အခန်း ၈၉ - ကောင်းကင်ဘုံရွေးချယ်ခံသူ နှစ်ဦး

ထို့နောက် ပိုင်ရန်က ပိုင်ဇီဟန်ဘေးရှိ လင်းရွှမ်းဘက်သို့ ဖြည်းညင်းစွာ လှည့်ကြည့်လိုက်သည်။

"လင်းရွှမ်း... ဟုတ်တယ်မလား?"

သူက တည်တည်ကြည်ကြည်ဖြင့် မေးလိုက်သည်။

"မင်း ပိုင် မျိုးနွယ်စုဝင် တစ်ယောက် ဖြစ်လာဖို့ ဆန္ဒရှိရဲ့လား?"

လင်းရွှမ်းသည် ထိုမေးခွန်းကြောင့် အံ့အားသင့်သွားပြီး မျက်တောင်တဖြတ်ဖြတ် ခတ်နေမိသည်။ သူ ခဏမျှ တုံ့ဆိုင်းသွားပြီးနောက် ခေါင်းခါပြလိုက်သည်။

"ကျွန်တော်... ကျွန်တော် ပိုင်မျိုးနွယ်စုထဲ မဝင်ချင်ပါဘူး" သူက ဖြည်းဖြည်းချင်းသော်လည်း ပြတ်သားစွာ ပြောလိုက်သည်။ "ကျွန်တော် သခင်လေး ပိုင်ဇီဟန့်ကိုပဲ အလုပ်အကျွေးပြုချင်တာပါ"

သူ့အသံက အေးဆေးသော်လည်း စိတ်ပိုင်းဖြတ်ထားမှုတို့ ပြည့်နှက်နေသည်။

သို့သော် ပိုင်ရန်သည် စိတ်ဆိုးသွားပုံမရဘဲ အားရပါးရ ရယ်မောလိုက်သည်။

"ဟားဟားဟား! ကောင်းတယ်! သစ္စာရှိမှုဆိုတာ ငါတို့မျိုးနွယ်စုမှာ ပိုပြီးရှိသင့်တဲ့ အရည်အချင်းပဲ"

သူက သဘောကျစွာ ခေါင်းညိတ်လိုက်ပြီး "အခြေအနေက ဒီလိုဆိုမှတော့ အတင်းအကျပ် လုပ်စရာမလိုပါဘူး။ ငါ့အမြင်မှာတော့ ပိုင်ဇီဟန့်ကို အလုပ်အကျွေးပြုတဲ့သူမှန်သမျှ ငါတို့ ပိုင်မျိုးနွယ်စုရဲ့ အစိတ်အပိုင်းပဲ။ မင်းအတွက် လိုအပ်တဲ့ ကျင့်စဉ်အရင်းအမြစ်တွေကို တိုက်ရိုက်ပေးပို့ဖို့ ငါမျိုးနွယ်စုကို အကြောင်းကြားလိုက်မယ်။ ဆေးလုံးတွေ၊ ဝိညာဉ်ကျောက်တုံးတွေ၊ လက်နက်တွေ... မင်း ဘာလိုအပ်လိုအပ်ပေါ့"

လင်းရွှမ်းမှာ မှင်တက်သွားရသည်။

"ဒါ... ဒါတွေက အရမ်းများလွန်းပါတယ်၊ ကျွန်တော်—"

"လက်ခံလိုက်ပါ" ပိုင်ဇီဟန်က လက်ကို ဝေ့ယမ်းကာ ကြားဖြတ်ပြောလိုက်သည်။

"ဒီလောက်လေးက ငါတို့မျိုးနွယ်စုရဲ့ ဘဏ္ဍာတိုက်အတွက် ဘာမှမဟုတ်ပါဘူး"

သူ့အသံက ခပ်အေးအေးဖြစ်သော်လည်း ထိုစကားများနောက်ကွယ်တွင် စူးရှမှုတစ်ခု ပါဝင်နေသည်။ ထိုစကားမှာ လင်းရွှမ်းကို ပြောနေခြင်းထက် အခန်းထဲရှိ အခြားသူများကို ကြားစေချင်သည့်ပုံစံမျိုး ဖြစ်နေသည်။

ပိုင်ရန်က သဘောကျစွာဖြင့် နောက်တစ်ကြိမ် ရယ်မောလိုက်ပြန်သည်။

"ဟားဟားဟား! ဒါဟာ ကောင်းကင်ဘုံရဲ့ ကောင်းချီးပဲ။ တစ်ဂိုဏ်းလုံးမှာ တစ်ယောက်တည်းရှိတဲ့ 'ကောင်းကင်အဆင့် တာအို ပဲ့တင်ထပ်မှု' ပါရမီရှင်ကို ငါတို့ ပိုင်မျိုးနွယ်စုက ရရှိလိုက်ပြီ!"

