အခန်း ၂၄ - လွန်ခဲ့တဲ့ သုံးနှစ်လုံးလုံး မင်း ဒီလိုပုံစံနဲ့ ဖြတ်သန်းခဲ့တာလား

ရှောင်ယွီ၏ စကားအဆုံးတွင် သူ၏ မျက်ဝန်းများထဲ၌ အလွန်တရာ အားကောင်းလှသော ယုံကြည်ချက်များဖြင့် ပြည့်နှက်နေခဲ့သည်။ တစ်ချိန်တည်းမှာပင် အဆင့်၃ စတုတ္ထအလွှာ ၏ ကျင့်ကြံခြင်းအရှိန်အဝါတစ်ခု ဝုန်းခနဲ ပေါက်ကွဲထွက်ပေါ်လာခဲ့၏။ 

ပတ်ဝန်းကျင်၏ အပူချိန်မှာလည်း အရမ်းမြန်မြန်ဆန်ဆန် မြင့်တက်လာခဲ့ရတော့သည်။ မီးလျှံများ၏ လောင်မြိုက်ခြင်းကို ခံလိုက်ရသဖြင့် ကွင်းပြင်ကျယ်ကြီး၏ ကြမ်းပြင်မှာ စတင်၍ မည်းမှောင်လာခဲ့ပြီး အက်ကြောင်းများပင် ထွက်ပေါ်လာခဲ့၏။

"ချင်းအာ... ငါပဲ ဝင်တိုက်ပေးရမလား"

ကွက်တိ ဤအချိန်တွင် အသံတစ်သံ ထွက်ပေါ်လာခဲ့သည်။ ထိုစကားကို ကြားရသောအခါ ဆန်ကွမ်းချင်းအာ လှမ်းကြည့်လိုက်ရာ သူမ၏ မျက်ဝန်းများထဲ၌ ရွံရှာစက်ဆုပ်မှုများဖြင့် ပြည့်နှက်သွားခဲ့ရ၏။

"မလိုပါဘူး... သခင်လေးတုအနေနဲ့ ကျွန်မရဲ့ ကိစ္စတွေထဲမှာ ဝင်ရောက်ပတ်သက်ပြီး ဒုက္ခခံနေဖို့ မလိုပါဘူး"

တီကျွယ်တျန်းက ထိုသူရှိရာဆီသို့ တစ်ချက်လှမ်းကြည့်လိုက်သည်။

နာမည် - တုဇိထန် 

အဆင့်အတန်း - ဝူဝမ်ဂိုဏ်း၏ သခင်လေး၊ အမြှောက်စာဗီလိန် 

အင်အား - အဆင့်၃ စတုတ္ထအလွှာ

ကျင့်စဉ် - ဝူဝမ်အတတ်၊ နေမင်းချေမှုန်းခြင်းလက်ညှိုး...

ဤလူက အသေးအဖွဲ ဗီလိန်လေးတစ်ယောက် ဖြစ်လိမ့်မည်ဟု သူ မထင်ထားခဲ့ပေ။ ကြည့်ရသည်မှာ သူက အချစ်ရူးတစ်ယောက် ဖြစ်ပုံရ၏။ သို့သော်လည်း သူက အသုံးမကျသော အချစ်ရူးတစ်ယောက်သက်သက်သာ ဖြစ်ပေသည်။ 

အခြားဗီလိန်က အနည်းဆုံးတော့ ကံကြမ္မာသမီး‌ တော်ကို လိုက်လံပိုးပန်းကြသော်လည်း သူက ဘာဖြစ်လို့ဇာတ်လိုက်မဟုတ်သော မိန်းကလေးမျိုးကို လိုက်လံပိုးပန်းနေရသနည်း။ 

တကယ့်ကို နားမလည်နိုင်စရာပင်။

သို့သော်လည်း ဤလူက ဗီလိန်တစ်ယောက် ဖြစ်နေသဖြင့် သူ့ကို အကူအညီတစ်ခု ပေးအပ်လိုက်လျှင်လည်း မဆိုးပေ။ တီကျွယ်တျန်း တစ်စုံတစ်ခုကို တွေးတောမိလိုက်ပြီးနောက် သူ၏ မျက်ဝန်းများထဲတွင် ထူးဆန်းလှသော အလင်းတန်းတစ်ခု ဖြတ်သန်းသွားခဲ့သည်။

