အခန်း (၁၇) - စစ်ဘုရင်ဇာတ်လိုက်၏ ယုံကြည်ချက် ဇနီးဖြစ်သူ ဖောက်ပြန်မှာကို မကြောက်ခြင်း

သူမ၏ အချစ်ဆုံးသူငယ်ချင်း ကျန်းရုန်ဖေး၏ ပြောပြချက်ကို ကြားပြီးနောက် ရွှီပင်းနင်းသည် ဒေါသတကြီးဖြင့် မကျေမနပ် ဖြစ်သွားခဲ့ရသည် "ဒီလိုဖခင်မျိုး ဘယ်လိုလုပ် ရှိရတာလဲ…မင်္ဂလာဆောင်ဖို့အတွက် ရောဂါအတုလုပ်ပြီး လှည့်စားတယ်ဆိုတာ တကယ်ကို လွန်လွန်းတယ်"

"ပြီးတော့ ဒီခေတ်ကြီးထဲမှာမှ 'မမွေးခင်ကတည်းက လူကြီးချင်း ကတိပြုခဲ့တဲ့ အိမ်ထောင်ရေး' ဆိုတဲ့ အဓိပ္ပာယ်မရှိတဲ့အရာကို ဖက်တွယ်ထားတုန်းပဲဆိုတာ တကယ်ကို ရယ်စရာကောင်းလှတယ်"

သူမ၏ ရှုတ်ချပြစ်တင်မှုများကို ရင်ဖွင့်ပြီးနောက် ရွှီပင်းနင်းက လှမ်း၍ မေးမြန်းလိုက်သည် "ဖေးဖေး... ဒါဆို နင် အခု ဘာဆက်လုပ်ဖို့ စိတ်ကူးထားလဲ"

"ငါကတော့ ဒီမှားယွင်းနေတဲ့ အိမ်ထောင်ရေးကို အဆုံးသတ်ချင်တာပေါ့…ဒါပေမယ့် ငါ့အဖေကို ဒီအကြောင်း စမ်းသပ်ပြီး ပြောကြည့်တော့ သူ့ရဲ့ သဘောထားက အရမ်းပြတ်သားတယ်…သူ လုံးဝ သဘောမတူဘူး… အကယ်၍ ငါကသာ အတင်းအကျပ် လုပ်မယ်ဆိုရင်တော့ ငါ့အဖေနဲ့ အဆက်အသွယ် ဖြတ်ရမယ့် နည်းလမ်းတစ်ခုပဲ ရှိလိမ့်မယ်" 

ကျန်းရုန်ဖေးက ဤနေရာတွင် ခေတ္တမျှ ရပ်တန့်လိုက်ပြီး…သက်ပြင်းချကာ မတတ်သာဟန်ဖြင့် ဆိုလိုက်သည် 

"ငါ့အဖေရဲ့ နာတာရှည်ရောဂါက ငါ့ကို လှည့်စားဖို့ လိမ်ညာခဲ့တာ မှန်ပေမယ့်…သူ့ရဲ့ ကျန်းမာရေးက တကယ်ကြီး သိပ်မကောင်းတာတော့ အမှန်ပဲ…အကယ်၍ ငါကသာ အကြီးအကျယ် ပြဿနာရှာလိုက်ရင် သူ တကယ်ကြီး စိတ်ဆိုးပြီး ဖျားသွားနိုင်တယ်"

"ဒါဆို နင့်မေမေကော… သူမက ဒီကိစ္စအပေါ် ဘယ်လို သဘောထားရှိလဲ" ရွှီပင်းနင်းက မေးမြန်းလိုက်သည်။

"ငါ့မေမေကလည်း ဒီအိမ်ထောင်ရေးကို သဘောမတူပါဘူး… ဒါပေမယ့် သူမက ငါ့အဖေရဲ့ ဆန္ဒကို မလွန်ဆန်ချင်တော့ ကြားနေသဘောမျိုးပဲ နေနေတယ်" 

ကျန်းရုန်ဖေးက ရွှီပင်းနင်း၏ လက်ကို ဆုပ်ကိုင်ကာ အကူအညီ တောင်းခံလိုက်သည် "ဒါကြောင့် နင့်မှာ ကောင်းတဲ့ အကြံဉာဏ် ရှိမလားလို့ ငါ လာမေးတာ"

