အခန်း (၃) စနစ်အရောင်းဆိုင်

ကူဟန်သည် သူ၏ ပျံသန်းခြင်းဓားကို စီးနင်းပြီး (၁၀) မိနစ်ခန့် ပျံသန်းလာပြီးနောက် ချုံနွယ်ပိတ်ပေါင်းများ ဖုံးလွှမ်းနေသည့် လျှို့ဝှက်ဂူတစ်ခုကို လျင်မြန်စွာ ရှာတွေ့ခဲ့သည်။ သူသည် ဝိညာဉ်စွမ်းအားကို သုံး၍ လမ်းရှင်းပြီးနောက် ဂူထဲသို့ ဝင်သွားလိုက်သည်။

မကြာမီမှာပင် ထူထပ်သော ဝိညာဉ်စွမ်းအားများ ပျံ့လွင့်နေသည့် အိပ်မက်ဆန်ဆန် ပင်ကိုယ်သဘာဝ ဝိညာဉ်ရေကန်ကို တွေ့လိုက်ရသည်။ ဤရေကန်သည် ယခင်ဘဝက သူ ခက်ခက်ခဲခဲ ရှာဖွေခဲ့ရသော နေရာဖြစ်သည်။

သူသည် အဝတ်များကို ချွတ်၍ ရေကန်ထဲသို့ ကိုယ်ကိုနှစ်ကာ စွမ်းအားများကို စုပ်ယူရင်း စနစ်၏ အချက်အလက်များကို စိတ်ဖြင့် ဖွင့်ကြည့်လိုက်သည်။

အမည်: ကူဟန် 

ဘွဲ့ထူး: သတ်မှတ်ထားသော ဗီလိန်

အကျိုးသက်ရောက်မှု: ဇာတ်လိုက်၏ ကံတရားနှင့် ဇာတ်လမ်း၏လွှမ်းမိုးမှုများကို ၈၀ ရာခိုင်နှုန်းအထိ လျှော့ချပေးနိုင်သည်။ 

အသက်: ၁၈ နှစ် 

ကျင့်စဉ်အဆင့်: ဝိညာဉ်နန်းတော် အဆင့် (၅)

အဆင့်အတန်း: ဓားရှာဖွေရေးဂိုဏ်း ဗိုင်လင်းတောင်ထိပ်၏ အကြီးဆုံးတပည့် 

သွေးမျိုးဆက်: ကိုးကြိမ်မြောက် နတ်ဘုရားအရိုး (အစောပိုင်းနိုးထမှု) 

စနစ်တာဝန်: မသတ်မှတ်ရသေးပါ နတ်ဘုရားစင်မြင့် အဆင့်သို့ ရောက်လျှင် ပေါ်လာမည်။ 

ဗီလိန်မှတ်: ၂၀၀၀ 

လက်ရှိအထူးမှတ်တမ်းတင်ခွင့်: (၁) ကြိမ် 

 နေရာ: ဓားရှာဖွေရေးဂိုဏ်း မိစ္ဆာချုပ်နှောင်ရာ မျှော်စင် 

ကူဟန်သည် ရှေ့တွင် ပေါ်နေသော စနစ်အချက်အလက်များကို ကြည့်ပြီး မှင်သက်သွားသည်။ သူက အထူးသွေးမျိုးဆက် တစ်ခုကို ပိုင်ဆိုင်ထားတာလား။

မူရင်းဝတ္ထုထဲတွင် သူကဲ့သို့ အသုံးချခံ ဗီလိန်အတွက် အသေးစိတ် ဖော်ပြချက်များ မရှိခဲ့ပေ။ စာအုပ်၏ အချိန်အတော်များများကို ဇာတ်လိုက် ယဲ့ချင်းယွမ်အကြောင်း ရေးသားရန်သာ သုံးခဲ့သည်။

ယခုမူ သူသည် အရင်ဘဝနှင့် မတူသော လမ်းစဉ်ကို ရွေးချယ်လိုက်ပြီ ဖြစ်ရာ ရှေ့ဆက် ဘာဖြစ်လာမည်ကို သူကိုယ်တိုင်ပင် မသိတော့ပေ။

သူသည် စနစ်အရောင်းဆိုင်ကို ဖွင့်ကြည့်လိုက်ရာ လက်နက်များနှင့် ကျင့်စဉ်များစွာကို တွေ့လိုက်ရသည်။

 မိုယဲ့ဓား: ဗီလိန်မှတ် ၅၀၀

 ဝိညာဉ်ဖျက်ဆီးရေးအလံ: ဗီလိန်မှတ် ၁၂၀၀၀

 ပန်ကူးနတ်ဘုရားပုဆိန်: ဗီလိန်မှတ် (၁) သန်း (ဤဈေးနှုန်းကို ကြည့်ပြီး သူ သက်ပြင်းချလိုက်ရသည်)

ကျင့်စဉ်ပိုင်းတွင်လည်း အဆင့်မြင့်လေလေ ဈေးကြီးလေလေ ဖြစ်သည်။ အချို့သော အထူးကျင့်စဉ်များကိုမူ ဗီလိန်မှတ်ဖြင့် တိုက်ရိုက်ဝယ်၍မရဘဲ ကံစမ်းမဲနှိုက်ရန် လိုအပ်သည်။

