အခန်း (၅) - မင်းသမီး၏ မိခင်ဖြစ်သူ အောင်သွယ်တော် လုပ်ပေးခြင်း

"အချိန်ပေးဖို့က ပြဿနာမရှိပါဘူးမေမေ၊ သမီးကိုပဲ လွှဲထားလိုက်ပါ သမီး သူ့ကိုသွားတွေ့ရင်းနဲ့ အရင်က သူ့အပေါ် အထင်လွဲခဲ့မိတာတွေကိုပါ တစ်ခါတည်း တောင်းပန်လိုက်မယ်"

ရွှီပင်းနင်းက ချက်ချင်းပင် သဘောတူလိုက်သည်။ 

အမှန်တကယ် စကားပြောရလျှင် မိခင်ဖြစ်သူ ရွှီရိုက ဤကိစ္စကို စကားမစခဲ့လျှင်တောင်မှ သူမသည် မူဟန်ကို လူကိုယ်တိုင်သွားတွေ့ပြီး မိခင်ဖြစ်သူကို ကယ်တင်ပေးခဲ့သည့်အတွက် ကျေးဇူးတင်စကား ပြောရန် ရည်ရွယ်ထားပြီးသား ဖြစ်သည်။

ရွှီရိုက ခေါင်းညိတ်ပြလိုက်သော်လည်း စိတ်ထဲတွင်မူ မူဟန်နှင့် ဇာတ်တိုက်ရန် ဇာတ်လမ်းကို မည်သို့ ညှိနှိုင်းရမည်နည်းဟု စဉ်းစားနေမိသည်။ 

မည်သို့ပင်ဆိုစေ မူဟန်က သူမကို ကယ်တင်ခဲ့သည်ဟူသော ဇာတ်လမ်းမှာ သူမဘာသာ လုပ်ကြံဖန်တီးထားခြင်း ဖြစ်သည်လေ။ အကယ်၍ သမီးဖြစ်သူနှင့် မူဟန်တို့ တွေ့ဆုံသည့်အခါ ဤအကြောင်းအရာကို စကားစပ်မိသွားပါက သူမ၏ လိမ်ညာမှုမှာ ချက်ချင်း ပေါ်သွားပေလိမ့်မည်။

သမီးဖြစ်သူ ရေချိုးခန်းထဲ ရောက်နေစဉ်အတွင်း ရွှီရိုသည် သူမ၏ အခန်းသို့ ပြန်လာပြီး မူဟန်၏ ချက်ဘောက်စ် ကို ဖွင့်ကာ စကားလုံးများကို သေချာစွာ ရွေးချယ်၍ ရိုက်နှိပ်လိုက်သည်။

"မင်္ဂလာပါ... အန်တီက ရှင်ယွဲ့ မုန့်တိုက်က ရွှီရိုပါ… မနက်ဖြန်ကျရင် အန်တီ့သမီးက ကိတ်မုန့်ကို လာပို့ပေးလိမ့်မယ်… သမီးရဲ့ ဝီချက် အဆက်အသွယ်လေးကို မောင်ရင့်ဆီ ပို့ပေးချင်လို့ အဆင်ပြေမလားကွယ်"

မက်ဆေ့ခ်ျကို ရေးစပ်ပြီးနောက် ရွှီရိုသည် ရွှီပင်းနင်း၏ ဝီချက် အဆက်အသွယ်ကတ်  နှင့်အတူ ပေးပို့လိုက်လေသည်။

မက်ဆေ့ခ်ျကို လက်ခံရရှိသောအခါ မူဟန် ခေတ္တမျှ စဉ်းစားလိုက်ပြီး ရွှီရို၏ ရည်ရွယ်ချက်ကို ချက်ချင်း ရိပ်မိသွားသည်။

"အဆင်ပြေပါတယ်ခင်ဗျာ"