ရွှီပင်းနင်း အနည်းငယ် အခက်တွေ့သွားရသော်လည်း၊ သူမ အတတ်နိုင်ဆုံး စဉ်းစားသုံးသပ်ပေးလိုက်သည်…

 "ငါက ဒီလို မိသားစု ပြဿနာတွေကို ကိုင်တွယ်တဲ့နေရာမှာ မတော်ပေမယ့်... ငါထင်တာတော့ နင်က နင့်မိဘတွေကို ပြောလို့မရရင်… ဘာဖြစ်လို့ ဟိုဘက်က အမျိုးသားဆီကနေ စပြီး မကြိုးစားကြည့်ရတာလဲ"

"ဒီလောကမှာရှိတဲ့ မိဘတွေရဲ့ မေတ္တာအများစုက... အစွဲအလမ်းကြီးရင်တောင်မှ သားသမီးတွေအပေါ် ထားတဲ့ အချစ်ကို အခြေခံထားတာပဲလေ… သူတို့လုပ်တာ မမှန်ကန်ဘူးဆိုရင်တောင် အနည်းဆုံးတော့ အဲဒါက သားသမီးတွေအတွက် ကောင်းမယ်လို့ မိဘတွေက ယူဆထားကြတာပဲ"

"နင့်အဖေက နင် မင်္ဂလာဆောင်ဖို့ အတင်းအကျပ် လုပ်နေရတဲ့ အကြောင်းရင်းကလည်း နင် ပျော်ရွှင်ရလိမ့်မယ်လို့ သူတစ်ဦးတည်း သဘောနဲ့ ယုံကြည်နေလို့ နေမှာပါ"

"အကယ်၍ နင်နဲ့ အဲဒီအမျိုးသားနဲ့ နှစ်ယောက်စလုံးက ဒီအိမ်ထောင်ရေးကို အဆုံးသတ်ဖို့ တစ်ချိန်တည်းမှာ တင်ပြကြမယ်ဆိုရင်… ငါ့စိတ်ထင် နင့်အဖေ သေချာပေါက် စိတ်ပြောင်းသွားလိမ့်မယ်"

ကျန်းရုန်ဖေး၏ လှပသော မျက်ဝန်းလေးများက ဤစကားကို ကြားရသောအခါ အနည်းငယ် တောက်ပသွားခဲ့သော်လည်း… မကြာမီမှာပင် ပြန်လည် မှေးမှိန်သွားခဲ့ရပြန်သည် "နင်ပြောတာ အဓိပ္ပာယ်ရှိပါတယ်… ဒါပေမယ့် ရှောင်ပေ့က အဲဒီလောက် ဖြောင်းဖြရလွယ်တဲ့သူ မဟုတ်ဘူး"

"ဖေးဖေး... နင်က အရမ်းလှတာပဲဥစ္စာ… အဲဒီအမျိုးသားက နင့်ကို လက်လွတ်မခံချင်တာ သဘာဝပါပဲ…သူ့ကို သဘောတူလာအောင် စိန်ခေါ်တဲ့ ပုံစံမျိုးနဲ့ ကြိုးစားကြည့်ပါလား" ရွှီပင်းနင်းက အကြံတစ်ခု ပေးလိုက်သည်။

"ပင်းနင်း... ငါ အခုမှ သတိထားမိတယ်၊ နင်က အချစ်ရေး အကြံပေးပညာရှင် လုပ်ဖို့ တော်တော်လေး သင့်တော်တာပဲ" ကျန်းရုန်ဖေးက သူမ၏ အချစ်ဆုံးသူငယ်ချင်းကို အံ့သြစွာ ကြည့်ကာ ဆိုလိုက်သည်။

ရွှီပင်းနင်း ရှက်ကိုးရှက်ကန်း ဖြစ်သွားရသည် "ငါက အချစ်ဝတ္ထုတွေ အများကြီး ဖတ်ဖူးလို့ အပေါ်ယံ စာတွေ့လောက်ပဲ ပြောနိုင်တာပါ… ငါ့ကို ဘယ်လိုလုပ် အချစ်ရေး အကြံပေးပညာရှင်လို့ ခေါ်လို့ရမှာလဲ။ အကယ်၍ ငါသာ တကယ် အဲဒီလိုလူ ဖြစ်နေရင်... ငါတောင်မှ"

