အခန်း (၁၃) - အပြစ်ကင်းစင်လွန်းတဲ့ မင်းသမီးလေး... လှည့်စားရတာ တကယ်ကို လွယ်ကူလွန်းတယ်

"ဒါဆိုရင် မစ္စက ကျားကျဲ နေ့စဉ်သုံး ဓာတုဗေဒပစ္စည်းထုတ်လုပ်ရေး ကုမ္ပဏီရဲ့ ဥက္ကဋ္ဌပေါ့။ သတင်းတွေမှာ ခဏခဏ ကြားဖူးပါတယ်ခင်ဗျာ၊ အခုလို ဆုံတွေ့ရတာ ဝမ်းသာပါတယ်" မူဟန်က ကျန်းရုန်ဖေးကို နှုတ်ဆက်လိုက်သည်။

"ကျွန်မအကြောင်းကို ကြားဖူးတယ် ဟုတ်လား" ကျန်းရုန်ဖေးက ပြုံးလျက် မေးသည်။

သူမက ရွှီပင်းနင်းနှင့် ပုံစံချင်း မတူချေ။ ရွှီပင်းနင်းက ပထမဆုံးအကြိမ် တွေ့ဆုံသော သူစိမ်းများအပေါ် အနည်းငယ် အေးစက်တတ်သော်လည်း သူမကမူ တခြားသူများအပေါ် အမြဲတမ်း နူးညံ့သိမ်မွေ့ပြီး ယဉ်ကျေးပျူငှာစွာ ဆက်ဆံတတ်ကာ…သူမ အလွန်အမင်း မုန်းတီးသော လူများနှင့် တွေ့မှသာ မျက်နှာပျက်လေ့ ရှိသူဖြစ်သည်။

"စီးပွားရေး မဂ္ဂဇင်းတွေထဲက သတင်းအချို့မှာ မစ္စ အကြောင်း ဖတ်ဖူးလို့ပါ… ဒီလောက် နာမည်ကြီးတဲ့ စီးပွားရေးလုပ်ငန်းရှင် အမျိုးသမီးတစ်ယောက်အကြောင်းကို ကျွန်တော် မကြားဖူးဘဲ နေမလဲ" မူဟန်က လွယ်လွယ်ကူကူပင် လိမ်ညာကာ အကြောင်းပြချက် ပေးလိုက်သည်။

သူသည် အမှန်တကယ်တော့ မည်သည့် စီးပွားရေး မဂ္ဂဇင်းကိုမျှ ဖတ်လေ့မရှိချေ။ သို့သော်လည်း ကျန်းရုန်ဖေးသည် ငယ်ငယ်ရွယ်ရွယ်နှင့် မိသားစုလုပ်ငန်းတစ်ခု၏ ဥက္ကဋ္ဌ ဖြစ်နေပြီဆိုကတည်းက သူမသည် အလွန် အရည်အချင်းရှိသူ ဖြစ်ရမည်ဖြစ်ပြီး၊ စီးပွားရေး မဂ္ဂဇင်းများ၏ အင်တာဗျူးခြင်းကို ခံရဖူးသည်မှာ ဆန်းကြယ်သော ကိစ္စတော့ မဟုတ်ချေ။

"ချီးမွမ်းလွန်းရာ ရောက်နေပါပြီ မစ္စတာဟန်…. မစ္စတာဟန်ကို ကြည့်ရတာလည်း အရှိန်အဝါ အတော်လေး ရှိတာပဲ... သေချာပေါက် အလားအလာရှိတဲ့ လူငယ်တစ်ယောက် ဖြစ်ရမယ်" 

ကျန်းရုန်ဖေးက အလိုက်သင့် ပြန်လည် ချီးမွမ်းစကား ဆိုလိုက်ခြင်း ဖြစ်သော်လည်း၊ မူဟန့်၏ အပြုအမူ အပြောအဆိုနှင့် ဝတ်စားဆင်ယင်မှုကို ကြည့်ခြင်းအားဖြင့် သူ၏ မိသားစုနောက်ခံမှာ အချက်အချာကျပြီး ထူးခြားမည်ကို သူမ သေချာပေါက် ခန့်မှန်းမိသည်။

