အခန်း ၂၅ - မင်းရဲ့ ဟန်ဆောင်မှုတွေကို တော်လိုက်တော့... (ဓားက ခန္ဓာကိုယ်ကို ထိုးဖောက်သွားခြင်း)

ဘေးပတ်ဝန်းကျင်ရှိ လူများအားလုံး၏ မျက်နှာအမူအရာများပါ လိုက်လံပြောင်းလဲသွားခဲ့ရသည်။ လွန်ခဲ့သည့် မိနစ်ပိုင်းခန့်က တီကျွယ်တျန်း မရည်ရွယ်ဘဲ ထုတ်ဖော်ပြသလိုက်သော ကျင့်ကြံခြင်းအရှိန်အဝါကြောင့် သူတို့သည် ကောင်းကင်ကြီး ပြိုကျပျက်စီးပြီး မြေကမ္ဘာကြီး နစ်မြုပ်သွားသည့်အလား ခံစားချက်မျိုးကို ခံစားလိုက်ရခြင်း ဖြစ်၏။ 

မြင့်မားလှသော စင်မြင့်ထက်တွင် ထိုင်နေပြီး ရုပ်သွင်ကို အသေအချာ မမြင်ရသော ထိုအမျိုးသားကို မည်သူမျှ မော့မကြည့်ဝံ့ကြတော့ချေ။ 

တိတ်တဆိတ် ချောင်းမြောင်းကြည့်ရှုရန် ကြံစည်နေသူများပင် မိမိတို့၏ အတွေးကို ချက်ချင်း လက်လျှော့လိုက်ကြရတော့သည်။

ဤအခိုက်အတန့်တွင် လူတိုင်း၏ အကြည့်များမှာ ကွင်းပြင်ကျယ်ကြီးထဲရှိ သွေးချင်းချင်းနီနေသော ရေခဲရုပ်တုကြီးဆီသို့သာ တစ်ဖန် ပြန်လည်ရောက်ရှိသွားခဲ့သည်။ 

ဆန်ကွမ်းချင်းအာသည် သူမ၏ လက်ကို ရပ်တန့်ခြင်းမရှိဘဲ ဓားဖြင့် တစ်ချက်ပြီးတစ်ချက် ရက်ရက်စက်စက် ဆက်တိုက် ထိုးစိုက်နေခဲ့၏။ စောင့်ကြည့်နေကြသူများမှာ ၎င်းမြင်ကွင်းကြောင့် မျက်ခုံးများပင် လှုပ်ခတ်သွားခဲ့ရသည်။ ဤသည်မှာ မည်မျှလောက်အထိ ကြီးမားလှသော နာကျည်းမှု ရန်ငြိုးရန်စ ဖြစ်ပါသနည်း။

"တော်လောက်ပြီ..."

အေးစက်လှသော အော်ဟစ်သံတစ်သံ ရေခဲရုပ်တုကြီးအတွင်းမှနေ၍ ထွက်ပေါ်လာခဲ့ပြီးနောက် ရေခဲတုံးကြီးမှာ ဝုန်းခနဲ ကွဲအက်ပျက်စီးသွားခဲ့ရသည်။ 

ရှောင်ယွီ၏ ပုံရိပ်မှာ အတွင်းမှ ပြန်လည်ပေါ်ထွက်လာခဲ့၏။ သူ၏ နှုတ်ခမ်းထောင့်တွင် သွေးစအချို့ စီးကျနေခဲ့ပြီး မျက်ဝန်းများမှာလည်း လုံးဝ အေးစက်သွားခဲ့ရတော့သည်။ မူလက သူ၏ အစွမ်းအစများကို ထုတ်ဖော်ပြသရမည့် အချိန်ဖြစ်သော်လည်း တိုက်ပွဲစတင်သည်နှင့် တပြိုင်နက် ပြင်းထန်စွာ ဒဏ်ရာရရှိသွားလိမ့်မည်ဟု သူ မထင်ထားခဲ့မိချေ။