ဘေးတစ်ဖက်တွင် ရှိနေသော တုဇိထန်၏ ခန္ဓာကိုယ်မှာ ရုတ်တရက် တုန်ယင်သွားခဲ့ရ၏။ 

ထို့နောက်တွင် သူသည် ပြန်လည်ထိုင်ချလိုက်ပြီး ကွင်းပြင်ထဲရှိ ပြိုင်ပွဲကိုသာ တိတ်ဆိတ်စွာ စောင့်ကြည့်နေခဲ့တော့သည်။

တုဇိထန် ဤကဲ့သို့ ငြိမ်သက်သွားသည်ကို မြင်တွေ့လိုက်ရသဖြင့် ဆန်ကွမ်းချင်းအာ အနည်းငယ် အံ့အားသင့်သွားခဲ့ရသော်လည်း ထို့နောက်တွင် သူမ စိတ်ဝင်စားမှု ကွယ်ပျောက်သွားခဲ့သည်။

ရှောင်ယွီသည် တုဇိထန်ကို အထင်သေးလှသော အကြည့်များဖြင့် စိုက်ကြည့်လိုက်၏။ အကယ်၍ ဤလူသာ ကွင်းထဲသို့ တက်လာခဲ့ပါက သူ တိုက်ကွက်တစ်ကွက်တည်းနှင့်တင် အပြတ်ရှင်းပစ်နိုင်ပေသည်။

"ရှောင်ယွီ... လွန်ခဲ့တဲ့ သုံးနှစ်အတွင်း မင်းရဲ့ အင်အားက ဘယ်လောက်အထိ တိုးတက်လာခဲ့လဲဆိုတာ ငါ့ကို ပြစမ်းပါဦး" ဆန်ကွမ်းချင်းအာ ကရှောင်ယွီကို စိုက်ကြည့်လိုက်သည်။

"မီးနတ်ဘုရားလက်ဝါး..."

ရှောင်ယွီသည် သူ၏ အစွမ်းထက်လှသော တိုက်ကွက်ကို ချက်ချင်းပင် ထုတ်သုံးလိုက်သည်။ ရှောင်ယွီတွင်လည်း မိမိ၏ ကိုယ်ပိုင်အစီအစဉ် ရှိပြီးသား ဖြစ်၏။ ထိုအရာကတော့ တိုက်ပွဲကို အရမ်းမြန်မြန်ဆန်ဆန် အဆုံးသတ်ပစ်ရန် ဖြစ်သည်။ တစ်ချိန်တည်းမှာပင် ဆန်ကွမ်းချင်းအာကို နောင်တရသွားစေချင်၏။ အတိတ်တုန်းက စေ့စပ်ပွဲကို ဖျက်သိမ်းခဲ့ခြင်းမှာ သူမအနေဖြင့် အမှားကြီး မှားခဲ့ခြင်း ဖြစ်ကြောင်း သိစေချင်ခြင်း ဖြစ်ပေသည်။

သို့သော်လည်း စိတ်ကူးက လှပသလောက် လက်တွေ့ကတော့ ရက်စက်လွန်းလှ၏။ ဆန်ကွမ်းချင်းအာ၏ ခန္ဓာကိုယ်မှာ လှုပ်ရှားသွားခဲ့ပြီး မျက်စိတစ်မှိတ်အတွင်းမှာပင် ပျောက်ကွယ်သွားခဲ့ပြီ ဖြစ်သည်။ သူမသည် ရှောင်ယွီ၏ လက်ဝါးချက်ကို တိုက်ရိုက်ပင် ရှောင်တိမ်းလိုက်၏။

ရှောင်ယွီ၏ မျက်နှာအမူအရာ ပြောင်းလဲသွားခဲ့ရသည်။ ဆန်ကွမ်းချင်းအာ၏ အရှိန်အဟုန်က ဤမျှလောက်အထိ မြန်ဆန်လိမ့်မည်ဟု သူ မထင်ထားခဲ့ခြင်းကြောင့်ပင်။ ဘေးပတ်ဝန်းကျင်မှ စောင့်ကြည့်နေကြသော လူများအားလုံးလည်း မယုံကြည်နိုင်လောက်သော အကြည့်များဖြင့် ဆန်ကွမ်းချင်းအာကို စိုက်ကြည့်လိုက်ကြသည်။ ထို့နောက်တွင် စင်မြင့်ထက်ရှိ သခင်လေးကို လှမ်းကြည့်လိုက်မိကြ၏။ တီကျွယ်တျန်း ကြားဝင်စွက်ဖက်ပေးခဲ့ခြင်းကြောင့် ဆန်ကွမ်းချင်းအာ ကျင့်ကြံခြင်းနယ်ပယ် ချိုးဖျက်နိုင်ခဲ့ခြင်းလားဟု သူတို့ သံသယဝင်မိခြင်း ဖြစ်သည်။

