အခန်း (၈၂) ထပ်ပြီး အပြစ်ပုံချခံရပြန်ပြီ
အမွေအနှစ်ဂူရဲ့ အဝင်ဝမှာ လေထုတစ်ခုလုံး တိတ်ဆိတ်ငြိမ်သက်နေသည်။ အထူးသဖြင့် လင်ရွှမ်ယွဲ့ရဲ့ လှပတဲ့မျက်လုံးတွေဟာ အံ့အားသင့်မှုကြောင့် ပြူးကျယ်နေပြီး သူမမျက်နှာမှာ မယုံကြည်နိုင်မှုတွေ ပြည့်နှက်နေသည်။
ယဲ့ချင်းယွမ်က သူမ မသိအောင် ဘယ်အချိန်မှာ ဒီလောက်များပြားတဲ့ ရတနာတွေကို တိတ်တဆိတ် သိမ်းဆည်းလိုက်တာလဲ သူမက အစောင့်အရှောက် ကျောက်ရုပ်နှစ်ကောင်နဲ့ အသေအလဲ တိုက်ခိုက်နေချိန်မှာ သူက လျှို့ဝှက်နေရာတစ်ခုကို ရှာတွေ့ပြီး ရတနာတွေကို ခူးဆွတ်ခဲ့တာလား။
ဒီကိစ္စရဲ့ နောက်ကွယ်က အမှန်တရားက ဘာပဲဖြစ်ဖြစ် အခု သေချာနေတာတစ်ခုကတော့ ယဲ့ချင်းယွမ်ဟာ တကယ်ပဲ အကျိုးအမြတ်တွေ ရရှိခဲ့ပြီး အဲဒါကို လူတိုင်း (သူမအပါအဝင်) မသိအောင် နည်းလမ်းတစ်ခုခုနဲ့ ဖုံးကွယ်ထားခဲ့တာပါပဲ။
"ယဲ့ချင်းယွမ် မင်းဒီလိုလူစားမျိုး ဖြစ်လိမ့်မယ်လို့ ငါတကယ်ကို မထင်ထားခဲ့ဘူး"
လင်ရွှမ်ယွဲ့က နာကျည်းစွာနဲ့ ပြောလိုက်သည် "မင်းနဲ့ ပူးပေါင်းနေတဲ့ ငါ့ကိုတောင် မင်းက လိမ်ညာခဲ့တာလား"
ယဲ့ချင်းယွမ်က "ဒီရတနာတွေက ငါ့ဆီကို အလိုလို ရောက်လာတာပါ" လို့ ပြောတာဟာ သူမရဲ့ ထင်မြင်ချက်ထက် အဆပေါင်းများစွာ ပိုပြီး ရယ်စရာကောင်းနေသည်။
"ဒီကောင်စုတ်"
"အခုထိ ခေါင်းမာနေတုန်းပဲ မင်းကတော့ တကယ့်ကို သေတွင်းထဲ ရောက်မှပဲ နောင်တရမယ့်ကောင်ပဲ" ဒေါသကြီးတဲ့ကွေ့ယီဂိုဏ်း ခေါင်းဆောင်က ယဲ့ချင်းယွမ်ကို ချက်ချင်းပဲ လက်ဝါးနဲ့ ရိုက်ချလိုက်သည်။
သတိပြန်ဝင်လာတဲ့ ယဲ့ချင်းယွမ်က မျက်မှောင်ကြုတ်လိုက်ပြီး သူ့ရဲ့ အနက်ရောင် ဓားကြီးကို ဆွဲထုတ်ကာ ပြန်လည် တိုက်ခိုက်လိုက်သည်။
ဝုန်းးးး
ဓားအရှိန်အဝါတွေ ထွက်ပေါ်လာပြီး ယဲ့ချင်းယွမ်က ဒီလောက်အမြန် ပြန်တိုက်လိမ့်မယ်လို့ ဘယ်သူမှ မထင်ထားကြပါဘူး။ ကွေ့ယီဂိုဏ်းခေါင်းဆောင်ဟာ ဓားချက်ထိမှန်ပြီး လေထဲကို လွင့်ထွက်သွားသည်။ ယဲ့ချင်းယွမ်ရဲ့ ဒီလုပ်ရပ်က ပေါက်ကွဲစေတတ်တဲ့ ယမ်းပုံထဲကို မီးစချလိုက်သလို ဖြစ်သွားေစသည်။
"ဒီကောင်က ဟန်ဆောင်နေတာပဲ"
"သူ သူတော်စင်အမွေအနှစ်ကို အကုန်ယူထားတာ သေချာတယ်"
"အားလုံး တူတူတက်ကြ ဒီနှစ်ယောက်ကို အရင်ဖမ်းပြီးမှ ရတနာတွေကို ငါတို့ အစွမ်းအလိုက် ခွဲယူကြမယ်" လူအုပ်ကြီးက ယဲ့ချင်းယွမ်နဲ့ လင်ရွှမ်ယွဲ့ကို ရတနာအပြည့်ရှိတဲ့ သိုးအုပ်ကြီးတွေလို သဘောထားပြီး ဝိုင်းအုံ တိုက်ခိုက်ကြတော့သည်။
