မြောက်ပိုင်းဝိညာဉ်ဒေသ.. ထိုက်ယီ သန့်စင်နယ်မြေ။
ထျန်ကျီးတောင်ထိပ်ရှိ ခမ်းနားထည်ဝါလှသော ခန်းမတစ်ခုအတွင်း၌ ...
"ငါ... ကူးပြောင်းလာတာလား..."
ဓားသွားကဲ့သို့ တောက်ပြောင်သော မျက်ခုံးမွှေးများနှင့် ကြယ်ပွင့်များအလား လင်းလက်သည့်မျက်လုံးများကို ပိုင်ဆိုင်ထားသော လူငယ်လေးတစ်ဦးသည် လက်ထဲတွင် တံမြက်စည်းကိုင်ကာ နံရံကိုမှီရင်း ရေရွတ်လိုက်သည်။
သူသည် ကြီးကျယ်ခမ်းနားလှသော်လည်း စိမ်းသက်လှသည့် ပတ်ဝန်းကျင်ကို ကြည့်ရှုရင်း သူ၏ စိတ်ထဲတွင် အတွေးများ နက်ရှိုင်းနေ၏။
ထိုစဉ် ရုတ်တရက်ဆိုသလိုပင် မှတ်ဉာဏ်အမြောက်အမြားသည် သူ၏ဦးနှောက်ထဲသို့ စီးဝင်လာကာ သူ၏ မျက်ဝန်းအစုံမှာ တစ်စထက်တစ်စ လင်းလက်လာခဲ့သည်။
"ငါ တကယ်ပဲ ကူးပြောင်းလာတာပဲ.. အဲဒါလည်း ငါ အခုလေးတင် ဖတ်တော့မယ့် ဝတ္ထုထဲကို ရောက်သွားတာ ဖြစ်ပုံရတယ်.. ငါက ဘယ်လိုဇာတ်ကောင်လဲ မသိဘူး.. ပင်မဇာတ်ကောင်တော့ မဖြစ်လောက်ပါဘူး နော်..."
သူ၏အမည်မှာ လုယင် ဖြစ်သည်။ မူလက သူသည် အိပ်ရာပေါ်တွင် လဲလျောင်းရင်း လက်ရာမြောက်လှသော ဝတ္ထုတစ်ပုဒ်ကို ဖတ်ရှုရန် ပြင်ဆင်နေစဉ် ရှန်းရှအမျိုးအစား ဝတ္ထုတစ်ပုဒ်ကို တွေ့ရှိခဲ့ခြင်း ဖြစ်သည်။ သို့သော် ဇာတ်လမ်းအကျဉ်းကို ဖတ်ပြီးခါစတွင် ဝတ္ထုထဲသို့ ချက်ချင်း ကူးပြောင်းလာလိမ့်မည်ဟု မည်သူက ထင်ထားမည်နည်း။
ထိုဇာတ်လမ်းအကျဉ်းမှာ... 'တောင်များ.. မြစ်ပေါင်းများစွာကို ဖြတ်ကျော်ကာ ငါသည် အရှင်သခင်ဖြစ်ပြီး ကမ္ဘာ့အရပ်လေးမျက်နှာနှင့် စကြာဝဠာတစ်ခွင်ကို လွှမ်းမိုးကာ…' ဟူ၍ အစချီ ရေးသားထားကာ အလွန်အမင်း ကြွားဝါလွန်းသည့် ပုံစံမျိုး ဖြစ်သည်။
သို့သော် ထိုဇာတ်လမ်း၏ အဓိကအချက်က ဘာလဲဆိုတာကို သူ လုံးဝမဖတ်ခဲ့ရသေးပေ။
ထိုအချက်ကြောင့်ပင် လုယင်သည် ဒီကမ္ဘာရဲ့ပင်မဇာတ်ကောင်က မည်သူဖြစ်သည်ကိုသော်လည်းကောင်း.. ဇာတ်ကြောင်းက မည်သို့သွားမည်ကိုသော်လည်းကောင်း လုံးဝ မသိရှိခဲ့ပေ။
သို့ရာတွင် ဇာတ်ညွန်းတွင် မြောက်ပိုင်းဝိညာဉ်ဒေသနှင့် ထိုက်ယီ သန့်စင်နယ်မြေ ဟူသော အမည်များကို ဖော်ပြထားသည်ကိုမူ သူသတိရနေသည်။
ထို့ကြောင့် လုယင်သည် သူရောက်ရှိလာသည့်နေရာမှာ ထိုဝတ္ထုထဲသို့ပင် ဖြစ်ကြောင်း မှန်းဆမိလိုက်သည်။
“ထျန်ကျီးတောင်ထိပ် သခင်ရဲ့ တပည့်ရင်း.. ကိုယ်ခန္ဓာသန့်စင်ခြင်း အဆင့် (၁).. လွန်ခဲ့တဲ့ ခုနစ်နှစ်တိုင်အောင် ကျင့်ကြံခြင်း မတက်လှမ်းနိုင်ခဲ့ဘဲ နေ့စဉ်နဲ့အမျှ ဂျူနီယာညီမလေးတွေရဲ့ အတွင်းခံအဝတ်အစားတွေကို လျှော်ဖွတ်ပေးနေရတဲ့သူတစ်ယောက်...”
