အခန်း ၄၄ - ငါ့သားက မင်းရဲ့ ယင်ယန် နတ်ဘုရားအသီးကို လဲလှယ်ပစ်လိုက်တယ်လို့ မင်း သံသယဝင်နေတာလား

ကျောက်ဝူကျီ၏ လက်ရှိအစီအစဉ်သည် အိမ်တော်သခင် ကုန်းကျိုလုံ၏ မျက်စိထဲတွင် သူ၏ ပုံရိပ်ကို ထိခိုက်စေနိုင်သည်ဆိုစေဦးတော့... အမှန်တကယ်၌မူ သူ ကုန်းမိသားစုသို့ ရောက်ရှိလာကတည်းက သူ့အပေါ် ကောင်းမွန်သော အထင်အမြင်မျိုး ရှိမနေခဲ့ကြချေ။

အကယ်၍ တီကျွယ်တျန်းသာ ဤအချက်ကို သိရှိသွားခဲ့လျှင် သူ၏ ဂုဏ်ဒြပ်အရ ကျောက်ဝူကျီကို ပိုမို၍ပင် အထင်သေးသွားပေလိမ့်မည်။

သို့သော်လည်း ကျောက်ဝူကျီကိုယ်တိုင် မသိလိုက်ဘဲ သူ၏ အစီအစဉ်သည် သူ့အတွက် အကျိုးကျေးဇူးအချို့ကို မမျှော်လင့်ဘဲ ဆောင်ကြဉ်းပေးသွားခဲ့ပြီ ဖြစ်၏။ ဤနည်းဖြင့် သူ၏ စီမံကိန်းသည် အောင်မြင်စွာ ပြီးဆုံးသွားနိုင်ပေလိမ့်မည်။

၎င်းကို တွေးမိရင်း ကျောက်ဝူကျီ စိတ်ထဲကနေ မကျေမနပ် ဖြစ်နေမိသော်လည်း ကုန်းစင်း၏ မျက်ဝန်းတွေကို ကြည့်လိုက်သည့် အခိုက်အတန့်မှာတော့ နူးညံ့ပျော့ပြောင်းသော အမူအရာကို ချက်ချင်း ပြောင်းလဲပြလိုက်တော့တယ်။

ကုန်းစင်းလည်း ကျောက်ဝူကျီ၏ ပုံစံကြောင့် ရင်ထဲတွင် ပြင်းထန်စွာ နာကျင်မှုကို ခံစားလိုက်ရပြီး စိတ်ထဲကနေ တွေးတောလိုက်မိတယ် - 'ဒါဆို... ငါ့ရဲ့ ဝမ်းကွဲမောင်လေးက တကယ်ပဲ တစ်စုံတစ်ခုကို လုပ်ဆောင်ခဲ့တာများလား...'

ကုန်းစင်းက စိုးရိမ်တကြီး မေးလိုက်တယ် "ကျောက်ဝူကျီ... ဒါနဲ့ ဒီနေ့ ငါ့မောင်လေးက မင်းကို ဘာတွေ ပြောခဲ့လို့လဲဟင်"

ကျောက်ဝူကျီက ဟန်ဆောင်ပြီး ပြန်ပြောတယ် "သူက ငါ့ရဲ့ နောက်ခံဇာစ်မြစ် အကြောင်းအရာတွေကို လာပြီး မေးမြန်းနေတာလေ"

"နောက်ခံ ဟုတ်လား... သူက အဲ့ဒါကို ဘာဖြစ်လို့ စူးစမ်းချင်နေရတာလဲ.. အဖိုးက သူ့ကို မပြောပြထားဘူးလား"

"ငါလည်း မသိဘူး… သူက ငါ့ကို နားလည်ရခက်တဲ့ စကားအချို့ လာပြောသေးတယ်... ငါ့ရဲ့ ဝိညာဉ်အလွှာက ပေါင်းစည်းနေတာလား…သို့မဟုတ် ခန္ဓာကိုယ်ကို လုယူထားတာလား ဆိုပြီးတော့လေ…သူ ဘာကို အဓိက ဆိုလိုချင်တာလဲဆိုတာ ငါ တကယ်ပဲ မသိပါဘူး"

ကုန်းစင်း ထိုစကားကို ကြားရသည့်အခါ ဘာပြန်ပြောရမှန်း မသိအောင် ဖြစ်သွားခဲ့ရပြီ ဖြစ်၏။ အသုံးမကျသော လူတစ်ယောက်၏ ခန္ဓာကိုယ်ကို လာရောက်လုယူခြင်းက သေဆုံးသွားတာထက်ပင် ပိုမို ဆိုးရွားလှသည် မဟုတ်ပါလား။

