အခန်း (၂၁) - ဆွဲဆောင်မှုအညွှန်းကိန်း ဆက်တိုက်မြင့်တက်လာခြင်း

​မူဟန်သည် စိတ်ထဲတွင်တော့ ရွှီပင်းနင်း၏ အကြံပြုချက်ကို သဘာဝအတိုင်းပင် အလွန် တွန်းလှန်ငြင်းဆန်နေခဲ့သည်။ 

ကျိန်ဆိုရုံလောက်ဆိုလျှင် ကိစ္စမရှိသော်လည်း ဝီချက်မိုမန့် ပေါ်တွင် တင်ဖို့ဆိုသည်မှာတော့ လုံးဝ မဖြစ်နိုင်သောအရာပင်။

​"ငါ ဓာတ်ပုံကို နင့်ဆီ ပို့ပေးမယ် ငါတို့ တစ်ချိန်တည်းမှာ အတူတူ တင်ကြရအောင်" ရွှီပင်းနင်းက မူဟန့်ကို အမြန် ပြောလိုက်သည်။

​မူဟန် သူ၏ ဦးနှောက်ကို အမြန်ဆုံး လှည့်ပတ်စဉ်းစားလိုက်ပြီးနောက် ဆိုလိုက်သည် "မင်းလို ရည်းစားမျိုးကို ရရှိခဲ့တာက ကိုယ့်အတွက်တော့ တကယ်ကို ဂုဏ်ယူစရာကောင်းတဲ့ အရာပါပဲ၊ ကိုယ်လည်း ကိုတို့ရဲ့ အချစ်ရေးကို လူတိုင်းကို သိစေချင်တာပေါ့..."

​သူသည် အရင်ဆုံး သူမ၏ စိတ်ကို စည်းရုံးသည့်အနေဖြင့် စကားအနည်းငယ် ပြောလိုက်ပြီးမှ အကြောင်းအရာကို လွှဲပြောင်းလိုက်သည်…

 "ဒါပေမယ့် ကိုယ် ဒီလောက်ထိ အတ္တမကြီးနိုင်ဘူးလေ မင်းရဲ့ ကုမ္ပဏီက အခုမှ တိုးတက်ခါစ အဆင့်မှာပဲ ရှိသေးတာ…အကယ်၍ ကိုယ်တို့နှစ်ယောက် အချစ်ရေးကို လူသိရှင်ကြား ကြေညာလိုက်ရင် မင်း ခက်ခက်ခဲခဲ တည်ဆောက်ထားရတဲ့ လုပ်ငန်းရှင် အမျိုးသမီး ပုံရိပ်ကို ထိခိုက်သွားနိုင်သလို ရင်းနှီးမြှုပ်နှံသူတွေရဲ့ မင်းအပေါ် ထားရှိတဲ့ ယုံကြည်မှုကိုလည်း လျော့နည်းသွားစေလိမ့်မယ်"

(ပညာတွေယူထားကြ)

​ရွှီပင်းနင်း ခေတ္တမျှ ဝေခွဲမရ ဖြစ်သွားပြီးမှ ဆက်၍ ဆိုလိုက်သည် "ထိခိုက်လည်း ထိခိုက်ပါစေ…. အဲဒါက အရေးမကြီးပါဘူး"

​သူမအတွက်မူ သူမ၏ လုပ်ငန်းအသက်မွေးဝမ်းကျောင်းမှာ အလွန်အရေးကြီးသော်လည်း…. ယခုအခါတွင်မူ ဒုတိယနေရာသို့သာ ရွှေ့ဆိုင်းလိုက်ချေပြီ။

​"မဖြစ်ဘူးလေ... မင်းရဲ့ လုပ်ငန်းလေး နည်းနည်း ပိုပြီး တည်ငြိမ်သွားတဲ့အထိ စောင့်တာက ပိုကောင်းပါတယ်… မဟုတ်ရင် မင်းက ကိုယ့်အတွက်နဲ့ ဒီလောက်အထိ အနစ်နာခံရတာကို မြင်ရင် ကိုယ် တကယ်ကြီး စိတ်မကောင်းဖြစ်ရလိမ့်မယ်" မူဟန်က ဆိုလိုက်သည်။

