အခန်း ၄၃ - ကံကြမ္မာသားတော်ကို အကွက်ဆင်ခြင်း၊ တစ်ချက်ခုတ် နှစ်ချက်ပြတ်
တီကျွယ်တျန်းသည် မိမိ၏ မေးခွန်းကြောင့် ကျောက်ဝူကျီ၏ ရင်ထဲတွင် ဤမျှလောက်အထိ ထိတ်လန့်တုန်လှုပ်သွားလိမ့်မည်ဟု လုံးဝ မထင်မှတ်ထားခဲ့ချေ။
သို့သော်လည်း တီကျွယ်တျန်းက ဤသို့ တမင်တကာ လုပ်ဆောင်ခဲ့ခြင်း ဖြစ်၏။ ဤကောင်က အတိတ်ဘဝမှ ပြန်လည်မွေးဖွားလာသူ ဖြစ်ကြောင်း သူ သိရှိထားပြီး ဖြစ်ရာ... အကယ်၍ မြက်ပင်ကို ရိုက်ပြီး မြွေကို မခြောက်လှန့်ခဲ့ဘူးဆိုလျှင် ဒီလူက သူ၏ မြေခွေးအမြီးကို လွယ်လွယ်ကူကူ ထုတ်ပြလိမ့်မည် မဟုတ်ချေ။ ထို့အပြင် မိမိ၏ စမ်းသပ်မှုကြောင့် ကံကြမ္မာသားတော်သည်လည်း စိုးရိမ်ထိတ်လန့်မှုကို သေချာပေါက် ခံစားရပေလိမ့်မည်။
ကံကြမ္မာသားတော်ကို စိုးရိမ်ပူပန်ပြီး မအီမသာ ဖြစ်အောင် လုပ်ဆောင်ခြင်းက... ဗီလိန်တစ်ဦးအနေဖြင့် တကယ့်ကို ပျော်ရွှင်စရာကောင်းလှသော ကိစ္စရပ်တစ်ခု မဟုတ်ပါလား။
မကြာမီအချိန်မှာတင် သူတို့၏ ရှေ့မှောက်၌ နတ်ဘုရားသစ်ပင်ကြီးတစ်ပင် ထွက်ပေါ်လာတာကို မြင်တွေ့လိုက်ရသဖြင့် သူတို့ သုံးဦးစလုံး၏ မျက်ဝန်းတွေက အရောင်တောက်သွားခဲ့ရတော့တယ်။
တကယ်တမ်းကျတော့ တီကျွယ်တျန်းက ဒီယင်/ယန်အသီးအပေါ်မှာ အထူးတလည် စိတ်ဝင်စားနေခြင်း မရှိချေ။ သို့သော်လည်း အကယ်၍ ကံကြမ္မာသားတော်သာ ဤအသီးကို ရရှိသွားခဲ့မည်ဆိုလျှင် သူ၏ အခြေခံအုတ်မြစ်က အဆမတန် တိုးတက်ကောင်းမွန်သွားလိမ့်မည်မှာ သေချာလှပေသည်။ ဒီအသီးနှင့် နှိုင်းယှဉ်ကြည့်မည်ဆိုလျှင် တီကျွယ်တျန်းက ကံကြမ္မာသားတော်၏ အတိတ်ဘဝမှ စစ်မှန်သော နောက်ခံဇာစ်မြစ်ကိုသာ ပိုမို၍ စူးစမ်းလိုစိတ် ဖြစ်ပေါ်နေခဲ့ခြင်း ဖြစ်၏။
ကြည့်ရတာ ဤနေရာကနေ ထွက်ခွာသွားပြီးနောက်ပိုင်းကျမှ ကုန်းကျိုလုံကို သေသေချာချာ ထပ်မံ မေးမြန်းကြည့်ရပေလိမ့်မည်။
ယင်/ယန် နတ်ဘုရားအသီး သုံးလုံးကို မြင်တွေ့လိုက်ရပြီးနောက် တီကျွယ်တျန်း ထူးဆန်းသော အချက်တစ်ခုကို ချက်ချင်း သတိပြုမိလိုက်တယ်။ ယင်ယန် နတ်ဘုရားအသီးက တဖြည်းဖြည်းချင်း ပြောင်းလဲနေခဲ့ပြီ ဖြစ်၏။