သူ၏ဦးနှောက်ထဲရှိ မှတ်ဉာဏ်အပိုင်းအစများကို စုစည်းစစ်ဆေးကြည့်လိုက်ရင်း လုယင်မှာ ပါးစပ်ထောင့်များ တွန့်သွားသည်အထိ ဖြစ်သွားရသည်။
မူလကိုယ်ပိုင်ရှင်မှာ အမှန်တကယ်ပင် အသုံးမကျသည့် လူတစ်ယောက်ဖြစ်နေသည်မဟုတ်လား...
ထို့ပြင် တပည့်ရင်းတစ်ဦးလည်း ဖြစ်သေးသည်။
ဒါက အမှန်တကယ်ပင် သက်ရှိထင်ရှား အသုံးမကျသူတစ်ဦး ဖြစ်နေပေတော့သည်။
သူ၏ဘဝမှာ အတော်လေး ဆိုးရွားလှပေသည်။
သို့သော် ဒီလို အန္တရာယ်များလှသော ရှန်းရှ ကမ္ဘာကြီးထဲတွင် စွမ်းအားမရှိဘဲ မည်သို့ ရပ်တည်နိုင်မည်နည်း။
လုယင်သည် မျက်မှောင်ကြုတ်လိုက်ကာ မိမိ၏ စွမ်းအားကို မြှင့်တင်မည့် နည်းလမ်းများကို စတင် စဉ်းစားတော့သည်။
တကယ်လို့ သူသာ ထိုဝတ္ထုကို အဆုံးထိ ဖတ်ပြီးခဲ့ပါက အနည်းဆုံးတော့ ကံကောင်းမည့် အချိန်နှင့် နေရာများကို သိရှိနေပေလိမ့်မည်။
သို့သော် အလွန်တရာ စိတ်မကောင်းစရာမှာ ကူးပြောင်းလာပုံမှာ ရုတ်တရက်ဆန်လွန်းလှသည်။
လုယင် တစ်ယောက် စဉ်းစားတွေးတောနေဆဲ အချိန်တွင်ပင် အသံတစ်သံသည် သူ၏ ဦးနှောက်ထဲတွင် ရုတ်တရက် ပေါ်ထွက်လာခဲ့သည်။
【ဒင်... ကံကြမ္မာ အနာဂတ်ခန့်မှန်းစနစ်မှ အိမ်ရှင်ကို ချိတ်ဆက်လိုက်ပါပြီ... ချိတ်ဆက်နေဆဲ…】
【ချိတ်ဆက်မှု အောင်မြင်ပါပြီ...】
ထိုအသံကို ကြားလိုက်ရသောအခါ လုယင်တစ်ကိုယ်လုံး တုန်ခါသွားသည်။
သူ့ဆီ စနစ် ရောက်လာပြီ ဖြစ်သည်။
‘ကောင်းလိုက်တာ…’
သူသည် စနစ်၏ လုပ်ဆောင်ချက်များကို အမြန်ပင် စစ်ဆေးကြည့်လိုက်သည်။
မကြာမီပင် သူသည် စနစ်၏ ပင်မလုပ်ဆောင်ချက်များကို သဘောပေါက်သွားခဲ့သည်။
ရိုးရိုးရှင်းရှင်း ပြောရလျှင် ဒီစနစ်သည် လုယင်အား မိမိပတ်ဝန်းကျင်ရှိ လူများ၏ မကြာခင် ကြုံတွေ့ရမည့် ကံကောင်းခြင်း အခွင့်အလမ်းများကို ကြည့်ရှုခွင့်ပေးပြီး.. အဓိက အခွင့်အလမ်းရှိသူများကို ရွေးချယ်ကာ သူတို့၏ ရှေ့ဆက်မည့်ဘဝကို ကြိုတင်ခန့်မှန်းနိုင်စေသည်။
ထိုသို့ ကြိုတင်ခန့်မှန်းထားသည့် ဇာတ်ကြောင်းများကို အသုံးပြု၍ တစ်ဖက်လူ၏ အခွင့်အလမ်းကို လက်ဦးမှုယူကာ လုယူနိုင်မည် ဖြစ်သည်။ အောင်မြင်စွာ လုယူနိုင်ပြီးနောက် စနစ်က အပိုဆုလာဘ်များကို ပေးမည် ဖြစ်ပေသည်။
သို့သော် စိတ်မကောင်းစရာမှာ သူ၏ကိုယ်ပိုင်အနာဂတ်ကိုမူ ကြိုတင်ခန့်မှန်း၍ မရနိုင်ပေ။
အချက်အလက်များကို နားလည်သွားပြီးနောက် လုယင်သည် သူ၏ ကိုယ်ပိုင်အချက်အလက်များကို ဦးစွာ စစ်ဆေးကြည့်လိုက်သည်။
【အိမ်ရှင်အမည်】 - လုယင်
【အထောက်အထား】 - ထိုက်ယီ သန့်စင်နယ်မြေ.. ထျန်ကျီးတောင်ထိပ် စီနီယာတပည့်
【ဘဝဇာတ်ကြောင်း】 - ဗီလိန်
【ခန္ဓာကိုယ်အရည်အချင်း】 - မရှိ
【နယ်ပယ်အဆင့်】 - ကိုယ်ခန္ဓာသန့်စင်ခြင်း အဆင့် (၁)
【အရည်အချင်း】 - သာမန်
【ကံကောင်းခြင်း တန်ဖိုး】 -( -၂၀၀)
【ကံကြမ္မာ တန်ဖိုး】 - ၀
“ဟ..”
