အခန်း ၂၉ - သံသယများ ဝင်လာခြင်း၊ ကြိုးပမ်းမှုအားလုံး အချည်းနှီး ဖြစ်သွားရခြင်း

ရှောင်ယွီ၏ စိတ်ဓာတ်ပြန်လည်တည်ငြိမ်လာသော အမူအရာကို မြင်တွေ့ရသောအခါ အဘိုးအိုသည် ကျေနပ်စွာဖြင့် ခေါင်းညိတ်လိုက်သည်။ ဤသည်မှာ သူသိထားသော ရှောင်ယွီပင် ဖြစ်၏။ သူသည် ကိုယ်ပိုင်ခံယူချက် ရှိပြီး ဇွဲလုံ့လဝီရိယရှိကာ ကြိုးစားအားထုတ်လိုစိတ် ရှိသူ ဖြစ်သည်။

ဆရာဖြစ်သူ၏ ကျေနပ်သွားသော မျက်နှာအမူအရာကို မြင်လိုက်ရမှသာ ရှောင်ယွီလည်း စိတ်သက်သာရာရကာ သက်ပြင်းချနိုင်တော့သည်။ အဆုံး၌မူ သူ၏ ယခုလက်ရှိ အင်အားမှာ အားကိုးလောက်စရာ မရှိသေးသည် မဟုတ်ပါလား။

ထို့အပြင် ယခုတစ်ကြိမ် ရှုံးနိမ့်ပြီးနောက်တွင် ဆရာဖြစ်သူက သူ့အပေါ် ကြည့်သည့် အကြည့်မှာ အနည်းငယ် ပြောင်းလဲသွားကြောင်း ရှောင်ယွီ သတိပြုမိလိုက်သည်။ ထိုလျှို့ဝှက်ဆန်းပြားသော သခင်လေးက ဆရာ့ကို တစ်စုံတစ်ခု ပြောလိုက်ခြင်းကြောင့်များ ဖြစ်နိုင်မလား။ ထို့ကြောင့် ဆရာဖြစ်သူတွင် အခြားသော အတွေးစိတ်ကူးများ ဝင်ရောက်သွားခြင်း ဖြစ်ပေလိမ့်မည်။

၎င်းကို တွေးမိရင်း ရှောင်ယွီ စိတ်ထဲတွင် စိုးရိမ်တကြီး ဖြစ်လာခဲ့ရသည်။ ဆရာဖြစ်သူ၏ ပြောပြချက်အရ အဆိုပါလူငယ် သခင်လေးမှာ... သူ၏ အင်အားကို အထင်သေး၍ မရနိုင်သလို နောက်ခံနောက်ကြောင်းမှာလည်း အလွန်တရာ အစွမ်းထက်လှပေသည်။ ဆရာဖြစ်သူ၏ ရုပ်ပိုင်းဆိုင်ရာ ခန္ဓာကိုယ်အစစ်အမှန်ကို ပြန်လည်သန့်စင်ပေးနိုင်မည့် နည်းလမ်းအမြောက်အမြားကိုပင် သူက လွယ်လွယ်ကူကူ လုပ်ဆောင်ပေးနိုင်စွမ်း ရှိပေသည်။ အကယ်၍ ထိုသို့သာ ဆိုပါက ဆရာဖြစ်သူအတွက် သူ (ရှောင်ယွီ) မှာ မည်သည့်အသုံးဝင်မည့် အပိုင်းမျှ ရှိတော့မည် မဟုတ်ချေ။

ထို့ကြောင့် ရှောင်ယွီ စိုးရိမ်ပူပန်နေခြင်း ဖြစ်၏။ သို့သော်လည်း အဘိုးအိုသည် သူ့ကို စွန့်ခွာသွားခြင်း မရှိသေးသည်ကို မြင်ရသဖြင့် ရှောင်ယွီ စိတ်ထဲတွင် စိုးရိမ်စိတ်နှင့်အတူ သက်သာရာရမှုကိုပါ တပြိုင်နက်တည်း ခံစားနေရသည်။ မိမိကိုယ်မိမိ ဘာဖြစ်လို့ ဤကဲ့သို့ တွေးတောနေမိသလဲဆိုသည်ကိုမူ သူ မသိချေ။