"ငါ ဘာမှမရဘူးလို့ ပြောနေတယ်လေ"
"မင်းတို့ ရှာချင်ရင် ယဲ့ချင်းယွမ်ကိုပဲ ရှာကြ" လင်ရွှမ်ယွဲ့ကတော့ အနစ်နာဆုံးပါပဲ။ သူမ တကယ် ဘာမှမရခဲ့ဘဲ ယဲ့ချင်းယွမ်နောက်လိုက်ပြီး ဖုန်တွေပဲ စားခဲ့ရတာပါ။ အခုတော့ ယဲ့ချင်းယွမ်ရဲ့ အပြစ်တွေကြောင့် သူမပါ ရောပြီး ဒုက္ခရောက်နေရပါပြီ။
သူမ တကယ့်ကို နောင်တရနေပါတယ်။ ဒီအရူး ယဲ့ချင်းယွမ်ကို ထပ်ခါတလဲလဲ ယုံကြည်ခဲ့မိတာကိုး ဒါကနဂါးရွှေရောင် ကံကောင်းခြင်း မဟုတ်ဘဲ ကျိန်စာပဲ ဖြစ်ရမယ်။
[တင်း ဇာတ်လိုက်မ လင်ရွှမ်ယွဲ့နှင့် ယဲ့ချင်းယွမ်တို့၏ ဆက်ဆံရေး လုံးဝပျက်ပြားသွားကြောင်း သိရှိရပါသည်။ ဗီလိန်မစ်ရှင် အောင်မြင်သည့်အတွက် ဆုလာဘ်အဖြစ် ဗီလိန်မှတ် ၇၀၀၀ ရရှိပါသည်]
အမှောင်ထဲက ကြည့်နေတဲ့ ဂူဟန်က ပြုံးလိုက်သည်။ လင်ရွှမ်ယွဲ့နဲ့ ယဲ့ချင်းယွမ်တို့ ဆက်ဆံရေး ပျက်ပြားသွားပြီ ဆိုပေမဲ့ သူက လင်ရွှမ်ယွဲ့ကို လွှတ်ပေးဖို့ အစီအစဉ် မရှိပါဘူး။ နောင်တစ်ချိန်မှာ သူတို့ ပြန်အဆင်ပြေသွားရင် ဒုက္ခပေးနိုင်တာကြောင့် သူမကိုပါ အပြတ်ရှင်းဖို့ သူ ဆုံးဖြတ်ထားသည်။
"တစ်ယောက်ယောက်က မင်းကို ထပ်ပြီး လုပ်ကြံလိုက်ပြန်ပြီ" ဆရာပိုင်ရဲ့ စကားကို ကြားလိုက်ရတဲ့အခါ ယဲ့ချင်းယွမ်ရဲ့ မျက်နှာက ပိုဆိုးသွားပါတယ် "တောက် ဘယ်သူလဲ ဘာလို့ ငါ့ကိုပဲ အမြဲ ပစ်မှတ်ထားနေရတာလဲ"
ပထမက မိစ္ဆာဂိုဏ်းသူလျှိုလို့ စွပ်စွဲခံရတယ် အခု လျှို့ဝှက်နယ်မြေထဲ ရောက်တော့လည်း ဘယ်သူမှန်းမသိတဲ့လူရဲ့ အပြစ်ပုံချခြင်းကို ခံနေရပြန်ပါပြီ။ သူ့ဘဝရဲ့ ကံအဆိုးဆုံး အချိန်တွေပါပဲ။
"ဆရာပိုင် အဲဒီလူက ဘယ်သူလဲဆိုတာ ဆရာ သိလား သူဘယ်အချိန်မှာ ငါ့အိတ်ထဲ ဒီပစ္စည်းတွေ ထည့်သွားတာလဲ ငါဘာလို့ လုံးဝ သတိမထားမိတာလဲ"
"ငါလည်း သေချာမသိဘူး ဒါပေမဲ့ မင်းဂူထဲစဝင်တုန်းက တခြားလူတစ်ယောက်ရဲ့ အရှိန်အဝါကို ငါ ခံစားမိသလိုပဲ" ဆရာပိုင်က သက်ပြင်းချပြီး "ဒါပေမဲ့ အဲဒီလူရဲ့ အရှိန်က အရမ်းမြန်လွန်းတယ်။ ငါတောင် ထင်ယောင်ထင်မှား ဖြစ်တာလို့ ထင်လိုက်မိလို့ မင်းကို ချက်ချင်း မပြောမိလိုက်တာ"
ယဲ့ချင်းယွမ် ပိုပြီး ထိတ်လန့်သွားသည်။ ဆရာပိုင်ဟာ အခု ဝိညာဉ်ခန္ဓာပဲ ရှိတော့တယ် ဆိုပေမဲ့ သူ့ရဲ့ အစွမ်းက အရင်က အရမ်းကြီးမားခဲ့တာပါ။ သူတောင် သေချာမမြင်လိုက်ရတဲ့ လူဆိုရင် အဲဒီလူရဲ့ ခြေလှမ်းပညာက ဘယ်လောက်တောင် မြင့်မားမလဲဆိုတာ တွေးကြည့်လို့တောင် မရပါဘူး။
