အခန်း ၇၆ - ကောလာဟလများ ချေဖျက်ခြင်းနှင့် ဂုဏ်သတင်းများ ပြန်လည်နိုးထခြင်း

ပိုင်ဇီဟန်သည် ယွင်ချင်းမေ့နှင့် ဖေးလင်ကို စနောက်နေခြင်းအား ရပ်တန့်လိုက်သည်။

သူကိုယ်တိုင် ရပ်တန့်ချင်၍တော့ မဟုတ်ပေ။ အကြီးအကဲ ချင်းလန်နှင့် လင်းရွှမ်တို့ သူ့ထံသို့ လျှောက်လှမ်းလာသည်ကို သတိပြုမိသွားခြင်းကြောင့် ဖြစ်သည်။

သူ အဘယ်ကြောင့် ရုတ်တရက် ရပ်တန့်သွားသည်ကို မိန်းကလေးနှစ်ဦး မသိသော်လည်း ၎င်းတို့မှာ ဆက်နေ၍ မေးမြန်းနေမည့်သူများ မဟုတ်ကြချေ။

၎င်းတို့နှစ်ဦး ထောင့်ကွေ့တစ်ခုတွင် ပျောက်ကွယ်သွားသည်နှင့် တစ်ပြိုင်နက် လင်းရွှမ်က အပြေးအလွှား ရောက်ရှိလာပြီး ပိုင်ဇီဟန်ကို မြင်လိုက်ရသည့် ခဏ၌ မျက်ဝန်းများ တောက်ပသွားတော့သည်။

"သခင်လေး... ရောက်နေတာလား"

သူ့အသံမှာ စိတ်လှုပ်ရှားမှုနှင့် အားကျမှုကို မနည်းထိန်းထားရသည့်ပုံစံ ပေါက်နေသည်။

"ဂုဏ်ယူပါတယ်ခင်ဗျာ! ကျွန်တော် အကုန်လုံးကို ကြည့်နေခဲ့တာပါ။ လင်းရွှမ်မင်းရဲ့ စွမ်းဆောင်ရည်တွေကို အားလုံးကို ချပြနိုင်ခဲ့တာကို မြင်ရတော့ ကျွန်တော် တကယ်ပဲ ဝမ်းသာမိပါတယ်"

သူ့စကားများမှာ ရိုးသားလှပြီး ဟန်ဆောင်မှု ကင်းမဲ့နေသည်။

"ဒါတွေအားလုံးက သခင်လေးရဲ့ အကူအညီကြောင့်ပါ" ဟု လင်းရွှမ်က ခေါင်းကို အနည်းငယ် ငုံ့လျက် ပြောလိုက်သည်။

"သခင်လေးသာ မရှိခဲ့ရင်... ကျွန်တော် ဒီအထိ ရောက်လာနိုင်မှာ မဟုတ်ဘူး"

အကြီးအကဲ ချင်းလန်သည် ၎င်းတို့နှစ်ဦး ဆက်ဆံပုံကို ကြည့်နေသည်။

သူမ မြင်တွေ့နေရသည့် အနေအထားအရ သူမ ကြားသိထားသည့် ကောလာဟလများမှာ လုံးဝ လုပ်ကြံဖန်တီးထားခြင်းဖြစ်ကြောင်း သိသာထင်ရှားနေသည်။

"မင်းတို့နှစ်ယောက် နောက်မှပဲ စကားဆက်ပြောကြတော့။ ကဲ... သွားရအောင်" ဟု အကြီးအကဲ ချင်းလန်က ဆိုသည်။

"အကြီးအကဲ... ကျွန်တော် တောင်းဆိုမှုတစ်ခုလောက် လုပ်လို့ ရမလား"

