အခန်း (၁၅) - ဇာတ်လိုက်၏ လက်အောက်ခံကို မိမိဘက်ပါအောင် သိမ်းသွင်းခြင်း

​လည်ပင်းတွင် ဓားဖြင့် တေ့ခြင်းခံထားရသော်လည်း မူဟန်သည်  စနစ် ရှိနေသောကြောင့် စိုးစဉ်းမျှ ထိတ်လန့်တုန်လှုပ်ခြင်း မရှိဘဲ တည်ငြိမ်နေခဲ့သည်။

​မူဟန်သည် ရှေ့မှ အမျိုးသမီးကို အကဲခတ်ကြည့်လိုက်သည်။ သူမသည် အသက် ၂၀ ဝန်းကျင်ခန့်သာ ရှိသေးပြီး အတော်လေး လှပသော်လည်း သူမ၏ မျက်ဝန်းများတွင်မူ လူကို ချမ်းစိမ့်သွားစေနိုင်သည့် ခက်ထန်ရက်စက်သော အရိပ်အယောင်များ ယှက်သန်းနေသည်။ 

ရုပ်ရည်ပိုင်းအရ ပြောရလျှင်မူ သူမသည် ရွှီပင်းနင်းနှင့် ကျန်းရုန်ဖေးတို့လောက် အဆင့်မမီသဖြင့် သေချာပေါက် ဇာတ်လိုက်မင်းသမီး တော့ မဟုတ်နိုင်ချေ။

​သို့သော် ပိုမိုသေချာစေရန်အတွက် မူဟန်သည် စနစ်နှင့် ဆက်သွယ်ကာ ထိုအမျိုးသမီး၏ အချက်အလက်များကို ကြည့်ရှုရန် ရွေးချယ်လိုက်သည်။

​【 ဇာတ်ပို့ဇာတ်ရုပ် - လင်းရော့ 】

【 ဆွဲဆောင်မှုအမှတ် - ၈၅ 】

【 တိုက်ခိုက်ရေးစွမ်းရည် - ၃၁၉ 】

【 ဇာတ်ပို့ရောင်ဝါအမှတ် - ၃၉ 】

【 စွမ်းရည်များ - အလယ်အလတ်အဆင့် တိုက်ခိုက်ရေးစွမ်းရည်၊ အလယ်အလတ်အဆင့် သေနတ်ပစ်ကျွမ်းကျင်မှု၊ အလယ်အလတ်အဆင့် လုပ်ကြံသတ်ဖြတ်မှုစွမ်းရည် 】

【 စရိုက်လက္ခဏာ - သွေးအေးခြင်း၊ သန်မာလာစေရန်အတွက် မည်သည့်အရာကိုမဆို လုပ်ဆောင်ရဲခြင်း၊ အရာအားလုံးကို စွန့်လွှတ်အနစ်နာခံရဲခြင်း 】

【 ကံကြမ္မာ - မွေးရာပါ လုပ်ကြံသတ်ဖြတ်သူ 】

【 အိမ်ရှင်အပေါ် ထားရှိသော နှစ်သက်မှုအမှတ် - ၀ 】

【 လတ်တလော စိုးရိမ်ပူပန်မှု - ဇာတ်လိုက် ရှောင်ပေ့ ၏ အစီအစဉ်အရ ကျန်းရုန်ဖေးကို တိတ်တဆိတ် ကာကွယ်ပေးနေရခြင်းမှာ အလွန် ပျင်းစရာကောင်းနေခြင်း 】

【 လတ်တလော အလိုချင်ဆုံးအရာ - သန်မာလာဖို့၊ သန်မာလာဖို့၊ ပိုပြီး သန်မာလာဖို့ 】

​လင်းရော့၏ အချက်အလက်များကို ကြည့်ပြီးနောက် မူဟန် စိတ်ထဲတွင် တိတ်တဆိတ် ဝမ်းသာသွားခဲ့သည်။ လင်းရော့၏ ဇာတ်ကောင်ရောင်ဝါအမှတ်မှာ သူ့ထက် နိမ့်ပါးနေသည့်အပြင် သူမ၌ သန်မာလိုစိတ် ပြင်းပြနေခြင်းက စနစ်လက်ဆောင်ပေးရန်အတွက် ဒုတိယမြောက် ပစ်မှတ်အဖြစ် အလွန်ပင် သင့်လျော်လှပေသည်။

