အခန်း ၃၄ - တောင်ပေါ်ရေကန်နှင့် ခြောက်ခြားဖွယ်ရာ စံအိမ် (၁)

"သူတို့က စတူဒီယိုနာမည်ကိုပါ ထည့်ကြေညာပေးလိုက်တာပဲ... ကြည့်ရတာ Dream Inc. က ပရော်ဖက်ရှင်နယ်အသင်းတွေနဲ့ ကစားသမားတွေ ပါဝင်ပတ်သက်လာတာကို ကန့်ကွက်မဲ့ပုံမပေါ်ဘူး" ဟု ဖုန်းပုကျွယ် က သုံးသပ်လိုက်သည်။

"ဒါပေမဲ့ ကျွန်တော်တို့လို ကျောထောက်နောက်ခံ 'အဖွဲ့အစည်း' မရှိတဲ့ ကစားသမားတွေအတွက်တော့ သတင်းကောင်းမဟုတ်ဘူးဗျ" ဟု လုံအောက်မင် က ဆိုသည်။ "တကယ်လို့ Dream Inc. က ဒီဂိမ်းစတူဒီယိုတွေကို ကန့်သတ်ချက်မထားဘူးဆိုရင်၊ ထိပ်တန်းကစားသမားအလွှာကို လူနည်းစုကပဲ ကြီးစိုးသွားလိမ့်မယ်။ ဥပမာ - သူတို့အချင်းချင်း ညှိနှိုင်းပြီး ဈေးကွက်ကို ကစားတာမျိုး ဒါမှမဟုတ် အဆင့်မြင့်သတင်းအချက်အလက်နဲ့ အရင်းအမြစ်တွေကို သူတို့အချင်းချင်းပဲ လက်ဝါးကြီးအုပ်ထားတာမျိုး လုပ်နိုင်တယ်"

"ဒါမှမဟုတ် တစ်မျိုးလည်း ဖြစ်နိုင်တာပဲ" ဟု ဖုန်းပုကျွယ် က ပြောသည်။ "Dream Inc. က ထိတ်လန့်ချောက်ခြားမှု သုခဘုံရဲ့ မျှတမှုစနစ်က အပြစ်ပြောစရာမရှိအောင် ပြည့်စုံတယ်လို့ ယူဆထားတာလည်း ဖြစ်နိုင်တယ်။ စတူဒီယိုတွေ အမြတ်ထုတ်နိုင်မဲ့ လမ်းစတွေကို စနစ်က အကြီးအကျယ် ကန့်သတ်ထားပြီးသားမို့လို့ ခင်ဗျားစိုးရိမ်သလို နည်းပညာပိုင်းဆိုင်ရာ အခက်အခဲတွေကြောင့် ဖြစ်လာမှာမဟုတ်ဘူးလို့ တွေးထားတာလည်း ဖြစ်နိုင်ပါတယ်။ ဒါပေမဲ့ ဒါတွေက ကျွန်တော်တို့ စိုးရိမ်ရမဲ့ ကိစ္စတွေမဟုတ်သလို၊ စိုးရိမ်လို့လည်း ဘာမှလုပ်လို့ရတာမှ မဟုတ်တာ။"

"ဒါနဲ့ အစ်ကိုလုံ... မေးရတာ အားနာပေမဲ့ ခင်ဗျားက ပရော်ဖက်ရှင်နယ် ကစားသမားလားဗျ?"

"အင်? ဟားဟား... အားနာစရာမလိုပါဘူးဗျာ။ ပရော်ဖက်ရှင်နယ် ကစားသမားဆိုတာ ဖုံးကွယ်ထားရမဲ့အရာမှ မဟုတ်တာပဲ၊ ဟုတ်တယ်မလား?" လုံအောက်မင် က ရယ်မောလိုက်သည်။ "ကျွန်တော်က ပရော်ဖက်ရှင်နယ် ကစားသမားတွေကို အထင်ကြီးပေမဲ့ ကိုယ်တိုင်ကတော့ မဟုတ်ပါဘူး။ ဂိမ်းဆော့ရတာ ဝါသနာပါတဲ့သူ တစ်ယောက်သက်သက်ပါပဲ"

