အခန်း (၃၄) - ရင်နှစ်သည်းချာ သူငယ်ချင်းမလေးနှင့် ညဉ့်နက်သန်းခေါင် ရင်ဖွင့်ခြင်း
ရှောင်ပေ့သည် အလွန်အမင်း နာကျင်လွန်းလှသဖြင့် တစ်ကိုယ်လုံး ချွေးစေးများ တဖြည်းဖြည်း စီးကျနေခဲ့သည်။ သူသည် ကုန်တိုက်အတွင်းမှ ထွက်ခွာလာခဲ့ပြီးနောက် ဆိတ်ငြိမ်သော နေရာတစ်ခုသို့ ရောက်ရှိသည့်အခါ လင်းရော့ ၏ ဖုန်းနံပါတ်ကို ချက်ချင်း ခေါ်ဆိုလိုက်တော့သည်။
"ငါ့အတွက် ဘရုစ် ကို ချက်ချင်း ဆက်သွယ်ပေးပါ။ ပြီးတော့ သူ့ကို ဆေးဘက်ဆိုင်ရာ အဖွဲ့တစ်ဖွဲ့နဲ့အတူ တရုတ်နိုင်ငံကို အမြန်ဆုံး လာခဲ့ဖို့ ပြောလိုက်ချေ" ရှောင်ပေ့၏ စွမ်းရည်အားလုံးနီးပါးမှာ သူ၏ လက်နှစ်ဖက်ပေါ်တွင် တည်မှီနေခြင်းဖြစ်ရာ... သူ၏ ညာဘက်လက်ကို မသန်မစွမ်းဖြစ်သွားမည့် အခြေအနေမျိုးအား သူ ဘယ်လိုမှ လက်မခံနိုင်ချေ။
လင်းေရာ့ သည် ရှောင်ပေ့၏ လေသံအတွင်းမှ အရေးတကြီး ဖြစ်ပျက်နေမှုကို ခံစားလိုက်ရသဖြင့် အနည်းငယ် အံ့အားသင့်သွားခဲ့ရသည်။
ဘရုစ်သည် နိုင်ငံရပ်ခြားတွင် အလွန်တရာ ကျွမ်းကျင်လှသော ထိပ်တန်းဆရာဝန်ကြီးတစ်ဦး ဖြစ်သည်။ လင်းရော့တစ်ယောက် ပြည်ပတွင် လုပ်ကြံသတ်ဖြတ်သူ တစ်ဦးအဖြစ် လုပ်ကိုင်နေစဉ်က... ပြင်းထန်စွာ ဒဏ်ရာရရှိခဲ့ပြီး အသက်အန္တရာယ် စိုးရိမ်ရသည့် အခြေအနေသို့ ရောက်ရှိခဲ့ဖူးသည်။ ထိုစဉ်က သူမ၏ အသက်ကို ပြန်လည်ကယ်တင်ပေးခဲ့သူမှာ ဘရုစ်နှင့် သူ၏ ဆေးအဖွဲ့သားများပင် ဖြစ်သည်။
"ဘာတွေဖြစ်လို့လဲဟင်… ရှင် ဒဏ်ရာရသွားတာလား" လင်းရော့ အကြောင်းရင်းကို သိရှိလိုသဖြင့် စူးစမ်းမေးမြန်းလိုက်သည်။
"နင် အရင်တုန်းက ဒီလောက် စကားမများပါဘူး…ငါခိုင်းတဲ့အတိုင်းသာ လုပ်စမ်းပါ"
ရှောင်ပေ့သည် မိမိ၏ အဖြစ်မှန်ကို ဖွင့်ဟပြောဆိုရန် အလွန်ပင် ရှက်ရွံ့နေခဲ့သည်။ သူသည် မိမိ၏ ပေါ့ဆမှုကြောင့် မူဟန်၏ ထောင်ချောက်အတွင်းသို့ သက်ဆင်းသွားခဲ့ရသည်မှာ မှန်သော်လည်း... သူ၏ ညာဘက်လက်ဝါးရိုးများ ကြေမွသွားခဲ့သည်ဟူသော အချက်မှာ အမှန်တရား ဖြစ်နေချေပြီ။ အကယ်၍ သူသာ ဤအကြောင်းကို ထုတ်ပြောလိုက်ပါက သူ၏ အရှိန်အဝါပုံရိပ်ကို ကြီးမားစွာ ထိခိုက်သွားစေမည် ဖြစ်သည်။
