အခန်း (၃၅) - တတိယမြောက် စနစ်ကို အပ်နှင်းခြင်း

​ရွှီပင်းနင်း၏ မေးခွန်းထုတ်မှု တရစပ်ဒဏ်ကြောင့် ကျန်းရုန်ဖေးတစ်ယောက် ဘာပြန်ပြောရမှန်း မသိဖြစ်သွားခဲ့ရသဖြင့် အချိန်ဆွဲသည့်အနေဖြင့် ဆိုလိုက်သည် -

​"ငါကပဲ အများကြီး ပြောပြနေရတာလား... အခု နင့်အလှည့်ပဲလေ။ နင့်ကောင်လေးနာမည်က ဘယ်သူလဲဆိုတာ ငါ့ကို အရင်ပြောပြဦး"

​"နင် ငါ့မေးခွန်းကို အရင်ဖြေရင်... ငါလည်း နင့်ကို သဘာဝအတိုင်း ပြန်ပြောပြမှာပေါ့" ရွှီပင်းနင်းက ဆိုလိုက်သည်။

​"မရပါဘူး... နင်ပဲ အရင်ပြောပြ"

​ကျန်းရုန်ဖေးသည် မူဟန်နှင့် ဖြစ်ပျက်ခဲ့သော ဇာတ်လမ်းကို ထုတ်ပြောရန် အလွန်ပင် ရှက်ရွံ့နေခဲ့သဖြင့်၊ ရွှီပင်းနင်းကို အေးဆေးသွားစေရန်အတွက် မူဟန်နှင့် မည်သို့သိကျွမ်းခဲ့ပုံကို ဇာတ်လမ်းဆင်၍ လိမ်ညာပြောဆိုရန်သာ စဉ်းစားနေခဲ့သည်။ ထို့ကြောင့် သူမ ရွှီပင်းနင်းနှင့် စကားလုံးချင်း လုနေစဉ်အတွင်း... စိတ်ထဲ၌ မည်သို့သော အလိမ်အညာ ဇာတ်ညွှန်းကို ဖန်တီးရမည်နည်းဟု အပြင်းအထန် စဉ်းစားနေခဲ့ရရှာသည်။

​"နင် အရင်ပြော... ပြီးမှ ငါပြောမယ်" ရွှီပင်းနင်းသည် ကျန်းရုန်ဖေးဘက်မှ ကတိဖျက်သွားမည်ကို စိုးရိမ်သဖြင့် ယခုထက်ထိ အလျှော့မပေးဘဲ ဇွတ်ငြင်းနေဆဲ ဖြစ်သည်။

​"ကောင်းပြီလေ... နင်မပြောရင်လည်း နေပေါ့၊ ငါလည်း နင့်ကို မပြောတော့ဘူး" ကျန်းရုန်ဖေး သူမ၏ စိတ်ကူးထဲက ဇာတ်ညွှန်း မပြီးသေးသဖြင့် ဤသို့ပင် လမ်းခွဲလိုက်ရန် ဆုံးဖြတ်လိုက်သည်။

​ရွှီပင်းနင်းသည် တကယ်ကိုပဲ စူးစမ်းလိုစိတ် ပြင်းပြနေခဲ့သဖြင့်... ကျန်းရုန်ဖေးကို အရင်ပြောပြလိုက်လျှင် ပိုကောင်းမည်ဟု တွေးမိလိုက်သည်။ အကယ်၍ ကျန်းရုန်ဖေးဘက်က ခေါင်းမာနေဦးမည်ဆိုပါက... သူမ ပြောပြလာသည့်အထိ တောက်လျှောက် ပူဆာတွန်းအားပေးရန် စိတ်ကူးလိုက်သည်။

​သို့သော်လည်း ရွှီပင်းနင်း စိတ်ဆုံးဖြတ်ချက် မချရသေးမီမှာပင်... သူမထံသို့ မူဟန်ထံမှ မက်ဆေ့ဂျ်တစ်ခု ရုတ်တရက် ရောက်ရှိလာခဲ့တော့သည်။

