အခန်း ၈၈- မင်းက အစေခံတစ်ယောက်ကို ဘာတွေပေးလိုက်တာလဲ?!

မင်းက အစေခံတစ်ယောက်ကို ဘာတွေပေးလိုက်တာလဲ?!

လင်းရွှမ်းမှာ ဇဝေဇဝါဖြစ်နေသော်လည်း ကျန်ရှိနေသည့် သူတို့သုံးယောက်မှာမူ ဖြစ်ပျက်နေသည်များကို နားလည်နိုင်ရန် ကြိုးစားရင်း ခဏတာ တိတ်ဆိတ်သွားကြသည်။

သူ အသုံးပြုနေသည့် ကျင့်စဉ်မှာ ပိုင်မျိုးနွယ်စု၏ သီးသန့်ကျင့်စဉ်ဖြစ်သည်ဟု လင်းရွှမ်းက အမြဲထင်မှတ်ထားခဲ့ခြင်း ဖြစ်သည်။ အကယ်၍ မျိုးနွယ်စုမှ လူကြီးသူမများ သိသွားပါက သူသည် အကျိုးအကန်း ဖြစ်သွားနိုင်သည် သို့မဟုတ် အသတ်ခံရနိုင်သည်အထိပင် သူ ယုံကြည်ထားခဲ့မိသည်။

"ပိုင်ဇီဟန်... မင်း ဒီကျင့်စဉ်ကို ဘယ်ကနေ ရခဲ့တာလဲ"

ပ်ိုင်ရန်က စပ်စုလိုစိတ်ဖြင့် မေးလိုက်သည်။ ဤကဲ့သို့သော ကျင့်စဉ်မျိုး ပိုင်ဇီဟန်ထံတွင် ရှိနေလိမ့်မည်ဟု မည်သူက ထင်ထားမည်နည်း။ ထို့အပြင် ပိုင်ဇီဟန်သည် အပြင်လောကသို့ လှည့်လည်သွားလာဖူးခြင်း မရှိဘဲ ပိုင်မျိုးနွယ်စု၏ အိမ်တော်တွင်သာ အနေများသူ ဖြစ်သည်။ သို့ဆိုလျှင် ဤကျင့်စဉ်ကို သူ ဘယ်က ရခဲ့သနည်း။

"ကျွန်တော် သိပ်မမှတ်မိတော့ဘူး။ မှတ်မိတတ်တဲ့ အရွယ်ကတည်းက ကျွန်တော့်ဆီမှာ ရှိနေတာ"

ပိုင်ဇီဟန်က ပြန်ဖြေလိုက်သည်။ ဤကျင့်စဉ်ကို 'စနစ်ဆိုင်' မှ လဲလှယ်ခဲ့ခြင်းဖြစ်သည်ဟု သူ မည်သို့ ရှင်းပြနိုင်မည်နည်း။ ဤသူများသည် 'စနစ်' ဆိုသည်မှာ ဘာလဲဆိုသည်ကိုပင် မသိကြချေ။ မျက်စိဖြင့် မမြင်နိုင်သည့် အရာတစ်ခုကို ပို၍ပင် ယုံကြည်ကြမည် မဟုတ်ပေ။ ထို့အပြင် စနစ်ဆိုသည်မှာ သူ၏ အကြီးမားဆုံးသော လျှို့ဝှက်ချက်ဖြစ်ပြီး ဤဘဝတွင် မည်သူ့ကိုမျှ ဖွင့်ပြောပြရန် အစီအစဉ်မရှိပေ။

ပိုင်ဇီဟန်၏ အဖြေကြောင့် ပိုင်ရန်နှင့် ကျန်ရှိသူများမှာ တစ်ဖန် ဆွံ့အသွားကြပြန်သည်။ ဤကဲ့သို့သော မခိုင်လုံသည့် ဆင်ခြေမျိုးဖြင့် လှည့်စားနိုင်မည်ဟု ပိုင်ဇီဟန်က ယူဆထားခြင်းမှာ သူတို့ကို လူအများဟု သတ်မှတ်နေသကဲ့သို့ ခံစားလိုက်ရသည်။