​မူဟန် မဆိုင်းမတွဘဲ လင်းရော့ထံသို့ စနစ်တစ်ခုကို တိုက်ရိုက် ပေးပို့လိုက်တော့သည်။

​"ကျန်းရုန်ဖေးဆိုတဲ့ မိန်းမနဲ့ ဝေးဝေးမှာ နေစမ်း... မဟုတ်ရင်တော့..." လင်းရော့က သူမ၏ ရည်ရွယ်ချက်ကို ပြတ်ပြတ်သားသားနှင့် လိုရင်းတိုရှင်း ပြောရန် ပြင်လိုက်သော်လည်း…စကားမဆုံးမီမှာပင် သူမ၏ ဦးနှောက်ထဲ၌ ထူးဆန်းသော အသံအချို့ ရုတ်တရက် မြည်ဟီးလာခဲ့သည်။

​လင်းရော့ ခေတ္တမျှ ဆွံ့အသွားပြီးနောက် အခြေအနေကို ချက်ချင်း သဘောပေါက်သွားခဲ့သည်… သူမတွင် စနစ်တစ်ခု ရရှိသွားခဲ့ပြီ ဖြစ်ပြီး… စနစ်က ပေးအပ်သော အလုပ်တာဝန်များကို ပြီးမြောက်အောင်မြင်ရုံဖြင့် သူမ စဉ်ဆက်မပြတ် သန်မာလာနိုင်တော့မည် ဖြစ်သည်။

​သူမသည် မူဟန့်ကို ခြိမ်းခြောက်နေသည့် စကားများကိုပင် ဂရုမစိုက်တော့ဘဲ စနစ်နှင့် စိတ်မရှည်စွာ ဆက်သွယ်ကာ အလုပ်တာဝန်တစ်ခု ချက်ချင်း ပေးအပ်ရန် တောင်းဆိုလိုက်တော့သည်။

​【 အလုပ်တာဝန်အကြောင်းအရာ - ရှင့်ရဲ့ရှေ့မှာ ရှိနေတဲ့သူကတော့ ကောင်းကင်ဘုံရဲ့ စောင့်ရှောက်မှုကို ခံထားရတဲ့ ကိုးဘဝလုံးလုံး လူကောင်းဖြစ်ခဲ့သူရဲ့ လူဝင်စားပဲ ဖြစ်တယ်။ သူ့နောက်ကို လိုက်ရုံနဲ့ ရှင်ဟာ ကံကောင်းခြင်းတွေကို ရရှိပြီး စဉ်ဆက်မပြတ် သန်မာလာနိုင်လိမ့်မယ် 】

【 အလုပ်တာဝန် မာတိကာ - သူ့ကို ရှင့်ရဲ့ သခင်အဖြစ် စိတ်ရင်းမှန်နဲ့ အသိအမှတ်ပြုပြီး သူခိုင်းသမျှကို လုပ်ဆောင်ပါ 】

【 အချိန်ကန့်သတ်ချက် - မိနစ် ၃၀ 】

【 အလုပ်တာဝန် ဆုလာဘ် - အဆင့်မြင့် ဘက်စုံတိုက်ခိုက်ရေးစွမ်းရည် 】

​လင်းရော့သည် တွေဝေမနေဘဲ အလုပ်တာဝန်ကို လက်ခံရန် တိုက်ရိုက် ရွေးချယ်လိုက်ပြီး… မူဟန့်လည်ပင်းတွင် တေ့ထားသော ဓားမြှောင်ငယ်ကို ချက်ချင်း ပြန်လည်ရုပ်သိမ်းလိုက်သည်။