မူလက ဆရာကိုယ်တိုင် ဝင်ရောက်ပူးကပ်ပြီး ကူညီပေးခဲ့ပါလျက်နှင့် ဘာဖြစ်လို့ မအောင်နိုင်ခဲ့ရတာလဲဟု သူ မေးမြန်းချင်ခဲ့သော်လည်း ထပ်မံတွေးတောကြည့်ပြီးနောက် ရှောင်ယွီ မမေးတော့ရန် ဆုံးဖြတ်လိုက်သည်။ ၎င်းကို ထပ်မံမေးမြန်းနေရန် မလိုတော့ပေ... ရလဒ်က မျက်ဝါးထင်ထင် ရှိနေခဲ့ပြီ မဟုတ်ပါလား။ ယခုအချိန်တွင် ဆရာနှင့် အမှားအမှန်ကို အငြင်းပွားနေခြင်းက အဓိပ္ပာယ်မရှိချေ။ အကယ်၍ သူသာ ဇွတ်အတင်း မေးမြန်းနေပါက ဆရာဖြစ်သူက သူ့အပေါ် ပို၍ စိတ်ပျက်သွားပေလိမ့်မည်။

၎င်းထက် ဆရာဖြစ်သူ ရှိနေဆဲ အချိန်အတွင်းမှာပင် နောက်ထပ်သော အခွင့်အရေးကြီးများနှင့် ကျင့်ကြံခြင်း အစွမ်းများကို တိုးတက်အောင် တောင်းဆိုတာက ပို၍ ကောင်းမွန်ပေသည်။ အကယ်၍ နောင်တစ်ချိန်တွင် ဆရာဖြစ်သူက သူ့ကို စွန့်ခွာသွားခဲ့လျှင်ပင် အခွင့်အရေးကြီးများက သူ၏ လက်ထဲသို့ ရောက်ရှိနေခဲ့ပြီ ဖြစ်ရာ... သူတို့နှစ်ဦး လမ်းခွဲရလျှင်ပင် ကြိုးပမ်းမှုအားလုံး အချည်းနှီး ဖြစ်မသွားတော့ချေ။

အဘိုးအို ဖမ်းဆီးခေါ်ဆောင်ခံရစဉ်ကတည်းက ရှောင်ယွီ၏ စိတ်ထဲတွင် သံသယများ ရှိနေခဲ့ခြင်း ဖြစ်သည်။ ဆရာဖြစ်သူ၏ အတိတ်က ကျင့်ကြံခြင်းအဆင့်နှင့် ပတ်သက်၍ ဆရာကလည်း ထုတ်မပြောခဲ့သလို သူကလည်း မမေးမြန်းခဲ့ချေ။ သို့သော် ရှောင်ယွီ စိတ်ထဲတွင်တော့ အတော်လေး စူးစမ်းလိုစိတ် ရှိနေခဲ့သည်။ ယခုလက်ရှိ ရှောင်ယွီ သိထားသော အမြင့်မားဆုံး ကျင့်ကြံခြင်းနယ်ပယ်မှာ "တံဆိပ်ခတ်ဧကရာဇ်အဆင့် ပညာရှင် ဖြစ်ပြီး ၎င်းမှာ အဇူရာ လျှို့ဝှက်ဆန်းကြယ် နယ်မြေ၏ အမြင့်ဆုံး ထိပ်သီးအဆင့် ဖြစ်ပေသည်။

အဘိုးအိုသည် ရှောင်ယွီ ဤမျှလောက်အထိ တည်ငြိမ်သွားသည်ကို မြင်တွေ့ရသောအခါ အနည်းငယ် အံ့အားသင့်သွားခဲ့ရ၏။ ဤသည်မှာ ရှောင်ယွီ၏ ပုံမှန်စရိုက်မျိုး မဟုတ်ချေ။ သို့သော်လည်း အဘိုးအိုက ၎င်းမှာ ယခုတိုက်ပွဲကြောင့် ဖြစ်လိမ့်မည်ဟု ခန့်မှန်းလိုက်သည်။ ကြည့်ရသည်မှာ ဤတိုက်ပွဲကြောင့် ရှောင်ယွီတစ်ယောက် အတော်လေး ကြီးပြင်းရင့်ကျက်လာခဲ့ပုံရပေသည်။

