အခန်း (၃) - တာဝန်ရေးဆွဲခြင်း

【တာဝန်မှာ ကျိုးကြောင်းဆီလျော်မှုမရှိသဖြင့် ပေးပို့၍မရနိုင်ပါ။ ပိုင်ရှင် ကျေးဇူးပြု၍ ပြန်လည်ရေးဆွဲပေးပါ။】

ရေးဆွဲထားသော တာဝန်ကို ပေးပို့မည် ဟု နှိပ်လိုက်သည်နှင့် တစ်ပြိုင်နက် မူဟန်သည် စနစ်ထံမှ အသိပေးချက်တစ်ခုကို ချက်ချင်း လက်ခံရရှိလိုက်သည်။

မူဟန်မှာ ယင်းအတွက် အံ့သြမသွားခဲ့ချေ။

သူသည် ယခင်ကတည်းက စိတ်ပိုင်းဆိုင်ရာ ပြင်ဆင်ထားပြီးဖြစ်သည်။

ရွှီရိုသည် ဇာတ်လိုက်၏ မိခင်ဖြစ်ပြီး သူမ၏ ဇာတ်ကောင်စရိုက်မှာ ရက်စက်ယုတ်မာသော ဗီလိန်တစ်ယောက် မဟုတ်ဘဲ အကောင်းဘက်သို့ ဦးတည်နေသူဖြစ်သည်။ သူမလှပလာစေရန်အတွက် သမီးဖြစ်သူကို ရောင်းစားရန်ဆိုသည်မှာ မဖြစ်နိုင်သော ကိစ္စရပ်ပင်ဖြစ်သည်။

ထို့အပြင် ရွှီရိုက လုပ်ဆောင်ရန် ဆန္ဒရှိနေလျှင်တောင်မှ ရွှီပင်းနင်းက ဘယ်တော့မှ သဘောတူမည် မဟုတ်ပေ။

မူဟန်သည် ကန့်သတ်ချက်များကို စမ်းသပ်ကြည့်ရန်အတွက်သာ ကျိုးကြောင်းဆီလျော်မှုမရှိသော တာဝန်တစ်ခုကို တမင်တကာ ရေးဆွဲခဲ့ခြင်းဖြစ်သည်။ (မရလို့)

ယခု ပိုမိုနားလည်သဘောပေါက်သွားပြီဖြစ်သဖြင့် မူဟန် ခေတ္တမျှ စဉ်းစားလိုက်ပြီး တာဝန်ကို ပြန်လည်ရေးဆွဲရန် စတင်လိုက်သည်။

ရွှီရို၏ စိတ်ထဲတွင် သူမ၏ အငယ်ဆုံးသမီးလေး ကောင်းမွန်သော အိမ်ထောင်ဘက်ကို ရှာဖွေတွေ့ရှိရန် မျှော်လင့်နေသည်။ ဤအချက်မှနေ၍ သူ စတင်နိုင်ပေသည်။

တစ်ဖက်တွင်မူ...

ရွှီရိုသည် အချိန်အနည်းငယ်ကြာ စိုးရိမ်တကြီး စောင့်ဆိုင်းနေခဲ့ပြီးနောက် မကြာမီမှာပင် "စနစ်" မှ ပေးပို့လိုက်သော အချက်အလက်များကို လက်ခံရရှိသွားသည်။

【ပိုင်ရှင်၏ ဆန္ဒကို ထောက်လှမ်းသိရှိရပါသည် - အငယ်ဆုံးသမီး ရွှီပင်းနင်း ကောင်းမွန်သော အိမ်ထောင်ဘက် ရှာတွေ့ရန် မျှော်လင့်နေခြင်း။ ဒေတာများက ရွှီပင်းနင်းကို ပြီးပြည့်စုံသော လက်တွဲဖော် တစ်ဦးနှင့် ယှဉ်တွဲပေးနိုင်ပါသည်။ ယှဉ်တွဲမှု ပြုလုပ်မည်လား။】

ရွှီရို အနည်းငယ် ဝမ်းသာသွားသည်။ 

ဒီစနစ်က တကယ်ပဲ ငါ့ဆန္ဒတွေကို သိ‌နေပြီး ဖြည့်ဆည်းပေးနိုင်မှာလား…

တွေးလိုက်ရင်း သူမက "ပြုလုပ်မည်" ဟု ချက်ချင်း ဖြေကြားလိုက်သည်။ စက္ကန့်သုံးဆယ်ခန့်အကြာတွင် ရလဒ်ထွက်ပေါ်လာခဲ့သည်။

