အခန်း (၁) - ဗီလိန်ဇာတ်ရုပ်ကို ရရှိခြင်း
ရွှီပင်းနင်း သည် မိသားစု၏ သတ္တမမြောက် သမီးဖြစ်ပြီး အစ်မ ခြောက်ယောက်ရှိသည်။
ထိုအစ်မခြောက်ယောက် မည်သည့်အလုပ်အကိုင်များ လုပ်ကိုင်နေသည်ကို လောလောဆယ် မသိရသေးပေ။
သူမတွင် ချင်ဖုန်း အမည်ရသည့် မောင်လေးတစ်ယောက်ရှိသော်လည်း လွန်ခဲ့သော ငါးနှစ်ခန့်က ပျောက်ဆုံးသွားခဲ့ပြီး သေဆုံးသွားပြီဟု ယူဆရသည်။
ယခုအခါ ရွှီပင်းနင်းနှင့် အနီးကပ်ဆုံးသူမှာ သူမ၏ မိခင် ရွှီရို ပင်ဖြစ်သည်။
ရွှီရိုသည် အလှမပျက်သေးသော မုဆိုးမတစ်ဦးဖြစ်ကာ သူမ၏ ခင်ပွန်းကွယ်လွန်သွားခဲ့သည်မှာ နှစ်နှစ်ဆယ်ရှိပြီဖြစ်သည်။
ချင်ဖုန်းမှာ ရွှီရို ၏ သားအရင်းဖြစ်ပြီး ရွှီပင်းနင်းနှင့် အခြားအစ်မ ခြောက်ယောက်စလုံးမှာ မွေးစားထားခြင်းဖြစ်သည်။
မူဟန် သည် သူ၏ဖုန်းထဲသို့ ဝင်ရောက်လာသော မက်ဆေ့ချ်ကို ကြည့်လိုက်ပြီးနောက် ကျောချမ်းကာ ချွေးစေးများ ပျံထွက်လာခဲ့သည်။
(စုံစမ်းခိုင်းထားတဲ့ လူဆီမှ ပေးပို့သော မက်ဆေ့ခ်ျ)
သူသည် ကူးပြောင်းလာသူတစ်ဦးဖြစ်သည်။ ယခင်ဘဝက အလုပ်ဒဏ်ပိပြီး သေဆုံးသွားခဲ့ရာမှ သူ၏ယခင်ကမ္ဘာနှင့် အနည်းငယ်ကွဲပြားသော ဤကမ္ဘာသို့ ကူးပြောင်းရောက်ရှိလာခဲ့ခြင်းဖြစ်သည်။
ဤဘဝတွင်မူ သူသည် အထက်တန်းလွှာ ဆွေကြီးမျိုးကြီးထဲတွင် မွေးဖွားလာခဲ့ကာ ရွှေဇွန်းကိုက်လျက် မွေးဖွားလာသူဖြစ်သည်။
ချမ်းသာကြွယ်ဝမှု၊ အာဏာစက်များနှင့်အတူ မွေးဖွားလာကတည်းက ဘဝ၏ အထွတ်အထိပ်သို့ ရောက်ရှိနေခဲ့ပြီး မည်သည့်ရုန်းကန်မှုမျှ ပြုလုပ်ရန် မလိုအပ်ခဲ့ပေ။
ယခင်ဘဝက အလွန်ပင်ပန်းဆင်းရဲခဲ့ရသဖြင့် ဤဘဝသစ်တွင် ဘဝကို အပြည့်အဝ ခံစားစံစားရန် သဘာဝကျကျပင် ဆန္ဒရှိခဲ့သည်။
ထို့ကြောင့် မူဟန်သည် ဤကမ္ဘာ၌ အပူအပင်ကင်းမဲ့စွာဖြင့် နှစ်ဆယ့်ငါးနှစ်တိုင်တိုင် နေထိုင်ခဲ့သည်။
သို့သော်…
မကြာသေးမီက မူဟန်သည် ရွှီပင်းနင်း အမည်ရှိ မိန်းကလေးတစ်ဦးနှင့် ဆုံတွေ့ခဲ့သည်။
