အခန်း ၂၆ - အမှန်နှင့်အမှား ရောယှက်နေသော ဆန်ကွမ်းချင်းအာ၏ အကွက်များ

မြင့်မားလှသော စင်မြင့်ထက်ရှိ လူများသည် ဆန်ကွမ်းချင်းအာကို ကြောက်ရွံ့ထိတ်လန့်ဖွယ် အကြည့်များဖြင့် စိုက်ကြည့်လိုက်မိကြသည်။ 

မိမိတို့ကိုယ်တိုင် ဘာဖြစ်လို့ ကြောက်ရွံ့နေမိသလဲဆိုသည်ကို သူတို့ မသိကြဘဲ ၎င်းမှာ ဗီဇစိတ်အရ ခံစားလိုက်ရခြင်းမျိုး ဖြစ်ပေလိမ့်မည်။

'တကယ့်ကို စိတ်ဝင်စားဖို့ကောင်းတဲ့ အမျိုးသမီးပဲ...' တီကျွယ်တျန်းကတော့ သူ့ဘာသာသူ ခပ်တိုးတိုး ရေရွတ်ရင်း သဘောကျစွာ ရယ်မောလိုက်မိသည်။

"ချင်းအာ... ငါ..."

"ကျွန်မကို ချင်းအာလို့ လာမခေါ်နဲ့…အရင်က ချင်းအာဆိုတာ သေဆုံးသွားခဲ့ပါပြီ…သူမကို သေအောင် ဖိအားပေးခဲ့တာ အစ်မကြီးကိုယ်တိုင် မဟုတ်ဘူးလား... ဆန်ကွမ်းဝမ်အာ"

"အတိတ်တုန်းက ကျွန်မတို့မိသားစုနဲ့ ရှောင်မိသားစုက ရင်းနှီးတဲ့ ပတ်သက်မှု ရှိခဲ့ကြတယ်… အစ်မကြီးနဲ့ သူနဲ့ကလည်း နက်နက်ရှိုင်းရှိုင်း ချစ်ခင်ခဲ့ကြတယ်... အဲ့ဒီတုန်းက ကျွန်မ အမြဲတမ်း အစ်မကြီးတို့ကို ထောက်ခံပေးခဲ့တာပဲ မဟုတ်လား"

"ဒါပေမဲ့ အစ်မကြီးက ဘာလုပ်ခဲ့လဲ"

"အစ်မကြီးရဲ့ ပါရမီက ကောင်းမွန်လွန်းလို့ အထက်ကမ္ဘာက အစွမ်းထက်တဲ့ ပညာရှင်ကြီးတစ်ယောက်ရဲ့ သတိပြုမိခြင်းကို ခံခဲ့ရတယ်… ကျွန်မတို့မိသားစုကလည်း အရမ်းမြန်မြန်ဆန်ဆန် တိုးတက်ဖွံ့ဖြိုးလာခဲ့တယ်"

"ဒါပေမဲ့... ရှောင်ယွီက အသုံးမကျတဲ့ လူဖျင်းတစ်ယောက် ဖြစ်သွားပြီဆိုတာကို အစ်မကြီး မသိဘဲ မနေပါဘူး... ဟုတ်တယ်မလား"

"ကျွန်မ သူ့ကို အထင်မသေးခဲ့ပါဘူး..."

"ဒါပေမဲ့ အစ်မကြီးက ဘာဖြစ်လို့ ကျွန်မအတွက် ဆုံးဖြတ်ချက်ကို လာပြီး ချပေးရတာလဲ"

"အစ်မကြီးက ကျွန်မရဲ့ အစ်မအရင်း ပဲလေ"