တီကျွယ်တျန်း၏ မျက်နှာထက်တွင် အေးစက်လှသော အပြုံးတစ်ခု ထွက်ပေါ်လာခဲ့ရတော့တယ်။ ကြည့်ရတာ ဒီအရာက ကံကြမ္မာသားတော်အတွက် သီးသန့် ပြင်ဆင်ပေးထားခြင်း ဖြစ်ရမယ်။ ယင်ယန် နတ်ဘုရားသစ်ပင်ကြီးကပါ ကံကြမ္မာအရှိန်အဝါ မသိမသာ လွှမ်းမိုးခြင်း ခံထားရလိမ့်မည်ဟု သူ လုံးဝ ထင်မှတ်မထားခဲ့မိချေ။
အသီးက သုံးလုံး ရှိနေတာ မှန်သလို အားလုံးကလည်း ဝဝလင်လင်နှင့် မှည့်ဝင်းနေခဲ့ကြပြီ ဖြစ်၏။
သို့သော်လည်း တီကျွယ်တျန်း 'အာကာသ /လေဟာနယ် နတ်ဘုရားမျက်လုံးကို' အသုံးပြုပြီး ဖောက်ထွင်းကြည့်ရှုလိုက်သည့် အခိုက်အတန့်မှာတင်... အသီးနှစ်လုံး၏ အတွင်းထဲက စွမ်းအင်အမြောက်အမြားမှာ စုပ်ယူခြင်း ခံထားရပြီး ဖြစ်ကြောင်း အလွယ်တကူ တွေ့လိုက်တော့တယ်။
၎င်းတို့၏ ဘေးနားက အရောင်အသွေး သိပ်မတောက်ပသော နတ်ဘုရားအသီး၏ အတွင်းထဲက စွမ်းအင်တွေကသာ တကယ့်ကို ထူးခြားဆန်းပြားလှသော အသွင်ပြောင်းလဲမှုကို လုပ်ဆောင်နေခဲ့ခြင်း ဖြစ်၏။
ကြည့်ရတာ ဤအသီးကသာ စစ်မှန်သော "ယင်ယန် နတ်ဘုရားအသီး" ဖြစ်ပြီး ကျန်ရှိနေသော အစောပိုင်း အသီးနှစ်လုံးမှာမူ "ယင်ယန် သူတော်စင်အသီး" လို့သာ ခေါ်ဆိုနိုင်ပေလိမ့်မည်။
မိမိ၏ နောက်ကွယ်က ကျောက်ဝူကျီ၏ မျက်ဝန်းတွေက အသာအယာ လှုပ်ရှားသွားခဲ့တာကို တီကျွယ်တျန်း သေသေချာချာ သတိပြုမိလိုက်တယ်။
ကုန်းစင်းကတော့ အသီးများ မြင်တွေ့လိုက်ရတဲ့အခါ ဝမ်းသာအားရ ဖြစ်လျက် ကျောက်စိမ်းသေတ္တာတစ်လုံးကို ချက်ချင်း ထုတ်ယူလိုက်တော့တယ်။ ထို့အပြင် သေတ္တာ၏ အပြင်ဘက်တွင် ထူးခြားလှသော တာအိုစည်းချက် အချို့ပါ အလိုအလျောက် ထွက်ပေါ်နေခဲ့တာ ဖြစ်၏။
ကုန်းစင်း သွားရောက်ပြီး အသီးခူးဆွတ်နေတာကို စောင့်ကြည့်ရင်း တီကျွယ်တျန်းနှင့် ကျောက်ဝူကျီတို့နှစ်ဦးစလုံး ဘာစကားမှ မပြောဘဲ တိတ်ဆိတ်နေခဲ့ကြတယ်။
"ကဲ... အခုဆိုရင် ငါတို့မှာ အသီး သုံးလုံး ရှိသွားပြီနော်" ကုန်းစင်းက လှမ်းပြောလိုက်တယ်။
"ငါ... အရောင်အနည်းငယ် ညိုမှိုင်းနေတဲ့ အသီးကိုပဲ ယူပါ့မယ်" ဤအချိန်မှာတင် ကျောက်ဝူကျီ၏ စိတ်ထဲ၌ အကြံတစ်ခု ချက်ချင်း ရရှိသွားခဲ့ရတော့တယ်။