သူ၏ အရည်အချင်းအဆင့်ကို မြင်လိုက်ရသောအခါ လုယင်မှာ သွေးတစ်လုပ်ပင် အန်ထွက်မတတ် ဖြစ်သွားရသည်။
သူသည် ဒီလောက် အားနည်းရခြင်းမှာ အံ့သြစရာတော့ မရှိပေ။
သို့သော် သူသည် ထိုကိစ္စများကို ဆက်လက်တွေးတောနေရန် အချိန်မရှိတော့ဘဲ ကံကောင်းခြင်း တန်ဖိုးနှင့် ကံကြမ္မာ တန်ဖိုးတို့၏ လုပ်ဆောင်ချက်များကိုသာ ရိုးရှင်းစွာ နားလည်လိုက်သည်။
လူတစ်ဦး၏ ကံကောင်းခြင်း တန်ဖိုး မြင့်မားလေလေ.. ကောင်းသော အခွင့်အလမ်းများနှင့် ကြုံတွေ့ရမည့် ဖြစ်နိုင်ခြေ များလေလေ ဖြစ်ကြောင်း သိရှိရသည်။
သူ၏ အနှုတ်နှစ်ရာ (-၂၀၀) ဆိုသော ကံကောင်းခြင်း တန်ဖိုးမှာ နေ့စဉ် ကံဆိုးမိုးမှောင်ကျနေသည်ဟု ဆိုလိုခြင်းမဟုတ်ဘဲ..
ဆိုးယုတ်သောလမ်းစဉ်များ သို့မဟုတ် နတ်ဆိုးကျင့်စဉ်များနှင့် ပတ်သက်သည့် အခွင့်အလမ်းများနှင့် ကြုံတွေ့ရမည့် ဖြစ်နိုင်ခြေ ပိုများကြောင်းကို ပြသနေခြင်း ဖြစ်သည်။
ကံကြမ္မာ တန်ဖိုးနှင့် ပတ်သက်၍မူ စနစ်၏ ဖော်ပြချက်အရ ကျင့်စဉ်များကို မြှင့်တင်ရန်.. ဝတ္ထု၏ ဇာတ်ကွက်များကို ကြည့်ရှုရန် စသည်တို့အတွက် အသုံးပြုနိုင်သည်ဟု ဆိုသည်။
ကံကောင်းခြင်း တန်ဖိုးနှင့် ကံကြမ္မာ တန်ဖိုး နှစ်ခုစလုံးကို အခြားသူများ၏ အခွင့်အလမ်းများကို လုယူခြင်းဖြင့် ရရှိနိုင်မည် ဖြစ်သည်။
လုယင်အား အံ့အားသင့်စေသည်မှာ သူသည် အမှန်တကယ်ပင် ဗီလိန်ဇာတ်ကောင် ဖြစ်နေခြင်းပင်။
သူ၏ ကံကောင်းခြင်း တန်ဖိုးမှာ အနှုတ်လက္ခဏာ ဖြစ်နေသောကြောင့် ဗီလိန် လမ်းစဉ်သို့ ရောက်ရှိသွားခြင်း ဖြစ်နိုင်ချေ အလွန်ပင် များပြားလှသည်။
အကြောင်းရင်း အတိအကျကိုမူ ဝတ္ထု၏ ဇာတ်ကွက်ကို ကြည့်ရှုရန် လုံလောက်သော ကံကြမ္မာ တန်ဖိုး ရရှိမှသာ သိရှိနိုင်မည် ဖြစ်ပေသည်။
【ဒင်... ဗီလိန် ပုံစံကို ဆက်လက်ထိန်းသိမ်းထားပေးပါ.. မဟုတ်ပါက စနစ်က အိမ်ရှင်ကို စွန့်ခွာသွားပါမည်...】
【ဒင်... သတိပေးချက် - အမျိုးသမီး ပင်မဇာတ်ကောင်ကို သိမ်းပိုက်ခြင်းသည်လည်း ပင်မဇာတ်ကောင်၏ အခွင့်အလမ်းကို လုယူခြင်းပင်ဖြစ်ကြောင်း အိမ်ရှင်အနေဖြင့် အမှတ်ရပေးပါရန်】
စနစ်၏ သတိပေးချက် အသံသည် ရုတ်တရက် ထွက်ပေါ်လာရာ လုယင်မှာ အနည်းငယ်မျှ ရေရာမှုမရှိဘဲ ဖြစ်သွားရသည်။
ထားလိုက်ပါတော့... ဗီလိန်လည်း ဖြစ်ချင်ဖြစ်ပါစေတော့... သူသည် တစ်သက်လုံး တရားမျှတသူအဖြစ် နေထိုင်ခဲ့ဖူးပြီးပြီ.. ယခုဘဝတွင်မူ လူဆိုးတစ်ဦးအနေနဲ့ ခဏလောက် သရုပ်ဆောင်ပြလိုက်မှာပေါ့...