"ကောင်းပါပြီ..." လင်းရော့က ပြန်လည်ဖြေကြားလိုက်သည်။ သူမ ရှောင်ပေ့နှင့် ဖုန်းချလိုက်ပြီးသည်နှင့်တစ်ပြိုင်နက်... ဤအကြောင်းအရာကို မူဟန့်ထံသို့ ချက်ချင်း အစီရင်ခံ တိုင်ကြားလိုက်တော့သည်။
မူဟန်သည် ကျန်းရုန်ဖေးကို နေအိမ်သို့ ကားမောင်း၍ ပြန်လည်ပို့ဆောင်ပေးနေစဉ်မှာပင် လင်းရော့၏ အစီရင်ခံစာကို လက်ခံရရှိခဲ့ခြင်း ဖြစ်သည်။ သူသည် စကားလုံးတစ်လုံးမျှ ပြန်လည်တုံ့ပြန်ခြင်းမရှိဘဲ တည်ငြိမ်စွာသာ နားထောင်နေခဲ့သည်။
မကြာမီအချိန်မှာပင် ကားလေးမှာ တာ့လင်ဗီလာ သို့ ဆိုက်ရောက်လာခဲ့သည်။ မူဟန် ကျန်းရုန်ဖေးကို နှုတ်ဆက်လိုက်ပြီး၊ သူမ တိုက်ခန်းအဆောက်အအုံအတွင်းသို့ ဝင်ရောက်သွားသည်ကို ကြည့်ရှုပြီးမှသာ... လင်းရော့ထံသို့ ဖုန်းပြန်လည်ခေါ်ဆိုလိုက်တော့သည်။
ဖုန်းပြောဆိုနေစဉ်အတွင်း မူဟန်သည် လင်းရော့အား ဆရာဝန်ကြီး ဘရုစ်နှင့် ပတ်သက်သော အချက်အလက်များကို မေးမြန်းစုံစမ်းလိုက်သည်။ လင်းရော့သည်လည်း သူမ သိရှိထားသမျှ အရာအားလုံးကို ကုန်စင်အောင် ပြောပြလိုက်တော့သည်။
မူဟန်သည် ဤထောက်လှမ်းရေး အချက်အလက်များထံမှနေ၍ အဓိက သော့ချက် နှစ်ခုကို ရှာဖွေတွေ့ရှိခဲ့သည်။
ပထမအချက်မှာ... ဘရုစ်သည် ငွေကြေးကို အလွန်တရာ မက်မောသူဖြစ်ပြီး၊ ငွေကို စွဲလမ်းရူးသွပ်သည့် အဆင့်အထိ ရှိနေခြင်း ဖြစ်သည်။
ဒုတိယအချက်မှာ... ဘရုစ်သည် လူပေါင်းများစွာ၏ အသက်ကို ကယ်တင်ပေးနိုင်ခဲ့သော အလွန်ကျွမ်းကျင်သည့် ဆရာဝန်ကြီး ဖြစ်သော်လည်း၊ သူ၏ သမီးအရင်းကိုမူ မကယ်တင်နိုင်ခဲ့ချေ။
အကျဉ်းချုပ်ရသော် ဘရုစ်၏ သမီးဖြစ်သူတွင် လောလောဆယ် ကုသရန် ဆေးမရှိသေးသော ရှားပါးရောဂါဆိုး တစ်ခု စွဲကပ်နေခြင်း ဖြစ်သည်။ ဘရုစ်သည် သူ ရှာဖွေစုဆောင်းထားသမျှသော ငွေကြေးအားလုံးကို အသုံးပြု၍... သမီးဖြစ်သူ၏ ရောဂါကို ကုသနိုင်မည့် ဆေးဝါးများ ထုတ်လုပ်ရန်အတွက် ဆေးဘက်ဆိုင်ရာ သုတေသနဓာတ်ခွဲခန်း တစ်ခုကို တည်ထောင်ခဲ့သော်လည်း၊ ယခုအချိန်အထိ မည်သည့် ဆေးဝါးမျိုးမျှ ရှာဖွေဖော်ထုတ်နိုင်ခြင်း မရှိသေးချေ။