"အစ်မကြီးရဲ့ ကူညီမှုကြောင့် လူတိုင်းက ဆန်ကွမ်းမိသားစုမှာ ကောင်းကင်ဘုံရဲ့ မျက်နှာသာပေးမှုကို ရရှိထားတဲ့ သမီးတော်တစ်ဦး ထွက်ပေါ်လာခဲ့ပြီလို့ ပြောကြတယ်။ ဆန်ကွမ်းမိသားစုတစ်ခုလုံး အစ်မကြီးရဲ့ အရိပ်အောက်မှာပဲ နေခဲ့ရတာ။ အဇူရာ လျှို့ဝှက်ဆန်းကြယ် နယ်မြေ ရဲ့ အရှင်သခင် အင်အားကြီးဂိုဏ်းတွေတောင်မှ ကျွန်မတို့ ဆန်ကွမ်းမိသားစုကို မျက်နှာသာပေးခဲ့ကြရတယ်။ ဒါတွေအားလုံးက အစ်မကြီး ဆန်ကွမ်းဝမ်အာရဲ့ မိသားစု မို့လို့လေ"

"အစ်မကြီးက အစွမ်းထက်တယ်... အစွမ်းအစ ရှိတယ်... အစ်မကြီးက ရှောင်ယွီကို သဘောကျတယ်ဆိုရင် သူ့ကို တစ်ခါတည်း ခေါ်သွားလိုက်ပါတော့လား"

"ဘာဖြစ်လို့ ကျွန်မကို သူ့ထံ လက်ထပ်ပေးဖို့ ဖခင်ဖြစ်သူကို သွားပြီး အကြံပြုခဲ့ရတာလဲ"

"ဒီကိစ္စကို သိလိုက်ရတုန်းက ကျွန်မ ဘယ်လောက်တောင် စိတ်ပျက်အားငယ်သွားခဲ့ရလဲဆိုတာ အစ်မကြီး သိရဲ့လား"

"ကျွန်မရဲ့ စိတ်ပျက်အားငယ်မှုက... အစ်မကြီးက ကျွန်မကို ရှောင်ယွီနဲ့ စေ့စပ်ပေးခဲ့လို့ မဟုတ်ပါဘူး... ကျွန်မရဲ့ စိတ်ပျက်အားငယ်မှုက အစ်မကြီးက သူ့ကို လျော်ကြေးပေးဖို့ ကြိုးစားခဲ့တာကြောင့်ပဲ။ မိမိရဲ့ သွေးသားရင်းချာ ညီမအရင်းကို သုံးပြီး သူ့ကို လျော်ကြေးပေးခဲ့တာ... အစ်မကြီးရဲ့ ညီမအရင်းကို သုံးပြီးတော့လေ"

"အမေ မကွယ်လွန်ခင်တုန်းက ဘာပြောခဲ့လဲဆိုတာ အစ်မကြီး မှတ်မိသေးရဲ့လား… ကျွန်မကို သေချာစောင့်ရှောက်ပေးဖို့ အစ်မကြီးကို မှာကြားခဲ့တာလေ... အခုတော့ အစ်မကြီးက ကျွန်မကို တကယ့်ကို ကောင်းကောင်းမွန်မွန် စောင့်ရှောက်ပေးလိုက်တာပဲ"

"အစ်မကြီးရဲ့ ပါရမီက မြင့်မားလွန်းလို့ အစ်မကြီးကို ခေါ်သွားတဲ့ ပညာရှင်ကြီးက ကျွန်မတို့မိသားစုအတွက် ကျင့်ကြံခြင်း အရင်းအမြစ် အမြောက်အမြား ချန်ထားပေးခဲ့တယ်။ ဖခင်ဖြစ်သူ ပြုံးနေတာကို မြင်ရတဲ့ အခိုက်အတန့်တုန်းက ကျွန်မ တကယ်ပဲ စိတ်သက်သာရာ ရခဲ့မိသေးတယ်... အမေ မရှိတော့တဲ့နောက်မှာ ဖခင်ပဲ ကျန်တော့တာလေ။ အရင်တုန်းက မိသားစု တိုးတက်ဖို့အတွက် တွေးတောရင်း ဖခင်ဖြစ်သူရဲ့ ဆံပင်တွေ ဖြူခဲ့ရတာ... ဖခင်ဖြစ်သူရဲ့ စိတ်သက်သာရာရတဲ့ အပြုံးကို မြင်ရတဲ့အတွက် အစ်မကြီးအပေါ် ကျွန်မ တကယ်ပဲ ကျေးဇူးတင်ခဲ့မိသေးတာပါ"