တီကျွယ်တျန်းက မိမိကို အစောပိုင်းကတည်းက သံသယဝင်နေခဲ့တာ ဖြစ်ရာ အခုဆိုရင် သူ တီကျွယ်တျန်း၏ သံသယတွေကို လုံးဝ ပျောက်ကွယ်သွားအောင် လုပ်ဆောင်နိုင်မယ့် အစီအစဉ်တစ်ခု ရှိသွားခဲ့ပြီ ဖြစ်၏။
တစ်ပြိုင်နက်တည်းမှာတင် ၎င်းက တစ်ချက်ခုတ် နှစ်ချက်ပြတ်လည်း ဖြစ်စေပေလိမ့်မည်။
ကုန်းစင်း ကျောက်ဝူကျီကို လှမ်းကြည့်လိုက်မိရာ သူမ၏ မျက်ဝန်းထဲမှာ ဇဝေဇဝါ ဖြစ်မှုတွေ ပြည့်နှက်သွားခဲ့ရတော့တယ်။
ကျောက်ဝူကျီက ဆင်ခြေပေးလိုက်တယ် "ဒီလို အသီးမျိုးက ငါ့ရဲ့ ဒဏ်ရာတွေကို တကယ်ပဲ ကုသပေးနိုင်မလားဆိုတာ ငါတို့ အတိအကျ မသိသေးဘူးလေ။ ဒါကြောင့်မို့လို့ ဘေးကင်းအောင်လို့ စွမ်းအင်အနည်းငယ် နည်းပါးပုံရတဲ့ အသီးကိုပဲ ငါ အသုံးပြုပါ့မယ်။ အကယ်၍ ၎င်းက ကုသပေးနိုင်တဲ့ အာနိသင် ရှိတယ်ဆိုရင်တော့ တကယ့်ကို ကောင်းမွန်ပြီး ငါ့ရဲ့ ရည်ရွယ်ချက် အောင်မြင်သွားမှာ ဖြစ်သလို... တကယ်လို့ အာနိသင် မရှိဘူးဆိုရင်တောင်မှ အနည်းဆုံးတော့ ငါတို့ မိသားစုအတွက် ဆုံးရှုံးမှု အနည်းဆုံး ဖြစ်သွားတာပေါ့" ကျောက်ဝူကျီ ဤစကားကို ပြောဆိုလိုက်ချိန်တွင် သူ၏ မျက်ဝန်းထဲမှာ စိုးရိမ်ပူပန်မှုတွေကော ဝမ်းသာအားရ ဖြစ်မှုတွေပါ ပြိုင်တူ ထွက်ပေါ်နေခဲ့တာ ဖြစ်၏။
ကုန်းစင်း၏ မျက်နှာအမူအရာ ချက်ချင်း ပြောင်းလဲသွားခဲ့ရပြီ ဖြစ်တယ်။ အကယ်၍ ကျောက်ဝူကျီသာ အောင်မြင်ခြင်း မရှိခဲ့ဘူးဆိုလျှင် သူမအပေါ် ကျရောက်လာမည့် ဖိအားတွေက အဆမတန် ကြီးမားလာလိမ့်မည် ဖြစ်ကြောင်း သူမ သေချာပေါက် သိရှိထားခြင်းကြောင့်ပင်။ ကြည့်ရတာ ကျောက်ဝူကျီက သူမအတွက်ကိုပါ သေသေချာချာ ထည့်သွင်းစဉ်းစားပေးနေခဲ့တာ ဖြစ်ရမယ်။
နှစ်ဦးသား ချစ်ကြည်နူး တစ်တီတူးနေစဉ်ပင်…
ထိုအရောင်ညိုမှိုင်းနေသော အစစ်အမှန် ယင်/ယန် နတ်ဘုရားအသီးကို လက်တစ်ဖက်က ချက်ချင်း လှမ်း၍ ယူဆောင်သွားခဲ့ပြီး ထိုအသီးကို တိုက်ရိုက် တစ်ကိုက် ကိုက်ဝါးပစ်လိုက်သည်။
ဟုတ်ပါတယ် တီကျွယ်တျန်းပင်…
ထို့နောက် တီကျွယ်တျန်း သူတို့နှစ်ဦးကို လှမ်းကြည့်လိုက်ရင်း...