မကြာသေးမီက ကျင့်ကြံခြင်းအင်အားများ ပြန်လည်ရရှိလာပြီး မိမိ၏ ကူညီမှုကြောင့် ရှောင်ယွီသည် အနည်းငယ် ဂုဏ်မာန ထောင်လွှားနေခဲ့ခြင်း ဖြစ်၏။ ယခုအခါတွင်တော့ ရှောင်ယွီသည် အတိတ်က ရှိခဲ့သော သူ၏ စရိုက်အမှန်ကို ပြန်လည်ရရှိလာခဲ့ပြီ ဖြစ်သည်။

"မင်းကို ဘာဖြစ်လို့ ဒီမြို့ငယ်လေးဆီ ခေါ်လာခဲ့ရသလဲဆိုတာ သိလား..." ရှောင်ယွီ တိတ်ဆိတ်နေသည်ကို မြင်သောအခါ အဘိုးအိုက ခေတ္တမျှ နှုတ်ဆိတ်နေပြီးနောက် မေးမြန်းလိုက်သည်။

အကြောင်းပြချက်မရှိဘဲ... ဤတပည့်ဖြစ်သူမှာ အတိတ်ကကဲ့သို့ မိမိနှင့် နီးကပ်မှု မရှိတော့ကြောင်း အဘိုးအို ခံစားလိုက်ရခြင်း ဖြစ်သည်။ သို့သော်လည်း အဘိုးအိုက ၎င်းကို ဂရုမစိုက်ပေ။ ဤသို့ ဖြစ်သွားတာကလည်း ကောင်းမွန်လှပေသည်... ၎င်းက နောင်အနာဂတ်တွင် ပိုမို၍ သတိကြီးစွာ ထားရှိနိုင်စေမည် မဟုတ်ပါလား။

"ဆရာ... အရင်က ဆရာပြောခဲ့တဲ့ အခွင့်အရေးကြီးက ဤနေရာမှာ ရှိနေလို့လားဟင်..."

"အတိအကျပဲ... ဤနေရာမှာ ရှိနေတာ။ သို့သော်လည်း ဆရာက တိကျတဲ့ တည်နေရာကိုတော့ မသိဘူး... ဒါပေမဲ့ဒီ မြို့ငယ်လေးရဲ့ အနီးအနားမှာ ရှိနေတာတော့ သေချာတယ်"

“အဖြူအမည်းမြို့..."

"၎င်းကို မျက်စိအရောင်ခွဲခြားလို့မရတဲ့  လူတစ်ယောက်က တည်ထောင်ခဲ့တာ။ ဒါပေမဲ့ အတိအကျ ပြောရရင်တော့ ထိုလူက မျက်စိမမြင်ရတဲ့ မျက်မမြင်တစ်ဦး ဖြစ်ပေမယ့် အလွန်တရာ အစွမ်းထက်လှတဲ့ အင်အားတွေကို ပိုင်ဆိုင်ထားခဲ့တာမျိုးကွ"

"တစ်ချိန်တည်းမှာပဲ သူက မိစ္ဆာကျင့်စဉ်တွေကို ကျင့်ကြံခဲ့တဲ့သူလည်း ဖြစ်တယ်။ အမှန်အတိုင်း ပြောရရင်တော့... သူက မိစ္ဆာကျင့်စဉ်ကို ကျင့်ကြံခဲ့တာလား ဒါမှမဟုတ် မိစ္ဆာမျိုးနွယ်စုဝင် တစ်ယောက်လားဆိုတာ ဆရာလည်း သေချာမသိဘူး"

