အခန်း ၃၆ - တောင်ပေါ်ရေကန်နှင့် ခြောက်ခြားဖွယ်ရာ စံအိမ်(၃)

"ဒါက ဘာကို ဆိုလိုတာလဲ။ ဒီ 'သရဲခြောက်သော နန်းတော်' ဆိုတာကကော ဘာကြီးလဲ" ဟု ဝမ်ထန်ကျီက မေးလိုက်သည်။

"မင်း နောက်ထပ်မေးမယ့် မေးခွန်းက အဲ့ဒါကို စားလို့ရလား ဆိုတာ မဟုတ်လား" ဖုန်းပုကျွယ်က ပြန်မေး၏။

"ငါက အဲ့လိုမေးခွန်းမျိုးမေးပြီး အူကြောင်ကြောင် လုပ်ပြရမယ့် အရွယ်ကို ကျော်နေပါပြီ... ပြီးတော့ ငါက အတည်ပြောနေတာနော် ဟုတ်ပြီလား" ဝမ်ထန်ကျီက ငြင်းခုံလိုက်သည်။

"ကဲ... ကိုယ့်ဘာသာကိုယ်ပဲ ကြည့်လိုက်တော့" ဖုန်းပုကျွယ်က မတ်တတ်ထရပ်လိုက်ပြီး သူ စောစောက စစ်ဆေးနေသည့်အရာကို ရှောင်ထန်နှင့် လုံအောက်မင်တို့ မြင်နိုင်ရန် ဖယ်ပေးလိုက်သည်။ ၎င်းတို့နှစ်ဦး အနားသို့ တိုးကပ်ကြည့်ရှုသည့်အခါ နံရံပေါ်တွင် လက်ရေးအချို့ကို တွေ့လိုက်ရသည်။ ဓားတစ်မျိုးမျိုးဖြင့် ထွင်းထုထားပုံရပြီး စာသားများမှာ အင်္ဂလိပ်လို ဖြစ်သော်လည်း ကစားသမားများအနေဖြင့် စနစ်ကို ဖွင့်၍ ဘာသာပြန်ချက်ကို ကြည့်ရှုနိုင်သည်။ ၎င်းမှာ အင်္ဂလိပ် ကဗျာနှစ်ပိုဒ် ဖြစ်ပုံရပြီး ဤသို့ ဖော်ပြထားသည် -

'အစိမ်းရောင်အလွှမ်းဆုံး ငါတို့ရဲ့ တောင်ကြားမြေဝယ်၊

ကောင်းကင်တမန် ဆယ်ပါးတို့ ကိန်းဝပ်စံပယ်ရာ၊

တစ်ခါကတော့ လှပထည်ဝါတဲ့ နန်းတော်တစ်ဆောင်၊

တောက်ပလင်းလက်စွာ ထွန်းတောက်ခဲ့ဖူးလေရဲ့။

အရှင်သခင် 'အတွေး' ရဲ့ အုပ်ချုပ်စိုးစံမှုအောက်မှာ၊

ဒီနေရာမှာပဲ အခိုင်အမာ တည်ရှိခဲ့တာ!

ဘယ်လို နတ်သားတစ်ပါးမှ တောင်ပံမဖြန့်နိုင်ခဲ့ဘူး၊

ဒီလောက်လှပတဲ့ ဗိသုကာလက်ရာရဲ့ အထက်မှာပေါ့!'