"အစ်မကြီးက အစ်မတစ်ယောက်အနေနဲ့ မရိုးသားတဲ့ လုပ်ရပ်ကို လုပ်ခဲ့ရင်တောင်မှပေါ့... အစ်မကြီးက ကောင်းကင်ဘုံရဲ့ ပါရမီရှင် တစ်ယောက်ပဲ... သေချာပေါက် ကောင်းကောင်းမွန်မွန် ကျင့်ကြံရမှာပေါ့။ ကျွန်မရဲ့ ပါရမီက မကောင်းဘူး... ကျွန်မရဲ့ အင်အားကလည်း မရှိဘူး။ အစ်မကြီးနဲ့ ဖခင်ဖြစ်သူ စိတ်အေးလက်အေး ရှိစေဖို့အတွက် ကျွန်မကိုယ်တိုင်ပဲ လိုက်လျောပေးဖို့ ရွေးချယ်ခဲ့တာ"

"ကျွန်မရဲ့ စရိုက်ကို အစ်မကြီး သိပါတယ်... ကျွန်မက ဘယ်တော့မှ အလျှော့ပေးတတ်တဲ့သူ မဟုတ်ဘူး။ မိသားစုအတွက်... အစ်မကြီးအတွက်... ကျွန်မ အလျှော့ပေးခဲ့တာ..ရှောင်ယွီက အသုံးမကျတဲ့ လူဖျင်းတစ်ယောက် ဖြစ်နေရင်တောင်မှပေါ့"

"သူ လူဖျင်း ဖြစ်သွားခဲ့တုန်းက လူတိုင်းက သူ့ကို စော်ကားနှိမ်ချခဲ့ကြပေမယ့် ကျွန်မ သူ့ကို တစ်ခါမှ အထင်မသေးခဲ့ဘူး… သူ့ဆီကို ကျင့်ကြံခြင်း အရင်းအမြစ်တွေတောင် အမြဲတမ်း ပေးပို့ခိုင်းခဲ့သေးတယ်… ဒါတွေအားလုံးက အစ်မကြီး ချန်ထားခဲ့တဲ့ အရင်းအမြစ်တွေပဲ... ကျွန်မ တစ်ခုမှ မသုံးခဲ့ပါဘူး"

"ကျွန်မ အလျှော့ပေးခဲ့တယ် ဆိုပေမယ့်... ဒါက အစ်မကြီးကို မမုန်းဘူးလို့ မဆိုလိုပါဘူး"

"ဒါပေမဲ့ သူ ဘာလုပ်ခဲ့လဲဆိုတာ အစ်မကြီး သိရဲ့လား... သူ့ရဲ့ လုပ်ရပ်တွေက ဘယ်လောက်အထိ လွန်လဲဆိုတာ ထည့်မပြောနဲ့တော့… ကျွန်မ ပါရမီ မကောင်းဘူး... အင်အား မရှိဘူး... ဒါပေမဲ့ အခြားလူတွေ သူ့ကို လှောင်ပြောင်နေကြတုန်းက ကျွန်မ သူ့ကို ကူညီပေးခဲ့သေးတာ… ဒါပေမဲ့ ကျွန်မ လှောင်ပြောင်ခံနေရတဲ့ အချိန်မှာကော... သူ ဘာလုပ်နေလဲ"

"လေလံရုံကို နေ့တိုင်းသွားပြီး... လေလံဆရာမနဲ့ ပတ်သက်မှုတွေ မရှင်းမလင်း ဖြစ်နေခဲ့တာလေ… တစ်ကြိမ်တုန်းက ကျွန်မ သူ့ကို မြင်ခဲ့ပေမယ့် သူက ကျွန်မကို နှုတ်တောင်မဆက်ခဲ့ဘူး... အခြားအမျိုးသမီးတစ်ယောက်ကို ဖက်ပြီး ကျွန်မရဲ့ ရှေ့မှောက်မှာ လာပြီး ကြွားဝါပြနေခဲ့တာ… ကျွန်မရဲ့ အမျိုးသားက လူဖျင်းတစ်ယောက် ဖြစ်နေရင်တောင်မှ... အနည်းဆုံးတော့ သူက ဂရုစိုက်တက်တဲ့ စိတ်ဓာတ်မျိုး ရှိသင့်တာ မဟုတ်ဘူးလား တကယ့်ကို ရယ်စရာကောင်းလိုက်တာ..."

