အခန်း (၇၃) မြင့်မြတ်နယ်မြေ၏ မျိုးဆက် ကျဆုံးခြင်း
သူ့ရှေ့မှာရှိနေတဲ့ ဝတ်စုံနက်လူသားဟာ ယဲ့ချင်းယွမ်ဖြစ်တယ်လို့ ဝေထျန်းချင်းက အခိုင်အမာ ယူဆလိုက်သည်။
တစ်ဖက်လူရဲ့ ကိုယ်လုံးကိုယ်ပေါက်က ရင်းနှီးနေရုံတင်မကပါဘူး။ အဓိကအချက်ကတော့ ယဲ့ချင်းယွမ် အမြဲကိုင်လေ့ရှိတဲ့ ထူးခြားတဲ့ ဓားနက်ကြီးကို သူ ခုနတင် မြင်တွေ့ခဲ့ရလို့ပါပဲ။ ပုံစံချင်းက လုံးဝကို ထပ်တူကျနေသည်။
"ယဲ့ချင်းယွမ်လား"
ဝတ်စုံနက်အောက်က လူသားဟာ လှောင်ပြုံးတစ်ခု ပြုံးလိုက်သည်။ သူဟာ ဓားနက်ကြီးကို မြှောက်လိုက်ပြီး ပြင်းထန်တဲ့ အရှိန်နဲ့ ထပ်မံ လွှဲရိုက်လိုက်ပြန်သည်။
ဝုန်း
မျက်စိတစ်မှိတ်အတွင်းမှာတင် ဓားအရှိန်အဝါတွေဟာ ပင်လယ်လှိုင်းလုံးကြီးတွေလို ဝေထျန်းချင်းနဲ့ ပတ်ဝန်းကျင်တစ်ခုလုံးကို ဝါးမြိုပစ်မတတ် ကျရောက်လာသည်။
တစ်ဖက်လူရဲ့ ဒီလို တိုက်ခိုက်မှုတွေကြောင့် ဝေထျန်းချင်းဟာ သူ့ရှေ့ကလူဟာ ယဲ့ချင်းယွမ် ဖြစ်မယ်လို့ ပိုပြီး ယုံကြည်သွားတော့သည်။
အရင်က ဖြစ်ခဲ့တဲ့ အငြိုးအတေးကြောင့် သူတို့ကို အပြတ်ရှင်းဖို့ လုပ်နေပြီလို့ သူ ထင်မြင်သွားတာပါ။
"ဒီခွေးကောင်" ဝေထျန်းချင်းက ဆဲရေးလိုက်ပေမဲ့ တုံ့ပြန်မှုကတော့ အလွန်မြန်သည်။ သူဟာ ခါးကြားကနေ ထူးခြားတဲ့ အလင်းတန်းတွေ ထွက်ပေါ်နေတဲ့ ကျောက်စိမ်းအဆောင်တစ်ခုကို ထုတ်ပြီး ချက်ချင်း ချေဖျက်လိုက်သည်။
ဝုန်းးး
မရေမတွက်နိုင်တဲ့ အစီအရင်စာသားတွေဟာ သူ့ပတ်ပတ်လည်မှာ အကာအကွယ်နံရံကြီးတစ်ခုအဖြစ် ပေါ်လာသည်။ အဲဒီအချိန်မှာပဲ ဓားအရှိန်အဝါတွေက တရဟော ကျရောက်လာသည်။
ဖျောက် ဖျောက် ဖျောက်
အင်အားကြီးမားလှတဲ့ ဓားအရှိန်အဝါတွေကြောင့် အကာအကွယ်နံရံကြီးဟာ တုန်ခါသွားပြီး အက်ကွဲကြောင်းတွေ ထင်ကျန်ရစ်သွားသည်။
ဝေထျန်းချင်းရဲ့ မျက်လုံးတွေဟာ ထိတ်လန့်တကြားနဲ့ ကျဉ်းမြောင်းသွားသည်။ ဒီအဆောင်ဟာ သူ့ဆရာဖြစ်တဲ့ အထွတ်အထိပ်အဆင့် ပညာရှင်ကြီးက သူ့အတွက် အထူးပြုလုပ်ပေးထားတာပါ။