မူဟန်က ထိုစကားလုံးအနည်းငယ်ကို အရင်ပြန်လည်ဖြေကြားလိုက်ပြီးနောက်၊ ခေတ္တမျှ စဉ်းစားဟန် ဆောင်ကာ နောက်ထပ် မက်ဆေ့ခ်ျတစ်ခုကို ထပ်မံရိုက်နှိပ်လိုက်သည်။

"ဒါနဲ့... ကျွန်တော့်မှာ အန်တီ့သမီးရဲ့ ဝီချက် ရှိနေပုံရတယ်ဗျ သူမနာမည်က ရွှီပင်းနင်း မဟုတ်လား"

ရွှီရိုသည် ယခင်ကတည်းက သူတို့နှစ်ဦးမှာ ဝီချက် တွင် မိတ်ဆွေဖြစ်နေမှန်း သိထားသော်လည်း အပြင်ပန်းတွင်မူ အံ့သြသွားဟန် ဆောင်ကာ ပြန်လည်ဖြေကြားလိုက်သည် -

"သြော်... တကယ်ကြီးလား… မောင်ရင်တို့နှစ်ယောက်က သိကြတာလား”

မူဟန် - "သိပ်တော့ မရင်းနှီးပါဘူး၊ အလုပ်ကိစ္စကြောင့် အကြိမ်အနည်းငယ် တွေ့ဖူးရုံပါ သူမက ဆက်ဆံရ နည်းနည်းခက်တဲ့ပုံပဲ အန်တီနဲ့ မတူဘူး... အန်တီကတော့ အများကြီး ပိုပြီး ချဉ်းကပ်ရလွယ်ကူပါတယ်"

ရွှီရို - "သမီးက တကယ်တော့ အလွန်နူးညံ့တဲ့သူပါ… မောင်ရင် သူမနဲ့ ရင်းနှီးသွားတဲ့အခါ အန်တီပြောတာ မှန်တယ်ဆိုတာ သိလာပါလိမ့်မယ်"

မူဟန်သည် ထိုမက်ဆေ့ခ်ျကို ကြည့်ပြီး သဘောကျသွားမိသော်လည်း၊ သူ၏ အနေအထိုင်ကို သတိကြီးစွာ ထိန်းသိမ်းထားသည့်ပုံစံ ပေါက်စေရန်အတွက် တစ်မိနစ်ခန့် တမင်စောင့်ဆိုင်းပြီးမှ ပြန်လည်ဖြေကြားလိုက်သည် - "ရင်းနှီးအောင် လုပ်ရမယ်… အန်တီ အဲဒါ ဘာကို ဆိုလိုတာလဲ ခင်ဗျာ"

ရွှီရိုသည် သူမ၏ စကားလုံးများမှာ အနည်းငယ် ပွင့်လင်းလွန်းသွားကြောင်း သတိပြုမိလိုက်သော်လည်း၊ တာဝန်ကို အမြန်ပြီးမြောက်လိုစိတ်ကြောင့် ဘာကိုမှ ဂရုမစိုက်တော့ဘဲ ပို၍ ပွင့်လင်းစွာပင် ပြောချင်ရာကို ပြောချင်ဇောဖြင့် ရိုက်နှိပ်လိုက်တော့သည် - "မောင်ရင် အထင်မလွဲပါနဲ့၊ အန်တီက မကောင်းတဲ့ ရည်ရွယ်ချက် မရှိပါဘူး… အန်တီက မောင်ရင်နဲ့ အန်တီ့သမီးကို ကြည့်ရတာ အလွန်လိုက်ဖက်တဲ့ စုံတွဲတစ်တွဲ ဖြစ်လာလိမ့်မယ်လို့ ထင်လို့ အောင်သွယ်တော် လုပ်ပေးချင်ရုံတင်ပါကွယ်"

မူဟန် - "အန်တီ နောက်နေတာလား"