လင်းရွှမ်က မဝံ့မရဲ မေးလိုက်သည်။

သူသည် သူမအပေါ် အကြွေးများစွာ တင်နေပြီဖြစ်ရာ အသေးအဖွဲ ကိစ္စလေးတစ်ခုကိုပင် ထပ်မံတောင်းဆိုရခြင်းမှာ သူ့ကို အားနာစိတ် ဖြစ်ပေါ်စေသည်။

"ရတာပေါ့။ ဘာကိစ္စလဲ"

အကြီးအကဲ ချင်းလန်က တုံ့ဆိုင်းခြင်းမရှိဘဲ ဖြေလိုက်သည်။

သူမက ထွေထွေထူးထူး မစဉ်းစားပေ။ လင်းရွှမ်ကဲ့သို့ ပါရမီရှင်တစ်ဦးကို သူမ၏ တောင်ထွတ်သို့ ဝင်ရောက်စေရန်အတွက် မကောင်းမှုမှလွဲ၍ ကျန်သည့် မည်သည့်ဆန္ဒကိုမဆို သူမ ဖြည့်ဆည်းပေးမည်ဖြစ်သည်။

"ကျွန်တော့်ရဲ့ နေအိမ်ကို သခင်လေးရဲ့ အနီးအနားမှာပဲ ထားပေးလို့ ရမလားခင်ဗျာ"

လင်းရွှမ်က မေးလိုက်သည်။

"သူ့အနားမှာ ရှိနေရင် သူ့ကို ဝေယျာဝစ္စလုပ်ပေးရတာ ပိုလွယ်ကူမှာမို့လို့ပါ"

ထိုစကားကြောင့် အကြီးအကဲ ချင်းလန်နှင့် ပိုင်ဇီဟန်တို့ နှစ်ဦးစလုံး အံ့အားသင့်သွားကြသည်။

လင်းရွှမ်က ကျေးဇူးသိတတ်သူမှန်း အကြီးအကဲ ချင်းလန် သိထားသော်လည်း ဤမျှအထိ နက်ရှိုင်းလိမ့်မည်ဟု သူမ မမျှော်လင့်ထားခဲ့ပေ။

ကောင်းကင်ဘုံလက်ဆောင် ပါရမီရှင်တစ်ဦးအဖြစ်—ကောင်းကင်ဓားဂိုဏ်းတစ်ခုလုံးက တန်ဖိုးထားရမည့်သူတစ်ဦးအဖြစ်—ပေါ်ထွက်လာပြီးသည့်တိုင် လင်းရွှမ်က ပိုင်ဇီဟန်ကို ဆက်လက် အလုပ်အကျွေးပြုလိုသေးသည်လား။

သူသည် ပိုင်ဇီဟန် ပေးခဲ့သည့် အရင်းအမြစ်များထက် ဆယ်ဆခန့် ပြန်လည်ပေးဆပ်ရန် ဂိုဏ်းထံမှ အကူအညီတောင်းကာ ကျေးဇူးဆပ်နိုင်သည်။

အစေခံတစ်ယောက်ကဲ့သို့ ဆက်လက် နေထိုင်နေရန် မလိုအပ်တော့ပေ။

သူတို့ဂိုဏ်း၏ အနာဂါတ် ဂိုဏ်းချုပ်—သို့မဟုတ် အနည်းဆုံး အဆင့်မြင့် အကြီးအကဲတစ်ဦး—ဖြစ်လာမည့်သူသည် နာမည်ပျက်ဖြင့် ကျော်ကြားနေသော ပိုင်ဇီဟန်ကဲ့သို့ လူမျိုးထံတွင် နှိမ့်ချနေသည်ကို ဂိုဏ်းက အလိုရှိမည်မဟုတ်သည်မှာ သေချာသည်။

ကောင်းကင်ဓားဂိုဏ်းတစ်ခုလုံးတွင်—ကောင်းကင်ဘုံစွန့်ပစ်ခံအင်ပါယာတစ်ခုလုံးတွင်ပင် ဖြစ်နိုင်သည်—ပိုင်ဇီဟန်ထက် နာမည်ဆိုးသူ မရှိသလောက်ပင်။

