အခန်း (၂၄) အသုံးမကျတဲ့သူကို ငါမလိုချင်ဘူး

ကူဟန်ကို ဝိုင်းဝန်းတိုက်ခိုက်ခဲ့ကြသူများသည် လေထဲတွင်ပင် ကျောက်ရုပ်များကဲ့သို့ တောင့်တင်းသွားကြသည်။

သူတို့၏ မျက်ဝန်းထဲတွင် သေခါနီး၌ ကမ္ဘာပေါ်တွင် အကြောက်ရဆုံး မြင်ကွင်းကို မြင်လိုက်ရသည့်အလား ထိတ်လန့်မှုများ ပြည့်နှက်နေသည်။

လော့ပိုင်ကျိ အံ့အားသင့်နေစဉ်မှာပင် အေးစက်သော လေညင်းတစ်ချက် ဝေ့တိုက်သွားသည်။ 

ထိုအခါ တောင့်တင်းနေသော လူမိုက်များ၏ ကိုယ်ခန္ဓာများသည် လေထဲတွင် အသားစများအဖြစ် ကြေမွပျက်စီးသွားပြီး မြေပြင်ပေါ်သို့ပင် မကျရောက်မီ သွေးမှုန်များအဖြစ် ပျောက်ကွယ်သွားတော့သည်။

တစ်ဦးတည်းသော အသက်ရှင်ကျန်ရစ်သူ ပွဲစားမှာလည်း အကောင်းအတိုင်း မဟုတ်ပေ။

သူ၏ ပေါင်ရင်းမှစ၍ အောက်ပိုင်းတစ်ခုလုံးမှာ အပိုင်းပိုင်း ပြတ်တောက်သွားပြီး နာကျင်လွန်းသဖြင့် မြေပြင်ပေါ်တွင် လူးလိမ့်အော်ဟစ်နေရသည်။

ကူဟန်သည် သူ၏ ဓားရှည်ကို ထုတ်ယူကာ ဟန်မုန့်ယောင်ထံသို့ ကမ်းပေးလိုက်ပြီး အေးစက်စွာ ပြောလိုက်သည်။

"မင်း ငါနဲ့ လိုက်ချင်တယ်ဆိုရင် မင်းရဲ့ အရည်အချင်းနဲ့ တန်ဖိုးကို သက်သေပြရမယ်။ ဒီကောင်က မင်းကိုအရင်က အများကြီး နှိပ်စက်ခဲ့တာပဲ အခု သူ့ကို သတ်လိုက်။"

အသက် (၁၂) နှစ်အရွယ်သာ ရှိသေးသော ဟန်မုန့်ယောင်သည် ဓားကို တုန်တုန်ရင်ရင်ဖြင့် လှမ်းကိုင်လိုက်သည်။ သူမသည် ငါးတစ်ကောင်ကိုတောင် မသတ်ဖူးသူ ဖြစ်သည်။

"ဘာလဲ မင်း မလုပ်ရဲဘူးလား" ကူဟန်၏ အသံက ပဲ့တင်ထပ်လာသည်။

"ဒီရက်စက်တဲ့ လောကကြီးမှာ မင်းက သူတစ်ပါးကို မသတ်ရင် သူတစ်ပါးက မင်းကို သတ်လိမ့်မယ်။ ငါလိုချင်တာက သန်မာပြီး ပြတ်သားတဲ့သူပဲ ကြောက်ချေးပါပြီး အသုံးမကျတဲ့သူကို ငါမလိုချင်ဘူး။"

ထိုစကားသည် ဟန်မုန့်ယောင်၏ စိတ်ကို မိုးကြိုးပစ်လိုက်သလို ဖြစ်သွားစေသည်။ သူမသည် ဓားကို မြှောက်လိုက်သည်။

ပွဲစားက ကြောက်လန့်တကြား တောင်းပန်သော်လည်း မရတော့သည့်အဆုံး သူမကို "ကျိန်စာသင့်သူ မိစ္ဆာမ" ဟု အော်ဟစ်ဆဲဆိုတော့သည်။

ဖျတ်

ဟန်မုန့်ယောင်သည် ဓားကို လွှဲရိုက်လိုက်သည်။ သွေးများ စဉ်ထွက်လာသည်။ သူမ၏ စိတ်ထဲတွင် အတိတ်က နာကျင်မှုများ ပြန်လည်ပေါ်ပေါက်လာသည်။

သူမ ဘာမှမလုပ်ခဲ့ဘဲနှင့် မျက်လုံးနီရုံနှင့် ဘာကြောင့် နှိပ်စက်ခံရသနည်း မိဘတွေကရော ဘာလို့ မုန်းကြသနည်း။

သူမ၏ ဓားချက်များသည် ပိုမိုမြန်ဆန်လာပြီး ရက်စက်လာသည်။ ပွဲစား၏ အော်ဟစ်သံများမှာ တဖြည်းဖြည်း တိတ်ဆိတ်သွားတော့သည်။

"တော်ပြီ သူ သေသွားပြီ။"

သန်မာပြီး နွေးထွေးသော လက်တစ်ဖက်က သူမ၏ ပုခုံးပေါ်သို့ ရောက်လာသည်။

ဟန်မုန့်ယောင်သည် သတိပြန်ဝင်လာပြီး သွေးစွန်းနေသော ဓားကို ကူဟန်ထံသို့ ရိုသေစွာ ပြန်ကမ်းပေးလိုက်သည်။

"မုန့်ယောင် သခင်လေးရဲ့ အမိန့်ကို နာခံပါ့မယ်။"

ကူဟန်က သဘောကျစွာ ပြုံးလိုက်သည်။

သူမသည် နောင်တစ်ချိန်တွင် တစ်ကမ္ဘာလုံးက ကြောက်ရမည့် မိစ္ဆာသခင်မ ဖြစ်လာမည့် ပါရမီကို ငယ်ငယ်ကတည်းက ပြသနေပြီ ဖြစ်သည်။

သူက ဟန်မုန့်ယောင်၏ ခေါင်းကို အသာအယာ ပုတ်ပေးလိုက်သည်။

"ကောင်းပြီ ငါနဲ့ လိုက်ခဲ့ရင် ဘယ်သူမှ မင်းကို ထပ်ပြီး မနှိပ်စက်စေရဘူး။"

[ဒေါင် ပိုင်ရှင်သည် ပစ္စည်းကို အလကားယူရုံတင်မကဘဲ ကလေးငယ်တစ်ဦးကိုပါ လူသတ်ရန် လှုံ့ဆော်ခဲ့သည်။ ဗီလိန်စရိုက်နှင့် အပြည့်အဝ ကိုက်ညီသဖြင့် ဗီလိန်မှတ် ၁၀၀၀ ရရှိပါသည်]

[ဒေါင် နေ့စဉ်တာဝန် (၃) ခု ပြီးမြောက်သည့်အတွက် အပိုဆုမှတ် ၁၅၀၀ ရရှိပါသည်။]