ကျောက်ဝူကျီ၏ မျက်ဝန်းထဲမှာ ဇဝေဇဝါ ဖြစ်နေဆဲ ပုံစံမျိုးကို မြင်တွေ့လိုက်ရသည့်အခါ... ကုန်းစင်း သက်ပြင်းတစ်ချက်ကို အသာအယာ ချလိုက်မိတော့တယ်။ ကြည့်ရတာ သူမ၏ ဝမ်းကွဲမောင်လေး (တီကျွယ်တျန်း) မှာ သံသယတွေ အမြောက်အမြား ရှိနေခဲ့ပုံရ၏။

ကျောက်ဝူကျီက မိမိကိုယ်ကိုယ် လှောင်ပြောင်သလိုမျိုး ထပ်မံ ပြောကြားလိုက်တယ် "ဒါမှမဟုတ်... ငါကပဲ လူငယ်တစ်ယောက်နဲ့မတူဘဲ အလွန်အမင်း ရင့်ကျက်လွန်းနေလို့ ဖြစ်ရမယ်"

ထိုစကားကြောင့် ကုန်းစင်း ပိုမို၍ စိတ်မကောင်း ဖြစ်သွားခဲ့ရပြန်၏။

သို့သော်လည်း သူမ ဘာစကားမှ အများကြီး ထပ်မံ မပြောကြားခဲ့တော့ချေ။ ဘာပဲဖြစ်ဖြစ် ကျောက်ဝူကျီက ကျင့်ကြံခြင်းကို မလုပ်ဆောင်နိုင်တာကြောင့် လူအများ၏ ကဲ့ရဲ့ရှုတ်ချမှုတွေနဲ့ စိတ်ပိုင်းဆိုင်ရာ နှိပ်စက်မှုတွေကို တောက်လျှောက် ရင်ဆိုင်ခဲ့ရတာ ဖြစ်ရာ... သူက သာမန်ထက် ပိုမို ရင့်ကျက်နေခြင်းက ဆန်းကြယ်လှသော ကိစ္စရပ်တစ်ခု မဟုတ်ပါချေ။

ထို့နောက် သူတို့နှစ်ဦးစလုံး အပြင်ဘက်သို့ လှမ်းထွက်လာခဲ့ကြတော့တယ်။

ဤအခိုက်အတန့်မှာတင် တီကျွယ်တျန်း၏ အသိစိတ်ထဲ၌ စနစ်၏ သတိပေးသံက ရုတ်တရက် ထွက်ပေါ်လာခဲ့ပြီ ဖြစ်၏။

【 ကံကြမ္မာသားတော်၏ အခွင့်အရေးကြီးကို ကြားဖြတ်နှောင့်ယှက်ခြင်း အောင်မြင်ပါသည်။ ကံကြမ္မာသားတော်၏ ကံကြမ္မာတန်ဖိုး ငါးရာ လျော့နည်းသွားခဲ့ပြီ ဖြစ်ပြီး... ဗီလိန်အမှတ်တန်ဖိုး ငါးရာ တိုးပွားလာခဲ့ပြီ ဖြစ်သည် 】

ကြည့်ရတာ ထိုယင်ယန် နတ်ဘုရားအသီးက ကံကြမ္မာသားတော်အတွက် တကယ့်ကို ကြီးမားလှသော အထောက်အကူ ဖြစ်စေမည့်အရာ ဖြစ်ရမယ်။

တီကျွယ်တျန်း အပြင်ဘက်သို့ ရောက်ရှိလာချိန်တွင် အပြင်၌ စောင့်ဆိုင်းနေကြသော လူအများကို ခေါင်းအသာအယာ ငြိမ့်ပြလိုက်ပြီး ဘာစကားမှ ထပ်မံ မပြောကြားခဲ့ချေ။

"သား... အတွင်းမှာ ဘယ်လိုလဲ" ကုန်းရှင်းယွဲ့က သူမ၏ အဖိုးတန် သားဖြစ်သူကို ကြည့်ကာ လှမ်း၍ မေးမြန်းလိုက်တယ်။

"မဆိုးပါဘူး အမေ" တီကျွယ်တျန်းက ပြန်လည် တုံ့ပြန်လိုက်၏။

ထိုစကားကို ကြားရတဲ့အခါ ကုန်းရှင်းယွဲ့၏ မျက်နှာထက်တွင် ဝမ်းသာအားရ ဖြစ်မှုတွေ ချက်ချင်း ထွက်ပေါ်လာခဲ့ရသလို... အိမ်တော်သခင် ကုန်းကျိုလုံကလည်း ခေါင်းကို အသာအယာ ငြိမ့်ပြလိုက်တော့တယ်။