လုံအောက်မင် ပြောသည်မှာ အမှန်ပင်ဖြစ်သည်။ ပြင်ပလောကတွင် သူ၏အမည်မှာ လုံလီဝမ် ဖြစ်ပြီး ရဲအရာရှိတစ်ဦး ဖြစ်သည်။ သူ၏အမည်တွင် စာပေပညာရှင်ဟု အဓိပ္ပာယ်ရသည့် 'ဝမ်' ပါသော်လည်း သူသည် ရဲရင့်ဖျတ်လတ်ကာ တစ်ခါတစ်ရံတွင် မဆင်မခြင် ဆောင်ရွက်တတ်သည့် အရာရှိတစ်ဦး ဖြစ်သည်။ အမှန်ဆိုလျှင် သူသည် အထူးစစ်ဆင်ရေးတပ်ဖွဲ့ (Special Ops) သို့ ပြောင်းရွှေ့ရန် ခြေလှမ်းအနည်းငယ်သာ လိုတော့သော်လည်း ကံဆိုးမှုတစ်ခု ကြုံခဲ့ရသည်။ အမှုတစ်ခုကို ကိုင်တွယ်စဉ် သူ အပြင်းအထန် ဒဏ်ရာရခဲ့သည်။ အကျဉ်းချုပ်ပြောရလျှင် သူ၏ ဒူးနှစ်ဖက်စလုံးတွင် ပြဿနာတက်သွားသဖြင့် အချိန်အတော်များများကို ရဲစခန်းထဲတွင်သာ ထိုင်ရင်း ကုန်ဆုံးစေခဲ့ရသည်။ နေ့စဉ်ဘဝတွင် အခက်အခဲမရှိသော်လည်း ရှေ့တန်းသို့ ပြန်သွားနိုင်မည့် မျှော်လင့်ချက်မှာ ပျက်သုဉ်းသွားခဲ့သည်။

"ဪ... အဲဒီလိုလား" ဖုန်းပုကျွယ် က ဆိုသည်။ "ကျွန်တော်ကတော့ ခင်ဗျားကို Solo ဆော့ရတာ ကြိုက်တဲ့ ပရော်ဖက်ရှင်နယ် ကစားသမားတစ်ယောက်လို့ ထင်နေတာ"

"ဟားဟား... တကယ်တော့ ကျွန်တော် အွန်လိုင်းမှာ သိပ်မရှိပါဘူး။ ပြီးခဲ့တဲ့ နှစ်ရက်က မိန်းမက ယောက္ခမနဲ့အတူ သင်္ချိုင်းကန်တော့သွားရင်း ဆွေမျိုးတွေဆီ လည်နေလို့ပါ။ ကျွန်တော်လည်း အလုပ်နားရက်နဲ့ တိုက်နေလို့ အွန်လိုင်းမှာ ပိုရှိနေတာ။ ဒါပေမဲ့ မနက်ဖြန်ကျရင်တော့..." သူက ခေတ္တတွန့်ဆုတ်သွားပြီး 'ရဲစခန်း' ဟု မပြောဘဲ "...ယူနစ်ကို ပြန်သွားရမှာမို့ ဆော့ဖို့ အချိန်ရှိမှာမဟုတ်တော့ဘူး"

"ဒါဆိုရင်တော့ ဒီည အနည်းဆုံး အဖွဲ့လိုက်ရှင်သန်ခြင်း ဇာတ်လမ်း (Multiplayer Scenario) နှစ်ခု၊ သုံးခုလောက် ပြီးအောင် ဆော့ကြစို့" ဟု စိတ်လှုပ်ရှားနေသော ဝမ်ထန်ကျီ က ဆိုသည်။