​"နင်မပြောချင်ရင်လည်း မပြောနဲ့တော့ဟေ့... ငါတို့ တွေ့ကြရသေးတာပေါ့။ ငါ့ကောင်လေးက ငါ့ဆီ မက်ဆေ့ဂျ်ပို့လာလို့... ငါ နင်နဲ့ ဆက်ပြီး စကားမပြောနိုင်တော့ဘူးနော်" ရွှီပင်းနင်းက အပြုံးလေးဖြင့် ဆိုလိုက်ပြီး၊ ကျန်းရုန်ဖေးနှင့် ဗီဒီယိုကောလ် ပြောဆိုခြင်းကို ချက်ချင်း ဖြတ်တောက်လိုက်တော့သည်။

​သူမ ကျန်းရုန်ဖေးထံသို့ ဗီဒီယိုကောလ် ခေါ်ဆိုခဲ့ရသည့် အကြောင်းရင်းမှာ... မူဟန့်ထံသို့ ပေးပို့ထားသော မက်ဆေ့ဂျ်မှာ ပြန်စာမရရှိသေးဘဲ အထီးကျန် ပျင်းရိနေခဲ့သဖြင့်၊ ကျန်းရုန်ဖေးနှင့် စကားပြောရင်း အချိန်ဖြုန်းရန် ကြံစည်ခဲ့ခြင်းသာ ဖြစ်သည်။ ယခုအခါ မူဟန်ထံမှ ပြန်စာရရှိသွားခဲ့ပြီ ဖြစ်ရာ... ရွှီပင်းနင်းအနေဖြင့် ကျန်းရုန်ဖေးနှင့် ဖုန်းထဲတွင် ဆက်လက်၍ အငြင်းပွားနေရန် စိတ်ကူးမရှိတော့ချေ။

​"သူငယ်ချင်းထက်... ယောကျ်ားကို ပိုဦးစားပေးတဲ့ကောင်မလေးပဲ" ရွှီပင်းနင်း၏ အပြုအမူကို ကြည့်ကာ ကျန်းရုန်ဖေး မကျေမနပ် ရေရွတ်လိုက်မိပြီး၊ မိမိသူငယ်ချင်းမလေး၏ ကောင်လေးမှာ မည်သို့သော ပုံစံမျိုး ဖြစ်နေမည်နည်းဟု ပိုမို၍ စူးစမ်းချင်စိတ်များ တဖွားဖွား ဖြစ်ပေါ်လာခဲ့ရတော့သည်။

​အခြားတစ်ဖက်တွင်မူ...

​ရွှီပင်းနင်း မူဟန်ပေးပို့လာသော မက်ဆေ့ဂျ်ကို စစ်ဆေးကြည့်ရှုလိုက်ပြီး သူ အိမ်သို့ ဘေးကင်းစွာ ရောက်ရှိသွားပြီဖြစ်ကြောင်း သိရှိလိုက်ရသည်။ ထို့နောက် သူမက... သူ ယနေ့အလုပ်ကိစ္စဖြင့် လူတစ်ဦးနှင့် သွားရောက်တွေ့ဆုံခဲ့သည့် ပွဲမှာ အဆင်ပြေချောမွေ့ခဲ့ရဲ့လားဟု မေးမြန်းလိုက်သည်။

​မူဟန် စကားလုံးအချို့ကို သုံးကာ ပေါ့ပေါ့ပါးပါးပင် လှည့်ပတ်၍ အလွယ်တကူ ဖြေရှင်းလိုက်ပြီးနောက်... သူ၏ "စိတ်အနှောင့်အယှက်ဖြစ်စရာ ဝေဒနာများ" ကို ရင်ဖွင့်တိုင်တည်လိုက်တော့သည်။ ၎င်း၏ အဓိက အနှစ်သာရမှာမူ... သူ၏ မိသားစုက သူ့အတွက် စေ့စပ်ကြောင်းလမ်းမည့် Blind date အစီအစဉ်တစ်ခုကို အတင်းအကျပ် စီစဉ်နေကြခြင်း ဖြစ်ကာ၊ သူက ငြင်းပယ်ခဲ့သော်လည်း... စီးပွားရေး ပူးပေါင်းဆောင်ရွက်မှုများနှင့် လူမှုရေးအရ အပြန်အလှန် ပေးဆပ်ရမည့် တာဝန်ဝတ္တရားများ ရှိနေသဖြင့်၊ မိသားစုက သူ့ကို သွားရောက်ရန် ဖိအားပေးနေကြခြင်း ဖြစ်ကြောင်း ဆိုလိုက်သည်။

