အခန်း ၄၈ - ကံကြမ္မာသားတော်သည် ကြွက်တစ်ကောင်၏ အနိုင်ကျင့်ခြင်းကို တကယ်ပဲ ခံလိုက်ရသည်

ဘာပဲဖြစ်ဖြစ်... ထိုစဉ်တုန်းက သူတို့နှစ်ဦး ပူးပေါင်းကာ ကျောက်ဝူကျီကို လုပ်ကြံသတ်ဖြတ်ခဲ့ကြခြင်း ဖြစ်ပေသည်။ သို့သော်လည်း ယခုအခါတွင်မူ သူတို့၏ သခင်အသစ်က ကျောက်ဝူကျီသည် လုံးဝ ကွယ်လွန်သွားခဲ့ခြင်း မရှိသေးကြောင်း ပြောကြားလာခဲ့ပြီ ဖြစ်၏။

"သူ့ကို တွေ့တဲ့အခါကျရင် မင်းတို့ဘာသာ သိလာလိမ့်မယ်"

"နောက်ပိုင်းကျရင်... ငါ့ရဲ့ အစီအစဉ်အတိုင်း သေသေချာချာ လုပ်ဆောင်ကြပါ အကယ်၍ တစ်စုံတစ်ခု မှားယွင်းသွားခဲ့မယ်ဆိုရင် နောက်ဆက်တွဲ ဘာဖြစ်မလဲဆိုတာ ငါ ထွေထွေထူးထူး ရှင်းပြနေဖို့ မလိုတော့ဘူးမလား"

ထိုစကားကို ကြားရသည့်အခါ သူတို့နှစ်ဦးစလုံး ခေါင်းကို အလောတကြီး ငြိမ့်ပြလိုက်ကြတော့သည်။

"မင်းတို့တွေ ဆက်ပြီး ပျော်ပါးနိုင်ပါပြီ"

"ဒါနဲ့... မင်းတို့ရဲ့ ပုံစံတွေက တော်တော်လေး ငြီးငွေ့စရာ ကောင်းလွန်းတယ်"

"အချိန်တန်ရင်... ငါ မင်းတို့အတွက် လုပ်ဆောင်စရာ အလုပ်တွေ ပေးအပ်ဖို့ ရှိသေးတယ်"

တီကျွယ်တျန်း ထွက်ခွာသွားတာကို စောင့်ကြည့်ပြီးနောက်ပိုင်းမှသာ ထိုသူနှစ်ဦးစလုံး အသက်ကို ပြင်းထန်စွာ ရှူသွင်းလိုက်မိကြတော့သည်။ ထို့နောက် သူတို့ အချင်းချင်း လှမ်းကြည့်လိုက်မိကြရင်း...

"မုယုံဟုန်ရန်... စောစောတုန်းက မင်း တကယ်ပဲ ငါ့ကို သတ်ဖို့ ပြင်ဆင်လိုက်တာလား"

"ဟုတ်တယ်... သတ်ဖို့ပဲ"

လီရှောက်ယွမ်၏ မျက်နှာအမူအရာ ချက်ချင်း ပြောင်းလဲသွားခဲ့ရသည်။

ထားပါတော့..

"သခင်ကြီးရဲ့ အစီအစဉ်မှာ မမျှော်လင့်တဲ့ ပြဿနာတွေ မဖြစ်ပွားအောင် ငါတို့ နန်းတော်ထဲက လူတွေအားလုံးကိုပါ တစ်ခါတည်း လိုက်ပြီး ထိန်းချုပ်ထားလိုက်ရင် ကောင်းမလား"

"ရတာပေါ့..."