"ကောင်းပြီ... တန်းစီလိုက်တော့" ဟု ဖုန်းပုကျွယ် က ပြန်ဖြေသည်။

"ကျွန်တော် အသင့်ပဲ" ဟု လုံအောက်မင် ကလည်း ထပ်လောင်းပြောသည်။

ရှောင်ထန် က အတည်ပြုလိုက်ပြီးနောက် စနစ်၏ အသံထွက်ပေါ်လာသည်။ ယခုတစ်ကြိမ်တွင် ဖုန်းပုကျွယ် မှာ အဖွဲ့ခေါင်းဆောင်မဟုတ်သဖြင့် သူကြားရသည့် အသံမှာ အနည်းငယ် ကွဲပြားနေသည်။ အစပိုင်း အစိတ်အပိုင်းအချို့ကို ဖြတ်တောက်ထားခြင်းပင်။

"သင်သည် အဖွဲ့လိုက်ရှင်သန်ခြင်းစနစ် (အဆင့် - သာမန်) ကို ရွေးချယ်ထားပါသည်၊ ကျေးဇူးပြု၍ အတည်ပြုပါ။

အတည်ပြုပြီးပါပြီ။ အဖွဲ့ဝင်အရေအတွက်ကို ကျပန်းရွေးချယ်လိုက်သည် - လူ ၆ ဦးပါဝင်သော အဖွဲ့။

သင့်အဖွဲ့သည် ကစားသမားတန်းစီဇယားထဲသို့ ဝင်ရောက်သွားပါပြီ။ အသင့်ဖြစ်နေသော အခြားကစားသမားများ သို့မဟုတ် အဖွဲ့များကို ရှာဖွေနေပါသည်။

ရှာဖွေမှု ပြီးဆုံးပါပြီ။ အဖွဲ့ဝင် ပြည့်စုံသွားပါပြီ။

အာရုံကြောချိတ်ဆက်မှုကို ညှိနှိုင်းနေပါသည်။ ဇာတ်လမ်းကို ဖန်တီးနေပါသည်...

ခေတ္တစောင့်ဆိုင်းပေးပါ။ ဒေါင်းလုဒ်လုပ်နေပါသည်။

ထိတ်လန့်ချောက်ခြားမှု သုခဘုံ (Thriller Paradise) မှ ကြိုဆိုပါသည်"

ယခုတစ်ကြိမ်တွင် စကားပြောသူမှာ စိတ်ဝေဒနာရှင် တစ်ဦးကဲ့သို့ပင်။ စကားပြောနေရင်း တစ်ဝက်ခန့်တွင် အသံမှာ အခြားတစ်ယောက်၏ အသံသို့ ပြောင်းလဲသွားသည်။

"ဒေါင်းလုဒ်လုပ်ခြင်း ပြီးဆုံးပါပြီ။ သင်သည် လက်ရှိတွင် အဖွဲ့လိုက်ရှင်သန်ခြင်း ဇာတ်လမ်း (သာမန်အဆင့်) ကို ကစားနေခြင်း ဖြစ်သည်။ ဤစနစ်တွင် ဇာတ်လမ်းမိတ်ဆက်ကို ပြသပေးမည်ဖြစ်ပြီး ဘေးထွက်မစ်ရှင် သို့မဟုတ် ဝှက်ဖုံးမစ်ရှင်များကို ဖော်ထုတ်နိုင်ကာ ကမ္ဘာ့နောက်ခံသမိုင်းကြောင်းကိုလည်း သိရှိနိုင်ခွင့် ရှိသည်။

ဇာတ်လမ်းအောင်မြင်မှုအတွက် ဆုလာဘ် - ကျပန်းသင်ယူနိုင်သော စွမ်းရည်ကတ် (Skill Card) တစ်ခု။

ဇာတ်လမ်းမိတ်ဆက်ကို မကြာမီ ပြသပါတော့မည်။ ထို့နောက် ဂိမ်းကို ချက်ချင်း စတင်ပါမည်"

ယခုတစ်ကြိမ် အဖွင့်ဗီဒီယို (CG) မှာ သစ်တောတစ်ခုမှ စတင်ပြီး ပထမလူအမြင်ဖြင့် ဖြည်းဖြည်းချင်း ရှေ့သို့ တိုးသွားသည်။ နောက်ခံစကားပြောသံက ဆိုသည်မှာ -