ကုန်းမိသားစုဝင်တွေကတော့ ထိုလူငယ်နှစ်ဦး ပြန်လည်ထွက်ပေါ်လာတာကို မြင်တွေ့လိုက်ရသည့် အခိုက်အတန့်မှာတင် သူတို့၏ မျက်နှာအမူအရာတွေ ချက်ချင်း ပြောင်းလဲသွားခဲ့ကြရပြီ ဖြစ်၏။ အထူးသဖြင့် သူတို့ ကျောက်ဝူကျီကို ကြည့်ရှုနေကြသော အကြည့်တွေထဲမှာ ပြင်းထန်လှသော အထင်အမြင်သေးမှုတွေ ပါဝင်နေခဲ့ခြင်းပင်။

ကုန်းကျိုလုံကိုယ်တိုင်လည်း မျက်မှောင်ကြုတ်လိုက်မိတော့တယ်။

ပင်မခန်းမဆောင်ကြီးအတွင်းရှိ လူအများ၏ မျက်နှာအမူအရာ အပြောင်းအလဲတွေကို မြင်တွေ့လိုက်ရသည့်အခါ... ကျောက်ဝူကျီ စိတ်ထဲကနေ တိတ်တဆိတ် ဝမ်းသာသွားခဲ့ရပြီ ဖြစ်၏။ ကြည့်ရတာ မိမိ ကြိုတင်ပြင်ဆင်ထားခဲ့သော အရာတွေက မဆိုးဘူးလို့ ပြောရပေလိမ့်မည်။

"အသုံးမကျတဲ့သူကတော့... အမြဲတမ်း အသုံးမကျတဲ့သူပဲ ဖြစ်နေမှာပါပဲ"

"တကယ့်ကို အသုံးမဝင်တဲ့ကောင်ပဲ... ဘာမှ တိုးတက်လာတာမျိုး မရှိဘူး။ သူက ခန္ဓာကိုယ် သန့်စင်ခြင်း အဆင့် ပထမအလွှာကိုပဲ အနိုင်နိုင် ချိုးဖျက်နိုင်ခဲ့လိမ့်မယ်လို့ ငါ လုံးဝ ထင်မှတ်မထားခဲ့ဘူး"

"မိသားစုက ဘာဖြစ်လို့ အဲ့ဒီ ယင်ယန် နတ်ဘုရားအသီးကို သူ့လိုကောင်ကို ပေးအပ်လိုက်သလဲဆိုတာ ငါ တကယ်ပဲ စဉ်းစားလို့မရတော့ဘူး"

"ငါ့စိတ်ထဲမှာတော့... အဲ့ဒီနတ်ဘုရားအသီးကို သူ့လိုကောင်ကို ကျွေးမယ့်အစား ဝက်တစ်ကောင်ကို ကျွေးလိုက်တာကမှ ပိုပြီး အကျိုးရှိဦးမယ်လို့ ခံစားရတယ်"

ကုန်းမိသားစုဝင် အခြားသော လူငယ်တွေက ကျောက်ဝူကျီကို ကြည့်ရှုရင်း မနာလိုဝန်တိုမှုတွေ၊ လှောင်ပြောင်သရော်မှုတွေဖြင့် ပြိုင်တူ စကားဆိုလိုက်ကြခြင်း ဖြစ်၏။

"ဟူး..." ကုန်းကျိုလုံ သက်ပြင်းတစ်ချက်ကို အသာအယာ ချလိုက်မိရင်း သူ၏ စိတ်ထဲက မျှော်လင့်ချက်တွေ လုံးဝ ပျောက်ကွယ်သွားခဲ့ရပြီ ဖြစ်တယ်။ ကြည့်ရတာ မိမိအနေဖြင့် ယခင်က ကိစ္စရပ်တွေကို အလွန်အမင်း အတွေးလွန်နေခဲ့မိပုံရ၏။

ဤအချိန်မှာတင် ကုန်းစင်းက ရှေ့သို့ လှမ်းလျှောက်လာခဲ့ရင်း... "အဖိုး... ဒီမှာ ယင်ယန် နတ်ဘုရားအသီး တစ်လုံး ကျန်ရှိနေသေးတယ်ရှင်... ကျေးဇူးပြုပြီး ကြည့်ရှုပေးပါဦး"

ထိုစကားကြောင့် ကုန်းကျိုလုံ ခေတ္တမျှ ကြောင်အသွားခဲ့ရပြီးမှ စိတ်ထဲကနေ ဒေါသတကြီး ရေရွတ်လိုက်မိတော့တယ် - 'ငါ့ရဲ့ မြေးမလေးက တကယ့်ကို လူအတစ်ယောက်များ ဖြစ်နေတာလား...'