ဒီလျှို့ဝှက်နယ်မြေရဲ့ ကန့်သတ်ချက်အရ တာအိုပေါင်းစည်းခြင်းအဆင့်အထက် စွမ်းအားတွေကို သုံးလို့မရပေမဲ့ ဒီအဆောင်ဟာ အဲဒီနယ်မြေအတွင်းက ဘယ်လိုတိုက်ခိုက်မှုကိုမဆို ခံနိုင်ရည်ရှိရမှာပါ။
"ဒါ... ဒါ ဘယ်လိုဖြစ်နိုင်မှာလဲ" ယဲ့ချင်းယွမ်က တစ်ချိန်လုံး သူ့ရဲ့ အစွမ်းအစတွေကို ဖုံးကွယ်ထားခဲ့တာပဲလို့ ဝေထျန်းချင်း တွေးမိပြီး ပိုလို့တောင် ကြောက်လန့်သွားသည်။
ဒါပေမဲ့ သူဟာ မြောက်ပိုင်းကောင်းကင် မြင့်မြတ်နယ်မြေရဲ့သူတော်စင်သားတော် တစ်ယောက်ပီပီ တခြားဝှက်ဖဲတွေလည်း ရှိနေပါသေးတယ်။
သူဟာ ရှေးဟောင်းစာသားတွေ ပါတဲ့ အဝါရောင် အဆောင်တစ်ခုကို ထပ်မံ ထုတ်ယူပြီး ဂါထာရွတ်လိုက်သည်။ အဲဒီအဆောင်ဟာ မီးတောက်သွားပြီး ဝေထျန်းချင်းကို လှည့်ပတ်ကာ ကာကွယ်ပေးလိုက်သည်။
အဲဒီနောက် ဝေထျန်းချင်းဟာ ဟင်းလင်းပြင်ထဲကနေ ရွှေရောင်နဲ့ အနက်ရောင် ရောယှက်နေတဲ့ ဓားတစ်လက်ကို ဆွဲထုတ်ပြီး ဝတ်စုံနက်လူသားရဲ့ ဦးခေါင်းတည့်တည့်ကို အစွမ်းကုန် လွှဲရိုက်လိုက်သည်။
"သေစမ်း"
ဘုန်း
ပြင်းထန်တဲ့ ပေါက်ကွဲမှုကြောင့် ဖုန်မှုန့်တွေ ထတောက်သွားပြီး ဝတ်စုံနက်လူသား ရှိတဲ့နေရာဟာ အပျက်အစီးတွေ ဖြစ်သွားသည်။
"အောင်မြင်သွားပြီလား" လို့ ဝေထျန်းချင်း တွေးနေတုန်းမှာပဲ ဖုန်မှုန့်တွေကြားထဲကနေ သံမဏိလက်ကြီးတစ်ဖက် ထွက်ပေါ်လာပြီး ဝေထျန်းချင်းရဲ့ လည်ပင်းကို ညှပ်ရိုးကျိုးမတတ် အမိအရ ဖမ်းဆုပ်လိုက်သည်။
ဝေထျန်းချင်းဟာ ဘာမှမခုခံနိုင်ဘဲ အပေါ်ကို မြှောက်တင်ခံလိုက်ရသည်။ သူ့ရဲ့ မျက်လုံးထဲမှာတော့ ထိတ်လန့်မှုနဲ့ ဒေါသတွေ ပြည့်နှက်နေပါတယ်။ အဲဒီအချိန်မှာပဲ ဝတ်စုံနက်လူသားရဲ့ ခေါင်းစွပ်ဟာ ပြုတ်ကျသွားပြီး သူ့ရဲ့ မျက်နှာ ပေါ်လာသည်။
ဒါဟာ ယဲ့ချင်းယွမ်ပါပဲ
"မင်း ငါ့ရဲ့ ဘယ်သူဘယ်ဝါဖစ်ကြောင်း သိသွားလည်း ဘာထူးမှာလဲ" ယဲ့ချင်းယွမ် (အသွင်ဆောင်ထားသော ဂူဟန်) က လှောင်ပြုံး ပြုံးရင်း ပြောလိုက်သည်။