ဒါပေမဲ့ စဉ်းစားနေဖို့ အချိန်မရှိတော့ပါဘူး။ ကျင့်ကြံသူတွေက ထပ်တိုက်လာပြန်ပါပြီ။
ဝမ်ထိန်က သူ့ရဲ့ ငွေရောင်လှံရှည်ကြီးနဲ့ ယဲ့ချင်းယွမ်ကို ပြင်းထန်စွာ ထိုးနှက်လိုက်သည်။ ပြင်းထန်တဲ့ လေဖိအားကြောင့် ယဲ့ချင်းယွမ်ရဲ့ အရိုးတွေတောင် မြည်ဟည်းလာသည်။
ယဲ့ချင်းယွမ်ရဲ့ မျက်လုံးတွေက အေးစက်သွားပြီး သူ့ရဲ့ ရင်ဘတ်ထဲက နဂါးတံဆိပ် စွမ်းအားတွေ နိုးကြားလာသည်။ သူ့နောက်မှာ ရွှေရောင်နဂါးရိပ်တစ်ခု ပေါ်လာပြီး ကောင်းကင်ယံကို ဟိန်းဟောက်လိုက်သည်။
ဒါကတော့ "စစ်မှန်သော နဂါးဟိန်းသံ"ဆိုတဲ့ နတ်ဘုရားစွမ်းအားပါ။ ဒီဟိန်းသံကြောင့် ဝမ်ထိန်ရဲ့ တိုက်ကွက် ပျက်စီးသွားရုံတင်မကဘဲ ဝိုင်းထားတဲ့ ကျင့်ကြံသူတွေအားလုံး ခဏတာ မှင်သက် တောင့်တင်းသွားကြသည်။ ဒီအခွင့်အရေးကို သုံးပြီး ယဲ့ချင်းယွမ်ဟာ မြားတစ်စင်းလို အမြန်ဆုံး ပြေးထွက်သွားတော့သည်။
"ဒီနေ့ အရှက်ကွဲတာကို ငါမှတ်ထားတယ် နောက်ကျရင် အဆပေါင်းများစွာ ပြန်ပေးဆပ်စေရမယ်" ဒီလိုပြေးရတာ ရှက်စရာကောင်းပေမဲ့ ဇာတ်လိုက်ပီပီ စကားကြီးစကားကျယ်တော့ ပြောသွားရဦးမှာပေါ့။
"ဒီကောင်စုတ် အခုထိ ရမ်းကားနေတုန်းပဲ"
"အမြန်လိုက်ကြ သူ့ကို သတ်ကြ" ကျင့်ကြံသူတွေက ဒေါသတကြီးနဲ့ ယဲ့ချင်းယွမ်နောက်ကို လိုက်သွားကြတော့သည်။
လင်ရွှမ်ယွဲ့လည်း အကျပ်ရိုက်နေပေမဲ့ သူမရဲ့ တပည့်တွေ ရောက်လာတာကြောင့် ဘေးကင်းရာကို လွတ်မြောက်ခဲ့သည်။
"နတ်ဘုရားမ ဟိုယဲ့ချင်းယွမ်ကို သွားကယ်ရမလား" လို့ တပည့်တစ်ယောက်က မေးလိုက်သည်။
"ထားလိုက်စမ်းပါ သူသေရင်တောင် ပိုကောင်းဦးမယ်" လင်ရွှမ်ယွဲ့က ဒေါသတကြီး ပြောလိုက်သည် "သူနဲ့သာ မပတ်သက်မိရင် ငါ ဒီလို ပြဿနာတွေနဲ့ တိုးမှာမဟုတ်ဘူး"
သူမ နှုတ်ကသာ ပြောနေပေမဲ့ စိတ်ထဲမှာတော့ ယဲ့ချင်းယွမ်ရဲ့ ထူးခြားတဲ့ ခံနိုင်ရည်ကို အံ့ဩနေမိသည်။ မိစ္ဆာအုပ်ကြီးကြားထဲမှာလည်း မသေဘူး အခု လူပေါင်းစုံ ဝိုင်းတိုက်တာလည်း မသေဘူး။ သူမ စိတ်ထဲမှာတော့ ယဲ့ချင်းယွမ်နဲ့ ပြန်အဆင်ပြေချင်တဲ့ စိတ်လေးက ရှိနေပါသေးတယ်။
သူမ သက်ပြင်းချပြီး ယဲ့ချင်းယွမ်ကို ကူညီဖို့ ပြောမလို့ ပြင်လိုက်စဉ်မှာပဲ... ခနဲ့တဲ့တဲ့ ရယ်သံလေးတစ်ခု ထွက်ပေါ်လာသည်။
"ငါ တကယ် သိချင်မိတယ်"
"ယဲ့ချင်းယွမ်မှာ ရှေးဟောင်းကံကြမ္မာတွေ ရှိနေတယ်လို့ မင်း ဘာလို့ ဒီလောက်တောင် ယုံကြည်နေရတာလဲ"