အခြားသော ကုန်းမိသားစုဝင်တွေကလည်း ထိုကျန်ရှိနေသေးသော ယင်ယန် နတ်ဘုရားအသီးကို မြင်တွေ့လိုက်ရသည့်အခါ မှင်တက်သွားခဲ့ကြရပြီး သူတို့၏ မျက်ဝန်းထဲမှာ လောဘရမ္မက် အရိပ်အယောင်တွေဖြင့် ချက်ချင်း ပြည့်နှက်သွားခဲ့ရတော့တယ်။

"အိမ်တော်သခင်... သူတို့ဇနီးမောင်နှံက အသီးတစ်လုံးစီ စားသုံးခဲ့ကြပြီဆိုတော့... လက်ရှိ ကျန်ရှိနေတဲ့ ယင်ယန် နတ်ဘုရားအသီးကို ဘယ်လိုမျိုး ပြန်လည်ခွဲဝေပေးမှာလဲရှင်"

"မှန်ပါတယ်... သူ့လိုကောင်ကို အခွင့်အရေးတွေ ဘယ်လောက်ပဲ ပေးအပ်ပါစေဦးတော့ လုံးဝ အသုံးဝင်မှာ မဟုတ်ပါဘူး။ နတ်ဘုရားအသီးတစ်လုံးလုံးကို စားသုံးပြီးတာတောင်မှ ခန္ဓာကိုယ်သန့်စင်ခြင်း အဆင့် ပထမအလွှာပဲ ရှိသေးတယ်ဆိုတော့... တကယ့်ကို အသုံးမကျတဲ့သူတွေထဲမှာမှ ထိပ်ဆုံးက အသုံးမကျတဲ့သူပဲ ဖြစ်ရမယ်"

ကျောက်ဝူကျီ၏ မျက်နှာအမူအရာ တကယ့်ကို ဆိုးရွားသွားခဲ့ရပြီ ဖြစ်၏။ အဆုံး၌မူ သူသည် ထိုယင်ယန် နတ်ဘုရားအသီးကို လုံးဝ စားသုံးခဲ့ရခြင်း မရှိခြင်းကြောင့်ပင်။

ကုန်းကျိုလုံက မြေးမဖြစ်သူထံသို့ တိတ်တဆိတ် အသံလွှင့်ပြီး မေးမြန်းလိုက်တယ် "မြေးမလေး... မင်း ဘာတွေ တွေးတောနေတာလဲ… မင်း ဒီနတ်ဘုရားအသီးကို မစားခဲ့ဘူးလားဟင်"

ထိုအသံလွှင့်ချက်ကို ကြားရသည့်အခါ ကုန်းစင်း ခေတ္တမျှ ကြောင်အသွားခဲ့ရပြီးမှ ဘာစကားမှ ထပ်မံ မပြောကြားဘဲ မိမိ၏ ခေါင်းကိုသာ အသာအယာ ခါယမ်းပြလိုက်တော့တယ်။

ပင်မခန်းမဆောင်ကြီးအတွင်းရှိ လူအများက ကျောက်ဝူကျီကို တောက်လျှောက် လှောင်ပြောင်သရော်နေကြတာကို စောင့်ကြည့်ရင်း... ကုန်းစင်း၏ မျက်နှာအမူအရာ ချက်ချင်း ပြောင်းလဲသွားခဲ့ရပြီ ဖြစ်၏။

သူမ၏ ခန္ဓာကိုယ်အတွင်းကနေ ပြင်းထန်လှသော အရှိန်အဝါတွေ ချက်ချင်း ထွက်ပေါ်လာခဲ့ရတော့တယ်။ ထို့နောက် သူမ၏ မျက်ဝန်းထဲမှာပါ ပြင်းထန်လှသော ခြိမ်းခြောက်မှု အရိပ်အယောင်တွေ ထွက်ပေါ်လာခဲ့ရပြီ ဖြစ်၏။

ခန်းမဆောင်အတွင်းရှိ ကျန်ရှိနေသော လူအများလည်း ချက်ချင်း တိတ်ဆိတ်သွားခဲ့ကြရတော့တယ်။