​သူသည် ဤကိစ္စကြောင့် မိသားစုနှင့်ပင် အကြီးအကျယ် စကားများ ရန်ဖြစ်ခဲ့ရသေးကြောင်း ထည့်ပြောလိုက်သေးသည်။

​ရွှီပင်းနင်းသည် အလွန်ပင် ရိုမန်တစ်ဆန်လှသော မိန်းကလေးတစ်ဦး ဖြစ်ရာ... သဘာဝအတိုင်း မူဟန်၏ လိုအပ်ချက်နှင့် အကျပ်အတည်းကို ပထမဦးစားပေး စဉ်းစားပေးခဲ့ပြီး၊ သူမအနေဖြင့် သဝန်တိုနေမည် မဟုတ်သဖြင့်... မိသားစုမျက်နှာကို ထောက်ထားသောအားဖြင့် Blind date သို့ ရိုးရိုးရှင်းရှင်း ဟန်ပြအဖြစ်သာ သွားရောက်ရန် သူ့ကို တိုက်တွန်းလိုက်တော့သည်။

​မူဟန် အစပိုင်းတွင် မလိုလားအပ်သည့်အလား ခေတ္တမျှ ငြင်းပယ်ဟန် ပြုလုပ်လိုက်ပြီးမှ... နောက်ဆုံးတွင် ရွှီပင်းနင်း၏ အကြံဉာဏ်ကို "မတတ်သာဘဲ ခေါင်းငြိတ်သယောင်" လက်ခံလိုက်ရင်း ဆိုလိုက်သည် - "ဒါနဲ့... ငါတို့နှစ်ယောက်ရဲ့ ဆက်ဆံရေးကို လောလောဆယ် လျှို့ဝှက်ထားကြရအောင်နော်… မင်းရဲ့ မိခင်ကလွဲလို့... တခြားဘယ်သူ့ကိုမှ မပြောပြတာက အကောင်းဆုံးပဲ"

​ဤမျှလောက်သော ဒုက္ခမျိုးစုံကို ခံစားရင်း အလိမ်အညာ ဇာတ်လမ်းများစွာကို ဖန်တီးခဲ့ရခြင်း၏... အစစ်အမှန် သော့ချက် ရည်ရွယ်ချက်မှာ ဤအချက်ပင် ဖြစ်သည်။

​သူသည် ရွှီပင်းနင်းနှင့် ကျန်းရုန်ဖေးတို့မှာ အရင်းနှီးဆုံး သူငယ်ချင်းများ ဖြစ်ကြကြောင်း ကြိုတင်၍ သိရှိထားပြီးသား ဖြစ်သည်။ မတော်တဆ အမှားအယွင်း တစ်စုံတစ်ရာ ဖြစ်ပေါ်ပြီး လူမိသွားခြင်းမျိုးကို ရှောင်ရှားနိုင်ရန်အတွက်... မူဟန် သဘာဝအတိုင်း ကြိုတင်ကာကွယ်မှု အစီအမံအချို့ကို ပြုလုပ်ထားရခြင်း ဖြစ်ပေသည်။

​သို့သော် သူ မသိရှိခဲ့ရသည့်အချက်မှာ... သူ ရွှီပင်းနင်းထံသို့ မက်ဆေ့ဂျ် မပေးပို့မီ မိနစ်ပိုင်းအလိုလေးတွင်တင်... သူ၏ လျှို့ဝှက်ချက်မှာ လုံးဝ ပေါက်ကြားသွားလုနီးပါး ဖြစ်ခဲ့ရခြင်းပင် ဖြစ်သည်။ ဒါပေမယ့် သူသည် ဘေးအန္တရာယ်ဆိုးကြီးမှ သီသီလေး လွတ်မြောက်သွားခဲ့ကြရသည်။