မည်သို့ပင်ဆိုစေ... မူဟန့်၏ လက်ကောက်ဝတ်တွင် ဝတ်ဆင်ထားသော ပါတက်ဖိလစ်  နာရီတစ်လုံးတည်းတင် အနည်းဆုံး သိန်းထောင်ချီ (သန်းဂဏန်း) တန်ဖိုးရှိပေသည်။ ထိုကဲ့သို့သော နာရီမျိုးကို ဝတ်ဆင်နိုင်သူက ဘယ်လိုလုပ် သာမန်လူတစ်ယောက် ဖြစ်နိုင်ပါအံ့နည်း။

"ကျွန်တော့်မှာတော့ ထူးခြားတဲ့ အရည်အချင်းရယ်လို့ မရှိပါဘူးဗျာ၊ လူကြီးတွေ ကို မှီခိုနေရတာပါပဲ" မူဟန်က အမှန်အတိုင်း ပြောလိုက်သည်။

"မစ္စတာဟန်က တကယ်ကို နှိမ့်ချလွန်းတာပဲ" ကျန်းရုန်ဖေးကမူ မူဟန် အားနာပြီး နှိမ့်ချပြောဆိုနေသည်ဟုသာ ထင်မှတ်လိုက်တော့သည်။

မူဟန်နှင့် ကျန်းရုန်ဖေးတို့သည် စကားတပြောပြောနှင့် ရယ်မောနေကြစဉ် ဘေးနားတွင် ထိုင်နေသော ရွှီပင်းနင်းမှာမူ စိတ်ထဲတွင် အနည်းငယ် နေရခက်လာခဲ့ရသည်။ 

မိခင်ဖြစ်သူ ရွှီရိုနှင့် ရှိစဉ်တုန်းကလည်း မူဟန်သည် သူမနှင့် စိတ်အားထက်သန်စွာ စကားပြောခဲ့ပြီး၊ ယခု အချစ်ဆုံးသူငယ်ချင်း ကျန်းရုန်ဖေး ရောက်လာသောအခါတွင်လည်း မူဟန်သည် သူမနှင့်ပါ ချက်ချင်း အဆင်ပြေသွားခဲ့ပြန်သည်။ ရွှီပင်းနင်း စိတ်ထဲတွင် အနည်းငယ် စိတ်မကောင်းဖြစ်ရပြီး၊ တစ်ပြိုင်တည်းမှာပင် မိမိကိုယ်ကိုယ် စကားမပြောတတ်၊ လူမှုဆက်ဆံရေး မလုပ်တတ်သည့်အတွက် တိတ်တဆိတ် ဒေါသထွက်မိနေသည်။

မူဟန် ရွှီပင်းနင်း၏ မျက်နှာအမူအရာကို သတိပြုမိသွားပြီးနောက် ကျန်းရုန်ဖေးနှင့် စကားပြောနေခြင်းကို ချက်ချင်း ရပ်တန့်လိုက်သည်။ သူသည် ကျန်းရုန်ဖေးနှင့် ရင်းနှီးအောင် လုပ်ချင်သည်မှာ အမှန်ပင်ဖြစ်သော်လည်း၊ ထိုသို့လုပ်ခြင်းက ရွှီပင်းနင်းနှင့် ဆက်ဆံရေးကို ထိခိုက်သွားစေမည်ဆိုပါက သူ့အတွက် ဆုံးရှုံးမှုကြီးမားပေလိမ့်မည်။

"ကျွန်တော့်ကို ခဏလောက် ခွင့်ပြုပါဦး၊ ဖုန်းတစ်ချက် ထွက်ကိုင်လိုက်ပါဦးမယ်။"

ထိုအချိန်တွင် မူဟန်သည် မိခင်ဖြစ်သူ ဝမ်ချင်း  ထံမှ ဖုန်းခေါ်ဆိုမှုတစ်ခုကို မြင်လိုက်ရသဖြင့်၊ ထိုအခွင့်အရေးကို အသုံးချကာ သီးသန့်ခန်းထဲမှ ခြေလှမ်းလှမ်း၍ ထွက်ခွာသွားခဲ့တော့သည်။