ရွှီပင်းနင်းသည် အသက် နှစ်ဆယ့်တစ်နှစ်ရှိပြီဖြစ်ကာ ချောမောလှပပြီး အချိုးအစားကျနသော ကိုယ်လုံးကိုယ်ပေါက်ကို ပိုင်ဆိုင်ထားသည်။ သူမသည် မူဟန်မြင်ဖူးသမျှထဲတွင် အလှဆုံး မိန်းမတစ်ဦးပင်ဖြစ်သည်။
သို့သော် ထိုအချက်က အရေးအကြီးဆုံး မဟုတ်ပေ။ အရေးအကြီးဆုံးအချက်မှာ ရွှီပင်းနင်းသည် ထူးချွန်ထက်မြက်လွန်းလှခြင်းပင်ဖြစ်သည်။
အသက် ဆယ့်ရှစ်နှစ်အရွယ်တွင် သူမသည် နာမည်ကြီး တက္ကသိုလ်တစ်ခုမှ ပညာသင်ယူပြီးမြောက်ခဲ့ပြီး ဘွဲ့ရသည်နှင့် အလှကုန်ကုမ္ပဏီတစ်ခုကို တည်ထောင်ခဲ့သည်။ သုံးနှစ်တာ ဖွံ့ဖြိုးတိုးတက်လာပြီးနောက် ကုမ္ပဏီသည် အောင်မြင်စွာ ရှယ်ယာထုတ်ရောင်းနိုင်ခဲ့ပြီး လက်ရှိကာလတန်ဖိုးမှာ ဘီလီယံ ၅၀ ကျော်နေပြီဖြစ်သည်။
သူမသည် မယုံနိုင်လောက်အောင် ထက်မြက်ပြီး လှပကာ ရည်းစားတစ်ခါမျှ မထားဖူးသေးဟုလည်း ဆိုကြသည်။ အပြစ်အနာအဆာတစ်ခုကို ပြရမည်ဆိုလျှင် သူမသည် အလွန်အေးစက်ပြီး မာနကြီးလွန်းပုံပေါ်နေခြင်းပင်ဖြစ်သည်။
သို့သော် ထိုအချက်ကြောင့်ပင်လျှင် ပို၍စိန်ခေါ်မှုတစ်ရပ် ဖြစ်လာခဲ့သည်။ မူဟန်သည် စိတ်ဝင်စားသွားခဲ့ပြီး သူမကို အရယူရန် ဆုံးဖြတ်ချက်ချလိုက်သည်။
သို့သော်လည်း အနည်းငယ် ထိတွေ့ဆက်ဆံကြည့်ပြီးနောက် ဤမိန်းမသည် ကိုင်တွယ်ရ အလွန်ခက်ခဲကြောင်း မူဟန် တွေ့ရှိသွားခဲ့သည်။
ဒေါ်လာဘီလီယံရာချီ ချမ်းသာသော လုပ်ငန်းစုကြီး၏ တစ်ဦးတည်းသော ဆက်ခံသူအနေဖြင့် သူသည် မိန်းကလေးများကို ချဉ်းကပ်ရာတွင် အမြဲတမ်း အောင်မြင်ခဲ့ပြီး သုံးရက်ထက်ပို၍ အချိန်ယူခဲ့ရဖူးသည် မရှိချေ။ သို့တိုင် ရွှီပင်းနင်းကမူ သူ၏လှည့်ကွက်များထဲသို့ လုံးဝမကျဆင်းခဲ့သည့်အပြင် သူ့ကို အတော်လေး ရွံရှာနေပုံပင် ရလေသည်။
မူဟန် ဒေါသထွက်လာပြီး မသမာသော နည်းလမ်းအချို့ကို သုံးရန် ကြံစည်ခဲ့သဖြင့် ရွှီပင်းနင်း၏ နောက်ခံကို စုံစမ်းခိုင်းလိုက်ခြင်းဖြစ်သည်။
"ချင်ဖုန်း... အဲဒီနာမည်က တော်တော်ရင်းနှီးနေပါလား..."