ဗီလိန်တစ်ဦး လုပ်ဆောင်လေ့ရှိသည့် အရာများမှာလည်း မာန်မာနထောင်လွှားခြင်း.. ပင်မဇာတ်ကောင်ကို ဖိနှိပ်ခြင်း.. ထို့နောက် ပင်မဇာတ်ကောင်၏ လက်ချက်ဖြင့် ပါးချခံရခြင်း (သခင်လေးပါးရိုက်ဇာတ်ကွက်) တို့မှလွဲ၍ အခြား မရှိနိုင်ပါ။
ပထမအချက် နှစ်ချက်မှာ ပြဿနာမရှိပေ။ သူသာ အစွမ်းထက်လာသည်နှင့်တပြိုင်နက် သူလိုချင်သလို လုပ်ဆောင်နိုင်မည် ဖြစ်သည်။
သို့သော် ပင်မဇာတ်ကောင်၏ လက်ချက်ဖြင့် သခင်လေးပါးရိုက်ခံ ဖြစ်ဖို့လား...
လုံးဝ မဖြစ်နိုင်ပါ...
ဘယ်လိုမှ မဖြစ်နိုင်ပါ…
ထိုစဉ်…
"စီနီယာအစ်ကို... ရှင် နောက်တစ်ကြိမ် ပျင်းရိနေပြန်ပြီလား... ဒီနေရာကို အမြန်ဆုံး သန့်ရှင်းရေးလုပ်လိုက်ပါဦး.. ဂျူနီယာအစ်ကို လီယုရဲ့နေရာကို ရှင် သန့်ရှင်းရေး မလုပ်ရသေးဘူးနော်..."
ချိုမြိန်သော အသံလေးတစ်ခုသည် လုယင်၏ နားထဲသို့ ဝင်ရောက်လာသည်။ လုယင်သည် ဦးခေါင်းကို လှည့်၍ ကြည့်လိုက်ရာ သူ၏ ဂျူနီယာညီမလေးများထဲမှ တစ်ဦးဖြစ်ကြောင်း တွေ့ရှိလိုက်ရသည်။
လုယင်သည် နံရံကိုမှီကာ အလုပ်မလုပ်ဘဲ ရပ်နေသည်ကို မြင်လိုက်ရသဖြင့် သူမက သတိပေးရန် စကားဆိုလာခြင်း ဖြစ်ပေသည်။
လုယင်သည် ရှက်ကိုးရှက်ကန်းဖြင့် ပြုံးလိုက်ကာ ခေါင်းညိတ်ပြလိုက်သည်။ "အင်းပါ အင်းပါ.. ငါ အခုချက်ချင်း သွားတော့မယ်လေ"
သူသည် တပည့်ရင်းတစ်ဦး ဖြစ်သော်လည်း သူ၏ စွမ်းရည်မှာ မည်သည့်အခါမျှ တိုးတက်မလာခဲ့သောကြောင့် ဆရာ၏ စီစဉ်မှုဖြင့် နေ့စဉ် အညစ်အကြေးသန့်ရှင်းရေးနှင့် ပင်ပန်းဆင်းရဲသည့် အလုပ်များကို လုပ်ကိုင်ရသော အစေခံတပည့်တစ်ဦးကဲ့သို့ ဖြစ်နေခဲ့ရသည်။
ထိုသို့ တုံ့ပြန်ရင်းဖြင့်ပင် လုယင်သည် စိတ်ထဲမှနေ၍ စနစ်ကို တိတ်တဆိတ် ခေါ်ယူလိုက်သည်။
သူ၏ ဂျူနီယာညီမလေး၏ ကျောပြင်ကို ကြည့်ရှုရင်း လုယင်သည် သူ၏ ပထမဆုံးသော အနာဂတ်ခန့်မှန်းမှုကို စတင်လိုက်တော့သည်။
အမည် - ကျန်းလင်လင်
ဇာတ်ကောင်ပုံစံ - အမည်မသိ ဇာတ်ပို့ဇာတ်ကောင်
နယ်ပယ်အဆင့် - ကိုယ်ခန္ဓာသန့်စင်ခြင်း အဆင့် (၄)
ခန္ဓာကိုယ်အရည်အချင်း - မရှိ
ကံကောင်းခြင်း တန်ဖိုး - ၃ (ဖြူစင်သောအဆင့်)
ဇာတိအရည်အချင်း - သာမန်
အနာဂတ်ခန့်မှန်းချက် - စတင်မည်လား...