သူသည် နှုတ်ခမ်းထောင့်ရှိ သွေးစများကို သုတ်လိုက်ရင်း ဆန်ကွမ်းချင်းအာကို စိုက်ကြည့်လိုက်သည်။

"ကောင်းတယ်... အရမ်းကောင်းတာပဲ… မင်းရဲ့ အခုရှိနေတဲ့ အင်အားကမှ ငါ့ရဲ့ အစစ်အမှန် တိုက်ခိုက်ရေးစွမ်းရည်ကို ထုတ်သုံးဖို့ ထိုက်တန်တာမျိုး"

ရှောင်ယွီ၏ စကားကို ကြားရသောအခါ လူအများအပြား၏ မျက်ဝန်းထဲတွင် အံ့အားသင့်မှုများဖြင့် ပြည့်နှက်သွားခဲ့ရသည်။ ဤရှောင်ယွီတွင် ဝှက်ဖဲတစ်ခု ကျန်ရှိနေသေးသည် မဟုတ်ပါလား။

"မီးနတ်ဘုရား အသွင်ပြောင်းလဲခြင်း"

ရှောင်ယွီ၏ မျက်ဝန်းထဲတွင် ရဲရင့်ပြတ်သားသော အကြည့်တစ်ခု ထွက်ပေါ်လာခဲ့ပြီးနောက် သူ၏ ခန္ဓာကိုယ်ပတ်ပတ်လည်တွင် မီးလျှံတန်းများ ဝုန်းခနဲ ထွက်ပေါ်လာခဲ့ကာ ၎င်းတို့အားလုံးကို သူ၏ ခန္ဓာကိုယ်အတွင်းသို့ ပြန်လည်စုပ်ယူလိုက်သည်။ 

ထိုအခါ သူ၏ အင်အားမှာ ချက်ချင်းပင် မြင့်တက်လာခဲ့ပြီး ကျင့်ကြံခြင်းအဆင့်ငယ် ၄ လွှာခန့်အထိ တိုက်ရိုက်မြင့်တက်သွားခဲ့သည်။ 

"ဒါက အမှန်တကယ်ပဲ လျှို့ဝှက်ကျင့်စဉ် တစ်ခုလား..."

"ဒီရှောင်ယွီက ဤကဲ့သို့သော လျှို့ဝှက်ကျင့်စဉ်မျိုးကို ပိုင်ဆိုင်ထားတာဆိုတော့ တကယ့်ကို အစွမ်းထက်တဲ့သူပဲ…ဒါပေမဲ့ နှမြောစရာကောင်းတာကတော့... ၎င်းကို နိမ့်ကျတဲ့ ကျင့်ကြံခြင်းအဆင့်တွေမှာပဲ သုံးလို့ရနိုင်တာပဲ "

"အကယ်၍ သူ့မှာ နောက်ထပ် တခြားဝှက်ဖဲတွေ ရှိနေသေးရင်ကော... သူက ထုတ်မပြသေးတာ ဒါမှမဟုတ် ရှာမတွေ့သေးတာလည်း ဖြစ်နိုင်တာပဲ" 

လူအချို့က အမျိုးမျိုး ခန့်မှန်းနေကြသလို အချို့သူများ၏ မျက်ဝန်းထဲတွင်မူ လောဘရမ္မက် အရိပ်အယောင်များ ပြည့်နှက်သွားခဲ့ရသည်။ 

အဆုံး၌မူ ကျင့်ကြံခြင်းအင်အားကို မြှင့်တင်ပေးနိုင်သော မည်သည့်လျှို့ဝှက်ကျင့်စဉ်မဆို အဆင့်မြင့်မားလှသည် မဟုတ်ပါလား။ 