မူဟန် ခေတ္တမျှ စဉ်းစားလိုက်ပြီးနောက် အမြန်ပင် မှတ်မိသွားခဲ့သည်။
လွန်ခဲ့သော ငါးနှစ်က ချင်ဖုန်း အမည်ရသော ကောင်လေးတစ်ယောက်နှင့် အငြင်းပွားမှုတစ်ခုကြောင့် သူ ပြဿနာတက်ခဲ့ပြီး ရန်ဖြစ်ခဲ့ကြသည်။ ထိုရန်ပွဲတွင် မူဟန် မနိုင်ခဲ့ဘဲ ဆေးရုံတွင် တစ်လခန့် လှဲနေခဲ့ရသည်။
ထိုစဉ်က မူဟန့် မိဘများမှာ အလွန် ရင်ကွဲခဲ့ရသည်။
ထို့နောက် မကြာမီမှာပင် ချင်ဖုန်း အမည်ရှိသော ထိုကောင်လေး ပျောက်ဆုံးသွားခဲ့သည်။
တစ်ဦးတည်းသော သားဖြစ်သည့်အတွက် မူဟန့် မိဘများသည် သူ့ကို ငယ်စဉ်ကတည်းက အလိုလိုက်ခဲ့ပြီး သူဖြစ်ချင်တာ မှန်သမျှကို ခွင့်ပြုပေးခဲ့သည်။ ရိုက်နှက်ဆုံးမရန် နေနေသာသာ ဆူတောင် မဆူခဲ့ကြချေ။
ချင်ဖုန်း ပျောက်ဆုံးသွားမှုသည် သူ၏မိသားစုနှင့် ပတ်သက်နေနိုင်ကြောင်း မူဟန် ခန့်မှန်းမိလိုက်သည်။
ငါးနှစ်တိုင်တိုင် ပျောက်ဆုံးနေသော လူငယ်တစ်ဦး…အိမ်တွင် သွေးသားမတော်စပ်သော အစ်မ ခုနစ်ယောက်၊ ကိုယ်ချင်းစာတရား အနည်းငယ်ရှိသော်လည်း အများကြီးမဟုတ်သော၊ ထိုလူငယ်နှင့် အညှိုးအတေးရှိပြီး ယခုအခါ ထိုလူငယ်၏ လှပသော အစ်မတစ်ဦးကို မျက်စိကျနေသော ချမ်းသာသည့် ဒုတိယမျိုးဆက်သခင်လေးတစ်ဦး...
ဤအရာသည် မြို့ပြ စိတ်ကူးယဉ် ဝတ္ထုတစ်ပုဒ်၏ ဇာတ်ကွက်စီးဆင်းမှုဖြစ်ကြောင်း ရှင်းလင်းနေပေသည်။
သို့သော် ကံမကောင်းစွာဖြင့် သူသည် ဇာတ်လိုက် မဟုတ်ဘဲ ဗီလိန် တစ်ဦး ဖြစ်နေပုံရသည်။
"ငါက ကောင်းမွန်တဲ့ ဘဝလေးတစ်ခုမှာ မွေးဖွားလာခဲ့တယ် ထင်နေတာ၊ တကယ်တမ်းကျ ဗီလိန်ဇာတ်ရုပ်ကို ရထားတာကိုး"
ပိုမိုနက်ရှိုင်းစွာ တွေးမိလေ မူဟန် ကျောချမ်းလာလေ ဖြစ်သည်။
သူသည် အလွန်ဆိုးရွားသော ယုတ်မာမှုမျိုးကို ကိုယ်တိုင်ကိုယ်ကျ မည်သည့်အခါကမျှ မလုပ်ခဲ့ဖူးချေ။
သနားကြင်နာတတ်သော စိတ်ထားလေးပင် ရှိသေးပြီး လဲကျနေသော သက်ကြီးရွယ်အိုများကို ကူညီပေးခြင်း၊ သဘာဝဘေးအန္တရာယ် ကြုံတွေ့ရသော ဒေသများသို့ အလှူငွေထည့်ဝင်ခြင်းများပင် ပြုလုပ်ခဲ့သေးသည်။
သူ၏ အကြီးမားဆုံး အပြစ်အနာအဆာမှာ မိန်းကလေး အနည်းငယ်ခန့်နှင့် တွဲဖူးခြင်းသာ ဖြစ်သည်။