သို့သော် ပိုင်ရန်က ထပ်မံ၍ အကျပ်မကိုင်တော့ပေ။ သူ့အတွက်မူ ပိုင်ဇီဟန်က ဤကျင့်စဉ်ကို မည်သည့်နေရာမှ ရခဲ့သည်ဖြစ်စေ အရေးမကြီးဘဲ ဤသည်မှာ သတင်းကောင်းတစ်ခု ဖြစ်နေခြင်းကသာ အဓိက ဖြစ်သည်။

"ပိုင်ဇီဟန်... ဒီကျင့်စဉ်ကို ငါ ကြည့်လို့ရမလား"

ပိုင်ရန်က ယဉ်ကျေးစွာ မေးလိုက်သည်။ ပိုင်ဇီဟန်က ထိုအရာကို အရေးတကြီး သဘောမထားပေ။ အမှန်အတိုင်းဆိုရလျှင် တွန့်တိုနေရလောက်အောင်ပင် သူ တန်ဖိုးမထားမိခြင်း ဖြစ်သည်။

"လင်းရွှမ်း... သူ့ကို ပြလိုက်ပါ"

ပိုင်ဇီဟန်က ပေါ့ပေါ့ပါးပါးပင် ညွှန်ကြားလိုက်သည်။ လင်းရွှမ်းက ခေါင်းညိတ်လိုက်ပြီး ကျင့်စဉ်စာအုပ်ကို ထုတ်ယူကာ ပိုင်ရန်ထံသို့ ကမ်းပေးလိုက်သည်။

ပိုင်ရန်က စာအုပ်ကို ဂရုတစိုက် လက်ခံယူလိုက်ပြီး တုန်ယင်နေသော လက်ချောင်းများဖြင့် ဖွင့်ကြည့်လိုက်သည်။ ပထမစာမျက်နှာအနည်းငယ်ကို ဖတ်ကြည့်လိုက်သည်နှင့် သူ၏ မျက်စိသူငယ်အိမ်များ ကျုံ့သွားတော့သည်။ သူ့ကဲ့သို့ အဆင့်အတန်းမြင့်မားသည့် ပုဂ္ဂိုလ်တစ်ဦးပင်လျှင် ဤကျင့်စဉ်အတွင်းရှိ နက်နဲဆန်းကြယ်မှုများကို အာရုံခံနိုင်စွမ်း ရှိသည်။

သူ့ကို ပို၍ တုန်လှုပ်စေသည့် အချက်မှာ ဤကျင့်စဉ်သည် ကြယ်တာရာများအောက်တွင် ညဖက်၌ လေ့ကျင့်ပါက အထိရောက်ဆုံး ဖြစ်နေခြင်းပင်။ ဆိုလိုသည်မှာ အခြေအနေမပေးသည့် အချိန်များတွင်ပင် 'ကြယ်တာရာ အသက်ရှူကျင့်စဉ်' သည် 'နဂါးပြာ အသက်ရှူကျင့်စဉ်' နှင့် ရင်ပေါင်တန်းနိုင်နေခြင်း ဖြစ်သည်။

"...ဒါက သာမန် မြေကမ္ဘာအဆင့် ကျင့်စဉ်တစ်ခုတင် မဟုတ်ဘူး" ဟု ပိုင်ရန်က တိုးတိုးလေး ရေရွတ်လိုက်သည်။ "ဒါက အထွတ်အထိပ်အဆင့်ပဲ... ကောင်းကင်အဆင့်လို့တောင် ခေါ်ဆိုထိုက်တယ်"

ချူဇီရန်နှင့် ပိုင်ရွှီချင်းတို့ နှစ်ယောက်စလုံး တောင့်တင်းသွားကြသည်။

ကောင်းကင်အဆင့်လား။

ထိုကဲ့သို့သော ကျင့်စဉ်မျိုးကို ရှေးဟောင်းဂိုဏ်းများမှ လက်ဆင့်ကမ်းလာသည့် သို့မဟုတ် ရှေးဟောင်းအပျက်အစီးများကြားတွင် မြှုပ်နှံထားသည့် ဒဏ္ဍာရီများတွင်သာ သူတို့ ကြားဖူးကြခြင်း ဖြစ်သည်။ သို့မဟုတ်လျှင်လည်း ကောင်းကင်ထက်တွင် ရပ်တည်နေသည့် အတုမရှိ ပညာရှိကြီးများက ဖန်တီးထားခြင်းမျိုးသာ ဖြစ်နိုင်သည်။