"သခင်... ကျွန်မ နောက်ထပ် ဘာတွေ ဆက်လုပ်ရမလဲဟင်" လင်းရော့ မူဟန့်ထံမှ ညွှန်ကြားချက်ကို တောင်းခံလိုက်သည်။
"ရှောင်ပေ့ ခိုင်းတဲ့အတိုင်းပဲ... ဘရုစ်ကို ဆက်သွယ်ပေးလိုက်ပါ" မူဟန်က ဆိုလိုက်သည်။
လင်းရော့ စုံစမ်းရရှိထားသော အချက်အလက်များအရ ဘရုစ်သည် အလွန်ပင် ကောင်းမွန်သော ဖခင်ကောင်းတစ်ဦး ဖြစ်ကြောင်း ကောက်ချက်ချနိုင်လှပေသည်။ ထို့ကြောင့် ဘရုစ်၏ စိတ်ကူးနှင့် လိုအင်ဆန္ဒကို ခန့်မှန်းရသည်မှာ မခက်ခဲလှချေ။
အကယ်၍ ဘရုစ်ထံသို့ စနစ် တစ်ခု ပေးအပ်လိုက်မည်ဆိုပါက... စနစ်ထံမှ ပြန်လည်ရရှိမည့် ဆုလာဘ်များမှာ သေချာပေါက် ဆေးပညာရပ်ဆိုင်ရာ စွမ်းရည်များသာ ဖြစ်ပေလိမည်။ ၎င်းကို မူဟန် အလွန်ပင် စိတ်ဝင်စားလှပေသည်။
ထို့အပြင်... ဘရုစ်ထံသို့ စနစ်ကို ပေးအပ်ပြီးနောက်၊ ရှောင်ပေ့ကို ကိုင်တွယ်ရန်အတွက် ဘရုစ်ကို စနစ်မစ်ရှင် များ စေခိုင်း၍ အသုံးချနိုင်သေးသည်။ ဤသည်မှာ တကယ်ကိုပဲ မြားတစ်စင်တည်းနဲ့ ငှက်နှစ်ကောင်ပစ် သည့် နည်းလမ်းကောင်းပင် ဖြစ်တော့သည်။
ကျန်းရုန်ဖေး နေအိမ်သို့ ပြန်လည်ရောက်ရှိလာခဲ့ပြီးနောက် မောပန်းနွမ်းနယ်စွာဖြင့် ဆိုဖာပေါ်သို့ လှဲချပစ်လိုက်တော့သည်။ သူမသည် မနေ့ညက အလွန်အမင်း အားအင်ကုန်ခမ်းခဲ့ရသလို၊ တစ်ကိုယ်လုံးလည်း ကိုက်ခဲနာကျင်နေခဲ့သည်။ ယနေ့ ကုန်တိုက်အတွင်း၌ လမ်းလျှောက်ခဲ့ပြီးနောက်တွင်မူ... သူမ၏ ခြေထောက်နှစ်ဖက်လုံးမှာ မိမိ၏ ခြေထောက်များ မဟုတ်တော့သကဲ့သို့ ခံစားနေရသည်။
အထူးသဖြင့်... တစ်ကိုယ်လုံး ကွဲအက်မတတ် ခံစားခဲ့ရသော ထိုဆန်းကြယ်သည့် ဝေဒနာမှာ သူမ၏ စိတ်ထဲတွင် ပြန်လည်၍ ထင်ထင်ရှားရှား ပေါ်ပေါက်လာခဲ့သည်။