ဆန်ကွမ်းချင်းအာ၏ ပါရမီက အလွန်တရာ ကောင်းမွန်လှသည် မဟုတ်ချေ။ အင်အားစုအချို့က ဆန်ကွမ်းချင်းအာ၏ အစစ်အမှန်အင်အားကို သိရှိထားကြသည်။ သို့သော် ယခုအခါတွင်မူ ဆန်ကွမ်းချင်းအာ ထုတ်ဖော်ပြသလိုက်သော တိုက်ခိုက်ရေးစွမ်းရည်မှာ ယခင်ကနှင့် လုံးဝ ကွဲပြားခြားနားနေခဲ့ပြီ ဖြစ်၏။

ရှောင်ယွီ၏ မျက်နှာအမူအရာ အနည်းငယ် ပြောင်းလဲသွားခဲ့ရသော်လည်း ကံကြမ္မာသားတော်တစ်ဦး ဖြစ်သဖြင့် သူ၏ စိတ်ဓာတ်ကြံ့ခိုင်မှုမှာ အခြားလူများနှင့် မတူဘဲ အလွန်တရာ မြင့်မားလှပေသည်။ 

ဆန်ကွမ်းချင်းအာက မိမိ၏ လက်ဝါးချက်ကို ရှောင်တိမ်းနိုင်သည်ကို မြင်သောအခါ ရှောင်ယွီသည်လည်း အထင်သေးစိတ်များကို ရုပ်သိမ်းလိုက်၏။

သို့သော်လည်း ထို့နောက်တွင် သူ၏ မျက်နှာအမူအရာ ထပ်မံ၍ ပျက်ယွင်းသွားခဲ့ရပြန်သည်။ 

အဘယ်ကြောင့်ဆိုသော် ဆန်ကွမ်းချင်းအာသည် သူ၏ နောက်ကျောဘက်ဆီသို့ အမှန်တကယ်ပင် ရောက်ရှိနေခဲ့ပြီ ဖြစ်ခြင်းကြောင့်ပင်။ ရှောင်ယွီ ခန္ဓာကိုယ်ကို လှည့်လိုက်ပြီး နောက်ဘက်သို့ လက်သီးဖြင့် ပြင်းထန်စွာ ထိုးနှက်လိုက်၏။

ဘုန်း...

ရှောင်ယွီ၏ လက်သီးချက်မှာ ဆန်ကွမ်းချင်းအာ၏ ဖမ်းဆွဲခြင်းကို ခံလိုက်ရသည်။

"လွန်ခဲ့တဲ့ သုံးနှစ်လုံးလုံး... ရှင် ဒီလိုပုံစံနဲ့ ဖြတ်သန်းခဲ့တာလား"

ဆန်ကွမ်းချင်းအာသည် လက်ကို အားပြင်းပြင်းဖြင့် ဆွဲလွင့်ပစ်လိုက်ရာ ရှောင်ယွီသည် လေထဲသို့ လွင့်ထွက်သွားခဲ့ပြီး မြေပြင်ပေါ်သို့ ဒုန်းခနဲ ပြုတ်ကျသွားခဲ့ရတော့သည်။ ကွင်းပြင်ကျယ်ကြီး တစ်ခုလုံး အနည်းငယ် တုန်ခါသွားခဲ့ရပြီး ရှောင်ယွီ ပြုတ်ကျသွားသော နေရာတွင် အက်ကြောင်းများပင် ထွက်ပေါ်လာခဲ့၏။

စောင့်ကြည့်နေကြသော လူအများအပြားက ရှောင်ယွီကို ကြည့်ကာ လှောင်ပြုံး ပြုံးလိုက်ကြသည်။

"လွန်ခဲ့တဲ့ သုံးနှစ်လုံးလုံး ငါ ဘယ်လို ဖြတ်သန်းခဲ့ရလဲဆိုတာ မင်းတို့ကို ငါ ပြမယ်ဆို... ဟုတ်ပါပြီ... မင်းက မြေပြင်ပေါ်မှာ လှိမ့်နေတဲ့ ပုံစံနဲ့ ဖြတ်သန်းခဲ့တာကိုး..."