အခန်းထဲတွင် ကျန်းရုန်ဖေးနှင့် ရွှီပင်းနင်းတို့ နှစ်ဦးတည်းသာ ကျန်ရစ်ခဲ့သည်။

"ဟောဟော... နင်နော်…ငါ့ကိုကျတော့ အလုပ်တွေ ရှိတယ်လို့ လိမ်ပြောပြီး တကယ်တော့ ယောက်ျားလေးတစ်ယောက်နဲ့ ခိုးပြီး ချိန်းတွေ့နေတာပေါ့လေ" 

ကျန်းရုန်ဖေးက ရွှီပင်းနင်းကို ကြည့်ကာ အနည်းငယ် မနာလိုဖြစ်ဟန်ဖြင့် စနောက်လိုက်သည်။

"မဟုတ်ပါဘူးဟ…ငါ တကယ်ပဲ သူနဲ့ အလုပ်ကိစ္စ ဆွေးနွေးနေတာပါ" ရွှီပင်းနင်းက ဇွတ်ငြင်းလိုက်သည်။

"ငါကတော့ လုံးဝ မယုံဘူး" ကျန်းရုန်ဖေးက သံသယ မျက်လုံးများဖြင့် စိုက်ကြည့်သည်။

"လွန်ခဲ့တဲ့ ရက်ပိုင်းက ငါ့ကုမ္ပဏီနဲ့ “မူဂရု”  တို့ရဲ့ ပူးပေါင်းဆောင်ရွက်မှုအကြောင်း ပြောပြခဲ့တာကို နင် မှတ်မိသေးလား။" ရွှီပင်းနင်းသည် သူငယ်ချင်းထက် ရည်းစားကို ပိုဦးစားပေးသူဟု အစွပ်စွဲမခံချင်သဖြင့် သက်သေထုတ်ပြလိုက်သည်။

"မှတ်မိတာပေါ့ သူက မူဂရုဗ်ကလား... နေပါဦး သူ့မျိုးရိုးကလည်း မူ ဆိုတော့... သူက ဖြစ်နိုင်တာက..." ကျန်းရုန်ဖေး တစ်ခုခုကို ခန့်မှန်းမိသွားပုံရသည်။

"ဟုတ်တယ်…မူဂရုဗ်ရဲ့ အကြီးဆုံး သခင်လေးပဲ" ရွှီပင်းနင်းက ဆိုလိုက်သည်။

ကျန်းရုန်ဖေး သီးသန့်ခန်း တံခါးဝဘက်သို့ လှမ်းကြည့်လိုက်ပြီး မည်သည့် အရိပ်အယောင်မျှ မရှိသေးသည်ကို မြင်ရမှ ဆက်ပြောသည်  "နင် အရင်က ပြောတော့ သူ့လိုလူမျိုးနဲ့ ဆက်ဆံရတာကို မကြိုက်ဘူး ဆို"

"ဒါကြောင့်မို့လို့ပေါ့... အခုထိ ငါတို့ကြားမှာ တစ်ခုခု ရှိနေတယ်လို့ ထင်နေတုန်းပဲလား" ရွှီပင်းနင်းက အနိုင်ရသွားသည့်အလား ဆိုလိုက်သည်။

"ဒါဆို နင်က ဘာဖြစ်လို့ သူနဲ့ နှစ်ယောက်တည်း အပြင်ထွက်ပြီး ထမင်းစားနေရတာလဲ" ကျန်းရုန်ဖေးက ဆက်မေးသည်။

"ကုမ္ပဏီရဲ့ အလုပ်ကိစ္စတွေအတွက်ကြောင့်မလို့ ငါ့မှာ ရွေးချယ်စရာ မရှိလို့ပါဟ ပြီးတော့ ငါက သူ့ကို သွားပြီး စိတ်အနှောင့်အယှက် မပေးရဲဘူးလေ" ရွှီပင်းနင်းက အနည်းငယ် သနားစရာကောင်းသော အမူအရာကို လုပ်ပြလိုက်သည်။