"ဆောင်းဦးညတစ်ညမှာ၊ မင်းနဲ့ ခရီးသွားအဖွဲ့ထဲမှာ ခုတင်တင်ပဲ သိကျွမ်းခဲ့တဲ့ တခြားအဖော်အချို့ဟာ တောင်ပေါ်မှာ လမ်းပျောက်သွားကြတယ်။ သေဆုံးနေတဲ့ သစ်တောထဲမှာ လျှောက်သွားနေရင်း ငတ်မွတ်မှုနဲ့ ရေငတ်မှုဒဏ်ကို ခြေလှမ်းတိုင်းမှာ ခံစားနေရတယ်။ အဲဒီအချိန်မှာ အံ့ဩစရာကောင်းလောက်အောင်ပဲ သစ်တောထဲက အိမ်တစ်လုံးကို မင်းတို့ တွေ့လိုက်ရတယ်"

မြင်ကွင်းမှာ ရှေးဟောင်းအိမ်ကြီးတစ်လုံးအဖြစ် ပြောင်းလဲသွားသည်။ ကောင်းကင်မှ တိမ်တိုက်များသည် မြေပြင်အထိ နိမ့်ကျနေပြီး ထိုခြောက်ခြားဖွယ်ရာ အိမ်ကြီးကို ဖုံးလွှမ်းထားသည်။ အိမ်ဘေးတွင် ရေကန်တစ်ခု ရှိနေပြီး ရေပြင်နှင့် ကပ်လျက် နံရံတွင် ပြတင်းပေါက်နှစ်ပေါက် ရှိနေသည်။ ၎င်းမှာ အိမ်ကြီးမှ ဟောက်ပက်ဖြစ်နေသော မျက်လုံးအစုံဖြင့် ရေထဲက သူ့ရဲ့ မရေရာတဲ့ အရိပ်ကို ပြန်ကြည့်နေသလိုပင်။

"မျှော်လင့်ချက်မဲ့ခြင်း အနံ့အသက်တွေဟာ အိမ်ကြီးထဲကနေ လွင့်ပျံလာပြီး သေနေတဲ့ သစ်ပင်တွေ၊ မီးခိုးရောင် နံရံတွေနဲ့ တိတ်ဆိတ်နေတဲ့ ရေကန်တွေဆီကနေ ထွက်ပေါ်နေတယ်။ ဒါပေမဲ့ မင်းတို့မှာ ရွေးချယ်စရာမရှိဘူး။ အေးစိမ့်တဲ့ လေထုက မင်းတို့ရဲ့ အရိုးထဲအထိ စိမ့်ဝင်နေပြီး ငတ်မွတ်မှုကြောင့် နိုးကြားမှုတွေလည်း ပျောက်ဆုံးနေပြီ။ ဒါကြောင့် မင်းတို့ အိမ်ထဲကို ဝင်ဖို့ ဆုံးဖြတ်လိုက်ကြတယ်..."

ထိုနေရာတွင် ဇာတ်လမ်းမိတ်ဆက်မှာ ပြီးဆုံးသွားသည်။ ဖုန်းပုကျွယ် မျက်လုံးဖွင့်လိုက်သောအခါ သူသည် အိမ်ကြီး၏ အတွင်းထဲသို့ ရောက်ရှိနေပြီဖြစ်သည်။ ဧည့်ခန်းဖြစ်ပုံရပြီး ကျယ်ဝန်းလှသည်။ ကြမ်းပြင်မှာ သစ်သားဖြင့် ပြုလုပ်ထားပြီး ပရိဘောဂများနှင့် အလှဆင်ထားပုံမှာ ၁၉ ရာစုကဲ့သို့ပင်။ မျက်နှာကျက်မှ chandeliers မီးဆိုင်းကြီးနှင့် နံရံကပ်မီးအိမ်များတွင် လျှပ်စစ်မီးရှိသော်လည်း ထူးခြားသည်မှာ ထိုမီးများမှလွဲ၍ အခြား မည်သည့် လျှပ်စစ်ပစ္စည်းမျှ မတွေ့ရခြင်းပင်။