"ဘာမှ ထပ်ပြီး ပြောမနေကြနဲ့တော့…ငါက ဒီလိုမျိုး အသားယူတက်တဲ့သူ မဟုတ်ဘူး။ အမ ကုန်းစင်း သူ့ကိုပဲ အကောင်းဆုံးသစ်သီးတွေ ပေးလိုက်ပါ…
ကျောက်ဝူကျီ၏ ခန္ဓာကိုယ်တစ်ခုလုံး ချက်ချင်း တုန်ယင်သွားခဲ့ရပြီ ဖြစ်ပြီး သူ၏ လက်တွေကိုလည်း တင်းကြပ်စွာ ဆုပ်ကိုင်လိုက်မိတော့တယ်။ သူ၏ မျက်ဝန်းထဲမှာ သွေးကြောမျှင်လေးတွေပါ ဒေါသတကြီး ထွက်ပေါ်လာခဲ့ရပြီ ဖြစ်၏။
သူ စိတ်ထဲကနေ ပြင်းထန်စွာ ကျိန်ဆဲလိုက်မိတော့တယ် - 'ဒီခွေးကောင်... မင်းက ဘာဖြစ်လို့ ဒီလောက်တောင် လက်မြန်ခြေမြန် ရှိနေရတာလဲ... မင်းကို ဘယ်သူက အဲ့ဒီအသီးကို စားခိုင်းလို့လဲဟမ်...။'
ကုန်းစင်းကတော့ တီကျွယ်တျန်းကို ကြည့်လိုက်မိရင်း သူမ၏ မျက်ဝန်းထဲမှာ စိတ်လှုပ်ရှားမှုတွေ ပြည့်နှက်သွားခဲ့ရတော့တယ်။ မိမိ၏ ဝမ်းကွဲမောင်လေးက သူမအတွက် တကယ်ပဲ ဒုက္ခခံပေးခဲ့တာ မဟုတ်ပါလား။
"အဆိုးဆုံး အသီးကိုမှ မောင်လေးက စားသုံးလိုက်ပြီဆိုတော့... ဝူကျီ... ရှင်လည်း အားနာမနေပါနဲ့တော့… အကယ်၍ ဒီအသီးက ရှင့်အတွက် တကယ်ပဲ အသုံးတည့်ခဲ့မယ်ဆိုရင် ဘယ်လောက်တောင် ကောင်းလိုက်မလဲ" ကုန်းစင်း စိတ်လှုပ်ရှားစွာဖြင့် ကျန်ရှိနေသော ယင်ယန် နတ်ဘုရားအသီးတစ်လုံးကို ကျောက်ဝူကျီ၏ လက်ထဲသို့ အတင်း ထည့်ပေးလိုက်တော့တယ်။
ကျောက်ဝူကျီ ထိုယင်ယန် နတ်ဘုရားအသီးကို မိမိ၏ လက်ထဲသို့ လှမ်း၍ ယူဆောင်လိုက်ပြီးနောက်ပိုင်းမှာတော့... သူ၏ နှုတ်ခမ်းထောင့်လေးတွေ တုန်ယင်သွားခဲ့ရပြီ ဖြစ်၏။ သူ၏ ရင်ထဲ၌လည်း ပြင်းထန်စွာ နာကျင်မှုကို ခံစားလိုက်ရတော့တယ်။
ဒီအခိုက်အတန့်မှာ သူ တီကျွယ်တျန်းကို မော့ကြည့်ဖို့ စိတ်ကူးမရှိခဲ့ချေ။ တီကျွယ်တျန်းအနေဖြင့် ဤအရာကို တမင်တကာ လုပ်ဆောင်ခဲ့တာလား၊ သို့မဟုတ် တစ်စုံတစ်ခုသော နည်းလမ်းကို အသုံးပြုခဲ့တာလားဆိုတာ သူ သေသေချာချာ တွေးတောဆင်ခြင်နေခဲ့ခြင်း ဖြစ်၏။
သို့မဟုတ်... တီကျွယ်တျန်းကလည်း ထိုယင်ယန် နတ်ဘုရားအသီး၏ ကွဲပြားခြားနားမှုတွေကို ကြိုတင်ပြီး ဖောက်ထွင်းမြင်တွေ့နေခဲ့တာများလား။
မိမိအနေဖြင့် စောစောတုန်းက အလောတကြီး ဖြစ်သွားခဲ့မိတာလား...။
