အခန်း (၃၁) ကြက်သွေးရောင် သွေးမိစ္ဆာဂိုဏ်း
"ဒါဆိုရင်လည်း ဟုတ်နိုင်တာပဲ ပျက်စီးသွားတဲ့ ကျင့်ကြံခြင်းစိတ်နှလုံးကို ပြုပြင်ပေးနိုင်တဲ့ နည်းလမ်းတွေက ရှာရခက်တာကိုး။"
မူဗိုင်လင်းသည် သူမ၏ တပည့်ချူးယိုဝေရှာမတွေ့ခဲ့ခြင်းအပေါ် အပြစ်မတင်ဘဲ အလယ်ပိုင်းတိုက်ကြီး လျှို့ဝှက်နယ်မြေတွင် ထိုကဲ့သို့သော နည်းလမ်းများ ရှိနိုင်ကြောင်း မျှော်လင့်ချက်အသစ် ထားရှိလာသည်။
ချူးယိုဝေကမူ သူမ၏ ဆရာမကို ကြည့်ရင်း ရင်ထဲတွင် ဝမ်းနည်းမိသည်။ "ဆရာ အစ်ကိုကြီးက မှားတာမဟုတ်ဘူး ငါတို့တွေကမှ မှားနေခဲ့ကြတာ"
သူမသည် အတိတ်ဘဝမှ ကူဟန်၏ ဆင်းရဲဒုက္ခများကို ဆရာမနှင့် အခြားညီမငယ်များပါ မြင်တွေ့နိုင်မည့် "သံသရာမှန်ပြင်"ကို ရှာဖွေရန် စိတ်ပိုင်းဖြတ်လိုက်သည်။ သူတို့အားလုံး ကူဟန်အပေါ် အကြွေးတွေ အများကြီး တင်နေခဲ့ကြပြီဖြစ်သည်။
တစ်ဖက်တွင်မူ ကူဟန်သည် ဟန်မုန့်ယောင်ကို ခေါ်ဆောင်ကာ သွေးယမားတောင်တန်းရှိ ကြက်သွေးရောင် သွေးမိစ္ဆာဂိုဏ်း၏ အလယ်ဗဟိုသို့ ရဲရဲတင်းတင်း ဝင်ရောက်သွားသည်။
"သခင်လေး ဒီထဲမှာ အန္တရာယ်ရှိတဲ့ အငွေ့အသက်တွေ ခံစားနေရတယ်" ဟု ဟန်မုန့်ယောင်က တုန်တုန်ရီရီ ပြောရှာသည်။
ကူဟန်က သူမ၏ ခေါင်းကို ပုတ်ပေးရင်း "မကြောက်နဲ့ ငါရှိတယ်ပြီးတော့ ငါတို့မှာ ကူညီမယ့်သူတွေ အများကြီးရှိတယ်" ဟု ဆိုကာ ပြုံးလိုက်သည်။
သွေးမိစ္ဆာဂိုဏ်း၏ အကြီးအကဲများနှင့် ဂိုဏ်းချုပ် ရွှယ်ရှောင်တို့မှာ သူတို့၏ ဂိုဏ်းထဲသို့ ကလေးမလေးတစ်ယောက်ကို လက်ဆွဲကာ အေးအေးလူလူ လမ်းလျှောက်ဝင်လာသော ကူဟန်ကို ကြည့်ပြီး အံ့အားသင့်ကာ ဒေါသထွက်နေကြသည်။
ကူဟန်၏ အရှိန်အဝါမှာ သူတို့ ခန့်မှန်း၍မရလောက်အောင် နက်ရှိုင်းလှသည်။
"မင်းက ဘယ်သူလဲ ငါတို့ သွေးမိစ္ဆာဂိုဏ်းထဲကို ဘာလာလုပ်တာလဲ" တာအိုပေါင်းစည်းခြင်းအဆင့်ရှိသော ဂိုဏ်းချုပ် ရွှယ်ရှောင်က အေးစက်စွာ မေးမြန်းလိုက်သည်။
ကူဟန်က စကားဖြင့် ပြန်မဖြေဘဲ လက်တစ်ချက်ကိုသာ မြှောက်၍ လက်ဖျောက်တီးလိုက်သည်။
ဝုန်း!
တစ်တောင်လုံး တုန်ခါသွားပြီး မြေငလျင်ကြီး လှုပ်ခတ်သွားသလို ဖြစ်သွားသည်။
ထို့နောက် တောင်ပတ်ပတ်လည်မှ ကြောက်မက်ဖွယ်ကောင်းသော မိစ္ဆာသားရဲကြီးများမှာ ဒီရေအလား သွေးမိစ္ဆာဂိုဏ်းဆီသို့ ဦးတည်ပြေးဝင်လာကြသည်။
သွေးမိစ္ဆာဂိုဏ်းသားများမှာ ထိတ်လန့်တုန်လှုပ်သွားကြသည်။ အဘယ်ကြောင့်ဆိုသော် ထိုသားရဲဘုရင်ကြီးများမှာ ကူဟန်၏ အနောက်တွင် အိမ်မွေးကြောင်လေးများကဲ့သို့ ယဉ်ပါးစွာ ဝပ်စင်းနေကြသောကြောင့် ဖြစ်သည်။
လူသားများကို အမြဲတမ်း ရန်လိုတတ်သော သားရဲကြီးများမှာ ကူဟန်၏ ရှေ့တွင်တော့ ဂုဏ်သိက္ခာကို အသာထားကာ လုံးဝအရှုံးပေး ဝပ်စင်းနေကြလေပြီ။