"စိတ်မပူပါနဲ့ ငါ နင့်အနားမှာ အတူတူ နေပေးမယ်" ကျန်းရုန်ဖေးက သူငယ်ချင်းအပေါ် သစ္စာရှိစွာဖြင့် ကူညီရန် ပြင်လိုက်တော့သည်။

ရွှီပင်းနင်း ချက်ချင်းပင် ဆွံ့အသွားရပြီး၊ မိမိစကားနှင့် မိမိ လည်ပင်းပြန်ကွင်းစွပ်မိသွားသဖြင့် အလွန်ပင် နောင်တရသွားရသည်။ 

 "ငါ သူ့ကို မကြိုက်ဘူးလို့ ပြောတာက စီးပွားရေးဆွေးနွေးတဲ့ အခါမျိုးမှာ သူက အနည်းငယ် ပြင်းထန်လွန်းလို့ ပြောတာပါ။ 

နင် ဒီမှာ အတူတူ ရှိနေပေးရင်တောင် စီးပွားရေးအကြောင်း ပြောတဲ့အခါ နင် ကြားဖြတ်ဝင်ပြောဖို့က အဆင်ပြေမှာ မဟုတ်ဘူးလေ"

သူမသည် မူဟန့်ကို ညစာဖိတ်ကျွေးရန်အတွက် သတ္တိအားလုံးကို အနိုင်နိုင် မွေးမြူခဲ့ရခြင်းဖြစ်ရာ၊ ရွှီပင်းနင်းအနေဖြင့် ဤအခွင့်အရေးကြီးကို ဤကဲ့သို့ အပျက်စီးမခံနိုင်ချေ။

"ဒါလည်း ဟုတ်တာပဲ… ကောင်းပြီလေ... ဒါဆိုရင် ငါ နင်တို့နှစ်ယောက်ကို မနှောင့်ယှက်တော့ပါဘူး…ငါ ဟိုဘက်အခြမ်းမှာပဲ သွားစားလိုက်တော့မယ်။ နင်တို့ ပြန်ခါနီးကျရင် ငါ့ကို ဖုန်းလှမ်းဆက်လိုက်ဦး… အတူတူ ပြန်ကြတာပေါ့" ကျန်းရုန်ဖေး ခေါင်းညိတ်လိုက်သည်။ 

ဤသည်က ကုမ္ပဏီ၏ အလုပ်ကိစ္စ ဖြစ်နေသဖြင့် ပြင်ပလူတစ်ဦးအနေဖြင့် ဝင်ရောက် စွက်ဖက်ရန် မသင့်တော်မှန်း သူမ နားလည်သည်။

"အင်းပါ... ခဏနေမှ တွေ့ကြမယ်နော်" ရွှီပင်းနင်းက ဆိုသည်။

ကျန်းရုန်ဖေး အခန်းထဲမှ ထွက်ခွာသွားစဉ် ဖုန်းပြောပြီး ပြန်လည်ဝင်ရောက်လာသော မူဟန်နှင့် လမ်းတွင် ထိပ်တိုက် ဆုံတွေ့ခဲ့ကြသည်။ နှစ်ဦးစလုံး ယဉ်ကျေးစွာ ပြုံးပြလိုက်ကြပြီးနောက် တစ်ယောက်ကိုတစ်ယောက် ဖြတ်ကျော်သွားခဲ့ကြတော့သည်။

အခန်းထဲတွင် မူဟန်နှင့် ရွှီပင်းနင်းတို့ နှစ်ဦးတည်းသာ ထပ်မံ ကျန်ရစ်ခဲ့ပြန်ရာ၊ ရုတ်တရက် လေထုက အနည်းငယ် အနေရခက်  ဖြစ်သွားခဲ့သည်။ ရွှီပင်းနင်းသည် ထိုအနေရခက်သော တိတ်ဆိတ်မှုကို ဖြိုခွဲချင်သော်လည်း ဘာပြောရမှန်း မသိဖြစ်နေခဲ့ရသည်။