သို့သော် ဘေးတွင် ပျင်းရိစွာ မှီနေသော ပိုင်ဇီဟန်က ခပ်ပေါ့ပေါ့ပင် ငြင်းဆိုလိုက်သည်။ "ဒါက မဟုတ်သေးဘူး!"

ပိုင်ရန်၏ မျက်နှာထက်မှ အပြုံးများ ပျောက်ကွယ်သွားသည်။

"ဘာကို ဆိုလိုတာလဲ?"

"နောက်ထပ် တစ်ယောက် ရှိသေးတယ်" ပိုင်ဇီဟန်က တည်ငြိမ်သော်လည်း အခိုင်အမာ ပြောလိုက်သည်။

ပိုင်ရန် တုန်လှုပ်သွားသည်။

အမှန်စင်စစ် မျိုးဆက်တစ်ခုတွင် ကောင်းကင်အဆင့် တာအို ပဲ့တင်ထပ်မှု ပါရမီရှင်တစ်ဦး ပေါ်ထွက်လာရန်ပင် အလွန်ခဲယဉ်းလှသည်။

သို့သော် နောက်ထပ်တစ်ဦး ရှိသေးသည်ဆိုပါလား?

"ဘယ်သူလဲ?"

ပိုင်ရန် မေးလိုက်သည်။ အကယ်၍ နောက်ထပ်တစ်ဦး ရှိနေပြီး ထိုသူကိုပါ သိမ်းသွင်းနိုင်မည်ဆိုလျှင် သူတို့ ပိုင်မျိုးနွယ်စုသည် အမှန်တကယ်ပင် အတားအဆီးမဲ့ ဖြစ်လာမည်ဟု သူခံစားလိုက်ရသည်။

"ပိုင်ရှင်းယွဲ့!"

တစ်ခန်းလုံး တိတ်ဆိတ်သွားသည်။

ဘိုင်ရန်၏ မျက်စိသူငယ်အိမ်များ ကျုံ့သွားသည်။

ပိုင်ရှင်းယွဲ့!

တစ်ချိန်က ပိုင်ရွှေချင်းထက်ပင် ပါရမီ ပိုထူးကဲသည်ဟု သတ်မှတ်ခံခဲ့ရသည့် ပိုင်မျိုးနွယ်စု၏ ပါရမီရှင်ဟောင်း။

သူမသာ ရှိနေပါက သူတို့ ပိုင်မျိုးနွယ်စုသည် ပိုမိုမြင့်မားလာပြီး 'ကောင်းကင်ဘုံစွန့်ပစ်ခံအင်ပါယာ တွင် အင်အားအကြီးဆုံး ဖြစ်လာလိမ့်မည်ဟု ပိုင်ရန် ယုံကြည်ခဲ့ဖူးသည်။

သို့သော် ထိုသို့ဖြစ်မလာခဲ့ဘဲ သူမသည် နှင်ထုတ်ခံခဲ့ရသည်။

ဤအချက်သည်လည်း သူ ပိုင်ဇီဟန်ကို မနှစ်မြို့ခဲ့သည့် အကြောင်းရင်းများထဲမှ တစ်ခုဖြစ်သည်။

ပိုင်ဇီဟန်ကြောင့် သူမ နှင်ထုတ်ခံရပြီး သူမ၏ တာအိုအရိုး ကို အလုခံခဲ့ရရုံသာမက ပိုင်ဇီဟန်ကိုယ်တိုင်မှာလည်း သူမ၏ တာအိုအရိုးကို ရရှိထားပါလျက်နှင့် သူမတွင်ရှိခဲ့သော ပါရမီမျိုးကို မနိုးထစေနိုင်ခဲ့ခြင်းကြောင့် ဖြစ်သည်။

"မဖြစ်နိုင်တာ... သူမက ပြည်နှင်ဒဏ်ပေးခံခဲ့ရတာလေ! သူမရဲ့ တာအိုအရိုးကလည်း အလုခံခဲ့ရတာ။ သူမက—"

"သူမက အရင်က ပါရမီမျိုး ပြန်ရနေပြီ၊ ဒါထက်တောင် ပိုပြီး ပါရမီထူးလာဦးမှာ" ပိုင်ဇီဟန်က အေးစက်စွာ ကြားဖြတ်ပြောလိုက်သည်။