အခြားအကြီးအကဲတစ်ဦးသာဆိုလျှင် လင်းရွှမ်ကို ဤကဲ့သို့ မိမိကိုယ်ကိုယ် တန်ဖိုးမချရန် ဝင်ရောက်တားမြစ်ပေလိမ့်မည်။

သို့သော် အကြီးအကဲ ချင်းလန်မှာ အခြားသူများနှင့် မတူပေ။ သူမသည် အပေါ်ယံ အသိုင်းအဝိုင်း မျက်နှာစာထက် စိတ်ဓာတ်တန်ဖိုးကို ပိုမိုအလေးထားသည်။

လင်းရွှမ်က ပိုင်ဇီဟန်အနားတွင် နေထိုင်ကာ ဆက်လက် အလုပ်အကျွေးပြုခြင်းဖြင့် ကျေးဇူးဆပ်လိုသည်ဆိုပါက သူမအနေဖြင့် ဝင်ရောက်နှောင့်ယှက်ရန် မလိုအပ်ဟု ခံစားရသည်။

"ကောင်းပြီလေ! ပိုင်ဇီဟန်ရဲ့ အိမ်အနီးအနားမှာ နေအိမ်တွေ အများကြီး ရှိပါတယ်။ မင်းနဲ့ အကိုက်ညီဆုံးတစ်ခုကို ရွေးချယ်နိုင်ပါတယ်"

လင်းရွှမ်က ခေါင်းခါလိုက်သည်။

"အနီးဆုံးတစ်ခုဆိုရင် ရပါပြီ"

သူသည် ယခင်က ဟောင်းနွမ်းစုတ်ပြတ်နေသည့် အထွေထွေလုပ်သား နားနေဆောင်တွင် နေထိုင်ခဲ့ရသူဖြစ်ရာ အဆောင်အယောင် ခမ်းနားမှုကို ဂရုမစိုက်ပေ။ သူသည် ပိုင်ဇီဟန်နှင့် နီးနီးကပ်ကပ် ရှိနေလိုရုံသာ ဖြစ်သည်။

အကြီးအကဲ ချင်းလန်နှင့် လင်းရွှမ်တို့ စကားပြောနေစဉ်တွင် ပိုင်ဇီဟန်က ပြုံးလျက် နားထောင်နေသည်။

လင်းရွှမ်သည် ထင်ပေါ်ကျော်ကြားသွားပြီးသည့်တိုင် သစ္စာရှိနေဆဲ ဖြစ်ပုံရသည်။ ၎င်းမှာ သတင်းကောင်းပင်။

အနည်းဆုံးတော့ လင်းရွှမ်သည် မည်သည့်အခြေအနေမျိုးတွင်မဆို ကျေးဇူးကို ကျေးဇူးဖြင့် ပြန်ဆပ်တတ်သူတစ်ဦး ဖြစ်သည်။

အရင်းအမြစ် အနည်းငယ်ပေးခဲ့သည်ကို အသက်သခင်ကျေးဇူး ဆပ်ပြီးပြီဟု သဘောထားကာ မိမိဘာသာ ကောင်းကင်ဘုံသို့ တက်လှမ်းသွားပြီး ကူညီခဲ့သူများကို လုံးဝမေ့လျောက်သွားတတ်သည့် အချို့သော ဇာတ်လိုက်များနှင့် မတူပေ။

ထိုကဲ့သို့သော ဇာတ်လိုက်မျိုးမှာ အခန်းပေါင်း ရာနှင့်ချီ ကြာပြီးနောက်တွင်မှ သူတို့ ဇာတ်လိုက်လုပ်နေစဉ်အတွင်း ကူညီခဲ့သူမှာ အောက်တန်းစား လူဆိုးတစ်ဦးလက်ချက်ဖြင့် သေဆုံးသွားခဲ့ရကြောင်း သိရှိသွားတတ်ကြသည်။

