အခန်း ၄၅ - မမျှော်လင့်ဘဲ အောင်မြင်သွားခြင်း

ကုန်းရှင်းယွဲ့ ဤစကားကို ပြောဆိုလိုက်သည့်အခါ သူမ၏ လေသံထဲတွင် နွေးထွေးမှု လုံးဝ ရှိမနေတော့ဘဲ သတ်ဖြတ်လိုစိတ်များသာ ပြည့်နှက်နေခဲ့သည်။ တီကျွယ်တျန်း၏ စရိုက်ကို သူမ ကောင်းစွာ သိရှိထားပြီး ဖြစ်ရာ... သူတို့က တီကျွယ်တျန်းသည် ယင်ယန်နတ်ဘုရားအသီးတစ်လုံးအတွက်နှင့်ဒီနေရာသို့ လာရောက်ခဲ့သည်ဟု တကယ်ပဲ ထင်နေကြခြင်း ဖြစ်၏။

သို့သော်လည်း ကုန်းမိသားစု၏ သမီးတစ်ဦးအနေဖြင့် ကုန်းမိသားစု၏ မျိုးဆက်သစ်လူငယ်များထဲတွင် ထူးချွန်ထက်မြက်သူ တစ်ဦးမျှ ရှိမနေကြောင်းကိုလည်း သူမ ကောင်းစွာ သိရှိထားသည်။

သူမသည် မိမိ၏ သားဖြစ်သူကို ကုန်းမိသားစု၏ အမွေအနှစ်အား ဆက်ခံမည့်သူ ဖြစ်လာစေရန် ရည်ရွယ်ထားခဲ့ခြင်း ဖြစ်ပြီး ၎င်းက နောင်တစ်ချိန်တွင် သားဖြစ်သူ၏ အခြေခံအုတ်မြစ်ကို အဆမတန် တိုးတက်ကောင်းမွန်စေရန် ဖြစ်၏။

သူတို့က ယခုအချိန်တွင် သူမ၏သားကို သံသယဝင်လာလိမ့်မည်ဟု သူမ လုံးဝ ထင်မှတ်မထားခဲ့မိချေ။

ကျောက်ဝူကျီ ပြင်းထန်လှသော ဤအရှိန်အဝါများ မိမိ၏ ခန္ဓာကိုယ်ပေါ်သို့ ဖိနှိပ်လာသည်ကို ခံစားလိုက်ရသည့်အခါ သူ၏ မျက်နှာအမူအရာ ချက်ချင်း ပျက်ယွင်းသွားခဲ့ရပြီး "ကျွန်တော် အဲ့ဒီလို မဆိုလိုပါဘူး... ဒါက ကျွန်တော်ကိုယ်တိုင် မစွမ်းဆောင်နိုင်လို့ ဖြစ်ရတာပါ" ဟု ပြန်လည် တုံ့ပြန်လိုက်ရတော့သည်။

သူ၏ ရင်ထဲတွင် ယခင်က ရှိခဲ့ဖူးသော အစွမ်းထက် ပညာရှင်ကြီးတစ်ဦး၏ မာန်မာနများ ပြန်လည် ထွက်ပေါ်လာခဲ့ရ၏။

အကယ်၍ ယခင်က ကျောက်ဝူကျီသာ ဖြစ်ခဲ့မည်ဆိုလျှင် ထိုစကားများကို ကြားရပြီးနောက် လူအမြောက်အမြားက တီကျွယ်တျန်းကို သံသယဝင်သွားကြမည်မှာ သေချာလှပေသည်။ ၎င်းက သူ၏ ကံကောင်းခြင်း ရောင်ဝါ ကြောင့် ဖြစ်၏။

သို့သော်လည်း လက်ရှိအချိန်တွင် ကြီးမားလှသော ဗီလိန်ကြီးတစ်ဦး ဖြစ်သည့် တီကျွယ်တျန်းက ဤနေရာတွင် ရှိနေပြီး သူ၏ ဗီလိန်‌ ရောင်ဝါ က အသက်ဝင်နေခဲ့ရာ... အခြားသူများအနေဖြင့် ကျောက်ဝူကျီ၏ စကားကို ယုံကြည်နိုင်ခြေက တကယ့်ကို နည်းပါးလှပေသည်။