မူဟန် သူမ၏ အခက်အခဲကို ရိပ်မိသွားပြီးနောက် စကားစမြည်ကို ကိုယ်တိုင် စတင်လိုက်ပြီး၊ ဝါသနာများအကြောင်း၊ ထို့နောက် စားသောက်ဖွယ်ရာများအကြောင်း၊ နေ့စဉ်ဘဝ၏ သေးငယ်သော အသေးစိတ် အချက်အလက်များနှင့် နောက်ဆုံးတွင် သူ၏ ကိုယ်ပိုင် ကြီးပြင်းလာခဲ့ရသော ဘဝအတွေ့အကြုံများကို မျှဝေပြောကြားပေးခဲ့သည်။

ဟုတ်ပါသည်... မူဟန် ပြောပြနေသော သူ၏ ဘဝအတွေ့အကြုံများအနက် ကိုးဆယ်ရာခိုင်နှုန်းမှာ စိတ်ကူးယဉ် လုပ်ကြံဖန်တီးထားခြင်းသာ ဖြစ်သည်။ 

မည်သို့ပင်ဆိုစေ... သူ ကြီးပြင်းလာရသည့် ဘဝ၏ အကြီးမားဆုံးသော အကြောင်းအရာမှာ မိန်းကလေး အမျိုးမျိုးကို လိုက်လံ ပတ်ရှာပြီး တွဲခဲ့ခြင်းဖြစ်ကြောင်း ရွှီပင်းနင်းအား ဘယ်လိုလုပ် အမှန်အတိုင်း ပြောပြနိုင်ပါအံ့နည်း။

စကားပြောဆိုနေစဉ်အတွင်း ရွှီပင်းနင်းသည်လည်း တက်ကြွစွာ တုံ့ပြန်ခဲ့ပြီး၊ သူမ၏ မျက်နှာပေါ်တွင် မသိစိတ်ကနေ ပြုံးရွှင်မှုများ ထွက်ပေါ်လာခဲ့သည်။ သူတို့နှစ်ဦး စိတ်ချင်း ပိုမိုပွင့်လင်းလာကြသောအခါ ရွှီပင်းနင်းသည်ပင် ကိုယ်တိုင် စကားပြောစရာ အကြောင်းအရာများကို ရှာဖွေလာခဲ့တော့သည်။

"ရှင့်ရဲ့ အတိတ်က အတွေ့အကြုံတွေထဲမှာ... ရှင့်အတွက် အမှတ်တရ အဖြစ်ဆုံး ဖြစ်စေခဲ့တဲ့ ကိစ္စမျိုး ရှိမလားဟင်" ရွှီပင်းနင်း၏ ဤမေးခွန်းက အမှန်တော့ မူဟန့်၏ အချစ်ရေး နောက်ကြောင်းရာဇဝင်ကို ပတ်ဝန်းကျင်လှည့်၍ စူးစမ်းလိုခြင်း ဖြစ်သည်။ 

အဘယ်ကြောင့်ဆိုသော် မူဟန် စောစောက သူ၏ ဘဝအတွေ့အကြုံများကို ပြောပြစဉ်က အချစ်ရေးနှင့် ပတ်သက်၍ တစ်လုံးတစ်ပါဒမျှ ထည့်သွင်းပြောကြားခဲ့ခြင်း မရှိသောကြောင့် ဖြစ်သည်။

မူဟန်သည်လည်း သူမ၏ ရည်ရွယ်ချက်ကို ချက်ချင်း ရိပ်မိသွားပြီး သူ၏ ဦးနှောက်ကို အလျင်အမြန် လည်ပတ်လိုက်သည်။

အကယ်၍ သူက တစ်ခါမှ ရည်းစားမထားဖူးပါဘူးဟု ပြောလိုက်လျှင် ရွှီပင်းနင်း သေချာပေါက် ယုံကြည်မည်မဟုတ်ချေ။

