အခန်း (၁၆) - ရှောင်ချီ၊ သတ္တိရှိရှိနဲ့ ဖွင့်ပြောလိုက်စမ်း

မူဟန်၏ စီစဉ်ညွှန်ကြားမှုကို ကြားရသောအခါ လင်းရော့သည် အနည်းငယ် ဝေခွဲမရ ဖြစ်သွားခဲ့သည်။

ရှောင်ပေ့သည် လူသူတော်ကောင်းယောင်ဆောင်တတ်သူ တစ်ဦးဖြစ်ပြီး၊ သူကိုယ်တိုင်ကမူ အပြင်ထွက်၍ မိန်းမ ရှုပ်နေသော်လည်း ကျန်းရုန်ဖေးကိုမူ အိန္ဒြေစောင့်ထိန်းစေချင်သဖြင့် မိမိအား ကျန်းရုန်ဖေး၏ လှုပ်ရှားမှုများကို စောင့်ကြည့်ရန် စေခိုင်းခဲ့ခြင်း ဖြစ်သည်။

သို့ဆိုလျှင် မူဟန်၏ ရည်ရွယ်ချက်က ဘာလဲ…သူက ကျန်းရုန်ဖေးအပေါ် တစ်စုံတစ်ခု ကြံစည်နေခြင်းလော။

သို့သော်လည်း လင်းရော့သည် မူဟန်၏ ရည်ရွယ်ချက်များကို ဂရုမစိုက်ပါ… သူမသည် မိမိကိုယ်ကိုယ် ပိုမိုသန်မာလာစေရန်သာ အလေးထားပြီး ကျန်ရှိသောအရာများမှာ သူမအတွက် အရေးမကြီးချေ။

"ရှောင်ပေ့ကိုတော့ ဘယ်လိုလုပ်ရမလဲ ကျန်းရုန်ဖေးရဲ့ သွားလာလှုပ်ရှားမှုတွေကို သူ့ဆီ သတင်းပို့ဖို့ လိုသေးလား" လင်းရော့က လှမ်း၍ မေးမြန်းလိုက်သည်။

"သတင်းပို့ပါ… ဒါပေမယ့် သတင်းမပို့ခင် ကျွန်တော့်ရဲ့ သဘောထားကို အရင်မေးဦး… သူ့ကို အကုန်လုံး လျှောက်မပြောနဲ့" မူဟန်က ဆိုလိုက်သည်။

"ရှင့်ဘက်ကနေ ရှောင်ပေ့ကို ပြန်ကိုင်တွယ်ဖို့ ကျွန်မကို သူလျှိုနှစ်ဖက်ချွန် လုပ်ခိုင်းတာပေါ့ ဟုတ်လား" လင်းရော့ အနည်းငယ် သဘောပေါက်သွားပုံ ရသည်။

"ကျန်းရုန်ဖေးနဲ့ ကျွန်တော်နဲ့က အစကတည်းက ဘာမှပတ်သက်တာ မဟုတ်ဘူး… သူက အကြောင်းပြချက်မရှိဘဲ ကျွန်တော့်ကို ခြိမ်းခြောက်ဖို့ လူလွှတ်တာက တကယ်ကို အဓိပ္ပာယ်မရှိတာပဲ… သူက ကျွန်တော်ကပဲ သူ့မိန်းမကို လုယူမလို့ စိုးရိမ်နေတာလား… ကျွန်တော်ကတော့ အလကားသက်သက် အစွပ်စွဲမခံနိုင်ဘူး" 

မူဟန်က ငြင်းဆိုခြင်း မပြုခဲ့ပါ။ 

အဘယ်ကြောင့်ဆိုသော် လင်းရော့သည် လူအ မဟုတ်သဖြင့် သူမ စဉ်းစားကြည့်ရုံဖြင့် ရိပ်မိနိုင်သောကြောင့် ဖြစ်သည်။

လင်းရော့သည် မည်သည့်မှတ်ချက်မျှ ထပ်မံမပေးခဲ့ချေ။ ယခင်အတိုင်းပင်... သူမသည် ပိုမိုသန်မာလာရန်သာ စိတ်ဝင်စားပြီး တခြားအရာများကို ဂရုမစိုက်ပါ။