"ယုတ္တိဗေဒအရ ပြောရရင်တော့... အကယ်၍ သူ၏ အစွမ်းထက်တဲ့ အင်အားတွေက အဇူရာ လျှို့ဝှက်ဆန်းကြယ် နယ်မြေထဲမှာ ရာစုနှစ်ပေါင်းများစွာ ကြာအောင် တည်ရှိနေခဲ့မယ်ဆိုရင်... အဇူရာ လျှို့ဝှက်ဆန်းပြား နယ်မြေတောင့်ခံနိုင်မှာ မဟုတ်ဘဲ ပျက်စီးသွားခဲ့ရလိမ့်မယ်။ ဒါပေမဲ့ အခုအချိန်အထိ အဇူရာ နယ်ပယ်ကြီးက ဘာမှမဖြစ်ဘဲ ကောင်းမွန်နေသေးတာကြောင့်... ဖြစ်နိုင်ခြေ တစ်ခုပဲ ရှိတော့တယ်"

"ဒါကတော့... ထိုလူ အောက်ကမ္ဘာသို့ ဆင်းသက်လာခဲ့စဉ်တုန်းက သူ၏ အင်အားတွေက အကြီးအကျယ် ဒဏ်ရာရ ပျက်စီးနေခဲ့တာကြောင့် အဇူရာ လျှို့ဝှက်ဆန်းကြယ် နယ်မြေ သူ့ကို လက်ခံပေးနိုင်ခဲ့တာမျိုးပဲ ဖြစ်ရမယ်"

ဆရာဖြစ်သူ၏ အကဲခတ်သုံးသပ်ချက်ကို ကြားရသောအခါ ရှောင်ယွီ ခေါင်းညိတ်လိုက်မိသည်။ ဤသည်မှာ ဆရာတစ်ယောက် ရှိခြင်း၏ အားသာချက်ပင် ဖြစ်၏။ သာမန် ဗဟုသုတ မရှိသော လူတစ်ယောက်သာ ဆိုပါက ဤကဲ့သို့သော ဖြစ်နိုင်ခြေမျိုးကို မည်သို့မျှ တွေးတောမိလိမ့်မည် မဟုတ်ချေ။

"ဆရာ... ဒါဆို အဲ့ဒီ အခွင့်အရေးကြီးက ဘယ်အချိန်ကျမှ ထွက်ပေါ်လာမှာလဲဟင်..."

"ဘယ်အချိန်မှာ ထွက်ပေါ်လာမလဲဆိုတာက အရေးမကြီးပါဘူး…ထို့အပြင်... ငါတို့က အစောတလျင် သွားပြီး လှုံ့ဆော်တဲ့သူတွေ မဖြစ်သင့်ဘူး"

"ပြီးတော့ လွန်ခဲ့တဲ့ ရက်ပိုင်းက ဖြစ်ပေါ်ခဲ့တဲ့ လှုပ်ခတ်မှုကြီးအကြောင်းကိုလည်း မင်း သိထားပြီးသားပဲ မဟုတ်လား။ ၎င်းက အထက်ကမ္ဘာက ကျင့်ကြံသူတွေ ဆင်းသက်လာခဲ့တာ ဖြစ်ပေမယ့် သူတို့အားလုံးက မျိုးဆက်သစ် လူငယ်ပိုင်းတွေပဲ ဖြစ်ရမယ်"

"ဒါဆို ဆရာ... အဲ့ဒီလူတွေက အဲဒီ တီမိသားစုက သခင်လေးနဲ့ နှိုင်းယှဉ်ရင်ကော ဘယ်လိုရှိလဲဟင်..."