မူဟန် ခေတ္တမျှ စကားကို ရပ်တန့်လိုက်ပြီး၊ သူ ယခင်က မြင်ဖူးထားသော ဝမ်းနည်းစရာ အချစ်ဇာတ်လမ်း အချို့ကို သူ၏ မှတ်ဉာဏ်ထဲမှ ရှာဖွေကာ၊ စိတ်ခံစားချက်များကို ချက်ချင်း ဖန်တီးလိုက်ပြီးနောက်၊ ဝမ်းနည်းကြေကွဲဖွယ် အမူအရာဖြင့် ဖြည်းညှင်းစွာ ဆိုလိုက်သည် …

"ရှိတာပေါ့... ကျွန်တော် အရင်က မိန်းကလေးတစ်ယောက်ကို အရမ်း သဘောကျခဲ့ဖူးတယ်… သူမကို အသက်ထက်မက ချစ်ခဲ့တာ"

ရွှီပင်းနင်း မူဟန့်၏ မျက်နှာပေါ်မှ ဝမ်းနည်းစရာ ဇာတ်လမ်းတစ်ပုဒ်၏ အရိပ်အယောင်ကို ဖတ်ရှုလိုက်မိပြီး မအောင့်အီးနိုင်ဘဲ မေးလိုက်မိသည်။ 

"ရှင်... ကျွန်မကို ပြောပြလို့ ရမလားဟင်"

မူဟန် အနည်းငယ် တွေဝေသွားဟန် သရုပ်ဆောင်လိုက်ပြီးနောက် စတင်၍ ပြောပြလိုက်တော့သည်။

ထိုဇာတ်လမ်း၏ အနှစ်ချုပ်မှာ ရိုးရှင်းလှပေသည်…၎င်းက ပထမဆုံးအကြိမ် မြင်မြင်ချင်း အချစ် ဖြင့် စတင်ခဲ့ပြီး၊ နောက်ဆုံးတွင် သေကွဲကွဲကာ လမ်းခွဲခဲ့ရသည့် ဇာတ်လမ်း ဖြစ်သည်။ 

ရိုးရိုးရှင်းရှင်း ပြောရလျှင် ၎င်းက ရုပ်ရှင်များနှင့် ရုပ်သံဇာတ်လမ်းတွဲများတွင် အမြဲတမ်း တွေ့နေကျ ရိုးအီနေသော ကြေကွဲဖွယ် အချစ်ဇာတ်လမ်း  သက်သက်မျှသာ ဖြစ်သည်။

သို့သော်လည်း မူဟန်သည် ယခင်က မိန်းကလေး အများအပြားကို လှည့်စားဖူးထားသူဖြစ်ရာ သူ၏ သရုပ်ဆောင် အရည်အချင်းမှာ အလွန်အမင်း ကောင်းမွန်လှပေသည်။ 

သူက စကားကို ဖြည်းဖြည်းချင်းနှင့် ခံစားချက်အပြည့်ဖြင့် ပြောပြနေသောအခါ နားထောင်သူကို ဇာတ်လမ်းထဲသို့ အလွယ်တကူ ဆွဲခေါ်သွားနိုင်ခဲ့သည်။

ထို့အပြင် ရွှီပင်းနင်းသည် အချစ်ကို အလွန်အမင်း ကိုးကွယ်တတ်သူ  ဖြစ်ပြီး၊ အချစ်ဝတ္ထုများကို ဖတ်ရှုရခြင်းကို သဘောကျကာ၊ စိတ်ခံစားမှုလည်း လွယ်ကူသူ ဖြစ်သည်။ မူဟန် ဇာတ်လမ်း၏ ဝမ်းနည်းစရာ အပိုင်းများသို့ ရောက်လာသောအခါ သူမ၏ မျက်ဝန်းအစုံမှာ မသိစိတ်ဖြင့် နီမြန်းလာခဲ့ရတော့သည်။

ဇာတ်လမ်း၏ အဆုံးသတ်ပိုင်းသို့ ရောက်သောအခါ မူဟန်သည် စကား ဆက်မပြောနိုင်တော့လောက်အောင် ရှိုက်ကြီးတငင် ဖြစ်သွားဟန် သရုပ်ဆောင်ကာ၊ ဝိုင်ခွက်ကို ယူ၍ တစ်ခွက်ပြီးတစ်ခွက် အဆက်မပြတ် မော့ချလိုက်တော့သည်။