ကောင်းကင်ဘုံစွန့်ပစ်ခံအင်ပါယာ တစ်ခုလုံးတွင် ထိုကဲ့သို့သော ကျင့်စဉ်မျိုး ပိုင်ဆိုင်ထားသူ တစ်ဦးမျှ မရှိပေ။ ဆိုလိုသည်မှာ ဤကျင့်စဉ်သည် ရှိသမျှထဲတွင် အကောင်းဆုံးများထဲမှ တစ်ခုပင် ဖြစ်သည်။

ထိုမျှ အဖိုးတန်လှသော ကျင့်စဉ်ကို ပိုင်ဇီဟန်က အစေခံတစ်ဦးကို ပေးလိုက်သည်တဲ့လား။

ချူဇီရန်မှာမူ ဂိုဏ်းအတွင်း မကြာသေးမီက ဖြစ်ပျက်ခဲ့သည်များကို မသိရှိသေးသည့် ပိုင်ရွှီချင်းနှင့် မတူဘဲ လင်းရွှမ်းမှာ အစေခံတစ်ဦးထက် ပိုသည်ကို အနည်းငယ် သိရှိထားသည်။

ပိုင်ရန်မှာမူ ဆက်လက်ဖတ်ရှုနေဆဲ ဖြစ်သည်။ မိနစ်အနည်းငယ်ကြာပြီးနောက်တွင် သူက စာအုပ်ကို ပိတ်လိုက်ပြီး သက်ပြင်းချလိုက်သည်။

"ပိုင်ဇီဟန်... ဒါကို မင်း ဘယ်က ရခဲ့လဲဆိုတာ ငါ မသိပေမဲ့ ဒီကျင့်စဉ်က အင်မတန် အစွမ်းထက်တယ်။ ဒါကို မင်း တန်ဖိုးထားရမယ်"

ပိုင်ဇီဟန်က နှာခေါင်းရှုံ့လိုက်သည်။ အကယ်၍ ဤအရာက တန်ဖိုးထားရမည့်အရာ ဖြစ်နေလျှင် သူ၏ အစစ်အမှန် 'ကောင်းကင်အဆင့်' ကျင့်စဉ်က မည်သို့ဖြစ်မည်နည်း။

"ဒါပေမဲ့ ဒီလောက် အဖိုးတန်တဲ့အရာကို ဘာလို့ ဒီလိုလူမျိုးကို သင်ပေးလိုက်ရတာလဲ"

ပိုင်ရန်က လင်းရွှမ်းကို စိုက်ကြည့်ရင်း မေးလိုက်သည်။ လင်းရွှမ်းမှာ စိတ်လှုပ်ရှားနေသော်လည်း ပိုင်ရန်၏ အကြည့်အောက်တွင် တုန်လှုပ်ခြင်း မရှိဘဲ ရင်ဆိုင်နေခဲ့သည်။ ထိုအချက်ကပင် အဘိုးအိုကို အံ့အားသင့်သွားစေသည်။

(ဟိုး... ဒါကို ကြည့်စမ်း)

လင်းရွှမ်းက မကြောက်မရွံ့ဘဲ တည့်တည့်ရင်ဆိုင်နေသည်ကို မြင်သောအခါ ပိုင်ရန်က တွေးလိုက်မိသည်။ အနည်းဆုံးတော့ ဤကလေးသည် ကြောက်ရွံ့ခြင်း သို့မဟုတ် နောက်ဆုတ်ခြင်း မရှိပေ။ ထိုအချက်ကပင် လင်းရွှမ်းတွင် တစ်ခုခု ထူးခြားနေသည်ဟု ပိုင်ရန်ကို ယုံကြည်သွားစေသည်။ ပိုင်ဇီဟန်က သူ့အပေါ် အလေးအနက်ထား ဆက်ဆံနေခြင်းမှာ အကြောင်းမဲ့ မဟုတ်နိုင်ပေ။