လေထုထဲတွင် ထူးဆန်းသော တင်းမာမှုတစ်ခု ဝင်ရောက်လာသည်။ ပိုင်ရှင်းယွဲ့အကြောင်း တစ်စွန်းတစ်စ ကြားဖူးထားသော ချူဇီရန်ပင်လျှင် စိတ်မသက်မသာ ဖြစ်သွားပုံရသည်။ပိုင်ရှင်းယွဲ့အကြောင်းနှင့် ပိုင်မျိုးနွယ်စုကြားတွင် ဖြေရှင်းမရသေးသော တင်းမာမှုများရှိကြောင်း သူမ ကြားဖူးထားသည်။ အထူးသဖြင့် သူမ၏ စေ့စပ်ထားသူနှင့် ပိုင်ရှင်းယွဲ့ကြားက ကိစ္စဖြစ်သည်။

ပိုင်ဇီဟန်သည် ပိုင်ရှင်းယွဲ့ထံသို့ သွားရောက်ခဲ့ကြောင်းလည်း သူမ သိထားသော်လည်း သူတို့ကြားတွင် ဘာမျှ ထူးထူးခြားခြား ဖြစ်ပျက်ခဲ့ပုံမရပေ။

ချူဇီယန်သည် ပါရမီရှင်ဟု တင်စားခံရသူနှင့် အမှိုက်ဟု တစ်ချိန်က သတ်မှတ်ခံရသူတို့ကြားတွင် အမှန်တကယ် ဘာတွေဖြစ်ပျက်ခဲ့သလဲဆိုသည်ကို သိလိုသဖြင့် ဆက်လက်စောင့်ကြည့်နေမိသည်။

သူမ တစ်စုံတစ်ရာ ကောက်ချက်မချနိုင်ရသည့် တစ်ခုတည်းသော အကြောင်းရင်းမှာ ပိုင်ဇီဟန်သည် ပိုင်ရှင်းယွဲ့၏ တာအိုအရိုးကို ရရှိပြီးသည့်တိုင်အောင် အမှိုက်အဆင့်တွင်သာ ဆက်ရှိနေခဲ့ခြင်းကြောင့် ဖြစ်သည်။

အကယ်၍သာ သူသည် ပါရမီထူးလာပြီး ပိုင်ရှင်းယွဲ့က နှင်ထုတ်ခံရသည်ဆိုပါက ပိုင်ဇီဟန်သည် သူမထံမှ တစ်ခုခုကို လုယူခဲ့သည်မှာ ထင်ရှားနေပေလိမ့်မည်။

သို့သော် ပိုင်ဇီဟန်မှာ ဆက်လက်၍ အရည်အချင်းမရှိသူ ဖြစ်နေခဲ့သောကြောင့် သူတို့ကြားတွင် အမှန်တကယ် ဘာတွေ ဖြစ်ပျက်ခဲ့သလဲဆိုသည်ကို သိရှိရန်မှာ မဖြစ်နိုင်သလောက်ပင်။

ပိုင်ဇီဟန်က လှောင်ပြုံးကလေးတစ်ခု ပြုံးလိုက်သည်။

"သူမက ကျွန်တော့်ကို ကောင်းကောင်းကြီး လက်စားချေဖို့ စောင့်နေတာ"

ပိုင်ရန်မှာ ကျောရိုးထဲအထိ ချမ်းစိမ့်သွားရသည်။ ပိုင်ဇီဟန်သည် ပိုင်ရှင်းယွဲ့အပေါ် တစ်ခုခု ကြံစည်နေပုံရသည်။

အကြီးအကဲ ပိုင်ရန်သည် ပိုင်ရှင်းယွဲ့နှင့် ပတ်သက်၍ နောင်တများဖြင့် ပြည့်နှက်နေသည်။ ပိုင်ရှင်းယွဲ့ နှင်ထုတ်ခံရစဉ်က သူသည် အဆင့်တက်ရန် ကျင့်ကြံအားထုတ်နေချိန် ဖြစ်သောကြောင့် နောင်တရနေခြင်းဖြစ်သည်။ အကယ်၍သာ သူရှိနေခဲ့ပါက ထိုကိစ္စကို တားဆီးမိမှာ အသေအချာပင်။

သူသာ ရှိနေခဲ့လျှင် အရာအားလုံးသည် ယခုကဲ့သို့ ဖြစ်လာလိမ့်မည် မဟုတ်ပေ။

ပြီးတော့ သူတို့မျိုးနွယ်စုတွင် 'ကောင်းကင်အဆင့် တာအို ပဲ့တင်ထပ်မှု' ပါရမီရှင် နှစ်ယောက်တောင် ရှိနေမည် ဖြစ်သည်။

ဒါကို ပြန်လည်ပြင်ဆင်လို့ ရနိုင်ဦးမလား?