ရွှီပင်းနင်း စိတ်ထဲတွင် အလွန်ပင် စိတ်မကောင်းဖြစ်ရပြီး…သူမသည် မူဟန့်၏ မျက်နှာချင်းဆိုင် ခုံမှနေ၍ သူ၏ ဘေးနားရှိ ခုံသို့ ရွှေ့ထိုင်လိုက်ကာ မူဟန် ဝိုင်ခွက်ကို မြှောက်လိုက်သည့်အချိန်တွင် သူ၏ လက်ကောက်ဝတ်ကို လှမ်း၍ ဖမ်းဆွဲတားဆီးလိုက်သည် …

"ထပ်ပြီး မသောက်ပါနဲ့တော့" ရွှီပင်းနင်းသည် လူကို ချော့မော့သည့်နေရာတွင် သိပ်မကျွမ်းကျင်သော်လည်း…မူဟန့်ကို ဤကဲ့သို့ ဆက်ပြီး အလွန်အမင်း သောက်ခွင့်မပြုနိုင်မှန်းကိုမူ သိထားသည်။

မူဟန် ရုန်းကန်ခြင်းမရှိဘဲ၊ လမ်းပျောက်နေသော လူတစ်ယောက်အလား အားကိုးရာမဲ့စွာဖြင့် ဆိုလိုက်သည်…

 "သူမ ဆုံးပါးသွားပြီးတဲ့နောက်... ကျွန်တော် တခြားမိန်းကလေးတွေနဲ့ ထပ်ပြီး တွဲခဲ့ပါသေးတယ်…သူမရဲ့ အရိပ်အယောင်ကို သူတို့ဆီမှာ အသည်းအသန် လိုက်ရှာမိခဲ့တာ... ဒါပေမယ့် ဘယ်သူမှ သူမ မဟုတ်ခဲ့ကြဘူး…သူမကတော့ တကယ်ပဲ ဆုံးပါးသွားခဲ့ပြီ... ဆုံးပါးသွားခဲ့ပြီ..."

ဤကဲ့သို့သော စကားများကို ပြောဆိုခြင်းမှာ မူဟန်အနေဖြင့် ကြိုတင်ကာကွယ်မှု (စရိုက်လက္ခဏာ တည်ဆောက်မှု) ပြုလုပ်နေခြင်း ဖြစ်သည်။ 

မည်သို့ပင်ဆိုစေ... သူသည် ယခင်က မိန်းကလေး အများအပြားနှင့် တွဲခဲ့ဖူးသူဖြစ်ရာ… နောင်တစ်ချိန်တွင် ရွှီပင်းနင်း ဤအချက်ကို သိရှိသွားခဲ့မည်ဆိုပါက ခွင့်လွှတ်နိုင်စေရန်အတွက် 'တရားဝင်' သော အကြောင်းပြချက်ကောင်းတစ်ခုကို ကြိုတင်၍ အကွက်ချ ခင်းကျင်းထားခြင်းသာ ဖြစ်သည်။

နောက်ဆုံးတွင်မူ မူဟန်သည် စကား ဆက်မပြောနိုင်တော့သည့်အလား ခေါင်းကို ငိုက်စိုက်ချလိုက်ပြီး၊ အယ်လ်ကိုဟော အရှိန်ကြောင့် ခန္ဓာကိုယ်ကို မထိန်းနိုင်တော့ဘဲ ရွှီပင်းနင်း၏ ရင်ခွင်ထဲသို့ ပစ်လဲကျသွားခဲ့တော့သည်။

ရွှီပင်းနင်း ခန္ဓာကိုယ်လေး တုန်ရင်သွားရသော်လည်း… သူ့ကို တွန်းထုတ်မပစ် ရက်ခဲ့ချေ။ သူမသည် မူဟန့်၏ ဝမ်းနည်းကြေကွဲဖွယ် စိတ်ခံစားချက်များ၏ ကူးစက်ခြင်းကို ခံလိုက်ရပြီး၊ သူမကိုယ်တိုင်လည်း မျက်ရည်များ ဝဲလှည့်ကာ ငိုကြွေးမိရင်း၊ လက်ကို ဆန့်ထုတ်၍ မူဟန့်၏ ဦးခေါင်းကို အသာအယာ ပွတ်သပ်ပေးကာ နူးညံ့စွာ ချော့မော့လိုက်သည်။ 