နောက်ကွယ်ရှိ ရှောင်ယွီသည် တကယ့်ကို အရှက်ရဖွယ် မျက်နှာအမူအရာ ဖြစ်သွားခဲ့ရသည်။ ယခုအခါတွင်မူ သူ ဘာပြန်ပြောရမှန်း မသိတော့ချေ။

"အစ်မကြီးက သူ့ကို လျော်ကြေးပေးခဲ့တယ်... ဒါဆို ကျွန်မကိုကော ဘယ်သူက လျော်ကြေးပေးမှာလဲ… ကျွန်မက ဘာဖြစ်လို့  နာကျင်မှု ခံစားချက်တွေကို ခံစားရမှာလဲ… စေ့စပ်ထားတဲ့သူက လူဖျင်းတစ်ယောက် ဖြစ်နေရင်တောင်မှ ကျွန်မ အလျှော့ပေးဖို့ ကြိုးစားခဲ့တာပဲ… ကျွန်မရဲ့ ပါရမီ မကောင်းဘူးဆိုတာကိုလည်း ကျွန်မ သိပါတယ်… အများဆုံး ရှိလှရင် နောင်အနာဂတ်မှာ ရိုးရိုးရှင်းရှင်းပဲ အသက်ရှင်သွားရုံပေါ့"

"ဒါပေမဲ့ ဘယ်အမျိုးသမီးမဆို မိမိကို ကာကွယ်ပေးမယ့် အမျိုးသားတစ်ယောက်ကို မလိုချင်ဘဲ နေမလား…သူက လူဖျင်း ဖြစ်နေရင်တောင်မှ... ကျွန်မ လှောင်ပြောင်ခံရတဲ့ အချိန်မှာ အနည်းဆုံးတော့ ကျွန်မရဲ့ ရှေ့ကနေ မားမားမတ်မတ် ရပ်တည်ပြီး ကာကွယ်ပေးသင့်တာ မဟုတ်ဘူးလား…ဒါကိုတောင် သူ မလုပ်ပေးနိုင်ခဲ့ဘူး"

"သူ့မှာ အင်အား မရှိလို့ပါလို့ အစ်မကြီး ပြောချင်ရင်တောင်မှ... သူကော တစ်ကြိမ်တစ်ခါလောက် ပေါ်လာဖူးရဲ့လား… ကျွန်မ သူ့အတွက် ဘယ်လောက်တောင် လုပ်ပေးခဲ့လဲ... သူကော ဘာလုပ်ပေးခဲ့လဲ… သူက နောင်တရရမှန်းတောင် မသိခဲ့ဘူး"

"စေ့စပ်ပွဲ ပျက်သွားပြီးတဲ့နောက်မှာမှ... သူက အဆင့်တွေ ချိုးဖျက်လာခဲ့တာ… ဒါပေမဲ့ အဲ့ဒီအချိန်တုန်းက ကျွန်မ သူ့ကို တကယ်ပဲ သတ်ပစ်ချင်ခဲ့တာ…ဒီလို လူမျိုးက အင်အား အနည်းငယ် ရှိလာတာနဲ့ ပြဿနာတွေကို လျှောက်ပြီး ရှာတော့မှာပဲ။ သူ့ရဲ့ မိသားစုက ဘယ်လောက်အထိ အင်အားနည်းလဲဆိုတာ သူ မသိဘူးလား"

"မင်းမှာ အခွင့်အရေးတွေနဲ့ ဝှက်ဖဲတွေ ရှိနေရင်တောင်မှ... မိမိထက် သာလွန်တဲ့သူကို သွားပြီး ရန်စတာက တကယ့်ကို မိုက်မဲတဲ့ လုပ်ရပ်ပဲ… အကယ်၍ ကျွန်မသာ တားမပေးခဲ့ရင်... သူတို့ရဲ့ ရှောင်မိသားစုတစ်ခုလုံး ပြာကျသွားခဲ့တာ ကြာလှပြီ… မိသားစုရဲ့ အစွမ်းထက်ဆုံးသူက ပုရွက်စိတ်သာသာ ရှိတာကို... တခြား အမျိုးသမီးတစ်ယောက်အတွက်နဲ့ တံဆိပ်ခတ်ဘုရင်အဆင့် ပညာရှင် စောင့်ရှောက်ထားတဲ့သူကို သွားပြီး ရန်စရဲတယ်လား"