သို့သော်လည်း အခြားသော လူငယ်အချို့ကတော့ ကုန်းစင်းကို ရန်စလိုသော အကြည့်မျိုးဖြင့် စိုက်ကြည့်နေခဲ့ကြဆဲ ဖြစ်၏။ အကယ်၍ ကုန်းစင်း၏ အဖိုးသည် အိမ်တော်သခင် ဖြစ်မနေခဲ့ဘဲ သူတို့၏ အဖိုးတွေကလည်း အကြီးအကဲတွေ ဖြစ်မနေခဲ့ကြဘူးဆိုလျှင်... သူတို့ကိုယ်တိုင်လည်း ဤအခွင့်အရေးကို သေချာပေါက် ရရှိနိုင်လိမ့်မည် မဟုတ်ပါလား။

ဘာပဲဖြစ်ဖြစ် အခုဆိုရင် နတ်ဘုရားအသီးက တစ်လုံးပဲ ကျန်ရှိတော့တာ ဖြစ်ရာ... သူတို့အနေဖြင့်လည်း ဝင်ရောက်ယှဉ်ပြိုင်ချင်နေခဲ့ကြခြင်း ဖြစ်ပေသည်။

ထိုလူတွေ၏ အကြည့်တွေကို စူးစမ်းလိုက်မိရင်း ကုန်းစင်း သက်ပြင်းတစ်ချက်ကို အသာအယာ ချလိုက်မိတော့တယ်။ ထို့နောက် သူမသည် မိမိ၏ မျက်လုံးတွေကို မှိတ်ကာ တွေးတောဆင်ခြင်မှုတွေ ပြည့်နှက်နေသော တီကျွယ်တျန်းကို လှမ်းကြည့်လိုက်မိတော့၏။ သူမအနေဖြင့် တီကျွယ်တျန်း၏ စစ်မှန်သော အတွေးအမြင်တွေကို ဘယ်လိုမှ ဖောက်ထွင်းမမြင်နိုင်ဘဲ ဖြစ်နေခဲ့ရသည်။

အိမ်တော်သခင် ကုန်းကျိုလုံ၏ မျက်နှာအမူအရာလည်း အနည်းငယ် ပြောင်းလဲသွားခဲ့ရပြီ ဖြစ်၏။ မိမိ၏ မြေးမလေးက မြေးဖြစ်သူ တီကျွယ်တျန်းအပေါ်ကိုများ သံယောဇဉ်တွေ ရှိနေတာများလား...။ ဤကဲ့သို့သော ကိစ္စရပ်မျိုးကိုတော့ သူ ဘယ်လိုနည်းနဲ့မှ ခွင့်ပြုနိုင်လိမ့်မည် မဟုတ်ချေ။

"ကုန်းစင်း... မင်း တစ်စုံတစ်ခုကို ပြောချင်လို့လား" ကုန်းကျိုလုံက မေးလိုက်တယ်။

ကုန်းစင်း တီကျွယ်တျန်းကို စိုက်ကြည့်လိုက်မိရင်း... တကယ်တမ်းကျတော့ သူမ ဤမေးခွန်းကို မမေးမြန်းချင်ခဲ့သော်လည်း ဘာဖြစ်လို့လဲမသိ သူမ၏ နှုတ်ကနေ မတော်တဆ ထွက်ပေါ်သွားခဲ့ရတော့တယ် - "မောင်လေး... အစ်မ တစ်ခုလောက် မေးပါရစေဦး…မောင်လေး အသီးတစ်လုံးပဲ ယူခဲ့တာ သေချာရဲ့လား... တခြား ဘာကိစ္စရပ်ကိုမှ လုပ်ဆောင်ခဲ့ခြင်း မရှိဘူးမလား"

ထိုစကားကို ကြားရသည့် အခိုက်အတန့်မှာတင်... ပင်မခန်းမဆောင်ကြီးတစ်ခုလုံး ချက်ချင်း တိတ်ဆိတ်ခြောက်ကပ်သွားခဲ့ရပြီ ဖြစ်၏။ ခန်းမဆောင်အတွင်းရှိ ကျန်ရှိနေသော လူအများလည်း တီကျွယ်တျန်းကို လှမ်းကြည့်လိုက်မိကြရင်း သူတို့၏ နှုတ်ခမ်းတွေကို တင်းကြပ်စွာ ပိတ်ထားလိုက်ကြတော့တယ်။

ကျောက်ဝူကျီကတော့ စိတ်ထဲကနေ အေးစက်စွာ လှောင်ပြုံးပြုံးလိုက်မိတော့၏။

"ကုန်းစင်း... မင်း ဘာတွေ လျှောက်ပြောနေတာလဲ" ကုန်းကျိုလုံ၏ မျက်နှာအမူအရာ ချက်ချင်း ပျက်ယွင်းသွားခဲ့ရပြီ ဖြစ်တယ်။

ကုန်းရှင်းယွဲ့ကလည်း ဘေးကနေ အေးစက်စွာ ပြုံးလိုက်မိရင်း...