​မည်သို့ပင်ဆိုစေကာမူ ဤအရာအားလုံးမှာ... မူဟန်၏ ဗီလိန်အရှိန်အဝါအမှတ်များက သူ့ထံသို့ သယ်ဆောင်လာပေးသော ကံကောင်းခြင်း လက်ဆောင်မွန်ကြောင့်ပင် ဖြစ်သည်။ ဇာတ်လိုက်မင်းသား၏ အရှိန်အဝါ မြင့်မားလေလေ... သူတို့၏ ကံကြမ္မာကံဇာတာ ကောင်းမွန်လေလေ ဖြစ်သကဲ့သို့ပင်... ဗီလိန်တစ်ဦး၏ အရှိန်အဝါ မြင့်မားလာခြင်းကလည်း တူညီသော ကံကောင်းခြင်း စွမ်းပကားကို ပိုင်ဆိုင်စေခြင်း ဖြစ်ပေသည်။

​"ကောင်းပါပြီ... ရှင့်ရဲ့ ဘလိုင်းဒိတ် အစီအစဉ်တွေ အားလုံး ပြီးဆုံးသွားတဲ့အထိ... ဘယ်သူ့ကိုမှ ထုတ်မပြောဘူးလို့ ကျွန်မ ကတိပေးပါတယ်" ရွှီပင်းနင်းက လွယ်လွယ်ကူကူပင် သဘောတူ ခေါင်းငြိတ်လိုက်တော့သည်။

​မူဟန် နောက်ဆုံးတွင် စိတ်အေးလက်အေးဖြင့် သက်ပြင်းတစ်ချက် ချလိုက်နိုင်တော့သည်။ ထို့နောက် သူ ရွှီပင်းနင်းထံသို့ ဗီဒီယိုကောလ် ခေါ်ဆိုလိုက်ပြီး... သူမ ပျော်ရွှင်သွားစေရန်အတွက် အလွန်ပင် ချိုသာနူးညံ့လှသော အချစ်စကားလုံးများကို တတွတ်တွတ် ဆိုလိုက်တော့သည်။ 

ရွှီပင်းနင်းတစ်ယောက် အချစ်မိုးများ ရွာသွန်းဖြန်းပက်ခြင်း ခံလိုက်ရသဖြင့် စိတ်အာရုံများ လုံးဝ ဝေဝါးသွားခဲ့ရပြီး၊ သူမ၏ မျက်နှာလေးမှာ နီမြန်းလျက်ရှိနေခဲ့သည်။

​ထို့နောက်တွင်မူ မူဟန်သည်... သူမ၏ ခြေထောက်လှလှလေးများကို ကြည့်ရှုလိုကြောင်း သေးငယ်သော တောင်းဆိုချက်အချို့ကို စတင်ပြုလုပ်လိုက်သည်။ ရွှီပင်းနင်း ရှက်ရွံ့နေခဲ့သော်လည်း သဘောတူလိုက်ပြီး ဖုန်းကင်မရာကို အရှေ့ဘက်ကင်မရာ သို့ ပြောင်းလဲပေးလိုက်ရှာသည်။

​ခြေထောက်လေးများကို ကြည့်ရှုအကဲခတ်ပြီးနောက်... မူဟန် သူ၏ ကံကို ထပ်မံစမ်းသပ်သည့်အနေဖြင့် သူမ၏ ရင်သားအစုံ ကိုပါ မြင်တွေ့ခွင့်ပေးရန် ထပ်မံ၍ တောင်းဆိုလိုက်ပြန်သည်။

ရွှီပင်းနင်း ရှက်လွန်းလှသဖြင့် မျက်နှာလေး တစ်ပြင်လုံး နီရဲသွားခဲ့ရပြီး... တွန့်ဆုတ်နေကာ ဘယ်လိုမှ သဘောမတူနိုင်ဘဲ ငြင်းပယ်လိုက်တော့သည်။ မူဟန်လည်း ထိုကိစ္စကို ဆက်လက်၍ ဖိအားမပေးတော့ဘဲ အခြားသော စကားဝိုင်း အကြောင်းအရာများဆီသို့ လျင်မြန်စွာ လွှဲပြောင်းပေးလိုက်သည်။

