အခန်း (၅၃) အံ့သြစရာပဲ တကယ့်ကို အံ့သြဖို့ကောင်းလှတယ်

ယဲ့ချင်းယွမ်က ကူဟန်ကို မိစ္ဆာသူလျှိုအဖြစ် ပရိသတ်အလယ်မှာ အကွက်ကျကျ စွပ်စွဲနေစဉ်မှာပဲ အခြေအနေက ရုတ်တရက် ပြောင်းလဲသွားပါတယ်။

မြို့စောင့်တပ်ဖွဲ့ ခေါင်းဆောင်ဟာ အင်အားကြီး ကျင့်ကြံသူတွေနဲ့အတူ အခန်းထဲကို ဝုန်းခနဲ ဝင်လာပြီး လူအုပ်ကို စူးရှတဲ့ မျက်လုံးတွေနဲ့ ဝေ့ကြည့်လိုက်ပါတယ်။

ယဲ့ချင်းယွမ်ကတော့ မြို့စောင့်တပ်ဟာ သူ့ရဲ့ စွပ်စွဲချက်အတိုင်း ကူဟန်ကို လာဖမ်းတာလို့ ထင်မှတ်ပြီး အောင်နိုင်သူအပြုံးနဲ့ စောင့်နေခဲ့တာပါ။

ဒါပေမဲ့ ခေါင်းဆောင်ရဲ့ အကြည့်က ကူဟန်ဆီမှာ ခဏပဲ ရပ်တန့်သွားပြီး ယဲ့ချင်းယွမ်ဆီကို အေးစက်စွာ ရောက်ရှိလာပါတယ်။

"ဟုတ်ပြီ သူပဲ။ ဝမ်ကျန့်ဂိုဏ်းက ယဲ့ချင်းယွမ် မနေ့ညက မိစ္ဆာကျင့်ကြံသူတွေရဲ့ တိုက်ခိုက်မှုမှာ မင်းပါဝင်ပတ်သက်နေတယ်လို့ သံသယရှိတယ် ဖမ်းဆီးလိုက်ကြ"

ယဲ့ချင်းယွမ်ဟာ မှင်သက်သွားပြီး အော်ဟစ်ငြင်းဆိုပါတော့တယ် 

"ခင်ဗျားတို့ လူမှားဖမ်းနေတာ ကျွန်တော် မနေ့ညက အဲ့ဒီလမ်းနားကိုတောင် မသွားခဲ့ဘူး ကူဟန်ကမှ သံသယရှိသူပါ"

ဒါပေမဲ့ တပ်ဖွဲ့ခေါင်းဆောင်က သိုလှောင်အိတ်ထဲကနေ အပြာရောင် အင်္ကျီစလေးတစ်ခုကို ထုတ်ပြလိုက်ပါတယ်။

 အဲ့ဒီအင်္ကျီစဟာ ယဲ့ချင်းယွမ်ရဲ့ ပြဲနေတဲ့ အင်္ကျီလက်နားနဲ့ ကွက်တိ ဖြစ်နေရုံတင်မကဘဲ မြို့တော်က ကျွမ်းကျင်ပညာရှင်တွေက အဲ့ဒီအစပေါ်က အော်ရာကို ခြေရာခံပြီး ယဲ့ချင်းယွမ်ရဲ့ အမှတ်အသားဖြစ်ကြောင်း အတည်ပြုပြီးသား ဖြစ်နေပါတယ်။

ယဲ့ချင်းယွမ်ဟာ အဲ့ဒီတော့မှ အရာအားလုံးကို နားလည်သွားပါတယ်။ မနေ့က မူလီအာနဲ့ ဆော့ကစားရင်း အင်္ကျီပြဲသွားတာဟာ မတော်တဆမဟုတ်ဘဲ တစ်စုံတစ်ယောက် (ကူဟန်) က သူ့ကို အကွက်ဆင်ဖို့အတွက် တမင်လုပ်ခဲ့တာ ဖြစ်မှန်း သိလိုက်ရပါပြီ။ သက်သေက ခိုင်လုံလွန်းနေတာကြောင့် သူ ဘယ်လိုမှ ငြင်းလို့မရတော့ပါဘူး။

ထိုစဉ် ကူဟန်က လက်ခုပ်တီးပြီး လှောင်ပြောင်လိုက်ပါတယ်  "အံ့သြစရာပဲ တကယ့်ကို အံ့သြဖို့ကောင်းလှတယ် ခုနက ညီငယ်လေးရဲ့ ခိုင်လုံတဲ့ သုံးသပ်ချက်တွေကို နားထောင်ပြီး ငါတောင် ငါ့ကိုယ်ငါ မိစ္ဆာသူလျှို ဖြစ်သွားပြီလားလို့ ထင်မိသွားတယ်။

အခုတော့ အမှန်တရားက ပေါ်လာပြီပေါ့။ မင်းကိုယ်တိုင်က မိစ္ဆာသူလျှို ဖြစ်နေပြီးတော့ ငါ့ကို လွှဲချဖို့ ကြိုးစားနေတာလား မင်းက မနာလိုစိတ်ကြောင့် မင်းရဲ့ အစ်ကိုကြီးကို ဒီလောက်အောက်တန်းကျတဲ့ နည်းလမ်းနဲ့ လုပ်ကြံရက်တယ်နော်။"

ကူဟန်ရဲ့ စကားတွေကြောင့် ယခင်က ကူဟန်ကို ဝိုင်းဝန်းစွပ်စွဲခဲ့ကြတဲ့ ဝမ်ကျန့်ဂိုဏ်းသားတွေဟာ ချက်ချင်းပဲ ဘက်ပြောင်းပြီး ယဲ့ချင်းယွမ်ကို ဒေါသတကြီး ပြန်လည် ဆဲဆိုကြပါတော့တယ်။

သူတို့ဟာ ယဲ့ချင်းယွမ်ရဲ့ လှည့်စားမှုကို ခံလိုက်ရပြီး အစ်ကိုကြီး ကူဟန်ကို မှားယွင်းစွပ်စွဲမိခဲ့တဲ့အတွက် ရှက်စိတ်နဲ့အတူ ယဲ့ချင်းယွမ်ကို ပိုပြီး ရန်ငြိုးဖွဲ့လိုက်ကြပါတယ်။

ကူဟန်ကတော့ ထိုလူအုပ်ကို "အရူးတွေ" လို့သာ သတ်မှတ်ပြီး ဂရုမစိုက်ဘဲ ရှိနေပါတယ်။