အခန်း (၈၄) ငါ့လက်ထဲသာ မိလို့ကတော့ အကျိုးဆက်ကို ခံစားရစေမယ်

ထိုစကားများ ထွက်ပေါ်လာသည်နှင့်တစ်ပြိုင်နက် အကြီးအကဲလီ၏ စိတ်အာရုံမှာ အလွန်အမင်း တုန်လှုပ်ခြောက်ခြားမှုကြောင့် ထပ်မံ၍ ဗလာဖြစ်သွားရပြန်သည်။

ယဲ့ချင်းယွမ်

သူမှတ်မိသလောက်ဆိုလျှင် ထိုသူမှာဓားရှာဖွေရေးဂိုဏ်း၏ သာမန်အတွင်းစည်းတပည့်တစ်ဦးမျှသာ မဟုတ်ပါလော ထို့အပြင် မိမိတို့၏ နတ်ဘုရားသားတော်နှင့် ယဲ့ချင်းယွမ်မှာ ရင်းနှီးသော ဆက်ဆံရေးရှိသည်ဟု ကြားထားဖူးရာ အဘယ်ကြောင့် တစ်ဖက်လူက မိမိတို့၏ သားတော်ကို ဤမျှ ရက်စက်စွာ သတ်ဖြတ်ရသနည်း။

ပေ့ရှောင်မြင့်မြတ်နယ်မြေမှ အကြီးအကဲများ မျက်နှာပျက်နေစဉ်မှာပင် ကောင်းကင်အသံမြင့်မြတ်နယ်မြေဘက်မှလည်း ဒေါသတကြီး အော်ဟစ်သံများ ထွက်ပေါ်လာသည်။

"မင်း ဘာပြောလိုက်တာလဲ"

"ရွှမ်ယွဲ့ရဲ့ အသက်တံဆိပ် ကွဲသွားပြီ ဟုတ်လား"

နတ်ဘုရားနယ်မြေနှစ်ခုမှ သားတော်နှင့် သမီးတော်တို့၏ ဆက်တိုက်သေဆုံးမှု သတင်းမှာ မုန်တိုင်းတစ်ခုကဲ့သို့ လျင်မြန်စွာ ပျံ့နှံ့သွားပြီး ဂိုဏ်းအသီးသီးမှ အရှိန်အဝါကြီးသူများကို အံ့အားသင့်စေခဲ့သည်။ သူတို့နှစ်ဦးမှာ ပါရမီထူးချွန်ရုံမက ထူးခြားသော ခန္ဓာကိုယ်ဖွဲ့စည်းပုံကိုပင် ပိုင်ဆိုင်ထားသူများ ဖြစ်သည်။

"မဖြစ်နိုင်တာ လျှို့ဝှက်နယ်မြေထဲမှာ တစ်ခုခု ထူးခြားတာ ပေါ်လာလို့များလား"

"မဖြစ်နိုင်ဘူး ငါတို့ဂိုဏ်းက တပည့်တွေ သေကျေတာရှိပေမဲ့ ထိပ်တန်းပါရမီရှင်တွေရဲ့ တံဆိပ်တွေကတော့ အကောင်းအတိုင်းပဲ။ လျှို့ဝှက်နယ်မြေထဲမှာ ထူးခြားတဲ့ အန္တရာယ်ရှိနေတာ မဟုတ်နိုင်ဘူး။"

အစွမ်းထက်သော ဂိုဏ်းဝင်တစ်ဦးက ခန့်မှန်းလိုက်သည်မှာ  "ယဲ့ချင်းယွမ်က ဝေထျန်းချင်းကို သတ်လိုက်တယ်လို့ ငါကြားတယ်။ ရွှမ်ယွဲ့နဲ့ သူတို့ကလည်း ရင်းနှီးကြတာဆိုတော့ အခု ရွှမ်ယွဲ့ပါသေသွားပြီဆိုရင် ဒါဟာ ယဲ့ချင်းယွမ်ရဲ့ လက်ချက်ဖြစ်ဖို့ များတယ်"

"မဖြစ်နိုင်တာ ယဲ့ချင်းယွမ်ရဲ့ အစွမ်းက သူတို့နှစ်ယောက်ထက် အများကြီး နိမ့်တာပဲ။ ဘယ်လိုလုပ် ဒီလောက် အချိန်တိုအတွင်းမှာ သူတို့ကို သတ်နိုင်မှာလဲ"