ကုန်းစင်း သတိဝင်လာခဲ့မိရင်း ကုန်းရှင်းယွဲ့ကို လှမ်းကြည့်လိုက်ကာ "အဒေါ်... လူငယ်တစ်ယောက်ကို ဒီလိုမျိုး လာပြီး ဖိနှိပ်နေတာက နည်းနည်းတော့ မသင့်တော်ဘူးမလား" ဟု စကားဆိုလိုက်သည်။

"ထို့အပြင်... ကျွန်မတို့အားလုံးက မိသားစုဝင်တွေပဲလေ… ကျွန်မက သာမန်ကာလျှံကာ မေးမြန်းကြည့်ရုံတင်ပါ"

တီကျွယ်တျန်းက ကြားကနေ ဝင်ရောက် စကားဆိုလိုက်၏ "ဟုတ်ပါတယ် အမေ... ကျွန်တော်တို့အားလုံးက မိသားစုဝင်တွေပဲဟာကို... ဒီလို ကိစ္စရပ်တွေအတွက်နဲ့ ဒီလောက်အထိ အလုပ်ရှုပ်ခံနေဖို့ မလိုပါဘူး"

သားဖြစ်သူ၏ စကားကို ကြားရသည့်အခါ ကုန်းရှင်းယွဲ့ သက်ပြင်းတစ်ချက်ကို အသာအယာ ချလိုက်မိတော့သည်။

တီကျွယ်တျန်း မိမိ၏ လက်ချောင်းကို အသာအယာ တောက်လိုက်သည့် အခိုက်အတန့်မှာတင်... ယင်ယန် နတ်ဘုရားအသီး ဆယ်လုံးက ခန်းမဆောင်အတွင်း၌ ချက်ချင်း ထွက်ပေါ်လာခဲ့ပြီ ဖြစ်၏။

ပင်မခန်းမဆောင်ကြီးအတွင်းရှိ လူအများ၏ မျက်နှာအမူအရာများ ချက်ချင်း ပြောင်းလဲသွားခဲ့ကြရတော့သည်။

ကုန်းစင်း၏ မျက်နှာအမူအရာလည်း လုံးဝ ပျက်ယွင်းသွားခဲ့ရပြီ ဖြစ်၏။ သူတို့ တန်ဖိုးထား မြတ်နိုးလှသော အရာများက တီကျွယ်တျန်း၏ မျက်စိထဲတွင်မူ သူ အလိုရှိတိုင်း အလွယ်တကူ ထုတ်ပေးနိုင်သော ပစ္စည်းအဆင့်မျှသာ ရှိနေခဲ့ခြင်းပင်။

ကုန်းရှင်းယွဲ့ စိတ်ထဲကနေ သက်ပြင်းချလိုက်မိသည်။

သူမသည် မိမိ၏ သားဖြစ်သူ၏ စရိုက်ကို ကောင်းစွာ သိရှိထား၏။

အကယ်၍ သားဖြစ်သူသာ ကြားကနေ တားဆီးမပေးခဲ့ဘူးဆိုလျှင် တီမိသားစု၏ ဘိုးဘေးအိုကြီးကိုယ်တိုင် ယခုအချိန်တွင် ဤနေရာသို့ လာရောက်နေလောက်ပြီ ဖြစ်သည်။ တီကျွယ်တျန်းက ဘိုးဘေးအိုကြီးကို တားဆီးပေးထားခဲ့ခြင်း ဖြစ်ရမည်။ ဘာပဲဖြစ်ဖြစ် ဘိုးဘေးအိုကြီးက တီကျွယ်တျန်းကို အလွန်အမင်း အလိုလိုက် လှသည် မဟုတ်ပါလား။

တီကျွယ်တျန်းက လှမ်းပြောလိုက်သည် "အဖိုး... ကျွန်တော် ဒီကို လာရောက်တာက ဒီလိုမျိုး ပြဿနာတွေ ဖြစ်ပွားစေလိမ့်မယ်လို့ လုံးဝ ထင်မှတ်မထားခဲ့မိဘူး။ ဒီတစ်ကြိမ်မှာ ကျွန်တော်ကိုယ်တိုင် သေသေချာချာ မစဉ်းစားမိခဲ့လို့ ဖြစ်ရမှာပါ"