"အတွင်းထဲမှာ ဘာတွေ ဖြစ်ပျက်ခဲ့သလဲဆိုတာ ငါ အတိအကျ မသိပေမယ့်... ငါ့သားက အသီးသုံးလုံးစလုံးကို ယူခဲ့ရင်တောင်မှ ဘာဖြစ်လဲဟင်" ကုန်းရှင်းယွဲ့၏ အရှိန်အဝါတွေ လုံးဝ ပြောင်းလဲသွားခဲ့ရပြီ ဖြစ်ပြီး... သူမ၏ စကားလုံးတစ်ခွန်းတည်းဖြင့် လူအများ၏ အသက်ရှင်ခြင်းနှင့် သေဆုံးခြင်းကို အလွယ်တကူ ဆုံးဖြတ်ပေးနိုင်မည့် မြင့်မြတ်လှသော ဘုရင်မကြီးတစ်ပါးကဲ့သို့ ပြောင်းလဲသွားခဲ့ခြင်း ဖြစ်၏။

ကုန်းကျိုလုံ၏ မျက်နှာအမူအရာ တကယ့်ကို ဆိုးရွားသွားခဲ့ရပြီ ဖြစ်တယ်။

"ကျွန်မ..." ကုန်းစင်းလည်း မိမိ၏ အဒေါ်ဖြစ်သူမှာ ယခင်က ဤမျှလောက်အထိ နူးညံ့ပျော့ပြောင်းပြီး ချဉ်းကပ်ရလွယ်ကူခဲ့သော်လည်း အခုအချိန်မှာ ဤမျှလောက်အထိ အရှိန်အဝါတွေ ပြင်းထန်စွာ ပြောင်းလဲသွားလိမ့်မည်ဟု လုံးဝ ထင်မှတ်မထားခဲ့မိချေ။

တီကျွယ်တျန်း မိမိ၏ မိခင်ဖြစ်သူကို လှမ်းကြည့်လိုက်မိရင်း နူးညံ့လှသော အပြုံးတစ်ခုကို ဖော်ပြလိုက်ကာ...

"အမေ... စိတ်မဆိုးပါနဲ့ဦး"

"အစ်မဝမ်းကွဲက ဒီလိုမျိုး မေးခွန်းထုတ်လာတယ်ဆိုမှတော့... သူမ တစ်စုံတစ်ခုကို သေချာပေါက် သံသယဝင်နေလို့ ဖြစ်ရမယ်"

"အတွင်းထဲမှာ နတ်ဘုရားအသီးက သုံးလုံး ရှိတာပါ…ကျွန်တော်က တစ်လုံး စားသုံးခဲ့ပြီးပြီ ဖြစ်သလို... ဒီသခင်လေးကျောက်ကလည်း တစ်လုံး စားသုံးခဲ့ပြီးပြီ ဖြစ်တာကြောင့်... အစ်မဝမ်းကွဲအနေနဲ့ ဒီလိုမေးခွန်းမျိုး မေးမြန်းလာတာက ဘာကို ဆိုလိုချင်တာလဲဆိုတာ ငါ တကယ်ပဲ သိချင်မိသွားပြီ" တီကျွယ်တျန်းက အေးဆေးတည်ငြိမ်စွာဖြင့် ပြန်လည် တုံ့ပြန်လိုက်တော့တယ်။

လူတိုင်း ဇဝေဇဝါ ဖြစ်သွားခဲ့ကြရပြီ ဖြစ်၏။

"ကုန်းစင်း... တကယ်တော့ အတွင်းထဲမှာ ဘာတွေ ဖြစ်ပျက်ခဲ့လို့လဲဟင်" ကုန်းကျိုလုံက မေးမြန်းလိုက်တယ်။