သူမ စကားပြောရင်းနှင့် ရုတ်တရက် ရပ်တန့်သွားခဲ့သည်။

"နင်တောင်မှ ဘာဖြစ်လို့လဲ" ကျန်းရုန်ဖေးက မျက်တောင်လေးခတ်ကာ စူးစမ်းချင်စိတ်ဖြင့် မေးမြန်းလိုက်သည်။

"ဘာမှမဟုတ်ပါဘူး… နင့်ကိစ္စကိုပဲ အမြန် ဖြေရှင်းဖို့ လုပ်ပါ" ရွှီပင်းနင်းက စကားလွှဲလိုက်သည်။

ကျန်းရုန်ဖေးလည်း ထပ်ပြီး မမေးတော့ချေ။ သူမသည် ဖုန်းကို ထုတ်ယူကာ အဆက်အသွယ်များထဲမှ ရှောင်ပေ့၏ ဖုန်းနံပါတ်ကို ရှာဖွေ၍ လှမ်းခေါ်လိုက်တော့သည်။

ဖုန်းမြည်သံက ငါးစက္ကန့်… ခြောက်စက္ကန့်ခန့် ကြာမြင့်ပြီးနောက်တွင် တစ်စုံတစ်ဦးက ဖုန်းကို ကိုင်လိုက်သည်။

"သူ အခု ရေချိုးနေလို့ ဖုန်းကိုင်ဖို့ အချိန်မရှိဘူး" တစ်ဖက်မှ အမျိုးသမီးတစ်ဦး၏ အသံ ထွက်ပေါ်လာခဲ့သည်။

ကျန်းရုန်ဖေး ဤစကားကို ကြားလိုက်ရသောအခါ ခေတ္တမျှ ဆွံ့အသွားရပြီးနောက် တည်ငြိမ်စွာဖြင့် ပြန်လည်ပြောကြားလိုက်သည် "ဒါဆိုရင်လည်း သူ ရေချိုးပြီးရင် ဖုန်းပြန်ဆက်ဖို့ သူ့ကို စကားပါးပေးပါဦး…ကျေးဇူးတင်ပါတယ်"

ဤသို့ပြောပြီးနောက် သူမသည် ဖုန်းကို ချက်ချင်း ချလိုက်တော့သည်။

အခြားတစ်ဖက်တွင်မူ... ရှောင်ပေ့သည် ရေချိုးခန်းထဲမှ ထွက်လာပြီးနောက် စကားပါးထားမှုကို ရရှိသဖြင့် ဖုန်းခေါ်ဆိုမှုမှတ်တမ်းကို စစ်ဆေးလိုက်သည်။

"နင် စိတ်ရူးပေါက်နေတာလား… ငါ့ဖုန်းကို ဘာဖြစ်လို့ နင်သဘောနဲ့နင် လျှောက်ကိုင်ရတာလဲ" ရှောင်ပေ့က မကျေမနပ်ဖြင့် ဆိုလိုက်သည်။

"နင်က အပြင်ထွက်ပြီး ပျော်ပါးရဲတဲ့ သတ္တိရှိမှတော့ တခြားလူတွေ သိသွားမှာကို ကြောက်နေသေးတာလား" ထိုအမျိုးသမီးက စီးကရက်တစ်လိပ်ကို မီးညှိကာ လှောင်ပြုံး ပြုံးလိုက်ပြီးနောက် စူးစမ်းချင်စိတ်ဖြင့် မေးလိုက်သည် "စောစောက မိန်းမက ဘယ်သူလဲ"

"ငါ့မိန်းမ" ရှောင်ပေ့က မှုန်ကုပ်ကုပ်ဖြင့် ပြန်ဖြေလိုက်ပြီးနောက် ဟိုတယ်အခန်း၏ ဝရန်တာသို့ လျှောက်လှမ်းသွားကာ ကျန်းရုန်ဖေးထံသို့ ဖုန်းပြန်ခေါ်လိုက်သည်။

"စောစောက ကိစ္စက ငါ့သူငယ်ချင်းက နောက်ပြောင်လိုက်တာပါ မိန်းမ… အထင်မလွဲပါနဲ့" ရှောင်ပေ့က လိမ်ညာလှည့်စားလိုက်သည်။

ကျန်းရုန်ဖေးသည် ယခင်ကတည်းက ဤကဲ့သို့သော ကောလာဟလများကို ကြားဖူးခဲ့သော်လည်း ကောလာဟလသက်သက်ဟုသာ ထင်မှတ်ခဲ့သည်။ 