ထူးချွန်လွန်းလှသည်ဟု မခေါ်ဆိုနိုင်သော်လည်း ချမ်းသာသော ဒုတိယမျိုးဆက်များအကြားတွင်တော့ သူသည် သေချာပေါက် ကောင်းမွန်သော သူတစ်ယောက်ဖြစ်ပေသည်။
ရွှီပင်းနင်း ပေါ်လာချိန်တွင် မူဟန်သည် ရူးသွပ်နေသကဲ့သို့ "သူမကို ဘယ်လိုနည်းနဲ့ဖြစ်ဖြစ် ရအောင်ယူမယ်" ဆိုသည့် ပြင်းထန်သော စွဲလမ်းမှုတစ်ခု ဖြစ်ပေါ်လာခဲ့ခြင်းမှာ အနည်းငယ် ထူးဆန်းနေသည်။
သူလိုချင်တာကို မရလျှင် တကယ့်ကို အစွန်းရောက်သော အရာတစ်ခုခုကို လုပ်မိနိုင်သည် သို့မဟုတ် နောက်ဆုံးတွင် ရူးသွပ်သွားနိုင်ချေရှိသည်။
ရွှီပင်းနင်း၏ နောက်ခံကို စုံစမ်းရန် လူလွှတ်ခဲ့ခြင်းက ထို အလားအလာများကို အရိပ်အမြွက် ပြသနေသည်။
သူသည် တကယ်ပင် ဗီလိန်ဇာတ်ရုပ်ကို ရထားသည်ဟု ယူဆပါက ဤ "ထူးဆန်းမှု" မှာ သဘာဝကျသွားပေလိမ့်မည်။
သူသည် မင်းသမီး၏ ရောင်ဝါ လွှမ်းမိုးခံရခြင်း သို့မဟုတ် ကံကြမ္မာကဲ့သို့သော လျှို့ဝှက်ဆန်းကြယ်သည့် စွမ်းအားတစ်ခုခု၏ ဆွဲဆောင်ခြင်းခံရကာ ရွှီပင်းနင်းကို အရယူလိုသည့် ဤပြင်းထန်သော စွဲလမ်းမှုကြီး ဖြစ်ပေါ်လာခြင်းဖြစ်နိုင်ကြောင်း မူဟန် ခန့်မှန်းမိလိုက်သည်။
ဤပြင်းထန်သော စွဲလမ်းမှုကို ကျေနပ်စေရန် သူ လှုပ်ရှားလိုက်သည်နှင့် ဇာတ်လမ်းကို ရှေ့ဆက်သွားစေမည့် သက်ဆိုင်ရာ အပြုအမူများကို လုပ်ဆောင်မိမည်ဖြစ်ပြီး ဇာတ်လိုက်ဖြစ်သူ အစွမ်းပြကာ သူ့ကို ပါးရိုက်စော်ကားခြင်းခံရရန် ခြေနင်းတုံးသက်သက် ဖြစ်သွားပေလိမ့်မည်။
မြို့ပြ စိတ်ကူးယဉ်ဝတ္ထုများစွာကို ဖတ်ဖူးသည့် မူဟန်သည် ဗီလိန်တစ်ဦး၏ နောက်ဆုံးနိဂုံးမှာ မည်သို့ရှိမည်ကို သဘာဝကျစွာပင် နားလည်ထားပြီးဖြစ်သည်။
ဝတ္ထုများ၏ ဇာတ်လမ်းသွားများအရ သူ၏နိဂုံးမှာ မိသားစုတစ်ခုလုံး ပျက်စီးသွားပြီး သူ၏ မိသားစုပိုင်ဆိုင်မှုများကို ဇာတ်လိုက်ဖြစ်သူက လုယူသွားခြင်းပင် ဖြစ်ရန် သေချာနေသည်။
"ကျစ်… သွားပါပြီ” မူဟန်သည် ရုတ်တရက် စိတ်အနှောင့်အယှက်ဖြစ်မှုများဖြင့် ပြည့်နှက်သွားသည်။
【"ကမ္ဘာပေါင်းများစွာ စနစ်ဖြန့်ချီသူ စနစ် နှင့် ချိတ်ဆက်မှု ပြုလုပ်နေပါသည်...】