"ဒါပေမဲ့ အဲ့ဒီကိစ္စတွေကို နောက်မှ လုပ်ဆောင်တာပေါ့… အခု လောလောဆယ်တော့ ငါတို့ ကိစ္စကိုပဲ ဆက်ကြရအောင်"

"မင်း စောစောတုန်းက တော်တော်လေး ထိတ်လန့်သွားတာ မဟုတ်လား... အခုအချိန်အထိ စိတ်ပါသေးရဲ့လား" မုယုံဟုန်ရန်က လှမ်း၍ မေးမြန်းလိုက်သည်။

လီရှောက်ယွမ် စမ်းသပ်ကြည့်လိုက်မိပြီးနောက် စိတ်ပျက်လက်ပျက်ဖြင့် သက်ပြင်းချလိုက်မိရင်း... အခြားသူများကိုသာ သွားရောက်ထိန်းချုပ်ရန် ဆုံးဖြတ်လိုက်တော့သည်။

တခြားတစ်ဖက်၌…

"မင်း... ငါ့ကို ဒီလိုမျိုး နေရာအထိ ခေါ်ဆောင်လာခဲ့တာလား”

ဤအခိုက်အတန့်တွင် ကုန်းစင်း ကျောက်ဝူကျီ၏ နောက်ကွယ်ကနေ လိုက်ပါလာခဲ့ရင်း တောင်ကလပ်တစ်ခု၏ အစွန်းသို့ ရောက်ရှိလာခဲ့ကြခြင်းပင်။

"ငါ့မှတ်ဉာဏ်ထဲမှာတော့... ဒီနေရာ ဖြစ်ရမှာပါ" ကျောက်ဝူကျီ တိုးတိုးလေး ရေရွတ်လိုက်မိသည်။

ကုန်းစင်း ဇဝေဇဝါ ဖြစ်မှုများ၊ သံသယဝင်မှုများ ပြည့်နှက်နေသည့် မျက်ဝန်းများဖြင့် ကျောက်ဝူကျီကို လှမ်းကြည့်လိုက်မိရင်း...

"မကြာခင်မှာတင် မင်း သိလာရမှာပါ… ဒါပေမဲ့ အောက်ခြေမှာ တကယ့်ကို အန္တရာယ်များလွန်းလှတာကြောင့် ငါတို့နှစ်ယောက်တည်းနဲ့ အောက်သို့ ဆင်းသွားဖို့က အဆင်မပြေနိုင်ဘူး"

"ငါတို့ လူတစ်ယောက်ကို စောင့်ဆိုင်းဖို့ လိုအပ်တယ်"

လက်ရှိအချိန်တွင် ကျောက်ဝူကျီ မိမိ၏ စိတ်ထဲ၌ မည်ကဲ့သို့သော အကြံအစည်မျိုးကို ကြံစည်နေသလဲဆိုတာ မည်သူမှ သိရှိထားခြင်း မရှိချေ။

ကျောက်ဝူကျီ မိမိ၏ လက်ထဲတွင် ကျောက်စိမ်းအဆောင်တစ်ခုကို ထုတ်ယူလိုက်ကာ... ၎င်းကို ချက်ချင်း ချေဖျက်ပစ်လိုက်တော့သည်။

ခေတ္တမျှ ကြာမြင့်ပြီးနောက် ဟင်းလင်းပြင် ဝင်ပေါက်တစ်ခု ပွင့်ဟသွားခဲ့ရပြီး ချန်ထန်၏ ပုံရိပ်က ချက်ချင်း ထွက်ပေါ်လာခဲ့ပြီ ဖြစ်၏။

"နန်းတော်သခင်ကြီး..."

ရုတ်တရက် ထွက်ပေါ်လာသော ထိုလူအိုကြီးကို မြင်တွေ့လိုက်ရသည့် အခိုက်အတန့်တွင် ကုန်းစင်း၏ မျက်နှာအမူအရာ ပြောင်းလဲသွားခဲ့ရသည်။

ထို့ပြင် ထိုမျှလောက်အထိ အစွမ်းထက်လှသော ထိပ်တန်းပညာရှင်ကြီးတစ်ဦးက ကျောက်ဝူကျီကို တလေးတစားဖြင့် ဦးညွှတ်ဂါရဝပြုနေသည်ကို စောင့်ကြည့်လိုက်မိရင်း... ကုန်းစင်းတစ်ယောက် ကျောက်ဝူကျီ၏ စစ်မှန်သော နောက်ခံဇာစ်မြစ်ကို လုံးဝ ရိပ်မိခြင်း မရှိတော့ချေ။

'သူက... တကယ်ပဲ ဘယ်သူလဲ'

