အခန်း (၁၄) - စနစ်အသုံးပြုခွင့် အကြိမ်ရေ ပြန်လည်ပြည့်တင်းလာခြင်း

မူဟန်သည် ခေတ္တမျှ "ဝမ်းနည်းကြေကွဲ" ပြပြီးနောက်၊ ရွှီပင်းနင်း၏ နွေးထွေးလှသော ရင်ခွင်ထဲမှ သူ၏ဦးခေါင်းကို နှမြောတသစွာဖြင့် ဖြည်းညှင်းစွာ ပြန်လည်ရုပ်သိမ်းလိုက်ပြီး ပုံမှန်အခြေအနေသို့ ပြန်လည်ရောက်ရှိသွားဟန် ပြုမူလိုက်သည်။

"ကျွန်တော် လူပြက်တစ်ယောက်လို ဖြစ်သွားပြီ" မူဟန်က အနည်းငယ် ရှက်ရွံ့သွားသည့်အလား ဆိုလိုက်သည်။

"ကျွန်မက ဘာလို့ ရှင့်ကို ရယ်ရမှာလဲ" ရွှီပင်းနင်းက ခေါင်းကို ခါယမ်းကာ ငြင်းဆိုလိုက်ပြီး၊ သူမ၏ မျက်နှာထက်တွင် သနားစိုးရိမ်စိတ်များ ပိုမို ထင်ဟပ်နေခဲ့သည်….

 "ဒါ ကျွန်မအပြစ်ပါ ရှင့်ရဲ့ အတိတ်က ဒဏ်ရာဟောင်းတွေကို ကျွန်မ မမေးခဲ့သင့်ဘူး"

"အမှန်တော့ လွန်ခဲ့တဲ့ တစ်နှစ် နှစ်နှစ်လောက်ကတည်းက ကျွန်တော် အဲဒီအရိပ်မည်းတွေထဲကနေ ရုန်းထွက်နိုင်ခဲ့ပြီး အရာအားလုံးကို လက်လွှတ်ထားနိုင်ခဲ့ပါပြီ။ 

ပြီးတော့ ဒီအကြောင်းကို ကျွန်တော် ဘယ်သူ့ကိုမှလည်း မပြောပြဖူးပါဘူး၊ ဒါပေမယ့် ဆန်းဆန်းပြားပြားပဲ... မင်းက ကောက်ကာငင်ကာ လှမ်းမေးလိုက်တော့ ကျွန်တော်လည်း လွှတ်ခနဲ ပြောမိသွားတာပဲ" မူဟန်က ဆိုလိုက်သည်။

ရွှီပင်းနင်း စိတ်ထဲတွင် အလွန်ပင် လှုပ်ရှားသွားရသည် … "ရှင်က ဘာဖြစ်လို့ ကျွန်မကိုမှ ရွေးပြီး ပြောပြခဲ့တာလဲ"

မူဟန်သည် ရွှီပင်းနင်း အမှန်တကယ် သိချင်နေသောအရာကို ရိပ်မိသည်….သူမသည် မိမိကိုယ်ကိုယ် မူဟန့်အတွက် ထူးခြားသော မိန်းကလေးတစ်ယောက် ဖြစ်နေပြီလား ဆိုသည်ကိုသာ သေချာချင်နေခြင်း ဖြစ်သည်။

"ကျွန်တော်လည်း သေသေချာချာ မသိဘူး" မူဟန်က ဝေဝေဝါးဝါးပင် ပြန်လည်ဖြေကြားလိုက်သည်။

အဘယ်ကြောင့်ဆိုသော် ရွှီပင်းနင်းအား 'မင်းက ထူးခြားလို့ပေါ့' ဟု တိုက်ရိုက်အဖြေပေးလိုက်ပါက အနည်းငယ် စိတ်ကစားရာ ရောက်သွားနိုင်ပြီး၊ သူ လက်ရှိ တည်ဆောက်ထားသော "အချစ်ကြီးသူ" ဆိုသည့် စရိုက်လက္ခဏာ  နှင့် ကိုက်ညီမှု ရှိတော့မည် မဟုတ်သောကြောင့် ဖြစ်သည်။ 

