အခန်း ၂ - ကံကြမ္မာ၏ သားတော်၏ စိန်ခေါ်မှု
သူ၏ စိတ်ထဲ၌ ပဲ့တင်ထပ်နေသော ခမ်းနားလှသည့် အသံကို နားထောင်ရင်း တီကျွယ်တျန်းမှာ အနည်းငယ် ဝေဝါးသွားသည်...
"စနစ်... နောက်တစ်ခါ ထပ်ပြောပြပါဦး"
တီကျွယ်တျန်းသည် သူ၏ စိတ်ထဲရှိ အသံနှင့် စတင် ဆက်သွယ်လိုက်သည်...
【ပိုင်ရှင်... ကံကြမ္မာဗီလိန်စနစ် နိုးထလာပါပြီ】
ငါက ကံကြမ္မာ၏ သားတော် မဟုတ်ဘူးလား"
【တောင်းပန်ပါတယ် ပိုင်ရှင်.. ပိုင်ရှင်ရဲ့ ပင်ကိုယ် ကောက်ကျစ်ဉာဏ်များတဲ့ စရိုက်က ကံကြမ္မာ၏ သားတော်တစ်ယောက်နဲ့ မကိုက်ညီလို့ပါ... ဒါ့အပြင် ကံကြမ္မာ၏ သားတော်ဆိုတာက ဗီလိန်တစ်ယောက်ရဲ့ ဆွဲဆောင်မှုနဲ့ ယှဉ်ရင် ဘာမှ မဟုတ်ပါဘူး】
"ဒါဆို ငါ့ရှေ့က ကောင်က ကံကြမ္မာ၏ သားတော်ပေါ့"
【မှန်ပါတယ်... ပိုင်ရှင်ရဲ့ ရှေ့မှာရှိနေတဲ့ အမျိုးသားက ကံကြမ္မာ၏ သားတော်ဖြစ်ပြီး အဲ့ဒီမိန်းကလေးကတော့ ကံကြမ္မာ၏ သမီးတော် ဇာတ်လိုက်မတစ်ဦး ဖြစ်ပါတယ်】
ဤစကားကို ကြားသောအခါ တီကျွယ်တျန်း စကားမပြောနိုင်အောင် ဖြစ်သွားရသည်...
သူသည် မူလက ကောင်းကင်ဘုံကိုပင် နင်းချေနိုင်စွမ်းရှိသည့် ကံကြမ္မာ၏ သားတော်ဟု ထင်မှတ်ထားခဲ့သော်လည်း ယခုတော့ ဗီလိန်ဇာတ်ရုပ်သာ ဖြစ်လာခဲ့ရသည်… ဘ၀ကလည်း …
"ကဲ ဗီလိန် ဆိုတော့ လည်း ဗီလိန်ပေါ့ "
တီကျွယ်တျန်းသည် သူ၏ အခြေအနေနှင့် နောက်ခံကို ပြန်လည် ဆန်းစစ်လိုက်သည်...
ဤဗီလိန်ဇာတ်ရုပ်သည် သူနှင့် အမှန်တကယ်ပင် ကိုက်ညီကြောင်း သူ သဘောပေါက်လိုက်သည်...
"စနစ်... မင်းရဲ့ လုပ်ဆောင်ချက်တွေကို မိတ်ဆက်ပေးပါဦး"
【ကံကြမ္မာဗီလိန်စနစ်သည် အိမ်ရှင်အား အောင်မြင်သော ဗီလိန်တစ်ဦး ဖြစ်လာစေရန် ကူညီပေးဖို့အတွက် ရည်ရွယ်ထားပါတယ်】
【ကံကြမ္မာ၏ သားတော်တွေက အိမ်အပြင်ကို ခြေလှမ်းလိုက်တာနဲ့ ဘာကြောင့်များ ကံကောင်းခြင်းတွေနဲ့ ကြုံတွေ့နေရတာလဲ... သူတို့က ကောင်းကင်တာအိုရဲ့ အချစ်တော်တွေမို့လို့ပါ】
【ငါတို့ ဗီလိန်တွေကတော့ တံတားခင်းပေးရတဲ့ ခြေလှမ်းတွေသာ ဖြစ်ပါတယ်... ငါတို့ရဲ့ နှစ်ပေါင်းများစွာ တည်ဆောက်ထားတဲ့ အခြေခံတွေကို ဘာကြောင့်များ အလွယ်တကူနဲ့ ဖျက်ဆီးခံလိုက်ရမှာလဲ... ဒါကြောင့် ငါတို့က ဒီသံသရာကို ချိုးဖျက်ပြီး ကံကြမ္မာ၏ သားတော်ရဲ့ ကံကြမ္မာကို လုယူကာ နောက်ဆုံးမှာ သူတို့ကို ဖယ်ရှားပစ်ရပါမယ်】
【ပိုင်ရှင် က ကံကြမ္မာ၏ သားတော်ရဲ့ အခွင့်အရေးကို လုယူပြီးတဲ့အခါမှာ ကံကြမ္မာတန်ဖိုးကို ခိုးယူနိုင်မှာဖြစ်ပြီး ဗီလိန်အမှတ်တွေကို ရရှိမှာဖြစ်ပါတယ်】