သူသည် ရွှီပင်းနင်းအပေါ် စိတ်ဝင်စားသည်မှာ မှန်သော်လည်း သူမနောက်သို့ တကောက်ကောက် လိုက်ရန်  ရည်ရွယ်ချက် မရှိချေ။

သူသည် မိန်းကလေးတစ်ယောက်နောက်သို့ လိုက်ကာ အောက်ကျနောက်ကျ ခံမည့်သူမျိုး မဟုတ်ပေ။ သူ့ရဲ့ ယခင်ဘဝအကြောင်းကို ထည့်မပြောလျှင်တောင်မှ ဤဘဝတွင် ချမ်းသာသော ဒုတိယမျိုးဆက် သခင်လေးတစ်ဦးအဖြစ် စတင်ခဲ့ရသဖြင့် မိန်းကလေးများနောက်သို့ တစ်ခါမျှ ပစ်ပစ်ခါခါ လိုက်ခဲ့ဖူးခြင်း မရှိချေ။ မည်သို့ပင်ဆိုစေ မိန်းကလေးများကသာ သူ့ထံသို့ အလိုအလျောက် ရောက်ရှိလာတတ်ကြသည်သာ။

ယခုအခါတွင်မူ သူ့၌ စနစ်၏ အကူအညီပင် ရှိနေသေးသည်။ ဇာတ်လိုက်နှင့် မင်းသမီးမှလွဲ၍ ကျန်ရှိသော သူများအားလုံးမှာ သူ၏ အသုံးချခံ လက်နက်များ ဖြစ်လာနိုင်ပေသည်။ အကယ်၍ ဤသို့သော အခြေအနေမျိုးတွင်မှ သူက ရွှီပင်းနင်းနောက်သို့ တကောက်ကောက် လိုက်နေရဦးမည်ဆိုပါက ဤစနစ်ကို လွှင့်ပစ်လိုက်ပြီး အခြားသူတစ်ယောက်ကိုသာ ကောက်ယူခွင့် ပေးလိုက်ခြင်းက ပို၍ ကောင်းပေလိမ့်မည်။

ရွှီရို ပို၍ စိုးရိမ်လာကာ - "အန်တီ နောက်နေတာမဟုတ်ဘူး…တကယ်ပြောတာပါ။ မောင်ရင်လည်း အန်တီ့သမီးကို တွေ့ဖူးတာပဲ၊ သူမ ဘယ်လိုလူလဲဆိုတာ သိတာပဲဥစ္စာ… စိတ်ထဲကနေ နည်းနည်းလေးတောင် မလှုပ်ခတ်မိဘူးလားကွယ်"

မူဟန် - "သူမက လှတာတော့ မှန်ပါတယ်၊ ဒါပေမယ့် စိတ်လှုပ်ခတ်တယ်ဆိုတဲ့ စကားလုံးက နည်းနည်း ပြင်းထန်လွန်းပါတယ်… ဒါ့အပြင် လူနှစ်ယောက် အတူတူရှိနေဖို့ဆိုတာ စရိုက်ချင်း ကိုက်ညီမှု ရှိ…မရှိ ဆိုတဲ့အချက်က အရေးကြီးဆုံးပါပဲ"

ရွှီရိုက ထိုစကားကို အပြည့်အဝ သဘောတူမိသော်လည်း မူဟန်နှင့် သူမ၏သမီးမှာ သေချာပေါက် အဆင်ပြေသွားလိမ့်မည်ဟု အခိုင်အမာ ယုံကြည်နေသည်။ 

အဘယ်ကြောင့်ဆိုသော် စနစ်က သူတို့နှစ်ဦး၏ လိုက်ဖက်ညီမှုကို ၉၉% အထိ မြင့်မားစွာ တွက်ချက်ပေးထားသောကြောင့်ပင်။ 