အမျိုးသားနှင့် အမျိုးသမီး ဆက်ဆံရေးတွင် အစောတလျင် ဖွင့်ဟဝန်ခံခြင်း မပြုသူကသာ ပိုမို အသာစီးရသော အနေအထားကို ပိုင်ဆိုင်နိုင်စမြဲ ဖြစ်သည်။

ဤကဲ့သို့သော အချစ်ရေး ကိစ္စရပ်များတွင် "ဝါရင့်ဆရာကြီး" ဖြစ်သော မူဟန်သည် ဤသဘောတရားကို ဘယ်လိုလုပ် နားမလည်ဘဲ နေမည်နည်း။ ထို့ကြောင့် သူသည် ရွှီပင်းနင်း ကြားချင်နေသော အဖြေကို အလွယ်တကူ ထုတ်ပြောလိမ့်မည် မဟုတ်ချေ။

"ကျွန်တော့်ရဲ့ အချစ်ရေး နောက်ကြောင်းကိုတော့ အကုန်ပြောပြပြီးပြီဆိုတော့... မင်းဘက်ကလည်း မျှမျှတတဖြစ်အောင် ပြောပြသင့်တယ် မဟုတ်လား" မူဟန်က လှမ်း၍ မေးခွန်းထုတ်လိုက်သည်။

"ကျွန်မက တစ်ခါမှ ရည်းစားမထားဖူးတာကို... ဘာတွေ ပြောပြရမှာလဲ"

"မဖြစ်နိုင်တာ"

"တကယ်ပြောတာပါ"

"ဒါဆိုရင် စိတ်လှုပ်ရှားပြီး ရင်ခုန်ဖူးခဲ့တဲ့ ယောက်ျားလေးမျိုးရော တစ်ယောက်မှ မရှိခဲ့ဘူးလား"

"မရှိပါဘူး... တစ်ယောက်မှ မရှိခဲ့ဘူး" ရွှီပင်းနင်းသည် ယခင်မေးခွန်းများကို အဆင်ပြေပြေ ဖြေကြားနိုင်ခဲ့သော်လည်း၊ ဤမေးခွန်းကိုမူ ဖြေခါနီးတွင် စက္ကန့်အနည်းငယ်မျှ သိသိသာသာ ဆွံ့အသွားခဲ့ရသည်။

လိမ်ညာသည့်နေရာတွင် ရွှီပင်းနင်း၌ မည်သည့် အတွေ့အကြုံမျှ မရှိကြောင်း ထင်ရှားလှပေသည…သူမသည် လိမ်ပြောသည့်အခါ တခြားသူ၏ ယုံကြည်မှုကို ရရှိရန်အတွက် အမြန်နှုန်းနှင့် ပြတ်သားပြီး ယုံကြည်မှုရှိသော လေသံဖြင့် ပြောရမည်မှန်း မသိရှိချေ။

"ကျန်ဝူကျိ ရဲ့ မိခင် ပြောခဲ့တာ တကယ်ကို မှန်တာပဲ" မူဟန်က သူမအား စနောက်ရန် ရည်ရွယ်ချက်ဖြင့် ဆိုလိုက်သည်။

"ဘာကို ဆိုလိုတာလဲဟင်" ရွှီပင်းနင်း သိပ်ပြီး နားမလည်ချေ။

"မိန်းကလေးက ပိုပြီး လှလေလေ... လိမ်ညာတဲ့နေရာမှာ ပိုပြီး တော်လေလေ တဲ့" မူဟန်က ချီးမွမ်းစကား ဆိုလိုက်သည်။

ရွှီပင်းနင်း ထိုချီးမွမ်းစကားကြောင့် ပါးပြင်လေးများ ရဲတက်သွားရပြီး မိမိကိုယ်ကိုယ် ပြန်လည် ခုခံကာကွယ်လိုက်သည် …

 "ကျွန်မ မလိမ်ပါဘူး…အရင်တုန်းက ကျွန်မ ဘယ်ယောက်ျားလေးအပေါ်မှာမှ ရင်မခုန်ဖူးတာ တကယ်ပါ"

"အရင်တုန်းက ဟုတ်လား... ဒါဆိုရင် အခုတော့ ရင်ခုန်နေတဲ့သူ ရှိနေပြီလို့ ဆိုလိုတာပေါ့" မူဟန်က အကွက်ကျကျ ဖိအားပေး မေးမြန်းလိုက်သည်။