၎င်းကို တွေးမိရင်း ကျောက်ဝူကျီ မိမိ၏ ခေါင်းကို မော့ကာ တီကျွယ်တျန်းကို လှမ်းကြည့်လိုက်မိတော့တယ်။ တီကျွယ်တျန်းက ထိုယင်ယန်အသီးကို စားသုံးလို့ ပြီးဆုံးသွားခဲ့ပြီ ဖြစ်ပြီး သူ၏ ခန္ဓာကိုယ်အတွင်းကနေ ပြင်းထန်လှသော စွမ်းအင်လှိုင်းအချို့ ခေတ္တမျှ ထွက်ပေါ်လာခဲ့ပြီးမှ ပြန်လည်ပျောက်ကွယ်သွားခဲ့တာ ဖြစ်၏။
လက်ရှိအချိန်မှာ ကျောက်ဝူကျီအနေဖြင့် ဘယ်လောက်ပင် နောင်တရနေပါစေဦးတော့ ဘာမှတတ်နိုင်တော့မှာ မဟုတ်ချေ။
သို့သော်လည်း ကျောက်ဝူကျီ တရားထိုင်ပြီး ထိုအသီးကို စုပ်ယူလိုက်သည့် အခိုက်အတန့်မှာတင် သူ၏ မျက်နှာအမူအရာ လုံးဝ ပျက်ယွင်းသွားခဲ့ရပြန်တယ်။
ထိုယင်ယန် နတ်ဘုရားအသီးကို စားသုံးပြီးနောက်ပိုင်းမှာ သူ၏ ခန္ဓာကိုယ်အတွင်း၌ ဘာပြောင်းလဲမှုမှ ဖြစ်ပေါ်မလာခဲ့ခြင်းကြောင့်ပင်။
"မဖြစ်နိုင်တာ... ဒါ လုံးဝ မဖြစ်နိုင်ဘူး။ ဒီယင်ယန် နတ်ဘုရားအသီးက အတုကြီးများလား..." ကျောက်ဝူကျီ၏ မျက်နှာအမူအရာ တကယ့်ကို ဆိုးရွားသွားခဲ့ရတော့တယ်။
အဆုံး၌မူ သူသည် အတိတ်ဘဝမှ အမှတ်သညာတွေကို ပိုင်ဆိုင်ထားတာ ဖြစ်ရာ ဤယင်ယန် နတ်ဘုရားအသီးက သူ၏ ဝိညာဉ်အလွှာအတွက် အလွန်တရာ ကြီးမားသော အထောက်အကူ ဖြစ်စေရမည် မဟုတ်ပါလား။
သို့သော်လည်း အခုအချိန်မှာ ဘာဖြစ်လို့ သူ့အတွက် ဘာမှ အသုံးမဝင်ဘဲ ဖြစ်နေရတာလဲ။
သူ စောစောတုန်းက တီကျွယ်တျန်း ထိုသေတ္တာကို သာမန်ကာလျှံကာ ကိုင်တွယ်ခဲ့တာကို ရုတ်တရက် သတိရသွားခဲ့မိတော့တယ်။
ကျောက်ဝူကျီ မျက်နှာကို တည်ငြိမ်အောင် ထိန်းထားသော်လည်း ရင်ထဲတွင်မူ တီကျွယ်တျန်းကို သတ်ပစ်ချင်လောက်အောင် ဒေါသတကြီး အော်ဟစ်လျက် စကားလှမ်းဆိုလိုက်တယ် - "သခင်လေးတီ... ဒီလို ပြက်လုံးမျိုးက လုံးဝ မရယ်ရဘူးနော်"
"ရှင် ဘာကို ဆိုလိုတာလဲ" ကုန်းစင်းက ကြားကနေ ဝင်မေးလိုက်တယ်။
ယင်ယန် နတ်ဘုရားအသီးကို စားသုံးပြီးနောက် ဘာအသံမှ ထွက်မလာဘဲ တိတ်ဆိတ်နေခဲ့သော ကျောက်ဝူကျီက တီကျွယ်တျန်းကို ရုတ်တရက် ထပြီး ပြစ်တင်ဝေဖန်လာခဲ့ခြင်းကြောင့် ကုန်းစင်းအနေဖြင့် လုံးဝ နားမလည်နိုင်အောင် ဖြစ်သွားခဲ့ရခြင်း ဖြစ်၏။
"ဝူကျီ... ရှင့်ရဲ့ စကားက ဘာကို ဆိုလိုတာလဲ" ကုန်းစင်းက ထပ်မံ မေးမြန်းလိုက်တယ်။