လုယင်သည် ပြတ်ပြတ်သားသားပင် ခန့်မှန်းရန် ရွေးချယ်လိုက်သည်။
【နေ့ (၁) - ကျန်းလင်လင်သည် ကျင့်ကြံရန်အတွက် ထျန်ကျီးတောင်ထိပ်တွင် ဆက်လက်နေထိုင်သည်။ သူမ၏ ကျင့်ကြံခြင်းစွမ်းရည်မှာ အနည်းငယ် တိုးတက်လာကာ ကိုယ်ခန္ဓာသန့်စင်ခြင်း အဆင့် (၄) သို့ အောင်မြင်စွာ တက်လှမ်းသွားသည်။ ညဘက်တွင် အောင်မြင်မှုကို ဂုဏ်ပြုသည့် အနေဖြင့် သူမ၏ အခန်းတွင်း၌ အဆိပ်ထုတ်ကျင့်စဥ်ကိုပြုလုပ်ခဲ့သည်။】
【နေ့ (၂) - ပြီးခဲ့သည့်ညက သူမတစ်ဦးတည်း အဆိပ်ထုတ်ကျင့်စဉ်ကိုပြုလုပ်ခဲ့ရာ ကျေနပ်အားရမှု မရှိခဲ့သောကြောင့် ကျန်းလင်လင်သည် စီနီယာအစ်ကို လီယု အား ရှာဖွေနေစဉ် လီယု၏အခန်းတွင်း၌ မိန်းကလေးတစ်ဦးနှင့် လျှို့ဝှက်ဆုံတွေ့နေသော လီယုနှင့် တိုက်ဆိုင်စွာ ဆုံတွေ့သွားရသည်။ သူမသည် အလွန်အမင်း ဒေါသထွက်လွန်းသဖြင့် ထိုနေရာတွင်ပင် သွေးအန်သွားကာ စိတ်ကိုဖြေသိမ့်ရန်အတွက် သန့်စင်နယ်မြေမှ ထွက်ခွာသွားသည်။】
【နေ့ (၃) - ကျန်းလင်လင်သည် တောင်အောက်သို့ တစ်ရက်တိုင်တိုင် လှည့်လည်သွားလာခဲ့သော်လည်း မည်သည့်အခွင့်အလမ်းကိုမျှ မရရှိခဲ့ပေ။ ညနေပိုင်းတွင် တေးဂီတနားဆင်ရန်အတွက် ပြည့်တန်ဆာအိမ်တစ်ခုသို့ သွားရောက်ခဲ့သည်။】
【နေ့ (၄) - ကျန်းလင်လင်သည် ထျန်ကျီးတောင်ထိပ်သို့ ပြန်လည်ရောက်ရှိလာပြီး ကျင့်ကြံခြင်းအပေါ် အာရုံစိုက်လာသည်။】
【နေ့ (၅) - ကျန်းလင်လင်သည် ထျန်ကျီးတောင်ထိပ်၌ ကျင့်ကြံခြင်းအပေါ် ဆက်လက် အာရုံစိုက်သည်။】
【...၆/၇/၈/၉…】
【နေ့ (၁၀) - ကျန်းလင်လင်သည် ထျန်ကျီးတောင်ထိပ်၌ ကျင့်ကြံခြင်းအပေါ် ဆက်လက် အာရုံစိုက်နေဆဲပင်သည်။】
ခန့်မှန်းချက် ပြီးဆုံးသွားရာ လုယင်သည် စိတ်ပျက်လက်ပျက်ဖြင့် သက်ပြင်းချလိုက်သည်။
ဖြူစင်သော ကံတရားဆိုတာ ဒါမျိုးကိုး...
ကံကောင်းခြင်း တန်ဖိုးသည် လူတစ်ဦး၏ တစ်သက်တာလုံးနှင့်အတူ လိုက်ပါနေတတ်ပြီး ယေဘုယျအားဖြင့် တိုးလာခြင်းလည်း မရှိသလို လျော့သွားခြင်းလည်း မရှိပေ။
စနစ်၏ ဝင်ရောက်စွက်ဖက်မှု မရှိပါက ပုံမှန်အားဖြင့် ထိုအတိုင်းသာ ဖြစ်သည်။
ဥပမာအားဖြင့် အခြားသူတစ်ဦး၏ အခွင့်အလမ်းကို လုယူပြီးနောက် သူတို့၏ ကံကောင်းခြင်း တန်ဖိုးမှာ ကျဆင်းသွားမည်ဖြစ်ပြီး လုယင်၏ ကံကောင်းခြင်း တန်ဖိုးမှာမူ တိုးတက်လာမည် ဖြစ်သည်။
ကံကောင်းခြင်း တန်ဖိုး မြင့်မားသူများ.. ဥပမာအားဖြင့် ကံကောင်းခြင်း သူများသည် ကောင်းကင်ဘုံ၏ စောင့်ရှောက်မှုကို ခံရသူများကဲ့သို့ ဖြစ်နေကြကာ ရေသောက်ရုံမျှဖြင့်ပင် အဆင့်တက်သွားနိုင်ကြသည်။
သို့သော် လူအများစု၏ ကံကောင်းခြင်း တန်ဖိုးမှာ မမြင့်မားလှပေ.. ယခု သူ့ရှေ့တွင်ရှိနေသော ကျန်းလင်လင်ကဲ့သို့ပင် ဖြစ်သည်။
မဟုတ်ပါက ဝတ္ထုဇာတ်ကြောင်းများအရဆိုလျှင် ထိုကဲ့သို့သော အခြေအနေမျိုးနှင့် ကြုံတွေ့ရသည့် တပည့်တစ်ဦးအနေဖြင့် တောင်အောက်သို့ ဆင်းသွားသောအခါ ရတနာတစ်ခုခုကို ရရှိခြင်း သို့မဟုတ် စိတ်ပိုင်းဆိုင်ရာ ရူးသွပ်သွားခြင်းတို့နှင့် ကြုံတွေ့ရမည် ဖြစ်သည်။
သို့သော် ကျန်းလင်လင်မှာမူ အလဟဿ တောင်ပေါ်မှဆင်းသွားခဲ့ရုံသာ ရှိခဲ့သည်။
ထို့ပြင် သူမသည် အပြင်ပန်းတွင် စင်ကြယ်ပြီး ချစ်စရာကောင်းဟန် ရှိသော်လည်း သူမ၏ လျှို့ဝှက်ချက်များကမူ…မူ…….