"ငါ မင်းကို နောက်မှ အသေးစိတ် ရှင်းပြပါ့မယ်… အခု လောလောဆယ် အရေးကြီးဆုံးအရာကတော့ ကျင့်ကြံခြင်း အရင်းအမြစ်တွေပဲ ဖြစ်တယ်… ငါ ယခင်ကဒီ နေရာမှာ အဖိုးတန်လှတဲ့ အရင်းအမြစ်အချို့ကို ဝှက်မ်းသိမ်းဆည်းထားခဲ့ဖူးတယ်"

"၎င်းက အများကြီးတော့ မဟုတ်ပေမယ့် ငါတို့နှစ်ယောက်စလုံး ကျင့်ကြံဖို့အတွက်တော့ လုံလောက်ပါတယ်။ ဒါပေမဲ့ နှစ်ပေါင်း များစွာ ကြာမြင့်နေပြီ ဖြစ်တာကြောင့် အဲ့ဒီပစ္စည်းတွေ ရှိးသေပျက်စီးသွားခဲ့ပြီလားဆိုတာတော့ ငါ အတိအကျ မသိသေးဘူး" ကျောက်ဝူကျီက ပြောလိုက်သည်။

ဟင်းလင်းပြင် ကမ္ဘာငယ်လေးအတွင်း၌ ပုန်းကွယ်နေသော တီကျွယ်တျန်းမှာမူ စနစ်၏ ကာကွယ်ပေးထားမှုကြောင့် မည်သူမှ ရိပ်မိခြင်း မရှိစေဘဲ ဖြစ်နေခဲ့ရ၏။

ထို့နောက် သူ၏ နတ်ဘုရားမျက်ဝန်းဖြင့် ထိုးဖောက်စူးစမ်းလိုက်မိတော့သည်။

တီကျွယ်တျန်း နောက်တစ်ကြိမ် ပြန်လည် ထွက်ပေါ်လာခဲ့သည့် အချိန်တွင်မူ... သူသည် မိမိ၏ ရှေ့မှောက်ရှိ စင်ပေါ်က အဖိုးတန်လှသော အရင်းအမြစ်များကို စူးစမ်းကြည့်ရှုလိုက်မိသည်။ ထိုနေရာတွင် တကယ့်ကို အဖိုးတန်လှသော ရတနာပစ္စည်းများ အမြောက်အမြား ရှိနေခဲ့ခြင်းပင်။

ခေတ္တမျှ ကြာမြင့်ပြီးနောက် တီကျွယ်တျန်း ထိုနေရာကနေ တိတ်တဆိတ် ထွက်ခွာသွားခဲ့တော့သည်။

ချန်ထန်သည် ကုန်းစင်းနှင့် ကျောက်ဝူကျီတို့နှစ်ဦးကို ခေါ်ဆောင်ကာ အောက်ခြေသို့ ဆင်းသက်လာခဲ့ကြသည်။

ကျောက်ဝူကျီ၏ မျက်နှာထက်တွင် အတိုင်းထက်အလွန် ဝမ်းမြောက် ဖြစ်မှုများဖြင့် ပြည့်နှက်နေခဲ့ရပြီး ကုန်းစင်းကလည်း မိမိ၏ ပတ်ဝန်းကျင်တစ်ခုလုံးကို စူးစမ်းလိုစိတ်များဖြင့် စူးစမ်းကြည့်ရှုနေခဲ့၏။

"ကျိန်း..." တံခါးကြီး ချက်ချင်း ပွင့်ဟသွားခဲ့ရသည်။

ကျောက်ဝူကျီ မိမိ၏ ခြေလှမ်းများကို မသိမသာ ပိုမို၍ မြန်ဆန်အောင် လှမ်းလျှောက်လိုက်မိတော့သည်။

ဘာပဲဖြစ်ဖြစ် သူသည် ယခင်က ဤနေရာ၌ နတ်ဘုရားဝိညာဉ်ဆေးလုံးတစ်လုံးကို သိမ်းဆည်းထားခဲ့ဖူးကြောင်း ကောင်းစွာ မှတ်မိနေခဲ့ခြင်းပင်။