​ရွှီပင်းနင်းသည်လည်း အကြံဉာဏ်ကို လက်ခံလွယ်သူတစ်ဦး ဖြစ်သည်…သူမသည် မိမိ၏ အနီးကပ်ဆုံးလူများ အကြံပေးသည်ကို လိုက်နာတတ်သည်။ သူမ၏ မိခင် ရွှီရိုက မူဟန့်ကို ပိုပြီး တက်တက်ကြွကြွ လိုက်ဖို့ တိုက်တွန်းခဲ့တုန်းကလည်း သူမ လိုက်နာခဲ့သည် မဟုတ်ပါလား။

​မူဟန်က ကန့်ကွက်နေသည်ကို မြင်ရသောအခါ ရွှီပင်းနင်းသည်လည်း ဝီချက်မိုမန့်ပေါ်တွင် တင်ရန် ဇွတ်မတောင်းဆိုတော့ချေ။ 

အဘယ်ကြောင့်ဆိုသော် ၎င်းမှာ လုံးဝ မလုပ်မဖြစ် လုပ်ရမည့် ရွေးချယ်မှုမျိုး မဟုတ်သောကြောင့် ဖြစ်သည်။ 

ထို့အပြင် ရေရှည်အမြင်ဖြင့် ကြည့်လျှင်လည်း ဤသည်မှာ အကျိုးကျေးဇူး ရှိနေခဲ့သည်။ 

သူမသည် ဤမျှ ငယ်ရွယ်သော အသက်အရွယ်နှင့် ဤမျှ အောင်မြင်မှု ရရှိထားသဖြင့် အလွန် ထူးချွန်သည်ဟု ဆိုနိုင်သော်လည်း…မူအုပ်စု ၏ ကာလတန်ဖိုးမှာ ဘီလီယံ တစ်ရာကျော် ရှိသည်ဟု ကြားဖူးသဖြင့် မူအုပ်စုနှင့် နှိုင်းယှဉ်ပါက ကွာဟချက်က အလွန် ကြီးမားနေဆဲ ဖြစ်သည်။

​သူမအနေဖြင့် မူဟန်၏ မိသားစုက သူမနှင့် မူဟန်တို့ အတူတူရှိနေသည်ကို ကန့်ကွက်ကြမည်ကိုလည်း အနည်းငယ် စိုးရိမ်မိသည်။ 

သူမ၏ လုပ်ငန်းကို ပိုမို ကြီးထွားအောင် ပြုလုပ်ခြင်းမှာလည်း သူတို့နှစ်ဦး၏ အနာဂတ်အတွက် ဖြစ်သည်။ 

ချစ်ခြင်းကဏ္ဍတွင် ဦးနှောက်ပုံသေဖြစ်နေသော လူများ၏ အတွေးအခေါ်မှာ ဤသို့ပင် ဖြစ်သည်။

သူတို့နှစ်ဦး ခုလေးတင်မှ ချစ်သူဖြစ်ကြ ရုံရှိသေးသော်လည်း သူမကမူ အနာဂတ်အတွက်အထိပါ စီမံကိန်း ချမှတ်နေခဲ့ချေပြီ။

​ရွှီပင်းနင်းအနေဖြင့် ဝီချက်မိုမန့် ကိစ္စကို ထပ်ပြီး အာရုံမစိုက်တော့သည်ကို မြင်ရမှသာ မူဟန် စိတ်ထဲတွင် တိတ်တဆိတ် သက်ပြင်းချလိုက်နိုင်ပြီး၊ သူ ခုလေးတင် ရရှိထားသော စနစ်သတိပေးချက် မက်ဆေ့ချ် အချို့ကို စစ်ဆေးလိုက်တော့သည်။

​【ဇာတ်လိုက်မ ရွှီပင်းနင်း၏ ပိုင်ရှင် အပေါ် ထားရှိသော စိတ်ကျေနပ်မှု အမှတ် +၅၊ လက်ရှိ စုစုပေါင်း စိတ်ကျေနပ်မှုအမှတ်မှာ ၈၀ (နက်ရှိုင်းသော သံယောဇဉ်) ဖြစ်သည်။ ဇာတ်လိုက် ချင်ဖုန်း ၏ ဇာတ်လိုက်အရှိန်အဝါ  အမှတ် -၃၀၊ အိမ်ရှင်၏ ဗီလိန်အရှိန်အဝါ အမှတ် +၃၀】