ထိုအချိန်မှာပင် ချစ်စရာကောင်းသော မိန်းကလေးတစ်ဦး၏ အသံက သူ၏စိတ်ထဲတွင် ထွက်ပေါ်လာခဲ့သည်။ ဤသည်မှာ မည်သည့်အရာဖြစ်ကြောင်း မူဟန် ချက်ချင်း သဘောပေါက်သွားသည်။
ကူးပြောင်းလာသူများသည် များသောအားဖြင့် စနစ် တစ်ခုနှင့်အတူ ပါလာတတ်သည်။
၂၅နှစ်ရှိပြီဆိုတော့ သူကတော့ ချွင်းချက်ဖြစ်မည်ဟု ထင်ထားခဲ့သော်လည်း တကယ်တမ်းတွင် အနည်းငယ် နောက်ကျပြီးမှ ရောက်လာခြင်းသာ ဖြစ်ပေသည်။
သို့သော် သူသည် ဗီလိန်တစ်ယောက်ဖြစ်ပါလျက် အဘယ်ကြောင့် 'ဗီလိန်စနစ် ' ပေါ်မလာသနည်း။ အဘယ်ကြောင့် 'ကမ္ဘာပေါင်းများစွာ စနစ်ဖြန့်ချီသူ’ စနစ် ဟူသော အရာတစ်ခုကို ချိတ်ဆက်မိရသနည်း။
သို့ရာတွင် စွမ်းအားကြီးမားနေသရွေ့ မည်သည့်စနစ်အမျိုးအစားဖြစ်စေ အရေးမကြီးပေ။ မူဟန့် ရင်ထဲတွင် မျှော်လင့်ချက် ရောင်ခြည်လေးတစ်ခု တောက်ပလာခဲ့သည်။
မကြာမီမှာပင် စနစ်ကို အောင်မြင်စွာ ချိတ်ဆက်နိုင်သွားခဲ့သည်။
မူဟန်သည် အချိန်ဆွဲမနေတော့ဘဲ စနစ်၏ လုပ်ဆောင်ချက်များကို မိတ်ဆက်ပေးရန် တိုက်ရိုက်ပင် တောင်းဆိုလိုက်သည်။
【ဤစနစ်တွင် စနစ်အမျိုးမျိုးကို ဖန်တီးရန် စနစ်ပုံစံခွက် အသီးသီးကို ပိုင်ဆိုင်ထားပြီး (ပိုင်ရှင်) အား စနစ် ဖြန့်ချီသူတစ်ဦး ဖြစ်လာစေမည်ဖြစ်သည်။ ၄၈ နာရီလျှင် တစ်ကြိမ် မစ်ရှင်တစ်ခုကို ဖြန့်ဝေပေးနိုင်ပါသည်။】
"ဒါက ဘာလုပ်ရမှာလဲ အကျိုးအမြတ်တွေ အားလုံးက တခြားသူတွေဆီ ရောက်သွားမှာလေ ငါ့အတွက် ဘာရမှာလဲ" မူဟန်က ညည်းတွားလိုက်သည်။
【ပိုင်ရှင် အနေဖြင့် ဇာတ်ကောင်တစ်ဦးထံသို့ စနစ်ကို အောင်မြင်စွာ ဖြန့်ဝေပေးပြီးသောအခါ၊ ထိုဇာတ်ကောင် ပြီးမြောက်အောင်မြင်စေရန်အတွက် Host က သင့်တင့်လျောက်ပတ်သော တာဝန်များကို သတ်မှတ်ပေးနိုင်ပါသည်။ တာဝန်များ ပြီးမြောက်သွားပါက ထိုဇာတ်ကောင်သည် ဆုလာဘ်တစ်ခု ရရှိမည်ဖြစ်ပြီး Host အနေဖြင့်လည်း မူလတန်ဖိုး၏ ၂ ဆ မှ ၁၀ ဆ အထိ တုံ့ပြန်မှု ဆုလာဘ် ကို ရရှိနိုင်ပါသည်။】
မူဟန့် မျက်လုံးများ အနည်းငယ် အရောင်လင်းသွားသည်။ ဒါက တော်တော်လေး ကောင်းမွန်သည့်ပုံ ပေါ်သည်။
"စနစ်က ပေးမယ့် ဆုလာဘ်တွေကို ငါက တိုက်ရိုက် သတ်မှတ်ပေးလို့ရလား" မူဟန်သည် အဓိကကျသော မေးခွန်းတစ်ခုကို တွေးမိသွားသည်။