​"တောင်းပန်ပါတယ်... စောစောက ကိစ္စက နားလည်မှုလွဲသွားတာပါ" လင်းရော့သည် သူမကိုယ်သူမ ပိုမို ယဉ်ကျေးပျူငှာသူအဖြစ် ပေါ်လွင်စေရန် အတတ်နိုင်ဆုံး ကြိုးစား၍ ပြုံးပြလိုက်သည်။

​"နားလည်မှုလွဲတာ ဟုတ်လား... ကျွန်‌ တော့် လည်ပင်းကို ဓားနဲ့တေ့ထားတာကို နားလည်မှုလွဲတာလို့ ပြောရလား" 

မူဟန်သည် သူမကို ကိုယ်ထိလက်ရောက် တိုက်ခိုက်၍ မနိုင်သော်လည်း အသာစီးရသော အနေအထားကို ပိုင်ဆိုင်ထားသဖြင့် လင်းရော့ကို သဘာဝအတိုင်း ကြောက်ရွံ့ခြင်း မရှိချေ။

​"ကျန်းရုန်ဖေးနဲ့ ဝေးဝေးမှာ နေဖို့ ရှင့်ကို သတိပေးခိုင်းလိုက်တာ ရှောင်ပေ့ပါ… ရှောင်ပေ့က ကျန်းရုန်ဖေးရဲ့ ခင်ပွန်းလေ" လင်းရော့က ရှောင်ပေ့ကို ချက်ချင်းပင် သစ္စာဖောက်၍ ဖွင့်ချလိုက်တော့သည်။ 

သူမ ရှောင်ပေ့အောက်တွင် အလုပ်လုပ်ရခြင်းမှာ ရိုးရိုးသားသား ပြောရလျှင် သူ၏ထံမှ ပညာရပ်များကို သင်ယူလို၍သာ ဖြစ်သည်။ 

သို့သော် ယခုအချိန်အထိ ရှောင်ပေ့သည် သူမအား မည်သည့်ပညာမျှ သင်ကြားပေးခဲ့ခြင်း မရှိချေ။ 

ထို့ကြောင့် လင်းရော့အနေဖြင့် ဤသည်ကို သစ္စာဖောက်ခြင်းဟုပင် သတ်မှတ်ခြင်း မရှိချေ။

​ထို့အပြင်... အကယ်၍ သစ္စာဖောက်ခြင်း ဖြစ်နေလျှင်ကော ဘာဖြစ်သနည်း။ 

သူမသည် သန်မာလာရန်အတွက်သာ လိုလားသူဖြစ်ရာ ကျန်ရှိသောအရာ အားလုံးကို စွန့်လွှတ်ပစ်နိုင်သည်။

​"ကျွန်တော်က ရှောင်ပေ့ဆိုတဲ့လူကို လုံးဝ မသိပါဘူး… သူက ဘယ်သူလဲ" မူဟန်က မေးလိုက်လိုက်သည်။

​လင်းရော့သည် မည်သည့်အရာကိုမျှ ဖုံးကွယ်ထားခြင်း မရှိဘဲ ပြန်လည်ဖြေကြားခဲ့သည် …

 "ရှောင်ပေ့က အရင်တုန်းက နိုင်ငံခြားမှာ ကြေးစားစစ်သား  လုပ်ခဲ့တာပါ ပြည်တွင်းကို ပြန်လာခဲ့တာ လအနည်းငယ်ပဲ ရှိသေးတယ်။ လူကြီးချင်း သဘောတူ ကတိပြုထားခဲ့တဲ့ အိမ်ထောင်ရေးအရ သူက ကျန်းရုန်ဖေးနဲ့ လက်ထပ်စာချုပ် ချုပ်ဆိုထားတာ ဖြစ်တယ်"

​"ကျန်းရုန်ဖေးက ရှောင်ပေ့ကို မုန်းပေမယ့်၊ ရှောင်ပေ့ကတော့ ကျန်းရုန်ဖေးကို အတော်လေး သဘောကျတယ်။ မကြာသေးခင်က ကျန်းရုန်ဖေးဆီကို ခြိမ်းခြောက်စာတစ်စောင် ရောက်လာခဲ့လို့ ရှောင်ပေ့က သူမ အန္တရာယ်ကြုံရမှာ စိုးရိမ်ပြီး ကျွန်မကို တိတ်တဆိတ် ကာကွယ်ပေးဖို့ စေခိုင်းထားတာပါ"