သို့သော် သူမက ဤအချက်ကို မူဟန့်အား ပြောပြ၍ မရချေ။

ရွှီရို - "လောလောဆယ်တော့ သူငယ်ချင်းအဖြစ်ပဲ စတင်ကြည့်ကြတာပေါ့ကွယ်… တစ်ယောက်အကြောင်းတစ်ယောက် သိသွားတဲ့အခါ လိုက်ဖက်မှု ရှိ မရှိ သိလာမှာပေါ့"

မူဟန် - "ပွင့်ပွင့်လင်းလင်း ပြောရရင် ကျွန်တော် ရွှီပင်းနင်းအပေါ်မှာ အမြင်သိပ်မကောင်းဘူးဗျ… ဒါပေမယ့် အန်တီက ဒီလောက်အထိ စိတ်ကောင်းရှိပြီး နူးညံ့လှပတဲ့သူ ဖြစ်နေတော့ အန်တီ ရဲ့ သမီးဖြစ်သူကလည်း စရိုက်ဆိုးမယ့်သူတော့ မဟုတ်လောက်ပါဘူး"

ရွှီရိုသည် ထိုချီးမွမ်းစကားကြောင့် အလွန်ဝမ်းသာသွားပြီး အချိန်အခါကောင်းဟု ယူဆကာ အလျင်အမြန်ပင် ရိုက်နှိပ်လိုက်သည် - "သမီးက မရင်းနှီးတဲ့သူတွေအပေါ်မှာပဲ အေးစက်စက် နိုင်တာပါ တကယ်တမ်းကျတော့ သူမက ရင်းနှီးတဲ့သူတွေအပေါ် အလွန်နူးညံ့တတ်ပါတယ်… မောင်ရင် ဘာမှစိုးရိမ်စရာမလိုပါဘူး… အန်တီ ကူညီပေးပါ့မယ်… အမေက သမီးကို မောင်ရင်က အမေ့ကို ကယ်ခဲ့တာလို့ လိမ်ပြောလိုက်မယ်လေ…ဒါဆိုရင် သူမ သေချာပေါက် မောင်ရင်နဲ့ သူငယ်ချင်းဖြစ်ဖို့ လိုလိုလားလား ရှိလာမှာဖြစ်ပြီး အေးစက်စက် နိုင်မှာမဟုတ်တော့ဘူး"

မူဟန် - "မလုပ်ပါနဲ့ အန်တီရယ်…အန်တီက ကျွန်တော့်ကို ပိုပြီး စိတ်လှုပ်ရှားအောင် လုပ်နေသလိုပဲ"

ရွှီရို - "အန်တီ တကယ်ပဲ မကောင်းတဲ့ ရည်ရွယ်ချက် မရှိပါဘူးကွယ်… မောင်ရင်က လူငယ်ကောင်းတစ်ယောက်လို့ ထင်လို့ သမီးနဲ့ မိတ်ဆက်ပေးချင်ရုံပါ… တခြား ဘာအကြံအစည်မှ မရှိပါဘူးလို့ အန်တီ အာမခံပါတယ်"

မူဟန် - "ဒါပေမယ့် ကျွန်တော်တို့က တစ်ကြိမ်ပဲ တွေ့ဖူးသေးတာလေ… အန်တီက ကျွန်တော့်ကို လူဆိုးတစ်ယောက် ဖြစ်နေမလားလို့ မစိုးရိမ်ဘူးလား"

ရွှီရို - "အန်တီက လူအကဲခတ် အလွန်တော်ပါတယ်ကွယ်… မောင်ရင်က လူဆိုးတစ်ယောက် မဟုတ်ဘူးဆိုတာ အန်တီ အသေအချာ ယုံကြည်တယ်"

စနစ်၏ စစ်ဆေးအတည်ပြုချက် ရှိနေသဖြင့် သူမတွင် ထိုကဲ့သို့သော စိုးရိမ်ပူပန်မှုမျိုး လုံးဝမရှိချေ။