ကျောက်ဝူကျီက တီကျွယ်တျန်းကို စိုက်ကြည့်ရင်း မေးလိုက်တယ် "သခင်လေးတီ... မင်း ဘယ်အချိန်အထိ သရုပ်ဆောင်နေဦးမှာလဲ"
"ကျောက်ဝူကျီ... ဒီကိစ္စက ငါ့မောင်လေးနဲ့ ဘာဆိုင်လို့လဲ" ကုန်းစင်းလည်း ဒီအခိုက်အတန့်မှာ ဒေါသထွက်သွားခဲ့ရပြီး ကျောက်ဝူကျီကို ပြန်လည်မေးမြန်းလိုက်တော့တယ်။
အဆုံး၌မူ မိမိ၏ ဝမ်းကွဲမောင်လေးက အဆိုးဆုံး အသီးကို စားသုံးပြီး နစ်နာမှုတွေကို ခံယူထားခဲ့ရတာ ဖြစ်ရုံမျှမက မိမိ၏ အဖိုးကိုယ်တိုင်ကပါ အစွမ်းထက်ဆုံး အသီးကို တီကျွယ်တျန်းအတွက် သီးသန့် ချန်ထားပေးဖို့ ပြောကြားခဲ့ဖူးသည် မဟုတ်ပါလား။
သို့သော်လည်း အခုတော့ တီကျွယ်တျန်းက နစ်နာမှုကို ခံယူခဲ့ရသည့်အပြင် ကျောက်ဝူကျီ၏ ပြစ်တင်ဝေဖန်ခြင်းကိုပါ ခံနေရသေးသည်။
ကျောက်ဝူကျီ ချက်ချင်း သတိဝင်လာခဲ့မိရင်း မိမိကို ကြည့်ရှုနေသော တီကျွယ်တျန်း၏ မျက်ဝန်းထဲက လှောင်ပြုံးတွေကို မြင်တွေ့လိုက်ရသည့် အခိုက်အတန့်မှာတင်... သူ၏ ဒေါသတွေက ချက်ချင်း အထွတ်အထိပ်သို့ ရောက်ရှိသွားခဲ့ရတော့တယ်။
သို့သော်လည်း သူ ပြန်လည်ရရှိလိုက်သော တစ်ခုတည်းသော အဖြေကတော့ တီကျွယ်တျန်း၏ လှည့်ထွက်သွားခဲ့ပြီ ဖြစ်သော ကျောပြင်ကြီးသာ ဖြစ်၏။
ကုန်းစင်းက စိတ်ရှုပ်စွာ မေးလိုက်တယ် "တကယ်တော့... ဘာတွေ ဖြစ်ပျက်သွားခဲ့တာလဲ"
ကျောက်ဝူကျီက မကျေမနပ် ပြောလိုက်တယ် "သူ စောစောတုန်းက အဲ့ဒီအသီးကို ယူလိုက်တဲ့ အချိန်မှာတင်... ယင်ယန် နတ်ဘုရားအသီးတွေကို တိတ်တဆိတ် အချင်းချင်း လဲလှယ်ပစ်လိုက်တာ သေချာတယ်"
ထိုစကားကို ကြားရတဲ့အခါ ကုန်းစင်း၏ မျက်ဝန်းထဲမှာ လုံးဝ မယုံကြည်နိုင်ဖွယ်ရာ အရိပ်အယောင်တွေဖြင့် ပြည့်နှက်သွားခဲ့ရတော့တယ်။
"မဖြစ်နိုင်တာ... ငါ့မောင်လေးက ဒီလို ကိစ္စရပ်မျိုးကို လုံးဝ လုပ်မှာ မဟုတ်ဘူး" ကုန်းစင်းက ပြတ်သားစွာ ပြန်လည်ချေပလိုက်တော့တယ်။
ကျောက်ဝူကျီ ဘာစကားမှ ဆက်မပြောတော့ချေ။ တီကျွယ်တျန်းက စောစောတုန်းက မိမိကို ခြိမ်းခြောက်ဖို့အတွက် စကားလုံးတွေကိုပါ အသုံးပြုခဲ့တာ ဖြစ်ရာ... ဤကဲ့သို့သော ကိစ္စရပ်မျိုးကို ဘာဖြစ်လို့ မလုပ်နိုင်ရမှာလဲ။
"ကုန်းစင်း... မင်း သိပါတယ်... ငါက မင်းကို ဘယ်တော့မှ လိမ်ညာမှာ မဟုတ်ဘူးဆိုတာကိုလေ" ကျောက်ဝူကျီက ပြောလိုက်တယ်။