​【ရွှီရို၏ တာဝန် ပြီးမြောက်အောင်မြင်သဖြင့်၊ ဆွဲဆောင်မှုအညွှန်းကိန်း ၄ မှတ် တိုးတက်လာသည်။ အိမ်ရှင်အနေဖြင့် ၄ ဆ ထိမှန်မှုကို လှုံ့ဆော်နိုင်ခဲ့သဖြင့် တုံ့ပြန်မှု ဆုလာဘ်အဖြစ် ဆွဲဆောင်မှုအညွှန်းကိန်း ၁၆ မှတ်အထိ တိုးတက်လာခြင်းအတွက် ဂုဏ်ယူပါသည်】

​【အိမ်ရှင်အနေဖြင့် စုစုပေါင်း ဆွဲဆောင်မှုအညွှန်းကိန်း ၁၂၁ မှတ်သို့ ရောက်ရှိသွားသည့်အတွက် ဂုဏ်ယူပါသည်။ ဆွဲဆောင်မှုအညွှန်းကိန်းမှာ သတ်မှတ်ချက်ထက် ၂၀ မှတ် ကျော်လွန်သွားသဖြင့် "အဆင့်နိမ့် စိတ္တဇညှို့မျက်ဝန်း" ကို သော့ဖွင့်ပေးလိုက်ပြီ ဖြစ်သည်။】

​ညှို့ …ညှို့မျက်ဝန်း ဟုတ်လား...

​အမည်ကို ကြည့်လိုက်ရုံနှင့်ပင် ဤအရာမှာ ကောင်းမွန်သောအရာတစ်ခု ဖြစ်ကြောင်း သိသာလှသည်။ မူဟန်သည် ညှို့မျက်ဝန်း၏ အသေးစိတ် မိတ်ဆက်ချက်ကို ကြည့်ရှုရန်အတွက် မစောင့်ဆိုင်းနိုင်တော့ချေ။

​【အဆင့်နိမ့် စိတ္တဇညှို့မျက်ဝန်း - ဆန့်ကျင်ဘက်လိင် (အမျိုးသမီး) တစ်ဦးနှင့် ၁၀ စက္ကန့်ခန့် မျက်လုံးချင်း ဆုံကြည့်ရုံဖြင့် သူမ၏ စိတ်ကျေနပ်မှုအမှတ်ကို ၆၀ (ရင်ခုန်သံမြန်ဆန်ခြင်း) အထိ တိုးတက်လာစေနိုင်သည်။

(မှတ်ချက် - အချို့သော အခြေအနေများတွင် ညှို့မျက်ဝန်းသည် အလုပ်မလုပ်နိုင်ခြင်း သို့မဟုတ် ထိရောက်မှု မရှိခြင်း၊အကန့်အသတ်ရှိခြင်းတို့ ဖြစ်နိုင်သည်။ ဥပမာ - ထိုသူတွင် အိမ်ထောင်ဖက်/ချစ်သူ ရှိနေပြီးသားဖြစ်ခြင်း၊ ထိုသူသည် အိမ်ရှင်အပေါ် အာဃာတ တရားရှိနေခြင်း၊ ထိုသူနှင့် အိမ်ရှင်တို့အကြား အသက်အရွယ် ကွာဟချက် အလွန်ကြီးမားလွန်းခြင်း၊ ထိုသူ၏ လိင်စိတ်တိမ်းညွတ်မှုမှာ အမျိုးသမီးချင်း စိတ်ဝင်စားသူဖြစ်ခြင်း သို့မဟုတ် ထိုသူနှင့် အိမ်ရှင်တို့ ပေါင်းဖက်ခြင်းကို လူမှုပတ်ဝန်းကျင်က လက်မခံနိုင်ခြင်း စသည်ဖြင့် ဖြစ်သည်)】

​မိတ်ဆက်ချက်မှာ ရိုးရှင်းပြီး ရှင်းလင်းလှသဖြင့် မူဟန် တစ်ချက်ကြည့်ရုံနှင့်ပင် သဘောပေါက်သွားခဲ့သည်။ 