မူဟန် ခပ်တိုးတိုး ရယ်မောလိုက်ပြီး ဖုန်းမျက်နှာပြင်ပေါ်တွင် လက်ချောင်းများကို ရိုက်နှိပ်ကာ ပြန်လည်ဖြေကြားလိုက်သည် - "ကျွန်တော့်ကို ယုံကြည်ပေးတဲ့အတွက် ကျေးဇူးတင်ပါတယ် အန်တီ"

ထိုအချိန်မှာပင် ရွှီရိုသည် သမီးဖြစ်သူ လှမ်းခေါ်သံကို ကြားလိုက်ရသည်။ သူမသည် ရေချိုးခန်းထဲသို့ ရေလဲအဝတ် ယူဆောင်သွားရန် မေ့လျော့နေခဲ့ပုံရသည်။

"ဒီကလေးကတော့ အမြဲတမ်း သတိမေ့တတ်တာပဲ"

ရွှီရိုသည် သူမဘာသာ ရေရွတ်လိုက်ပြီး ဖုန်းကို ချကာ ရွှီပင်းနင်း၏ အခန်းသို့ သွားလိုက်သည်။ ညဝတ်အင်္ကျီကို ရှာဖွေတွေ့ရှိပြီးနောက် အနည်းငယ် ပွင့်နေသော တံခါးကြားမှတစ်ဆင့် ကမ်းပေးလိုက်လေသည်။

ရွှီပင်းနင်းသည် အရှက်အကြောက် အလွန်ကြီးသူ ဖြစ်သဖြင့် မိခင်ဖြစ်သူ၏ ရှေ့တွင်ပင် ရှက်ရွံ့နေတတ်သည်။ 

သူမသည် လက်တစ်ဖက်ကိုသာ အပြင်သို့ ဆန့်ထုတ်ပြီး ညဝတ်အင်္ကျီကို လှမ်းယူလိုက်သည်။ 

ရွှီရို၏ အမြင်အာရုံကို မျှဝေခံစားနေသော မူဟန်ပင်လျှင် မည်သည့်အရာကိုမျှ မြင်တွေ့ခွင့်မရလိုက်ချေ။

ရွှီပင်းနင်း ရေချိုးခန်းထဲမှ ထွက်လာသောအခါ သူမသည် သေသပ်လှပသော ပိုးသားညဝတ်ဂါဝန် ကို ဝတ်ဆင်ထားပြီးဖြစ်သည်။

"မေမေ... သမီး အခန်းထဲ သွားတော့မယ်နော်" ဟု ရွှီပင်းနင်းက ရွှီရိုကို ပြောကာ သူမ၏ အိပ်ခန်းဆီသို့ လျှောက်လှမ်းသွားခဲ့သည်။

"သိပ်ပြီး ညဉ့်မနက်စေနဲ့ဦး မဟုတ်ရင် မနက်ကျရင် အမေက အတင်း လာနှိုးနေရဦးမယ်" ဟု ရွှီရိုက သတိပေးလိုက်သည်။

"သိပါပြီ သိပါပြီ မေမေရဲ့"

ရွှီပင်းနင်းက ကတိပေးလိုက်သည်။ အိပ်ခန်းထဲသို့ ပြန်ရောက်သည်နှင့် တစ်ပြိုင်နက် သူမသည် အလေ့အထအတိုင်း ဖုန်းကို ထုတ်ကာ ဝတ္ထုဖတ်သည့် App ကို ဖွင့်ပြီး ဖတ်လက်စ နေရာမှနေ၍ ဆက်လက်ဖတ်ရှုနေတော့သည်။

သူမသည် အချစ်ဝတ္ထု ဖတ်ရသည်ကို အလွန်နှစ်သက်ပြီး အချို့သော ညများတွင် မနက် ၁ နာရီ သို့မဟုတ် ၂ နာရီအထိ ညဉ့်နက်အောင် ဖတ်တတ်သည်။ 