​ဤစကားကို ကြားရသောအခါ မူဟန်သည် ထိုရှောင်ပေ့ဆိုသူမှာ သတ်ဖြတ်ခြင်းများကို ငြီးငွေ့လာသဖြင့် အေးအေးဆေးဆေး နေထိုင်ရန် ပြန်လည်ရောက်ရှိလာသော "စစ်ဘုရင်" အမျိုးအစား ဇာတ်လိုက်ဖြစ်ကြောင်း ရာနှုန်းပြည့် သေချာသွားခဲ့သည်။ 

မူဟန်သည် စစ်ဘုရင်များနှင့် စီအီးအို စတိုင် အွန်လိုင်းဝတ္ထု အမြောက်အမြားကို ဖတ်ရှုဖူးသဖြင့် ထိုကဲ့သို့သော ဇာတ်လမ်းပုံစံများကို ကောင်းစွာ ရင်းနှီးပြီးသား ဖြစ်သည်။

​ကျန်းရုန်ဖေးနှင့် ရှောင်ပေ့တို့၏ လက်ရှိ ဆက်ဆံရေးကို ကြည့်ခြင်းအားဖြင့် ဇာတ်ကွက်မှာ စတင်ရုံသာ ရှိသေးပုံရသည်။ 

နောက်ထပ် ဖြစ်ပျက်လာမည့် ဇာတ်ကွက်များမှာ ကျန်းရုန်ဖေးသည် အန္တရာယ်များနှင့် ဆက်တိုက် ကြုံတွေ့ရမည်ဖြစ်ပြီး…စစ်ဘုရင် ဇာတ်လိုက်က သူမအတွက် ပြဿနာများကို ဖြေရှင်းပေးရင်းနှင့် သူမ၏ နှလုံးသားကို တဖြည်းဖြည်းချင်း ဖမ်းစားသွားမည့် ပုံစံမျိုး ဖြစ်ပေလိမ့်မည်။

​သဘာဝအတိုင်းပင် မူဟန်အနေဖြင့် ဤသည်ကို ငြိမ်ခံကြည့်နေမည် မဟုတ်ချေ။ ပထမဦးစွာ... သူသည် ဗီလိန်တစ်ဦး ဖြစ်ပြီး ဇာတ်လိုက်၏ သဘာဝရန်သူ ဖြစ်သည့်အတွက် ဇာတ်လိုက်ကို သက်တောင့်သက်သက်သာ ရှိစေမည် မဟုတ်ပေ။

​နောက်ထပ် အချက်တစ်ခုမှာ အငြိုးအတေးက စတင်ဖြစ်ပေါ်သွားခဲ့ပြီဖြစ်ရာ မူဟန်အနေဖြင့် ဤကဲ့သို့ တိတ်တဆိတ် အနစ်နာခံမည့်သူ မဟုတ်ချေ။ 

ရှောင်ပေ့က သူ့ကို ခြိမ်းခြောက်ရန် လူလွှတ်လိုက်ခြင်းက... ထိုကဲ့သို့သော ဇာတ်လမ်းတွဲများ၏ စကားအတိုင်း ပြောရလျှင် သေတွင်းထဲသို့ သက်သက် လှမ်းဝင်လိုက်ခြင်းသာ ဖြစ်သည်… သူ့ကို သေချာပေါက် အလဲထိုးပစ်ရမည်။

​ဟုတ်ပါသည်... ရှောင်ပေ့ကို အလွယ်တကူ သတ်ပစ်ရန် မလွယ်ကူကြောင်းကိုလည်း မူဟန် နားလည်သည်။ သူသည် လင်းရော့ကို မိမိဘက်ပါအောင် "ဆွဲဆောင်" နိုင်ခဲ့သော်လည်း…သူမသည် ရှောင်ပေ့ကို ယှဉ်နိုင်မည့်သူ မဟုတ်သေးချေ။

