အခန်း (၇၆) ပေါ့ဆသွားလို့ မရှောင်လိုက်မိတာပါ

အဲဒီအချိန်မှာ လေထုတစ်ခုလုံး ခဲသွားသလို ဖြစ်သွားပြီး ကမ္ဘာကြီးက တိတ်ဆိတ်သွားသည့။ ကျင့်ကြံသူအားလုံးဟာ ကျောက်ရုပ်တွေလို မှင်သက်ပြီး မလှုပ်မယှက် ရပ်နေမိကြသည်။

ဒါ... ဒါက မဟုတ်သေးဘူးလေ ဟုတ်တယ်မလား။

စောစောကတင် ယဲ့ချင်းယွမ်ပြသခဲ့တဲ့ ယုံကြည်မှုတွေ အရာအားလုံးကို ထိန်းချုပ်နိုင်တယ်ဆိုတဲ့ အမူအယာတွေအရဆိုရင် တစ်ဖက်လူက ဒီမိစ္ဆာတွေကို အေးအေးဆေးဆေး ကိုင်တွယ်နိုင်ရမှာ မဟုတ်လား။

အခုတော့ ဘာလဲ ရင်ဆိုင်မှု တစ်ကြိမ်တည်းနဲ့တင် ခွေးသေတစ်ကောင်လို လွင့်ထွက်သွားတာလား။

ကူဟန်ရဲ့ အမိန့်ကြောင့် အစွမ်းကုန် တိုက်ခိုက်လိုက်တဲ့ ရိုင်းစိုင်းသော နွားရိုင်းမိစ္ဆာတောင်မှ ကြောင်တောင်တောင် ဖြစ်သွားသည်။

"မဟုတ်မှလွဲရော ဒီလူသားက အားနည်းရုံတင်မကဘဲ ဒီလောက်တောင် အတာလား" လို့ သူ တွေးနေမိသည်။

သူ့ရဲ့ တိုက်ခိုက်မှုက ပြင်းထန်ပေမဲ့ တစ်ဖက်လူက ရှောင်ချင်ရင် ရှောင်လို့ရနေတာပါ။ ဒါကြောင့် သူက တစ်ချက်တည်းနဲ့ ပြိုင်ဘက်ကို အပြင်းအထန် ဒဏ်ရာရစေနိုင်မယ်လို့ မထင်ထားခဲ့ပါဘူး။

သူက တစ်ဖက်လူရဲ့ ဉာဏ်ရည်ကို အထင်ကြီးမိသွားတာပါ။ ဒီလူကတော့ လူအတစ်ယောက်လို ဘာမှမလုပ်ဘဲ အတိုက်ခံဖို့ စောင့်နေခဲ့တာကိုး။

လေထုက ပိုပြီးတော့ တိတ်ဆိတ်ကာ အနေရခက်လာသည်။ နွားရိုင်းမိစ္ဆာနဲ့ တခြားမိစ္ဆာတွေကလည်း တိတ်ဆိတ်နေကြသလို ယဲ့ချင်းယွမ် အံ့ဖွယ်အမှု လုပ်ပြမှာကို စောင့်ကြည့်နေတဲ့ ပရိသတ်တွေကလည်း ဆွံ့အကုန်ကြပါပြီ။

အထူးသဖြင့် လင်ရွှမ်ယွဲ့ပါပဲ သူမဟာ သူမရဲ့ ကံကြမ္မာမျက်လုံးမှာ တစ်ခုခု ချို့ယွင်းနေပြီလားလို့တောင် သံသယဝင်လာသည်။

သူမဟာ လူမှားကြည့်မိတာလား အခုအချိန်မှာ သူမဟာ ယဲ့ချင်းယွမ်အတွက် အစား ရှက်ပေးနေရသည်။ ဘယ်သူကမှ သူမနဲ့ ယဲ့ချင်းယွမ်နဲ့ သိတယ်လို့ မထင်အောင် မြေကြီးထဲသာ ငုပ်လျှိုးသွားချင်စိတ် ပေါက်နေပါပြီ။