ပထမဆုံးအကြိမ် အလုပ်တာဝန်ကို ပြီးမြောက်ခဲ့ခြင်းကြောင့် စွမ်းရည်များ တိုးတက်လာသည့် အရသာကို သူမ ကောင်းစွာ မြည်းစမ်းခဲ့ရပြီး ဖြစ်သည်။ 

ထို့ကြောင့် လင်းရော့သည် စနစ်၏ လမ်းညွှန်ချက်များကို သဘာဝအတိုင်း ယုံကြည်သွားခဲ့ချေပြီ။ 

စနစ်၏ ဆုံးဖြတ်ချက်အရ မူဟန်၏နောက်သို့ လိုက်ခြင်းက သူမကို ပိုမိုသန်မာလာစေနိုင်သဖြင့် သူမအနေဖြင့် မူဟန်ခိုင်းသမျှကိုသာ လုပ်ဆောင်ရန် ဆုံးဖြတ်လိုက်သည်။

မူဟန်နှင့် လင်းရော့တို့သည် ဆက်သွယ်ရလွယ်ကူစေရန် ဖုန်းနံပါတ်ချင်း လဲလှယ်လိုက်ကြပြီးနောက်… မူဟန်သည် ကားထဲသို့ ပြန်လည်ဝင်ရောက်ကာ အငှားယာဉ်မောင်းအား ကားမောင်းထွက်ခိုင်းလိုက်တော့သည်။

လင်းရော့သည် မူဟန် ထွက်ခွာသွားသည်ကို စောင့်ကြည့်ပြီးနောက် ရှောင်ပေ့၏ ဖုန်းနံပါတ်ကို လှမ်း၍ ခေါ်ဆိုလိုက်သည်။

"ကိစ္စက ပြီးပါပြီ… အဲဒီလူက အရမ်းကြောက်သွားတာမလို့ လိပ်ပြာတောင် လွင့်မတတ်ပဲ… နောက်ဆိုရင် သူ ကျန်းရုန်ဖေးကို မြင်တာနဲ့ ပတ်ပြေးမှာ သေချာတယ်" လင်းရော့က ဆိုလိုက်သည်။

"တော်တယ်" ရှောင်ပေ့က ဆက်လက်၍ မေးမြန်းသည် .... "ဒါဆို ငါ့မိန်းမကော…သူမ အခု ဘယ်မှာလဲ… အိမ်ကို ပြန်သွားပြီလား"

"သူမရဲ့ အချစ်ဆုံးသူငယ်ချင်း ရွှီပင်းနင်းရဲ့ အိမ်ကို သွားပါတယ်… ဒီညတော့ အဲဒီမှာပဲ တည်းခိုလိမ့်မယ် ထင်တယ်" လင်းရော့သည် ကျန်းရုန်ဖေး၏ ဖုန်းထဲတွင် တိတ်တဆိတ် ခြေရာခံကိရိယာနှင့် အသံဖမ်းစက်များကို ကြိုတင်တပ်ဆင်ထားခဲ့ခြင်း ဖြစ်သည်။ 

ထို့ကြောင့် လင်းရော့သည် ကျန်းရုန်ဖေး၏ သွားလာမှုများနှင့် ဘေးနားရှိလူများနှင့် စကားပြောသမျှ အကြောင်းအရာများကို အကုန်သိရှိနေခဲ့သည်။

လင်းရော့၏ သတင်းပို့ချက်ကို ကြားရသောအခါ ရှောင်ပေ့ စိတ်အေးသွားပြီး ဖုန်းကို ချလိုက်သည်။

ထိုအချိန်တွင် သူသည် ဘား တစ်ခု၌ ရောက်ရှိနေပြီး ပြင်းထန်သော အရက်ခွက်ကို ကိုင်ဆောင်ကာ ဘေးပတ်ဝန်းကျင်ရှိ လှပသော အမျိုးသမီးများကို လိုက်လံကြည့်ရှုနေခဲ့သည်။ 

သူသည် အရင်တုန်းက နိုင်ငံခြားတွင် ဓားသွားထက်၌ သွေးစွန်းသော ဘဝကို ဖြတ်သန်းခဲ့ရသူ ဖြစ်သည်။ယနေ့ကုန်လွန်သွားပါက မနက်ဖြန်ဆိုသည်မှာ ရှိမရှိ မသေချာသဖြင့် စိတ်အပန်းဖြေသည့် အခါတိုင်းတွင် သူသည် ကာမဂုဏ်ခံစားမှုများ၌ အမြဲတမ်း နစ်မွန်းတတ်သည်။