တစ်နည်းအားဖြင့် ပြောရလျှင်... ညှို့မျက်ဝန်း အလုပ်မလုပ်နိုင်သော အထူးအခြေအနေ အနည်းငယ်ကို ဖယ်ထုတ်လိုက်ပါက၊ အခြေခံအားဖြင့် သူ ကြည့်လိုက်သည့် မည်သည့်မိန်းကလေးမဆို ရင်ခုန်သွားစေမည် ဖြစ်သည်။ 

အဓိကမှာ ဆန့်ကျင်ဘက်လိင်နှင့် ၁၀ စက္ကန့်မျှ မျက်လုံးချင်း ဆုံကြည့်ရုံသာ လိုအပ်သည့် စတင်မှုအခြေအနေမှာ... တကယ်ကို အောင်မြင်ရန် လွယ်ကူလွန်းလှသည်။

​ပြီးတော့ ဤသည်မှာ အဆင့်နိမ့် ညှို့မျက်ဝန်း၏ အာနိသင်သာ ရှိသေးသည်၊ သူ၏ ဆွဲဆောင်မှုအညွှန်းကိန်း ဆက်တိုက်မြင့်တက်လာသည်နှင့်အမျှ ဤအထူးစွမ်းရည်မှာလည်း အဆင့်မြင့်တက်လာဦးမည် ဖြစ်သည်။ 

ထိုအချိန်ကျလျှင် စိတ်ကျေနပ်မှုအမှတ် တိုးတက်လာမှုမှာ ရင်ခုန်ရုံ အဆင့်တင် ရှိတော့မည် မဟုတ်ချေ။

​'ဒါကို မွေးရာပါ မြှူဆွယ်ညှို့ယူနိုင်တဲ့ စုန်းကဝေခန္ဓာကိုယ် လို့ ခေါ်ရမလားပဲ' မူဟန် အံ့သြစွာ တွေးလိုက်မိသည်။

​"ရှင် ဘာဖြစ်လို့ ရုတ်တရက်ကြီး စကားမပြောတော့တာလဲ… ဘာတွေ တွေးနေလို့လဲ"

​သူ အတွေးနက်နေစဉ်မှာပင် ရွှီပင်းနင်း၏ အသံလေးက သူ၏ နားထဲသို့ တိုးဝင်လာခဲ့သည်။

​"ကိုယ် မျက်လုံးက ရုတ်တရက်ကြီး တစ်မျိုးကြီး ဖြစ်သွားလို့ပါ…ဖုန် သို့မဟုတ် သဲတစ်ခုခု ဝင်သွားတယ် ထင်တယ်" မူဟန်က သူ၏ မျက်လုံးကို ပွတ်သပ်ရင်း ဆိုလိုက်သည်။ သူသည် ညှို့မျက်ဝန်း၏ အာနိသင်ကို စမ်းသပ်ကြည့်ချင်သဖြင့် လိမ်ညာလိုက်ခြင်း ဖြစ်သည်။

​"ကျွန်မ ကို ပြကြည့်ဦး"

​ရွှီပင်းနင်းက စိုးရိမ်တကြီးဖြင့် ဆိုလိုက်ပြီး မူဟန်၏ မျက်လုံးကို စတင်၍ စစ်ဆေးပေးရန် ကြည့်လိုက်သည်၊ သို့သော် ခဏမျှ ကြည့်ပြီးနောက်တွင်မူ သူမ တစ်ကိုယ်လုံး ရုတ်တရက်ကြီး ကျောက်ရုပ်အလား အေးခဲသွားခဲ့ရတော့သည်။ 

မူဟန်၏ အကြည့်များမှာ ဆွဲဆောင်မှုရှိပြီး နက်ရှိုင်းလှကာ၊ သူမ၏ စိတ်ဝိညာဉ်ကို ဆွဲထုတ်သွားနိုင်လောက်သည့် ထူးဆန်းသော မှော်ဆန်မှုတစ်ခု ရှိနေသည့်အလား ခံစားလိုက်ရသည်။