ဧည့်ခန်းနှင့် မျက်နှာချင်းဆိုင်တွင် ၂ မီတာခန့် ကျယ်ဝန်းသော လှေကားရှိပြီး ဒုတိယထပ်သို့ ဦးတည်ထားသည်။ ပတ်ပတ်လည်တွင် တံခါးလေးပေါက်ရှိကာ လှေကားနောက်ကွယ်တွင် စင်္ကြံလမ်းတစ်ခု ရှိသည်။ ထိုလမ်းတွင် မီးမရှိသဖြင့် မည်သည့်နေရာသို့ ဦးတည်သည်ကို မမြင်ရပေ။

ဖုန်းပုကျွယ် သည် ပတ်ဝန်းကျင်ကို စက္ကန့်အနည်းငယ်ကြာ အကဲခတ်လိုက်ပြီးနောက် ဧည့်ခန်းထဲတွင် မတ်တတ်ရပ်နေသော အခြားကစားသမား သုံးဦးဆီသို့ အကြည့်ရောက်သွားသည်။

ပထမဆုံးတစ်ယောက်မှာ အမျိုးသားကစားသမား တစ်ဦးဖြစ်သည်။ သူ၏ IGN မှာ 'မရှုံးနိမ့်‌သော ချန်ပီယံ' ဖြစ်ပြီး အဆင့် ၂၀ သို့ ပထမဆုံးရောက်သွားသည့် 'ကြောက်တရားမရှိ ချန်ပီယံ ' နှင့် နာမည် အနည်းငယ်သာ ကွာခြားသည်။ သို့သော် သူသည် အဆင့် ၂၀ ရောက်ရန် အလှမ်းဝေးနေသေးပြီး လက်ရှိတွင် အဆင့် ၁၅ သာ ရှိသေးသည်။ သူ၏ ဘွဲ့အမည်မှာ 'Reckless Boxer' (မဆင်မခြင် လက်ဝှေ့သမား) ဖြစ်သည်။ ရုပ်ရည်အရ သူသည် လုံအောက်မင် နှင့် အမျိုးအစားတူသော်လည်း လုံကော ၏ ရှဝါဇန်နယ်ဂါ ကဲ့သို့ ခန္ဓာကိုယ်နှင့် ယှဉ်လျှင်မူ အရပ်အမောင်း၊ ကြွက်သားနှင့် အရှိန်အဝါပိုင်းတွင် အများကြီး လိုအပ်နေသေးသည်။

ကျန်သည့် ကစားသမားနှစ်ဦးမှာ အမျိုးသမီးများ ဖြစ်ကြသည်။ သူတို့သည် တန်းစီဇယားထဲ မဝင်ခင်ကတည်းက တစ်ဖွဲ့တည်း ဖြစ်ပုံရသည်။ အဘယ်ကြောင့်ဆိုသော် သူတို့နှစ်ယောက်မှာ နီးနီးကပ်ကပ် ရပ်နေကြသောကြောင့်ဖြစ်သည်။ နာမည်များကို ကြည့်ခြင်းဖြင့်လည်း အရိပ်အမြွက် ရနိုင်သည်။ တစ်ယောက်မှာ 'ဖြတ်ကျော်မိုးစက်(Passing Rain)' ဖြစ်ပြီး အခြားတစ်ယောက်မှာ 'ရယ်မောသော ဝိညာဉ်(Laughing Soul)'ဖြစ်ကာ နှစ်ယောက်စလုံး အဆင့် ၁၃ ဖြစ်ကြသည်။