ရွှီပင်းနင်း မိမိ စကားမှားသွားမှန်း သတိပြုမိသွားပြီး ချက်ချင်း ပြင်ဆင်ရန် ကြိုးစားလိုက်သည် …

"အခု... အခုလည်း မရှိပါဘူး" သူမ စကားပြောနေစဉ်တွင် သိသိသာသာပင် စကားထစ်နေခဲ့ရပြီး… မျက်နှာတစ်ခုလုံးလည်း နီမြန်းနေခဲ့ရာ မည်သူမဆို သူမ လိမ်ပြောနေမှန်း အလွယ်တကူ သိနိုင်ပေသည်။

"ကောင်းပါပြီ... ငါ မင်းကို ယုံပါတယ်" မူဟန် အနေတော် ရောက်ပြီဟု ခံစားရသဖြင့် ဆက်လက်၍ မစနောက်တော့ဘဲ စကား ဆိုလိုက်သည် …

 "ကျွန်တော်တို့ အခု ပြောခဲ့တဲ့ စကားတွေကို လျှို့ဝှက်ချက်အနေနဲ့ ထိန်းသိမ်းပေးထားဖို့ မျှော်လင့်ပါတယ်နော်"

ရွှီပင်းနင်းသည် အတင်းအဖျင်း ပြောတတ်မည့် မိန်းကလေးမျိုး မဟုတ်သော်လည်း နောင်တစ်ချိန်တွင် သူ၏ လုပ်ကြံဖန်တီးထားသော "ဇာတ်လမ်း" ကို မတော်တဆ နှုတ်ကျွံပြောမိခြင်းမျိုး မရှိစေရန်အတွက် ကြိုတင်ကာကွယ်ထားခြင်းက ပိုမို စိတ်ချရပေသည်။

"စိတ်ချပါ... ကျွန်မ ဘယ်သူ့ကိုမှ မပြောပါဘူး… ဒါနဲ့... ရှင်လည်း ကျွန်မ မိုးခြိမ်းတာ ကြောက်တတ်တဲ့အကြောင်းကို ဘယ်သူ့ကိုမှ... ဘယ်သူ့ကိုမှ သွားမပြောရဘူးနော်" လွန်ခဲ့သော ညက ပုံရိပ်များက ရွှီပင်းနင်း၏ ဦးနှောက်ထဲတွင် ဖျတ်ခနဲ ပြန်လည် ပေါ်ပေါက်လာခဲ့သဖြင့် သူမ၏ မျက်နှာနှင့် နားရွက်လေးများ ပူနွေးလာခဲ့ရပြန်သည်။

အပြန်အလှန်အားဖြင့် တစ်ဦးချင်းစီ၏ လျှို့ဝှက်ချက်များကို "ထိန်းသိမ်းပေးထားခြင်း" ဆိုသည်မှာ အမျိုးသားနှင့် အမျိုးသမီးကြား ဆက်ဆံရေးကို ပိုမို နွေးထွေး အရှိန်တက်လာစေရန် ကူညီပေးသည့် လျှို့ဝှက်လှည့်ကွက်ငယ်တစ်ခု ဖြစ်သည်။ 

မူဟန်သည် ဤသဘောတရားကို သဘာဝအတိုင်း ကောင်းစွာ နားလည်ထားသည်။ သူသည် ရွှီပင်းနင်းကို ကြည့်ကာ ချက်ချင်းပင် တုံ့ပြန်လိုက်သည် …

"သဘောတူတယ်... ကတိပဲ”

ဤသို့ပြောပြီးနောက် သူသည် ဝိုင်ခွက်ကို မြှောက်လိုက်သည်။ ရွှီပင်းနင်းလည်း သဘောပေါက်သွားပြီး သူမ၏ ဝိုင်ခွက်ကို ယူကာ မူဟန့်ခွက်နှင့် အသာအယာ ခွက်ချင်းတိုက်လိုက်ပြီး ဝိုင်နီကို တစ်ငုံ သောက်လိုက်ကာ သူတို့၏ ကတိကဝတ် "ထုံးတမ်းစဉ်လာ" ကို အောင်မြင်စွာ ပြီးမြောက်စေခဲ့တော့သည်။