၎င်း၏ အာနိသင်က ယင်ယန် နတ်ဘုရားအသီးနှင့် နှိုင်းယှဉ်လိုက်လျှင် အနည်းငယ် လျော့နည်းသော်လည်း သူ၏ ဝိညာဉ် ပေါင်းစပ်မှုကိုတော့ သေချာပေါက် ပိုမို၍ မြန်ဆန်စေလိမ့်မည် ဖြစ်ပေသည်။

'ဝိညာဉ်ပေါင်းစပ်မှုသာ အောင်မြင်စွာ ပြီးဆုံးသွားခဲ့မယ်ဆိုရင်... ကိစ္စရပ်များစွာကို ဖော်ထုတ်နိုင်မှာ ဖြစ်သလို ငါ့ရဲ့ ကျင့်ကြံခြင်း အစွမ်းကလည်း အဆမတန် တိုးတက်လာလိမ့်မှာပဲ'

သို့သော်လည်း ထိုနေရာအတွင်းသို့ လှမ်းဝင်လိုက်ကြသော လူသုံးဦးစလုံး ချက်ချင်း ဆွံ့အမှင်တက်သွားခဲ့ကြရတော့သည်။ သူတို့၏ ရှေ့မှောက်ရှိ ပတ်ဝန်းကျင်တစ်ခုလုံးမှာ လုံးဝ ဗလာကျင်းနေခဲ့ခြင်းကြောင့်ပင်။

နေဦး... ထိုနေရာတွင် ကြွက်တစ်ကောင် ရှိနေခဲ့ သည်… ဤကဲ့သို့သော နေရာမျိုး၌ ကြွက်တစ်ကောင်က ဘာဖြစ်လို့ ရောက်ရှိနေရတာလဲ။

သူသည် ယခင်က ဤနေရာ၌ ကာကွယ်ရေး နည်းလမ်းများစွာကို သေသေချာချာ ချမှတ်ထားခဲ့ဖူးသည် မဟုတ်ပါလား။

အတွင်းပိုင်း၌ သူတော်စင်အဆင့်ရှိ ကျင့်ကြံသူများကိုပင် ဖိနှိပ်နိုင်စွမ်းရှိသော မဟာအစီအရင်များ ရှိနေခဲ့ခြင်းပင်။ မိမိအနေဖြင့် ၎င်းတို့၏ အရှိန်အဝါကို ဘာဖြစ်လို့ လုံးဝ ခံစားမိခြင်း မရှိရတာလဲ...။

"ဝူကျီ... ဟိုမှာ ကြည့်လိုက်ပါဦး... အဲ့ဒီကြွက်က ဘာကို စားနေတာလဲဟင်" ကုန်းစင်း ဤအခိုက်အတန့်တွင် ကြွက်၏ ခံတွင်းထဲ၌ တစ်ဝက်တစ်ပျက် ကျန်ရှိနေသေးသော အရာကို လှမ်းကြည့်လိုက်မိရင်း ထိတ်လန့်တုန်လှုပ်စွာဖြင့် အော်ဟစ်လိုက်မိတော့သည်။

ကျောက်ဝူကျီ လှမ်းကြည့်လိုက်မိသည့် အခိုက်အတန့်တွင်... "တောက်... ငါ့ရဲ့ နတ်ဘုရားဝိညာဉ်ဆေးလုံး"

ကျောက်ဝူကျီ ပြင်းထန်လှသော အရှက်ရမှုများနှင့် ဒေါသတရားများကြောင့် ရူးသွပ်လုမတတ် ဖြစ်သွားခဲ့ရပြီ ဖြစ်၏။ သူ ထိုကြွက်၏ နောက်သို့ ချက်ချင်း လိုက်လံ ဖမ်းဆီးတော့သည်။

၎င်းကို မြင်တွေ့လိုက်ရသည့်အခါ ထိုကြွက်ကလည်း လေထဲသို့ ခုန်တက်လိုက်ကာ ပျံသန်းကန်ချက်တစ်ချက်ကို ချက်ချင်း ပြုလုပ်လိုက်တော့သည်။

"ဘုန်း..."