【ရွှီပင်းနင်း၏ အကောင်းဆုံးသော ‌လက်တွဲဖော်ကို ယှဉ်တွဲပြီးပါပြီ၊ လိုက်ဖက်ညီမှုနှုန်းမှာ ၉၉% ဖြစ်ပါသည်။ အသေးစိတ် အချက်အလက်များကို ကြည့်ရှုမည်လား】

"ကြည့်မယ်" ရွှီရို တုံ့ဆိုင်းမနေခဲ့ချေ။

【အမျိုးသား၏ အမည်မှာ မူဟန်ဖြစ်ပြီး၊ အသက် ၂၅ နှစ် အရပ်ရှည်ပြီး ရုပ်ချောကာ၊ ကိုယ်ကျင့်တရား အလွန်ကောင်းမွန်ပြီး၊ ကူညီတတ်ကာ တရားမျှတမှုကို မြတ်နိုးသူဖြစ်သည်...】

မူဟန့်၏ အိမ်လိပ်စာနှင့် ဆက်သွယ်ရန် အချက်အလက်များ အပါအဝင် အသေးစိတ် အချက်အလက်များစွာ ပါဝင်နေသည်။

မူဟန် ကိတ်မုန့်မှာယူခဲ့စဉ်က သူ၏အမည်၊ လိပ်စာနှင့် ဆက်သွယ်ရန် အချက်အလက်များကို ချန်ထားခဲ့သည်။ ဤသူမှာ ဆိုင်တွင် ကိတ်မုန့်လာမှာသွားသော ရုပ်ချောချော ကောင်လေးဖြစ်ကြောင်း ရွှီရို ချက်ချင်း သဘောပေါက်သွားသည်။

သူမ၏ စိတ်ထဲတွင် မူဟန့်၏ ချောမောသော ရုပ်ရည်ကို ပြန်လည်မြင်ယောင်လာခဲ့သည်။

စနစ်က ပြသထားသော အချက်အလက်များအရ မူဟန်သည် အရပ်ရှည်ပြီး ရုပ်ချောသည်ဟု ဆိုထားရာ သူမလည်း သဘာဝကျကျပင် သဘောတူမိသည်။ 

အခြားအချက်များနှင့် ပတ်သက်၍မူ ရွှီရိုသည် မူဟန်နှင့် ယခုမှ သိကျွမ်းဖူးခြင်းဖြစ်၍ မဆုံးဖြတ်နိုင်ပေ။ သို့သော် စနစ်က ထိုသို့ပြောထားသဖြင့် လိမ်ညာထားခြင်း မဖြစ်နိုင်လောက်ချေ။

ထို့အပြင် မူဟန်နှင့် သူမ၏သမီးမှာ အတော်လေး လိုက်ဖက်ညီမည့်ပုံ ပေါ်နေသည်။ ဒေတာများ၏ ယှဉ်တွဲမှုအတိုင်းပင် လိုက်ဖက်ညီမှုက ၉၉% အထိ မြင့်မားနေသည်လေ။

【တာဝန် အကြောင်းအရာ : မူဟန်နှင့် ရွှီပင်းနင်းတို့၏ ဆက်ဆံရေးကို အစပြု၍ မြှင့်တင်ပေးပါ။ အကယ်၍ မူဟန့်အပေါ် ရွှီပင်းနင်း၏ နှစ်သက်မှု သည် 'ခင်မင်မှု' အဆင့်သို့ ရောက်ရှိသွားပါက တာဝန်ပြီးမြောက်သည်ဟု သတ်မှတ်မည်။】

【တာဝန် အချိန်ကန့်သတ်ချက် : ၂၄ နာရီ】

【တာဝန် ဆုလာဘ် : ဆွဲဆောင်မှု ၂ မှတ် တိုးလာမည်။】

ရွှီရို စဉ်းစားနေစဉ် နောက်ထပ် အချက်အလက်များ ဝင်ရောက်လာပြန်သည်။

ရွှီရိုသည် တာဝန်၏ အကြောင်းအရာကို မှတ်သားထားလိုက်ပြီး အောင်သွယ်တော် လုပ်ပေးရန် စိတ်အားထက်သန်နေမိသည်။ 