***

ဝင်ခွင့်စာမေးပွဲသတင်းမှာ ကောင်းကင်ဓားဂိုဏ်းတစ်ခွင် တောမီးပမာ ပျံ့နှံ့သွားလေသည်။

အစပိုင်းတွင် လှေကားတက်၊ အိမ်သာဆေး လုပ်နေရသည့် အေးအေးဆေးဆေးနေတတ်သော အထွေထွေလုပ်သားလေး လင်းရွှမ်သည် ကောင်းကင်အဆင့် ပါရမီကို နိုးထစေခဲ့သည်ဆိုသည့် စကားမှာ တီးတိုးစကားများသာ ဖြစ်သည်။

လူများက ရယ်မောကြသည်။ ပြက်လုံးတစ်ခုဟု ထင်ကြသည်။ အရှက်မရှိ လိမ်ညာမှုဟု ယူဆကြသည်။

သို့သော် အကြီးအကဲများ၏ အတည်ပြုချက်နှင့် ကိုယ်တိုင်မြင်တွေ့ခဲ့ရသည့် တပည့်များ၏ စကားများကဲ့သို့သော အသေးစိတ် အချက်အလက်များ ထွက်ပေါ်လာသောအခါ ထိုတီးတိုးစကားများသည် ပြင်းထန်သော မုန်တိုင်းတစ်ခုအဖြစ်သို့ ပြောင်းလဲသွားတော့သည်။

အထွေထွေလုပ်သားလေးမှာ လူတိုင်း၏ မျှော်လင့်ချက်ကို ရိုက်ချိုးပစ်ခဲ့ပြီဖြစ်သည်။

သို့သော် လင်းရွှမ်၏ ကောင်းကင်အဆင့် ရလဒ်ထက် ပိုမိုတုန်လှုပ်ဖွယ်ကောင်းသည်မှာ သူသည် တောင်ပေါ်သို့ တစ်ကိုယ်တည်း တက်လှမ်းခဲ့ခြင်း မဟုတ်ဆိုသည့် အချက်ပင်ဖြစ်သည်။

မျက်မြင်တွေ့ခဲ့သည့် တပည့်အချို့၏ ပြောကြားချက်အရ လင်းရွှမ်သည် တိုက်ခိုက်ရေး စမ်းသပ်မှုတွင် ပိုင်မျိုးနွယ်စုဝင်များသာ လေ့ကျင့်နိုင်သည့် နက်နဲအဆင့် ဓားသိုင်းပညာတစ်ခုကို အသုံးပြုခဲ့သည်ဟု ဆိုသည်။

ထိုအချက်တစ်ခုတည်းနှင့်ပင် လူအများ အာရုံစိုက်မိရန် လုံလောက်နေပြီဖြစ်သည်။

သို့သော် လူများက အစအနများကို ဆက်စပ်ကြည့်သောအခါ—တန်ဖိုးကြီး ဆေးလုံးများ၊ ရုတ်တရက် တိုးတက်လာသည့် ခွန်အား၊ တည်ငြိမ်သည့် အမူအရာနှင့် ပိုင်ဇီဟန်အနားတွင် သစ္စာရှိသော အစောင့်ခွေးတစ်ကောင်ကဲ့သို့ အမြဲရှိနေပုံများ—အဖြေက ထွက်လာတော့သည်။

ထို့နောက် ထွက်ပေါ်လာသည့် သတင်းများက ဂိုဏ်းတစ်ခုလုံးကို တုန်လှုပ်သွားစေသည်။

"နေပါဦး... မင်းပြောချင်တာက ပိုင်ဇီဟန်က သူ့ကို မြေကမ္ဘာအဆင့် ကျင့်စဉ်တစ်ခု ပေးခဲ့တယ် ဟုတ်လား။ မင်း နောက်နေတာလား"