အကယ်၍ သူက ဆုလာဘ်များကို ကိုယ်တိုင် သတ်မှတ်နိုင်မည်ဆိုပါက သူလိုအပ်သမျှကို အခြားသူများအတွက် သတ်မှတ်ပေးနိုင်မည်ဖြစ်သည်။ ထိုသို့ဆိုလျှင် သူသည် အဆပေါင်းများစွာသော တုံ့ပြန်မှုဆုလာဘ်ကို ရရှိနိုင်မည်ဖြစ်ပြီး ၎င်းသည် ရိုးရှင်းစွာပင် အံ့မခန်း ဖြစ်သွားပေလိမ့်မည်။
【မရပါ… စနစ်မှ ခွဲဝေပေးသော ဆုလာဘ် အမျိုးအစားသည် ထိုဇာတ်ကောင်၏ လတ်တလော အလိုအပ်ဆုံးသော ဆန္ဒကို စံနှုန်းအဖြစ် အခြေခံပါသည်။ ဥပမာ - တစ်စုံတစ်ယောက်က ငွေများစွာရှာချင်နေပါက ပိုင်ရှင် သတ်မှတ်ထားသော တာဝန်ကို ပြီးမြောက်ပါက ရလဒ်အနေဖြင့် ငွေ ၁ သန်း ဆုလာဘ်အဖြစ် ရရှိမည်ဆိုပါက ၅ ဆ တုံ့ပြန်မှုဆုလာဘ်ကို အသက်သွင်းမိပါက Host အနေဖြင့် ငွေ ၅ သန်း ရရှိမည်ဖြစ်ပါသည်】
"သြော်... အဲဒီလိုလား" မူဟန် နှုတ်ခမ်းမဲ့လိုက်သော်လည်း လက်ခံနိုင်စရာတော့ ရှိပေသည်။
လူအမျိုးမျိုးတွင် မတူညီသော လိုအပ်ချက်များနှင့် ဆန္ဒများ ရှိကြသည်။ သူသည် ဆုလာဘ်ကို ရွေးချယ်၍မရသော်လည်း လူကိုမူ ရွေးချယ်နိုင်သည်။ တချို့က ငွေကိုနှစ်သက်သည်၊ တချို့က မိန်းမလှများကို နှစ်သက်သည်၊ တချို့က အာဏာကို နှစ်သက်သည်၊ တချို့က ကြီးမားသော ခွန်အားကို လိုချင်ကြပြီး တချို့ကတော့ သန်စွမ်းကျန်းမာသော ခန္ဓာကိုယ်ကို လိုချင်ကြသည်...
စနစ်တစ်ခု မဖြန့်ဝေမှီ သူသည် အခြားသူများ၏ လိုအပ်ချက်များနှင့် ဆန္ဒများကို ဦးစွာ နားလည်အောင် လုပ်နိုင်သည်။ ၎င်းသည် ဆုလာဘ်များကို သွယ်ဝိုက်သောနည်းဖြင့် ရွေးချယ်ခြင်းပင်ဖြစ်သည်။
"ဘယ်သူ့ကိုမဆို စနစ် ဖြန့်ဝေပေးလို့ရတာလား" မူဟန် ထပ်မေးလိုက်သည်။
【ဇာတ်လိုက်များ တွင် ဇာတ်လိုက်ရောင်ဝါ ရှိပြီး မင်းသမီးများ တွင် မင်းသမီးရောင်ဝါ ရှိကြသည်။ ၎င်းတို့သည် အထူး ကံကြမ္မာသယ်ဆောင်သူများ ဖြစ်ကြသည်။ အချို့သော ဇာတ်လိုက်များသည် ကိုယ်တိုင် စနစ်များကို ပိုင်ဆိုင်ထားပြီးဖြစ်ရာ ၎င်းတို့သည် စနစ် ဖြန့်ဝေခြင်း၏ လက်ခံသူများ ဖြစ်လာနိုင်မည်မဟုတ်ပါ။】