သို့သော် သူမ၏သမီးမှာ နေ့လယ်ဘက်တွင် အလုပ်သွားနေသဖြင့် သွားရောက်မနှောင့်ယှက်သင့်သောကြောင့် သူမ၏ အတွေးများကို လောလောဆယ် ဖိနှိပ်ထားလိုက်ပြီး ညဘက် အိမ်ပြန်ရောက်မှသာ စကားပြောရန် စီစဉ်လိုက်သည်။

တာဝန်ကို ရေးဆွဲပြီးနောက် မူဟန် အနည်းငယ် သက်ပြင်းချလိုက်နိုင်သည်။

တာဝန်ဆုလာဘ်များကို စနစ်က သတ်မှတ်ပေးခြင်းဖြစ်ပြီး သူကိုယ်တိုင် တက်ကြွစွာ သတ်မှတ်၍မရသော်လည်း၊ သူခန့်မှန်းထားသည့်အတိုင်း ဆုလာဘ်မှာ "ဆွဲဆောင်မှု" တိုးလာခြင်းပင်ဖြစ်သည်။

တာဝန် အချိန်ကန့်သတ်ချက်နှင့် ပတ်သက်၍မူ မူဟန် လွတ်လပ်စွာ သတ်မှတ်နိုင်သည်။ သူက ၂၄ နာရီဟု သတ်မှတ်လိုက်ခြင်းမှာ ရွှီရိုကို မြန်မြန်လုပ်ဆောင်စေရန် တိုက်တွန်းလိုခြင်းကြောင့်သာ ဖြစ်သည်။

နောက်အကြောင်းရင်းတစ်ခုမှာ မူဟန်၏ တာဝန်ပေးအပ်မှုတွင် ကန့်သတ်ချက်များ ရှိနေသောကြောင့်ဖြစ်သည်။

သူသည် ၂၄ နာရီလျှင် တစ်ကြိမ်သာ တာဝန်ပေးအပ်ခွင့် ရှိသော်လည်း ထိုအရေအတွက်မှာ အကန့်အသတ်မရှိ စုဆောင်းသွားနိုင်သည်။ ရိုးရိုးရှင်းရှင်းပြောရလျှင် အကယ်၍ သူက ၂၄၀ နာရီအတွင်း ရွှီရိုကို မည်သည့်တာဝန်မျှ မပေးအပ်ပါက ရရှိနိုင်သော တာဝန်အရေအတွက်မှာ ၁၀ ခုအထိ စုဆောင်းမိသွားမည်ဖြစ်သည်။

ဤကန့်သတ်ချက်သည် မူဟန်အနေဖြင့် ဆုလာဘ်များကို အကန့်အသတ်မရှိ ရှာဖွေနိုင်ရန် အားနည်းချက်များကို အမြတ်ထုတ်ခြင်းမှ တားဆီးထားခြင်းဖြစ်သည်။

အကယ်၍ ထိုကန့်သတ်ချက်သာ မရှိပါက သူသည် ရွှီရိုကို 'အသက်တစ်ခါရှူပါ' ကဲ့သို့သော အလွန်ရိုးရှင်းသည့် တာဝန်တစ်ခုကို ပေးအပ်နိုင်ပြီး ၎င်းကို တာဝန်ပြီးမြောက်သည်ဟု သတ်မှတ်နိုင်ပေလိမ့်မည်။

ကောင်းကင်ယံမှာ တဖြည်းဖြည်း မှောင်မိုက်လာသည်။

မြို့တော်၏ စည်ကားသိုက်မြိုက်မှုကို ပြသနေသည့်အလား လူများနှင့် ကားများသည် လမ်းမများပေါ်တွင် ရောင်စုံဖဲပြားများ စီးဆင်းနေသကဲ့သို့ ရွေ့လျားနေကြသည်။

ယွင်တင်း အိမ်ယာ ရှိ သီးသန့်စံအိမ်တစ်ခုအတွင်းတွင် ရွှီရိုသည် နောက်ဆုံးဟင်းခွက်ကို ထမင်းစားပွဲပေါ်သို့ တင်လိုက်သည်။ ထိုအချိန်မှာပင် တံခါးဖွင့်သံ ထွက်ပေါ်လာပြီးနောက် "ဒေါက်-ဒေါက်" ဟူသော ခြေသံများ ဆက်တိုက်ထွက်ပေါ်လာသည်။

"အတော်ပဲ…ထမင်းစားလို့ရပြီ" ဟု ရွှီရိုက ထမင်းစားခန်းထဲသို့ ဝင်လာသူကို ပြုံးလျက် ပြောလိုက်သည်။

ထိုအချိန်တွင်...