ဆိုဖာပေါ်တွင် ခေတ္တမျှ မှိန်းနေပြီးနောက် ကျန်းရုန်ဖေးသည် လိမ်းဆေးကို နောက်တစ်ကြိမ် ထပ်မံလိမ်းကျံလိုက်ပြီး၊ တစ်ကိုယ်လုံးကို ရေပတ်တိုက်လိုက်တော့သည်။ သူမ၏ လက်ရှိ ခန္ဓာကိုယ် အခြေအနေအရ... ရေချိုးရန်အတွက် အလွန်ပင် အဆင်မပြေ ဖြစ်နေသဖြင့် လောလောဆယ် ဤကဲ့သို့သာ ဖြစ်သလို ရှင်းလင်းလိုက်ရခြင်း ဖြစ်သည်။
ညအိပ်ဝတ်စုံကို လဲလှယ်ဝတ်ဆင်ပြီးနောက် ကျန်းရုန်ဖေး ကုတင်ပေါ်သို့ တက်၍ အနားယူလိုက်သည်။ သူမ အလွန်ပင် အိပ်ငိုက်နေခဲ့သော်လည်း... စိတ်ထဲတွင်မူ အကြောင်းပြချက်မရှိဘဲ စိတ်လှုပ်ရှား အားတက်နေခဲ့သဖြင့် ဘယ်လိုမှ အိပ်ပျော်၍ မရနိုင်ခဲ့ချေ။
အတိအကျပင် ထိုအချိန်မှာပင်... တစ်စုံတစ်ဦးက ဗီဒီယိုကောလ် ခေါ်ဆိုလာခဲ့သည်။ ရွှီပင်းနင်း ၏ ပရိုဖိုင်ပုံလေးကို ကြည့်လိုက်ပြီးနောက် ကျန်းရုန်ဖေး ကုတင်ပေါ်တွင် ထိုင်လိုက်ရင်း ဖုန်းကို လက်ခံဖြေကြားလိုက်တော့သည်။
ဗီဒီယိုထဲတွင် ရွှီပင်းနင်းသည် ညအိပ်ဝတ်စုံကို ဝတ်ဆင်ထားပြီး သူမ၏ အိပ်ခန်းအတွင်း၌ ရှိနေဟန် တူသော်လည်း၊ သူမ၏ မျက်နှာလေးမှာ အလွန်ပင် တက်ကြွလန်းဆန်းနေခဲ့သည်။
"အခုမှ ညဆယ်နာရီပဲ ရှိသေးတာကို... နင်က အိပ်ယာထဲ ရောက်နေပြီလား" ရွှီပင်းနင်း အံ့အားသင့်စွာ မေးမြန်းလိုက်သည်။ သူမသည် ကျန်းရုန်ဖေး၏ အလုပ်အချိန်ဇယားကို ကောင်းစွာ သိရှိထားပြီး၊ သူမသည် များသောအားဖြင့် ညသန်းခေါင်ယံအချိန်နီးမှသာ အနားယူလေ့ရှိကြောင်း သိထားသောကြောင့် ဖြစ်သည်။
"ဟုတ်တယ်... ငါ အရမ်း မောပန်းနေလို့ပါ၊ ဒါပေမယ့် ကုတင်ပေါ်လှဲနေရင်းနဲ့လည်း ဘယ်လိုမှ အိပ်လို့မရဘူး ဖြစ်နေတယ်" ကျန်းရုန်ဖေး အားနည်းလှသော လေသံလေးဖြင့် ဆိုရှာသည်။
"နင့်ပုံစံက တကယ်ကို နုံးခွေနေတဲ့ ပုံပဲ နင် ဒီနေ့ ဘာတွေလျှောက်လုပ်နေတာလဲ" ရွှီပင်းနင်း စူးစမ်းစွာ မေးလိုက်သည်။
ဤမေးခွန်းကြောင့် ကျန်းရုန်ဖေး လန့်ဖျတ်သွားခဲ့ရပြီးမှ ခေတ္တမျှ ဆိုင်းငံ့ကာ လိမ်ညာ၍ ရှင်းပြလိုက်ရသည် - "ငါ... ငါ အလုပ်တွေ အချိန်ပိုဆင်းနေလို့ပါ။ မနေ့ညကလည်း အိပ်ရေးသိပ်မဝဘူးလေ"