မူဟန် ခေါင်းညိတ်လိုက်သည်။ တစ်နည်းအားဖြင့်ဆိုရသော် အဓိက ဇာတ်လိုက်မင်းသားနှင့် မင်းသမီးမှလွဲ၍ ကျန်လူအားလုံးသည် စနစ် ဖြန့်ဝေခြင်းအတွက် ပစ်မှတ်များ ဖြစ်နိုင်ပေသည်။
ထို့ပြင် သူက တာဝန်များကို သတ်မှတ်ပေးနိုင်သောကြောင့် မင်းသားနှင့် မင်းသမီးမှလွဲ၍ ကျန်လူတိုင်းကို "သူ့လူများ" အဖြစ် သတ်မှတ်နိုင်မည်ဖြစ်သည်။ ထိုသို့ဆိုလျှင် ဇာတ်လိုက်ကို ရှင်းလင်းရန်ကိစ္စမှာ ရိုးရှင်းသည့် ကိစ္စရပ်တစ်ခု ဖြစ်မသွားပေဘူးလား။
"လုပ်ကြံသတ်ဖြတ်တဲ့သူ တစ်ယောက်ကို စနစ် ဖြန့်ဝေပေးလိုက်ပြီးတော့ ဇာတ်လိုက်ကို တိုက်ရိုက်သတ်ဖို့ တာဝန်တစ်ခု သတ်မှတ်ပေးလိုက်လို့ရလား" မူဟန်သည် အလုပ်ရှုပ်သက်သာစေရန် တိုက်ရိုက်ပင် စီစဉ်လိုက်သည်။
【Host အနေဖြင့် ထိုသို့ ရွေးချယ်နိုင်ပါသည်။ သို့သော် ဇာတ်လိုက်သည် ဇာတ်လိုက်ရောင်ဝါ၏ ကာကွယ်မှုအောက်တွင်ရှိပြီး အန္တရာယ်ကို လွယ်ကူစွာ ရှောင်လွှဲနိုင်ပါသည်။ ထို့အပြင် ဇာတ်လိုက်အများစုသည် သာမန်လုပ်ကြံသူများ မရင်ဆိုင်နိုင်သော ကိုယ်ပိုင် သိုင်းပညာစွမ်းရည်များကို ပိုင်ဆိုင်ထားကြပါသည်။】
"ဒါဆို ကမ္ဘာပေါ်မှာ အတော်ဆုံး လုပ်ကြံသတ်ဖြတ်သူကို ရှာရင်တောင် မရဘူးလား" မူဟန် အရှုံးမပေးဘဲ ဆက်မေးလိုက်သည်။
【ပိုင်ရှင် အနေဖြင့် စနစ်ဖြန့်ဝေရန် ပစ်မှတ်ကို ရွေးချယ်ရာတွင် ထိုပစ်မှတ်၏ ဇာတ်ကောင်ရောင်ဝါ သည် ပိုင်ရှင်ထက် နိမ့်ကျနေရပါမည်…မဟုတ်ပါက Host သည် ၎င်းတို့ထံ စနစ် ဖြန့်ဝေပေးနိုင်မည်မဟုတ်ပါ။ ပိုင်ရှင် ၏ လက်ရှိ ရောင်ဝါအရ ကမ္ဘာ့အတော်ဆုံး လုပ်ကြံသတ်ဖြတ်သူထံ စနစ် ဖြန့်ဝေပေးရန် မဖြစ်နိုင်ပါ】
"ဒါဆို ငါက ဘယ်လိုလုပ် ကစားရမှာလဲ" မူဟန် ဒေါသတကြီး ပြောလိုက်သည်။
【ပိုင်ရှင် သည် မိမိ၏ ကိုယ်ပိုင်ရောင်ဝါကို မြှင့်တင်နိုင်ပါသည်။】
"ဒါမှပေါ့ ဒါပေမယ့် ဘယ်လိုမြှင့်တင်ရမှာလဲ" မူဟန့် မျက်နှာထား အနည်းငယ် ပြေလျော့သွားသည်။