ဤကဲ့သို့သော ဘဝမျိုးကို ကျင့်သားရနေခဲ့သဖြင့် ပြည်တွင်းသို့ ပြန်ရောက်လာပြီးနောက်တွင်လည်း ဤအကျင့်ကို မပြင်နိုင်ခဲ့ချေ။ သူသည် တစ်ရက်မျှ မိန်းကလေးတစ်ယောက်နှင့် မထိတွေ့ရပါက တစ်ကိုယ်လုံး နေမထိထိုင်မသာ ဖြစ်နေတတ်သည်။ ဘားများသည် သူ မကြာခဏ လာတတ်သော နေရာများ ဖြစ်သည်…အဘယ်ကြောင့်ဆိုသော် ဒီနေရာကို လာကြသူအများစုမှာ ပျော်ပါးရန် သက်သက်သာဖြစ်ပြီး မည်သည့် တာဝန်ယူမှုကိုမျှ ပြုလုပ်ရန် မလိုအပ်သောကြောင့် ဖြစ်သည်။ မိုးလင်းသွားသည်နှင့် တစ်ဦးကိုတစ်ဦး လိုက်လံနှောင့်ယှက်ကြေး မရှိချေ။

ရှောင်ပေ့၏ ရုပ်ရည်မှာ မင်းသားတစ်ပါးလို ချောမောလှပခြင်း မရှိသော်လည်း…သူ၏ ခန္ဓာကိုယ် တည်ဆောက်ပုံမှာ မြင့်မားထွားကျိုင်းပြီး ကြံ့ခိုင်သော ယောက်ျားပီသသည့် ပုံစံမျိုး ဖြစ်သည်။ 

ထို့ကြောင့် သူသည် အချို့သော မိန်းကလေးများအတွက် ဆွဲဆောင်မှု အပြည့်ရှိနေဆဲ ဖြစ်သည်။ အခြေခံအားဖြင့် သူ ဘားသို့ လာသည့် အကြိမ်တိုင်းတွင် လက်ဗလာဖြင့် ပြန်ရလေ့မရှိချေ။

ရှောင်ပေ့သည်လည်း ဤဘဝကို ပြောင်းလဲရန် စဉ်းစားဖူးသော်လည်း ကျန်းရုန်ဖေး၏ လက်ဖျားကိုပင် ထိတွေ့ရန် မဆိုထားနှင့်၊ သူမ၏ မျက်နှာကို မြင်တွေ့ရရန်ပင် ခက်ခဲလွန်းလှသည်။ အကယ်၍ သူ အခြေချလိုပါက ကျန်းရုန်ဖေးအနေဖြင့် ဇနီးတစ်ယောက်၏ တာဝန်ကို ကောင်းစွာ ထမ်းဆောင်ရမည် ဖြစ်သည်။

မူဟန် အိမ်သို့ ပြန်ရောက်ပြီးနောက် ရေချိုးလိုက်ရာ အရက်အရှိန်မှာ အကုန်ပြယ်သွားခဲ့ချေပြီ။ သူသည် အလုပ်တာဝန်တစ်ခုကို သတ်မှတ်ကာ ရွှီရို၏ စနစ်ထံသို့ ပေးပို့လိုက်သည်။

【 အလုပ်တာဝန် မာတိကာ - သမီးငယ်လေးကို မူဟန့်ထံသို့ ဝန်ခံစကား ပြောခိုင်းပြီး အချစ်ရေး ဆက်ဆံရေးတစ်ခုကို တည်ဆောက်စေပါ 】

【 အချိန်ကန့်သတ်ချက် - ၂၄ နာရီ 】

【 အလုပ်တာဝန် ဆုလာဘ် - ဆွဲဆောင်မှုအမှတ် ၄ မှတ် တိုးမြင့်ခြင်း 】

ဝရန်တာတွင် အဝတ်လှမ်းနေသော ရွှီရိုသည် အလုပ်တာဝန်အသစ် ရောက်ရှိလာကြောင်း အကြောင်းကြားချက်ကို ရရှိသွားပြီးနောက်၊ ရွှီပင်းနင်းကို စကားပြောရန် လှမ်းခေါ်လိုက်တော့သည်။