​【ဇာတ်လိုက်မ ရွှီပင်းနင်း၏ အိမ်ရှင်အပေါ် ထားရှိသော စိတ်ကျေနပ်မှုအမှတ် +၅၊ လက်ရှိ စုစုပေါင်း စိတ်ကျေနပ်မှုအမှတ်မှာ ၈၅ (နက်ရှိုင်းသော သံယောဇဉ်) ဖြစ်သည်】

​ဤသတိပေးချက်ကို ရရှိလိုက်သဖြင့် မူဟန်သည် ဤသည်မှာ ညှို့မျက်ဝန်းကြောင့်ဖြစ်ကြောင်း သဘာဝအတိုင်း နားလည်လိုက်သည်။ အနည်းငယ် တုန့်ဆိုင်းသွားပြီးနောက် မူဟန်သည် ရုတ်တရက် ခေါင်းကို စောင်းလိုက်ပြီး သူမထံသို့ တဖြည်းဖြည်းချင်း တိုးကပ်သွားခဲ့တော့သည်။

​ရွှီပင်းနင်း၏ မျက်နှာထက်တွင် ရှက်ရွံ့မှုနှင့် တွန့်ဆုတ်မှုတို့ ဖြတ်ပြေးသွားခဲ့သော်လည်း၊ နောက်ဆုံးတွင် သူမသည် မျက်ဝန်းအစုံကို ဖြည်းညှင်းစွာ မှိတ်ချလိုက်တော့သည်။ 

ရွှီပင်းနင်း၏ စိတ်ထဲတွင် မိမိကိုယ်ကိုယ် အိန္ဒြေနည်းနည်း ထိန်းသိမ်းရန် သတိပေးနေသည့် ဆင်ခြင်တုံတရား အသံတစ်ခု ရှိနေခဲ့သော်လည်း၊ သူမ စိတ်ထဲတွင် ထိုသို့တွေးနေသော်လည်း သူမ၏ ခန္ဓာကိုယ်မှာမူ ထိန်းချုပ်မှု ကင်းမဲ့နေခဲ့ချေပြီ။

​ရွှီပင်းနင်း အသိစိတ် အနည်းငယ် ပြန်ဝင်လာသည့်အချိန်တွင်... စိတ်ထဲ၌ အတွေးတစ်ခု ပေါ်လာခဲ့သည် - သူမ၏ ပထမဆုံးအကြိမ် အနမ်း ကတော့ ပျောက်ဆုံးသွားခဲ့ချေပြီ။ 

သို့သော်လည်း ရွှီပင်းနင်းသည် မိမိရှေ့မှောက်ရှိ အမျိုးသားကို တွန်းထုတ်ခြင်းမရှိဘဲ၊ ဆန့်ကျင်ဘက်အနေဖြင့် အနည်းငယ် မူးယစ်မိန်းမောနေခဲ့ပြီး လက်လွှတ်ရန် တွန့်ဆုတ်နေမိကာ... သူမ တစ်ခါမှ မခံစားဖူးသေးသည့် ဤဆန်းသစ်၊ သာယာပြီး စိတ်လှုပ်ရှားဖွယ်ကောင်းသော ခံစားချက်ကို ဆက်လက်၍ အရသာခံနေမိတော့သည်။

​သူတို့နှစ်ဦး၏ ဆက်ဆံရေးကို ဖျက်ဆီးလိုက်သည့် အချိန်မတော် ထွက်ပေါ်လာသော ဖုန်းမြည်သံတစ်ခု မရှိမချင်းပေါ့...။

​၎င်းက ချစ်သူနှစ်ဦး၏ အပြန်အလှန် ကြင်နာမှု ကို နောက်ဆုံးတွင် ကြားဖြတ်နှောင့်ယှက်လိုက်တော့သည်။ 

မူဟန် အစကတော့ ဖုန်းမကိုင်ချင်သော်လည်း လင်းရော့ထံမှ လာသော ဖုန်းဖြစ်ကြောင်း မြင်လိုက်ရသဖြင့် ခဏမျှ စဉ်းစားပြီးနောက် ကိုင်ရန် ဆုံးဖြတ်လိုက်သည်။ 