ကတိကဝတ် ပြုလုပ်ပြီးနောက် သီးသန့်ခန်းအတွင်း ခေတ္တမျှ တိတ်ဆိတ်မှုများ လွှမ်းမိုးသွားခဲ့သည်။ ရွှီပင်းနင်းသည် မူဟန့်၏ မျက်နှာချင်းဆိုင် ခုံသို့ ပြန်လည် ရွှေ့ထိုင်လိုက်ပြီး ခေါင်းငုံ့ကာ ထမင်းစားနေခဲ့သော်လည်း…သူမ၏ လှပသော မျက်ဝန်းအစုံကမူ မကြာခဏဆိုသလို မူဟန့်ထံသို့ ခိုးကြည့်မိနေခဲ့သည်။ မူဟန်သည်လည်း မကြာခဏဆိုသလို ခေါင်းမော့ကာ ရွှီပင်းနင်းကို လှမ်းကြည့်တတ်သည်။

တစ်ခါတစ်ရံတွင် သူတို့နှစ်ဦး၏ အကြည့်ချင်း ဆုံစည်းသွားတတ်ကြပြီး…ခေတ္တမျှ စိုက်ကြည့်မိနေကြပြီးနောက်မှ မသိမသာ အကြည့်လွှဲသွားတတ်ကြသည်။ ထိုနေရာတွင် မည်သည့် စကားသံမျှ မရှိသော်လည်း၊ စကားလုံးများထက် ပိုမို လေးနက်လှသော အဓိပ္ပာယ်သက်ရောက်မှုရှိသည့် ရင်ခုန်စရာ လေထုတစ်ခုကမူ လွှမ်းမိုးနေခဲ့ချေပြီ။

သို့သော်ငြားလည်း မည်မျှပင် ကောင်းမွန်သော စားသောက်မှု ဖြစ်ပါစေ အချိန်ကန့်သတ်ချက်တော့ ရှိစမြဲ ဖြစ်သည်။ ညစာစားပွဲ ပြီးဆုံးသွားသောအခါ ရွှီပင်းနင်းသည် ကောင်တာသို့ သွားရောက်ကာ ငွေရှင်းလိုက်ပြီးနောက် အပြင်ဘက်ရှိ ကျန်းရုန်ဖေးအား အကြောင်းကြားလိုက်သည်။

မူဟန်သည် ဝိုင်အနည်းငယ် ပိုမို သောက်သုံးခဲ့သဖြင့် လမ်းလျှောက်သည့်အခါ အနည်းငယ် ခေါင်းမူးပြီး အရှိန်မထိန်းနိုင်ဖြစ်နေခဲ့သည်။ 

ရွှီပင်းနင်းက ရှေ့သို့ လှမ်း၍ သူ့ကို တွဲကူလိုက်သော်လည်း သူမ၏ အားအင်က မူဟန့်ကို ကောင်းစွာ တွဲနိုင်လောက်အောင် မသန်မာသဖြင့် ဘေးနားရှိ ကျန်းရုန်ဖေးထံသို့ အကူအညီတောင်းသည့် အကြည့်ဖြင့် လှမ်းကြည့်လိုက်သည်။ ကျန်းရုန်ဖေးလည်း သဘောပေါက်သွားပြီး ရွှီပင်းနင်းနှင့်အတူ ဘယ်… ညာ တစ်ဖက်စီ ညှပ်ကာ မူဟန့်ကို ကားပါကင်နေရာအထိ တွဲကူပေးခဲ့ကြသည်။

သူတို့ သုံးဦး၏ နောက်ကွယ်ရှိ အရိပ်မည်းတစ်ခုထဲတွင် အမျိုးသမီးတစ်ဦးသည် သူတို့၏ လှုပ်ရှားမှုများကို အကဲခတ် စောင့်ကြည့်နေခဲ့သည်။

"ကျန်းရုန်ဖေးက အခု သူမရဲ့ အချစ်ဆုံးသူချင်း ရွှီပင်းနင်းနဲ့အတူ ရှိနေပြီး၊ အရက်အလွန်အမင်း မူးနေတဲ့ လူငယ်တစ်ယောက်ကို တွဲကူပေးနေတယ်။ 