"ဒီကိစ္စကို ကျုပ်ကိုယ်တိုင်ပဲ ရှင်းပြပါရစေ" ကုန်းစင်းတစ်ယောက် အရှိန်အဝါတွေကြောင့် ထိတ်လန့်သွားခဲ့ရပြီး စကားကို သေသေချာချာ မပြောဆိုနိုင်တော့တာကို မြင်တွေ့လိုက်ရသည့်အတွက် ကျောက်ဝူကျီ ရှေ့သို့ တစ်လှမ်း လှမ်းကာ ဝင်ရောက်ပြောဆိုလိုက်ခြင်း ဖြစ်၏။

လူအမြောက်အမြား အံ့အားသင့်သွားခဲ့ကြရပြီ ဖြစ်တယ်။ မိမိတို့ရှေ့က လှောင်နေကြ လူငယ်လေးမှာ ယခင်နှင့်မတူဘဲ တစ်စုံတစ်ခု ထူးခြားပြောင်းလဲနေသလိုမျိုး ခံစားချက်ကို ပေးစွမ်းနေခဲ့သော်လည်း မည်သည့်အချက်လဲဆိုတာကိုမူ သူတို့ အတိအကျ မပြောနိုင်ခဲ့ကြချေ။

ကုန်းရှင်းယွဲ့လည်း ခေတ္တမျှ ကြောင်အသွားခဲ့ရသော်လည်း ဤကိစ္စကို လုံးဝ ထည့်သွင်းစဉ်းစားနေခြင်း မရှိခဲ့ချေ။

ကျောက်ဝူကျီက ဆက်လက် ပြောကြားလိုက်တယ် "ငါ ထိုနတ်ဘုရားအသီးကို စားသုံးပြီးနောက်ပိုင်းမှာတော့... ရေတစ်ခွက်ကို သောက်သုံးလိုက်ရသလိုမျိုးပဲ ခံစားချက် ရှိခဲ့တာပါ"

"ယင်ယန် နတ်ဘုရားအသီးရဲ့ အဓိက အာနိသင်က ဝိညာဉ်အလွှာကို ကုသပေးနိုင်တာပဲ မဟုတ်လား"

"ယခင်ကလည်း မိသားစုက သေသေချာချာ စစ်ဆေးခဲ့ဖူးပြီးသားပါ... ငါ့ရဲ့ ဝိညာဉ်အလွှာက ပြင်းထန်လှတဲ့ အမွေအနှစ်တစ်ခုကြောင့် ထိခိုက်ဒဏ်ရာရရှိထားခဲ့တာလေ"

"ကုန်းစင်းက ကျွန်တော်ရဲ့ ဇနီးသည်တစ်ဦး ဖြစ်တာနဲ့အညီ... သူမအနေနဲ့ ကျွန်တော်ရဲ့ ဒဏ်ရာတွေ မြန်မြန်ဆန်ဆန် သက်သာပျောက်ကင်းသွားဖို့ မျှော်လင့်နေတာက သဘာဝကျပါတယ် ဒါကြောင့် သူ၀မ်းကွဲမောင်လေးကို တစ်ခုခုများဖြစ်သလား မေးမြန်းတာ ဖြစ်ပါတယ်”

တကယ်တမ်းကျတော့ ကျောက်ဝူကျီက ဤစကားလုံးတွေကို လုံးဝ ထုတ်ဖော်ပြောဆိုလိုခြင်း မရှိခဲ့ချေ။

သို့သော်လည်း သူ၏ ရင်ထဲတွင် အနည်းငယ်မျှ စိုးရိမ်ထိတ်လန့်မှုကို ခံစားနေရတာကြောင့်... မိမိကိုယ်ကိုယ် မတရားမှုကို ခံစားထားရသော လူငယ်လေးတစ်ဦးအဖြစ်သာ ပုံဖော်ပြသလိုက်ရခြင်း ဖြစ်၏။ မဟုတ်လျှင် သူ၏ အပေါ်၌ ရှိနေနိုင်သော သံသယတွေကို လုံးဝ ဖယ်ရှားနိုင်လိမ့်မည် မဟုတ်ချေ။

ထို့အပြင်... ဝိညာဉ်အလွှာကို ပြန်လည်ကုသပေးနိုင်မည့် နည်းလမ်းက ဤယင်ယန် နတ်ဘုရားအသီး တစ်ခုတည်းသာ ရှိတာမျိုး မဟုတ်ပါချေ။ ၎င်းက အချိန်အနည်းငယ် ပိုမိုကြာမြင့်သွားရုံမျှသာ ဖြစ်၏။