သို့သော် ယခုမူ ထိုအရာများက အမှန်တရားဖြစ်ကြောင်း သေချာသွားခဲ့ချေပြီ။ သို့သော်လည်း သူမက ဂရုမစိုက်သဖြင့် သဘာဝအတိုင်းပင် စိတ်ဆိုးဒေါသထွက်ခြင်း မရှိချေ။

"ရှင်းပြနေဖို့ မလိုပါဘူး…နင် ပျော်ပါးချင်တယ်ဆိုရင်လည်း သဘောအတိုင်း ပျော်ပါးပါ….ငါ နင့်ကို လွတ်လပ်ခွင့်ပေးသလို၊ နင်လည်း ငါ့ကို လွတ်လပ်ခွင့် ပြန်ပေးဖို့ မျှော်လင့်တယ်" ကျန်းရုန်ဖေးက တည်ငြိမ်သော လေသံဖြင့် ဆိုလိုက်သည်။

"ဘာကို ဆိုလိုတာလဲ" ရှောင်ပေ့က မေးလိုက်သည်။

"ငါတို့ ကွာရှင်းကြရအောင်….ငါ နင့်ကို လွှတ်ပေးမယ်….နင်လည်း ငါ့ကို လွှတ်ပေးပါ" ကျန်းရုန်ဖေးက ဆိုလိုက်သည်။

"ငါတို့ အစကတည်းက သဘောတူထားကြတယ် မဟုတ်လား၊ အကယ်၍ နောက်ဆုံးအထိ အတူတူမနေဖြစ်ရင်တောင် အနည်းဆုံး နှစ်နှစ်လောက် စောင့်ပြီးမှ ကွာရှင်းကြမယ်လို့လေ….အခုမှ လအနည်းငယ်ပဲ ရှိသေးတာကို"

"ငါ ရုတ်တရက်ကြီး စိတ်ပျက်လာလို့ အမြန်ဆုံး အဆုံးသတ်ချင်ရုံပဲ"

"အဲဒါလည်း ရတာပဲ….နင် မေမေနဲ့ ဖေဖေတို့ကို သွားပြောလိုက်လေ…အကယ်၍ သူတို့ သဘောတူရင် ငါလည်း သဘောတူမယ်"

ကျန်းရုန်ဖေး စက္ကန့်အနည်းငယ်မျှ တိတ်ဆိတ်သွားရသည်။ အကယ်၍ သူမ၏ မိဘများကို ပြောဆိုရလွယ်ကူပါက၊ သူမအနေဖြင့် ရှောင်ပေ့ကို ဖုန်းဆက်၍ စကားပြောနေမည် မဟုတ်ချေ။ 

သူမက ဒေါသတကြီးဖြင့် ပြောလိုက်သည် "ငါက နင်နဲ့ ဆွေးနွေးနေတာ မဟုတ်ဘူး….အသိပေးတာ….အကယ်၍ နင် သဘောမတူရင် ငါလည်း အပြင်ထွက်ပြီး စိတ်ကြိုက် လျှောက်ပျော်ပါးပစ်မှာ…. အဲဒီအချိန်ကျရင် နင့်မျက်နှာ ဘယ်နား သွားထားမလဲဆိုတာ စောင့်ကြည့်ရသေးတာပေါ့"

ရှောင်ပေ့ စိတ်ထဲတွင် ရယ်ချင်သွားရသည်။ 

သူက ကျန်းရုန်ဖေးသည် ထိုကဲ့သို့သော မိန်းကလေးမျိုး မဟုတ်မှန်း ကောင်းစွာ သိရှိထားသဖြင့် ဤသည်မှာ စိတ်ဆိုးမာန်ဆိုးဖြင့် ပြောလိုက်သည့် စကားသက်သက်သာ ဖြစ်ကြောင်း နားလည်သည်။ 

အသက် ၂၄ နှစ်အရွယ်ရှိပြီး တစ်ခါမှ ရည်းစားမထားဖူးသေးသည့် အပြစ်ကင်းစင်သော မိန်းကလေးတစ်ယောက်က... ဤကဲ့သို့သော အောက်တန်းကျသည့်အရာကို ဘယ်လိုလုပ် ပြုလုပ်နိုင်မည်နည်း။