"ဆရာလည်း မသိဘူး... အချို့လူတွေက လူသိမခံဘဲ အရှိန်အဝါကို ဖုံးကွယ်ထားရတာကို ပိုပြီး သဘောကျတတ်ကြလို့ပဲ။ အဲ့ဒီသခင်လေးက ဘယ်မိသားစုရဲ့ 'အမွေဆက်ခံခြင်း အစီအစဉ်' ထဲကလဲ ဒါမှမဟုတ် အခြားအရာတစ်ခုခုလားဆိုတာ ဆရာ မသိဘူး"

"အကယ်၍ သူသာ အမွေဆက်ခံခြင်း အဆင့် အစီအစဉ်ထဲက တစ်ယောက်ဆိုရင်တော့... သူ၏ အဆင့်အတန်းက ကြောက်မက်ဖွယ်ကောင်းလောက်အောင် မြင့်မားလွန်းလှတယ်"

"အမွေဆက်ခံခြင်း အဆင့် ဆိုတာက... အဲ့ဒီ အင်အားကြီး မိသားစုတွေရဲ့ ဆက်ခံသူတွေကို ပြောတာလားဟင်..."

"အတန်အသင့်တော့ ဟုတ်ပါတယ်။ သို့သော်လည်း သူတို့က သတ်မှတ်ထားတဲ့ ဆက်ခံသူအစစ်အမှန်တွေ မဟုတ်ကြသေးဘူး... ဒါပေမဲ့ သူတို့ အမွေဆက်ခံရမယ့် အရာတွေကတော့ လူသားတွေအနေနဲ့ နှစ်ပေါင်းသောင်းချီတိုင်အောင် အသည်းအသန် လိုက်လံရှာဖွေနေကြရတဲ့ အဖိုးတန်ရတနာတွေ ဖြစ်တယ်"

အဘိုးအိုသည် ကျန်ရှိနေသေးသော စကားလုံးများကို ထုတ်မပြောခဲ့ချေ။ အကယ်၍ ထိုလူငယ်သာ ထိုအင်အားကြီး မိသားစု၏ "နတ်ဘုရားသားတော်" သာ ဆိုပါက ၎င်းက ပိုမို၍ ကြောက်မက်ဖွယ်ကောင်းပေလိမ့်မည်။ 

သို့သော်လည်း အဘိုးအိုက ၎င်းကို သံသယမဝင်ခဲ့ချေ။ 

အဆုံး၌မူ ဤကဲ့သို့သော အင်အားကြီး မိသားစု၏ နတ်ဘုရားသားတော်တစ်ဦးအနေဖြင့် မိသားစုအတွင်း၌ သို့မဟုတ် မသေမျိုးကမ္ဘာ ထဲရှိ လျှို့ဝှက်နယ်မြေတစ်ခုခု၌သာ အပိတ်အဆို့ခံကာ ကျင့်ကြံနေရမည် မဟုတ်ပါလား။ သူက ဘာဖြစ်လို့ ဤကဲ့သို့သော ငှက်ဆိုးကုန်း ကျိန်စာသင့်နေရာမျိုးသို့ လာရောက်နေရမည်နည်း။

အဘိုးအို သတိမထားမိလိုက်သော အချိန်တွင်... သူတို့နှစ်ဦး စကားပြောဆိုနေကြစဉ်မှာပင် လေဟာနယ် အတွင်း၌ ပုံရိပ်တစ်ခု တိတ်တဆိတ် ပုန်းကွယ်နေခဲ့သည်။ ထိုလူငယ်နှစ်ဦးကို စိုက်ကြည့်နေသောသူမှာ အခြားသူမဟုတ်ဘဲ တီကျွယ်တျန်းပင် ဖြစ်၏။

အခွင့်အရေးကြီးကို ဝင်ရောက်လုယူရန်လား... တကယ့်ကို ပြက်လုံးတစ်ခုပါပဲ။ ဤအရာက ကံကြမ္မာသားတော်နှင့် ထိုက်တန်သော အရာ ဖြစ်ပေသည်။ ထို့ကြောင့် ကံကြမ္မာသားတော်၏ လက်ထဲမှနေ၍ ပြန်လည်လုယူခြင်းကသာ အမြန်ဆန်ဆုံး နည်းလမ်း ဖြစ်၏။ 