"အရာအားလုံး ပြီးဆုံးသွားပါပြီ... အတိတ်က ကိစ္စတွေပဲဥစ္စာ"

【 မင်းသမီး ရွှီပင်းနင်း၏ အိမ်ရှင်အပေါ် ထားရှိသော နှစ်သက်မှုအမှတ် + ၁၀  လက်ရှိ စုစုပေါင်း နှစ်သက်မှုအမှတ်မှာ ၇၅ (လေးစားခြင်း -) သို့ ရောက်ရှိသွားသည်။ ဇာတ်လိုက် ချင်ဖုန်း  ၏ ဇာတ်လိုက်ရောင်ဝါအမှတ် - ၂၀ လျော့ကျသွားပြီး၊ အိမ်ရှင်၏ ဗလိန်ရောင်ဝါအမှတ် + ၂၀ တိုးမြင့်လာသည်။ 】

ရွှီပင်းနင်း၏ နွေးထွေးလှသော ရင်ခွင်ထဲတွင် မှီတင်းနေရင်းနှင့် မူဟန်သည် စနစ်၏ အကြောင်းကြားစာကို ချက်ချင်း လက်ခံရရှိလိုက်ရာ၊ အပြစ်ကင်းစင်လှသော မိန်းကလေးများအား လှည့်စားရခြင်းမှာ တကယ်ကို လွယ်ကူလွန်းလှသည်ဟု စိတ်ထဲကနေ တိတ်တဆိတ် သက်ပြင်းချကာ ရယ်မောလိုက်မိတော့သည်။

အကယ်၍ အချစ်ရေးတွင် လှည့်စားခြင်းကို ကြုံတွေ့ဖူးထားသော အခြားမိန်းကလေးတစ်ဦးသာ ဆိုပါက ဤကဲ့သို့သော ဇာတ်လမ်းမျိုးကို လုံးဝ ယုံကြည်မည်မဟုတ်သည့်အပြင်၊ မူဟန်သည် သနားစရာ ကောင်းဟန်ဆောင်ကာ မိမိကိုယ်ကိုယ် အချစ်ကြီးသူ  အဖြစ် ပုံဖော်နေခြင်းဖြစ်ကြောင်း ချက်ချင်း ရိပ်မိသွားပေလိမ့်မည်။

သို့သော်လည်း ရွှီပင်းနင်းကမူ ၎င်းကို အပြည့်အဝ ယုံကြည်သွားခဲ့ချေပြီ။

သို့သော် ဤသည်ကလည်း ကျိုးကြောင်းဆီလျော်လှပေသည်။ ရွှီပင်းနင်းသည် တစ်ခါမျှ ရည်းစားမထားဖူးသဖြင့် အမျိုးသားများ၏ လှည့်ကွက်များစွာကို ဘယ်လိုလုပ် သိရှိနိုင်ပါအံ့နည်း။ 

ထို့အပြင် သူမသည် အချစ်ကို အလွန်အမင်း ပုံကြီးချဲ့ တွေးတတ်သူ ဖြစ်သည်။ 

၎င်းအပြင် မိခင်ဖြစ်သူ ရွှီရိုကလည်း မူဟန်သည် လူကောင်းတစ်ယောက်ဖြစ်ကြောင်း သူမ၏ နားထဲတွင် ခဏခဏ ရိုက်သွင်းပေးထားခဲ့သေးသည်။ 

ရွှီပင်းနင်းအနေဖြင့် မူဟန်သည် သူမအား လှည့်စားရန်အတွက် ဇာတ်လမ်းတစ်ပုဒ်ကို လုပ်ကြံဖန်တီးလိမ့်မည် ဟူသော အချက်ကို အစောကတည်းက စိုးစဉ်းမျှပင် ထည့်သွင်းစဉ်းစားခဲ့ခြင်း မရှိချေ။