ကျောက်ဝူကျီ မိမိ၏ ဆီးခုံအောက်ပိုင်းကို လက်ဖြင့် အုပ်လိုက်မိရင်း မြေပြင်ပေါ်သို့ ဒူးထောက်လဲကျသွားခဲ့ရတော့သည်။

ချန်ထန်၏ မျက်နှာအမူအရာ ချက်ချင်း ပျက်ယွင်းသွားခဲ့ရပြီ ဖြစ်၏။ သူ မိမိ၏ ခြေထောက်နှစ်ဖက်ကို အလောတကြီး ပူးကပ်လိုက်မိရင်း... 'တစ်မိနစ်လောက် တောင့်ခံနိုင်ရင်ပဲ တော်သေးတာပေါ့' ဟု တွေးတောလိုက်မိသည်။

ကျောက်ဝူကျီတစ်ယောက် လုံးဝ ဒုက္ခိတ မဖြစ်သွားခဲ့လျှင်ပဲ ကံကောင်းလှပြီ ဖြစ်၏။ ကျောက်ဝူကျီတစ်ယောက် အဆင်ပြေပါ့မလားဆိုတာ သူ အတိအကျ မသိရချေ။

ဤအခိုက်အတန့်တွင် ကျောက်ဝူကျီမှာမူ ပြင်းထန်လှသော နာကျင်မှုများကြောင့် သူ၏ နဖူးပြင်ထက်တွင် အကြောပြိုင်းပြိုင်း ထွက်ပေါ်နေခဲ့ရပြီ ဖြစ်၏။ သူ ဘာကိုမှ ပြန်လည် မတုံ့ပြန်နိုင်သေးချေ။

ထိုကြွက်က ကျောက်ဝူကျီ၏ ရှေ့မှောက်သို့ အေးဆေးစွာ လှမ်းလျှောက်လာခဲ့ရင်း... လက်လယ်ချောင်းကို ထောင်ပြလိုက်ကာ ခံတွင်းထဲက ဆေးလုံးကို အပိုင်းပိုင်းအစစ ဖြစ်အောင် ဝါးစားပစ်လိုက်ပြီးနောက် မြေပြင်ပေါ်သို့ တိုက်ရိုက် ထွေးထုတ်ပစ်လိုက်တော့သည်။

၎င်းက မိမိ၏ ခြေထောက်ဖြင့် ဆေးလုံးဖတ်များကို ဖုန်မှုန့်များနှင့် ရောနှောသွားအောင် နှစ်ချက်ခန့် ထပ်မံ နင်းခြေဖျက်ဆီးပစ်လိုက်ရာ... ၎င်းက လုံးဝ အနက်ရောင် ရွှံ့စေးလုံးတစ်ခုအဖြစ် ပြောင်းလဲသွားခဲ့ရတော့သည်။

ထို့နောက် ထိုကြွက်သည် လူသားတစ်ယောက်ကဲ့သို့ ခန့်ခန့်ထည်ထည်ဖြင့် လှည့်ထွက်သွားခဲ့တော့သည်။

ကျောက်ဝူကျီတစ်ယောက် သွားကို တင်းတင်းကြိတ်ရင်း အံကြိတ်ကာ ရေရွတ်လိုက်မိတော့သည်။

ထိုမြင်းကွင်းကို စောင့်ကြည့်နေခဲ့သော ကုန်းစင်းလည်း ကြောင် ကြည့် နေပြီးမှ အနေရခက်လှသော အမူအရာများ ချက်ချင်း ထွက်ပေါ်လာခဲ့ရပြီ ဖြစ်၏။ ယခင်က တကယ့်ကို ယုံကြည်ချက် အပြည့် ရှိနေခဲ့သော ကျောက်ဝူကျီတစ်ယောက် ယခုအချိန်တွင် ကြွက်တစ်ကောင်၏ အနိုင်ကျင့်ခြင်းကို ဤမျှလောက်အထိ ခံလိုက်ရလိမ့်မည်ဟု သူမ လုံးဝ ထင်မှတ်မထားခဲ့မိချေ။

ကျောက်ဝူကျီ၏ နာကျင်လှသော ပုံစံကို ကြည့်ရှုလိုက်မိရင်း ကုန်းစင်း သက်ပြင်းတစ်ချက် ချလိုက်မိတော့သည်။ သူမ၏ မျက်ဝန်းထဲတွင် စိတ်ပျက်မှုများဖြင့် ပြည့်နှက်နေခဲ့ခြင်းပင်။