အကယ်၍ သူကိုယ်တိုင် သွားရောက်ရှာဖွေပါက အန္တရာယ်အချို့ ရှိနေနိုင်ပေသည်။ တီကျွယ်တျန်းအနေဖြင့် ၎င်းကို မကြောက်ရွံ့သော်ငြား... အခမဲ့ လုပ်အားပေး အလုပ်သမားတစ်ယောက် ရှိနေတာက ပို၍ မကောင်းပေဘူးလား။ ဤသည်မှာ "လှဲနေရင်းနှင့် အနိုင်ရရှိခြင်း" ဟူသော အခြေအနေမျိုးပင် ဖြစ်ပေလိမ့်မည်။

အချိန်ကာလများမှာ လျင်မြန်စွာ ကုန်ဆုံးသွားခဲ့သည်။ မျက်စိတစ်မှိတ်အတွင်းမှာပင် သုံးရက်တာ အချိန်ကာလ ကုန်ဆုံးသွားခဲ့ပြီ ဖြစ်၏။

'ကြည့်ရတာ အချိန်ကျရောက်လာပြီပဲ... မကြာခင် ပွင့်တော့မယ် ထင်တယ်'

'တိကျတဲ့ တည်နေရာကတော့ ဤမြို့ငယ်လေးရဲ့ အရှေ့တောင်ဘက် မိုင်သုံးဆယ်အကွာမှာ ရှိတဲ့... စာသားမပါတဲ့ ကျောက်စာတိုင် ရှိတဲ့ ကုန်းမြေမြှင့်လေးပဲ ဖြစ်ရမယ်'

'အချိန်ကတော့ ညနေ ၃ နာရီ ဝန်းကျင်လောက်မှာပဲ...' တီကျွယ်တျန်းက သူ့ဘာသာသူ ခပ်တိုးတိုး ရေရွတ်လိုက်သည်။

အကယ်၍ ရှောင်ယွီ၏ ဆရာသာ ဤစကားကို ကြားရပါက သူ သေချာပေါက် ပိုမို၍ ထိတ်လန့်တုန်လှုပ်သွားပေလိမ့်မည်။ 

(ဆင်းလာတုန်း ကယူလာတဲ့ ဟောကိန်း မှာပါလို့သိတာ)

တိကျသော တည်နေရာ၊ ပုံသဏ္ဌာန်နှင့် အချိန်ကာလကိုပါ သိရှိနေခြင်းက... တကယ့်ကို မယုံကြည်နိုင်လောက်အောင် အံ့ဩစရာကောင်းလွန်းလှပေသည်။ 

ကြည့်ရသည်မှာ အောက်ကမ္ဘာသို့ ဆင်းသက်လာကြသော အခြားလူများသည်လည်း လှုပ်ရှားမှုများ စတင်ပြုလုပ်ကြတော့မည် ဖြစ်သည်။

အချို့သော အင်အားကြီး မိသားစုဝင်များအနေဖြင့် ဤနေရာကို ခန့်မှန်းတွက်ချက်နိုင်ကြသော်လည်း အတွင်း၌ မည်သို့သော အခွင့်အရေးကြီး ရှိနေသလဲဆိုသည်ကိုမူ သူတို့ မသိကြကြောင်း တီကျွယ်တျန်း သိရှိထားခဲ့၏။ 

အတွင်း၌ ဘာရှိနေသလဲဆိုသည်ကို တီကျွယ်တျန်းကိုယ်တိုင်လည်း သေချာမသိသော်လည်း သူ၏ မိသားစုကမူ သိရှိထားကြောင်း သူ သိသည်။ သို့သော်လည်း မိသားစုဝင်များက သူ့ကို ထုတ်ဖော်ပြောဆိုခဲ့ခြင်း မရှိချေ။

သို့သော် တီကျွယ်တျန်း ဤနေရာသို့ ရောက်ရှိလာကတည်းက... သူသည် ရင်းနှီးနေသော အရှိန်အဝါတစ်ခုကို အာရုံခံမိလိုက်သည်။ 