"သမီးနဲ့ မူဟန်နဲ့ကြားထဲမှာ အခြေအနေတွေ ဘယ်လိုရှိလဲဟင်" ရွှီရိုက လှမ်းမေးလိုက်သည်။

"ဒီနေ့ သမီးတို့ အတူတူ ထမင်းစားပြီး စကားတွေ အများကြီး ပြောဖြစ်ကြတယ်" ရွှီပင်းနင်းက အနည်းငယ် ရှက်ရွံ့စွာဖြင့် ဆိုလိုက်သည်။

"ဒါဆိုရင် သူက သမီးအပေါ် အဲဒီလို စိတ်ကူးမျိုး ရှိနေတယ်လို့ကော ခံစားရလား"

"သမီး ထင်တာတော့... နည်းနည်းတော့ ရှိမယ်ထင်တယ်"

"ကြည့်ရတာ သမီးတို့နှစ်ယောက်စလုံးက အပြန်အလှန် သဘောကျနေကြတာပဲ…အဲဒါ တကယ်ကို ကောင်းတာပေါ့…ဒါဆိုရင်လည်း သမီးတို့နှစ်ဦးကြားက အချစ်ရေး ဆက်ဆံရေးကို အမြန်ဆုံး တည်ဆောက်လိုက်တာက ပိုကောင်းမယ်။ ဒီလောက် ကောင်းတဲ့ယောက်ျားလေးကို တခြားမိန်းကလေးတွေ လုမသွားစေနဲ့ဦး" ရွှီရိုက တိုက်တွန်းလိုက်သည်။

"အကယ်၍ သူက သမီးကို ဖွင့်ပြောလာရင်တော့... သမီးသဘောတူမှာပါ" ရွှီပင်းနင်း မျက်နှာလေး နီမြန်းကာ ဆိုလိုက်သည်။

"ဒီလိုကိစ္စမျိုးက ယောက်ျားလေးဘက်က စဖို့ပဲ လိုတာမှ မဟုတ်တာ သမီးဘက်ကလည်း ပိုပြီး တက်ကြွလှုပ်ရှားပြီးတော့  သဘောကျတဲ့အကြောင်း တိုက်ရိုက် ဖွင့်ပြောလို့ရတာပဲ"

"သမီးက မိန်းကလေးပဲဟာကို… ယောက်ျားလေးတစ်ယောက်ကို သွားပြီး ဖွင့်ပြောရမှာက...သိက္ခာမရှိသလို ဖြစ်နေမှာပေါ့"

"သမီး စာတွေ အများကြီး ဖတ်ထားတာ အလကားပဲ… အခုခေတ်မှာ ကျား…မ တန်းတူညီမျှမှုကို အော်နေကြတာ မဟုတ်ဘူးလား… ဘာဖြစ်လို့ မိန်းကလေးတွေဘက်က အစပြုပြီး ဖွင့်မပြောနိုင်ရမှာလဲ။ အမေတို့တုန်းကလည်း အမေကပဲ အရင် ဖွင့်ပြောခဲ့လို့ ရှောင်ဖုန်းရဲ့ အဖေနဲ့ ညားခဲ့တာပေါ့။ 

အချို့ယောက်ျားလေးတွေက အချစ်ရေးနဲ့ ပတ်သက်ရင် အတော်လေး ထုံအကြတာ။ အကယ်၍ သမီးကသာ သူ ဖွင့်ပြောမှာကို ထိုင်စောင့်နေရင် ဘယ်လောက်တောင် ကြာဦးမလဲ မသိဘူး"

ဒုတိယစာကြောင်းမှာ ရွှီရို၏ လိမ်ညာထားသော စကားသက်သက်သာ ဖြစ်သည်။ သူမသည် ချင်ဖုန်း ၏ ဖခင်နှင့် အောင်သွယ်ပေးစားမှုအရ တွေ့ဆုံခဲ့ခြင်းဖြစ်ပြီး…သူ၏အပေါ်တွင် မည်သည့် အချစ်စိတ်မျှ မရှိခဲ့ဖူးချေ။( ဟေး ဟေး…စာရေးဆရာက အဲ့လောက်လမ်းကြောင်း ပြီဆိုရင် ခေါင်ထိ အကုန် ဖြစ်တော့မယ်ထင်တယ် )