သူတို့ကိုယ်တိုင် မသုံးရလျှင်ပင် သူတို့၏ သားသမီး မျိုးဆက်များအတွက် အသုံးဝင်ပေသည်။

"ကဲ... အခုမှ တိုက်ပွဲ အစစ်အမှန်က စပြီ" မိမိ၏ တိုးတက်လာသော အင်အားကို ခံစားလိုက်ရပြီးနောက် ရှောင်ယွီ၏ ခန္ဓာကိုယ်ထက်၌ အားကောင်းလှသော ယုံကြည်ချက်များ တစ်ဖန် ပြန်လည်ထွက်ပေါ်လာခဲ့ပြန်သည်။

ဟမ့်…. ဆန်ကွမ်းချင်းအာက နှာခေါင်းရှုံ့၍..

"အမှိုက်သက်သက်ပဲ..."

ဖြန်း…

ပါးရိုက်သံနှင့်အတူ

ဆန်ကွမ်းချင်းအာ၏ ကျင့်ကြံခြင်းအရှိန်အဝါ ဝုန်းခနဲ ပေါက်ကွဲထွက်ပေါ်လာခဲ့သည်။ ၎င်းသည် အဆင့်၄ တတိယအလွှာ ၏ အရှိန်အဝါ ဖြစ်ပေသည်။

ရှောင်ယွီအနေဖြင့် မည်သို့မျှ တုံ့ပြန်ရန် အချိန်မရမီမှာပင် ဆန်ကွမ်းချင်းအာ၏ ပြင်းထန်လှသော ပါးရိုက်ချက်တစ်ခုမှာ သူ၏ မျက်နှာထက်သို့ တိုက်ရိုက်ပင် ကျရောက်သွားခဲ့ရတော့၏။ 

ရှောင်ယွီ၏ ခန္ဓာကိုယ်မှာ လေထဲတွင် ခုနစ်ရာ့နှစ်ဆယ် ဒီဂရီခန့် လည်ထွက်သွားခဲ့ပြီးနောက် မြေပြင်ပေါ်သို့ ဒုန်းခနဲ ပြုတ်ကျသွားခဲ့ရတော့သည်။

ယခုအချိန်တွင် ရှောင်ယွီတစ်ယောက် ကြောင်အသွားခဲ့ရရုံသာမက ဘေးပတ်ဝန်းကျင်မှ စောင့်ကြည့်နေကြသော လူများအားလုံးပါ ဆွံ့အအံ့ဩသွားခဲ့ကြရတော့၏။

"ဘုရားရေ... အဆင့်၄ကျင့်ကြံသူ ဖြစ်နေပြီလား..."

"ရက်စက်လွန်းလှချည်လား... ဒီလောက် ငယ်ရွယ်တဲ့ အသက်အရွယ်နဲ့ အဆင့်၄ ကျင့်ကြံသူ အဆင့်ကို ရောက်နေပြီလား..."

ဆန်ကွမ်းကျန့်၏ မျက်နှာထက်၌ပင် အလွန်အမင်း ဝမ်းမြောက်လှိုက်လှဲမှုများဖြင့် ပြည့်နှက်သွားခဲ့ရသည်။ 

ဤကျင့်ကြံခြင်းနယ်ပယ် ချိုးဖျက်မှုမှာ တီကျွယ်တျန်း၏ ကူညီမှုကြောင့် ဖြစ်သည်ကို သူ ဂရုမစိုက်တော့ချေ။ 

သူမအနေဖြင့် ယခုကဲ့သို့သော ကျင့်ကြံခြင်းအဆင့်သို့ ရောက်ရှိသွားခဲ့ပြီ ဖြစ်ရာ နောင်တစ်ချိန်တွင် အချိန်အမြောက်အမြားကို သက်သာစေမည် မဟုတ်ပါလား။ 

အခြားလူများ ကျင့်ကြံနေရမည့် အချိန်အတွင်းမှာပင် ဆန်ကွမ်းချင်းအာသည် နောက်ထပ်တစ်ဆင့် ထပ်မံ၍ ချိုးဖျက်နိုင်ပေလိမ့်မည်။

