အခန်း (၈၅) မင်းက သူ့ကိုအစားထိုး တစ်ယောက်လို သဘောထားခဲ့တာပဲ
လျူရုယန်နဲ့ ေလာ့ပိုင်ကျီတို့က ယဲ့ချင်းယွမ်အတွက် အသနားခံနေတာကို ကြားရတဲ့အခါ ချူယိုဝေဟာ ငေးခနဲ ဖြစ်သွားပြီး အတိတ်က မြင်ကွင်းတစ်ခုကို ပြန်လည် မြင်ယောင်လာသည်။
အဲဒါကတော့ သူမရဲ့ အစ်ကိုကြီး (ကူဟန်) ဟာ ထျန်းရှန်းလျှို့ဝှက်နယ်မြေကနေ ဒဏ်ရာတွေနဲ့ တစ်ယောက်တည်း ပြန်လာခဲ့တုန်းက အားလုံးက သူ့ကို အေးစက်စက် ဆက်ဆံခဲ့ကြပြီး ဘယ်သူမှ သူ့အတွက် ရှေ့နေမလိုက်ပေးခဲ့ကြတဲ့ မြင်ကွင်းပါပဲ။
"ညီမလေး ဒီနေ့အထိ ငါနားမလည်နိုင်တဲ့ အချက်တစ်ချက် ရှိနေတုန်းပဲ။"
"ထျန်းရှန်းလျှို့ဝှက်နယ်မြေတုန်းက အစ်ကိုကြီးက အန္တရာယ်ကို ဂရုမစိုက်ဘဲ မင်းကို မိစ္ဆာသားရဲတွင်းထဲကနေ ကယ်ထုတ်ခဲ့တာလေ။"
"ဒါပေမဲ့ မင်းက ယဲ့ချင်းယွမ်နောက်ကို လိုက်ပြီး နယ်မြေထဲက ထွက်လာတဲ့အချိန်မှာ အစ်ကိုကြီးရဲ့ အခြေအနေကို တစ်ချက်ကလေးတောင် ထည့်မစဉ်းစားခဲ့ဘူး။ အစ်ကိုကြီး အန္တရာယ်ကြုံနေလား ဒဏ်ရာတွေ ပြင်းပြင်းထန်ထန် ရနေလားဆိုတာကို မင်း ဂရုမစိုက်ဘဲ ယဲ့ချင်းယွမ်နောက်ကို လိုက်ပြီး ဂိုဏ်းကို တန်းပြန်ခဲ့တာပဲ။"
"အဲဒီတုန်းက ဘာလို့အစ်ကိုကြီးကို ရှာဖို့စိတ်မကူးခဲ့တာလဲ အခုကျမှ ဘာလို့ယဲ့ချင်းယွမ်အတွက် ဒီလောက်တောင် စိုးရိမ်တကြီး ဖြစ်နေရတာလဲ ဝိညာဉ်နန်းတော်အဆင့်တောင် မရှိသေးတဲ့ ယဲ့ချင်းယွမ်က မိစ္ဆာသားရဲလက်ကနေ အကောင်းအတိုင်း လွတ်လာနိုင်တာကိုက ထူးဆန်းနေပြီလေ။"
"နှစ်ပေါင်းများစွာ မင်းအပေါ် ကောင်းခဲ့တဲ့ အစ်ကိုကြီးရဲ့ မေတ္တာက ဂိုဏ်းထဲရောက်တာ နှစ်လခွဲတောင် မပြည့်သေးတဲ့ ယဲ့ချင်းယွမ်ထက် မသာတာလား"
ချူယိုဝေရဲ့ စကားတွေက ထက်မြက်လွန်းပြီး လျူရုယန်ရဲ့ အသည်းကို တည့်တည့်မှန်စေသည်။ လျူရုယန်က မျက်နှာပျက်သွားပြီး "မဟုတ်ပါဘူး အဲဒီတုန်းက ချင်းယွမ်မောင်လေးလည်း ဒဏ်ရာတွေ ရထားလို့ ငါက စိုးရိမ်ပြီး မြန်မြန်ပြန်ခေါ်သွားမိတာပါ"