လုယင်သည် စိတ်ပျက်လက်ပျက်ဖြင့် သက်ပြင်းချလိုက်သည်။ ကျန်းလင်လင်ဆီမှ မည်သည့်အခွင့်အလမ်းမျှ မရနိုင်တော့သည်ဖြစ်ရာ သူမနှင့် စကားထပ်ပြောနေရန်လည်း အချိန်မရှိတော့ပေ။
လီယု သစ္စာဖောက်သွားခြင်းက သူမ၏ ကိုယ်ပိုင်ကိစ္စသာ ဖြစ်ပြီး လုယင်အနေဖြင့် ဝင်ရောက်စွက်ဖက်လိုစိတ် မရှိပေ။
စိတ်မကောင်းစရာ တစ်ခုမှာ လက်ရှိတွင် ခန့်မှန်းချက်သည် ဆယ်ရက်တာကာလအတွက်သာ အလုပ်လုပ်နိုင်သေးခြင်း ဖြစ်သည်။ ရက်များကို တိုးမြှင့်လိုပါက သူသည် စနစ်ကို မြှင့်တင်ရန် လိုအပ်ပေသည်။
ထိုအချက်ကို စဉ်းစားရင်း လုယင်သည် ကံကောင်းခြင်းတွေ ပိုင်ဆိုင်ထားသည့် ပင်မဇာတ်ကောင်ကို ရှာဖွေခြင်းက အကောင်းဆုံးဖြစ်မည်ဟု တွေးတောမိလိုက်သည်။
မည်သို့ပင်ဆိုစေကာမူ ပင်မဇာတ်ကောင်မျိုးအတွက် အခွင့်အလမ်းများစွာ ရှိနေမည်မှာ အသေအချာပင် ဖြစ်သည်။ သူသာ ထိုသူကို ရှာတွေ့ခဲ့ပါက အသေအချာပင် အကျိုးအမြတ်များကို အဆုံးမရှိ ထုတ်ယူပစ်လိုက်မည် ဖြစ်သည်။
ထို့အပြင် အမျိုးသမီးဇာတ်လိုက်ကို ကြိုတင်ဖမ်းဆီးခြင်းသည်လည်း ပင်မဇာတ်ကောင်၏ အခွင့်အလမ်းကို လုယူခြင်းပင်ဖြစ်ကြောင်း စနစ်က ဆိုထားခဲ့သည်။
ထိုအချက်ကြောင့်ပင် လုယင်မှာ အနည်းငယ်မျှ စိတ်လှုပ်ရှားလာခဲ့ရသည်။
ဝတ္ထုထဲရှိ အမျိုးသမီးဇာတ်လိုက်များအားလုံးမှာ အလွန်တရာ အလှအပလေးများသာ ဖြစ်ကြသည် မဟုတ်ပါလော...
ခန့်မှန်းချက်ကို တစ်ကြိမ် စမ်းသပ်ပြီးနောက် လုယင်သည် အခြားပစ်မှတ်များကို ဆက်လက်ရှာဖွေမနေတော့ဘဲ အမြန်ဆုံး သန့်ရှင်းရေးလုပ်ရန်အတွက်သာ စတင်လှုပ်ရှားလိုက်တော့သည်။
သူ၏ ဆရာ သတ်မှတ်ပေးထားသော တာဝန်ကို အမြန်ဆုံး ပြီးမြောက်အောင် လုပ်ဆောင်ရမည်ဖြစ်ပြီး မဟုတ်ပါက အပြစ်ပေးခံရမည် ဖြစ်သည်။ အပေါ့ပါးဆုံး အပြစ်ပေးမှုမှာပင် တိုက်ပိတ်ခံရခြင်း ဖြစ်ပေလိမ့်မည်။
သူ၏ ဆရာသည် လက်ရှိတွင် ထျန်ကျီးတောင်ထိပ်၌ မရှိသေးသော်လည်း ဒီနေရာမှာ မည်သည့်အရာများ ဖြစ်ပျက်နေသည်ကို သူ မသိရှိဟု မယူဆသင့်ပေ။
မည်သို့ပင်ဆိုစေကာမူ ဆရာ၏ နေရာသာ ကျန်ရှိတော့သည်ဖြစ်ရာ သန့်ရှင်းရေး ပြီးစီးသွားမှသာ အခြားကိစ္စများကို ဆက်လုပ်ရန် နောက်ကျသွားမည် မဟုတ်ပေ။
တကယ်လို့ သူသာ တကယ်တမ်း ဆယ့်ငါးရက်တိုင်တိုင် တိုက်ပိတ်ခံရကာ မည်သူ့ကိုမျှ မတွေ့ရဘဲ ဘာမှမလုပ်နိုင်တော့ပါက ပို၍ပင် ဆိုးရွားသွားပေလိမ့်မည်...