"ဟားဟား... ကျင့်ကြံဖော်၊ မင်းပြောလိုက်တဲ့ စကားက တကယ့်ကို အဓိပ္ပာယ်နက်နဲလွန်းတယ်..."

ကွင်းပြင်ဘေးမှ လူများက ရှောင်ယွီကို ဝိုင်းဝန်းရယ်မော လှောင်ပြောင်လိုက်ကြ၏။ ကံကြမ္မာသားတော် ဟုတ်လား။

ရှောင်ယွီ၏ မျက်နှာတစ်ခုလုံး အရှက်ရမှုများဖြင့် နီမြန်းသွားခဲ့ရသည်။ မိမိ၏ မဆင်မခြင် သတိလက်လွတ် ဖြစ်သွားမှုကြောင့် ဤမျှလောက်အထိ မျက်နှာပျက်ရလိမ့်မည်ဟု သူ မထင်ထားခဲ့မိချေ။ 

'ကောင်းပြီလေ... အခု မင်းတို့ ဘယ်လောက်ပဲ လှောင်ပြောင်နေပါစေဦးတော့... နောက်ကျရင် မင်းတို့အားလုံး ပါးရိုက်ခံရတဲ့ ခံစားချက်မျိုး ဖြစ်သွားအောင် ငါ ပြပေးမယ်'

၎င်းကို တွေးမိရင်း ရှောင်ယွီ၏ ခန္ဓာကိုယ်ပတ်ပတ်လည်ရှိ မီးလျှံများမှာ စတင်၍ စုစည်းလာခဲ့သည်။ 

မီးလျှံမြွေနဂါး တစ်ကောင် ထွက်ပေါ်လာခဲ့ပြီး ၎င်း၏ မျက်ဝန်းများထဲတွင် အေးစက်လှသော အလင်းတန်းများဖြင့် ပြည့်နှက်နေခဲ့၏။ 

ရှောင်ယွီ လှုပ်ရှားလိုက်ပြီး မီးလျှံမြွေနဂါး၏ ဦးခေါင်းထက်တွင် နင်းကာ ဆန်ကွမ်းချင်းအာရှိရာဆီသို့ ပြင်းထန်စွာ ပြေးဝင်သွားခဲ့သည်။

တစ်ချိန်တည်းမှာပင် သူ၏ လက်ဝါးထက်၌ ကျင့်ကြံခြင်း အရှိန်အဝါများ စုစည်းလာခဲ့၏။ အလျား ပေတစ်ဆယ်ခန့် ရှိသော ကြီးမားလှသည့် လက်ဝါးကြီးတစ်ခု ထွက်ပေါ်လာခဲ့ပြီး ၎င်းပတ်ပတ်လည်တွင် မီးလျှံများဖြင့် ဝန်းရံထားခဲ့သည်။ သေသေချာချာ အကဲခတ်ကြည့်လျှင် ရှောင်ယွီ၏ မျက်ဝန်းများထဲတွင်လည်း ယခုအခါ မီးလျှံများဖြင့် ပြည့်နှက်နေခဲ့ပြီ ဖြစ်၏။

"မမျှော်လင့်ဘဲ... ဒါက ကောင်းကင်နဲ့မြေကြီးရဲ့ ထူးခြားဆန်းပြားမီးလျှံဖြစ်နေတာပဲ"

"ဟုတ်တယ်... ဒါပေမဲ့ ဒီမီးလျှံက ခွဲခြားရခက်ပြီး သားရဲမီးလျှံ နဲ့ တော်တော်လေး ဆင်တူတယ်"

ဆန်ကွမ်းချင်းအာ၏ မျက်ဝန်းထဲတွင်တော့ မည်သည့်တုန်လှုပ်မှုမျှ မရှိပေ။ 

ယခုအချိန်တွင် ဆန်ကွမ်းချင်းအာ စိတ်ထဲ၌ အနည်းငယ် ကံကောင်းသည်ဟု ခံစားနေမိ၏။ အကယ်၍ တီကျွယ်တျန်းသာ သူမကို ကျင့်ကြံခြင်းနယ်ပယ် ချိုးဖျက်အောင် ဆေးလုံးပေး မကူညီပေးခဲ့ပါက သူမ ယနေ့ သေချာပေါက် ရှုံးနိမ့်သွားလိမ့်မည် ဖြစ်သည်။ 