"ငါကြားတာကတော့ လင်းရွှမ်ကို သူ့ရဲ့ ကိုယ်ရံတော်အစေခံ လုပ်မယ်ဆိုရင် ကျင့်စဉ်တစ်ခု ပေးမယ်လို့ ကတိပေးခဲ့တာတဲ့။ လင်းရွှမ်ရဲ့ တိုးတက်မှုကို ကြည့်ရရင်တော့ အဲဒါက အမှန်ပဲဖြစ်ရမယ်"

"ဒါပေမဲ့ ပိုင်ဇီဟန်က ဘာလို့ အပြင်လူတစ်ယောက်ကို အဲဒီလိုမျိုး ပေးရတာလဲ"

"အဲဒါပဲလေ! အဲဒါက မဖြစ်သင့်တဲ့အရာပဲ! ဒါက မျိုးနွယ်စုရဲ့ လျှို့ဝှက်ချက်ကို အကြီးအကျယ် ဖောက်ဖျက်တာပဲ။ ပိုင်မျိုးနွယ်စုသာ သိသွားရင် သူ ဆူပူကြိမ်းမောင်းခံရရုံတင် မကဘူး။ အသတ်ခံရနိုင်တယ်၊ ဒါမှမဟုတ် အနည်းဆုံးတော့ မျိုးနွယ်စုကနေ အဝတ်တစ်ထည် ကိုယ်တစ်ခုနဲ့ နှင်ထုတ်ခံရမှာ"

"အဲဒီကောင်က ဘာတွေ ဖြစ်နေတာလဲ..."

ကောင်းကင်ဓားဂိုဏ်းမှာ ပွက်လောရိုက်သွားသည်။

သူတို့သည် ပိုင်ဇီဟန်ကို ပါရမီလည်းမရှိ၊ ကိုယ်ကျင့်တရားလည်းမရှိသည့် ပျင်းရိပြီး မောက်မာသော သခင်လေးတစ်ဦးအဖြစ်သာ မှတ်ယူထားခဲ့ကြသည်။

သူနှင့်ပတ်သက်သည့် ကောလာဟလအမျိုးမျိုး ရှိနေပြီး တစ်ခုထက်တစ်ခု ပိုမိုဆိုးရွားလှသည်။ သူသည် အခွင့်ထူးခံ လူကုံထံသားတစ်ဦး၏ ပုံစံမျိုးပင်။

ယခုမူ သူသည် ကောလာဟလများထက်ပင် ပိုမိုရူးသွပ်ကြောင်း သူတို့ သိရှိသွားကြပြီဖြစ်သည်။

မိမိမျိုးနွယ်စု၏ သီးသန့်သိုင်းကွက်ကို အပြင်လူတစ်ဦးအား သင်ကြားပေးရဲသည်အထိ ပိုင်ဇီဟန်သည် မိမိမျိုးနွယ်စု၏ စည်းမျဉ်းများကိုပင် ကြောက်ရွံ့ပုံမရပေ။

နက်နဲအဆင့် သိုင်းကွက်တစ်ခုကို အစေခံဖြစ်စေရန်အတွက် အပြင်လူအား သင်ကြားပေးခြင်းမှာပင် မတွေးရဲစရာဖြစ်ရာ မြေကမ္ဘာအဆင့်ဆိုလျှင် ပြောနေရန်ပင် မလိုတော့ပေ။

ထိုကဲ့သို့သော ပုဂ္ဂိုလ်မျိုးရှိပါက 'ဝိညာဥ်သန္ဓေ' အဆင့် ကျင့်ကြံသူတစ်ဦးပင်လျှင် အစေခံအဖြစ် ခံယူရန် ဝန်လေးမည်မဟုတ်ချေ။

"နေပါဦး၊ ဒါဆို ပိုင်ဇီဟန်က လင်းရွှမ်ကို နှိပ်စက်နေတယ်ဆိုတဲ့ ကောလာဟလတွေက အမှားတွေပေါ့"