ဤသို့ ပြောဆိုနေစဉ်အတွင်း... စိတ်ထဲတွင် အပြစ်မကင်းသကဲ့သို့ ခံစားလိုက်ရသဖြင့်၊ ကျန်းရုန်ဖေး မိမိ၏ ဆံပင်များကို လက်ဖြင့် အသာအယာ သပ်တင်လိုက်မိသည်။ ၎င်းမှာ အလွန်ပင် သာမန်ဆန်လှသော အပြုအမူလေးတစ်ခု ဖြစ်သော်လည်း၊ မျက်စိရှင်လှသော ရွှီပင်းနင်းသည် တစ်စုံတစ်ခုသော အရာကို ချက်ချင်း ဖမ်းဆွဲမိသွားခဲ့သည်။
"ဟေး... နင့်လက်မှာ ဘာဖြစ်လို့ လက်စွပ်ကြီး ဝတ်ထားရတာလဲ" ရွှီပင်းနင်း အံ့အားသင့်စွာ အော်ဟစ်လိုက်သည် - "နင်နဲ့ နင့်ရဲ့ ယောကျ်ားကြားမှာ... တစ်စုံတစ်ခု တိုးတက်မှုတွေ ရှိသွားခဲ့ပြီလား"
"ဘယ်ကသာ... လုံးဝ မဟုတ်ပါဘူး။ သူက ငါ့ကို ဒီလက်စွပ် ပေးစရာလား" ကျန်းရုန်ဖေး စိတ်လှုပ်ရှားစွာဖြင့် ချက်ချင်းပင် ခြေပလိုက်မိသည်။
"ဒါဆို ဘယ်သူပေးတာလဲ" ရွှီပင်းနင်း ပိုမို၍ စိတ်ဝင်စားသွားခဲ့သည်။
ကျန်းရုန်ဖေး ထပ်မံ၍ လိမ်ညာလိုက်ပြန်သည် - "ငါ့ဘာသာငါ ဝယ်ထားတာပါ"
"နင့်မှာ လျှို့ဝှက်ချက်တစ်ခု ရှိနေပြီပဲ" ရွှီပင်းနင်း ကျန်းရုန်ဖေး၏ ပုံစံမှာ တစ်ခုခု မမှန်ကန်ကြောင်း ရိပ်မိသွားခဲ့ချေပြီ။
"ငါ နင့်ကို မလိမ်ပါဘူး... အမှန်အတိုင်း ပြောတာပါ" ကျန်းရုန်ဖေး ရှင်းပြလိုက်သော်လည်း သူမ၏ စကားလုံးများမှာ ယုံကြည်ရခက်ပြီး အားနည်းလွန်းနေခဲ့သည်။
"ငါ့ကို အမှန်အတိုင်း ပြောပြစမ်းပါ ငါ တကယ်ကို သိချင်လွန်းလို့ပါ" ရွှီပင်းနင်း အလွန်အမင်း စိတ်အားထက်သန်စွာဖြင့် မေးမြန်းလိုက်သည်။
"တကယ် ဘာမှမဟုတ်ပါဘူးဆို" အကယ်၍ သူမနှင့် ရွှီပင်းနင်းတို့မှာ အရင်းနှီးဆုံး သူငယ်ချင်းများ ဖြစ်ကြသော်လည်း... ဤကဲ့သို့သော ရှက်စရာကောင်းသည့် ကိစ္စမျိုးကို ထုတ်ဖော်ပြောဆိုရန်အတွက် ကျန်းရုန်ဖေး ခက်ခဲနေဆဲ ဖြစ်သည်။
"ကုတ်ကပ်မနေပါနဲ့အေ... ငါလည်း နင့်ကို လျှို့ဝှက်ချက်တစ်ခု ပြန်ပြောပြမယ်လေ ငါတို့ အပြန်အလှန် လဲလှယ်ကြမလား" ရွှီပင်းနင်းက ဈေးဆိုလိုက်သည်။
"နင့်ရဲ့ လျှို့ဝှက်ချက်က ဘာလဲ... အရင်ပြောပြဦး" ကျန်းရုန်ဖေး စိတ်ဝင်စားသွားခဲ့သည်။