"အစ်မဝမ်းကွဲ... မောင်လေးအတွက်နဲ့ စိတ်ရှုပ်သွားရပြီဆိုရင် တောင်းပန်ပါတယ်" တီကျွယ်တျန်းက လျှော့ပေးသည့် အမူအရာဖြင့် တောင်းပန်စကား ဆိုလိုက်ခြင်း ဖြစ်၏။

ကုန်းရှင်းယွဲ့ မိမိ၏ သားဖြစ်သူ၏ အမူအရာကို စောင့်ကြည့်လိုက်မိပြီးနောက် သူမ၏ ရင်ထဲတွင် ပြင်းထန်လှသော ဒေါသတရားများ ပိုမို၍ ထွက်ပေါ်လာခဲ့ရပြီး ကုန်းစင်းကို သတ်ဖြတ်လိုသော အကြည့်များဖြင့် စိုက်ကြည့်လိုက်တော့သည်။

ကုန်းမိသားစုဝင် အခြားသော လူအများလည်း ထိတ်လန့်တုန်လှုပ်သွားခဲ့ကြရပြီ ဖြစ်၏။ သူတို့အနေဖြင့် တကယ့်ကို ကြီးမားလှသော အမှားတစ်ခုကို ပြုလုပ်မိသွားခဲ့ပြီ ဖြစ်ကြောင်း ရိပ်မိလိုက်ကြတော့သည်။

တီကျွယ်တျန်းက အေးဆေးစွာ ထပ်မံ စကားဆိုလိုက်သည် "အစ်မဝမ်းကွဲ... အစ်မရဲ့ လက်ထဲမှာ နတ်ဘုရားအသီး တစ်လုံး ရှိနေသေးတယ် မဟုတ်ဘူးလား… ၎င်းကို စမ်းပြီး စားသုံးကြည့်လိုက်ပါဦး"

ထိုစကားကို ကြားရသည့်အခါ ကုန်းစင်း ဘာဖြစ်လို့လဲမသိ သူမ၏ စိတ်အလိုအတိုင်း ထိုနတ်ဘုရားအသီးကို တိုက်ရိုက် စားသုံးပစ်လိုက်မိတော့သည်။

သူမ၏ ခန္ဓာကိုယ်အတွင်းကနေ ပြင်းထန်လှသော အရှိန်အဝါများ ချက်ချင်း ထွက်ပေါ်လာခဲ့ရပြီ ဖြစ်၏။

သူမ၏ ကျင့်ကြံခြင်းအစွမ်းက သေသေချာချာ အောင်မြင်စွာ ချိုးဖျက်ဝင်ရောက်သွားခဲ့ပြီ ဖြစ်သည်။

တီကျွယ်တျန်း အသာအယာ ပြုံးလိုက်ကာ...

"အမေ... ကျွန်တော့်မှာ လုပ်ဆောင်စရာ ကိစ္စအချို့ ရှိနေသေးလို့ အရင်ဆုံး သွားခွင့်ပြုပါဦး"

"အဖိုး... အဖွား... ကျွန်တော် အချိန်ရတဲ့အခါ မိသားစုဆီကို နောက်တစ်ကြိမ် ထပ်ပြီး လာလည်ပါ့မယ်"

"ဘိုးဘေးကြီး" တီကျွယ်တျန်း စကားပြောဆိုလို့ ပြီးဆုံးသွားသည့်အခါခေါ်လိုက်သည်။

သူ၏ နောက်ကွယ်တွင် ဟင်းလင်းပြင်ဝင်ပေါက်တစ်ခု ချက်ချင်း ထွက်ပေါ်လာခဲ့ပြီ ဖြစ်၏။ တီကျွယ်တျန်း၏ ပုံရိပ်က ချက်ချင်း ပျောက်ကွယ်သွားခဲ့ရတော့သည်။