မိမိ၏ ဆယ်စုနှစ်တစ်ခုကျော် ကြိုးစားကျင့်ကြံခဲ့မှုမှာ ဤလူ၏ သုံးနှစ်တာ ကြိုးစားကျင့်ကြံခဲ့မှုလောက်ပင် အဖတ်မတင်သည်ကို သူမ မထင်ထားခဲ့မိချေ။

မိမိ၏ အစ်မဖြစ်သူမှာ ဤရှောင်ယွီထက်ပင် ပိုမိုကြောက်မက်ဖွယ်ကောင်းလှသည်ကို တွေးမိရင်း... ဆန်ကွမ်းဝမ်အာ၏ အစစ်အမှန်အင်အားမှာ မည်သည့်အဆင့်အထိ ရောက်ရှိနေပြီနည်း။

"မဟုတ်ဘူး... ငါ သေချာပေါက် နိုင်ရမယ် ငါ သူမရဲ့နေရာကို အစားထိုးချင်တာ... သူမ ငါ့ကို မော့ကြည့်ရမယ့်နေ့ ရောက်လာစေရမယ်" ဆန်ကွမ်းချင်းအာ၏ မျက်ဝန်းများ ပြောင်းလဲသွားခဲ့သည်။

သူမသည် ရှောင်ယွီကို စိုက်ကြည့်လိုက်၏။ ထို့နောက်တွင် သူမ၏ ခန္ဓာကိုယ်မှာ လှုပ်ရှားသွားခဲ့ပြီး ကွယ်ပျောက်သွားခဲ့ပြီ ဖြစ်သည်။ သူမ ပြန်လည်ပေါ်ထွက်လာချိန်တွင်တော့ ကောင်းကင်ယံထက်မှနေ၍ ဝုန်းခနဲ ဆင်းသက်လာခဲ့ခြင်း ဖြစ်၏။ သူမသည် လက်ဝါးတစ်ချက် ပြင်းထန်စွာ ရိုက်ချလိုက်ရာ ရှောင်ယွီ၏ မီးလျှံမြွေနဂါးကြီးကို တိုက်ရိုက်ပင် ရိုက်ခွဲခြေမွပစ်လိုက်တော့သည်။

တစ်ချိန်တည်းမှာပင် အေးခဲစေသော ရေခဲစွမ်းအင်တစ်ခု ထွက်ပေါ်လာခဲ့ပြီး ရှောင်ယွီကို တိုက်ရိုက်ပင် အေးခဲပစ်လိုက်တော့၏။ 

ဆန်ကွမ်းချင်းအာ၏ ရုတ်တရက် တိုက်ခိုက်မှုကြောင့် ရှောင်ယွီ၏ မီးလျှံမြွေနဂါးကြီး ပျက်စီးသွားပြီး ရှောင်ယွီပါ ရေခဲတုံးကြီးအဖြစ် အေးခဲသွားသည်ကို မြင်တွေ့လိုက်ရသဖြင့် အခြားလူများအားလုံး အသက်ရှူပင် မှားမတတ် ဖြစ်သွားခဲ့ကြရတော့သည်။

ဤမိန်းကလေး၏ အင်အားက မည်သည့်အဆင့်အထိ ရောက်ရှိသွားခဲ့ပြီနည်း။ အေးခဲနေသော ရှောင်ယွီကို ကြည့်ရင်း ပြိုင်ပွဲကို စောင့်ကြည့်နေကြသူများအားလုံး သက်ပြင်းချလိုက်မိကြ၏။

"ဒီသုံးနှစ်ပြည့် ကတိကဝတ် ပြိုင်ပွဲက တကယ့်ကို ရယ်စရာပြက်လုံးတစ်ခု ဖြစ်သွားလိမ့်မယ်လို့ ငါ မထင်ထားခဲ့မိဘူး"

"အကယ်၍ ဟိုမှာရှိနေတဲ့ သခင်လေးသာ ကြားဝင်မကူညီခဲ့ရင်... ဒီမိန်းကလေးကော နိုင်ပါ့မလား"