"အတိအကျပဲ! လင်းရွှမ်က အခု ကောင်းကင်အဆင့် ပါရမီရှင် ဖြစ်နေပြီလေ။ လင်းရွှမ်သာ တောင်းဆိုမယ်ဆိုရင် ဂိုဏ်းက ပိုင်ဇီဟန်ကို နှင်ထုတ်ပြီးတော့တောင် လင်းရွှမ်ကို ဆွဲထားမှာ။"

"ဒါပေမဲ့ သူက အဲဒီလိုလုပ်မယ့်အစား အကြီးအကဲ ချင်းလန်ကို သူ့ရဲ့ နေအိမ်ကို ပိုင်ဇီဟန်နဲ့ နီးတဲ့နေရာမှာ ထားပေးဖို့ ကိုယ်တိုင် တောင်းဆိုခဲ့တာ"

တပည့်တစ်စုလုံး မှင်တက်ကာ ငြိမ်ကျသွားကြသည်။

"ဒါဆို ပိုက်ဇီဟန်က သူ့ကို နှိပ်စက်တယ်၊ ရိုက်နှက်တယ်၊ အဆိပ်ဆေးတွေ ကျွေးတယ်ဆိုတဲ့ ကောလာဟလတွေက... လျှောက်ပြောတာတွေပေါ့? ငါကတော့ ပိုင်ဇီဟန်က တကယ်ပဲ အဲဒီလိုတွေ လုပ်တယ် ထင်နေတာ"

"အဲဒီလိုပဲ ဖြစ်ရမယ်! လူတွေက တစ်ယောက်ယောက်ရဲ့ နာမည်ဖျက်ဖို့အတွက် လုပ်ကြံစကားတွေ ပြောတာ ဒါက ပထမဆုံးအကြိမ်မှ မဟုတ်တာ"

မကြာမီပင် ကောင်းကင်ဓားဂိုဏ်းသားများသည် ပိုင်ဇီဟန်အား တစ်စုံတစ်ဦး၏ အကွက်ချ လုပ်ကြံမှုကို ခံနေရသည့် သားကောင်အဖြစ် စတင်မြင်လာကြပြီး သူ၏ နာမည်ဂုဏ်သတင်းမှာလည်း ပြန်လည်ကောင်းမွန်လာတော့သည်။

မှန်ပါသည်၊ ထိုအရာများမှာ ဂိုဏ်းအတွက် ကောင်းကင်အဆင့် ပါရမီရှင်တစ်ဦး ရရှိလိုက်ခြင်းလောက် အရေးမကြီးပေ။

သို့သော် လူတစ်ဦးအတွက်မူ ဤသည်မှာ ကြီးမားသော ပြဿနာတစ်ခု ဖြစ်နေသည်။

***

အတွင်းတောင်ထွတ်တစ်ခုပေါ်ရှိ တသီးတခြားဖြစ်နေသော ဝန်းခြံတစ်ခုအတွင်းတွင် ရှန်လျန်သည် ဇရပ်တစ်ခုအောက်၌ တစ်ကိုယ်တည်း ထိုင်နေသည်။ လက်ဖက်ရည်မှာလည်း မသောက်ရသေးဘဲ ရှိနေကာ သူ၏ မျက်မှောင်များမှာ ကျောက်သားပေါ်တွင် ထွင်းထုထားသည့်အလား တွန့်ချိုးနေသည်။

"တောက်!"

ခလွမ်း!