မူဟန်သည် သူ၏အခန်းထဲ၌ နေနေပြီး ကုတင်ပေါ်တွင် လှဲလျောင်းကာ မျက်နှာကြက်ကို ငေးကြည့်နေသည်။ သူ၏ အကြည့်များမှာ စူးစိုက်မှု ကင်းမဲ့နေသည်။ သို့သော် သူ ဒီတိုင်း ကြောင်ငေးနေခြင်းတော့ မဟုတ်ပေ။

ရွှီရိုကို စနစ်ပေးလိုက်ပြီးနောက် သူမ၏ အမြင်နှင့် အကြားအာရုံကို သူ မျှဝေခံစားနိုင်သည်။

ရွှီရို မြင်သမျှ ကြားသမျှ အားလုံးကို မူဟန် သိရှိနိုင်ပေသည်။ ၎င်းမှာ လူသား လှုပ်ရှားစောင့်ကြည့်ကင်မရာ တစ်လုံးနှင့် လက်တွေ့အားဖြင့် အတူတူပင်ဖြစ်သည်။

ရွှီရို၏ အမြင်အာရုံကို အသုံးပြု၍ မူဟန်သည် ရွှီပင်းနင်းကို အကဲခတ်ကြည့်လိုက်သည်။

သူမသည် ရုံးဝတ်စုံကို ဝတ်ဆင်ထားသည်။ သူမ၏ အဖြူရောင်ရှပ်အင်္ကျီ ရင်ဘတ်မှာ တင်းရင်းနေပြီး အစွမ်းထက်သော အမြင်အာရုံ ရိုက်ခတ်မှုကို ဖန်တီးပေးနေသည်။ အောက်သို့ ငုံ့ကြည့်လိုက်လျှင် ပိုးသားခြေအိတ်အမည်းရောင် (စတော်ကင်အမဲ) ဝတ်ဆင်ထားသော ခြေတံရှည်များကို တွေ့ရသည်။

ဘဲဥပုံမျက်နှာလေးပေါ်တွင် သေသပ်လှပသော မျက်နှာပေါက်များ ရှိနေပြီး သူမ၏ နှင်းပွင့်ကဲ့သို့ ဖြူစင်သော အသားအရေမှာ ထမင်းစားခန်း မီးရောင်အောက်တွင် ကြည်လင်တောက်ပစွာ လင်းလက်နေသည်။

မူဟန် ယခင်က ရွှီပင်းနင်းနှင့် ဆက်သွယ်ခဲ့စဉ်က အမြင်နှင့် ကွာခြားစွာပင် ထိုအချိန်က သူမသည် အေးစက်စက် နိုင်လှသော်လည်း ယခုအခါ သူမ၏မျက်နှာပေါ်တွင် အပြစ်ကင်းစင်သော အပြုံးတစ်ခု ချိတ်ဆွဲထားလေသည်။

"မေမေ့ လက်ရာက အကောင်းဆုံးပဲ၊ ကုမ္ပဏီကန်တင်းထက် အများကြီး ပိုကောင်းတယ်"

ရွှီပင်းနင်းသည် အရသာရှိသော အစားအစာများကို မြိန်ယှက်စွာ စားသုံးရင်း ပါးစပ်အပြည့်ဖြင့် မိခင်ဖြစ်သူ ရွှီရိုကို ပြောလိုက်သည်။

"ဖြည်းဖြည်းစားပါကွယ် နင်သွားဦးမယ်" ဟု ရွှီရိုက ပြုံး၍ ပြောလိုက်သည်။

သားအမိနှစ်ယောက် အတူတူ ထမင်းစားရင်း တစ်ခါတစ်ရံ စကားစမြည်ပြောနေကြသည်မှာ အလွန်နွေးထွေးသော မြင်ကွင်းလေးတစ်ခု ဖန်တီးပေးနေသည်။

စကားပြောသံများကို နားထောင်ရင်း မူဟန်သည် ရွှီပင်းနင်း၏ အချက်အလက်များကို စစ်ဆေးကြည့်လိုက်သည်။

【မင်းသမီး : ရွှီပင်းနင်း】

【ဆွဲဆောင်မှု : ၉၇】

【တိုက်ခိုက်ရေးစွမ်းအား : ၄၁】

【မင်းသမီးရောင်ဝါ : ၁၉၈】

【စွမ်းဆောင်ရည်များ : အဆင့်မြင့် စီးပွားရေးစွမ်းရည်၊ အဆင့်မြင့် ကော်ပိုရိတ်စီမံခန့်ခွဲမှုစွမ်းရည်】