ခန်းမကို သန့်ရှင်းရေးလုပ်ပြီးနောက် လုယင်သည် မရပ်မနားဘဲ ဆရာ၏ နေရာသို့ အမြန်ဆုံး ဦးတည်သွားခဲ့သည်။
လုယင်၏ ဆရာ၏ အမည်မှာ လင်းရှောင်း ဖြစ်ပြီး ကောင်းကင်အရှင်သခင်အဆင့်၏ စွမ်းအားရှင်တစ်ဦး ဖြစ်သည်။
ကောင်းကင်အရှင်သခင်အဆင့်၏ စွမ်းအားရှင်တစ်ဦးဆိုသည်မှာ မြောက်ပိုင်းဝိညာဉ်ဒေသ၌ပင် ထိပ်တန်းအဆင့် တည်ရှိမှုတစ်ခု ဖြစ်ပေသည်။
ထိုက်ယီ သန့်စင်နယ်မြေအတွင်း၌ ကောင်းကင်အရှင်သခင်အဆင့်ရှိသူ နှစ်ဦးသာ ရှိသည်။ တစ်ဦးမှာ လင်းရှောင်း ဖြစ်ပြီး နောက်တစ်ဦးမှာ ထိုက်ယီ သန့်စင်နယ်မြေ၏ မဟာအကြီးအကဲ ပင်။
လင်းရှောင်း၏ ခန်းမသည် ထျန်ကျီးတောင်ထိပ်၏ အရှေ့ဘက်ခြမ်းတွင် တည်ရှိပြီး အခြားသူများ၏ နှောင့်ယှက်မှုကို ရှောင်ရှားနိုင်ရန်အတွက် အလွန်တရာ တိတ်ဆိတ်ခေါင်ဖျားသော နေရာတွင် တည်ဆောက်ထားခြင်း ဖြစ်သည်။
သူ့ရှေ့တွင် ရှိနေသော ခမ်းနားထည်ဝါလှသည့် နန်းတော်ကြီးကို ကြည့်ရင်း လုယင်သည် မိမိ၏ သစ်သားတဲငယ်လေးနှင့် တိတ်တဆိတ် နှိုင်းယှဉ်ကြည့်မိကာ ခါးသီးစွာ ပြုံးလိုက်ရုံမှလွဲ၍ မတတ်နိုင်တော့ပေ။
ထပ်မံ၍ စဉ်းစားမနေတော့ဘဲ လုယင်သည် သူ၏ တံမြက်စည်းကို ကိုင်ကာ အထဲသို့ ဝင်ရောက်သွားခဲ့သည်။
လင်းရှောင်းသည် ကိစ္စရပ်များကို ဖြေရှင်းရန်အတွက် ထိုက်ယီ သန့်စင်နယ်မြေမှ ထွက်ခွာသွားသည်မှာ တစ်လနီးပါး ရှိပြီဖြစ်ပြီး ယခုအချိန်အထိ ပြန်လည်မရောက်ရှိလာသေးပေ။
သူ၏ ခန်းမကိုမူ လုယင်ကသာ အမြဲတမ်း သန့်ရှင်းရေးလုပ်ပေးလေ့ရှိပြီး ပုံမှန်အားဖြင့် အခြားမည်သူမျှ လာရောက်လေ့ မရှိကြပေ။
ဒါကလည်း တပည့်အများစုသည် သူ့အား အလွန်တရာ ကြောက်ရွံ့ကြသောကြောင့် ဖြစ်ပေသည်။
ကြီးကျယ်ခမ်းနားလှသော အဆောက်အအုံကြီးထဲသို့ ဝင်ရောက်လာပြီးနောက် လုယင်သည် သေသေချာချာ စနစ်တကျ စတင် သန့်ရှင်းရေးလုပ်တော့သည်။
သူ၏ ဆရာနှင့် ပတ်သက်၍ သူ၏ စိတ်ထဲတွင် အနည်းငယ်မျှ မကျေနပ်ချက်များ ရှိနေဆဲပင် ဖြစ်သည်။
သူ၏ အရည်အချင်းမှာ ညံ့ဖျင်းသည်ဆိုဦးတော့.. သူ့ဆရာအနေဖြင့် သူ့အား ဒီလို အလုပ်သမားတပည့်တစ်ဦးကဲ့သို့ ဆက်ဆံရန် မသင့်ပေ။
မည်သို့ပင်ဆိုစေကာမူ သူသည် စီနီယာတပည့်တစ်ဦး မဟုတ်ပါလော။
ဒီလို ဆက်ဆံမှုကြောင့် သူသည် ဂျူနီယာညီမများနှင့် ဂျူနီယာညီအစ်ကိုများရှေ့တွင် မျက်နှာပြစရာပင် မရှိတော့ဘဲ မည်သူကမျှ သူ့အား စီနီယာအစ်ကိုတစ်ဦးအနေဖြင့် လေးစားခြင်း မရှိကြတော့ပေ။
ပထမထပ်ကို သန့်ရှင်းရေးလုပ်ပြီးနောက် လုယင်သည် ဒုတိယထပ်သို့ ဆက်လက်တက်သွားခဲ့သည်။
ဒုတိယထပ်သို့ ရောက်ရှိသည်နှင့်တပြိုင်နက် ထူးဆန်းသော ဆေးရနံ့တစ်ခုကို သူ ရလိုက်သည်။
ဘာတွေဖြစ်နေတာလဲ...
ဒီတစ်လအတွင်းမှာ ဆရာရဲ့နေရာကို ဘယ်သူမှ မလာခဲ့ပါဘူး.. ဘယ်လိုလုပ်ပြီး ဆေးရနံ့တွေ ထွက်နေရတာလဲ...