မိမိ၏ သားဖြစ်သူ ထွက်ခွာသွားတာကို စောင့်ကြည့်ပြီးနောက် ကုန်းရှင်းယွဲ့ မိမိ၏ မိဘနှစ်ပါးကို စိတ်ပျက်လှသော အကြည့်များဖြင့် လှမ်းကြည့်လိုက်မိတော့သည်။ ထိုလူကြီးနှစ်ဦးစလုံးက အစမှအဆုံးအထိ ဘာစကားမှ ဝင်ရောက်ပြောဆိုခြင်း မရှိခဲ့ကြချေ။

"အဖေ... အမေ... ကျွန်မလည်း မကြာခင်မှာ ပြန်ပါတော့မယ်"

"ဒါတွေက... ကျွန်မ မိသားစုအတွက် သီးသန့် ယူဆောင်လာခဲ့တဲ့ အရာအချို့ပါ" ကုန်းရှင်းယွဲ့ ယင်ယန် နတ်ဘုရားအသီး ဆယ်လုံးကို ထပ်မံ ထုတ်ယူလိုက်ပြန်သည်။

"ကုန်းမိသားစုရဲ့ မျိုးဆက်သစ်လူငယ်တွေရဲ့ ကျင့်ကြံခြင်းအဆင့်က ဘယ်လောက်တောင် ရှိနေလို့လဲဟင်။ သူမက အမြင့်ဆုံး ဖြစ်ရမယ် မဟုတ်လား... အဲ့ဒီ ယင်ယန် နတ်ဘုရားအသီးကို စားသုံးပြီးတာတောင်မှ အဆင့်၆ ကျင့်ကြံသူ န၀မအလွှာပဲရှိသေးတယ် "မိသားစုက တဖြည်းဖြည်းနဲ့ ဆုတ်ယုတ်လာခဲ့ပြီပဲ"

"ကျွန်မက သား တီကျွယ်တျန်းကို ဒီနေရာသို့ ခေါ်ဆောင်လာပြီး ကုန်းမိသားစုနဲ့ ပိုမို ရင်းနှီးစေချင်ရုံတင်ပါ"

"မျိုးဆက်သစ်လူငယ်တွေကြားထဲမှာ ကွာဟချက် ကြီးမားနေတာက ဘာကို ဆိုလိုသလဲဆိုတာ ရှင်တို့တွေ ကောင်းကောင်း သိကြမှာပါ"

"အခုတော့ ကျွန်မက သံသယဝင်တာကိုပါ ခံလိုက်ရလိမ့်မယ်လို့ လုံးဝ ထင်မှတ်မထားခဲ့မိဘူး"

"ရှင်တို့တွေ... မေ့လျော့နေကြပြီလား"

"တီမိသားစုဆိုတာ ဘယ်လိုမျိုး တည်ရှိမှုကြီးလဲဆိုတာကိုလေ"

"ယင်ယန် နတ်ဘုရားအသီးဆိုတဲ့ အရာမျိုးကို... တီကျွယ်တျန်း စားသုံးခြင်း မပြုတော့တာ နှစ်ပေါင်း ဘယ်လောက် ကြာမြင့်နေပြီလဲဆိုတာ ရှင်တို့ သိရဲ့လား"

"ဒါက... သူ့အတွက်တော့ အမှိုက်အသီးတစ်လုံးသာသာ ပဲရှိ‌ တော့တယ်"

"သူက ကျွန်မရဲ့ သား ဖြစ်ရုံတင်မကဘဲ... တီမိသားစုရဲ့ နတ်ဘုရားသားတော် ဖြစ်သလို နောင်တစ်ချိန်မှာ တီမိသားစုတစ်ခုလုံးကို ဦးဆောင်မယ့်သူလည်း ဖြစ်တယ်"

"အကယ်၍ တီကျွယ်တျန်းသာ ကြားကနေ တားဆီးမပေးခဲ့ဘူးဆိုရင် ကျွန်မကိုယ်တိုင်တောင် တီမိသားစုရဲ့ ဘိုးဘေးကြီးကို တားဆီးနိုင်လိမ့်မယ် မဟုတ်ဘူး"