ဤကဲ့သို့ ကြားဖြတ်နှောင့်ယှက်ခြင်း ခံလိုက်ရသဖြင့် ရွှီပင်းနင်းသည်လည်း တဖြည်းဖြည်းနှင့် အသိစိတ် ပြန်လည်ဝင်လာခဲ့ပြီး၊ ရှက်သွေးဖြာကာ မျက်နှာလေး နီမြန်းလျက် သူမ၏ အဝတ်အစားများနှင့် စောင်းနေသော ပခုံးသိုင်းကြိုးလေးကို အမြန် ပြန်လည်ပြင်ဆင်လိုက်တော့သည်။ 

သူမ ခုလေးတင်က အရမ်း စိတ်ပါသွားခဲ့သဖြင့်... ဒီလူ့ရဲ့ လက်က ဘယ်အချိန်ကတည်းက ဘယ်ကို လျှောက်နှိုက်နေမှန်းကိုပင် သူမ သတိမထားမိခဲ့ချေ။

​မူဟန်သည် လင်းရော့နှင့် ယခင်ကတည်းက ပြောဆိုထားခဲ့ဖူးသည်၊ အရေးကြီးသည့် ကိစ္စမရှိပါက ကျန်းရုန်ဖေး၏ လှုပ်ရှားမှုများကို စာတို ဖြင့်သာ ပေးပို့အစီရင်ခံရန် ဖြစ်သည်။ 

သို့သော် ယခုမူ လင်းရော့က ဖုန်းကို တိုက်ရိုက် ခေါ်ဆိုလာခြင်း ဖြစ်သဖြင့် ဤသည်မှာ အရေးပေါ်အခြေအနေတစ်ခု ဖြစ်ကြောင်း ထင်ရှားလှသည်။

​"ကျန်းရုန်ဖေးက အရေးကြီးတဲ့ ညစာစားပွဲတစ်ခုကို တက်ရောက်နေတာ၊ သူမ အခု အရက်နည်းနည်း သောက်ထားတယ် လောလောဆယ်တော့ သတိရှိနေသေးပေမယ့် ခဏနေရင်တော့ ဘာဖြစ်မလဲ မသိဘူး" လင်းရော့၏ အသံက ဖုန်းထဲမှ ထွက်ပေါ်လာခဲ့သည်။

​မူဟန် ဤစကားကို ကြားလိုက်ရသည်နှင့်တစ်ပြိုင်နက် အခွင့်အရေး ရောက်ရှိလာပြီဖြစ်ကြောင်း သိရှိလိုက်သည် သို့သော် ကျန်းရုန်ဖေးရှိရာသို့ သွားရောက်ခြင်းမှာ ရွှီပင်းနင်းကို ခေတ္တမျှ ထားပစ်ခဲ့ရမည်ဟု သေချာပေါက် ဆိုလိုခြင်း ဖြစ်သည်။ 

ရွှီပင်းနင်းသည် ချော့ရလွယ်ပြီး လှည့်စားရလွယ်ကူလှသည်…မူဟန် ခံစားရသည်မှာ သူသာ နောက်ထပ် နည်းနည်းလေး ပိုပြီး ကြိုးစားလိုက်မည်ဆိုပါက ယနေ့ညတွင် ရွှီပင်းနင်းကို ဟိုတယ်သို့ ခေါ်ဆောင်ကာ နှလုံးသားချင်း စကားပြောရန် အခွင့်အရေး ရှိနေခဲ့သည်။ (ဟိုတယ်မှာ ကိုလာကိုလာ သောက်ဖို့ သူခေါ်တယ် )

​သို့သော် စဉ်းစားချင့်ချိန်ပြီးနောက် မူဟန်သည် ဤအတွေးကို ခေတ္တမျှ နှိပ်ကွပ်ထားလိုက်သည်။ 

အဘယ်ကြောင့်ဆိုသော် သူသည် ယနေ့မှသာ ရွှီပင်းနင်းနှင့် ချစ်သူအဖြစ် တရားဝင် အတည်ပြုခဲ့ခြင်း ဖြစ်ရာ၊ လောလောလောလောဆယ်တွင် အလွန်အကျွံ တောင်းဆိုမှုများ ပြုလုပ်ခြင်းက အောင်မြင်နိုင်ခြေ ရှိသော်လည်း ရွှီပင်းနင်းကို ထိတ်လန့်သွားစေနိုင်သည်။ 