"ငါ... အခု အပျိုကြီး (Single) မဟုတ်တော့ဘူး" ရွှီပင်းနင်း အပြုံးလေးဖြင့် ဆိုလိုက်သည်။
"ငါ မယုံပါဘူး... ငါ့ကို သက်သေပြစမ်းပါဦး" ကျန်းရုန်ဖေး ဤမျှလောက်သော စကားဖြင့် အလွယ်တကူ လှည့်စားခံမည့်သူ မဟုတ်ချေ။
"ခဏလေး စောင့်ဦး" ရွှီပင်းနင်း ဖုန်းအယ်လ်ဘမ်ကို လှန်လှောကြည့်ရှုလိုက်ပြီးနောက်... သူမနှင့် မူဟန်တို့ လက်ချင်းချိတ်ထားသည့် ဓာတ်ပုံတစ်ပုံကို ကျန်းရုန်ဖေးထံသို့ ပေးပို့လိုက်ရင်း ဆိုလိုက်သည် -
"ဒါက မနေ့ညကတင် ဖြစ်သွားတာလေ... မီးရှူးမီးပန်း ပွဲတော်တုန်းက…ငါတို့နှစ်ယောက် ဆက်ဆံရေးကို အတည်ပြုလိုက်ကြပြီ"
ဓာတ်ပုံထဲရှိ အမျိုးသမီး၏ လက်ကလေးကို သေသေသပ်သပ် စစ်ဆေးကြည့်ရှုပြီးနောက် ကျန်းရုန်ဖေး စိတ်ထဲတွင် အနည်းငယ် သံသယ ဝင်နေဆဲ ရှိသေးသည်။
"အဲဒီ အမျိုးသားက ဘယ်သူလဲ" ကျန်းရုန်ဖေး ထပ်မံ၍ ဖိအားပေး မေးမြန်းလိုက်သည်။
"ငါ အခုလောလောဆယ် နင့်ကို မပြောပြသေးဘူး…နင့်ရဲ့ လျှို့ဝှက်ချက်ကို အရင်ပြောပြဦး... ဒါမှ ငါ နားထောင်လို့ရမှာ" ရွှီပင်းနင်းသည် အကယ်၍ မိမိက အရာအားလုံးကို အရင်ပြောပြလိုက်ပါက ကျန်းရုန်ဖေးဘက်မှ ကတိဖျက်သွားမည်ကို စိုးရိမ်သဖြင့်... သူမကို ရင်ခုန်အောင် တမင်သက်သက် ဆိုင်းငံ့ထားရန် ဆုံးဖြတ်လိုက်ခြင်း ဖြစ်သည်။
ကျန်းရုန်ဖေး သက်ပြင်းချလိုက်ပြီး ဝန်ခံလိုက်ရရှာသည် - "ဒီလက်စွပ်က... ပွဲတစ်ခုကနေ ရတဲ့ ဆုလက်ဆောင်ပါအေ..."
"ဘယ်လိုပွဲမျိုးက လက်စွပ်တွေကို ဆုအဖြစ် ပေးနေတာလဲ"
"ဒီနေ့က မေလ ၂၀ ရက်နေ့ (520) မဟုတ်လား ကုန်တိုက်ထဲမှာ စုံတွဲတွေ အပြန်အလှန် ကစားရတဲ့ ပြိုင်ပွဲတစ်ခု ကျင်းပနေတာလေ၊ ပါဝင်ယှဉ်ပြိုင်သူ တိုင်းကို အမှတ်တရ ပါဝင်ဆုအနေနဲ့ ပေးတာ"
"ဒီလိုမျိုး ပြိုင်ပွဲတွေက စုံတွဲတွေပဲ ပါဝင်ခွင့်ရှိတာ မဟုတ်ဘူးလား…နင်က ဘယ်သူနဲ့အတူ သွားပြီး ပါဝင်ဆင်နွှဲခဲ့တာလဲ... ငါ့ကို အမြန်ဆုံး ပြောစမ်းပါ"
"အမျိုးသား တစ်ယောက်နဲ့ပေါ့..."