"ရှင်တို့တွေလည်း စောစောတုန်းက အဲ့ဒီ အရှိန်အဝါကို ကောင်းကောင်း ခံစားမိကြမှာပါ" ကုန်းရှင်းယွဲ့ ဤစကားကို ပြောဆိုလိုက်ပြီးနောက် ထွက်ခွာသွားရန် ပြင်ဆင်လိုက်တော့သည်။

ထိုစဉ် လူအိုကြီးတစ်ဦး၏ ပုံရိပ်က ချက်ချင်း ထွက်ပေါ်လာခဲ့ပြီ ဖြစ်၏။ ထိုသူကို မြင်တွေ့လိုက်ရသည့် အခိုက်အတန့်မှာတင် အိမ်တော်သခင် ကုန်းကျိုလုံ တလေးတစားဖြင့် ချက်ချင်း ဦးညွှတ်ဂါရဝပြုလိုက်မိတော့သည်။

"ဘိုးဘေးကြီး"

"မြေးမလေး... မင်းက တကယ့်ကို စိတ်ရင်းစေတနာ ကောင်းမွန်လှပါတယ်။ ဒီတစ်ကြိမ်မှာ ကုန်းမိသားစုက တကယ်ပဲ မှားယွင်းသွားခဲ့ရပါတယ်"

ဂုန်းရှင်းယွဲ့က အေးစက်စွာ တုံ့ပြန်လိုက်သည် "မလိုပါဘူးရှင်... ကျွန်မမှာ လုပ်ဆောင်စရာ ကိစ္စတွေ ရှိနေသေးလို့ပါ… ဘိုးဘေးကြီး... အဖေ... အမေ... အားလုံးပဲ ကိုယ်စိတ်နှစ်ဖြာ ကျန်းမာကြပါစေ" ကုန်းရှင်းယွဲ့ ချက်ချင်း ထွက်ခွာသွားခဲ့တော့သည်။

ကုန်းမိသားစု၏ ဘိုးဘေးအိုကြီး သက်ပြင်းတစ်ချက်ကို အသာအယာ ချလိုက်မိရင်း ကုန်းကျိုလုံကို လှမ်း၍ အမိန့်ပေးလိုက်သည် "မင်း... နောက်ဘက်တောင်ဆီသို့ သွားပြီး သေသေချာချာ ကျင့်ကြံခြင်းကိုပဲ လုပ်ဆောင်တော့"

ထိုစကားကို ကြားရသည့်အခါ ကုန်းကျိုလုံ၏ မျက်နှာအမူအရာ လုံးဝ ပျက်ယွင်းသွားခဲ့ရပြီ ဖြစ်၏။ ဤစကားလုံးများက ဘာကို ဆိုလိုသလဲဆိုတာ သူ သေချာပေါက် ရိပ်မိလိုက်ခြင်းကြောင့်ပင်။

"ဒီနေ့ကစပြီး... ကုန်းမိသားစုကို ကုန်းယိလုံ က တိုက်ရိုက် လွှဲပြောင်းဦးဆောင်စေ" ဘိုးဘေးအိုကြီးက ထပ်မံ ကြေညာလိုက်သည်။

ကုန်းမိသားစုတွင် နဂါးဆယ်ကောင်ဟု ခေါ်ဆိုရမည့် ညီအစ်ကို တစ်ကျိပ် ရှိနေခဲ့တာ ဖြစ်ရာ... ကုန်းယိလုံက ထိုညီအစ်ကိုများထဲတွင် အကြီးဆုံး ဖြစ်ပြီး ဤစကားကို ကြားရသည့်အခါ သူ စိတ်ထဲကနေ အတိုင်းထက်အလွန် ဝမ်းမြောက်သွားခဲ့ရတော့သည်။

"ကုန်းရှင်းယွဲ့ဆိုတဲ့ အဲ့ဒီမြေးမလေး ပြန်လာတာက... ငါကိုယ်တိုင် သူမကို အတင်းအကျပ် အကူအညီတောင်းပြီး ခေါ်ဆောင်လာခဲ့လို့ ဖြစ်ရတာ။ မဟုတ်ရင် တီမိသားစုရဲ့ မြင့်မြတ်လှတဲ့ အိမ်တော်သခင်မကြီးက ကုန်းမိသားစုမှာ ဤမျှလောက်အထိ အချိန်အကြာကြီး နေထိုင်နေပါ့မလား"