"ငါ နားလည်ပါတယ်….နားလည်ပါတယ် အရွယ်ရောက်ပြီးသား မိန်းမတစ်ယောက်အနေနဲ့ လိုအပ်ချက်ရှိတာက အရမ်း သဘာဝကျပါတယ်….နင် ပျော်ပါးချင်တယ်ဆိုရင်လည်း သွားပြီး ပျော်ပါးလိုက်လေ….ငါ စိတ်မရှိပါဘူး" ရှောင်ပေ့က သဘောထားကြီးဟန်ဖြင့် ဆိုလိုက်သည်။

သူ၏ အမြင်တွင်မူ... ယောက်ျားတစ်ယောက်အနေဖြင့် မိန်းမတစ်ယောက်၏ ရှေ့မှောက်၌ မိမိ၏ ယဉ်ကျေးသိက္ခာရှိမှုကို လုံးဝ အကျမခံနိုင်ချေ…. သူကိုယ်တိုင် အပြင်မှာ လျှောက်ရှုပ်နိုင်မှတော့….သဘောတရားအရ ကျန်းရုန်ဖေးလည်း ထိုနည်းတူ ပြုလုပ်နိုင်သည်ဟု တွေးတောခြင်း ဖြစ်သည်။

ဟုတ်ပါသည်... ဤကဲ့သို့သော ယဉ်ကျေးသိက္ခာရှိမှုဆိုသည်မှာ နှုတ်ကပတ်ဖြင့်သာ ထိန်းသိမ်းထားခြင်း ဖြစ်သည်။ 

မိမိ၏ ဇနီးဖြစ်သူက တခြားယောက်ျားနှင့် ဖောက်ပြန်နေသည်ကို ခွင့်လွှတ်ပေးနိုင်လောက်အောင် သဘောထားကြီးမည့် လင်ယောက်ျားဆိုသည်မှာ ဤလောကတွင် မရှိချေ။ 

ကျန်းရုန်ဖေးက သူ့ကို လင်ယောက်ျားတစ်ယောက်လို မဆက်ဆံသော်လည်း….သူကမူ ကျန်းရုန်ဖေးကို သူ၏ ဇနီးအဖြစ် သတ်မှတ်ထားဆဲ ဖြစ်သည်။

"ကောင်းပြီလေ... ဒါ နင်ကိုယ်တိုင် ပြောတာနော်….ငါ အခုချက်ချင်းပဲ ယောက်ျားတစ်ယောက် သွားရှာတော့မယ်" ကျန်းရုန်ဖေးက ဆိုလိုက်သည်။

"သွားလေ... ဒါပေမယ့် သတိထားဦး…မိမိကိုယ်ကိုယ် အကာအကွယ်ပေးဖို့လည်း မမေ့နဲ့ဦးနော်" ရှောင်ပေ့က သူမကို ကူညီအားပေးနေသည့်အလား ကြင်နာစွာဖြင့် သတိပေးလိုက်သေးသည်။

သူ ဤကဲ့သို့သော စကားများကို ရဲရဲဝံ့ဝံ့ ပြောရဲခြင်းမှာ... ပထမအချက်အနေဖြင့် ကျန်းရုန်ဖေးသည် ထိုကဲ့သို့သော မိန်းကလေးမျိုး မဟုတ်ကြောင်း ယုံကြည်ထားခြင်းကြောင့်ဖြစ်ပြီး၊ ဒုတိယအချက်အနေဖြင့် ကျန်းရုန်ဖေး၏ နောက်ကွယ်တွင် သူမကို စောင့်ကြည့်ရန် လင်းရော့ကို တာဝန်ပေးထားသောကြောင့် ဖြစ်သည်။ 

ကျန်းရုန်ဖေးအနေဖြင့် ထိုကဲ့သို့ ပျက်စီးယိုယွင်းသော အပြုအမူမျိုးကို မပြုလုပ်နိုင်သော်လည်း…အကယ်၍ တကယ်ကြီး ပြုလုပ်ခဲ့မည်ဆိုလျှင်ပင် လင်းရော့ဆိုသည့် အာမခံချက်က ရှိနေသေးသည်။ ထို့ကြောင့် ရှောင်ပေ့အနေဖြင့် စိုးစဉ်းမျှ ထိတ်လန့်ခြင်း မရှိချေ။