​"မင်းက ရှောင်ပေ့ လွှတ်လိုက်တဲ့သူ ဖြစ်နေတာကို... ဘာဖြစ်လို့ ကျွန်‌တော့်ကို ဒါတွေ အကုန်လုံး ပြောပြနေရတာလဲ" မူဟန် သူ၏ အတွေးများကို ဖုံးကွယ်ကာ မသိနားမလည်ဟန်ဖြင့် လင်းရော့ကို လှမ်းမေးလိုက်သည်။

​"ကျွန်မ ရှောင်ပေ့ဆီက ပိုက်ဆံယူပြီး အလုပ်လုပ်ပေးတာ မှန်ပေမယ့်… သူက ကျွန်မရဲ့ လစာကို ခဏခဏ ဖြတ်တောက်လွန်းလို့ စိတ်အနှောင့်အယှက် ဖြစ်ရတယ်….အခု ရှင့်ကို ဒါတွေ ပြောပြရတဲ့ အကြောင်းရင်းကတော့... ရှင့်ကို ကြည့်ရတာ ကျွန်မမျက်စိထဲမှာ သဘောကျလို့... ဒါကြောင့် ရှင့်ကို မနာကျင်စေချင်ဘူး…ဘာဖြစ်လို့လဲဆိုတော့ ရှင်က အရမ်း ချောလွန်းတယ်... ကျွန်မ တစ်သက်မှာ ဒီလောက်ချောတဲ့ ယောက်ျားတစ်ယောက်ကို တစ်ခါမှ မမြင်ဖူးဘူး" ဟု လင်းရော့က ဆိုလိုက်သည်။

​"ဒါဆိုရင်လည်း ကျေးဇူးတင်ရမှာပေါ့" လင်းရော့၏ အကြောင်းပြချက်မှာ အတော်လေး လွန်လွန်းလှသော်လည်း မူဟန်သည် အမှန်တရားကို သိရှိထားသဖြင့် ဆက်လက်၍ မေးမြန်းခြင်း မပြုတော့ချေ။

​"ရှင့်ကို ကြည့်ရတာလည်း ချမ်းသာတဲ့သူတစ်ယောက် ဖြစ်ပုံရတယ် ပြီးတော့ ကျွန်မရဲ့ စွမ်းရည်တွေကလည်း အတော်လေး ကောင်းမွန်တာမလို့... ကျွန်မကို သက်တော်စောင့်တစ်ယောက်အနေနဲ့ ငှားရမ်းဖို့ စဉ်းစားမလားဟင်" လင်းရော့က ဆက်လက်၍ ကမ်းလှမ်းလိုက်သည်။

​"မင်း ကိုငှားရမှာလား"

​"ဟုတ်တယ်"

​"မင်း ကျွန်တော်ရဲ့ ကားထဲကို ဘာသံမှမထွက်ဘဲ ခိုးဝင်လာနိုင်တာကို ကြည့်ရင် စွမ်းရည်ရှိတာတော့ မှန်ပါတယ်... ဒါပေမယ့် မင်းက ချက်ချင်းကြီး ဘက်ပြောင်းလိုက်တာဆိုတော့... ကျွန်‌ တော်က မင်းကို ဘယ်လိုလုပ် ယုံကြည်ရမှာလဲ"

​မူဟန်သည် လင်းရော့အား သူမ ရရှိထားသော စနစ်ဆိုသည်မှာ အမှန်စင်စစ် သူ၏လက်အောက်ခံ ကပ်ပါးစနစ်မျှသာ ဖြစ်ပြီး၊ စနစ်၏ "အရှင်သခင်" မှာ သူကိုယ်တိုင် ဖြစ်ကြောင်းကို မသိစေချင်သဖြင့် သင့်တော်သလို အကဲခတ် မေးခွန်းထုတ်လိုက်ခြင်း ဖြစ်သည်။