"ယဲ့ချင်းယွမ်က သူတို့ရဲ့ ယုံကြည်မှုကို အသုံးချပြီး ကျောပြင်ကို ဓားနဲ့ထိုးတာ ဖြစ်နိုင်တာပဲ"

ကျင့်ကြံသူများစွာမှာ အမျိုးမျိုး ဆွေးနွေးနေကြသော်လည်း အမှန်တရားကို သိရှိရန်မှာ တပည့်များ လျှို့ဝှက်နယ်မြေမှ ပြန်ထွက်လာသည်အထိ စောင့်ဆိုင်းရမည် ဖြစ်သည်။

တစ်ချိန်တည်းမှာပင်အလယ်ပိုင်းတိုက်ကြီး လျှို့ဝှက်နယ်မြေ အတွင်း၌။

ဝိညာဉ်စွမ်းအားကုန်ခမ်းလုနီးပါး ဖြစ်နေသော ယဲ့ချင်းယွမ်မှာ တောအုပ်အတွင်း အသည်းအသန် ထွက်ပြေးနေရသည်။

သူ့နောက်တွင် ဂိုဏ်းပေါင်းစုံမှ တပည့်များက အနီးကပ် လိုက်လံတိုက်ခိုက်နေကြပြီး အထူးသဖြင့် ပေ့ရှောင်သန့်စင်နယ်မြေမှ လူများမှာ ဒေါသတကြီးဖြင့် သူ့ကို သတ်ဖြတ်ရန် ကြိုးစားနေကြသည်။

"တောက် ဒီနေ့ ဒီကောင့်ကို အမိဖမ်းပြီး ဝေထျန်းချင်းအတွက် ကလဲ့စားချေရမယ်"

ဒီလူတွေ ရူးနေကြတာလား။ ယဲ့ချင်းယွမ်မှာ မောဟိုက်စွာ ပြေးလွှားရင်း ကျိန်ဆဲနေမိသည်  "ငါ ဘယ်တုန်းက အဲဒီ ဝေထျန်းချင်းကို သတ်လိုက်လို့လဲ?! ဒါက တမင် လုပ်ကြံစွပ်စွဲတာပဲ"

သူသည် အမွေအနှစ်ဂူမှ ရတနာသူခိုးအဖြစ် စွပ်စွဲခံရရုံမက အခုတော့ လူသတ်သမားအဖြစ်ပါ အပူကပ်ခံနေရပြီ ဖြစ်သည်။ "ဒါဟာ တစ်နေရာရာမှာ ပုန်းနေတဲ့ကောင်က ငါ့ကို တမင် အပြစ်ပုံချနေတာ သေချာတယ်"

ယဲ့ချင်းယွမ်၏ မျက်လုံးများမှာ ဒေါသကြောင့် နီမြန်းနေပြီး "ငါ့လက်ထဲသာ မိလို့ကတော့ အကျိုးဆက်ကို ခံစားရစေမယ်"

ကူဟန်ကမူ သစ်ပင်ကြီးတစ်ပင်ကို မှီ၍ စားစရာဝိညာဉ်သီးတစ်လုံးကို အေးအေးဆေးဆေး စားရင်း ယဲ့ချင်းယွမ်ကို ကြည့်ကာ သက်ပြင်းချလိုက်သည်။

တစ်ဖက်က ကြည့်ရင်တော့ ဒီကောင်က တကယ်ကို မသေနိုင်တဲ့ ပိုးဟပ်ပဲ။ ဇာတ်လိုက်ပီပီ သူသည် ကျောက်ရုပ်များ၏ ရိုက်နှက်မှုကို ခံရသည် လူအုပ်ကြီး၏ ဝိုင်းဝန်းတိုက်ခိုက်မှုကို ခံရသည် အခု ဝိညာဉ်စွမ်းအား ကုန်ခမ်းနေသည့်တိုင် ခွေးတစ်ကောင်ထက်ပင် မြန်အောင် ပြေးနိုင်သေးသည်။