ကုန်းစင်း၏ မျက်နှာအမူအရာ ချက်ချင်း ပြောင်းလဲသွားခဲ့ရပြီ ဖြစ်၏။ ထို့နောက် သူမ ရှေ့သို့ လှမ်းလျှောက်သွားနေသော တီကျွယ်တျန်းကို လှမ်းကြည့်လိုက်မိရာ... ကုန်းစင်းတစ်ယောက် မိမိ၏ ဦးခေါင်းတစ်ခုလုံး နှစ်ခြမ်းကွဲလုမတတ် စိတ်ရှုပ်ထွေးမှုကို ပြင်းထန်စွာ ခံစားလိုက်ရတော့တယ်။
"ဒီကိစ္စကို လျှောက်ပြီး မခန့်မှန်းနေနဲ့တော့။ ငါတို့ အပြင်ရောက်ရင် အဖိုးကိုပဲ ဒီအကြောင်း သေသေချာချာ မေးမြန်းကြည့်ကြတာပေါ့"
"အကယ်၍... သူက တကယ်ပဲ ဒီလို လုပ်ခဲ့တယ်ဆိုရင်တောင်မှ ငါတို့ ဘာမှတတ်နိုင်မှာ မဟုတ်ဘူး... ဒါပေမဲ့ ငါ မင်းကို သေသေချာချာ ရှင်းပြချက်တစ်ခုတော့ ပြန်ပေးပါ့မယ်" ကုန်းစင်းက ကျောက်ဝူကျီကို ပြောလိုက်တယ်။
ထိုစကားကို ကြားရတဲ့အခါ ကျောက်ဝူကျီ ချက်ချင်း သတိဝင်လာခဲ့မိရင်း မိမိအနေဖြင့် စောစောတုန်းက အလွန်အမင်း အလောတကြီး ဖြစ်သွားခဲ့မိကြောင်း ရိပ်မိလိုက်တော့တယ်။
သို့သော်လည်း မိမိ၏ စောစောတုန်းက အမူအရာကို ပြန်လည်သုံးသပ်ကြည့်ပြီးနောက်ပိုင်းမှာတော့ ကျောက်ဝူကျီ တစ်စုံတစ်ခုကို ထပ်မံ ရိပ်မိလိုက်ပြန်၏။
တီကျွယ်တျန်း မိမိကို လျစ်လျူရှုပြီး ထွက်ခွာသွားခြင်းက... မိမိအနေဖြင့် အရှက်ရပြီး ဒေါသထွက်နေသည်ဟုသာ တီကျွယ်တျန်းက ထင်မှတ်သွားခြင်း ဖြစ်ရမည်။
၎င်းက လူငယ်တစ်ဦး၏ စိတ်နေစိတ်ထားနှင့် တကယ့်ကို ကိုက်ညီလွန်းလှပေသည်။
'ဒါက... မမျှော်လင့်ဘဲ ငါ့အတွက် ပြဿနာအချို့ကို မသိမသာ လျှော့ချပေးသွားတာပဲ'
'ယင်ယန် နတ်ဘုရားအသီးနဲ့ ပတ်သက်ပြီးတော့တော့... နောက်မှပဲ တခြားနည်းလမ်းကို ရှာဖွေရတော့မှာပေါ့'
ကျောက်ဝူကျီက ကုန်းစင်းကို အမြန် အောက်ကျို့ပြီး ပြောလိုက်တယ် "စိတ်မကောင်းပါဘူး ကုန်းစင်းရယ်... ငါက အောင်မြင်မှုကို အလွန်အမင်း လောမိသွားလို့ ဖြစ်ရမယ်။ ငါက အစွမ်းထက်တဲ့ အင်အားတွေကို မြန်မြန်ဆန်ဆန် ပိုင်ဆိုင်ချင်ရုံတင်ပါ... ဒါမှသာ မင်းရဲ့ ရှေ့မှာ မားမားမတ်မတ် ရပ်တည်ပြီး မင်းကို သေသေချာချာ ကာကွယ်ပေးနိုင်မှာလေ။
အကယ်၍ ဒီကိစ္စက မင်းကို တကယ်ပဲ အခက်တွေ့စေခဲ့မယ်ဆိုရင် မင်း ဘာမှလုပ်ပေးဖို့ မလိုပါဘူး..အပြင်ရောက်ရင် ဒါတွေအားလုံးက ငါ့ရဲ့ အမှားပါလို့ပဲ တိုက်ရိုက် ပြောလိုက်ပါတော့"