၎င်းမှာ "အဋ္ဌမမြောက် ဘိုးဘေးကြီး"  ၏ အရှိန်အဝါ ဖြစ်ကြောင်း သူ သိရှိလိုက်၏။ အဋ္ဌမမြောက် ဘိုးဘေးကြီးသည် အဇူရာ လျှို့ဝှက်ဆန်းကြယ် နယ်‌ မြေကြီးကို တိတ်တဆိတ် တံဆိပ်ခတ်နှိပ်  ထားခဲ့ခြင်း ဖြစ်ပြီး ၎င်းကို အခြားလူများ သိရှိကြလိမ့်မည် မဟုတ်ချေ။ အဆုံး၌မူ အဋ္ဌမမြောက် ဘိုးဘေးကြီးသည်လည်း အစီအရင်ဆရာကြီးတစ်ဦး မဟုတ်ပါလား။ ထို့အပြင် သူက အလွန်တရာ အစွမ်းထက်လှသော ပညာရှင်ကြီးတစ်ဦးလည်း ဖြစ်ပေသည်။

မိသားစု၏ "အရပ်ဆယ်မျက်နှာ မသေမျိုးတံဆိပ်ခတ်ခြင်း အစီအရင်" ဆိုသည်မှာလည်း ဘိုးဘေးကြီးကိုယ်တိုင် သုတေသနပြု ဖော်ထုတ်ထားခဲ့သော အစီအရင်များထဲမှ တစ်ခု ဖြစ်၏။ ၎င်းကို မသေမျိုးကမ္ဘာ၏ ထိပ်သီး သတ်ဖြတ်ခြင်း အစီအရင်ကြီး ဆယ်ခုထဲမှ တစ်ခုဟု ခေါ်ဆိုကြပေသည်။ သို့သော်လည်း ၎င်းကို ဘိုးဘေးကြီးက ဖော်ထုတ်ခဲ့ခြင်း ဖြစ်ကြောင်း မည်သူမျှ မသိကြချေ။

ထို့အပြင် နောက်ထပ် ကြောက်မက်ဖွယ်ရာ အကောင်းဆုံး အစီအရင်တစ်ခု ရှိနေသေးရာ ၎င်းမှာ "ကောင်းကင်နှင့် မြေကမ္ဘာ တံဆိပ်ခတ်နှိပ်ခြင်း အစီအရင်" ဖြစ်ပြီး ၎င်းက သဘာဝအတိုင်း အလိုအလျောက် ဖြစ်ပေါ်နေခြင်း ဖြစ်၏။ တီမိသားစုတွင်လည်း ၎င်းကဲ့သို့သော အစီအရင်တစ်ခု ရှိနေခဲ့သည်။ သို့သော်လည်း ၎င်းကို အသုံးမပြုခဲ့သည်မှာ ကြာလှပြီ ဖြစ်ပေသည်။

နတ်ဘုရားကမ္ဘာတစ်ခုလုံး သည် ဤအစီအရင်ကြီး၏ လွှမ်းမိုးမှုအောက်တွင် ရှိနေကြောင်း တီကျွယ်တျန်း သိရှိထားခဲ့၏။ 

ဤသည်မှာ တီမိသားစု၏ လျှို့ဝှက်ချက်များထဲမှ တစ်ခုလည်း ဖြစ်ပေသည်။ အကယ်၍ တီကျွယ်တျန်းသာ တီမိသားစု၏ နတ်ဘုရားသားတော် ဖြစ်မနေခဲ့ပါက ဤအကြောင်းအရာကို သူ သိရှိနိုင်လိမ့်မည် မဟုတ်ချေ။ အချို့သော အကြီးအကဲများပင် နတ်ဘုရားကမ္ဘာကြီးတစ်ခုလုံး ဤအစီအရင်ကြီးဖြင့် ဖုံးလွှမ်းခံထားရသည်ကို မသိရှိကြချေ။ 

"အရပ်ဆယ်မျက်နှာ မသေမျိုးတံဆိပ်ခတ်ခြင်း အစီအရင်" မှာ အစွမ်းထက်လှသော်လည်း ၎င်းမှာ အများအာရုံလွှဲရန်အတွက် ဖန်တီးထားသော အရာသက်သက်မျှသာ ဖြစ်ပေသည်။