ချန်ထန်၏ မျက်ဝန်းထဲတွင်မူ... တစ်စုံတစ်ခုကို သဘောပေါက်သွားသည့် အမူအရာမျိုး ရှိနေခဲ့ပြီး 'ကြွက်ရဲ့ အမေကလည်း ကြွက်ပဲ ဖြစ်ရမှာပေါ့... ကြည့်ရတာ ကျောက်ဝူကျီက ဤကဲ့သို့သော အရာမျိုးကို တကယ့်ကို နှစ်သက်သဘောကျပုံရတယ်' ဟု စိတ်ထဲက တွေးတောလိုက်မိသည်။ အကယ်၍ ကျောက်ဝူကျီသာ ချန်ထန်၏ တွေးတောမှုကို သိရှိသွားခဲ့မည်ဆိုလျှင် သူ သေချာပေါက် ရူးသွပ်သွားပေလိမ့်မည်။

"ထစမ်းပါ..."

ကုန်းစင်း ခေါင်းကို ခါယမ်းလိုက်မိရင်း ကျောက်ဝူကျီကို တွဲထူကာ မတ်တတ်ရပ်စေလိုက်သည်။

ဟင်းလင်းပြင် ကမ္ဘာငယ်လေးအတွင်းကနေ စောင့်ကြည့်နေခဲ့သော တီကျွယ်တျန်းမှာမူ သူ၏ နှုတ်ခမ်းထက်တွင် အသာအယာ ပြုံးလိုက်မိတော့သည်။ ထိုအပြုံးက တကယ့်ကို ဆွဲဆောင်မှုရှိလှပြီး ကံကြမ္မာသားတော်၏ ရုပ်ပျက်ဆင်းပျက် ဖြစ်နေမှုနှင့် တကယ့်ကို ဆန့်ကျင်ဘက် ဖြစ်နေခဲ့ခြင်းပင်။

【 အောင်မြင်မှု - ကံကြမ္မာသားတော်၏ မူလအခွင့်အရေး ရတနာကို အောင်မြင်စွာ လုယူနိုင်ခဲ့သည်။ ကံကြမ္မာသားတော်၏ ကံကြမ္မာတန်ဖိုး ၅၀၀ လျော့နည်းသွားခဲ့ပြီး... သခင်ကြီး၏ ဗီလိန်ရမှတ် ၅၀၀ တိုးတက်လာခဲ့ပြီ ဖြစ်သည်။ 】

【 အောင်မြင်မှု - ကံကြမ္မာ၏ ဇာတ်လိုက်မသည် ကံကြမ္မာသားတော်အပေါ် စိတ်ပျက်သွားခဲ့ရသည်။ ကံကြမ္မာသားတော်၏ ကံကြမ္မာတန်ဖိုး ၁၀၀ေလျော့နည်းသွားခဲ့ပြီး... သခင်ကြီး၏ ဗီလိန်ရမှတ် ၁၀၀၀ တိုးတက်လာခဲ့ပြီ ဖြစ်သည်။ 】

မမျှော်လင့်ဘဲ ကံကြမ္မာသားတော်၏ ကံကြမ္မာတန်ဖိုးမှာ တစ်ပြိုင်နက်တည်းမှာတင် ထပ်မံ၍ ၁၅၀၀ ခန့်အထိ လျော့နည်းသွားခဲ့ရပြီ ဖြစ်ရာ... စုစုပေါင်း ကံကြမ္မာတန်ဖိုး နှစ်ထောင်ခန့်အထိ ဆုံးရှုံးသွားခဲ့ရခြင်းပင်။

ကျောက်ဝူကျီ မတ်တတ်ရပ်လိုက်နိုင်သည့် အချိန်တွင်မူ သူ၏ ခြေထောက်နှစ်ဖက်စလုံး ပြင်းထန်စွာ တုန်ယင်နေခဲ့ရပြီ ဖြစ်၏။