​သူတို့နှစ်ဦး အတူတူ စကားစမြည် ပြောဆိုနေခဲ့ကြရင်း အချိန်များမှာ မသိမသာ ကုန်လွန်သွားခဲ့ရာ... ညသန်းခေါင်ယံ အချိန်သို့ ရောက်ရှိသည့်အခါကျမှသာ နှမြောတသစွာဖြင့် ဖုန်းလိုင်းကို ဖြတ်တောက်လိုက်ကြတော့သည်။

​ဖုန်းချပြီးနောက် မူဟန်သည် လင်းရော့ထံသို့ ဆက်သွယ်လိုက်ပြီး ဆရာဝန်ကြီး ဘရုစ်တစ်ယောက် ထန်ကျိုး မြို့သို့ အတိအကျ မည်သည့်အချိန်တွင် ဆိုက်ရောက်မည်နည်းဟု မေးမြန်းစုံစမ်းလိုက်သည်။ လင်းရော့က နောက်တစ်နေ့ နံနက် ၆ နာရီ ၃၀ မိနစ်တွင် ဆိုက်ရောက်လိမ့်မည်ဖြစ်ကြောင်း ပြန်လည်ဖြေကြားခဲ့သည်။ မူဟန် နှိုးစက် ပေးလိုက်ပြီးနောက် လျင်မြန်စွာပင် အိပ်စက်အနားယူလိုက်တော့သည်။

​နောက်တစ်နေ့ နံနက်စောစော။

​သီးသန့် ကိုယ်ပိုင်ဂျက်လေယာဉ်  တစ်စီးသည် ထန်ကျိုးမြို့ရှိ လေဆိပ်တစ်ခုသို့ ဖြည်းညှင်းစွာ ဆိုက်ရောက်လာခဲ့သည်။ 

ဆရာဝန်ကြီး ဘရုစ်သည် သူ၏ ဆေးဘက်ဆိုင်ရာ အဖွဲ့သားများနှင့်အတူ ထန်ကျိုးမြို့သို့ ရောက်ရှိလာခဲ့ခြင်း ဖြစ်သည်။ လင်းရော့သည် လေဆိပ်တွင် ကြိုတင်၍ ကားတစ်စီးကို အဆင်သင့် စီစဉ်ထားခဲ့ပြီး ဘရုစ်ကို သွားရောက်ကြိုဆိုစေခဲ့သည်။

​မူဟန် ကြိုတင်ပေးထားသော နှိုးစက်သံကြောင့် အိပ်ယာမှ နိုးထလာခဲ့သည်။ သူ၏ အိပ်ချင်မူးတူး ဖြစ်နေသော မျက်လုံးများကို ပွတ်သပ်လိုက်ရင်း... လင်း ရော့၏ မြင်ကွင်းနှင့် ကြားသိရသော အသံများကို စနစ်မှတစ်ဆင့် အပြန်အလှန် မျှဝေခံစားရန် ရွေးချယ်လိုက်တော့သည်။

​လင်းရို့နှင့် တစ်ဖက်လူတို့အကြား စကားပြောဆိုနေကြသည့် အသံများထံမှတစ်ဆင့်... မူဟန်သည် မည်သူမှာ ဘရုစ် ဖြစ်သည်ကို လျင်မြန်စွာ ခွဲခြားသိရှိလိုက်ရသည်။

​လင်းရော့ ပေးအပ်ထားသော အချက်အလက်များအရ... ဘရုစ်သည် အသက် ၄၀ ကျော် အရွယ်ခန့်သာ ရှိသေးသော သက်လတ်ပိုင်း အမျိုးသားတစ်ဦး ဖြစ်ရမည် ဖြစ်သော်လည်း၊ ယခု မျက်စိရှေ့မှောက်တွင် မြင်တွေ့နေရသော ဘရုစ်မှာမူ... သူ၏ အစစ်အမှန်အသက်ထက် များစွာ ပိုမိုအိုမင်းရင့်ရော်နေဟန် တူပြီး၊ သူ၏ မုတ်ဆိတ်မွေးများအကြားတွင် ထင်ရှားလှသော ဆံပင်ဖြူများ ရောပြွမ်းလျက်ရှိနေခဲ့သည်။