"နင်..." ကျန်းရုန်ဖေး တစ်ခဏမျှ စကားအော်အ စွံ့အသွားရပြီး….ဒေါသတကြီးဖြင့် ဖုန်းကို ချက်ချင်း ချလိုက်တော့သည်။

ကျန်းရုန်ဖေးသည် ဖုန်းပြောစဉ်တွင် စပီကာ ဖွင့်ထားခဲ့သဖြင့်…. ဘေးနားရှိ ရွှီပင်းနင်းသည် သူတို့၏ စကားပြောသမျှ အားလုံးကို အတိုင်းသား ကြားခဲ့ရသည်။

"ဒီလူက နင့်ရဲ့ စရိုက်ကို အတော်လေး ကောင်းကောင်း သိထားပုံရတယ်… နင်က အဲဒီလို မိန်းမဆိုးလိုမျိုး မလုပ်နိုင်မှန်း သူ သိနေတော့... ဘာမှ ကြောက်ရွံ့စရာမရှိသလို ဖြစ်နေတာပေါ့" ရွှီပင်းနင်း မျက်မှောင်ကြုတ်ကာ သူမ၏ အချစ်ဆုံးသူငယ်ချင်း ကျန်းရုန်ဖေးအတွက် စိုးရိမ်ပူပန်သွားမိသည်။

"ငါ အခု ဘာလုပ်ရမလဲ… ငါ တကယ်ကြီး ယောက်ျားတစ်ယောက်ကို လျှောက်ရှာလို့မှ မရတာ" ကျန်းရုန်ဖေး စိတ်ပျက်လက်ပျက်ဖြင့် ဆိုလိုက်သည်။

"ငါ့မှာ ရည်းစားမရှိတာ နှမြောဖို့ကောင်းတယ်၊ မဟုတ်ရင်တော့ နင့်ကို ခေတ္တ ခနငှားပေးလို့ ရတာပေါ့" ရွှီပင်းနင်းသည် သူမ၏ သူငယ်ချင်းကို ဘယ်လိုနှစ်သိမ့်ရမှန်း မသိသဖြင့်၊ စိတ်ဓာတ်ကျနေသော အခြေအနေကို လျော့ပါးသွားစေရန် နောက်ပြောင်လိုက်ခြင်း ဖြစ်သည်။

ကျန်းရုန်ဖေးသည် ဤစကားကို ကြားသော်လည်း ရယ်မောခြင်းမရှိဘဲ သူမကို မျက်စောင်းသာ ထိုးလိုက်တော့သည်။

မူမိသားစု အိမ်တော်တွင်မူ... မူဟန်သည် အလွန် သဘောကျကာ ရယ်မောနေခဲ့သည်။

သူသည် လင်းရော့အား စနစ်ကို ပေးအပ်ထားခဲ့ပြီး ဖြစ်သဖြင့်… လင်းရော့၏ မြင်ကွင်းနှင့် ကြားရသမျှ အာရုံများကိုပါ အတူတူ မျှဝေခံစားခွင့် ရှိနေခဲ့သည်။ လင်းရော့သည် ကျန်းရုန်ဖေး၏ ဖုန်းကို စောင့်ကြည့်နေသဖြင့် ကျန်းရုန်ဖေး၏ စကားပြောသမျှကို အကုန်ကြားနိုင်ရာ၊ လင်းရော့မှတစ်ဆင့် မူဟန်သည် ကျန်းရုန်ဖေး၊ ရှောင်ပေ့နှင့် ရွှီပင်းနင်းတို့၏ စကားဝိုင်းကို သဘာဝအတိုင်း အတိုင်းသား ကြားနေရခြင်း ဖြစ်သည်။

လက်ရှိအချိန်တွင်... သူသည် ကျန်းရုန်ဖေးနှင့် ပတ်သက်ဆက်နွှယ်နိုင်ရန်အတွက် အခွင့်အရေးတစ်ခုကိုသာ လိုအပ်တော့သည်၊ ၎င်းမှာ ကျန်းရုန်ဖေး အန္တရာယ်နှင့် ကြုံတွေ့ရမည့် အချိန်ပင် ဖြစ်သည်။

ရှောင်ပေ့ကို အဝါရောင် ဦးထုပ်ဆောင်းပေးရမည့် (လင်ပြောင်ခံရစေမည့်) နေ့ရက်မှာ... လက်တစ်ကမ်း အကွာအဝေးသို့ ရောက်ရှိလာခဲ့ချေပြီ။