အသိအမှတ်ပြုမှုကို သူ ဘယ်လိုမှ မရနိုင်ဘူး။"

"မင်း လုပ်ရမှာက အဲဒီကောင် အထဲက နဂါးတွေရဲ့ သတ်ဖြတ်တာကို ခံရမယ့်အချိန်ကိုပဲ စောင့်နေလိုက်။ သူ သေသွားတာနဲ့ မင်း အထဲကို ဝင်လို့ရပြီ"

ဒါကို ကြားမှ ယဲ့ချင်းယွမ်ရဲ့ ဒေါသတွေက အနည်းငယ် ငြိမ်ကျသွားသည်။

ဟုတ်သားပဲ ဟိုအဘိုးကြီး ပြောခဲ့တာပဲ ရှေးဟောင်းနဂါးရဲ့ အသိအမှတ်ပြုမှု ရဖို့ဆိုရင် သူ့ရင်ဘတ်က အမှတ်အသားက မရှိမဖြစ်ပဲ။ သူ့ရှေ့က ဝင်သွားတဲ့ကောင်ကတော့ သေဖို့ပဲရှိတယ်။ နာရီဝက်လောက် စောင့်လိုက်ရင် အဲဒီကောင် အထဲမှာ အပိုင်းပိုင်း ပြတ်သွားပြီးတဲ့နောက် သူ သူရဲကောင်းပီပီ ဝင်သွားရုံပါပဲ။

နဂါးအမွေအနှစ် အတွင်းပိုင်း၌ တိမ်မြူတွေကြားမှာ တောင်တန်းတွေဟာ အထပ်ထပ် ဖြစ်နေသည်။ ဝတ်စုံဖြူနဲ့ကူဟန်ဟာ ဟင်းလင်းပြင်ထဲကနေ ထွက်ပေါ်လာသည်။ ချက်ချင်းဆိုသလို တစ်ကမ္ဘာလုံး တုန်ခါသွားပြီး မဟာနဂါး အရှိန်အဝါတွေဟာ လှိုင်းလုံးကြီးတွေလို ဖြတ်သန်းသွားသည်။

တိမ်မြူတွေကြားထဲကနေ တောင်ကြီးတွေလောက် ကြီးမားတဲ့ နဂါးကြီးတွေရဲ့ ကိုယ်ထည်တွေကို ခပ်ရေးရေး မြင်နေရသည်။ အိပ်မောကျနေတဲ့ ရှေးဟောင်းနဂါးတွေဟာ ကူဟန်ဆိုတဲ့ ပြင်ပလူကို မြင်တဲ့အခါ နိုးထလာပြီး သူ့ဆီကို တိုးဝင်လာကြသည်။ တောင်ငယ်လေးတွေလောက် ကြီးမားတဲ့ ရွှေရောင် မျက်လုံးကြီးတွေဟာ တိမ်မြူကြားကနေ ကူဟန်ကို ငုံ့ကြည့်နေကြသည်။

"မင်းက... မုန်တိုင်းနဂါးဘုရင် ရွေးချယ်လိုက်တဲ့ လူသားလား" ရှေးဟောင်းနဂါးကြီးတွေဟာ ကူဟန်ကို စပ်စုတဲ့ မျက်လုံးတွေနဲ့ ကြည့်နေသည်။ ဒါပေမဲ့ သူတို့ သေချာကြည့်လေလေ၊ ပိုပြီး ထိတ်လန့်လာလေလေပါပဲ။

"မဟုတ်ဘူး... သူ့ဆီမှာ မုန်တိုင်းနဂါးဘုရင်ရဲ့ အငွေ့အသက် မရှိဘူး"

"သူက ဘယ်လိုလုပ် ဝင်လာတာလဲ ငါတို့နဂါးမျိုးနွယ်ရဲ့ အမှတ်အသား မပါဘဲ ဒီအကာအကွယ်ကို ကျော်ပြီး ဘယ်သူမှ မဝင်နိုင်ဘူးလေ"