"အမျိုးသမီးတစ်ယောက်အတွက်နဲ့တင်... တကယ့်ကို ရယ်စရာကောင်းလိုက်တာ"

"ဒါက အစ်မကြီး သဘောကျခဲ့တဲ့ လူစားမျိုးပေါ့... အင်အား ရှိလာရင်တောင်မှ သူက တကယ့်ကို နှလုံးသားမရှိဘဲ အတ္တကြီးတဲ့သူသက်သက်ပဲ။ ဂုဏ်မာနထောင်လွှားပြီး အခြားလူတွေကို အထင်သေးတတ်တဲ့သူ…သူ့မှာ အင်အားအနည်းငယ် ရှိလာတာနဲ့ စိတ်ကြိုက် လုပ်လို့ရပြီလို့ သူ တကယ် ထင်နေတဲ့သူ…တကယ့်ကို ရယ်စရာပဲ"

ရှောင်ယွီကို ကြည့်ကာ…

"မြစ်တစ်စင်းရဲ့ အရှေ့ဘက်မှာ နှစ်သုံးဆယ်... မြစ်တစ်စင်းရဲ့ အနောက်ဘက်မှာ နှစ်သုံးဆယ် တဲ့လား... ရှင် အဲ့ဒီလို ပြောခဲ့တုန်းကသာ ကျွန်မ ကြီးမားတဲ့ ပေးဆပ်မှုကို မလုပ်ခဲ့ရင်... ရှင် ဒီနေ့ ဒီနေရာမှာ မားမားမတ်မတ် ရပ်နေနိုင်မယ့် အခွင့်အရေး ရှိဦးမယ်လို့ ထင်လို့လား… လူဖျင်းတစ်ယောက်က... အင်အား ရှိလာရင်တောင်မှ လူဖျင်းသက်သက်ပါပဲ…သူက စိတ်နှလုံးထဲအထိ နိမ့်ကျနေတဲ့ လူဖျင်းတစ်ဦးပဲ… ငါ့မှာ အင်အား ရှိလာရင် ဘာဖြစ်လဲဆိုပြီး အမြဲ တွေးနေတာ... မင်းမှာ အင်အား မရှိရင်ကော ကောင်းကောင်းမွန်မွန် မရှင်သန်နိုင်ဘူးလား"

"အခုကော... အမကြီး ငါ့ကို သတ်ချင်သေးတုန်းပဲလား... လာလေ... လုပ်လိုက်စမ်းပါ”

"ဆန်ကွမ်းဝမ်အာ... ဒါက အစ်မကြီး ဖြစ်စေချင်တဲ့ ရလဒ်ပဲ မဟုတ်လား"

ဓားကို ကိုင်ထားသော ဆန်ကွမ်းဝမ်အာ၏ လက်များမှာ တုန်ယင်နေခဲ့သည်။ 

ဤမျှလောက်အထိ အကြောင်းအရာအမြောက်အမြား ဖြစ်ပျက်ခဲ့လိမ့်မည်ဟု သူမ မသိခဲ့မိချေ။ 

ဘာဖြစ်လို့ အခြေအနေတွေက ဤကဲ့သို့ ဖြစ်သွားရသနည်း။ 

ဆန်ကွမ်းချင်းအာကို ကြည့်ရင်း သူမ၏ မျက်ဝန်းထဲတွင် သေဆုံးခြင်းတရား၏ အရိပ်အယောင်များ ထွက်ပေါ်လာခဲ့သည်။ 

ဆန်ကွမ်းချင်းအာ သူမကို လိမ်ညာပြောဆိုနေခြင်း မဟုတ်ကြောင်း သူမ သိရှိထားခဲ့၏။ သူမအနေဖြင့် အမှန်တကယ်ပဲ အမှားကြီး မှားခဲ့မိခြင်း ဖြစ်ပါသလား။

"ဟူး... အခြေအနေကဒီလို ဖြစ်နေတာကိုး..."