(ဒီနေရာမှာ ကုန်း ဘိုးဘေးကြီးက တီမိသားစု ဘိုးဘေးအဆင့် နီးပါး ကျင့်ကြံဆင့် ရှိတယ် တဖြည်း နိမ့်ကျလာတဲ့ မိသားစု‌ပေါ့)

"ငါ ခေတ္တမျှ စိတ်လွင့်သွားတဲ့ အချိန်လေးအတွင်းမှာတင်... ဤကဲ့သို့သော ပြဿနာမျိုး ဖြစ်ပွားလိမ့်မယ်လို့ လုံးဝ ထင်မှတ်မထားခဲ့မိဘူး" ဘိုးဘေးအိုကြီး ထိုမျိုးဆက်သစ် လူငယ်များကို ကြည့်ကာ စိတ်ပျက်လက်ပျက်ဖြင့် ခေါင်းကို ခါယမ်းလိုက်မိပြီး ဘာစကားမှ ထပ်မံ မပြောကြားဘဲ ထွက်ခွာသွားခဲ့တော့သည်။

အခြားသော ကုန်းမိသားစုဝင် အချို့ကမူ ဘိုးဘေးအိုကြီး ထွက်ခွာသွားတာကို စောင့်ကြည့်ရင်း သူတို့၏ မျက်နှာထက်တွင် ဝမ်းသာအားရ ဖြစ်မှုများ ရှိနေခဲ့သော်လည်း အချို့ကမူ တကယ့်ကို စိတ်ပျက်နေခဲ့ကြဆဲ ဖြစ်၏။

ဒီအချိန်မှာ ကုန်းစင်း သတိဝင်လာခဲ့မိရင်း မိမိ၏ အဖိုးကို လှမ်းကြည့်လိုက်ကာ တစ်စုံတစ်ခုကို ပြောဆိုချင်နေခဲ့သည်။

သူမ၏ အဖိုး၌ သားတစ်ဦးနှင့် သမီးတစ်ဦးသာ ရှိခဲ့တာ ဖြစ်ပြီး သမီးဖြစ်သူက ကုန်းရှင်းယွဲ့ ဖြစ်သလို သားဖြစ်သူမှာမူ ကုန်းစင်း၏ ဖခင် ဖြစ်သော ကုန်းရုကျွေ ဖြစ်သော်လည်း သူက မိသားစု အတွက် ကွယ်လွန်သွားခဲ့ပြီ ဖြစ်၏။

ထို့ကြောင့်လည်း အဖိုးဖြစ်သူက သူမအပေါ် အပြစ်မကင်းသလိုမျိုး ခံစားချက်ဖြင့် သူမ အလိုရှိသမျှ အရာအားလုံးကို တောက်လျှောက် ဖြည့်ဆည်းပေးခဲ့ခြင်း ဖြစ်ပေသည်။

"ဟူး..." ကုန်းကျိုလုံ မိမိ၏ မြေးမလေးကို တစ်ချက် လှမ်းကြည့်လိုက်မိပြီးနောက်ပိုင်းမှာတော့... ဘာစကားမှ ထပ်မံ မပြောကြားဘဲ သက်ပြင်းတစ်ချက် ချလိုက်မိရင်း လှည့်ထွက်သွားခဲ့တော့သည်။ သူ တစ်စုံတစ်ခုကို ပြောဆိုချင်နေခဲ့သော်လည်း ဘာပြောရမှန်း မသိအောင် ဖြစ်နေခဲ့ရခြင်းပင်။