​ဘရုစ်၏ ရုပ်ရည်သွင်ပြင်ကို တစ်ချက်မျှ အကဲခတ်ကြည့်ရှုပြီးနောက်... ပိုင်ရှင် ဖြစ်သော မူဟန်၏ စနစ်ဆက်သွယ်ရေးစွမ်းရည်က တစ်ဖက်လူ၏ အချက်အလက်ကို ချက်ချင်း စစ်ဆေးပေးလိုက်တော့သည်။

​【ဇာတ်ပို့ဇာတ်ကောင် - ဒေနာ ဘရုစ် 】

【ဆွဲဆောင်မှုအမှတ် - ၆၈】

【တိုက်ခိုက်ရေးစွမ်းရည် - ၈၆】

【ဇာတ်ပို့အရှိန်အဝါအမှတ် - ၉၅】

【စွမ်းရည်များ - ထိပ်တန်းအဆင့် အနောက်တိုင်းဆေးပညာရပ် ကျွမ်းကျင်မှု၊ အခြေခံအဆင့် တရုတ်ရိုးရာ တိုင်းရင်းဆေးပညာရပ် ကျွမ်းကျင်မှု】

【စရိုက်လက္ခဏာ - သမီးဖြစ်သူအပေါ် အလွန်အမင်း အလိုလိုက်ပြီး အသက်ထက်မက ချစ်မြတ်နိုးသော ဖခင်ကောင်းတစ်ဦး】

【ကံကြမ္မာနှင့် ဖူးစာ - ထိပ်တန်းအဆင့် ကုသရေးသမားတော်ကြီး 】

【လတ်တလော စိုးရိမ်ပူပန်မှု - ဆေးဝါးသုတေသနဌာနသည် ငွေကြေးအရင်းအနှီး ပြတ်လပ်မှုနှင့် ရင်ဆိုင်နေရပြီး၊ ရောဂါကုသဆေး ရှာဖွေဖော်ထုတ်နိုင်ရန် လမ်းစမှာ အလွန်ပင် ဝေးကွာနေဆဲ ဖြစ်ခြင်း】

【လတ်တလော အတွေးအခေါ် - သမီးဖြစ်သူ၏ ရောဂါအခြေအနေမှာ ပိုမိုဆိုးရွားလာခဲ့ပြီး၊ သူမတွင် အသက်ရှင်ရန် အချိန်အများကြီး မကျန်တော့ချေ။ အံ့ဖွယ်အမှုတစ်ခုခု ဖြစ်ပေါ်လာရန်သာ မျှော်လင့်နေမိခြင်း】

​ဘရုစ်၏ အချက်အလက်များကို ကြည့်ရှုပြီးနောက် မူဟန်၏ စိတ်ထဲတွင် မည်သို့ ကိုင်တွယ်ရမည်ဟူသော အကြံဉာဏ်ကောင်းတစ်ခု ချက်ချင်း ပေါ်ပေါက်လာခဲ့တော့သည်။

​ဘရုစ်သည် နိုင်ငံရပ်ခြားမှ နေ၍ ပျံသန်းလာခဲ့ခြင်းဖြစ်ရာ လေယာဉ်စီးရသည့် ဒဏ်ကြောင့် အနည်းငယ် မောပန်းနွမ်းနယ်နေခဲ့သည်။ သူ ကားအတွင်း၌ မျက်လုံးများကို ခေတ္တမျှ မှိတ်ထားလိုက်ပြီး အနားယူရန် ကြံစည်လိုက်သည်။

 သို့သော်လည်း အတိအကျပင် ထိုအချိန်၌... ဆန်းကြယ်လှသော အသံအချို့မှာ သူ၏ စိတ်အာရုံအတွင်းသို့ ရုတ်တရက် ရောက်ရှိလာခဲ့သော်လည်း၊ သူကမူ ၎င်းကို အလုပ်အလွန်အကျွံလုပ်ခြင်းကြောင့် ဖြစ်ပေါ်လာသော အမြင်အာရုံ အကြားအာရုံ မှားယွင်းမှု ဟုသာ သတ်မှတ်လိုက်ပြီး ဂရုမစိုက်ဘဲ ထားလိုက်တော့သည်။