ရှောင်ယွီ သတိပြန်ဝင်လာခဲ့ပြီးနောက် ဆန်ကွမ်းချင်းအာကို မယုံကြည်နိုင်လောက်သော အကြည့်များဖြင့် စိုက်ကြည့်လိုက်ရင်း အော်ဟစ်လိုက်မိ၏။

"မဖြစ်နိုင်ဘူး... မင်း မတရားတဲ့နည်းလမ်း သုံးထားတာပဲ" ရှောင်ယွီ၏ မျက်ဝန်းထဲတွင် မကျေနပ်မှုများဖြင့် ပြည့်နှက်နေခဲ့ရသည်။ 

ဆန်ကွမ်းချင်းအာကို ကြည့်ရင်း သူ၏ သုံးနှစ်ပြည့် ကတိကဝတ်မှာ တကယ့်ကို ရယ်စရာပြက်လုံးတစ်ခု ဖြစ်သွားခဲ့ရပြီ မဟုတ်ပါလား။ ရှောင်ယွီအနေဖြင့် ၎င်းကို သဘာဝကျစွာပင် လက်မခံနိုင်ဘဲ ရှိနေခြင်း ဖြစ်သည်။

"လက်မခံနိုင်ဘူး ဟုတ်လား... ဒါဆိုလည်း အောင့်ခံထားလိုက်စမ်းပါ" ဆန်ကွမ်းချင်းအာသည် သူမ၏ ဓားကို တင်းတင်းဆုပ်ကိုင်ထားခဲ့၏။

သူမသည် ရှောင်ယွီရှိရာဆီသို့ တရွေ့ရွေ့ လှမ်းလျှောက်လာခဲ့သည်။ 

ရှောင်ယွီ၏ မျက်ဝန်းထဲတွင် ကြောက်ရွံ့ထိတ်လန့်မှု အရိပ်အယောင်များ ထွက်ပေါ်လာခဲ့ရ၏။ 

ဟုတ်ပေသည်... ကြောက်ရွံ့ခြင်းတရားပင်။ ရှောင်ယွီသည် ဆန်ကွမ်းချင်းအာ၏ မျက်ဝန်းထဲ၌ ပြင်းထန်လှသော သတ်ဖြတ်လိုစိတ်များနှင့်အတူ နက်ရှိုင်းပြီး အရိုးထဲအထိ အေးစက်သွားစေမည့် နာကျင်မှုများကို မြင်တွေ့လိုက်ရခြင်းကြောင့် ဖြစ်သည်။

"မင်း... မင်း ငါ့ကို သတ်ချင်တာလား..."

"ဆန်ကွမ်းချင်းအာ တကယ်ပဲ တိုက်ခိုက်တော့မည်ကို မြင်သောအခါ ဆန်ကွမ်းဝမ်အာသည် လှုပ်ရှားလိုက်ပြီး ဆန်ကွမ်းချင်းအာ၏ ရှေ့မှောက်တွင် ပိတ်ဆို့ကာ တားဆီးလိုက်သည်။ 

ဘေးပတ်ဝန်းကျင်မှ လူများမှာမူ ယခုအခါ လုံးဝ ထုံထိုင်းသွားခဲ့ကြရပြီ ဖြစ်သည်။ 

"မင်း ငါ့ကို တားချင်တာလား..." ဆန်ကွမ်းချင်းအာက တစ်လုံးချင်း ပြောဆိုလိုက်သည်။

"ငါ မင်းကို တားနေတာ မဟုတ်ပါဘူး... မင်းအနေနဲ့ အမှားတစ်ခု ကျူးလွန်မိမှာ စိုးရိမ်လို့ပါ"

"အမှားတစ်ခု ဟုတ်လား... တကယ့်ကို မြင့်မြတ်လှတဲ့ အကြောင်းပြချက်ပါလား။ ဖယ်စမ်း..."