"ဒါပေမဲ့ အတွေ့အကြုံအရဆိုရင် ယဲ့ချင်းယွမ် ဒီလောက်ထိ အကြပ်ရိုက်သွားတဲ့အခါ" ကူဟန်က တိုးတိုးလေး ရေရွတ်လိုက်သည် "သူ့ရဲ့ဇာတ်လိုက် အရှိန်အဝါပွင့်လာတာ ဒါမှမဟုတ် ဝှက်ဖဲတစ်ခုခု သုံးတော့မှာပဲ"

ကူဟန်သည် လင်ရွှမ်ယွဲ့ကို သတ်စဉ်က သူမ၏ ဝိညာဉ်အကြွင်းအကျန်ကို စစ်ဆေးခဲ့ရာ ယဲ့ချင်းယွမ်၏ လည်ပင်းတွင် ဆွဲထားသော ကျောက်စိမ်းဆွဲသီးမှာ လျှို့ဝှက်နယ်မြေမြေပုံနှင့် ဆက်စပ်နေကြောင်း သိရှိထားသည်။ ၎င်းမှာ ယဲ့ချင်းယွမ်၏ အဓိက ဝှက်ဖဲဖြစ်နိုင်သလို သူ့နောက်ကွယ်က မိသားစုနှင့်လည်း ပတ်သက်နေပေလိမ့်မည်။

ရှေးဟောင်းအပျက်အစီးတစ်ခု၏ အတွင်း၌လျူရုယန်၏ စိုးရိမ်တုန်လှုပ်သံ ထွက်ပေါ်လာသည်။ "အစ်မကြီး ချင်းယွမ်မောင်လေးက စောစောကတည်းက ငါတို့ကို အကူအညီတောင်းတဲ့ အချက်ပြမှုတွေ ပို့နေတာ ငါတို့ တကယ်ပဲ သွားမကယ်တော့ဘူးလား"

သူမအတွက်မူ ယဲ့ချင်းယွမ်သည် မိမိတို့မြစ်စတီကန်းတောင်ထိပ်မှ တပည့်တစ်ဦးဖြစ်သလို ဆရာ့၏ တိုက်ရိုက်တပည့်လည်း ဖြစ်ရာ သူ့ကို ဒီအတိုင်း သေခိုင်းရန်မှာ စိတ်မသက်မသာ ဖြစ်နေမိသည်။ လော့ပိုင်ကျီကလည်း သူမသည် ဓားသမားတစ်ဦးဖြစ်ရာ သူရဲကောင်းပီပီ မောင်လေးကို ကယ်တင်လိုသော ဆန္ဒရှိနေသည်။

ချူယိုဝေကမူ မျက်မှောင်ကြုတ်လျက် အေးစက်စွာ ပြောလိုက်သည်။ "သွားချင်ရင် သွားကြ ဒီနေရာမှာ ငါရှာနေတဲ့အရာ ရှိနေနိုင်တယ်။ ဒါကိုမတွေ့မချင်း ငါမထွက်သွားဘူး။"

ချူယိုဝေမှာ ယခင်ဘဝက သူမ၏ အစ်ကိုကြီး (ကူဟန်) ခံစားခဲ့ရသော နာကျင်မှုများကို ပြန်လည် နားလည်နိုင်ရန်နှင့် ပေးဆပ်နိုင်ရန်အတွက် ပြန်လည်မွေးဖွားခြင်းနတ်ဘုရားမှန်ကို ရှာဖွေနေခြင်း ဖြစ်သည်။ ၎င်းမှာ ရှေးဟောင်းခေတ် အင်ပါယာလက်နက်တစ်ခုဖြစ်ပြီး အတိတ်ဘဝ မြင်ကွင်းများကို ပြန်လည် မြင်တွေ့စေနိုင်စွမ်း ရှိသည်။

"ဒါပေမဲ့ ချင်းယွမ်မောင်လေးက အသက်အန္တရာယ် ကြုံနေရတာလေ" လျူရုယန်က ဆက်၍ နားချနေသည် "အစ်မကြီး ချင်းယွမ်မောင်လေးက အစ်ကိုကြီးကို မိစ္ဆာသူလျှိုလို့ စွပ်စွဲခဲ့တာ မှန်ပေမဲ့ အခုတော့ အမှန်တရားက ပေါ်နေပြီပဲ။ တကယ့်သူလျှိုက တခြားလူလေ ဒီလို ကိစ္စအသေးအမွှားလေးအတွက်နဲ့ မောင်လေးကို ဒီအတိုင်း ပစ်မထားသင့်ဘူး"