တကယ်တမ်းကျတော့ ကျောက်ဝူကျီက ဒီကိစ္စကို ဒီအတိုင်းပဲ လက်လွှတ်လိုက်ဖို့ ရည်ရွယ်ထားခဲ့ခြင်း ဖြစ်၏။ သို့သော်လည်း အကယ်၍ တီကျွယ်တျန်းသာ အပြင်ရောက်လျှင် မပြောသင့်သော စကားအချို့ကို ပြောဆိုခဲ့မည်ဆိုလျှင် မည်သို့လုပ်မည်နည်း။
အဆုံး၌မူ တီကျွယ်တျန်း မိမိကို အစောပိုင်းက မေးမြန်းခဲ့သော မေးခွန်းများမှာ သူ၏ အသိစိတ်ထဲတွင် ထင်ထင်ရှားရှား ရှိနေဆဲ ဖြစ်ခြင်းကြောင့်ပင်။ တီကျွယ်တျန်းအနေဖြင့် မိမိကို အခုအချိန်အထိ သံသယဝင်နေဆဲလားဆိုတာ သူ အတိအကျ မသိရှိချေ။
မိမိ၏ နောက်ဆက်တွဲ အစီအစဉ်တွေ အဆင်ပြေစေရန်နှင့် မိမိကိုယ်ကိုယ် ဖော်ပြမိခြင်း မရှိစေရန်အတွက်... သူ လက်ရှိအချိန်မှာ ကုန်းစင်းကို ယာယီအားဖြင့်သာ အသုံးချရပေလိမ့်မည်။ သို့သော်လည်း နောင်ကျမှ ကုန်းစင်းကို သေသေချာချာ ပြန်လည်ပေးဆပ်သွားမည် ဖြစ်၏။
လက်ရှိ ကျောက်ဝူကျီကတော့ လုံးဝ ပြောင်းလဲသွားခဲ့ပြီ ဖြစ်ပြီး မိမိကိုယ်ကိုယ် စစ်မှန်သော လူငယ်လေးတစ်ဦးအဖြစ် သရုပ်ဆောင်ဖို့ ပြင်ဆင်လိုက်ပြီ ဖြစ်တယ်။
ယခင်က ကုန်းစင်းက မိမိ၏ အဖိုးဖြစ်သူမှာ သူ့၌ တကယ့်ကို ရင့်ကျက်လွန်းလှသော အရိပ်အယောင်တွေ ရှိနေကြောင်း ပြောကြားခဲ့ဖူးသည် မဟုတ်ပါလား။
ထိုအဘိုးကြီး သံသယ၀င်သွားလျင်မလွယ်ပေ…
အကယ်၍ တီကျွယ်တျန်းသာ တစ်စုံတစ်ခုကို သွားရောက်ပြောကြားခဲ့မည်ဆိုလျှင် မည်သို့လုပ်မည်နည်း။ လူငယ်တစ်ဦးက မည်မျှပင် ထူးချွန်ထက်မြက်ပြီး ရင့်ကျက်သည်ဆိုစေဦးတော့ လူငယ်တို့၏ သဘာဝ စရိုက်အချို့ကတော့ လုံးဝ ပျောက်ကွယ်သွားလိမ့်မည် မဟုတ်ချေ။ သူတို့တွေက စိတ်လိုက်မာန်လိုက် လုပ်ဆောင်တတ်ကြသလို မတရားမှုကိုလည်း ခံပြင်းတတ်ကြပေသည်။
ဒါကြောင့်မို့လို့ပဲ... သူ ကုန်းစင်းဆီကနေ ဤစကားကို ကြားရမှသာ ကုန်းကျိုလုံ၏ စိတ်ထဲက ရှိနေနိုင်သော သံသယတွေကိုပါ လုံးဝ ပျောက်ကွယ်သွားအောင် အစီအစဉ်လုပ်ဆောင်နိုင်မှာ ဖြစ်၏။
တီကျွယ်တျန်း ဘာမှမပြောခဲ့ဘူးဆိုရင်တောင်မှ သူကတော့ ကြိုတင်ပြီး ပြင်ဆင်ထားရပေလိမ့်မည်။ ဘာပဲဖြစ်ဖြစ် ကြိုတင်ကာကွယ်ထားခြင်းက အကောင်းဆုံး မဟုတ်ပါလား။