(ကံစမ်းမဲ တစ်ကြိမ်လျှင် ၂၅၀ မှတ်၊ ၃၆၁ ကြိမ် နှိုက်ပါက အထူးကျင့်စဉ်တစ်ခု သေချာပေါက်ရမည် ဟူသော စည်းကမ်းကို မြင်သောအခါ သူ၏စနစ်မှာ ခေတ်သစ်လောင်းကစားဂိမ်းများအတိုင်း သင်ယူထားသည်ကို သတိပြုမိလိုက်သည်)။

ကူဟန်သည် ဗီလိန်မှတ်များကို မည်သို့ရှာရမည်ကို သိထားသဖြင့် ဈေးကြီးသည်ကို သိပ်စိတ်မပူပေ။ ဤဘဝတွင် ကိုယ့်ကိုယ်ကိုယ် ရင်းနှီးမြှုပ်နှံခြင်းကသာ အောင်မြင်မှု၏ လျှို့ဝှက်ချက် ဖြစ်သည်။

တစ်နာရီခန့်အကြာတွင် ကူဟန်သည် ရေကန်ထဲမှ ပြန်တက်လာသည်။ သူ၏ အသားအရေမှာ ရွှေရောင်အလင်းတန်းများ ထွက်ပေါ်နေပြီး စွမ်းအားများ ပြည့်ဝလာသည်။ သူ၏ ကျင့်စဉ်အဆင့်မှာလည်း ဝိညာဉ်နန်းတော် အဆင့် (၆) သို့ တိုက်ရိုက်တက်လှမ်းသွားခဲ့သည်။

"မဆိုးဘူး ခန္ဓာကိုယ်ရော ကျင့်စဉ်ရော သိသိသာသာ တိုးတက်လာပြီ။"

သူသည် ဘဝများစွာကို ဖြတ်သန်းခဲ့သူ ဖြစ်သဖြင့် ကျင့်စဉ်အဆင့် တက်လှမ်းရာတွင် အတားအဆီး များ မရှိသလောက်ပင် ဖြစ်နေသည်။ ရေကန်ထဲရှိ စွမ်းအားများ အားလုံး ကုန်ခမ်းသွားသည်ကို အတည်ပြုပြီးနောက် သူ စိတ်ကျေနပ်စွာ ထွက်ခွာခဲ့သည်။ ယဲ့ချင်းယွမ်အနေဖြင့် ဤနေရာကို ရှာတွေ့လျှင်ပင် ဘာမှရတော့မည် မဟုတ်ပေ။

"လျိုယုရန်နဲ့ ယဲ့ချင်းယွမ်တို့ ဘာဖြစ်နေပြီလဲ မသိဘူး သေများ သေသွားကြပြီလား"

ကူဟန်သည် လှောင်ပြုံးပြုံးရင်း တိုက်ပွဲဖြစ်ပွားခဲ့ရာ နေရာသို့ ပြန်သွားကြည့်လိုက်သည်။ ထိုနေရာမှာ ပျက်စီးယိုယွင်းနေပြီး မြေပြင်မှာ အက်ကွဲကြောင်းများဖြင့် ပြည့်နှက်နေသည်။

သူ ထင်ထားသည့်အတိုင်းပင် ဇာတ်လိုက်ဖြစ်သော ယဲ့ချင်းယွမ်မှာ သေမသွားဘဲ တစ်စုံတစ်ဦး (သို့မဟုတ်) ဝှက်ဖဲတစ်ခုခု၏ အကူအညီဖြင့် အသက်ရှင်သွားကာ ထိုနေရာမှ ထွက်ခွာသွားကြပြီ ဖြစ်သည်။

"ဂိုဏ်းကို ပြန်သွားကြပြီပေါ့။ ငါ့ရဲ့ချစ်လှစွာသော ညီမငယ်လေးကတော့ ငါ့ကို စစ်မြေပြင်က ထွက်ပြေးတယ်လို့ အပြစ်ပုံချနေလောက်ပြီ"

သူသည် ထွက်ပြေးရန် စိတ်မကူးပေ။ ဂိုဏ်းထဲသို့ ပြန်ဝင်ပြီး စနစ်၏ မှတ်တမ်းတင်ခြင်း တာဝန်ကို လုပ်ဆောင်ရဦးမည်ဖြစ်သည်။ သူသည် ဓားကို စီးနင်းရင်း ဂိုဏ်းဆီသို့ ပျံသန်းလာစဉ် ဖြူစင်အေးစက်သော အသွင်ရှိသည့် သူ၏ ဆရာမကို သတိရမိလိုက်သည်။

"ရယ်စရာကောင်းလိုက်တာ ကျွန်တော့်ကို နှစ်ပေါင်းများစွာ ပြုစုပျိုးထောင်ပေးခဲ့ပေမဲ့ ဂိုဏ်းထဲရောက်တာ (၂) လခွဲပဲ ရှိသေးတဲ့ ယဲ့ချင်းယွမ်ကိုမှ ပိုပြီး ယုံကြည်နေတယ်ပေါ့"

ကူဟန်၏ မျက်ဝန်းထဲတွင် အေးစက်သော အလင်းတန်းများ ဖြတ်ပြေးသွားသည်။

"ဆရာမ... ဒီဘဝမှာကော ခင်ဗျား ဘယ်သူ့ကို ရွေးချယ်ဦးမလဲ"