ရွှီရိုသည် သမီးဖြစ်သူ၏ ဤဝါသနာကို သိထားသောကြောင့် သတိပေးနေခြင်း ဖြစ်သည်…အကယ်၍ အနားယူချိန် မလုံလောက်ပါက နောက်တစ်နေ့ အလုပ်သွားသည့်အခါ မလန်းဆန်းမည်ကို စိုးရိမ်သောကြောင့်ပင်။

ဈေးကွက်တန်ဖိုး ၅ဘီလီယံ  ချီရှိသော ကုမ္ပဏီတစ်ခု၏ ထိပ်ဆုံးတွင် ထိုင်နေသည့် အမျိုးသမီး စီအီးအို  တစ်ဦးက အချစ်ဝတ္ထုများကို အသည်းအသန် ဖတ်ရှုနေတတ်သည်ဟူသော အချက်ကို အခြားသူများကို ပြောပြလျှင် မည်သူမျှ ယုံကြည်ကြမည် မဟုတ်ချေ။ 

သို့သော် ၎င်းက အမှန်တရားပင် ဖြစ်သည်။ ရွှီပင်းနင်းနှင့် သိပ်မရင်းနှီးသော သူများအနေဖြင့် သူမသည် သီးသန့်အချိန်များတွင် လုံးဝအေးစက်စက် နိုင်သူမဟုတ်ဘဲ အလွန်နူးညံ့သိမ်မွေ့သူတစ်ဦး ဖြစ်သည်ကို မည်သို့မျှ စိတ်ကူးမိကြမည် မဟုတ်ချေ။

အစပိုင်းတွင် ရွှီပင်းနင်းသည် မိခင်ဖြစ်သူ၏ သတိပေးချက်ကို သတိရနေခဲ့သော်လည်း၊ ဝတ္ထုထဲတွင် အလွန်အမင်း စီးမျောသွားခဲ့ရာ သတိပြန်ဝင်လာသည့် အချိန်၌ မနက် ၁ နာရီကျော်သွားခဲ့ပြီ ဖြစ်သည်။ 

သူမသည် ဆက်လက်ဖတ်ရှုလိုသော ဆန္ဒကို ထိန်းချုပ်ကာ အိပ်စက်ရန်အတွက် မိမိကိုယ်မိမိ အတင်းအကျပ် ဖိနှိပ်လိုက်ရတော့သည်။

နောက်တစ်နေ့မနက်တွင်...

ရွှီရိုသည် မနက်စာ ပြင်ဆင်ပြီးသွားသော်လည်း သမီးဖြစ်သူ နိုးမလာသေးသည်ကို မြင်ရသဖြင့် သူမ၏ အခန်းသို့ သွားကာ အကျွမ်းတဝင်ရှိလှသော ပုံစံအတိုင်း စောင်ကို ဆွဲလှန်လိုက်လေသည်။ 

ညဝတ်ဂါဝန်၏ အနားစမှာ အပေါ်သို့ လွင့်တက်သွားပြီး အသက်ရှူမှားလောက်စရာ မြင်ကွင်းတစ်ခု ထွက်ပေါ်လာခဲ့သည်။

နှစ်ခြိုက်စွာ အိပ်ပျော်နေသော ရွှီပင်းနင်းသည် အေးစိမ့်သော ခံစားချက်ကြောင့် လန့်နိုးလာခဲ့သည်။ မျက်လုံးကို ဖွင့်ကြည့်လိုက်သောအခါ ရွှီရိုက ကုတင်ဘေးတွင် လက်ခါးထောက်လျက် ရပ်နေသည်ကို တွေ့လိုက်ရသည်။

"ညက ညဉ့်မနက်စေနဲ့လို့ အမေပြောသားပဲ၊ သမီးက စကားကို မနားထောင်ဘူး။ အချစ်ဝတ္ထုတွေကို ဒီလောက်တောင် သဘောကျနေရင် ကိုယ့်ဘာသာကိုယ် ရည်းစားတစ်ယောက်လောက် ရှာထားလိုက်ပါလား" ဟု ရွှီရိုက စနောက်လိုက်သည်။