သူ လက်ရှိအချိန်မှာ ဤနေရာကနေ လွယ်လွယ်ကူကူ ထွက်ခွာသွားနိုင်ခြင်း မရှိသေးချေ။ အကယ်၍ သူ ဤနေရာကနေ ထွက်ခွာသွားခွင့် ရရှိလိမ့်မည်ဆိုလျှင် သူ၏ အစွမ်းက မကြာမီအချိန်အတွင်းမှာတင် အရှိန်အဟုန်ပြင်းစွာဖြင့် တိုးတက်ကောင်းမွန်လာမှာ သေချာလှပေသည်။

လက်ရှိအချိန်မှာ ကျောက်ဝူကျီ၏ အဓိက ရည်ရွယ်ချက်ကတော့ တီကျွယ်တျန်း၏ သံသယတွေကို လုံးဝ ပျောက်ကွယ်သွားအောင် လုပ်ဆောင်ဖို့ ဖြစ်၏။

ထို့အပြင် ကုန်းမိသားစုဝင် အားလုံးက သူ့အပေါ်ကို လုံးဝ စိတ်ပျက်သွားကြပြီး သူတို့၏ သတိထားမှုတွေကိုပါ လျှော့ချပစ်နိုင်အောင် လုပ်ဆောင်ရန် ဖြစ်ပေသည်။ ဤနည်းအားဖြင့်မှသာ သူ ဘေးကင်းအောင် လှုပ်ရှားနိုင်မည့် အခွင့်အရေးကို ရရှိနိုင်ပေလိမ့်မည်။

ကျောက်ဝူကျီ စကားပြောဆိုလို့ ပြီးဆုံးသွားပြီးနောက်ပိုင်းမှာတော့ လုံးဝ တိတ်ဆိတ်သွားခဲ့တော့တယ်။

ပင်မခန်းမဆောင်ကြီးတစ်ခုလုံး ခြောက်ကပ်သွားခဲ့ရပြီ ဖြစ်၏။

ကုန်းရှင်းယွဲ့၏ ခန္ဓာကိုယ်အတွင်းကနေ ပြင်းထန်လှသော သတ်ဖြတ်လိုစိတ်တွေ ချက်ချင်း ထွက်ပေါ်လာခဲ့ပြီ ဖြစ်ရုံမျှမက... ခန်းမဆောင်အတွင်းရှိ လူအများ၏ မျက်နှာအမူအရာတွေပါ တကယ့်ကို ဆိုးရွားစွာ ပြောင်းလဲသွားခဲ့ရတော့တယ်။

ဒီအခိုက်အတန့်မှာ နန်းတော်ကြီး၏ အထက် ကောင်းကင်ယံတစ်ခုလုံး ချက်ချင်း မှောင်မိုက်သွားခဲ့ရပြီ ဖြစ်၏။

ပြင်းထန်လှသော ဖိနှိပ်မှု အရှိန်အဝါတွေက တရိပ်ရိပ် ချဉ်းကပ်ပျံ့နှံ့လာခဲ့တာကြောင့်... ပင်မခန်းမဆောင်ကြီးအတွင်းရှိ ကျန်ရှိနေသော လူအများလည်း အသက်ပင် ဝဝမရှူဝံ့ကြတော့ချေ။

အိမ်တော်သခင် ကုန်းကျိုလုံ၏ မျက်နှာအမူအရာ တကယ့်ကို ပျက်ယွင်းသွားခဲ့ရပြီ ဖြစ်၏။ တစ်ပြိုင်နက်တည်းမှာတင် သူ ပြင်းထန်စွာ တုန်လှုပ်မှုကိုပါ ခံစားလိုက်ရတော့တယ်... အဆုံး၌မူ မိမိ၏ သမီးဖြစ်သူ၏ စစ်မှန်သော ကျင့်ကြံခြင်း အစွမ်းက မိမိကိုယ်တိုင်ပင် ဖောက်ထွင်းမမြင်နိုင်လောက်အောင် ပြင်းထန်လှလိမ့်မည်ဟု သူ လုံးဝ ထင်မှတ်မထားခဲ့မိခြင်းကြောင့်ပင်။

ကုန်းရှင်းယွဲ့က ကျောက်ဝူကျီကို အေးစက်စွာ စိုက်ကြည့်လိုက်မိရင်း ပြတ်သားလှသော လေသံဖြင့် မေးခွန်းထုတ်လိုက်တော့တယ်…

"မင်းက... ငါ့သားက မင်းတို့ရဲ့ ယင်ယန် နတ်ဘုရားအသီးကို တိတ်တဆိတ် လဲလှယ်ပစ်လိုက်တယ်လို့ သံသယဝင်နေတာလားဟန်"