"တော်တော့" ချူယိုဝေက အေးစက်စက် တားလိုက်သည်။
"ညီမလေး မင်းဂိုဏ်းထဲကို စရောက်ကတည်းက အစ်ကိုကြီးအပေါ်မှာ ထူးခြားတဲ့ သံယောဇဉ် ရှိနေခဲ့တာကို ငါ သိပါတယ်။ ဒါပေမဲ့ အဲဒီသံယောဇဉ်က အဖြေမရခဲ့ဘူး။ အဲဒီအချိန်မှာ ယဲ့ချင်းယွမ် ပေါ်လာပြီး မင်းကို အစ်ကိုကြီးလိုပဲ ကြင်ကြင်နာနာ ဆက်ဆံပေးတော့ မင်းက သူ့ကို အစ်ကိုကြီးရဲ့ အစားထိုး တစ်ယောက်လို သဘောထားပြီး စွဲလန်းသွားခဲ့တာပဲ မဟုတ်လား"
"ငါ" လျူရုယန်ရဲ့ မျက်လုံးတွေ ဝေဝါးသွားပြီး ဘာမှ ပြန်မပြောနိုင်တော့ပါဘူး။
ဘေးက လော့ပိုင်ကျီလည်း အံ့ဩသွားသည်။ သူမကတော့ ဓားကျင့်စဉ်ကိုပဲ အာရုံစိုက်သူမို့ ချူယိုဝေလို ပါးနပ်မှု မရှိပါဘူး။ အခုမှပဲ သူမ နားလည်သွားသည်။ လျူရုယန်ဟာ အစ်ကိုကြီးကို စွဲလန်းခဲ့ပေမဲ့ အစ်ကိုကြီးက ကျင့်ကြံခြင်းကိုပဲ အာရုံစိုက်ပြီး အထီးကျန်နေခဲ့တာကြောင့် အစ်ကိုကြီးနဲ့ ပုံစံတူတဲ့ ယဲ့ချင်းယွမ် ပေါ်လာတဲ့အခါ သူမက အစားထိုးအနေနဲ့ ချစ်မိသွားခဲ့တာပါ။
နှစ်ပေါင်းများစွာ ပေးဆပ်ခဲ့တဲ့ အစ်ကိုကြီးရဲ့ မေတ္တာကို နှစ်လခွဲပဲ ရှိသေးတဲ့ ယဲ့ချင်းယွမ်က အစားထိုး ဝင်ယူသွားနိုင်တာက တကယ်ကို ရယ်စရာကောင်းလွန်းလှသည်။
"အစ်မကြီး... အဲဒီလို မဟုတ်ပါဘူး" လျူရုယန်က မျက်ရည်တွေနဲ့ ရှင်းပြဖို့ ကြိုးစားပေမဲ့ ချူယိုဝေကတော့ ဂူထဲကို ဆက်ဝင်သွားသည်။
"မင်း ယဲ့ချင်းယွမ်ကို တကယ်ချစ်တာလား အစားထိုး သဘောထားတာလားဆိုတာ ငါ စိတ်မဝင်စားတော့ဘူး။ ဒါပေမဲ့ မင်း သိထားရမှာက ယဲ့ချင်းယွမ်ထက် အစ်ကိုကြီးအပေါ်မှာ မင်းအကြွေးတွေ အများကြီး ပိုတင်နေတယ်ဆိုတာပဲ။ မင်း တောင်းပန်သင့်တဲ့သူက အစ်ကိုကြီးပဲ။"