ဖြတ်ကျော်မိုးစက်(Passing Rain) မှာ အသက် ၂၀ ကျော်ခန့်ရှိပုံရပြီး ဆံပင်ကို ဂုတ်ဝဲအထိ တိုတိုလေး ညှပ်ထားသည်။ ထူးဆန်းသည်မှာ သူမသည် လှပသော်လည်း ပြင်ပအသွင်အပြင်တွင် ဆွဲဆောင်မှုရှိစေရန် မည်သည့်အရာမျှ ထပ်မံဖြည့်စွက်ထားခြင်း မရှိပေ။ နည်းပညာအရ ပြောရလျှင် ဂိမ်းစက်၏ မျက်နှာပြင်ပြုပြင်နိုင်စွမ်းဖြင့် လူတိုင်းသည် အလှပဆုံးသူများ ဖြစ်လာနိုင်ပြီး အမျိုးသားမျက်နှာကို အမျိုးသမီးအဖြစ်သို့ ပြောင်းရန်ပင် ပြဿနာမရှိပေ။ အမျိုးသမီးကစားသမားတစ်ယောက်သည် ဤဂိမ်းတွင် သူမ၏ အလှအပကို အမြင့်ဆုံးအထိ မပြုပြင်ထားခြင်းမှာ အပြင်ထွက်လျှင် မိတ်ကပ်မလိမ်းဘဲ ထွက်လာသကဲ့သို့ပင်။ သို့မဟုတ် သူမသည် ပြင်ပလောကတွင် အလွန်ပင် ထူးဆန်းသည့် ရုပ်ရည်ရှိနေပြီး ယခုမြင်ရသည်မှာ စနစ်က အကောင်းဆုံး ပြုပြင်ပေးထားသည့် အခြေအနေဖြစ်နေ၍လား?

ဖုန်းပုကျွယ် က သူမကို အကဲခတ်နေစဉ် ထိုမိန်းကလေး၏ မျက်လုံးများက သူ့မျက်လုံးများနှင့် ဆုံသွားသည်။ လူတစ်ယောက်၏ ပထမဆုံး အထင်အမြင်မှာ အကြည့်ပေါ်တွင် မူတည်နေလေ့ရှိသည်။ ပထမဆုံး တစ်ချက်ကြည့်လိုက်လျှင် ဖုန်းပုကျွယ် ၏ မျက်လုံးထဲတွင် တည်ငြိမ်အေးဆေးမှုကို မြင်ရမည်ဖြစ်ပြီး၊ ထိုမိန်းကလေး၏ မျက်လုံးထဲတွင်မူ အေးစိမ့်ပြီး ထက်မြက်သော လူသတ်ငွေ့အချို့ကို ဖုန်းပုကျွယ် မြင်လိုက်ရသည်။ ၎င်းမှာ သူမက သူ့ကို စိုက်ကြည့်နေခြင်း သို့မဟုတ် အေးစက်ဟန်ဆောင်နေခြင်းကြောင့် မဟုတ်ဘဲ ပုံမှန်အတိုင်းပင် ထွက်ပေါ်နေခြင်း ဖြစ်သည်။ ဤအကြည့်မျိုးမှာ ပြင်ပလောကတွင် လူသတ်ခြင်းကို ကျင့်သားရနေသူတစ်ဦး၌သာ ရှိနိုင်သည့် အကြည့်မျိုးပင်။

အကြည့်ကို အပေါ်သို့ ပင့်တင်လိုက်သောအခါ 'ဖြတ်ကျော်မိုးစက်' ၏ ဘွဲ့အမည်မှာ 'Heartless Decapitator' (နှလုံးသားမဲ့ ခေါင်းဖြတ်သူ) ဖြစ်သည်ကို ဖုန်းပုကျွယ် တွေ့လိုက်ရသည်။ ထို့နောက် သူက စိတ်ထဲမှ ရေရွတ်လိုက်သည် - ဘာတွေ ဖြစ်ကုန်တာလဲ? အထူးအေးဂျင့်မလေးက သတ္တိလာမွေးနေတာလား?

'ရယ်မောသော ဝိညာဉ်' ကတော့ ပို၍ ပုံမှန်ဆန်ပုံရသည်။ သူမသည် ဖြတ်ကျော်မိုးစက်ထက် တစ်နှစ်၊ နှစ်နှစ်ခန့် ငယ်ပုံရသည်။ မျက်နှာသေးသေးလေးနှင့် ဆံပင်အရှည်ကြီး ရှိသော်လည်း သူမ၏ ချစ်စရာကောင်းသော မျက်နှာလေးကို ဖုံးကွယ်မထားပေ။ သူမ၏ မျက်နှာထက်တွင် အပြုံးနုနုလေး ရှိနေသော်လည်း... မျက်လုံးထဲတွင်မူ ဟာသအရိပ်အမြွက်မျှ မရှိပေ။ 'ရယ်မောသော ဝိညာဉ်' ၏ ဘွဲ့အမည်မှာ 'Smart Gunslinger' (ပါးနပ်သော သေနတ်သမား) ဖြစ်သည်။ အံ့ဩစရာမရှိလျှင် သူမသည် သေနတ်ပစ်ရာတွင် ထူးချွန်သူ ဖြစ်ပေလိမ့်မည်။