မတိုက်နိုင်ရင်လည်း မတိုက်နိုင်ဘူး ပြောပေါ့ အခုတော့ ဘာမှမလုပ်ဘဲ နွားရိုင်းတိုက်တာကို အေးဆေးခံနေတာက တကယ့်ကို လူအတဲ့ လုပ်ရပ်ပဲ မဟုတ်လား။

"ဟွတ်... ဟွတ်... ဟွတ်"

ဇာတ်လိုက်ပီပီ ယဲ့ချင်းယွမ်ကတော့ ပိုးဟပ်တစ်ကောင်လို မသေနိုင်တဲ့ စွမ်းအား ရှိသည်။ ဒါပေမဲ့ သူ့ရဲ့ အခြေအနေကတော့ မလှပပါဘူး။

အဝေးက အပျက်အစီးတွေကြားကနေ ဖုန်တထောင်းထောင်း ဆံပင်ဖရိုဖရဲနဲ့ သူ ပြန်တွားထွက်လာသည်။ သူဟာ အရေးပေါ်အနေနဲ့ သူ့ရဲ့ ရုပ်သေးတစ်ရုပ်ကို အစားထိုး အသုံးချလိုက်လို့ အသက်မသေခဲ့တာပါ။

ဒါပေမဲ့ ခန္ဓာကိုယ်ရဲ့ နာကျင်မှုထက် စိတ်ဓာတ်ပိုင်းဆိုင်ရာ အရှက်ရမှုက သူ့ကို ပိုပြီး နှိပ်စက်နေသည်။

သူ ကျင့်ကြံခြင်းလမ်းစဉ်ပေါ် ရောက်ကတည်းက ဒီလောက် အရှက်ကွဲရတဲ့ အခြေအနေမျိုး တစ်ခါမှ မကြုံဖူးပါဘူး ဒါဟာ သူ့ရဲ့မိစ္ဆာဧကရာဇ်သွေးအနှစ်က ပထမဆုံးအကြိမ် သိသိသာသာ ချို့ယွင်းသွားတာလည်း ဖြစ်သည်။

"ခုနက ငါ ပေါ့ဆသွားလို့ပါ... အရှိန်မတင်လိုက်ရလို့"

"ဒီတစ်ခါတော့ တကယ် အတည်လုပ်တော့မယ်"

ဒီစကားကို ကြားရတဲ့အခါ ကျင့်ကြံသူ အများအပြားဟာ ယဲ့ချင်းယွမ်အတွက် အစား ရှက်လွန်းလို့ ခြေမနဲ့ မြေကြီးကိုတောင် ကုတ်မိမတတ် ဖြစ်သွားကြသည်။ ဒီကောင်က တကယ်ပဲ အရှက်မရှိတာလား ဒီလိုစကားမျိုးကိုတောင် ထွက်ပြောရဲသေးတယ်။

လင်ရွှမ်ယွဲ့ကတော့ ဆက်မကြည့်နိုင်တော့ပါဘူး။ သူမဟာ ယဲ့ချင်းယွမ်နဲ့ ပူးပေါင်းမိတာကို နောင်တတွေ အကြီးအကျယ် ရနေပါပြီ။

ဝေထျန်းချင်းနဲ့ အတူတူ ထွက်မသွားမိတာကိုလည်း နောင်တရနေသည်။ သူမ ဘယ်လိုများ မျက်စိကန်းပြီး ဒီလိုလူမျိုးကို ယုံမိပါလိမ့်။

"ဆရာပိုင် ကျွန်တော့် ခန္ဓာကိုယ်ကို ဆရာ ခဏထိန်းချုပ်ပေးပါ။ ရှေ့က မိစ္ဆာတွေကို ရှင်းပစ်ပေးပါဦး"

ယဲ့ချင်းယွမ်က အရှက်ရမှုကို အံကြိတ်ပြီး သူ့ထဲက ဝိညာဉ်အဘိုးကြီးကို အကူအညီတောင်းလိုက်ပါတယ်။