ကုန်းစင်း မိမိ၏ အဖိုး၏ မျက်နှာအမူအရာကို ကြည့်ရှုလိုက်မိရင်း သူမ၏ ရင်ထဲတွင် နောင်တတရားများ ပြင်းထန်စွာ ထွက်ပေါ်လာခဲ့ရတော့သည်။ မိမိအနေဖြင့် စောစောတုန်းက မေးခွန်းတစ်ခုကို မတော်တဆ မေးမြန်းမိလိုက်ရုံမျှဖြင့် ဤမျှလောက်အထိ ကြီးမားလှသော ကိစ္စရပ်ကြီးတစ်ခု ဖြစ်ပွားလာလိမ့်မည်ဟု သူမ လုံးဝ ထင်မှတ်မထားခဲ့မိချေ။

ကုန်းစင်းတစ်ယောက် တကယ့်ကို မတရားသလိုမျိုး ခံပြင်းမှုကို ခံစားလိုက်ရတော့သည်။

ကုန်းယိလုံ ရှေ့သို့ လှမ်းလျှောက်လာခဲ့ရင်း ကုန်းစင်းကို တိုက်ရိုက် ကြေညာလိုက်တော့သည် "ကုန်းစင်း... ကျောက်ဝူကျီက တကယ့်ကို ကြီးမားလှတဲ့ အမှားတစ်ခုကို ပြုလုပ်ခဲ့တာ ဖြစ်လို့... သူ ကုန်းမိသားစုရဲ့ ပင်မအိမ်တော်ကနေ ချက်ချင်း ထွက်ခွာသွားရမယ်"

"ဘာအကြောင်းပြချက်နဲ့လဲ" ကုန်းစင်းက ဒေါသတကြီး ပြန်လည်မေးမြန်းလိုက်သည်။

"ငါက အခု ကုန်းမိသားစုရဲ့ အိမ်တော်သခင် အသစ် ဖြစ်နေလို့ပဲ... မင်းရဲ့ အဖိုးက အိမ်တော်သခင် မဟုတ်တော့ဘူးလေ"

"ဒါ့အပြင်... မင်းမှာ တကယ်ပဲ ဦးနှောက် မရှိတာလားဟင်"

"မင်း မမြင်ဘူးလား... တီမိသားစုက အခု လုံးဝ ဒေါသထွက်သွားခဲ့ပြီလေ။ မင်းရဲ့ အဖိုးကလည်း ဒီကိစ္စကြောင့်မို့လို့ ပတ်သက်ပြီး ရာထူးကနေ ဖယ်ရှားခြင်း ခံလိုက်ရတာ ဖြစ်တယ် ဒါက တီမိသားစုကို ငါတို့ မိသားစုရဲ့ သဘောထားကို ထုတ်ဖော်ပြသလိုက်တာပဲ မဟုတ်လား"

"ဒီနေရာကို မင်းရဲ့ အဖိုးကိုယ်တိုင် လာခဲ့ရင်တောင်မှ ဘာမှ ပြောနိုင်မှာ မဟုတ်ဘူး" ကုန်းယိလုံက ဤအကြောင်းအရာများကို တိုက်ရိုက် ပြတ်သားစွာ ပြောဆိုလိုက်ခြင်း ဖြစ်၏။

ကုန်းစင်း၏ မျက်နှာ ချက်ချင်း ဖြူလျော်သွားခဲ့ရပြီ ဖြစ်သည်။ သူမ အဖိုးဖြစ်သူ ထွက်ခွာသွားစဉ်က မိမိကို ကြည့်ရှုသွားခဲ့သော အကြည့်များကို ရုတ်တရက် သတိရသွားခဲ့မိတော့၏။

သူမ၏ အဖိုးသည်လည်း သူမ အစောပိုင်းက မှားယွင်းသွားခဲ့ကြောင်း သိရှိထားသော်လည်း သူမ၏ ဘက်ကနေ တောက်လျှောက် ရပ်တည်ပေးခဲ့ခြင်း ဖြစ်ရမည်။

ကျောက်ဝူကျီကမူ ယခင်က မကျေမနပ် ဖြစ်မှုများဖြင့် ပြည့်နှက်နေခဲ့သော်လည်း မိမိအနေဖြင့် ကုန်းမိသားစု၏ ပင်မအိမ်တော်ကနေ ထွက်ခွာသွားရမည် ဖြစ်ကြောင်း ကြားရသည့် အခိုက်အတန့်မှာတော့... သူ၏ ဝိညာဉ်အလွှာတစ်ခုလုံး ဝမ်းသာအားရ ဖြစ်လျက် ခုန်ပေါက်သွားခဲ့ရပြီ ဖြစ်၏။