"ဒီကောင်က တော်တော်ထူးဆန်းတယ် သူ့ဆီမှာ မိစ္ဆာဘိုးဘေးရဲ့ အရှိန်အဝါ အငွေ့အသက် ပါနေသလိုပဲ" မိစ္ဆာဘိုးဘေးရဲ့ အငွေ့အသက်ကို ခံစားမိတဲ့အခါ မာနကြီးလှတဲ့ နဂါးကြီးတွေရဲ့ မျက်လုံးထဲမှာ ကြောက်ရွံ့ရိပ်တွေ ယှဉ်တွဲလာသည်။ ရှေးဟောင်း နဂါးမျိုးနွယ်တွေဟာ သက်ရှိတွေရဲ့ ကံကြမ္မာကို မြင်နိုင်စွမ်း ရှိကြပါတယ်။

ဒါပေမဲ့ ကူဟန်ရဲ့ ကံကြမ္မာကတော့ အလွန်ထူးဆန်းနေပြီး ရှုပ်ထွေးလွန်းနေတာကြောင့် ဒီကမ္ဘာကလူ မဟုတ်သလို ခံစားနေရသည်။ ပုံမှန်ဆိုရင် ဒီလို ကံကြမ္မာမျိုး ရှိတဲ့သူဟာ အစောကြီးကတည်းက သေသင့်နေပါပြီ။ ဒါပေမဲ့ အခုတော့ ဒီလူက သူတို့တောင် ကြောက်ရွံ့ရမယ့် အရှိန်အဝါမျိုးနဲ့ ရှိနေတာပါ။

"မင်း... ဘယ်သူလဲ ငါတို့ နဂါးမျိုးနွယ်ရဲ့ နယ်မြေထဲကို ဘာလို့ ကျူးကျော်ဝင်ရောက်တာလဲ" နဂါးကြီးတစ်ကောင်က အသံကို ထိန်းပြီး မေးလိုက်သည်။ ဒါပေမဲ့ ကူဟန်ကတော့ သူတို့ကို ဂရုမစိုက်ပါဘူး။ သူဟာ အမွေအနှစ်နေရာရဲ့ အနက်ရှိုင်းဆုံးဆီကို ကြည့်လိုက်ပြီး စိတ်ထဲကနေ ခပ်တိုးတိုး ပြောလိုက်သည်။

မှတ်ပုံတင်မယ် ဗီလိန်မှတ် ၂၀,၀၀၀ သုံးပြီး အဆင့်မြင့်ဆုံး ဆုလာဘ်ကို ရယူမယ်။

[ဒင် အကောင့်ဝင်ခြင်း အောင်မြင်ပါသည် နေရာ - အလယ်ပိုင်းတိုက်ကြီး လျှို့ဝှက်နယ်မြေ နဂါးအမွေအနှစ်။]

[ဂုဏ်ယူပါသည် အမြင့်ဆုံး ဆုလာဘ်ကို ရရှိသွားပါပြီ။ ပိုင်ရှင် ရရှိသွားသော အရာများမှာ

၁။ နဂါးဘိုးဘေး၏ သွေးနှစ်(ရှေးဟောင်း မိစ္ဆာဘိုးဘေးများထဲမှ တစ်ဦးဖြစ်သော နဂါးဘိုးဘေး၏ နောက်ဆုံးကျန်ရှိခဲ့သော သွေးစက်ဖြစ်သည်။ ၎င်းကို စုပ်ယူပြီးနောက် ပိုင်ရှင်၏ သွေးမျိုးဆက်ကို မြှင့်တင်နိုင်မည်ဖြစ်ပြီး ခန္ဓာကိုယ်နှင့် ဝိညာဉ်အစွမ်းသည် မူလထက် ၁၀ဆပိုမို အားကောင်းလာမည်။ ဤသွေးဖြင့် ဤနေရာရှိ နဂါးမျိုးနွယ်အားလုံးကို စေခိုင်းနိုင်မည် ဖြစ်သည်။)