လုယင်သည် မျက်မှောင်ကြုတ်လိုက်ကာ ဆေးရနံ့လာရာနောက်သို့ လိုက်သွားရင်း အကာအရံ အချို့ကို ဖြတ်ကျော်သွားခဲ့သည်။
ရုတ်တရက်ဆိုသလိုပင် ကြမ်းပြင်ပေါ်တွင် ပြန့်ကြဲနေသော မိန်းမဝတ် အတွင်းခံများကို သူ မြင်လိုက်ရသည်။
ဘာကြီးလဲဟ...
ဒီမှာ မိန်းမတစ်ယောက် ရှိနေတာလား...
ဆရာက တစ်ယောက်ယောက်ကို ဒီမှာ လျှို့ဝှက်ဝှက်ထားတာများလား...
လုယင်သည် ပုံမှန်အားဖြင့် အလွန်အမင်း တည်ကြည်ခက်ထန်ပြီး တည်ငြိမ်ပုံပေါက်နေတတ်သော သူ၏ ဆရာသည် ဒီလို… လုပ်လိမ့်မည်ဟု လုံးဝ မထင်ထားခဲ့မိပေ။
စူးစမ်းလိုစိတ်များ ပြည့်နှက်နေလျက် လုယင်သည် သူ့ဆရာ၏ အာရုံကို ဖမ်းစားနိုင်တဲ့ မိန်းကလေးက မည်သည့် လူမျိုးဖြစ်သည်ကို ကိုယ်တိုင်တွေ့မြင်လိုစိတ် ဖြစ်ပေါ်လာခဲ့သည်။
မှန်ပေသည်... စူးစမ်းလိုစိတ်သက်သက်သာ ဖြစ်သည်... အခြားသော မသန့်စင်သည့် အတွေးများ လုံးဝ မရှိခဲ့ပေ။
သူ၏ အကြည့်များကို ရွှေ့ပြောင်းလိုက်ရင်း လုယင်သည် နောက်ဆုံးအကာအရံကို ကျော်ဖြတ်ကာ သစ်သားရေကန်တစ်ခုအတွင်း၌ ထိုင်နေသော ပုံရိပ်တစ်ခုကို မြင်လိုက်ရသည်။
ခါးတိုင်အောင် ရောက်ရှိနေသော မွှေးကြိုင်သောဆံနွယ်ရှည်များ.. အဝတ်အစားကင်းမဲ့နေသည့် ပုခုံးသားများ.. နှင်းပွင့်ကဲ့သို့ ဖြူစင်သော အသားအရေ.. ထို့ပြင် ကောင်းမွန်စွာ ဖွံ့ဖြိုးနေသော ခန္ဓာကိုယ်ပုံစံကိုလည်း ယောင်ဝါးဝါး မြင်တွေ့နေရသည်။
ထိုပျော့ပျောင်းရှည်လျားလှသော ဆံနွယ်များမှာ လုံးဝ မည်းမှောင်နေခြင်းမဟုတ်ဘဲ ဆေးဆိုးထားပုံရသည့် ပုံစံမျိုး ဖြစ်နေသည်။
မည်းနောင်နေသော ဆံနွယ်များကြားတွင် လက်မအနည်းငယ်တိုင်း၌ ဆီးနှင်းကဲ့သို့ ဖြူစင်နေသော ဆံပင်ဖြူအမျှင်များ ပါရှိနေကာ အလွန်အမင်း ထင်ရှားပေါ်လွင်နေ၏။
သို့သော် ထိုဆံပင်များကို မြင်လိုက်ရသည့်အခိုက်အတန်းတွင် လုယင်၏ မျက်လုံးအစုံမှာ ချက်ချင်းပင် အကျယ်ကြီး ပြူးသွားခဲ့ရသည်။
အဘယ်ကြောင့်ဆိုသော် ထိုဆံပင်ပုံစံသည် သူ အလွန်တရာ ရင်းနှီးကျွမ်းဝင်နေသည့် ပုံစံတစ်ခု ဖြစ်နေသောကြောင့်တည်း...
လင်းရှောင်း.. သူဆရာ၏ ဆံပင်ပုံစံမှာ ဒီလိုအတိအကျပင် ဖြစ်နေပေသည်...
ဒါဆိုရင်သူက…
ရဲရင့်လှသော အတွေးတစ်ခုသည် လုယင်၏ ဦးနှောက်ထဲသို့ ရုတ်တရက် ဝင်ရောက်လာခဲ့သည်။
"ဘယ်သူလဲ..."
ထိုစဉ် ရေကန်အတွင်း၌ ရှိနေသော သူသည် တစ်စုံတစ်ရာကို ရှာဖွေတွေ့ရှိသွားဟန်ဖြင့် ရုတ်တရက် ခေါင်းလှည့်လာကာ လုယင်နှင့် အကြည့်ချင်း ဆုံသွားခဲ့သည်။
စကားစုတစ်ခုသည် လုယင်၏ ဦးနှောက်ထဲသို့ ချက်ချင်းပင် ပေါ်ထွက်လာခဲ့သည် ...
‘လှုပ်ရှားနေသော ပင်လယ်လှိုင်းတံပိုးကြီးများ'
‘ကြီးမားသော… တောင်တန်းကြီးတွေ’