လက်ထဲမှ လက်ဖက်ရည်ခွက်မှာ အစိပ်စိပ်အမွှာမွှာ ကွဲအက်သွားပြီး ကြွေစလေးများမှာ စားပွဲပေါ်တွင် ပျံ့နှံ့သွားတော့သည်။

အရာအားလုံးက လုံးဝ ပြီးပြည့်စုံနေခဲ့သည်—သို့မဟုတ် သူက ထိုသို့ ထင်နေခဲ့ခြင်းဖြစ်သည်။

လင်းရွှမ်ဆိုသည့် အမည်မသိ အထွေထွေလုပ်သားမှာ ပိုင်ဇီဟန်၏ နာမည်ကို ဖျက်ဆီးရန်အတွက် သူ၏ ရွှေ့ကွက်တစ်ခုသာ ဖြစ်သင့်သည်။

ကောလာဟာလများ မှန်၊ မမှန်ကို သူ ဂရုမစိုက်ပေ။ အမှားဖြစ်ကြောင်း သက်သေပြနိုင်သည့်တိုင် ကြီးကြီးမားမား ထိခိုက်မှုရှိမည် မဟုတ်ပေ။ အခြား ဆိုးရွားသည့် ကောလာဟလများစွာ ကျန်ရှိနေသေးသည်။

သို့သော် ယခုမူ...

လင်းရွှမ်၏ ရုတ်တရက် တောက်ပလာမှုနှင့် သူ၏ ကောင်းကင်အဆင့် ပါရမီသတင်း ပျံ့နှံ့သွားမှုကြောင့် လူများမှာ ပိုင်ဇီဟန်က သူ့ကို နှိပ်စက်သည်ဆိုသော ကောလာဟလများကိုသာ အာရုံစိုက်နေကြသည်။

ယခုမူ ထိုကောလာဟလများမှာ ပြိုကွဲပျက်စီးသွားပြီ ဖြစ်သည်။

ထိုကောင်လေးမှာ လူအများရှေ့တွင်ပင် 'လျှို့ဝှက်လ' တောင်ထွတ်သို့ ဝင်ရောက်ရန် ရွေးချယ်ခဲ့ပြီး ပိုင်ဇီဟန်ကို သူ၏ ကျေးဇူးရှင်အဖြစ်ပင် ခေါ်ဆိုခဲ့သည်လား။

ယခုအခါ လူအများက အခြားသော ကောလာဟလများသည်လည်း မှားယွင်းနေလိမ့်မည်ဟု ထင်မြင်နေကြပြီဖြစ်သည်။

"တောက်!"

ရှန်လျန်က အံကြိတ်ကာ မျက်နှာပျက်နေသည်။

ပို၍ဆိုးသည်မှာ လူပြောသူပြောများ ပြောင်းလဲသွားခြင်းပင်။

လွန်ခဲ့သည့် တစ်နာရီအတွင်းမှာပင် ရှန်လျန်သည် သူ တစ်ခါမျှ ကြားရလိမ့်မည်ဟု မထင်ထားသည့် စကားများကို ကြားခဲ့ရသည်။

"ပိုင်ဇီဟန်က ငါကြားဖူးထားသလိုမျိုး မဟုတ်ဘဲ လုံးဝ ဆန့်ကျင်ဘက် ဖြစ်နေမယ်လို့ မထင်ထားမိဘူး"

"အေးလေ၊ သူ လင်းရွှမ်ကို ဆက်ဆံပုံကို ကြည့်ဦး။ အထွေထွေလုပ်သားလေး တစ်ယောက်ကိုတောင် တန်ဖိုးကြီး အရင်းအမြစ်တွေနဲ့ မြေကမ္ဘာအဆင့် ကျင့်စဉ်တွေ ပေးခဲ့တာ!"

"အခုဆိုရင် ပိုင်ဇီဟန်ဆီမှာ အစေခံဝင်လုပ်ချင်တဲ့သူတွေတောင် ရှိနေပြီ။ အတွင်းစည်းတပည့်အချို့ဆိုရင် သူခိုင်းတာ အကုန်လုပ်ပေးမယ်၊ သူ့ရဲ့ အစေခံအဖြစ် လက်ခံပေးပါလို့ ပြောနေကြတာ ငါကြားခဲ့တယ်"

(ရက်ရောတယ်? ကြင်နာတယ်? သစ္စာရှိအောင် မွေးမြူတတ်တယ်?)