ဆန်ကွမ်းချင်းအာသည် မိမိ၏ သတိပေးချက်ကို ဂရုမစိုက်ဘဲ ရှောင်ယွီကို အမှန်တကယ် သတ်ဖြတ်ရန် ကြံစည်နေသည်ကို ဆန်ကွမ်းဝမ်အာ မြင်တွေ့လိုက်ရသောအခါ သူမ၏ မျက်နှာထက်၌ ဒေါသအရှိန်အဟုန်များ ပြည့်နှက်သွားခဲ့ရတော့သည်။

"မင်းက အရမ်းအစွမ်းထက်နေတာ မဟုတ်လား… အကယ်၍ မင်း ငါ့ကို အနိုင်ယူနိုင်ရင် မင်းကို ငါ လွှတ်ပေးမယ်။ မဟုတ်ရင်တော့... မင်း ငါ့စကားကို နားထောင်ရမယ်" ဆန်ကွမ်းဝမ်အာသည် ဓားတစ်လက်ကို ဆွဲထုတ်လိုက်ပြီး ဆန်ကွမ်းချင်းအာရှိရာဆီသို့ လှမ်း၍ ချိန်ရွယ်လိုက်၏။ ဆန်ကွမ်းဝမ်အာ၏ မျက်ဝန်းထဲတွင်လည်း အကူအညီမဲ့မှု အရိပ်အယောင်များဖြင့် ပြည့်နှက်နေခဲ့ရသည်။

ဘေးပတ်ဝန်းကျင်မှ စောင့်ကြည့်နေကြသူများအားလုံး မျက်လုံးများ ပြူးကျယ်လျက် ဤမြင်ကွင်းကို စိုက်ကြည့်နေကြမိသည်။ စူးစမ်းလိုစိတ်များဖြင့် ပြည့်နှက်နေခဲ့ပြီး ဤသည်မှာ တကယ့်ကို စိတ်ဝင်စားစရာကောင်းလှသော အတင်းအဖျင်း ဇာတ်လမ်းကောင်းတစ်ခု မဟုတ်ပါလား။ 

တီကျွယ်တျန်းကတော့ ၎င်းကို လုံးဝ ဂရုမစိုက်ဘဲ ပြဇာတ်ကောင်းတစ်ခုကို စောင့်ကြည့်နေသည့် အမူအရာမျိုးဖြင့်သာ ရှိနေခဲ့၏။ ဤပြဇာတ်ကောင်းမှာ ယခုမှသာ စတင်ခဲ့ခြင်း ဖြစ်သည် မဟုတ်ပါလား။ မုဆိုးတစ်ယောက်အနေဖြင့် စိတ်ရှည်သည်းခံခြင်းမှာ အရေးကြီးဆုံးအရာ ဖြစ်ပေသည်။

"မင်း တကယ်ပဲ ငါ့ကို တားမှာလား..." ဆန်ကွမ်းချင်းအာက တစ်လုံးချင်း မေးမြန်းလိုက်သည်။

"ငါ ပြောပြီးပြီပဲ... မင်း ငါ့ကို အနိုင်ယူနိုင်ရင် ဖြတ်သွားလို့ရတယ်လို့" ဆန်ကွမ်းဝမ်အာကလည်း တစ်လုံးချင်း ပြန်လည်ပြောဆိုလိုက်၏။

ဆန်ကွမ်းချင်းအာ ရယ်မောလိုက်မိပြီး သူမ၏ မျက်ဝန်းထဲတွင် ခြောက်ကပ်ကပ် ဖြစ်ခြင်း အရိပ်အယောင်များဖြင့် ပြည့်နှက်သွားခဲ့ရသည်။ ထို့နောက်တွင် သူမ၏ ခန္ဓာကိုယ်မှာ ဝုန်းခနဲ လှုပ်ရှားသွားခဲ့ပြီ ဖြစ်၏။

စွပ်…

"ချင်းအာ... နင်…. နင်က”