​ဘရုစ်နှင့် သူ၏ ဆေးအဖွဲ့သားများကို တင်ဆောင်လာသော အဆင့်မြင့်ဗင်ကားကြီး သည်... ခန့်ညားလှသော စံအိမ်ကြီးတစ်ခု၏ ရှေ့မှောက်သို့ ဆိုက်ရောက်လာခဲ့သည်။ 

ဤစံအိမ်ကြီးမှာ... ကျန်းမင်းက ရှောင်ပေ့နှင့် ကျန်းရုန်ဖေးတို့ မင်္ဂလာလက်ဖွဲ့အဖြစ် ပေးအပ်ထားခဲ့သော အိမ်ကြီး ဖြစ်သော်လည်း၊ ၎င်းအိမ်တွင် ရှောင်ပေ့တစ်ဦးတည်းသာ နေထိုင်လေ့ရှိပြီး ကျန်းရုန်ဖေးတစ်ယောက် တစ်ခါမျှပင် လာရောက်လည်ပတ်ခြင်း မရှိခဲ့ဖူးချေ။

​ရှောင်ပေ့သည် သူ၏ လက်နှစ်ဖက်ကို အနောက်တွင် ပုန်းကွယ်ထားလျက် အိမ်အတွင်းမှ ထွက်လာခဲ့ပြီး တံခါးကို ဖွင့်ပေးလိုက်သည်။ သူ ဘရုစ်ကို နှုတ်ဆက်လိုက်ပြီးနောက် လင်းရော့ကို ဆိုလိုက်သည် -

​"မင်း  ပြန်ပြီး မင်းရဲ့ အလုပ်တွေကို ဆက်လုပ်နိုင်ပါပြီ ငါတို့ ဒီမှာ မင်းရဲ့အကူအညီ မလိုတော့ဘူး"

​လင်းရော့ကို မောင်းထုတ်ပြီးနောက် ရှောင်ပေ့သည် ဘရုစ်ကို အိမ်အတွင်းသို့ ဖိတ်ခေါ်ကာ စကားပြောဆိုလိုက်တော့သည်။

​"မစ္စတာ ဝုဖ်ကင်း .. ခင်ဗျား ဒီလောက်တောင် အရေးတကြီး ခေါ်လိုက်ရတာကတော့... သေချာပေါက် ငါ့ရဲ့ အကူအညီ လိုအပ်လို့ပဲ ဖြစ်ရမယ်။ ဒါပေမယ့် မင်း ပုံစံကတော့ ဘာမှမဖြစ်ဘဲ အကောင်းတိုင်း ရှိနေသလိုပဲနော်" ဘရုစ်သည် ကျွမ်းကျင်လှသော တရုတ်စကားကို အသုံးပြု၍ ဆိုလိုက်ရာ ၎င်း၏ လေယူလေသိမ်းမှာ အတော်လေး ကောင်းမွန်လှပေသည်။

​ဝုဖ်ကင်း ဆိုသည်မှာ ရှောင်ပေ့ ပြည်ပတွင် ရှိစဉ်က အသုံးပြုခဲ့သော လျှို့ဝှက်ကုဒ်နာမည်  ဖြစ်ပြီး၊ သူသည် နိုင်ငံခြား ကြေးစားစစ်သားလောက တွင် အလွန်ပင် ကျော်ကြားလှသော ဒဏ္ဍာရီတစ်ဦး ဖြစ်ခဲ့ဖူးသည်။

​ဤမေးခွန်းကို ကြားရသောအခါ ရှောင်ပေ့၏ မျက်နှာအမူအရာမှာ အနည်းငယ် ပျက်ယွင်းသွားခဲ့ရပြီး... သူ၏ အနောက်တွင် ပုန်းကွယ်ထားခဲ့သော၊ ပေါက်စီတစ်ခုကဲ့သို့ ဖူးဖူးယောင်နေသည့် သူ၏ ညာဘက်လက်ဝါးကြီးကို ဖြည်းည်းချင်း ထုတ်ပြလိုက်တော့သည်။

​ဘရုစ် အံ့အားသင့်စွာဖြင့် မေးမြန်းလိုက်သည် - "ခင်ဗျား ဘယ်လိုလုပ်ပြီး ဒီလောက်တောင် ပြင်းပြင်းထန်ထန် ဒဏ်ရာရသွားရတာလဲ"