"မေမေက အရင်တုန်းက အဲဒီလောက်တောင် သတ္တိရှိခဲ့တာလား... သမီး လုံးဝ မသိခဲ့ဘူးပဲ" ရွှီပင်းနင်းက သူမ၏ မိခင်ကို အံ့သြစွာ ကြည့်ကာ မယုံနိုင်အောင် ဖြစ်နေခဲ့သည်။

"အမေ အဲဒီတုန်းက ငယ်သေးတာဆိုတော့ စိုးရိမ်စရာတွေ အများကြီး မရှိခဲ့ဘူးလေ… ပြီးတော့ လူတစ်ယောက်ကို သဘောကျတာက ရှက်စရာကိစ္စမှ မဟုတ်တာ" ရွှီရိုက ဆိုလိုက်သည်။

"သမီး ခဏလောက် စဉ်းစားပါရစေဦး" ရွှီပင်းနင်းက တွေဝေစွာ ဆိုလိုက်သည်။

ရွှီရိုက စိတ်မရှည်စွာဖြင့် ပြောသည် .... "သမီး က ပိုပြီး စဉ်းစားလေလေ၊ ပိုပြီး သတ္တိနည်းလေလေ ဖြစ်မှာပဲ သွားသာ လုပ်လိုက်စမ်းပါ… ဒါက သမီး ကုမ္ပဏီ ထောင်ခဲ့တုန်းက ကိစ္စလိုမျိုးပဲလေ… အကယ်၍ သမီး မှာ သတ္တိနဲ့ ပြတ်သားမှု မရှိခဲ့ရင် သမီး အောင်မြင်နိုင်ပါ့မလား အချစ်ရေးကလည်း စီးပွားရေးလုပ်ငန်း စတင်တာနဲ့ သဘောတရားချင်း အတူတူပါပဲ"

"အမေ သမီး အတွက် ဗေဒင် တွက်ပေးထားပြီးပြီ… နင်က မိဿရာသီဖွား မဟုတ်လား မနက်ဖြန်က နင့်ရဲ့ ဒီနှစ်အတွင်းမှာ အချစ်ရေးကံ အကောင်းဆုံးနေ့ပဲ… အဲဒီအချိန်ကျမှ ဖွင့်ပြောရင်တော့ သေချာပေါက် အားစိုက်ရတာ တစ်ဝက်သက်သာပြီး အကျိုးသက်ရောက်မှုက နှစ်ဆ ဖြစ်လိမ့်မယ်"

ရွှီရို၏ အလုပ်မှာ ထိုမျှ မရှုပ်သဖြင့် သူမ ပျင်းသည့်အခါတိုင်း ရာသီခွင် ဗေဒင်များကို လေ့လာလေ့ရှိသည်။ 

ရွှီပင်းနင်းကလည်း ဤအချက်ကို ကောင်းစွာ သိရှိထားသည်….ထို့ကြောင့် ရွှီရို ပြောသည်ကို ကြားသောအခါ ရွှီပင်းနင်း စိုးစဉ်းမျှ မသံသယဖြစ်တော့ချေ။

"မေမေ... ဒါဆိုရင် သမီး ဘယ်လိုလုပ်ရမလဲ ဖုန်းထဲကပဲ ပြောရမလား…ဒါမှမဟုတ် လူချင်းတွေ့ပြီး ပြောရမလား" ရွှီပင်းနင်းသည် ရွှီရို၏ တိုက်တွန်းမှုကြောင့် စိတ်လှုပ်ရှားလာခဲ့ပြီး ဤအခွင့်အရေးကို လက်လွတ်မခံချေ။

"မနက်ဖြန်ညက မီးရှူးမီးပန်း ပွဲတော် ရှိတယ်လေ…ယွီကျီကျိုး  မှာ သေချာပေါက် အတော်လေး စည်ကားလိမ့်မယ်" ရွှီရိုက ခေတ္တမျှ စဉ်းစားပြီး အကြံပြုလိုက်သည်။

ထန်ကျိုး တွင် နှစ်စဉ် မီးရှူးမီးပန်း ပွဲတော် အနည်းငယ် ရှိတတ်ပြီး… ၎င်းမှာ အလွန် ရင်ခုန်စရာကောင်းသော နေရာတစ်ခု ဖြစ်သည်။ 