ကျင့်ကြံခြင်းဟူသည်မှာ ရေဆန်တွင် လှေလှော်ရသကဲ့သို့ ဖြစ်ပြီး ရှေ့သို့ မတက်လှမ်းနိုင်ပါက နောက်သို့ ပြန်လည်ဆုတ်ယုတ်သွားစမြဲ မဟုတ်ပါလား။ ယခုအခါတွင်မူ ဆန်ကွမ်းချင်းအာသည် ဆယ်စုနှစ်တစ်ခုကျော် ကြိုးစားကျင့်ကြံခဲ့ခြင်း ဖြစ်ပြီး ရှောင်ယွီကတော့ သုံးနှစ်သာ ကြိုးစားကျင့်ကြံခဲ့ရသေးခြင်း ဖြစ်ကြောင်း သူတို့ နားလည်လိုက်ကြ၏။

"ဒီကောင်က တကယ့်ကို ပါရမီရှင်တစ်ဦးပဲ... ဒါပေမဲ့ သူက ကံဆိုးသွားတာသက်သက်ပါပဲ" အခြားလူများကလည်း ထိုစကားကို ခေါင်းညိတ်ထောက်ခံလိုက်ကြသည်။

"အားပါးပါး..."

ကွက်တိ ဤအချိန်တွင် စောင့်ကြည့်နေကြသော လူအများအပြား အံ့ဩတကြီး ရေရွတ်လိုက်ကြမိ၏။ တီကျွယ်တျန်း၏ မျက်နှာထက်၌လည်း အံ့အားသင့်ဖွယ် အမူအရာတစ်ခု ထွက်ပေါ်လာခဲ့သည်။ ဤဆန်ကွမ်းချင်းအာက တကယ့်ကို ရက်စက်တတ်လိမ့်မည်ဟု သူ မထင်ထားခဲ့ခြင်းကြောင့်ပင်။

သူမသည် ဓားတစ်လက်ကို ဆွဲထုတ်လိုက်ပြီး အေးခဲနေသော ရေခဲရုပ်တုကြီးအတွင်းသို့ တိုက်ရိုက်ပင် ထိုးစိုက်ပစ်လိုက်သည်ကို သူ မြင်တွေ့လိုက်ရခြင်းကြောင့် ဖြစ်၏။ ဟုတ်ပေသည်... သူမသည် ဓားဖြင့် ရက်ရက်စက်စက် ထိုးစိုက်ပစ်လိုက်ခြင်း ဖြစ်သည်။

ကရက်...

ထို့နောက်တွင် ဖြူစင်သော ဓားသွားမှာ အတွင်းသို့ ဝင်ရောက်သွားခဲ့ပြီး နီမြန်းလှသော သွေးချင်းချင်းနီနေသည့် ဓားသွားအဖြစ် ပြန်လည်ထွက်ပေါ်လာခဲ့သည်။ ရေခဲရုပ်တုကြီးတစ်ခုလုံး သွေးနီရောင်များဖြင့် စွန်းထင်းသွားသည်ကို မြင်တွေ့လိုက်ရသဖြင့် လူအများအပြား၏ ဦးရေပြားများပင် အေးစက်သွားခဲ့ရတော့၏။

ဆန်ကွမ်းဝမ်အာ၏ ခန္ဓာကိုယ်တစ်ခုလုံးလည်း တုန်ယင်သွားခဲ့ရပြီး စိတ်ထဲတွင် ပြင်းထန်လှသော နာကျင်မှုကို ခံစားလိုက်ရသည်။

"ဆန်ကွမ်းချင်းအာ... တော်လိုက်တော့..." ဆန်ကွမ်းဝမ်အာ ဒေါသတကြီး အော်ဟစ်လိုက်မိ၏။

သို့သော်လည်း ဆန်ကွမ်းချင်းအာကတော့ မကြားချင်ယောင်ဆောင်ကာ ရေခဲရုပ်တုကြီးကို ဓားဖြင့် ဆက်တိုက် ထိုးစိုက်နေခဲ့သည်။ ၎င်းကို မြင်တွေ့လိုက်ရသဖြင့် ဆန်ကွမ်းဝမ်အာ၏ မျက်ဝန်းများထဲတွင် ဒေါသအရှိန်အဟုန်များ ပြည့်နှက်သွားခဲ့ရ၏။

"ဒီသုံးနှစ်အတွင်းမှာ မင်းက ဤမျှလောက်အထိ ဆိုးသွမ်းပုန်ကန်တတ်လာလိမ့်မယ်လို့ ငါ မထင်ထားခဲ့ဘူး…ဒီနေ့မှာတော့... ငါ ဖခင်ဖြစ်သူရဲ့ ကိုယ်စား မင်းကို ဆုံးမရတော့မယ်… ဒီကိစ္စက မူလကတည်းက ငါတို့ ဆန်ကွမ်းမိသားစုဘက်က မှားခဲ့တာပဲ" ဆန်ကွမ်းဝမ်အာ စကားပြောပြီးနောက် ချက်ချင်းပင် ဝင်ရောက်တိုက်ခိုက်ရန် ပြင်ဆင်လိုက်သည်။

"ဒူးထောက်စမ်း..."