"ဒါက ဘာအဓိပ္ပာယ်ကြီးလဲ" ဝမ်ထန်ကျီမှာ ထိုကဗျာကိုကြည့်ပြီး ကြောင်တောင်တောင် ဖြစ်သွားသည်။

"ဒါက 'သရဲခြောက်သော နန်းတော်'လို့ ခေါ်တဲ့ ဆောင်းပါးတစ်ပုဒ် ဖြစ်ပုံရတယ်၊ စုစုပေါင်း ခြောက်ပိုဒ်ရှိတာလား" လုံအောက်မင်က ခန့်မှန်းလိုက်သည်။ ၎င်းတို့နှစ်ဦးစလုံးက ဖုန်းပုကျွယ်သာ သူတို့နှင့်အတူ ရှိနေလျှင် သူ့ကိုသာ မေးလိုက်ရုံပင်ဟု ယုံကြည်ထားကြသည်။ အကြောင်းမှာ ထိုလူက အရာအားလုံးကို သိနေပုံရသောကြောင့် ဖြစ်သည်။ သို့သော် သူတို့လှည့်ကြည့်လိုက်သည့်အခါ ထိုလူမှာ ပျောက်ခြင်းမလှ ပျောက်ကွယ်နေပြီ ဖြစ်ကြောင်း တွေ့လိုက်ရသည်။

"အစ်ကိုကျွယ်?" ဝမ်ထန်ကျီက ပတ်ဝန်းကျင်ကို ဝေ့ဝဲကြည့်ပြီး ဒုတိယထပ်သို့ တက်သည့် လှေကားကို ကြည့်ရန် နောက်သို့ ခြေတစ်လှမ်း ဆုတ်လိုက်သည်။

"သူ ဘယ်ရောက်သွားတာလဲ။ ငါတို့ သတိမထားမိတဲ့အချိန်မှာပဲ ခိုးထွက်သွားတာလား" လုံအောက်မင်ကလည်း ပတ်ပတ်လည်ကို လိုက်ရှာသော်လည်း ထိုလူ၏ အရိပ်အယောင်မျှ မတွေ့ရပေ။ နောက်ဆုံးတွင် သူက ပခုံးတွန့်ကာ သက်ပြင်းချလိုက်ရုံသာ တတ်နိုင်တော့သည်။ "သူ စောစောက ပြောသွားတာ ရှိတယ်လေ၊ လူခွဲတာက ပိုအကျိုးရှိတယ်ဆိုတော့ ငါတို့ ဒီကဗျာကို လေ့လာနေတုန်း သူ ခိုးထွက်သွားတာ ဖြစ်ရမယ်"

"ဒါဆို ငါတို့လည်း သဲလွန်စအချို့ကို သွားရှာကြရအောင်" ဝမ်ထန်ကျီက ပြောသည်။ "ဘာပဲဖြစ်ဖြစ် အစ်ကိုကျွယ်က ပင်မမစ်ရှင် ုအသစ်တက်လာရင် ဒီနေရာမှာ ပြန်ဆုံကြမယ်လို့ ပြောထားတာပဲ" လုံအောက်မင်က ခေါင်းညိတ်ပြပြီး ပထမထပ်တွင် တစ်ဦးတည်းစီ ခွဲ၍ စတင်ရှာဖွေကြတော့သည်။ သူတို့သည် ဖွင့်၍ရသမျှ တံခါးမှန်သမျှကို ဖွင့်ကာ သဲလွန်စများ သို့မဟုတ် 'သရဲခြောက်သော နန်းတော်' ၏ အခြားကဗျာပိုဒ်များကို အာရုံစိုက် ရှာဖွေကြသည်။

...

ပထမထပ်၏ ရှုပ်ထွေးလှသော စင်္ကြံလမ်းအတွင်း၌ အမျိုးသမီးကစားသမားနှစ်ဦးမှာ ဂရုတစိုက် ရှေ့သို့ တိုးလာနေကြသည်။ ကြည့်ရသည်မှာ သူတို့သည် ထောင်ချောက်ကဲ့သို့သော အရာများနှင့် ကြုံတွေ့ခဲ့ရပြီးပုံရသည်။ 'ဖြတ်ကျော်မိုးစက်' (Passing Rain) ၏ လက်ထဲတွင် တဖျတ်ဖျတ် တောက်ပနေသော ဓားတစ်လက် ရှိနေသည်။ ထိုပစ္စည်းမှာ သာမန် (Normal) အဆင့်သာ ရှိသော်လည်း သူမသည် ဤရိုးရှင်းသော လက်နက်ကို အသုံးပြုကာ 'နှလုံးသားမဲ့ ခေါင်းဖြတ်သူ' (Heartless Decapitator) ဟူသော ဘွဲ့အမည်ကို ရရှိအောင် စွမ်းဆောင်နိုင်ခဲ့သည်။ ၎င်းကပင် သူမ မည်မျှ တော်ကြောင်း သက်သေပြနေသည်။