【စရိုက်လက္ခဏာ : အပြင်ပန်းတွင် အေးစက်သော်လည်း အတွင်းစိတ် နွေးထွေးခြင်း၊ အချစ်ကို အလွန်အမင်း ရူးသွပ်သူ 】

【ကံကြမ္မာ : ခင်ပွန်းကို ကြီးပွားစေမည့်ကိန်း 】

【ပိုင်ရှင်အပေါ် နှစ်သက်မှု : -၁၀ (ဂရုမစိုက် / လျစ်လျူရှု)】

【လတ်တလော စိုးရိမ်ပူပန်မှုများ : ကုမ္ပဏီ၏ ထုတ်ကုန်အသစ်အတွက် အရောင်းလမ်းကြောင်း ပြဿနာများကို စိုးရိမ်နေခြင်း】

【လတ်တလော ဆန္ဒများ : ရည်းစားထားချင်နေခြင်း】

လူတစ်ယောက်ကို အပြင်ပန်းကြည့်ရုံနဲ့ တကယ် အကဲဖြတ်လို့မရဘူးပဲ။

မူဟန် သက်ပြင်းမချဘဲ မနေနိုင်တော့ချေ။

ရွှီပင်းနင်းသည် သဘာဝအားဖြင့် အေးစက်စက် နိုင်သည်ဟု သူထင်ထားခဲ့သော်လည်း တကယ်တမ်းတွင် ထိုအရာက သူမကိုယ်သူမ ကာကွယ်ရန် အသုံးပြုသော မျက်နှာဖုံးတစ်ခုမျှသာ ဖြစ်ပြီး အမှန်တကယ်တော့ သူမသည် အချစ်ကို အလွန်အမင်း ရူးသွပ်သူတစ်ဦး ဖြစ်နေသည်။

ဆန့်ကျင်ဘက် အခြေအနေ နှစ်ခုက အတော်လေး ကြီးမားလှသည်ဟု ဆိုရပေမည်။

ကံကြမ္မာ အမျိုးအစားတွင် ရွှီပင်းနင်းသည် ရွှီရိုနှင့် လုံးဝ ဆန့်ကျင်ဘက်ဖြစ်နေသည်။ သူမတွင် ခင်ပွန်းကို ကြီးပွားစေမည့်ကိန်း ရှိနေရာ မင်းသမီးတစ်ယောက်ဖြစ်ရန် အမှန်တကယ် ထိုက်တန်လှပေသည်။ အကယ်၍ သူ့အနေဖြင့် သူမကိုသာ လက်ဝယ်ပိုင်ဆိုင်နိုင်ပါက သူ၏ ကိုယ်ပိုင်ကံကြမ္မာကိုပင် တိုးတက်စေနိုင်မည်ဖြစ်သည်။

နောက်ဆက်တွဲအခြေအနေများက ရွှီရို၏ စွမ်းဆောင်ရည်အပေါ်တွင် မူတည်နေတော့သည်။ မူဟန် စတင်၍ စိတ်အားထက်သန်စွာ စောင့်မျှော်နေမိသည်။

ထမင်းစားရင်း တစ်ဝက်ခန့်အရောက်တွင် ရွှီရို၏ မျက်လုံးများ အရောင်လဲ့သွားပြီး သူမ၏သမီးကို ရုတ်တရက် မေးလိုက်သည်။

"ရှောင်ချီ…သမီးလည်း အသက်မငယ်တော့ဘူး…ရည်းစားထားဖို့ စဉ်းစားပြီးပြီလား"

ရွှီပင်းနင်းသည် သတ္တမမြောက် ကလေးဖြစ်ပြီး 'ရှောင်ချီ’ သည် သူမ၏ အိမ်ခေါ်နာမည်ဖြစ်သော်လည်း ရွှီရို တစ်ယောက်သာ ထိုသို့ခေါ်လေ့ရှိသည်။

"အဲဒီလိုကိစ္စမျိုးက ရေစက်အပေါ်မှာပဲ မူတည်ပါတယ်"