ဒီကောင်က အတော်လေးကို ချောတာပဲ... အမျိုးသား အနုပညာရှင် စတားတွေထက်တောင် ပိုပြီး ချောသေးတယ်" ဟု ထိုအမျိုးသမီးက ဖုန်းကို ကိုင်ကာ လှမ်း၍ သတင်းပို့လိုက်သည်။

"အနုပညာရှင်တွေထက်တောင် ချောတယ် ဟုတ်လား..." ဖုန်းတစ်ဖက်ကမ်းမှ အမျိုးသားတစ်ဦး၏ အသံ ထွက်ပေါ်လာခဲ့ပြီး၊ သူ၏ လေသံမှာ သိသိသာသာပင် မကျေမနပ် ဖြစ်နေခဲ့သည် … "အဲဒီကောင်က ငါ့မိန်းမနဲ့ ဘာပတ်သက်မှု ရှိနေလဲဆိုတာကို ချက်ချင်း စုံစမ်းပေးစမ်း"

"ကျွန်မက ကျန်းရုန်ဖေးကို ကာကွယ်ပေးဖို့ပဲ သဘောတူထားတာပါ… တခြားသူတွေရဲ့ ကိုယ်ရေးကိုယ်တာ ကိစ္စတွေကို လိုက်လံ စုံစမ်းပေးဖို့ မပြောခဲ့ဘူး… ပြီးတော့ ဒါက ကျွန်မ ကျွမ်းကျင်တဲ့ အပိုင်းလည်း မဟုတ်ဘူး" ဟု အမျိုးသမီးက ပြတ်သားစွာ ဆိုလိုက်သည်။

"ကျန်းရုန်ဖေးက ငါ့မိန်းမပဲ... ငါ ဒီကိစ္စတွေကို သေချာပေါက် သိထားရမယ်" ဟု ဖုန်းထဲမှ အမျိုးသားက အမိန့်ပေးသလို ပြောသည်။

"ရှင်ရဲ့ ကိုယ်ပိုင် အရှုပ်ထုပ် ဘဝကလည်း အတော်လေး ပွေရှုပ်နေတာပဲကို... ရှင်က ရှင်ဘာသာ ကစားနည်းတွေ ကစားနေပြီး၊ သူမကလည်း သူမဘာသာ ကစားတာပဲ… ဘာတွေကို လိုက်ပြီး ထိန်းချုပ်ချင်နေတာလဲ" အမျိုးသမီးက အနည်းငယ် ရယ်ချင်ပတ်ချင် ဖြစ်သွားသည်။

"စကားပြောရင် ဆင်ခြင်ဦး…အကယ်၍ မင်း ငါ့ဆီကနေ ပညာရပ်တွေကို ဆက်သင်ယူချင်တယ်ဆိုရင် မင်းရဲ့ အဆင့်အတန်းကို မင်း သိထားရမယ်" ဖုန်းထဲမှ အမျိုးသားက သတိပေးလိုက်သည်။

အမျိုးသမီး ခေတ္တမျှ နှုတ်ဆိတ်သွားပြီးနောက် "ကျွန်မ တကယ်ပဲ စုံစမ်းစစ်ဆေးတဲ့နေရာမှာ မတော်ဘူး… ပြီးတော့ အချိန်လည်း အရမ်းကုန်တယ်… ရှင်က ကျွန်မကို ကျန်းရုန်ဖေးအနားမှာ ၂၄ နာရီပတ်လုံး စောင့်ရှောက်ခိုင်းထားတာလေ... ကျွန်မမှာ ခန္ဓာကိုယ် နှစ်ခုမှ မရှိတာ"

"ဒါဆိုရင် တိုက်ရိုက်ပဲ လုပ်လိုက်တော့။ အဲဒီကောင်ကို နောက်နောင် ကျန်းရုန်ဖေးအနားကနေ ဝေးဝေးမှာ နေဖို့ သတိပေးလိုက်… ဒါကို ဘယ်လိုလုပ်ရမလဲဆိုတာ ငါက မင်းကို ထပ်ပြီး သင်ပေးနေဖို့ မလိုဘူး မဟုတ်လား" ဖုန်းထဲမှ အမျိုးသားက ဆိုသည်။

"ဒါကတော့ လွယ်ပါတယ် ပြဿနာမရှိဘူး” အမျိုးသမီး ဤသို့ပြောပြီးနောက် ဖုန်းကို ချက်ချင်း ချလိုက်တော့သည်။