​ဤစကားကို ကြားသောအခါ လင်းရော့သည် စကားလုံး အနည်းငယ်မျှဖြင့် ယုံကြည်မှုရရန် ခက်ခဲကြောင်း နားလည်သွားသည်။ ခေတ္တမျှ တိတ်ဆိတ်သွားပြီးနောက်… သူမသည် ဓားမြှောင်ငယ်ကို ပြန်လည်ကောက်ယူကာ သူမ၏ လက်မောင်းကို ချက်ချင်း ဓားဖြင့် မွှန်းလိုက်တော့သည်။

​သူမ၏ လက်မောင်းထံမှ သွေးများ ပန်းထွက်လာခဲ့သော်လည်း လင်းရော့သည် မည်သည့် နာကျင်သည့် အမူအရာမျှ မပြဘဲ တည်ငြိမ်စွာ ကျိန်ဆိုလိုက်သည် …

 "အကယ်၍ ကျွန်မ ရှင့်အပေါ် သစ္စာဖောက်ခဲ့ရင်... မြေမြှုပ်သင်္ဂြိုဟ်မယ့် နေရာတောင် မရှိဘဲ သေပါစေ"

မင်း…မင်း…အံ့ဩချင်ယောင်ဆောင်လိုက်ကာ

​"မင်းရဲ့ စိတ်ရင်းမှန်ကို တွေ့ရပြီဆိုတော့... ဒီလိုလုပ်ကြတာပေါ့... အစမ်းခန့် ကာလ တစ်လကို လစာ နှစ်သောင်း…အတည်ပြု ဝန်ထမ်းဖြစ်သွားရင်တော့ လစာ ငါးသောင်း။ နင် လုပ်ချင်ရဲ့လား" မူဟန်က ဆိုလိုက်သည်။

​"လုပ်ပါ့မယ် ရှင်က အခုကစပြီး ကျွန်မရဲ့ သခင် ပဲ ကျွန်မနာမည်က လင်းရော့ ပါ"

​"သူဌေး လို့ ခေါ်ရမှာ မဟုတ်ဘူးလား"

​"တူတူပါပဲ... အဓိပ္ပာယ်ကတော့ အတူတူပါပဲ"

​"မင်း သဘောရှိသလို ခေါ်ပါ... အခေါ်အဝေါ် သက်သက်ပဲဥစ္စာ" မူဟန် အပေါ်ယံတွင်မူ မတတ်သာဘဲ လက်ခံလိုက်သည့်အလား ပြုမူလိုက်သည်။ 

သို့သော် အမှန်စင်စစ်တွင်မူ သူသည် "သခင်" ဆိုသည့် အခေါ်အဝေါ်ကို ပိုမို သဘောကျပြီး စိတ်ကျေနပ်မှု ရရှိစေသည်။

​မူဟန်နှင့် လင်းရော့တို့ "အလုပ်ခန့်ထားမှု သဘောတူညီချက်" ရရှိသွားသည်နှင့် တစ်ပြိုင်နက် လင်းရော့၏ အလုပ်တာဝန်မှာလည်း ပြီးမြောက်အောင်မြင်သွားခဲ့ပြီး သူမသည် အဆင့်မြင့် ဘက်စုံတိုက်ခိုက်ရေးစွမ်းရည်ကို ရရှိသွားခဲ့သည်။

​တစ်ပြိုင်တည်းမှာပင် မူဟန်သည်လည်း တုံ့ပြန်မှု ဆုလာဘ်ကို ရရှိခဲ့ပြီး၊ ၄ ဆ တိုးပွားနိုင်ခြေ ပွင့်သွားခဲ့ကာ သူ၏ အဆင့်မြင့် ဘက်စုံတိုက်ခိုက်ရေးစွမ်းရည်မှာ ထိပ်တန်းအဆင့် ဘက်စုံကိုယ်ခံပညာစွမ်းရည် သို့ အဆင့်မြှင့်တင်ခြင်း ခံလိုက်ရသည်။