ရွှီပင်းနင်း၏ မျက်နှာ နီမြန်းသွားပြီးနောက် ရွှီရိုကို ထူးဆန်းစွာ ကြည့်လိုက်သည်။ "မေမေ ဘာလို့ ရုတ်တရက်ကြီး ဒါကို ပြောလာတာလဲ"

"အမေက သမီးကို ဂရုစိုက်လို့ပါ ကြည့်စမ်း... သမီးအသက်က ၂၁ နှစ်တောင် ရှိနေပြီ၊ ရည်းစား တစ်ခါမှတောင် မထားဖူးသေးဘူး… သတင်းထွက်သွားရင် လူတွေက ရယ်ကြလိမ့်မယ်" ဟု ရွှီရိုက ပြောလိုက်သည်။

"ရယ်စရာ ဘာရှိလို့လဲ" ဟု ရွှီပင်းနင်းက ရေရွတ်လိုက်သည်။

"သမီး ပတ်ဝန်းကျင်မှာရော သဘောကျတဲ့သူ ရှိလား" ဟု ရွှီရိုက မေးလိုက်သည်။

"မရှိပါဘူး"

"ဒါဆို အမေက သမီးအတွက် တစ်ယောက်လောက် မိတ်ဆက်ပေးရင်ရော ဘယ်လိုလဲ"

"မေမေ…သမီးကို အတင်း လူကြီးချင်း သဘောတူပေးစားဖို့တော့ မစဉ်းစားထားဘူး မဟုတ်လား" ရွှီပင်းနင်း အနည်းငယ် သတိထားသွားသည်။

"ဘယ်ဟုတ်ရမလဲ" ရွှီရို ခေါင်းခါလိုက်သည်။

"ဒီနေ့ အမေ့ဆိုင်ကို လူငယ်လေးတစ်ယောက် ကိတ်မုန့်လာမှာသွားတယ်… သူ့အခြေအနေတွေက အတော်လေး ကောင်းမွန်ပြီး သမီးနဲ့ဆို သိပ်ကို လိုက်ဖက်တယ်လို့ အမေမြင်တာနဲ့ သမီးကို မိတ်ဆက်ပေးချင်လို့ပါ"

"သမီးကတော့ သိပ်မလုပ်ချင်ပါဘူး" ရွှီပင်းနင်းက အလွန် ယုံကြည်စိတ်ချရမည် မထင်သဖြင့် ပြောလိုက်သည်။

သမီးဖြစ်သူ ငြင်းဆန်နေသည်ကို မြင်သောအခါ ရွှီရို အနည်းငယ် စိုးရိမ်လာသည်။ ဤအရာက သူမ၏ နုပျိုမှုကို ပြန်လည်ရရှိနိုင်မလား ဆိုသည့်အပေါ်တွင် မူတည်နေသဖြင့် သမီးဖြစ်သူကို ဘယ်လိုနည်းနဲ့ဖြစ်ဖြစ် သဘောတူအောင် လုပ်ရပေမည်။ ထို့အပြင် ဤသည်မှာ သူမသမီး၏ ပျော်ရွှင်မှုအတွက်လည်း ဖြစ်သည်လေ…ဒါက နှစ်ဦးနှစ်ဖက်စလုံးအတွက် အကျိုးရှိသည့် အခြေအနေတစ်ခု ဖြစ်သည်။

"သူ့ကို သိကျွမ်းအောင် လုပ်ကြည့်လိုက်ပါ၊ ဘာများ အကျိုးယုတ်သွားမှာမို့လို့လဲ… အမေ့ရဲ့ အမြင်ကို ယုံစမ်းပါ…ဒီလူငယ်လေးက တကယ်ကို မဆိုးပါဘူး…အမေက သမီးကို ရောင်းစားမှာကို စိုးရိမ်နေတာလား" ဟု ရွှီရိုက မျက်မှောင်ကြုတ်လျက် လေသံကို အနည်းငယ် တင်းမာစွာ ပြောလိုက်သည်။

"အင်းပါ… ဒါဆို သမီး သူ့ကို သိကျွမ်းအောင် လုပ်ကြည့်ပါ့မယ်"

ရွှီပင်းနင်းသည် နှုတ်ခမ်းကိုစူကာ သဘောတူကြောင်း ခေါင်းညိတ်လိုက်သည်။ မည်သို့ပင်ဆိုစေ မိခင်ဖြစ်သူက သူမကို ရောင်းစားမည်ဟူသော အချက်ကို သူမ ဘယ်သောအခါမျှ ယုံကြည်မည် မဟုတ်ချေ။