သူသည် မိမိ၏ အခြေအနေက 'မြက်ပင်ကို တမင် စိုက်ပျိုးခဲ့သော်လည်း ရှင်သန်ခြင်း မရှိဘဲ... မရည်ရွယ်ဘဲ စိုက်ပျိုးမိသော အရာကမှ အရိပ်အာဝါသ ကောင်းမွန်လှသော သစ်ပင်ကြီးတစ်ပင်အဖြစ် ပြောင်းလဲသွားခဲ့ရခြင်းမျိုး ဖြစ်သည်' ဟု မမျှော်လင့်ဘဲ အောင်မြင်သွားခြင်းအတွက် ဝမ်းသာအားရ ဖြစ်နေမိတော့သည်။

တစ်နာရီခန့် ကြာမြင့်ပြီးနောက်...

ကုန်းစင်း ဝေးကွာလှသော ပင်မခန်းမဆောင်ကြီးကို လှမ်းကြည့်လိုက်မိရင်း သက်ပြင်းတစ်ချက် ချလိုက်မိတော့သည်။

ကျောက်ဝူကျီက ဘေးကနေ နှစ်သိမ့်စကား ဆိုလိုက်သည် "ကုန်းစင်း... စိတ်အေးအေးထားပါ… ငါ မကြာခင်မှာတင် မင်းကို ဒီနေရာကို ပြန်ခေါ်လာနိုင်မှာပါ။ အဲ့ဒီအချိန်ကျရင် ကုန်းမိသားစုက သူတို့ အခု ချမှတ်ခဲ့တဲ့ ဆုံးဖြတ်ချက်အတွက် သေချာပေါက် နောင်တရစေရမယ်"

ကုန်းစင်း ကျောက်ဝူကျီကို တစ်ချက် လှမ်းကြည့်လိုက်မိပြီးနောက်ပိုင်းမှာတော့ ဘာစကားမှ မပြောဘဲ မိမိ၏ ခေါင်းကိုသာ အသာအယာ ခါယမ်းပြလိုက်တော့သည်။ ကျောက်ဝူကျီက ကုန်းစင်း မိမိ၏ စကားကို အ‌ လေးမထားဘူးဆိုတာ ရိပ်မိလိုက်သော်လည်း သူ ဘာမှ ထပ်မံ ရှင်းလင်းပြောပြခြင်း မပြုခဲ့ချေ။

ကုန်းစင်းက လှမ်းမေးလိုက်သည် "မင်း... တော်တော်လေး ပျော်ရွှင်နေတဲ့ ပုံပဲနော်"

"အင်း... ငါ့စိတ်ထဲမှာ တော်တော်လေး ပေါ့ပါးသွားသလို ခံစားရလို့ပါ"

"ကုန်းမိသားစုက ရှင့်ကို အဲ့ဒီလောက်တောင် စိတ်ကျဉ်းကျပ်အောင် လုပ်ဆောင်ခဲ့လို့လား"

"အဲ့ဒီလိုတော့ မဟုတ်ပါဘူး... ငါက ဒီနေရာနဲ့ လုံးဝ အံဝင်ခွင်ကျ မဖြစ်ဘူးလို့ ခံစားရရုံတင်ပါ"

ကုန်းစင်းက ပြန်လည်မေးမြန်းလိုက်သည် "ဒါနဲ့... အဲ့ဒီ ယင်ယန် နတ်ဘုရားအသီးက တကယ်ပဲ ပြဿနာ ရှိနေခဲ့တာ သေချာလား"

"အင်း... ငါ သေချာပေါက် အာမခံရဲတယ် သူ ဘာတွေ ကြံစည်နေသလဲဆိုတာ ငါ အတိအကျ မသိသေးပေမယ့်... ပြဿနာ ရှိနေတာကတော့ သေချာတယ်" ကျောက်ဝူကျီက ပြတ်သားစွာ ဖြေလိုက်သည်။