"ဟဲဟဲ... ဒီအကောင်လေးတွေကို ထားလိုက်စမ်းပါ။ ဒီမိစ္ဆာတစ်ရာတောင်ကြားထဲက မိစ္ဆာအားလုံးကိုတောင် ငါရှင်းပေးလို့ရတယ်" ဆရာပိုင်ရဲ့ အဖြေကြောင့် ယဲ့ချင်းယွမ် ယုံကြည်မှု ပြန်ရလာသည်။

"ခုနကဟာက သွေးပူလေ့ကျင့်ခန်း လုပ်တာပါ။ အခုမှ တကယ့်ပွဲကစမှာ ဒီမိစ္ဆာ နည်းနည်းလေးနဲ့ ငါ့ကို သတ်ဖို့ မလုံလောက်သေးဘူး" ယဲ့ချင်းယွမ်က ဓားနက်ကြီးကို ကိုင်ပြီး တိုက်ခိုက်ဖို့ ပြင်လိုက်သည်။

ဝုန်းးး

ဒါပေမဲ့ အဲဒီအချိန်မှာပဲ တောင်ကြားအနက်ပိုင်းကနေ အပြင်းအထန် တုန်ခါမှုကြီး ဖြစ်ပေါ်လာသည်။ မိစ္ဆာတွေရဲ့ ဟိန်းဟောက်သံတွေက တစ်လှိုင်းပြီးတစ်လှိုင်း ထွက်ပေါ်လာသည်။

ကျင့်ကြံသူတွေဟာ ကျောချမ်းသွားပြီး ထိတ်လန့်တကြား ကြည့်လိုက်တဲ့အခါ တောင်ကြားထဲကနေ မရေမတွက်နိုင်တဲ့ နီရဲတဲ့ မျက်လုံးတွေနဲ့အတူ မိစ္ဆာအုပ်ကြီးဟာ လှိုင်းလုံးကြီးတွေလို ပြေးထွက်လာတာကို မြင်လိုက်ရသည်။

"ယဲ့ချင်းယွမ် မင်း... ဒီကောင်စုတ်"

ကျင့်ကြံသူတစ်ယောက်က ဒေါသတကြီး ဆဲဆိုလိုက်ပါတယ် "မင်း ကြွားချင်တာနဲ့ မိစ္ဆာတစ်ရာတောင်ကြားထဲက မိစ္ဆာတွေအကုန်လုံး နိုးကုန်ပြီ မဟုတ်လား"

သူတို့တွေဟာ မိစ္ဆာတွေ အိပ်ပျော်နေတုန်း ခိုးဝင်ဖို့ စောင့်နေကြတာပါ။ အခုတော့ ယဲ့ချင်းယွမ်ရဲ့ လုပ်ရပ်တွေကြောင့် မိစ္ဆာတွေအကုန် ထွက်လာပါပြီ။ အခွင့်အရေး ရဖို့ထက် အသက်ရှင်အောင် ပြေးနိုင်ဖို့က ပိုအရေးကြီးသွားပါပြီ။

ယဲ့ချင်းယွမ်ရဲ့ မျက်နှာဟာ ပြာနှမ်းသွားပြီး "ဆရာပိုင် မိစ္ဆာတွေက အရမ်းများနေတယ်... ဆရာ တကယ် နိုင်ပါ့မလား" လို့ မေးလိုက်သည်။

ဆရာပိုင်က ခဏတိတ်သွားပြီးမှ "အင်း အရေအတွက်က ငါထင်ထားတာထက် ပိုများနေတယ် မဖြစ်နိုင်လောက်ဘူး။ ဘေးကင်းဖို့အတွက် အရင်ဆုံး မဟာဗျူဟာမြောက်ဆုတ်ခွာခြင်းလုပ်ကြတာပေါ့"

ဒီစကားက ယဲ့ချင်းယွမ်ကို လုံးဝ စိတ်ပျက်သွားစေသည်။

"ဆရာပိုင် ဆရာကတော့ ဒီနေ့ ကျွန်တော့်ကို အရှက်ခွဲလိုက်တာပဲ"