'ရယ်မောသော ဝိညာဉ်' (Laughing Soul) ကမူ လက်နက် တပ်ဆင်မထားပေ။ သူမ၏ ကောက်ချက်မှာ ဖုန်းပုကျွယ်နှင့် ဆင်တူသည်။ အကယ်၍ ဤ ဇာတ်လမ်း (Scenario) တွင် သရဲတစ္ဆေများနှင့် ထောင်ချောက်များသာ အဓိကပါဝင်နေပါက သူမ၏ သေနတ်များကို သုံးစရာ အကြောင်းမရှိပေ။

"ဟင်?" အနောက်မှ လိုက်လာသော 'ရယ်မောသော ဝိညာဉ်' က ရုတ်တရက် ရပ်လိုက်ပြီး စက္ကန့်အနည်းငယ်အကြာတွင် ပြောလိုက်သည်မှာ "... သူတို့ ဘေးထွက်မစ်ရှင် (Side Mission) တစ်ခုကို စတင်နိုင်ခဲ့ပုံရတယ်"

'ဖြတ်ကျော်မိုးစက်' က မစ်ရှင်အသေးစိတ်ကို ကြည့်ကာ မေးလိုက်သည်။ "ဒါဆို ငါတို့ကော ဒီ 'သရဲခြောက်သော နန်းတော်' ကို ရှာဖို့ ပူးပေါင်းပေးသင့်လား"

"အင်း... အဲ့ဒါကို သီးသန့်လုပ်ဖို့တော့ မလိုပါဘူး" 'ရယ်မောသော ဝိညာဉ်' က ခဏစဉ်းစားပြီး ပြန်ဖြေသည်။ "လောလောဆယ်တော့ အဲ့ဒါက ဘာလဲဆိုတာ ငါတို့ မသိသေးဘူး၊ ပြီးတော့ ငါတို့လည်း ဒီအချိန်တောက်လျှောက် သဲလွန်စတွေ ရှာနေတာပဲ မဟုတ်လား"

"အိုကေလေ၊ ဒါဆို ဆက်သွားရအောင်" 'ဖြတ်ကျော်မိုးစက်' က ပြောပြီး သူတို့၏ ရှာဖွေမှုကို ပြန်လည်စတင်လိုက်သည်။

...

ဒုတိယထပ်တွင်မူ 'မရှုံးနိမ့်ခြင်း ချန်ပီယံ' သည် အလွန်ကျယ်ဝန်းသော အခန်းတစ်ခုအတွင်း ရပ်နေသည်။ ဧည့်ခန်းကဲ့သို့ပင် ဤအခန်းရှိ ပြတင်းပေါက်များသည် ရှည်လျားကျဉ်းမြောင်းပြီး နံရံ၏ အမြင့်ပိုင်းတွင် တပ်ဆင်ထားကာ မှောင်မည်းနေသော ရာဘာပင်သား ကြမ်းပြင်နှင့် အတော်လှမ်းသည်။ နီကျင်ကျင် အလင်းရောင်တစ်ခုက ပြတင်းပေါက်မှတစ်ဆင့် ဖြာကျနေပြီး အခန်းအတွင်းရှိ သိသာထင်ရှားသော အရာများပေါ်သို့ ကျရောက်နေသည်။ သို့သော် မေးစရာရှိသည်မှာ၊ ဤကဲ့သို့ မှောင်မည်းသောညတွင် ပြတင်းပေါက်အပြင်ဘက်၌ အဘယ်အရာက ဤနီရဲသော အလင်းရောင်ကို ပေးစွမ်းနိုင်သနည်း?