ဤအခိုက်အတန့်တွင် ဆန်ကွမ်းချင်းအာသည် ဝင်ရောက်တိုက်ခိုက်ခဲ့ခြင်း မဟုတ်ပေ။ 

ဆန်ကွမ်းဝမ်အာက သူမရှိရာဆီသို့ ဓားဖြင့် ချိန်ရွယ်ထားသည်ကို မြင်တွေ့လိုက်ရချိန်တွင် သူမသည် မိမိ၏ ခန္ဓာကိုယ်ကို ထိုဓားသွားရှိရာဆီသို့ တိုက်ရိုက်ပင် တိုးဝင်ပစ်လိုက်ခြင်း ဖြစ်သည်။ 

ဓားသွားမှာ သူမ၏ ခန္ဓာကိုယ်ကို ထိုးဖောက်သွားသည်ကို ကြည့်ရင်း ဆန်ကွမ်းချင်းအာသည် အမှန်တကယ်ပင် ရယ်မောနေခဲ့မိ၏။

မြင့်မားလှသော စင်မြင့်ထက်ရှိ ဆန်ကွမ်းကျန့်၏ မျက်နှာအမူအရာလည်း ချက်ချင်း ပြောင်းလဲသွားခဲ့ရပြီး ထို့နောက်တွင် နောင်တရမှုများဖြင့် ပြည့်နှက်သွားခဲ့ရတော့သည်။ 

သူသည် ဆန်ကွမ်းဝမ်အာကို ကြည့်လိုက်ချိန်တွင် သူ၏ မျက်ဝန်းထဲ၌ ဒေါသအရှိန်အဟုန်များ ပြည့်နှက်နေခဲ့သော်လည်း ဆန်ကွမ်းမိသားစု၏ လျင်မြန်စွာ တိုးတက်ဖွံ့ဖြိုးလာမှုမှာ ဤသမီးကြီးအပေါ်၌သာ မူတည်နေသည်ကို ပြန်လည်တွေးတောမိလိုက်ချိန်တွင် ဆန်ကွမ်းကျန့်တစ်ယောက် နှုတ်ဆိတ်သွားခဲ့ရပြီး သက်ပြင်းတစ်ချက် ချလိုက်မိကာ သူ၏ ခန္ဓာကိုယ်မှာ အနည်းငယ် တုန်ခါသွားခဲ့ရတော့၏။

ဤမြင်ကွင်းကို စောင့်ကြည့်နေကြသော အခြားလူများအားလုံးလည်း ဆန်ကွမ်းချင်းအာ၏ မျက်ဝန်းထဲရှိ အကူအညီမဲ့မှုများကို ကြည့်ကာ သက်ပြင်းချလိုက်မိကြသည်။ 

သူတို့အနေဖြင့် ဘာတွေဖြစ်ပျက်ခဲ့သလဲဆိုသည်ကို အသေအချာ မသိကြသော်ငြား ယခုအခါ ကွင်းပြင်ထဲရှိ ညီအစ်မနှစ်ဦးကို ကြည့်ရင်း လူအများအပြားတွင် ကိုယ်ပိုင်အတွေးစိတ်ကူးများ ရှိလာခဲ့ကြပြီ ဖြစ်၏။ 

တစ်ယောက်ယောက် သေဆုံးသွားလျှင် သို့မဟုတ် နှစ်ယောက်စလုံး သေဆုံးသွားလျှင် ပို၍ အကောင်းဆုံး ဖြစ်ပေလိမ့်မည်။ 

ဤမျှလောက်အထိ အင်အားကြီးမားလှသော ဆန်ကွမ်းမိသားစုမျိုးက လူများကို သူတို့ ကြောက်ရွံ့ထိတ်လန့်‌ သောကြောင့် ဖြစ်သည်။

ဆန်းကွမ်း၀မ်အာက မေးလိုက်သည်…

"ဘာဖြစ်လို့လဲ..."