"တောက် ဒီကောင်တွေကို လုံးဝ ခါချလို့ မရပါလား" ယဲ့ချင်းယွမ်တစ်ယောက် အားကုန်လုနီးပါး ဖြစ်နေပြီး မျက်နှာက အလွန် ညိုမည်းနေသည်။ သူက လင်ရွှမ်ယွဲ့နဲ့ ဓားရှာဖွေရေးဂိုဏ်းက တပည့်တွေကို အကူအညီလှမ်းတောင်းပေမဲ့ ဘယ်သူမှ ပြန်မဖြေကြပါဘူး။
ဒီအတိုင်းဆိုရင် သူ အဖမ်းခံရပြီး အသေဆိုးနဲ့ သေရတော့မှာပါ။ သူ မသေချင်သေးပါဘူး။ သူ့ရဲ့ ကလဲ့စားချေမှုတွေ မပြီးသေးသလို မြောက်ပိုင်းက သူ့ဝမ်းကွဲညီမတွေကိုလည်း မကယ်ရသေးပါဘူး။
ဝင်းခနဲ
အဲဒီအချိန်မှာပဲ သူ့ရင်ဘတ်က ကျောက်စိမ်းဆွဲသီးဟာ တောက်ပလာပြီး ထူးဆန်းတဲ့ စွမ်းအားတွေ ထွက်ပေါ်လာသည်။ အဲဒီစွမ်းအားတွေက သူ့ခန္ဓာကိုယ်ထဲကို စီးဝင်သွားပြီး ကုန်ခမ်းနေတဲ့ မိစ္ဆာဧကရာဇ် သွေးအဆီအနှစ်တွေကို ပြန်လည် နိုးကြားလာစေသည်။
နဂါးဘုရင်ပေးခဲ့တဲ့ တံဆိပ်ကလည်း အဲဒီစွမ်းအားနဲ့ တုံ့ပြန်လိုက်ပြီး ယဲ့ချင်းယွမ်ရဲ့ ခန္ဓာကိုယ်ထဲကနေ နဂါးအရှိန်အဝါတွေ လှိုင်းလုံးတွေလို ထွက်ပေါ်လာသည်။
ဟိန်းးး
ကောင်းကင်တုန်ဟည်းသွားစေမယ့် နဂါးဟိန်းသံတစ်ခု ထွက်ပေါ်လာသည်။ လိုက်လံတိုက်ခိုက်နေတဲ့ ကျင့်ကြံသူတွေဟာ ဝိညာဉ်ထိခိုက်သွားပြီး ခေါင်းတွေကို ကိုင်ကာ နာကျင်စွာ ရပ်တန့်သွားကြသည်။
ဝုန်းးး
တစ်ချိန်တည်းမှာပဲ လျှို့ဝှက်နယ်မြေတစ်ခုလုံး ပြင်းထန်စွာ တုန်ခါသွားသည်။ မြေကြီးတွေ အက်ကွဲကုန်ပြီး နယ်မြေရဲ့ အနက်ရှိုင်းဆုံးနေရာကနေ ပိုပြီး ကြောက်မက်ဖွယ်ကောင်းတဲ့ နဂါးဟိန်းသံကြီး ထွက်ပေါ်လာသည်။ အပြင်မှာ စောင့်နေတဲ့ ဂိုဏ်းချုပ်တွေနဲ့ အကြီးအကဲတွေလည်း ဒီဟိန်းသံကို ကြားလိုက်ရပြီး အံ့ဩသွားကြသည်။
"ဒါ... ဒါ နဂါးဟိန်းသံ မဟုတ်လား"
နဂါးမျိုးနွယ်ဆိုတာ မိစ္ဆာလောကမှာ အမြင့်ဆုံး မျိုးနွယ်စုပါ။ ဒီအလယ်ပိုင်းတိုက်ကြီး လျှို့ဝှက်နယ်မြေထဲမှာ နဂါးမျိုးနွယ် ရှိတယ်ဆိုတာမျိုး တစ်ခါမှ မကြားဖူးခဲ့ပါဘူး။ ဘာလို့ အခုမှ ရုတ်တရက် ပေါ်လာရတာလဲ။