'မရှုံးနိမ့်ခြင်း ချန်ပီယံ' သည် မျက်စိအားကောင်းသော်လည်း အခန်း၏ အလှမ်းဝေးသော ထောင့်များ သို့မဟုတ် နံရံအစွန်းများရှိ ထွင်းထုထားသော အကန့်များကို ကြည့်ရန် ခဲယဉ်းနေသည်။ ဟုတ်ပါသည်။ ဤအသေးစိတ်အချက်အလက်များသည် ထိုလူအတွက် အရေးမကြီးပေ။ ဘာပဲဖြစ်ဖြစ် သေချာမြင်ရလျှင်ပင် ဘာထူးမည်နည်း? သူလိုအပ်သော တစ်ခုတည်းသော သတင်းအချက်အလက်မှာ အခန်းထဲတွင် မကောင်းဆိုးဝါးများ ပုန်းအောင်းနေသလား ဆိုသည်သာ ဖြစ်သည်။

နံရံတွင် တွဲလွဲဆွဲထားသော လိုက်ကာများနှင့် ပရိဘောဂများမှာ သက်တမ်းကုန်နေပြီ ဖြစ်သည်။ ၎င်းတို့သည် ဟောင်းနွမ်းဆွေးမြည့်နေပြီး ကြည့်ရသည်မှာ အလွန်ပင် နေရထိုင်ရ ခက်ခဲစေမည့် ပုံစံမျိုးဖြစ်သည်။ ကြမ်းပြင်ပေါ်တွင် ပြန့်ကျဲနေသော စာအုပ်များနှင့် တူရိယာများကလည်း အခန်း၏ သက်ဝင်လှုပ်ရှားမှုကို မြှင့်တင်မပေးနိုင်ခဲ့ပေ။ လွမ်းဆွေးဖွယ် အနံ့အသက်တစ်ခုက လေထုထဲတွင် လွှမ်းခြုံနေပြီး အေးစိမ့်သော ပတ်ဝန်းကျင်မှာ ထောင့်တိုင်းသို့ စိမ့်ဝင်နေပုံရသည်။

စနစ်အသံကို ကြားပြီးနောက် 'မရှုံးနိမ့်ခြင်း ချန်ပီယံ' က စာရင်းကို တစ်ချက်ကြည့်လိုက်သည်။ သူ၏ ပထမဆုံး အတွေးမှာ အမျိုးသမီးကစားသမားနှစ်ဦးက အိမ်ထဲတွင် တစ်ခုခုကို တွေ့ရှိသွားပြီး ဘေးထွက်မစ်ရှင်ကို စတင်လိုက်ခြင်း ဖြစ်မည်ဟူ၍ ဖြစ်သည်။ ၎င်းမှာ သူ အထင်သေးထားသော အဆင့်နိမ့်ကစားသမား သုံးဦးကြောင့် ဖြစ်နိုင်သည်ဟု သူ လုံးဝ ထည့်မစဉ်းစားခဲ့ပေ။ သူသည် ပဟေဠိဖြေရှင်းခြင်းတွင် မတော်သော်လည်း 'မရှုံးနိမ့်ခြင်း ချန်ပီယံ' မှာ ပရော်ဖက်ရှင်နယ် ဂိမ်းကစားသမားတစ်ဦး ဖြစ်သည်။ သူသည် ဝေဖန်ပိုင်းခြားနိုင်စွမ်း အားနည်းကောင်း အားနည်းနိုင်သော်လည်း ၎င်းကို ဂိမ်းကစားခြင်း အတွေ့အကြုံများဖြင့် အစားထိုးနိုင်သည်။