သူ ပိုင်ဇီဟန်ကို ကြည့်လိုက်ပြီးနောက် ၎င်းမှာ မဖြစ်နိုင်မှန်း သိလိုက်သည်။

ပိုင်ဇီဟန်အနေနှင့် သူလုပ်ခဲ့သမျှအတွက် တောင်းပန်ပြီး သူ့ကိုယ်သူ အရှက်ခွဲမည့်သူ မဟုတ်ပေ။

အမှန်တကယ် အပြစ်တင်ရမည်ဆိုလျှင် သူ့မိခင်ကိုသာ အပြစ်တင်သင့်သည်။

သို့သော်လည်း ပိုင်ရှင်းယွဲ့သည် ပိုင်မျိုးနွယ်စုဝင် တစ်ယောက်ဖြစ်နေသေးသည်ဟု ပိုင်ရန် ခံစားရသည်။ အနည်းဆုံးတော့ သူမ၏ သွေးထဲတွင် သူတို့မျိုးနွယ်စု သွေးများ စီးဆင်းနေဆဲဖြစ်သည်။ ထို့ကြောင့် သူမကို သူမ၏ မိသားစုနှင့် ပြန်လည် တိုက်ခိုက်စေခြင်း မပြုလိုပေ။

သူမ ခံစားခဲ့ရသမျှကို ကြည့်လျှင် ဤသည်မှာ တောင်းဆိုရန် များလွန်းနေသည်ကိုတော့ သူသိပါသည်။

အကယ်၍ အရင်ကဆိုလျှင် ပိုင်ရန်သည် ပိုင်ရှင်းယွဲ့အတွက် ပိုင်ဇီဟန်ကို စွန့်ပစ်ရန် ဝန်လေးနေမည် မဟုတ်သော်လည်း ယခုမူ အခြေအနေက ပြောင်းလဲသွားပြီဖြစ်သည်။

ပိုင်ဇီဟန်သည် စွမ်းဆောင်ရည်ရှိပြီး ပါးနပ်သူဖြစ်ကြောင်း သက်သေပြခဲ့ပြီး ဖြစ်သည်။ ဘယ်ကရမှန်းမသိသော အစွမ်းထက် 'မြေကမ္ဘာအဆင့်' ကျင့်စဉ်များကိုပင် ပိုင်ဆိုင်ထားသူ ဖြစ်သည်။

ပိုင်ရှင်းယွဲ့သည် အမှန်တကယ် ပါရမီထူးနေလျှင်ပင် ယခုအချိန်တွင် သူမအတွက် လက်စားချေရန်မှာ မဖြစ်နိုင်သလောက်ပင်။

ထိုအစား သူက ဆန့်ကျင်ဘက်ကို စိုးရိမ်နေမိသည်။

ပိုင်ရှင်းယွဲ့သည် ပိုင်ဇီဟန်၏ လက်ချက်ဖြင့် ကျဆုံးသွားရလေမလား?

"မစိုးရိမ်ပါနဲ့! ကျွန်တော် ပိုင်ရှင်းယွဲ့ကို ဘာမှမလုပ်ဖို့ ဆုံးဖြတ်ထားပါတယ်" ပိုင်ဇီဟန်က ပိုင်ရန်၏ စိတ်ကို ဖတ်နိုင်နေသကဲ့သို့ ပြောလိုက်ရာ ပိုင်ရန်မှာ အနည်းငယ် အရှက်ရသွားသည်။

အကယ်၍ မနေ့ကသာဆိုလျှင် ပါရမီပြန်ရလာသော ပိုင်ရှင်းယွဲ့ကို ပိုင်ဇီဟန်က အလွတ်ပေးမည်ဆိုသည့် စကားကို ပိုင်ရန် ရယ်မောမိမှာ ဖြစ်သော်လည်း ယနေ့မူ အခြေအနေက ခြားနားသွားပြီဖြစ်သည်။

ပိုင်ဇီဟန်၏ အကြံအဖန်များနှင့် ရက်စက်မှုများကို ကြည့်လျှင် သူသာ အမှန်တကယ် အလိုရှိပါက သူမကို ရှင်းပစ်နိုင်သည့် အခွင့်အရေးရှိသည်ဆိုသည်ကို ပိုင်ရန် မငြင်းနိုင်ပေ။

အင်အားချင်း ယှဉ်မည်ဆိုလျှင် ရှန်လျန်သည်ပင် ပိုင်ရှင်းယွဲ့ထက် သန်မာသော်လည်း နောက်ဆုံးတွင် ပိုင်ဇီဟန်ကြောင့် ဒုက္ခိတ ဖြစ်သွားခဲ့ရသည် မဟုတ်ပါလား?