"ဘာဖြစ်လို့လဲ?" 'ဖြတ်ကျော်မိုးစက်'ကရုတ်တရက် နှုတ်ခမ်းဟလိုက်သည်။ သူမ၏ မျက်လုံးများက ဖုန်းပုကျွယ် ဆီသို့ ပစ်မှတ်ထားနေသည်။ သူမ၏ အမူအရာက အေးစက်ပြီး စကားလုံးများက ထက်မြက်လှသည်။

သူမကို ဘာကြောင့် စိုက်ကြည့်နေသလဲဟု မေးနေခြင်းဖြစ်ကြောင်း ဖုန်းပုကျွယ် နားလည်လိုက်သည်။ သူက ပြုံးလိုက်ပြီး နှုတ်ဆက်လိုက်သည်။ "အဲ... ဘာမှမဟုတ်ပါဘူး။ ခင်ဗျားတို့ နှစ်ယောက်ရဲ့ ဘွဲ့အမည်တွေကို ကြည့်ပြီး အံ့ဩသွားလို့ပါ"

'ဖြတ်ကျော်မိုးစက်'က ပြန်မပြောဘဲ နေလိုက်သည်။ သူမအတွက် အချိန်ဖြုန်းရကျိုးမနပ်သည့် စကားတစ်ခွန်းကို ကြားလိုက်ရသလိုမျိုးပင်။ ၎င်းက ဖုန်းပုကျွယ် ကို အခက်တွေ့သွားစေသည်။

'ရယ်မောသော ဝိညာဉ်'က အခြေအနေကို သိသဖြင့် တင်းမာမှုကို လျှော့ချရန် ရယ်မောလိုက်သည်။ "ရှင်တို့လည်း အတူတူပါပဲ၊ ရှင်တို့ရဲ့ ဘွဲ့အမည်တွေကလည်း စိတ်ဝင်စားဖို့ ကောင်းပါတယ်" သူမ၏ ဝမ်းကွဲညီမမှာ စကားနည်းသူဖြစ်ကြောင်း သိထားသဖြင့် ဖုန်းပုကျွယ် မျက်နှာမပျက်စေရန် တစ်ခုခု ပြောပေးလိုက်ခြင်း ဖြစ်သည်။

ထိုမိန်းကလေးနှစ်ဦးအကြောင်း အနည်းငယ် ရှင်းပြရလျှင် - 'ဖြတ်ကျော်မိုးစက်' အဘိုး၏ ညီမမှာ 'ရယ်မောသော ဝိညာဉ်' ၏ အဘွားဖြစ်သည်။ အခြေခံအားဖြင့် သူတို့မှာ ဆွေမျိုးတော်စပ်ကြသည်။ အမှန်စင်စစ် သူတို့မှာ အသက် ၂၂ နှစ်ချင်း အတူတူပင်။ '‌ဖြတ်ကျော်မိုးစက်' မှာ စကားပြောရသည်ကို မနှစ်သက်သော်လည်း သူမမှာ အနိုင်ကျင့်ခံရမည့်သူမျိုး မဟုတ်ပေ။ သူမသည် အမျိုးသားများနှင့် ဖြစ်စေ၊ မည်သူနှင့်ဖြစ်စေ ရန်ပွဲတွင် တစ်ခါမျှ ရှုံးနိမ့်ဖူးခြင်း မရှိပေ။ သူမက ထိုမျှအထိ မိုက်သူဖြစ်သည်။ 'ရယ်‌မောသောဝိညာဉ်' မှာမူ မကြီးထွားသေးသည့် ကလေးတစ်ယောက်ကဲ့သို့ပင်။ သူမမှာ နောက်ပြောင်တတ်သူဖြစ်ပြီး အမြဲတမ်း ဟာသလုပ်တတ်သည်။ ထို့ပြင် ဉာဏ်ရည် (IQ) ပိုင်းတွင်လည်း ဖုန်းပုကျွယ် ထက်ပင် ပို၍ ထက်မြက်နိုင်သော်လည်း၊ သူမတွင် ဖုန်းပုကျွယ် ကဲ့သို့ အရာရာကို အတင်းအဓမ္မ ဖတ်ရှုလေ့လာပြီး ခွဲခြမ်းစိတ်ဖြာတတ်သည့် ထူးဆန်းသော အလေ့အထမျိုး မရှိပေ။