သူသည် အသုံးအဆောင်များ သို့မဟုတ် စားသုံးကုန်ပစ္စည်းများ ရှိမရှိ သိရန် အခန်းအတွင်းကို အကြမ်းဖျင်း မွှေနှောက်ရှာဖွေလိုက်သော်လည်း အနည်းငယ် အသုံးဝင်ပုံရသည်မှာ သစ်သားဂစ်တာတစ်လက်နှင့် ကြိုးပြတ်နေသော တယောတစ်လုံးသာ ရှိသည်။ သူ၏ လက်ဗလာမှာပင် ထိုကျိုးလွယ်သော သစ်သားပစ္စည်းများထက် ပို၍ ထိရောက်ပေလိမ့်မည်။ သူ၏ ဘွဲ့အမည်ဖြစ်သော 'ကသုတ်ကရက် လက်ဝှေ့သမား' (The Reckless Boxer) က သူ၏ လက်သီးချက်များမှ ထွက်ပေါ်လာသော ထိခိုက်မှုဒဏ် (Damage) ကို မြှင့်တင်ပေးသည့် အလိုအလျောက်အာနိသင်ကို ပေးစွမ်းသည်။

လက်နက်ပစ္စည်းများကို လက်လျှော့လိုက်ပြီးနောက် 'မရှုံးနိမ့်ခြင်း ချန်ပီယံ' က မစ်ရှင်ပစ္စည်းများကို စတင်ရှာဖွေတော့သည်။ သူသည် 'သရဲခြောက်သော နန်းတော်' ဆိုသည်မှာ ဘာလဲဆိုသည်ကို မသိသလို ကြမ်းပြင်ပေါ်တွင် ပြန့်ကျဲနေသော စာအုပ်များကို ဖတ်ရှုရန်လည်း စိတ်မဝင်စားပေ။ သူသည် သဲလွန်စနှင့် အတူဆုံးဟု ထင်ရသော အရာတစ်ခုဆီသို့ တိုက်ရိုက် လျှောက်သွားလိုက်သည်။ ၎င်းမှာ စားပွဲပေါ်ရှိ စာအိတ်တစ်ခု ဖြစ်သည်။ အခန်းထဲရှိ အခြား ဖတ်ရှုနိုင်သော အရာများမှာ ကြမ်းပြင်ပေါ်တွင် သို့မဟုတ် ထောင့်တစ်နေရာတွင် ပုံနေသော်လည်း ဤစာအိတ်တစ်ခုတည်းသာလျှင် မှင်အိုးတစ်ခုအောက်တွင် သပ်သပ်ရပ်ရပ် ရှိနေသည်။

မှင်အိုးကို မလိုက်သည့်အခါ မှင်အချို့ ပုလင်းထဲမှ ယိုစိမ့်ထွက်ကာ စာအိတ်ကို စွန်းထင်းနေသည်ကို 'မရှုံးနိမ့်ခြင်း ချန်ပီယံ' သတိပြုမိလိုက်သည်။ သို့သော် ထိုအစွန်းအထင်းမှာ ခြောက်သွေ့နေပြီ ဖြစ်သည်။ သူက စာအိတ်ကို ကောက်ယူကာ ဖုန်မှုန့်လွှာများကို မှုတ်ထုတ်လိုက်ပြီးနောက် စာအိတ်ကိုဖွင့်၍ အတွင်းမှစာကို ထုတ်ယူလိုက်သည်။ စာမှာ ပြည့်စုံမှုမရှိပေ၊ အကြောင်းမှာ ယိုစိမ့်နေသော မှင်များကြောင့် နေရာအတော်များများမှာ ဖတ်မရအောင် ဖြစ်နေပြီး အခြားနေရာများမှာလည်း အချိန်ကြာလာသည်နှင့်အမျှ ဝေဝါးနေသောကြောင့် ဖြစ်သည်။

