အခန်း (၅၂) မင်းတို့ ပါးစပ်ကို မထိန်းနိုင်ရင် ငါကိုယ်တိုင် ထိန်းပေးမယ်

ပတ်ဝန်းကျင်မှ တပည့်များ၏ ဝေဖန်သံများကို ကြားရသောအခါ ယဲ့ချင်းယွမ်၏ နှုတ်ခမ်းထောင့်တွင် အောင်နိုင်သူအပြုံးတစ်ခု ပေါ်လာသည်။

သူသည် ကျင့်ကြံခြင်းတွင် ကူဟန်ကို မယှဉ်နိုင်သော်လည်း လူထု၏ စိတ်ဓာတ်ကို အသုံးချကာ ကူဟန်ကို ဖိအားပေးရန် ကြိုးစားနေခြင်းဖြစ်သည်။

ချူးယိုဝေ တို့ ညီမသုံးယောက်မှာလည်း အစ်ကိုကြီးက သူတို့ကို ငြင်းပယ်ပြီး တစ်ယောက်တည်း မြို့ထဲသွားခဲ့သည်ဟူသော အချက်ကြောင့် စိတ်ပျက်အားငယ်နေကြသည်။

ကူဟန်သည် ထွက်ခွာနေရာမှ ခဏရပ်လိုက်သည်။ သူသည် အတိတ်ဘဝက ယဲ့ချင်းယွမ်၏ ဤကဲ့သို့သော လှည့်ကွက်များကြောင့် "မိစ္ဆာသူလျှို" ဟု စွပ်စွဲခံခဲ့ရဖူးသည်ကို ပြန်လည်သတိရသွားသည်။

ထိုစဉ်က ဂိုဏ်းသူဂိုဏ်းသားများနှင့် ဆရာဖြစ်သူမှာ ယဲ့ချင်းယွမ်၏ စကားနောက်သို့ သက်သေမရှိဘဲ လိုက်ပါကာ သူ့ကို စွန့်ပစ်ခဲ့ကြသည်။ သို့သော် ယခုအခါ ကူဟန်မှာ အရင်လို မဟုတ်တော့ပေ။

သူသည် ပိုမိုအားကောင်းလာပြီး စနစ်ကိုလည်း ပိုင်ဆိုင်ထားသည်။

ကူဟန်သည် သူ၏ ခန္ဓာကိုယ်မှ ကြောက်မက်ဖွယ်ကောင်းသော ဖိအားများကို ထုတ်ဖော်လိုက်ရာ ပတ်ဝန်းကျင်ရှိ တပည့်များမှာ အသက်ရှူရခက်ခဲကာ မျက်နှာများ ဖြူဖျော့ကုန်ကြသည်။

သူက အေးစက်စွာ ပြောလိုက်သည် 

"ဂိုဏ်းရဲ့ စည်းကမ်းအရ ငါတို့ လေ့ကျင့်ရေးအတွက် တိုက်ခိုက်လို့ရတယ် တစ်ဖက်လူကို အသက်မသေစေရင် ရပြီ။ မင်းတို့ ပါးစပ်ကို မထိန်းနိုင်ကြဘူးဆိုရင် ငါကိုယ်တိုင် ထိန်းပေးရလိမ့်မယ်။ ငါပြောတာကို နားလည်ကြတယ်မလား"

ဤခြိမ်းခြောက်မှုကြောင့် လူအများမှာ တုန်လှုပ်သွားကြသော်လည်း ယဲ့ချင်းယွမ်ကတော့ အလျှော့မပေးဘဲ ထပ်မံစွပ်စွဲလိုက်ပြန်သည်။ 

"အစ်ကိုကြီး... အစ်ကိုကြီးက စီနီယာအစ်မတွေကို ငြင်းပယ်ပြီး မြို့ထဲကို တိတ်တိတ်လေး ဘာသွားလုပ်တာလဲ မနေ့ညကပဲ မြို့ထဲမှာ မိစ္ဆာကျင့်ကြံသူတွေ ပြဿနာရှာခဲ့ပြီး အရေးကြီးပုဂ္ဂိုလ်တချို့ အသတ်ခံခဲ့ရတယ်။

ပြီးတော့ လူငယ်တစ်ယောက်က မိစ္ဆာကျင့်ကြံသူတွေနဲ့ လျှို့ဝှက်ဆက်သွယ်နေတယ်လို့လည်း သတင်းထွက်နေတယ်။ အစ်ကိုကြီးက ဘာလို့ ဆင်ခြေပေးပြီး မြို့ထဲကို ခိုးသွားရတာလဲ တစ်ခုခုများ ဖုံးကွယ်ထားတာ ရှိနေလို့လား"

ယဲ့ချင်းယွမ်၏စကားကြောင့်လေထုမှာပြန်လည်အေးခဲသွားသည်။လူအများမှာလည်းကူဟန်သည်တကယ်ပင်မိစ္ဆာဂိုဏ်းနှင့်ပတ်သက်နေသောသစ္စာဖောက်တစ်ဦးလားဟုသံသယဝင်လာကြတော့သည်။