ယဲ့ချင်းယွမ်ဟာ လင်ရွှမ်ယွဲ့တို့ရှေ့မှာ အစွမ်းပြချင်ခဲ့ပေမဲ့ အခုတော့ ပိုပြီး အရှက်ကွဲသွားပါပြီ။ သူက လင်ရွှမ်ယွဲ့တို့ကို ခေါ်ပြီး ပြေးဖို့ ပြင်လိုက်ပေမဲ့ လှည့်ကြည့်လိုက်တဲ့အခါ သူ့နောက်မှာ ဘယ်သူမှ မရှိတော့ပါဘူး။ လင်ရွှမ်ယွဲ့တို့ဟာ မီတာအတော်များများအထိ ဝေးအောင် ပြေးသွားကြပါပြီ။

"နေ... နေဦး ငါ့ကို စောင့်ဦး"

ယဲ့ချင်းယွမ်က အော်ဟစ်ပြီး လင်ရွှမ်ယွဲ့နောက်ကို လိုက်ပြေးသွားသည်။

"မလာနဲ့ မင်း ငါတို့နားကို မကပ်နဲ့"

လင်ရွှမ်ယွဲ့က ထိတ်လန့်တကြား အော်လိုက်သည်။

ဒီမိစ္ဆာအုပ်ကြီးက ယဲ့ချင်းယွမ်ကြောင့် ထွက်လာတာဖြစ်ပြီး မိစ္ဆာအများစုကလည်း ယဲ့ချင်းယွမ်နောက်ကိုပဲ လိုက်နေကြတာပါ။ သူသာ သူတို့နား ကပ်လာရင် သူတို့ကိုပါ အသေတွင်းထဲ ဆွဲသွင်းသလို ဖြစ်မှာ မဟုတ်လား။

လင်ရွှမ်ယွဲ့ဟာ အခုချိန်မှာ ယဲ့ချင်းယွမ်ကို ယုံခဲ့မိတဲ့အတွက် အကြီးအကျယ် နောင်တရနေပါပြီ။ သူမသာ အချိန်ကို ပြန်လှည့်လို့ရရင် ယဲ့ချင်းယွမ်ကို ပါးရိုက်ပြီး အဝေးဆုံးကို မောင်းထုတ်ပစ်မိမှာပါ။

[ဒင် ဂုဏ်ယူပါတယ် ပိုင်ရှင်သည် ဗီလိန်ဇာတ်ကြောင်းတစ်ခုကို ပြီးမြောက်ခဲ့သည့်အတွက် ဗီလိန်မှတ် ၂၀၀၀ ရရှိပါသည်]

ဝတ်စုံဖြူဝတ်ထားတဲ့ကူဟန်တယောက် တောင်ကြားအနက်ပိုင်းကနေ အေးအေးဆေးဆေး ထွက်လာခဲ့သည်။ ယဲ့ချင်းယွမ် ပြေးသွားတဲ့ဘက်ကို ကြည့်ပြီး သူက ခပ်ပြုံးပြုံးပါပဲ။ အခုဆိုရင် တောင်ကြားထဲက ရတနာမှန်သမျှကို အမွေးတစ်ပင်မကျန် သူ သိမ်းဆည်းပြီးပါပြီ။

ပြီးတော့ သူဟာ ယဲ့ချင်းယွမ်ရဲ့ဇာတ်လိုက်စွမ်းအားကို ယုံကြည်သည်။ ဒီလို မိစ္ဆာတွေ လိုက်ဖမ်းတဲ့ ဒုက္ခကနေ ယဲ့ချင်းယွမ်ဟာ ချောက်ထဲပြုတ်ကျပြီး ရှေးဟောင်းအမွေအနှစ်တွေ အခွင့်အရေးသစ်တွေ ထပ်ရဦးမှာပါ။

ဂူဟန် လုပ်ရမှာကတော့ ရိုးရှင်းသည်။ ယဲ့ချင်းယွမ်နောက်ကို တိတ်တဆိတ် လိုက်သွားပြီး ရလာသမျှ အခွင့်အရေးတွေကို သူ့ဆီကနေ ပြန်လုဖို့ပါပဲ။

ဂူဟန်ဟာ ခြေလှမ်းတစ်လှမ်း လှမ်းလိုက်ပြီး ယဲ့ချင်းယွမ်နောက်ကို လိုက်သွားသည်။