ထို့ပြင် ပိုင်ဇီဟန်ကို အပြစ်တင်၍လည်း မရပေ။ အရာအားလုံးမှာ ဖြစ်သင့်ဖြစ်ထိုက်သည့် အကြောင်းပြချက်များ ရှိနေခဲ့သည်။

အမှန်တရားမှာ ပိုင်ရန် ထင်နေသည်နှင့် အလွန်ကွာခြားနေသော်လည်းပေါ့။

ပိုင်းရှင်းယွဲ့ကို အလွတ်ပေးမယ် ဟုတ်လား?

ပိုင်ဇီဟန်သည် အင်အားချင်း တူညီနေလျှင်ပင် ကံကြမ္မာအလိုအရ ရွေးချယ်ခံရသူ ကို ထိပ်တိုက်ရင်ဆိုင်ရန် မဝံ့ရဲသေးပေ။

ထိုကဲ့သို့သော သူများသည် သေခါနီးအချိန်ရောက်လျှင် ဝှက်ဖဲများကို တစ်ခုပြီးတစ်ခု ထုတ်သုံးလာတတ်ပြီး၊ ဝှက်ဖဲမရှိလျှင်ပင် ကံကောင်းထောက်မစွာဖြင့် အသက်ဘေးမှ လွတ်မြောက်သွားတတ်ကာ နောက်မှ ပိုမိုအစွမ်းထက်စွာ ပြန်လာပြီး သူ့အသက်ကို ရန်ရှာတတ်ကြောင်း သူသိသည်။

ထို့ကြောင့် အကြွင်းမဲ့ သေချာမှု မရှိမချင်း သူသည် 'ကံကြမ္မာအလိုအရ ရွေးချယ်ခံရသူ' တစ်ယောက်ကို ရန်စရန် အစီအစဉ် မရှိပေ။

သို့သော် ပိုင်ရန်ကမူ ထိုအချက်ကို မသိဘဲ ပိုင်ဇီဟန်သည် သူမကို အမှန်တကယ် မမုန်းတီးတော့သဖြင့် သူမနောက်ကို လိုက်ရန် အကြောင်းမရှိဟု ထင်မှတ်နေသည်။

ပိုင်ရှင်းယွဲ့ဘက်က ရန်လိုလာလျှင်ပင် ပိုင်ဇီဟန်သည် သူမ၏ ဒေါသကို နားလည်ပေးနိုင်လောက်သည်ဟုများလား?

မဖြစ်နိုင်သလောက်ပင် ဖြစ်သော်လည်း အကြီးအကဲ ပိုင်ရန်မှာ ထိုသို့သာ ယုံကြည်ချင်နေပြီး သူမ မူလရှိသင့်သည့် နေရာသို့ ပြန်ရောက်လာမည့် အနာဂတ်ကိုသာ စိတ်ကူးယဉ်ကြည့်နေမိသည်။

"အကယ်၍ အဘိုးတို့ဘက်က အလိုရှိတယ်၊ ခေါ်နိုင်တယ်ဆိုရင် သူမကို မျိုးနွယ်စုထဲ ပြန်ခေါ်လာလို့ ရပါတယ်။ သူမကို အန္တရာယ်မပြုဖို့ ကျွန်တော့် မိခင်တွေကိုလည်း ကျွန်တော် ပြောပေးပါ့မယ်"

ပိုင်ဇီဟန်က ပြောလိုက်သည်။ ဤသည်မှာ သူသည် ပိုင်ရှင်းယွဲ့အပေါ် မည်သည့် ရန်ငြိုးရန်စမှ မရှိကြောင်း ပြသလိုက်ခြင်းပင် ဖြစ်သည်။ သူမဘက်က လက်စားချေဖို့ လာလျှင်ပင်ပေါ့။

"ကောင်းပြီ! မိသားစုဆိုတာ စည်းစည်းလုံးလုံး ရှိနေကြတာက အကောင်းဆုံးပဲ!"