"မင်း ဒီမှာတင် သေသွားရင် ငါလုပ်တာလို့ ဘယ်သူမှ သိမှာမဟုတ်ဘူး။"
ဝေထျန်းချင်းဟာ သူ့ရဲ့ နောက်ဆုံးထွက်သက်မှာ စွမ်းအားအားလုံးကို စုစည်းပြီး မြောက်ပိုင်းကောင်းကင်မြင့်မြတ်နယ်မြေက တခြားတပည့်တွေဆီကို ဝိညာဉ်အသိနဲ့ သတင်းစကားတစ်ခု ပေးပို့လိုက်သည်။
"ငါ့ကို သတ်တဲ့သူဟာ ဝမ်ကျန့်ဂိုဏ်းက ယဲ့ချင်းယွမ်ပဲ"
သတင်းပေးပြီးတာနဲ့ ဝေထျန်းချင်းဟာ အသက်မဲ့သွားသည်။ သူ့ရဲ့ အလောင်းကို ဘေးကို ပစ်ချလိုက်ပြီးနောက် ယဲ့ချင်းယွမ်ရဲ့ မျက်နှာဟာ ရွံ့စေးလို အရည်ပျော်ကာ ပြောင်းလဲသွားသည်။ ခဏအကြာမှာတော့ မူလရုပ်သွင်ဖြစ်တဲ့ ကူဟန်ပြန်ပေါ်လာသည်။
"သူ သတင်းပို့လိုက်ပြီပဲ ဒါမှ ငါ့ရဲ့ ကစားပွဲက အဓိပ္ပာယ်ရှိမှာ" လို့ ဂူဟန်က အေးအေးဆေးဆေး ပြောလိုက်သည်။
သူဟာ ဝေထျန်းချင်းကို ချက်ချင်း သတ်နိုင်ပေမဲ့ ယဲ့ချင်းယွမ်က သတ်တာပါလို့ ဝေထျန်းချင်း လုံးဝ ယုံကြည်သွားအောင် တမင် သရုပ်ဆောင်ပြခဲ့တာပါ။
ကူဟန်ဟာ အငြိုးအတေးကြီးသူ တစ်ယောက်ပါ။ ယဲ့ချင်းယွမ်ကို မိစ္ဆာဂိုဏ်းရဲ့သူလျှိုလို့ နာမည်ဖျက်ရုံနဲ့ သူမကျေနပ်နိုင်ပါဘူး။
အခုတော့ "မြင့်မြတ်နယ်မြေရဲ့သူတော်စင်သားတော်ကို သတ်ဖြတ်သူ" ဆိုတဲ့ အမှုကြီးကိုပါ ထပ်တင်ပေးလိုက်ပါပြီ။
ဝေထျန်းချင်းရဲ့ အလောင်းကို မီးရှို့ဖျက်ဆီးလိုက်ပြီး အနီးအနားမှာ ယဲ့ချင်းယွမ်ရဲ့ အဝတ်အစား အစအနလေးတွေကို တမင် ချန်ထားခဲ့သည်။
"ကဲ ဟိုကောင် ယဲ့ချင်းယွမ် ဘာလုပ်နေလဲ သွားကြည့်ရအောင်" ကူဟန်က မေးစေ့ကို ပွတ်ရင်း တွေးလိုက်သည်။
"သူ နောက်ထပ် သွားမယ့်နေရာက မိစ္ဆာတစ်ရာတောင်ကြားပဲ ဖြစ်ရမယ်။ သူ့အတွက် ငါပြင်ထားတဲ့ လက်ဆောင်ကြီးကို သူကြိုက်မယ်လို့ မျှော်လင့်ပါတယ်"
ကူဟန်ရဲ့ ပုံရိပ်ဟာ နေရာမှာတင် ပျောက်ကွယ်သွားပြီး မိစ္ဆာတစ်ရာတောင်ကြား ရှိရာဘက်ကို အမြန်ဆုံး ထွက်ခွာသွားတော့သည်။