သို့သော်လည်း ကွက်တိ ဤအခိုက်အတန့်တွင် တီကျွယ်တျန်းက စကားတစ်ခွန်း ပြောဆိုလိုက်၏။ အလွန်တရာ ကြီးမားလှသော အရှိန်အဝါနှင့် ကြောက်မက်ဖွယ်ကောင်းလှသော ဖိအားကြီးတစ်ခု ဝုန်းခနဲ ကျရောက်လာခဲ့သည်။ 

ဆန်ကွမ်းဝမ်အာ၏ မျက်နှာအမူအရာ ချက်ချင်းပင် ပျက်ယွင်းသွားခဲ့ရ၏။ 

သူမအနေဖြင့် ခုခံချင်သော်လည်း လုံးဝ မခုခံနိုင်ဘဲ ရှိနေခဲ့သည်။

သူမ၏ ခန္ဓာကိုယ်မှာ ကြမ်းပြင်ပေါ်သို့ တိုက်ရိုက်ပင် ဒူးထောက်ကျသွားခဲ့ရတော့၏။ 

အခြားလူများအားလုံး၏ မျက်နှာအမူအရာများလည်း အလွန်တရာ ထိတ်လန့်တုန်လှုပ်သွားကြရသည်။

"သခင်လေး... သခင်လေးက..."

တီကျွယ်ထျန်းက ပြုံးလိုက်ကာ …

"မင်းက အမျိုးသားတွေရဲ့ အကြောင်းကို နားမလည်ပါဘူး…အမျိုးသားတွေ တိုက်ခိုက်နေတဲ့ အချိန်မှာ အမျိုးသမီးတွေအနေနဲ့ ဝင်ရောက်စွက်ဖက်တာမ ကြိုက်ဘူး” 

“နောက်ပြီး... ဒါက သူတို့ကြားက ရန်ငြိုးရန်စသက်သက်ပဲလေ… အကယ်၍ မင်းသာ ရှောင်ယွီ မင်းကို မုန်းတီးသွားတာမျိုး မဖြစ်စေချင်ဘူးဆိုရင်... ဒီအတိုင်းပဲ ငြိမ်ငြိမ်လေး စောင့်ကြည့်နေလိုက်စမ်းပါ" 

တီကျွယ်တျန်းက ပြောဆိုလိုက်သည်။

ထိုစကားကို ကြားရသောအခါ ဆန်ကွမ်းဝမ်အာ၏ မျက်ဝန်းထဲရှိ ဒေါသအရှိန်အဟုန်များမှာ ပျောက်ကွယ်သွားခဲ့ပြီး သူမ သတိပြန်ဝင်လာခဲ့သည်။ 

ဟုတ်ပေသည်... ရှောင်ယွီသည် အမြဲတမ်း ဂုဏ်မာနထောင်လွှားလှသော လူတစ်ဦး မဟုတ်ပါလား။

"သခင်လေးရဲ့ သတိပေးမှုအတွက် ကျေးဇူးတင်ပါတယ်ရှင်..."

တီကျွယ်တျန်း ခေါင်းညိတ်ပြလိုက်ပြီးနောက် သူ၏ ကျင့်ကြံခြင်းအရှိန်အဝါကို ပြန်လည်ရုပ်သိမ်းလိုက်ကာ…

'ကံကြမ္မာသားတော်ကို ဓားနဲ့ ထိုးစိုက်နေတဲ့ ဤမျှလောက်အထိ စိတ်ကျေနပ်စရာကောင်းတဲ့ မြင်ကွင်းမျိုးကို မင်းလို ပျင်းစရာကောင်းတဲ့မိန်းမ တစ်ယောက်က လာပြီး နှောင့်ယှက်လို့ ဘယ်ဖြစ်ပါ့မလဲ'