"နင် ပြောတာက မပြောတာနဲ့ အတူတူပဲဟာကို..."
ရွှီပင်းနင်း မျက်လုံးလေး ကလန်ကလား လုပ်လိုက်ပြီးနောက်... ရုတ်တရက် အရေးကြီးသော အချက်အလက်တစ်ခုကို ဖမ်းဆွဲမိသွားသည့်အလား - "ဟေး... ခဏလေးဦးနော်၊ ဒီလိုမျိုး စုံတွဲပြိုင်ပွဲတွေက များသောအားဖြင့် အရမ်းကို ရင်းနှီးကျွမ်းဝင်တဲ့ ထိတွေ့မှုတွေ ရှိရတာလေ။ နင်က ဆုလက်ဆောင်လေး တစ်ခုအတွက်နဲ့... တပါးသူကို အခွင့်အရေး အပိုင်ကြံခွင့် ပေးခဲ့လိမ့်မယ်လို့ ငါ လုံးဝ မယုံဘူး"
"ဒီနေ့ အလုပ်ဆင်းတဲ့အချိန်တုန်းက... ရှောင်ပေ့က ငါ့နောက်ကို တောက်လျှောက် လိုက်လာခဲ့တာလေ…ဒါကြောင့် ငါ သူ့ကို တမင်သက်သက် ဒေါသထွက်ပြီး စိတ်အနှောင့်အယှက် ဖြစ်သွားအောင်လို့ လုပ်လိုက်တာပါ" ကျန်းရုန်ဖေးက ဆိုလိုက်သည်။
"ငါ နားလည်နိုင်ပါတယ်... ဒါပေမယ့် တစ်ဝက်ပဲ နားလည်တာနော်။ ငါ အခုထက်ထိ မယုံနိုင်သေးတာက... နင်က ရှောင်ပေ့ကို ဒေါသထွက်အောင် လုပ်ဖို့ သက်သက်အတွက်နဲ့... တခြားယောက်ျားတစ်ယောက်ကို အသားယူခွင့် ပေးခဲ့မယ်ဆိုတာပဲ။ အကယ်၍... အကယ်၍ နင်က အဲဒီလူကို တကယ်ပဲ သဘောကျနေတာမျိုး မဟုတ်ရင်ပေါ့" ရွှီပင်းနင်း ကျိုးကြောင်းဆီလျော်စွာဖြင့် ဆန်းစစ်သုံးသပ်လိုက်သည်။
"ဟုတ်တယ်... ဟုတ်တယ်… ငါ သူ့ကို တကယ်ပဲ သဘောကျမိလို့ပါ" ကျန်းရုန်ဖေး မျက်နှာလေး နီမြန်းလျက်နှင့်ပင်... ပွင့်ပွင့်လင်းလင်း ဝန်ခံလိုက်တော့သည်။
"ဟားဟား... ငါ ခန့်မှန်းတာ ကွက်တိပဲ! နင်တို့နှစ်ယောက် ဘယ်လိုမျိုး သိကျွမ်းခဲ့ကြတာလဲဟင်။ သိရတာ ဘယ်လောက်ကြာပြီလဲ။ သူက ဘယ်လိုပုံစံမျိုးလဲ။ ငါကော သူ့ကို မြင်ဖူးလား" ရွှီပင်းနင်း စိတ်လှုပ်ရှားစွာဖြင့် မေးခွန်းများကို တရစပ် မေးမြန်းလိုက်တော့သည်။