"ရည်းစားဆိုတာက ရှာရလွယ်တာကျလို့..." ရွှီပင်းနင်းက တိုးတိုးလေး ပြန်လည်ချေပရင်း ကုတင်ပေါ်မှ အလျင်အမြန် ဆင်းလိုက်တော့သည်။

တစ်ဆယ့်ငါးမိနစ်ခန့်အကြာတွင် ရွှီရိုနှင့် ရွှီပင်းနင်းတို့ အိမ်မှ အတူတူ ထွက်လာခဲ့ကြပြီး မိမိတို့၏ အလုပ်ခွင်အသီးသီးသို့ ထွက်ခွာသွားကြသည်။ 

လမ်းခွဲခါနီးတွင် ရွှီရိုက ထပ်မံသတိပေးလိုက်သည် - "ကိတ်မုန့် သွားပို့ဖို့ မမေ့နဲ့ဦးနော်"

"မမေ့ပါဘူး မေမေ"

ရွှီပင်းနင်း စိတ်ကို ပြန်လည်စုစည်းကာ ကုမ္ပဏီသို့ အချိန်မီ ရောက်ရှိလာခဲ့ပြီး ဓာတ်လှေကားကို တစ်ယောက်တည်း စီးကာ အပေါ်သို့ တက်လာခဲ့သည်။ 

၎င်းမှာ ဓာတ်လှေကားကို သူမတစ်ယောက်တည်းအတွက် သီးသန့်ဖယ်ထားခြင်းကြောင့် မဟုတ်ပေ။ 

အမှန်တကယ်တော့ ဝန်ထမ်းများသည် သူမကို မြင်လိုက်ရသည့်အခါတိုင်း ဖိနပ်ကြိုးချည်ရန် အကြောင်းပြချက် ရှာခြင်း သို့မဟုတ် အရေးကြီးဖုန်း ဖြေကြားဟန်ဆောင်ခြင်းများ ပြုလုပ်ကာ သူမနှင့် အနည်းဆုံး ငါးမီတာခန့် ဝေးဝေးတွင် နေလေ့ရှိကြပြီး ဓာတ်လှေကား အတူတူစီးရန် ပို၍ပင် ဝေးစွတည်း။

ရွှီပင်းနင်းသည် အလုပ်ကိစ္စတွင် အလွန်စေ့စပ်သေချာပြီး ပြတ်သားစွာ ဆုံးဖြတ်ချက်ချတတ်သူ ဖြစ်သည်။ 

သူမ၏ အေးစက်စက် နိုင်သော အမူအရာနှင့် ပေါင်းစပ်လိုက်သောအခါ ဝန်ထမ်းများမှာ သူမကို အလွန်အမင်း ကြောက်ရွံ့ကြပြီး အမှားတစ်ခုခု ပြုလုပ်မိပါက စီအီးအိုကို စိတ်အနှောင့်အယှက် ဖြစ်စေမည်ကို စိုးရိမ်နေကြသည်။ 

ထို့အပြင် ရုံးခန်းထဲသို့ ညာဘက်ခြေလှမ်းဖြင့် အရင်ဝင်မိခြင်းကြောင့် အလုပ်ထုတ်ခံရမည်ကိုပင် ကြောက်ရွံ့နေကြသည်။

သို့သော် လက်တွေ့တွင်မူ ရွှီပင်းနင်းသည် ခိုင်လုံသော အကြောင်းပြချက် မရှိဘဲ မည်သူ့ကိုမျှ အလုပ်ထုတ်လေ့မရှိချေ….အလုပ်တွင် ကြီးမားသော အမှားအယွင်းတစ်ခု ပြုလုပ်မိခြင်းမျိုး မဟုတ်လျှင်ပေါ့။