သူ၏ နဖူးပြင်ထက်တွင်လည်း ချွေးစေးလေးများ တောက်တောက်စက်စက် ကျဆင်းနေခဲ့သည်။ အကယ်၍ သူ ခန့်မှန်းရမည်ဆိုလျှင် သူ၏ အောက်ပိုင်းမှာ အနည်းငယ် ရောင်ကိုင်းနေခဲ့ပြီ ဖြစ်ရမည်။

သို့သော်လည်း ဤကဲ့သို့သော ကျယ်ပြောလှသည့် နေရာမျိုး၌ ပုန်းကွယ်စရာ နေရာမရှိတာကြောင့် သူကိုယ်တိုင်လည်း သေသေချာချာ စစ်ဆေးနိုင်ခြင်း မရှိဘဲ ဤအတိုင်း အနေရခက်စွာသာ မတ်တတ်ရပ်နေခဲ့ရတော့သည်။

ကုန်းစင်းက လှမ်းပြောလိုက်သည် "ဒီနေရာမှာ ဘာအရင်းအမြစ်မှ ရှိမနေမှတော့... ငါ မင်းကို အပြင်ဘက် ဝင်ပေါက်နားကနေ စောင့်ဆိုင်းနေပါ့မယ်"

"အမြန်လုပ်နော်..."

ထိုစကားကြောင့် ကျောက်ဝူကျီ၏ မျက်နှာတစ်ခုလုံး အရှက်ရမှုများကြောင့် နီရဲသွားခဲ့ရပြီ ဖြစ်၏။ သူ၏ ရင်ထဲတွင် ယခင်က ရှိခဲ့ဖူးသော တက်ကြွမှုနှင့် မာန်မာနများ လုံးဝ ရှိမနေတော့ချေ။

ကုန်းစင်း ထွက်ခွာသွားတာကို စောင့်ကြည့်ရင်း ကျောက်ဝူကျီ တိုးတိုးလေး ရေရွတ်လိုက်မိသည် "ငါ သေချာပေါက်... အဲ့ဒီနေရာသို့ပဲ သွားရောက်ရတော့မှာလား..."

'မဖြစ်ဘူး... ငါ့အနေနဲ့ အခုအချိန်မှာ အင်အားကို မဖြစ်မနေ လိုအပ်နေတာ ဖြစ်ပေမယ့် အဲ့ဒီနေရာကတော့...' ထိုအကြောင်းအရာကို တွေးမိသည့် အခိုက်အတန့်မှာတင် ကျောက်ဝူကျီ၏ မျက်နှာထက်တွင် ပူပန်မှုများဖြင့် ပြည့်နှက်သွားခဲ့ရတော့သည်။

"ငါ အတိတ်ဘဝတုန်းကလိုမျိုး ကိစ္စရပ်တွေကို ထပ်မံ ပြုလုပ်ရတော့မှာလား"

"မဖြစ်ဘူး... ငါ ဒီတစ်ကြိမ်မှာတော့ လောင်းကြေးထပ်ပြီး စွန့်စားကြည့်ရမယ်" သူ ဤသို့ တွေးတောလိုက်မိရင်း မိမိ၏ အောက်ပိုင်းကို အမြန်ဆုံး စစ်ဆေးလိုက်မိရာ... လောလောဆယ်တွင် ကြီးမားလှသော ပြဿနာမျိုး ရှိမနေကြောင်း အတည်ပြုနိုင်ခဲ့မှသာ အပြင်ဘက်သို့ လှမ်းထွက်လာခဲ့တော့သည်။

"ရှင်... အဆင်ပြေရဲ့လားဟင်" ကုန်းစင်းက စိုးရိမ်တကြီးဖြင့် လှမ်း၍ မေးမြန်းလိုက်သည်။

"ငါ အဆင်ပြေပါတယ်… ဒီအတိုင်း နှစ်ရက်လောက် နားနားနေနေ နေလိုက်ရင် အဆင်ပြေသွားမှာပါ"

"ကံကောင်းထောက်မစွာနဲ့... အဲ့ဒီကြွက်ရဲ့ အစွမ်းက သိပ်ပြီး မပြင်းထန်လို့ ဖြစ်ရမှာပါ"