"ဘာဖြစ်လို့လဲ ဟုတ်လား… အမကြီး ကိုယ်အမကြီး ပြန်မေးကြည့်သင့်တာပေါ့... ငါ့ရဲ့ ချစ်လှစွာသော အစ်မကြီး… ငါ တိုက်ခိုက်တော့မယ့် အချိန်မှာ မင်းက ငါ့ကို တားဆီးဖို့ ကြိုးစားခဲ့တာ မဟုတ်လား။ အခုတော့ မင်း အောင်မြင်သွားခဲ့ပြီလေ"

"အခု မင်း ငါ့ကို သတ်ချင်နေတုန်းပဲလား..."

"အဲ့လို မဟုတ်ပါဘူး... ငါက မင်းကို ရပ်တန့်စေချင်ရုံသက်သက်ပါ..."

"ငါ မင်းကို နာကျင်အောင် လုပ်ဖို့ လုံးဝ မတွေးခဲ့ပါဘူး..."

"ဆန်ကွမ်းဝမ်အာ... နင်ရဲ့ ဟန်ဆောင်မှုတွေကို တော်လိုက်ပါတော့"

"အခု နင့်ကို ကြည့်ရတာတင် ငါ တကယ့်ကို ရွံရှာစက်ဆုပ်မိတယ်"

ပြောရင်းနှင့်ပင် ဆန်ကွမ်းချင်းအာ ရှေ့သို့ နောက်ထပ် ခြေလှမ်းတစ်လှမ်း လှမ်းလိုက်သည်။ 

နီမြန်းလှသော သွေးများဖြင့် စွန်းထင်းနေသည့် ရှည်လျားလှသော ဓားကြီးမှာ ထူးဆန်းပြီး ဆွဲဆောင်မှုရှိလှသော အလင်းတန်းတစ်ခု ထွက်ပေါ်နေခဲ့၏။ 

ယခုအခါ ဆန်ကွမ်းချင်းအာနှင့် ဆန်ကွမ်းဝမ်အာတို့မှာ မျက်နှာချင်းဆိုင် ဖြစ်နေကြပြီ ဖြစ်သည်။ ၎င်းတို့နှစ်ဦးအကြားတွင် ဓားရိုးတစ်ခုစာမျှသာ ကွာဝေးတော့၏။

"မင်း ဆက်ပြီး တိုက်ခိုက်ချင်သေးတာလား။ အကယ်၍ မင်းရဲ့ လက်က အနည်းငယ်မျှ ထပ်မံလှုပ်ရှားသွားခဲ့မယ်ဆိုရင်... ဆန်ကွမ်းမိသားစုတစ်ခုလုံးမှာ မင်းကို ယှဉ်နိုင်မယ့်သူ ရှိတော့မှာ မဟုတ်ဘူး... ဆန်ကွမ်းဝမ်အာ… မင်း စမ်းကြည့်ချင်သေးလား..."

"အမကြီး နင်က အထက်ကမ္ဘာကို ရောက်ဖူးတာပဲ…အဲ့ဒီနေရာက ဤအောက်ကမ္ဘာထက်စာရင် ပိုပြီးတော့ ရက်စက်ကြမ်းကြုတ်မယ်ဆိုတာ သေချာပါတယ်… " 

ဆန်ကွမ်းချင်းအာ၏ နှုတ်ခမ်းထက်၌ ဆွဲဆောင်မှုရှိလှသော သွေးနီရောင် အပြုံးတစ်ခု ထွက်ပေါ်လာခဲ့သည်။

သူမ၏ ခန္ဓာကိုယ်တစ်ခုလုံးတွင် ပြင်းထန်လှသော နာကျင်မှုများ ပြန့်နှက်နေခဲ့သော်ငြား သူမ၏ မျက်ဝန်းများမှာမူ တစ်ချက်မျှပင် လှုပ်ခတ်ခြင်းမရှိဘဲ တည်ငြိမ်နေခဲ့၏။ မည်သည့်အရာကိုမျှ မခံစားရသည့်အလားပင်။