စာ၏ အစပိုင်းနှင့် ရေးသူ၏ လက်မှတ်တို့ကို ဖတ်၍မရသော်လည်း ပါဝင်သည့် အကြောင်းအရာအရ ဤစာသည် အိမ်ပိုင်ရှင်က သူ၏ သူငယ်ချင်းထံသို့ ရေးသားထားခြင်း ဖြစ်နိုင်သည်ဟု သူ ခန့်မှန်းလိုက်သည်။ ရေးသားသူက သူသည် ကျိန်စာတစ်မျိုးမျိုးကြောင့် ပြင်းထန်သော ဝေဒနာကို ခံစားနေရပြီး အမြင်အာရုံ အမှားများကြောင့် ညှဉ်းပန်းနှိပ်စက်ခံနေရသည်ဟု ဆိုထားသည်။ သူသည် သူ၏ အရင်းနှီးဆုံး သူငယ်ချင်း၊ သူ၏ တစ်ဦးတည်းသော သူငယ်ချင်းကို အလွန်အမင်း တွေ့ချင်နေရှာသည်။ ထိုသူငယ်ချင်းသာ လာရောက်လည်ပတ်မည်ဆိုလျှင် သူ၏ အခြေအနေမှာ ကောင်းမွန်လာနိုင်မည်ဟု သူက မျှော်လင့်နေသည်။ စာသားများထဲတွင် စိတ်မမှန်သည့် လက္ခဏာများ အမှန်ပင် ရှိနေသော်လည်း ရေးသားသူ၏ တုန်ရီနေသော လက်များနှင့် နားလည်ရခက်သော ဝါကျတည်ဆောက်ပုံများကြောင့် အကြောင်းအရာ အတော်များများမှာ နားမလည်နိုင်အောင် ဖြစ်နေသည်။

'မရှုံးနိမ့်ခြင်း ချန်ပီယံ' သည် စာကို ဖတ်ပြီးသည့်တိုင် ဘာမှ ထူးထူးခြားခြား သိမလာသော်လည်း ထိုစာကို သူနှင့်အတူ ယူဆောင်သွားလိုက်သည်။ သူသည် အခန်းကို နောက်ဆုံးအကြိမ်အဖြစ် တစ်ချက် ဝေ့ကြည့်လိုက်ပြီးနောက် လှည့်ထွက်သွားတော့သည်။

...

မှောင်မည်းနေသော ကျောက်သားလိုဏ်ခေါင်းတစ်ခုအတွင်း၌ လက်နှိပ်ဓာတ်မီးတစ်လက် ရုတ်တရက် ပွင့်လာပြီး လူတစ်ယောက်၏ ရှေ့ရှိ လမ်းတိုလေးကို အလင်းပေးလိုက်သည်။

ဖုန်းပုကျွယ်က သူ၏ ပတ်ဝန်းကျင်ကို ကြည့်ကာ တိုးတိုးလေး ရေရွတ်လိုက်သည်။ "ဒီအိမ်ကြီးမှာ တော်တော်လေး ပြဿနာရှိနေတာပဲ... ဒါက ဘာကြီးလဲ။ 'ဗန်ပိုင်းယားနန်းတော်'(Castlevania)လား။ ဟိုဘက်ဒီဘက် နေရာလွဲမှားနေတဲ့ အာကာသတွေ ရှိနေသလို အခုတော့ လျှို့ဝှက်စင်္ကြံလမ်းတောင် ရှိနေပြီပဲ"

လွန်ခဲ့သော မိနစ်အနည်းငယ်က ရှောင်ထန်နှင့် လုံကောတို့ထံမှ ခိုးထွက်လာရန် သူ ရည်ရွယ်ခဲ့ခြင်း မဟုတ်ပေ။ သူသည် နံရံပေါ်ရှိ ပန်းချီကားကို အနီးကပ်ကြည့်ချင်သောကြောင့် ဧည့်ခန်း၏ အခြားတစ်ဖက်သို့ လမ်းလျှောက်သွားခဲ့ရုံသာ ဖြစ်သော်လည်း...