ဤစကားကို ပြောဆိုပြီးနောက်ပိုင်းတွင် ကျောက်ဝူကျီ မိမိကိုယ်ကိုယ် ပါးစပ်ကို နှစ်ချက်ခန့် ပြန်လည် ရိုက်ပုတ်ပစ်လိုက်ချင်စိတ်များ ပေါက်ပွားသွားခဲ့ရတော့သည်။

မိမိအနေဖြင့် ဤမျှလောက်အထိ အရှက်ရစရာ ကောင်းလှသော ကိစ္စကို ပြောဆိုမိလိုက်သည် မဟုတ်ပါလား။

"ဟုတ်ပြီ... ငါတို့ကို ဝူကျီပြည်နယ်သို့ အမြန်ဆုံး ခေါ်ဆောင်သွားပေးပါဦး" ကျောက်ဝူကျီက တည်ကြည်လေးနက်စွာဖြင့် အမိန့်ပေးလိုက်သည်။

ချန်ထန် ဘာမှ ထပ်မံ မမေးမြန်းတော့ဘဲ ခေါင်းကို ငြိမ့်ပြလိုက်သည့် အခိုက်အတန့်မှာတင်... ဟင်းလင်းပြင် ဝင်ပေါက်တစ်ခု ချက်ချင်း ထွက်ပေါ်လာခဲ့ပြီ ဖြစ်၏။

သူတို့ ထွက်ခွာသွားတာကို စောင့်ကြည့်ပြီးနောက် တီကျွယ်တျန်း၏ ပုံရိပ်ကလည်း သူတို့၏ နောက်ကွယ်ကနေ ထပ်ကြပ်မကွာ တိတ်တဆိတ် လိုက်ပါသွားခဲ့တော့သည်။

ဘာပဲဖြစ်ဖြစ် သူသည် စောစောတုန်းက လိုဏ်ဂူအတွင်း၌ ကံကြမ္မာသားတော်၏ ရေရွတ်မှုများကို ကောင်းစွာ ကြားသိထားခဲ့ခြင်းပင်။ ကြည့်ရတာ ထိုအခွင့်အရေး ရတနာက ကံကြမ္မာသားတော်ကို ကြီးမားလှသော ပြောင်းလဲမှုများ ဖြစ်ပေါ်စေလိမ့်မည် ဖြစ်ရမည်။

အကယ်၍ သူသာ ကျင့်ကြံခြင်းကို ထပ်မံ ပြုလုပ်ခဲ့မည်ဆိုလျှင် သူ၏ အတိတ်ဘဝတုန်းက ကျင့်ကြံခြင်း အဆင့်သို့ အမြန်ဆုံး ပြန်လည် ရောက်ရှိနိုင်မည် ဖြစ်သော်လည်း ၎င်းက ထိုမျှလောက်သာ ရှိသေးပြီး အလွန်ဆုံးမှ နောက်ထပ် ခြေလှမ်းတစ်လှမ်းခန့်သာ ပိုမို၍ တိုးတက်နိုင်မည် ဖြစ်ပေသည်။

သို့သော်လည်း ကံကြမ္မာသားတော်အနေဖြင့် ဤမျှလောက်သော အဆင့်ဖြင့် လုံးဝ ကျေနပ်နှစ်သိမ့်နိုင်လိမ့်မည် မဟုတ်ချေ။

တီကျွယ်တျန်းသည် ကျောက်ဝူကျီ၏ ရင်ထဲက ရုန်းကန်နေမှုများကို မြင်တွေ့ထားခဲ့ရသော်လည်း မည်ကဲ့သို့သော အခွင့်အရေး ရတနာက ကံကြမ္မာသားတော်ကို ဤမျှလောက်အထိ ဝေခွဲမရအောင် ဖြစ်ပွားစေသလဲဆိုတာကိုတော့ သူ အတိအကျ မသိရသေးချေ။

၎င်းနှင့် တစ်ပြိုင်နက်တည်းမှာတင် တီကျွယ်တျန်း သတင်းစကားတစ်ခုကို တိတ်တဆိတ် ပေးပို့လိုက်တော့သည်။

"အစီအစဉ်ကို... စတင်လိုက်ကြတော့..."