【ပိုင်ရှင် ၏ ဇာတ်ကောင်ကို ဗီလိန်အဖြစ် သတ်မှတ်ထားသောကြောင့် ရောင်ဝါသည် ဗီလိန်ရောင်ဝါ ဖြစ်ပါသည်။ ရောင်ဝါအမှတ်များကို ဇာတ်လိုက်နှင့် မင်းသမီးတို့ထံမှ လုယူနိုင်ပါသည်။ အမှတ်များ လုယူနိုင်သော နည်းလမ်းများမှာ (အောက်ပါတို့သာမက) ဇာတ်လိုက်၏ စိတ်ဓာတ်ကို နှောင့်ယှက်ခြင်း၊ မင်းသမီး၏ စိတ်ဓာတ်ကို နှောင့်ယှက်ခြင်း၊ ဇာတ်လိုက်ကို ဒဏ်ရာရစေခြင်း (သို့မဟုတ်) မသန်မစွမ်းဖြစ်စေခြင်း၊ မင်းသမီးကို ဒဏ်ရာရစေခြင်း (သို့မဟုတ်) မသန်မစွမ်းဖြစ်စေခြင်း၊ ဇာတ်လိုက်ကို သတ်ဖြတ်ခြင်း၊ မင်းသမီးကို သတ်ဖြတ်ခြင်း၊ ဇာတ်လိုက်၏ ခန္ဓာကိုယ်နှင့် ဝိညာဉ်ကို သိမ်းပိုက်ခြင်း၊ မင်းသမီး၏ ခန္ဓာကိုယ်နှင့် ဝိညာဉ်ကို သိမ်းပိုက်ခြင်း စသည်တို့ ဖြစ်ကြပါသည်။】
ဇာတ်လိုက်ရဲ့ ခန္ဓာကိုယ်နဲ့ ဝိညာဉ်ကို သိမ်းပိုက်မယ်…အဲဒါကြီးက အရမ်းလွန်လွန်းနေပြီ…
ဤနည်းလမ်းများထဲတွင် မူဟန်သည် မင်းသမီး၏ ခန္ဓာကိုယ်နှင့် ဝိညာဉ်ကို သိမ်းပိုက်ခြင်းဘက်သို့သာ အများဆုံး စိတ်ယိမ်းနေမိသည်။
သို့သော် ပထမဆုံးစနစ်ကို မည်သူ့ထံ ပေးသင့်သနည်း။ မူဟန် စတင်၍ ခွဲခြမ်းစိတ်ဖြာကြည့်လိုက်သည်။
ချင်ဖုန်း ပျောက်ဆုံးနေသည်မှာ ၅ နှစ်ရှိပြီဖြစ်ပြီး သတင်းအစအနမျှ မရရှိပေ။ ဝတ္ထုများ၏ ပုံစံခွက် ဇာတ်လမ်းသွားများအရ သူသည် တစ်နေရာရာတွင် ပညာများ သင်ယူနေမှာမလွဲ။
သူ တောင်ပေါ်မှ ဆင်းလာမှသာလျှင် ဇာတ်လမ်းက တရားဝင် စတင်မည်ဖြစ်သည်။ ချင်ဖုန်း ဆင်းမလာသေးသရွေ့ လှုပ်ရှားပြင်ဆင်ရန် အချိန်များစွာ ရှိနေသေးသည်။
မူဟန် ခေတ္တမျှ စဉ်းစားလိုက်ပြီး သူ၏ ဦးစားပေးအစီအစဉ်အလိုက် ရည်မှန်းချက်ငယ် သုံးခုကို ယာယီ ချမှတ်လိုက်သည်။
ဇာတ်လိုက် တောင်ပေါ်မှ မဆင်းလာမီ ရွှီပင်းနင်းကို အနည်းဆုံးတော့ ရအောင်ယူရမည်။
ဖြစ်နိုင်လျှင် ဇာတ်လိုက်ကို ထိပ်တိုက်ရင်ဆိုင်နိုင်မည့် အရင်းအနှီးရှိစေရန် မိမိ၏ တိုက်ခိုက်ရေးစွမ်းအားကို တတ်နိုင်သမျှ မြှင့်တင်ရမည်။
ဘေးကင်းလုံခြုံစေရန်အတွက် အကောင်းဆုံးမှာ အကာအကွယ် တစ်ခု ရယူရန်ဖြစ်သည်။
အကယ်၍ တစ်စုံတစ်ယောက်က သူ့ကို နောက်ခံပေးထားမည်ဆိုပါက ဇာတ်လိုက်ကို ကြောက်စရာမလိုတော့ဘဲ ဖြေရှင်းရန် ပိုမိုလွယ်ကူလာမည်ဖြစ်သည်။ ထိုအကာအကွယ် အတွက် အကောင်းဆုံးသော ကိုယ်စားလှယ်လောင်းမှာ ဇာတ်လိုက်၏ မိခင်အရင်းဖြစ်သူ ရွှီရို ပင် ဖြစ်သည်မှာ သံသယဖြစ်ဖွယ်မရှိချေ။