​ရှောင်ပေ့၏ မျက်ဝန်းများမှာ အနည်းငယ် ဝေဝါးသွားခဲ့ရပြီးမှ... လျင်မြန်စွာပင် သဘာဝအတိုင်း ပြန်လည်ဟန်ဆောင်လိုက်သည် - "ငါ... လေးလံတဲ့ အရာဝတ္ထုတစ်ခုခုနဲ့ အထုခံလိုက်ရလို့ပါ"

​"ခင်ဗျား ဆေးရုံကို သွားပြီး စစ်ဆေးမှုတွေ လုပ်ပြီးပြီလား" ဘရုစ်က မေးလိုက်သည်။

​"ဆေးရုံသွားရုံနဲ့သာ အဆင်ပြေမယ်ဆိုရင်... ငါ မင်းကို ဒီလောက်အဝေးကြီးကနေ အတင်းခေါ်နေစရာ မလိုဘူးပေါ့" ရှောင်ပေ့က ဆိုလိုက်သည်။

​ဘရုစ် ဆက်လက်၍ စကားမဆိုတော့ချေ။ သူက ရှောင်ပေ့၏ လက်ကို အကြိုအကြားထိပါ စစ်ဆေးကြည့်ရှုလိုက်ပြီးနောက်... ရှောင်ပေ့၏ ညာဘက်လက်ဝါးအတွင်း၌ အရိုးကျိုးအက်မှု အမြောက်အမြား ဖြစ်ပွားနေခဲ့ပြီး၊ ၎င်း၏ အရေပြားနှင့် အသားမျှင်အချို့မှာလည်း အတိုင်းအတာတစ်ခုအထိ ပုပ်ပျက်နေခဲ့ပြီ (Necrotic ဖြစ်နေခဲ့ပြီ) ဖြစ်ကြောင်း ကောက်ချက်ချလိုက်တော့သည်။ အခြေအနေမှာ အလွန်ပင် ပြင်းထန်ဆိုးရွားလှပေသည်။

​သို့သော်လည်း ပိုမိုတိကျလှသော ဆုံးဖြတ်ချက်ကို ချမှတ်နိုင်ရန်အတွက် ပိုမိုအဆင့်မြင့်လှသော ဆေးဘက်ဆိုင်ရာ စက်ကိရိယာများ လိုအပ်ပေသည်။ သူက တရုတ်နိုင်ငံသို့ ယူဆောင်လာခဲ့သော သီးသန့်လေယာဉ်ပေါ်တွင်မူ... တရုတ်နိုင်ငံ၌ မရှိသေးသော အဆင့်မြင့် ဆေးဘက်ဆိုင်ရာ စက်ပစ္စည်းအချို့ ပါရှိနေခဲ့သည်။ သို့သော်လည်း ၎င်းတို့ကို ဤအိမ်သို့ သယ်ဆောင်လာရန်အတွက် အချိန်အနည်းငယ် လိုအပ်ပေဦးမည်။

​စောင့်ဆိုင်းနေစဉ်အတွင်း ဘရုစ်သည် သူ၏ အပ်စိုက်အပ် များကို ထုတ်ယူလိုက်ပြီး ရှောင်ပေ့ကို ဆိုလိုက်သည် -

​"မစ္စတာ ဝုဖ်ကင်း... ခင်ဗျားရဲ့ လက်ထဲမှာ ပိတ်ဆို့နေတဲ့ သွေးပုပ်အချို့ကို အရင်ဆုံး ဖယ်ထုတ်ပေးပါရစေ အဲဒါက ခင်ဗျားကို နာကျင်မှု သက်သာသွားစေပြီး ပိုမိုသက်တောင့်သက်သာ ဖြစ်သွားစေလိမ့်မယ်"

​"မင်း တရုတ်ရိုးရာ တိုင်းရင်းဆေးပညာကို... ဘယ်အချိန်ကတည်းက စပြီး သင်ယူထားတာလဲ" ရှောင်ပေ့ အနည်းငယ် အံ့အားသင့်စွာဖြင့် မေးမြန်းလိုက်သည်။