​မူဟန်သည် ထိုစွမ်းရည်ကို တိုက်ရိုက် ထုတ်ယူ၍ အသုံးပြုလိုက်ရာ၊ တစ်ခဏအတွင်းမှာပင် အမျိုးမျိုးသော တိုက်ခိုက်ရေး နည်းစနစ်များကို တတ်မြောက်သွားခဲ့သည်။ 

သူ၏ အာရုံကြော တုံ့ပြန်မှု အရှိန်နှုန်းမှာ အလွန်အမင်း တိုးတက်ကောင်းမွန်လာခဲ့ပြီး ကြွက်သားများ၏ မှတ်ဉာဏ် ကိုလည်း စုပ်ယူနိုင်ခဲ့သည်။ သူသည် မည်သည့် လေ့ကျင့်ခန်းမျှ ပြုလုပ်ရန် မလိုဘဲ သာမန်လူတစ်ယောက် ဘဝမှ ထိပ်တန်းအဆင့် ဘက်စုံကိုယ်ခံပညာရှင်တစ်ဦးအဖြစ်သို့ ချက်ချင်း ကူးပြောင်းသွားခဲ့ချေပြီ။

​【 တိုက်ခိုက်ရေးစွမ်းရည် - ၅၅၉ 】

​တိုက်ခိုက်ရေးစွမ်းရည် အမှတ်မှာလည်း သိသိသာသာ တိုးမြင့်လာခဲ့သည်။ ဤအဆင့်သို့ ရောက်ရှိသွားပြီ ဖြစ်သဖြင့် လက်နက်မဲ့ တိုက်ခိုက်ရမည့် အခြေအနေမျိုးတွင် သူသည် စစ်ဘုရင်တစ်ဦးနှင့် ထိပ်တိုက်ရင်ဆိုင်ရန်ပင် စိုးရိမ်စရာ မရှိတော့ချေ။

​ထိုအချိန်တွင် မူဟန် ခေါ်ထားသော အငှားယာဉ်မောင်း ရောက်ရှိလာခဲ့သည်။ မူဟန်သည် ယာဉ်မောင်းအား ဘေးတွင် ခေတ္တမျှ စောင့်ဆိုင်းခိုင်းထားပြီး လင်းရော့အား ညွှန်ကြားလိုက်သည်…

 "ကျန်းရုန်ဖေးရဲ့ နောက်ကိုပဲ ဆက်ပြီး လိုက်နေပါ…သူမရဲ့ လှုပ်ရှားမှုတွေကို ငါ့ဆီ အချိန်မရွေး သတင်းပို့ရမယ် အကယ်၍ ကျန်းရုန်ဖေး အန္တရာယ် ကြုံရနိုင်တယ်လို့ ခံစားရရင် ငါ့ဆီကို ကြိုတင်ပြီး အကြောင်းကြားရမယ်"

​ဤသို့ ပြုလုပ်ရခြင်းတွင် အကြောင်းပြချက် နှစ်ခု ရှိသည်။

​ပထမအချက်မှာ လက်နက်မဲ့ အခြေအနေမျိုးတွင် သူသည် ယခုအခါ လင်းရော့ကို အလွယ်တကူ ကိုင်တွယ်နိုင်ပြီ ဖြစ်သဖြင့် သူမ၏ ကာကွယ်မှုကို ရယူရန် မလိုအပ်တော့ခြင်း ဖြစ်သည်။

​ဒုတိယအချက်မှာ ရှောင်ပေ့သည် လင်းရော့ မိမိဘက်သို့ ဘက်ပြောင်းသွားမှန်း မသိရှိသေးသဖြင့် သူမကို သူလျှို  တစ်ဦးအနေဖြင့် အပြည့်အဝ အသုံးချနိုင်မည့်အပြင် ကျန်းရုန်ဖေးနှင့် ပတ်သက်သည့် သတင်းအချက်အလက်များကို ရယူကာ ရှောင်ပေ့၏ နယ်မြေကိုပါ လုယူနိုင်မည် ဖြစ်သောကြောင့် ဖြစ်သည်။