အဆင့်လိုက် တဖြည်းဖြည်းချင်း သွားခြင်းက ပို၍ ကောင်းမွန်ပေလိမည်။ ဘာပဲဖြစ်ဖြစ် သူ ယနေ့တွင် ခန္ဓာကိုယ်ချင်း ထိတွေ့မှု ရရှိခဲ့ပြီဖြစ်ရာ၊ နောက်တစ်ကြိမ်တွင် ပိုမို၍ တိုးတက်အောင် ပြုလုပ်နိုင်ပြီး၊ အပြန်အလှန်အားဖြင့် နောက်ဆုံးတွင် ထိုအဆင့်သို့ ရောက်ရှိသွားမည်သာ ဖြစ်သည်။ 

မည်သို့ပင်ဆိုစေကာမူ ဇာတ်လိုက် ချင်ဖုန်း၏ ဇာတ်ကွက် တရားဝင် မစတင်မီ အချိန်အတွင်း သူ ရွှီပင်းနင်းကို ဘာပဲဖြစ်ဖြစ် အပိုင်ရယူထားရမည် ဖြစ်သည်။

​"အချိန်လည်း မစောတော့ဘူးပဲ... ငါတို့ ပြန်ကြရအောင်…မဟုတ်ရင် အန်တီရွှီ စိုးရိမ်နေလိမ့်မယ်" မူဟန်သည် ခုလေးတင် မိမိ၏ မဆင်မခြင် ပြုမူမိမှုများကြောင့် ရွှီပင်းနင်းအပေါ် အားနာသလို၊ နောင်တရသလို မျက်နှာအမူအရာမျိုးဖြင့် လှမ်း၍ ဆိုလိုက်သည်။

​ရွှီပင်းနင်းသည် အခုမှ သတိပြန်လည်လာပြီး ဆင်ခြင်တုံတရား ပြန်ဝင်လာခဲ့သည်။ 

မူဟန်၏ ခုလေးတင်က အပြုအမူများမှာ တကယ်ကိုပင် "အတွေ့အကြုံ အလွန်များပြားလွန်း" နေကြောင်း သတိပြုမိသွားသဖြင့် သူမ စိတ်ထဲတွင် အနည်းငယ် မတင်မကျ ဖြစ်သွားခဲ့ရသည်။ 

သို့သော်လည်း မူဟန်၏ ဤစကားကို ကြားလိုက်ရပြီးနောက်တွင်မူ သူမ ရုတ်တရက်ကြီး စိတ်ထဲတွင် ပိုမို၍ သက်သောင့်သက်သာ ဖြစ်သွားခဲ့ရပြန်သည်။ 

မူဟန်သည် ခုလေးတင်က စိတ်ကို မထိန်းနိုင်ဖြစ်သွားခြင်းကြောင့်သာ ဖြစ်ရမည်၊ သူမအနေဖြင့်လည်း အလွန်အကျွံ စိတ်ကျဉ်းမြောင်းမနေသင့်ချေ။ ထို့အပြင် သူမတွင်လည်း တာဝန်အနည်းငယ် ရှိနေခဲ့သည် မဟုတ်ပါလား၊ သူမကိုယ်တိုင်လည်း ခုလေးတင်က ဝေဝေဝါးဝါး ဖြစ်သွားခဲ့သည်လေ။

​ရွှီပင်းနင်းကို နှစ်သိမ့်ပြီးနောက် မူဟန်သည် အပျော်စီးသင်္ဘောကို ဆိပ်ကမ်းသို့ ပြန်လည်မောင်းနှင်စေခဲ့သည်။ 

ကုန်းပေါ်သို့ ရောက်ရှိပြီးနောက် မူဟန်နှင့် ရွှီပင်းနင်းတို့သည် နှုတ်ဆက်သည့်အနေဖြင့် အပြန်အလှန် ဖက်လိုက်ကြပြီး…ထို့နောက်တွင်မူ သူသည် လင်းရော့ ပေးပို့ထားသော တည်နေရာဆီသို့ ကားကို ဦးတည်မောင်းနှင် ထွက်ခွာသွားခဲ့တော့သည်။