"ဒီလိုလူမျိုး ဟုတ်လား"

ပိုင်ဇီဟန်က ခပ်ဆတ်ဆတ်လေသံဖြင့် ပြန်ပြောလိုက်သည်။ "အကြီးအကဲကြီး အခုထိ သတင်းမကြားသေးဘူး ထင်တယ်"

"ဘာသတင်းလဲ"

ပိုင်ရန်မှာ ရှင်းရှင်းလင်းလင်းပင် ဇဝေဇဝါ ဖြစ်သွားသည်။

"တောက်! ပိုင်မျိုးနွယ်စုက ဘာတွေ လုပ်နေကြတာလဲ။ ဒီလောက် သတင်းကြီးတာကို ဘာတစ်ခုမှ မသိကြဘူးလား"

ပိုင်ဇီဟန်က စိတ်ပျက်လက်ပျက်ဖြင့် လျှာသပ်လိုက်သည်။ ဤကဲ့သို့ အသိအမြင် ခေါင်းပါးနေခြင်းမှာပင် သူတို့ မျိုးနွယ်စု ပျက်သုဉ်းရမည့် အကြောင်းရင်းတစ်ခု ဖြစ်လိမ့်မည်ဟု သူ ယူဆလိုက်သည်။ ပိုင်ရွှီချင်း၏ စေ့စပ်ထားသူဟောင်းမှာ ဂိုဏ်းအတွင်း အတော်လေး ဂယက်ရိုက်သွားစေခဲ့သော်လည်း ပိုင်မျိုးနွယ်စုမှာမူ ဘာမှမသိဘဲ အေးဆေးနေကြဆဲ ဖြစ်သည်။

တစ်ဖန် ပြန်စဉ်းစားကြည့်လျှင် မျိုးနွယ်စုမှ အများစုမှာ ပိုင်ရွှီချင်းကဲ့သို့ပင် တစ်နေ့လုံး အောင်း၍ ကျင့်ကြံနေကြသူများ ဖြစ်ပါက အံ့သြစရာတော့ မဟုတ်တော့ပေ။ ဇာတ်လိုက်ဟု ယူဆရသူကို စောင့်ကြည့်ရန် လူတစ်ယောက် စေလွှတ်ရမည့်အချိန် ရောက်ပြီဟု ပိုင်ဇီဟန်က တွေးလိုက်သည်။

ထို့အပြင် ဂိုဏ်းသို့ သူရောက်ရှိလာကတည်းက သူ့ကို ရှောင်ဖယ်နေကြသည့် ပိုင်မျိုးနွယ်စုဝင်များကိုလည်း သူ သတိရသွားသည်။ ပိုင်ဇီဟန်က ပိုင်မျိုးနွယ်စုကို အဆက်မပြတ် ဆဲဆိုနေပြီး အကြောင်းစုံကို မရှင်းပြသောကြောင့် အကြီးအကဲကြီး ပိုင်ရန်မှာ ပို၍ပင် မျက်စိလည်လာတော့သည်။

"အကြီးအကဲကြီး... ကျွန်မ ရှင်းပြပါရစေ"

ပိုင်ဇီဟန်က ရှင်းပြမည့်ပုံ မရှိဘဲ ပိုင်မျိုးနွယ်စုကိုသာ ဆက်လက် ဝေဖန်နေမည်ကို မြင်သောအခါ ချူဇီရန်က ဝင်ပြောလိုက်သည်။ သူမက 'ကောင်းကင်ဓားဂိုဏ်း' ၏ စစ်ဆေးမှုတွင် လင်းရွှမ်း၏ မယုံကြည်နိုင်လောက်သော စွမ်းဆောင်ရည်နှင့် သူ၏ 'ကောင်းကင်အဆင့် တာအိုပဲ့တင်ထပ်မှု' အကြောင်းကို ရှင်းပြလိုက်သည်။

"ကောင်းကင်အဆင့် တာအိုပဲ့တင်ထပ်မှု..."