ရွှီပင်းနင်းနှင့် ကျန်းရုန်ဖေးတို့သည်လည်း ထိုနေရာသို့ အကြိမ်အနည်းငယ် ရောက်ဖူးကြပြီး၊ စုံတွဲများ အချင်းချင်း ဖွင့်ပြောကြသည့် မြင်ကွင်းများကိုပင် ကိုယ်တိုင် မြင်တွေ့ဖူးခဲ့သည်။ အချို့မှာ ကျရှုံးခဲ့ပြီး အချို့မှာမူ အောင်မြင်ခဲ့ကြသည်။

ခေတ္တမျှ တွေဝေပြီးနောက် ရွှီပင်းနင်းသည် ဖုန်းကို ထုတ်ယူကာ မူဟန့်ထံသို့ မက်ဆေ့ခ်ျတစ်စောင် ပို့လိုက်ပြီး မနက်ဖြန် မီးရှူးမီးပန်း ပွဲတော်သို့ သွားရန် လှမ်း၍ ဖိတ်ခေါ်လိုက်တော့သည်။

မူဟန် မက်ဆေ့ခ်ျကို ရရှိသောအခါ ချက်ချင်းပင် ပြန်လည် တုံ့ပြန်လိုက်ပြီး ရွှီပင်းနင်း၏ ဖိတ်ခေါ်မှုကို လက်ခံလိုက်သည်။ ရွှီပင်းနင်း  ဝမ်းသာသွားခဲ့ပြီး အိပ်ခန်းထဲသို့ ပြန်လာခဲ့သည်။

ထိုအချိန်တွင် ကျန်းရုန်ဖေးသည် ရေချိုးပြီးခါစဖြစ်ကာ ရွှီပင်းနင်း၏ ညအိပ်ဝတ်စုံကို ဝတ်ဆင်ထားခဲ့သည်။

"အန်တီရွှီက ဘာဖြစ်လို့လဲမသိဘူး။ ပြီးခဲ့တဲ့အကြိမ် ငါတွေ့တုန်းကထက်စာရင် အများကြီး ပိုပြီး နုပျိုလာသလိုပဲ" ကျန်းရုန်ဖေးက ရွှီပင်းနင်းကို အံ့သြစွာ လှမ်းမေးလိုက်သည်။

"ငါလည်း သေချာမသိဘူး…အမေရဲ့ ခန္ဓာကိုယ် ဖွဲ့စည်းပုံကြောင့်ထင်တယ် အမေက ရုတ်တရက်ကြီး ဒုတိယအကြိမ် ပြန်ပြီး နုပျိုလာသလိုပဲ"

"ခန္ဓာကိုယ် ဖွဲ့စည်းပုံကြောင့် ဟုတ်လား... အင်း…ငါကတော့ အန်တီဆီက အထူး အသားအရေ ထိန်းသိမ်းနည်းတွေ ရှိမလားလို့ မေးမလို့ပဲ"

ရွှီရို၏ အကြောင်းကို ခေတ္တမျှ စကားစမြည် ပြောဆိုပြီးနောက်…ကျန်းရုန်ဖေးသည် အကြောင်းအရာကို မိမိဘက်သို့ ပြန်လှည့်လိုက်ပြီး သူမ၏ စိတ်အနှောင့်အယှက်ဖြစ်စရာများကို ရင်ဖွင့်လေတော့သည်။

ကျန်းရုန်ဖေးအနေဖြင့် ထိုလက်ထပ်စာချုပ်ကို ချုပ်ဆိုခဲ့ရခြင်းမှာ အိမ်ထောင်ရေး ကတိကဝတ်ကြောင့် သက်သက်မဟုတ်ဘဲ၊ သူမ၏ ဖခင်တွင် ကုသမရနိုင်သော ရောဂါဆိုးကြီး ခံစားနေရသောကြောင့် ဖြစ်သည်။ သူမ၏ ဖခင်ကို နောင်တမရစေချင်သောကြောင့် သမီးလိမ္မာလေးဖြစ်သည့် ကျန်းရုန်ဖေးက အလျှော့ပေးခဲ့ခြင်း ဖြစ်သည်။

သို့သော်လည်း မနေ့ကတင် ကျန်းရုန်ဖေးသည် သူမ၏ ဖခင်ဖြစ်သူက သူမကို လှည့်စားရန်အတွက် ရောဂါဖြစ်ဟန်ဆောင်ခဲ့ခြင်း ဖြစ်ကြောင်း သိရှိသွားခဲ့ရသည်။