၂။ ရှေးဦးနဂါးခေါင်းလောင်း (အမြင့်ဆုံး နတ်ဘုရားလက်နက်) - ဧကရာဇ်အဆင့် လက်နက်အဖြစ် မြှင့်တင်ရန် အဆင့်သင့်ဖြစ်နေပြီ ဖြစ်သည်။ ကောင်းကင်နှင့် မြေကြီး၏ စွမ်းအားများကို အလိုအလျောက် စုပ်ယူပြီး ရန်သူများကို သတ်ဖြတ်နိုင်သည်။ ဧကရာဇ်အဆင့်အောက်ရှိ မည်သည့်တိုက်ခိုက်မှုကိုမဆို ၁၀၀% ကာကွယ်ပေးနိုင်ပြီး ဧကရာဇ်အဆင့် တိုက်ခိုက်မှုများကိုပင် ၉၀% အထိ လျှော့ချပေးနိုင်သည်။

၃။ နဂါးစီးသူရဲ ကာကွယ်ရေးမှူး ၄ ဦး (တစ်ဦးစီတွင် နတ်ဘုရားစင်မြင့်အဆင့် ၉ရှိပြီး အမြင့်ဆုံး သူတော်စင်အဆင့်အထိ အလိုအလျောက် တိုးတက်နိုင်သည်။ ၎င်းတို့နှင့်အတူ နဂါးစီးသူရဲ ၁၀၀၀ လည်း ပါဝင်သည်။)

၄။ နဂါးဘိုးဘေး နန်းဆောင် (တန်ဖိုးကြီး အဆောက်အဦး အမျိုးအစား လက်နက်ဖြစ်သည်။ ချထားလိုက်ပါက မိုင်ပေါင်း ၆၀၀ အတွင်း နဂါးအရှိန်အဝါများ ထုတ်လွှတ်ပြီး မည်သည့်သက်ရှိကိုမဆို ဖိနှိပ်ထားနိုင်သည်။ အကယ်၍ ပိုင်ရှင်က ခေါင်းလောင်းကို ဤနန်းဆောင်အတွင်း အသုံးပြုပါက အစွမ်း ၁၀၀% ထွက်ပေါ်မည် ဖြစ်သည်။)

ဂူဟန်ဟာ ဒီဆုလာဘ်တွေအပေါ် တော်တော်လေး စိတ်ကျေနပ်သွားသည်။ အခုဆိုရင် သူ့မှာ လုံးဝဥဿုံ ကာကွယ်ပေးမယ့် လက်နက်ရှိသွားပြီဖြစ်သလိုသူ့ရဲ့ ကိုယ်ပိုင် ဗီလိန်အဖွဲ့အစည်းကိုလည်း တည်ထောင်နိုင်ပါပြီ။

အပြင်မှာတင် ယဲ့ချင်းယွမ်ကို သူတိုက်ရိုက်သတ်ပစ်ချင်ပေမဲ့ ယဲ့ချင်းယွမ်ရဲ့ ကျောက်စိမ်းဆွဲပြားထဲမှာ ရင်းနှီးနေတဲ့ အရှိန်အဝါတစ်ခုကို ခံစားမိတာကြောင့် သူစောင့်ကြည့်နေတာပါ။ အခုချက်ချင်း သတ်လိုက်ရင် ဇာတ်လမ်းရဲ့ အကာအကွယ်ကြောင့် ယဲ့ချင်းယွမ်က ထွက်ပြေးလွတ်မြောက်သွားနိုင်သလို သူ့နောက်ကွယ်က အင်အားကြီးသူတွေကလည်း စောစီးစွာ ဝင်ပါလာနိုင်သည်။

ဘာပဲဖြစ်ဖြစ် သူကိုယ်တိုင် စီစဉ်ထားတဲ့ ပြဇာတ်ကြီးမှာ ဇာတ်လိုက်ဖြစ်တဲ့ ယဲ့ချင်းယွမ်ကပြဖို့ ကျန်သေးတာပဲ မဟုတ်လား။ ဇာတ်လိုက်မပါတဲ့ ပြဇာတ်ဆိုတာ ပျင်းစရာ ကောင်းလွန်းသည်။