(ပိုင်ဇီဟန် ဘာလို့ စိတ်တိုနေလဲဆိုတာ အခုမှ နားလည်တော့တယ်။ ဒါက အင်မတန် အရေးကြီးတဲ့ကိစ္စပဲ။ ပိုင်မျိုးနွယ်စုက ဒါကို လုံးဝ မသိသေးဘူး။ ဒီလောက် ပေါ့ဆတဲ့အတွက် ထျန်းဟန်းကို သင်ခန်းစာ ပေးရမယ်...)

ပိုင်မျိုးနွယ်စုအနေဖြင့် ဤသတင်းကို မသိရှိခြင်းမှာ ကောင်းကင်ဓားဂိုဏ်းမှ သတင်းများကို တင်းကျပ်စွာ ထိန်းချုပ်ထားသောကြောင့်လည်း ပါဝင်သည်။ သူတို့သည် လင်းရွှမ်းကို အခြားသူများ လုယူသွားမည်ကို မလိုလားကြပေ။ သို့သော်လည်း သူတို့အနေဖြင့် သတင်းအားလုံးကိုတော့ မဖုံးကွယ်နိုင်ခဲ့ပေ။ အချို့သော မျိုးနွယ်စုကြီးများသည် သိရှိထားကြပြီး လွန်ခဲ့သည့် လအနည်းငယ်ကပင် လင်းရွှမ်းကို စည်းရုံးရန် ကြိုးစားခဲ့ကြသေးသည်။ လင်းရွှမ်းကမူ ထိုသူအားလုံးကို ငြင်းပယ်ခဲ့သည်မှာ ထင်ရှားသည်။

စစ်ဆေးမှု ပြုလုပ်စဉ်က ပိုင်ဇီဟန် တစ်ဦးတည်းသာ ရှိနေခဲ့ခြင်း ဖြစ်နိုင်ပြီး၊ ကောင်းကင်ဓားဂိုဏ်းတစ်ခုလုံးတွင်လည်း ဤသတင်းကို မျိုးနွယ်စုထံ ပေးပို့နိုင်သူမှာ သူတစ်ဦးတည်းသာ ရှိပေလိမ့်မည်။ ကျန်ရှိသည့် ပိုင်မျိုးနွယ်စုဝင်များမှာမူ ဂိုဏ်းပြင်ပသို့ ရောက်နေကြခြင်း သို့မဟုတ် ပိုင်ဇီဟန်ကို ရှောင်ရှားရန်အတွက်သာ အောင်း၍ ကျင့်ကြံနေကြခြင်း ဖြစ်သည်။

တစ်နည်းအားဖြင့် ပြောရလျှင် ကောင်းကင်ဓားဂိုဏ်းအတွင်း ဖြစ်ပျက်နေသည်များကို ပိုင်မျိုးနွယ်စု မသိရှိရခြင်းမှာ ပိုင်ဇီဟန်ကြောင့်လည်း ပါဝင်နေသည်။

"ဟားဟား... တကယ့် ပါရမီရှင်ပဲ။ လူငယ်လေး... မင်းရဲ့ အနာဂတ်က အလွန်တောက်ပမှာ သေချာတယ်"

ပိုင်ရန်က ပြုံးလျက် ပြောလိုက်သည်။ သူသည် လင်းရွှမ်း၏ ပါရမီကြောင့် အံ့သြသွားရုံသာမက၊ စစ်ဆေးမှု မတိုင်ခင်ကတည်းက လင်းရွှမ်း၏ အလားအလာကို ပိုင်ဇီဟန် မည်သို့ သိရှိခဲ့သည်ကို နားမလည်နိုင်သော်လည်း ပိုင်ဇီဟန် အဘယ်ကြောင့် ဤသို့ လုပ်ဆောင်ခဲ့သည်ကိုမူ စတင် သဘောပေါက်လာခဲ့သည်။

သို့သော် ထိုအချက်မှာ အရေးမကြီးတော့ပေ။ အရေးကြီးဆုံးအချက်မှာ ပိုင်မျိုးနွယ်စုဖက်တွင် ထိပ်တန်း ပါရမီရှင်တစ်ဦး ရရှိထားခြင်းပင် ဖြစ်တော့သည်။