ဤမိန်းကလေးနှစ်ဦးအကြောင်း အသေးစိတ် အဘယ်ကြောင့် ပြောပြနေရသနည်း? အကြောင်းမှာ သူတို့သည် အဓိကဇာတ်ကောင်များ ဖြစ်လာကြမည် မဟုတ်ပါလား။ အခန်း ၃၄ သို့ ရောက်နေပြီဖြစ်ရာ အဓိက အမျိုးသမီးဇာတ်ကောင်များ ပေါ်လာသင့်သည့် အချိန်ပင် မဟုတ်ပါလား။ သို့မဟုတ် စနစ်ကြီးက ရုတ်တရက် အမျိုးသမီးအဖြစ် ပြောင်းလဲသွားပြီး ဇာတ်လိုက်မင်းသားကို ချစ်မိသွားလိမ့်မည်ဟု သင်တို့ မျှော်လင့်နေကြသလား? အကယ်၍ ထိုသို့ဆိုလျှင်တော့ သင်တို့ ဇာတ်လမ်းမှားဖတ်နေပြီ ဖြစ်ပေလိမ့်မည်။

"ကျေးဇူးတင်ပါတယ်" ဖုန်းပုကျွယ် က သူမ၏ စေတနာကို လက်ခံလိုက်ပြီး 'မရှုံးနိမ့်‌သောချန်ပီယံ' ဘက်သို့ လှည့်လိုက်သည်။ "အဲ... မရှုံးနိမ့်‌သော ညီအစ်ကို၊ ခင်ဗျားက ဟို ' ကြောက်တရားမရှိ ချန်ပီယံ' နဲ့ ဆွေမျိုးတော်တာလား?"

"ငါတို့က စတူဒီယိုတစ်ခုတည်းကပါ" ဟု ထိုလူက ခပ်ပြတ်ပြတ် ပြောသည်။ "တခြားမေးခွန်းတွေကို ဖြေဖို့ ငါ့မှာ အချိန်မရှိဘူး။ မင်းတို့လို သာမန်ကစားသမားတွေရဲ့ မေးခွန်းတွေကို ဖြေရတာနဲ့တင် ငါ နားငြီးနေပြီ" သူက ခေါင်းနားတွင် လက်မြှောက်ပြရင်း အထင်အမြင်သေးသည့် လေသံဖြင့် ပြောလိုက်သည်။

"ဪ... ကျွန်တော်တို့ထဲမှာ ပရော်ဖက်ရှင်နယ် ကစားသမားတစ်ယောက် ပါနေတာပဲ။ ဒါဟာ ဂုဏ်ယူစရာပါပဲ" ဖုန်းပုကျွယ် က ပို၍ ရွဲ့စောင်းသော လေသံဖြင့် ချီးကျူးလိုက်သည်။

ထိုလူက နှာခေါင်းရှုံ့ကာ ခေါင်းကို မော့ပြီး တစ်ဖက်သို့ လှည့်သွားသည်။ အကယ်၍ စနစ်သာ မရှိလျှင် သူ ဆဲရေးတိုင်းထွာနေလောက်ပြီ ဖြစ်သည်။ ရုတ်တရက် စနစ်က ထိုတင်းမာနေသော လေထုကို ဖြိုခွဲလိုက်သည်။

"ပင်မမစ်ရှင် စတင်ပါပြီ"