"အလကားတွေ!"

ရှန်လျန်က ဟိန်းဟောက်လိုက်သည်။

ပိုင်ဇီဟန်၏ အကွက်ထဲတွင် ခံစားခဲ့ရပြီးနောက် လူတစ်ယောက်က သူ့ကို ချီးကျူးစကား ပြောလိုက်တိုင်း ပါးရိုက်ခံရသလို ခံစားနေရသည်။

ပိုင်ဇီဟန်ကသာ ထိုမျှ ရက်ရောလျှင် သူက အဘယ်ကြောင့် မတရား ခံစားခဲ့ရသနည်း။ သူက အခြားသူများကို ကြောက်ရွံ့အောင် သို့မဟုတ် နာခံအောင် လုပ်တတ်ရုံနှင့် ကြင်နာသူ ဖြစ်သွားရောလား။

မှန်ပါသည်၊ သူသည် ကောလာဟလအချို့ကို လုပ်ကြံခဲ့သည်။ သို့သော် ထိုအရာများမှာ မှားယွင်းနေသည်ဟု မဆိုလိုပေ။

သူသည် ဖြစ်ရပ်တစ်ခုကိုသာ လုပ်ကြံဖန်တီးမိခြင်း ဖြစ်သည်။

သူသည် သူခံခဲ့ရသလို အခြားသူများ မခံရအောင် ကာကွယ်ပေးနေခြင်းသာ ဖြစ်သည်။

မှန်ပါသည်၊ ထိုအရာများမှာ ထိုသို့သော ဆိုးရွားသည့် လုပ်ရပ်များကို လုပ်ဆောင်နေစဉ်အတွင်း မိမိကိုယ်ကိုယ် ပြန်လည် ခုခံချေပနေသည့် ဆင်ခြေများသာ ဖြစ်သည်။

သို့သော် ယခုမူ ထိုခက်ခဲစွာ လုပ်ဆောင်ခဲ့သမျှမှာ အလဟဿ ဖြစ်သွားတော့မည်။

ရှန်လျန်အနေဖြင့် ထိုသို့ ဆက်လက်ဖြစ်ပျက်နေသည်ကို ခွင့်မပြုနိုင်ပေ။

သူသည် လက်စွပ်အတွင်းမှ ဆက်သွယ်ရေး အဆောင်လက်ဖွဲ့တစ်ခုကို ထုတ်ယူလိုက်သည်။

"ဖန်ကျင်းယန်" ဟု သူက အေးစက်စွာ ပြောလိုက်သည်။

ခဏအကြာတွင် တစ်ဖက်မှ ရင်းနှီးနေသော၊ တည်ငြိမ်အေးဆေးသော အသံတစ်ခု ထွက်ပေါ်လာသည်။

"စီနီယာအစ်ကို ရှန်။ ကျွန်တော် အမိန့်ကို စောင့်နေပါတယ်"

ရှန်လျန်၏ မျက်ဝန်းများမှာ မှောင်မိုက်သွားသည်။

"အချိန်ရောက်ပြီ။ ကောင်းကောင်းမွန်မွန် ကစားပေးနေတဲ့ အချိန် ပြီးသွားပြီ"

ခဏမျှ တိတ်ဆိတ်သွားသည်။ ထို့နောက် ဖန်ကျင်းယန်၏ အသံတွင် စိတ်ဝင်စားမှု အရိပ်အယောင်များ ပါဝင်လျက် ထွက်ပေါ်လာသည်။

"ဒါဆို ကျွန်တော်တို့ အစီအစဉ်အတိုင်း ဆက်သွားကြတော့မလား"

"သွားမယ်!"

ရှန်လျန်က ပြတ်သားစွာ ပြောလိုက်သည်။

"ဒီတစ်ခါတော့ ပိုင်ဇီဟန်ရဲ့ နာမည်ကို ငါ အပြတ်အသတ် ဖျက်ဆီးပစ်မယ်!"