ကားပါကင်သို့ ရောက်ရှိပြီးနောက် ရွှီပင်းနင်းနှင့် ကျန်းရုန်ဖေးတို့သည် မူဟန်နှင့်အတူ ခေတ္တမျှ စောင့်ဆိုင်းနေခဲ့ကြသည်။ ထိုသို့ စောင့်ဆိုင်းနေစဉ်အတွင်း သူငယ်ချင်းနှစ်ဦးသည် တိုးတိုးလေး စကားပြောဖြစ်ကြသည် …

"နင် ငါ့အိမ်ကို လိုက်ခဲ့မလားဟင်…ငါ နင့်ကို ပြောပြချင်တဲ့ စကားတွေ အများကြီး ရှိနေလို့ပါ" ကျန်းရုန်ဖေးက သူမ၏ ရင်ဖွင့်စရာများကို သူငယ်ချင်းဖြစ်သူအား ပြောပြချင်နေသည်။

"ဒါက ဘယ်လိုလုပ် အဆင်ပြေမှာလဲဟ... အဆင်မပြေလောက်ပါဘူး" ရွှီပင်းနင်းက တိုးတိုးလေး ပြန်ပြောသည်။

"သူနဲ့ ငါနဲ့က အိမ်တစ်အိမ်တည်းမှာ အတူတူ နေကြတာမှ မဟုတ်တာ"

"ဟင်... ဟုတ်လား"

"ငါ အဲဒီအိမ်ကို ရုတ်တရက်ကြီး ပြန်မသွားချင်တော့ဘူး ဒါဆိုရင် နင့်အိမ်ကိုပဲ ငါ လိုက်ခဲ့ရမလား... အဆင်ပြေလား။"

"ငါက မေမေနဲ့ အတူတူ နေတာဆိုတော့... အဆင်ပြေတာပေါ့"

"ဒါဆိုရင် သွားကြစို့"

ရွှီပင်းနင်း ခေတ္တမျှ တွေဝေသွားပြီး မူဟန့်ကို လှမ်းကြည့်ကာ အနည်းငယ် စိုးရိမ်စိတ် ဖြစ်ပေါ်လာသည်။ မူဟန်သည် သူတို့နှစ်ဦး ဘာတွေ ပြောနေသည်ကို သေသေချာချာ မကြားရသော်လည်း၊ ကျန်းရုန်ဖေးသည် ရွှီပင်းနင်းအား ခေါ်ဆောင်သွားရန် ကြိုးစားနေမှန်းကိုမူ ရိပ်မိသည်။

မူဟန် သူခေါ်ထားသော အငှားယာဉ်မောင်း ထံမှ မက်ဆေ့ခ်ျကို စစ်ဆေးလိုက်ပြီး ဆိုလိုက်သည်  "ကျွန်တော် ခေါ်ထားတဲ့ ယာဉ်မောင်းက မကြာခင် ရောက်တော့မှာပါ။ မင်းတို့နှစ်ယောက်မှာ ကိစ္စရှိရင် အရင် သွားနှင့်ကြလေ"

"ကောင်းပြီလေ... ဒါဆိုရင်လည်း အိမ်ရောက်ရင် ကျွန်မဆီ ဖုန်း ဒါမှမဟုတ် မက်ဆေ့ခ်ျ လှမ်းပို့ဦးနော်" ရွှီပင်းနင်းက မူဟန့်အား ပြောလိုက်သည်။

ကျန်းရုန်ဖေးသည် သူမ၏ အချစ်ဆုံးသူငယ်ချင်းကို အံ့သြသော မျက်လုံးများဖြင့် လှမ်းကြည့်လိုက်မိသည်၊ အဘယ်ကြောင့်ဆိုသော် ရွှီပင်းနင်း၏ လေသံမှာ အလွန်အမင်း နူးညံ့လွန်းနေသောကြောင့် ဖြစ်သည်။ 

သို့သော်လည်း သူမ သိပ်ပြီး အလေးအနက် မတွေးမိဘဲ ရွှီပင်းနင်းအနေဖြင့် ယဉ်ကျေးပျူငှာစွာ နှုတ်ဆက်ခြင်းသာ ဖြစ်လိမ့်မည်ဟု ထင်မှတ်လိုက်သည်။