""စကားကို လျှောက်မပြောနဲ့ဦး... ဆန်ကွမ်းမိသားစုက ငါတို့ ရန်စလို့ရတဲ့ အင်အားစု မဟုတ်ဘူး"

"ဆန်ကွမ်းချင်းအာက အသုံးမကျတဲ့သူလို့ အရင်က ငါတို့ ထင်ခဲ့ကြတာ... တကယ်တော့ ငါတို့ကိုယ်တိုင်ကသာ အသုံးမကျတဲ့ လူမိုက်တွေ ဖြစ်နေခဲ့တာပဲ"

ဘေးပတ်ဝန်းကျင်မှ လူများက တီးတိုး ပြောဆိုလိုက်ကြသည်။

'တကယ့်ကို စိတ်ဝင်စားဖို့ကောင်းတဲ့ အမျိုးသမီးပဲ...' တီကျွယ်တျန်းကတော့ ဆန်ကွမ်းချင်းအာသည် ဂုဏ်မာနထောင်လွှားသော လူတစ်ဦး ဖြစ်ပြီး သူမ ပြောဆိုလိုက်သော စကားများမှာ အမှန်နှင့်အမှား ရောယှက်နေခြင်း ဖြစ်ကြောင်း ရိပ်မိလိုက်သည်။ 

ဤနည်းလမ်းကမှ ပိုမို၍ လက်တွေ့ကျပြီး အစစ်အမှန်နှင့် တူပေလိမ့်မည်။

တစ်ဖက်တွင်မူ ၎င်းက သူမ၏ မိသားစုနှင့် ဖခင်ဖြစ်သူကို နောင်တရသွားစေနိုင်သလို... ဆန်ကွမ်းဝမ်အာကိုလည်း အပြစ်မကင်းသလို ခံစာသွားရစေနိုင်သည်။ 

အခြားတစ်ဖက်တွင်မူ... သူမသည် မိမိကိုယ်မိမိ အကောင်းဆုံး ပုံရိပ်တစ်ခု ဖြစ်အောင် တည်ဆောက်လိုက်ခြင်းပင်။ 

သူမ လုပ်ဆောင်ခဲ့သမျှ အရာအားလုံးမှာ ဖိအားပေးခံရ၍ ဖြစ်ကြောင်း သက်သေပြလိုက်ခြင်း ဖြစ်၏။ 

ထို့ကြောင့် သူမအနေဖြင့် ရှောင်ယွီကို သတ်ဖြတ်လိုက်လျှင်ပင် လူတိုင်းက နားလည်ပေးနိုင်ကြပေလိမ့်မည်။ 

မိန်းမတို့၏ စိတ်နှလုံးသည် သမုဒ္ဒရာအောက်ခြေရှိ အပ်တစ်ချောင်းကဲ့သို့ ရှာဖွေရခက်လှပေသည်။

ကံကြမ္မာသားတော်ပင် ယခုအခါ ကြောင်အသွားခဲ့ရသည်ကို မြင်တွေ့လိုက်ရသည် မဟုတ်ပါလား။ 

ရှောင်ယွီ ကိုယ်တိုင်ပင် ဆန်ကွမ်းချင်းအာ၏ စကားများမှာ အမှန်လား၊ အမှားလားဆိုသည်ကို သံသယဝင်နေမိပြီ ဖြစ်သည်။

ဆန်ကွမ်းချင်းအာ လှည့်ထွက်သွားခဲ့သည်။

"နေဦး... ငါတို့ရဲ့ တိုက်ပွဲက မပြီးသေးဘူးလေ..." ရှောင်ယွီ ရုတ်တရက် စိုးရိမ်တကြီး ဖြစ်သွားခဲ့ရသည်။ 

ဆန်ကွမ်းချင်းအာ၏ စကားနှင့် လုပ်ရပ်များနှင့် ပတ်သက်၍ သူ၏ စိတ်ထဲတွင် သံသယအချို့ ထွက်ပေါ်နေခဲ့ပြီ ဖြစ်၏။