ရွှီပင်းနင်းနှင့် ကျန်းရုန်ဖေးတို့ ထွက်ခွာသွားပြီးနောက် မူဟန်သည် ကား၏ ဘေးခရီးသည်ထိုင်ခုံတွင် မျက်လုံးမှိတ်ကာ အိပ်ငိုက်ဟန်ဆောင်ရင်း စဉ်းစားစရာ အချို့ကို အာရုံခံလိုက်သည်။

၄၈ နာရီ အချိန်ကာလ ကုန်လွန်သွားခဲ့ပြီဖြစ်ရာ၊ သူသည် ဗီလိန်စနစ်  ကို အသုံးပြုနိုင်မည့် အခွင့်အရေးအသစ်တစ်ခု ထပ်မံ ရရှိခဲ့ပြီ ဖြစ်သည်။ ထို့အပြင် ရွှီရို  ထံသို့ အလုပ်တာဝန်များ ပေးအပ်နိုင်မည့် အကြိမ်ရေမှာလည်း ပြန်လည်ပြည့်တင်း  သွားခဲ့ပြီဖြစ်ရာ၊ သူသည် သူမထံသို့ တတိယမြောက် အလုပ်တာဝန်ကို ပေးအပ်နိုင်ပြီ ဖြစ်သည်။

ဗီလိန်စနစ်၏ အသုံးပြုခွင့် အကြိမ်ရေမှာ အကန့်အသတ်မရှိ စုဆောင်းထားနိုင်ပြီး ၄၈ နာရီလျှင် တစ်ကြိမ်နှုန်းဖြင့် အခွင့်အရေးတစ်ခု တိုးပွားလာခြင်း ဖြစ်သည်။ ရွှီရို၏ ကိစ္စတွင်မူ အလုပ်တာဝန်များကို ပြီးမြောက်အောင်မြင်ခြင်းက လက်ရှိတွင် ဆွဲဆောင်မှုအမှတ်များကိုသာ ပုံသေ တိုးမြင့်ပေးနေခဲ့သည်။ 

မူဟန် လက်ရှိအချိန်တွင် အလိုချင်ဆုံး ဖြစ်နေသော ဆုလာဘ်မှာမူ တိုက်ခိုက်ရေးစွမ်းရည်  တိုးမြင့်လာခြင်း ဖြစ်သည်။

တိုက်ခိုက်ရေးစွမ်းရည်ကို တိုးမြင့်ရန်အတွက် ဗီလိန်စနစ်၏ ပစ်မှတ် ကို သေသေချာချာ ရွေးချယ်ရန် လိုအပ်ပေသည်။ သို့သော်လည်း ခေတ္တမျှ စဉ်းစားပြီးနောက်တွင်မူ မူဟန့်အနေဖြင့် သင့်တော်သော ကိုယ်စားလှယ်လောင်းကို ချက်ချင်း မစဉ်းစားမိသဖြင့် အရင်ဆုံး ရွှီရိုထံသို့သာ အလုပ်တာဝန်တစ်ခု ထပ်မံ ပေးအပ်ရန် ဆုံးဖြတ်လိုက်သည်။

သို့သော် မူဟန် စဉ်းစား၍ မဆုံးသေးမီမှာပင် သူ၏ လည်ပင်းသို့ အေးစက်စက် အရာတစ်ခု လာရောက် ထိတွေ့မိသွားသဖြင့် ထိတ်လန့်တုန်လှုပ်သွားရတော့သည်။

သူ မျက်လုံးကို ချက်ချင်း ဖွင့်ကြည့်လိုက်ရာ... ယာဉ်မောင်းထိုင်ခုံတွင် အမျိုးသမီးတစ်ဦး ရောက်ရှိနေခဲ့ပြီး သူမသည် ဓားမြှောင်ငယ်တစ်ခုကို ကိုင်ဆောင်ကာ မူဟန့်၏ လည်ပင်းဆီသို့ တေ့ထားခဲ့ချေပြီ။ မူဟန် ခံစားလိုက်ရသော အေးစက်စက် အာရုံမှာ ထိုဓားသွားထံမှ တိုက်ရိုက် ထွက်ပေါ်နေခြင်း ဖြစ်သည်။