【ဗီလိန်အမှတ်တွေကို သခင်ရဲ့ စွမ်းအားကို တိုးမြှင့်ဖို့ သို့မဟုတ် စနစ်အရောင်းဆိုင်ထဲက ကောင်းကင်ဘုံများနှင့် လောကအပေါင်းမှ ကျင့်စဉ်များ၊ လက်နက်များနှင့် ပစ္စည်းအမျိုးမျိုးကို ဝယ်ယူဖို့အတွက် အသုံးပြုနိုင်ပါတယ်】
【သို့သော် စနစ်အရောင်းဆိုင်ကို ဖွင့်လှစ်နိုင်ဖို့အတွက် သခင်က ကံကြမ္မာ၏ သားတော်တစ်ဦးကို အရင်ဆုံး သတ်ဖြတ်ရပါမယ်】
【ကံကြမ္မာ၏ သားတော်ကို သတ်ဖြတ်ဖို့ စည်းမျဉ်းကတော့ သူတို့ရဲ့ ကံကြမ္မာတန်ဖိုး သုညအထိ လျော့ကျသွားဖို့ လိုအပ်ပါတယ်】
【ကံကြမ္မာ၏ သားတော်နဲ့ ပတ်သက်ဆက်နွယ်နေတဲ့ အမျိုးသမီးများ၊ ကံကြမ္မာ၏ ဇာတ်လိုက်မများကိုတော့ သခင်အနေနဲ့ အတားအဆီးမရှိ သတ်ဖြတ်နိုင်ပါတယ်】
【ပိုင်ရှင်….လက်ရှိအချိန်မှာ အစပြုသူအတွက် လက်ဆောင်အထုပ်အပိုး တစ်ခု ရှိနေပါတယ်... ဖွင့်လှစ်မလား】
တီကျွယ်တျန်း ဤစကားကို ကြားသောအခါ သူ၏ မျက်ဝန်းများတွင် အလင်းတန်းတစ်ခု ဖြတ်ပြေးသွားသည်...
၎င်းမှာ တစ်ခဏချင်းမှာပင် ပျောက်ကွယ်သွား၏...
"အစပြုသူ လက်ဆောင်အထုပ်အပိုးကို ဖွင့်လိုက်"
【အစပြုသူ လက်ဆောင်အထုပ်အပိုးကို ဖွင့်လှစ်လိုက်ပါပြီ】
【ဂုဏ်ယူပါတယ် သခင်... သခင်က ရှေးဟောင်း ကမ္ဘာဦးမူလ နတ်ဆိုးကျင့်စဉ်ကို ရရှိသွားပါပြီ】
【အဆင့် ၆ ကျင့်ကြံသူအဆင့် - အဆင့်တက်ကတ် တစ်ခု】
【နတ်ဘုရားစွမ်းရည် - ကောင်းကင်ယံကို ဖြတ်တောက်သည့် တံဆိပ်တော်】
【 အာကာသ နတ်ဘုရားမျက်လုံး】
【ဗီလိန်အမှတ် တစ်သောင်း】
【ကံကြမ္မာဗီလိန်ရောင်ဝါ - မဟာတာအို၏ စူးစမ်းစစ်ဆေးမှုကို ခုခံကာကွယ်နိုင်စွမ်းရှိသည်】
တီကျွယ်တျန်း စနစ်၏ အကြောင်းကြားချက်များကို ကြားပြီးနောက် သူ၏ ရင်ထဲတွင် လှိုင်းထန်သွားရသည်...
"မဆိုးဘူး... တော်တော်လေးကို ခမ်းနားတာပဲ"
【ပိုင်ရှင် ၏ အချက်အလက်များကို ထုတ်ပေးနေပါပြီ】
သခင် - တီကျွယ်တျန်း
ကိုယ်ပိုင်လက္ခဏာ - မသေမျိုးနယ်မြေမှ တီ မိသားစု၏ နတ်ဘုရားသားတော်
ကိုယ်ခန္ဓာ - ရှေးဟောင်းကမ္ဘာဦး နတ်ဆိုးကိုယ်ခန္ဓာ၊ အာကာသ နတ်ဘုရားမျက်လုံး၊ ကံကြမ္မာဗီလိန် ရောင်ဝါ
စွမ်းအား - အဆင့် ၆ ကျင့်ကြံသူ၊ ရှေးဟောင်းကမ္ဘာဦး နတ်ဆိုးကျင့်စဉ်၊ ကောင်းကင်ဧကရာဇ်ကျင့်စဉ်၊ ဧကရာဇ်နတ်ဘုရားလက်ဝါး၊ ကောင်းကင်သတ် ဓားပညာ၊ လူသားဘုရင် တံဆိပ်တော်... နတ်ဘုရားစွမ်းရည် - ကောင်းကင် ဖြတ် တံဆိပ်တော်
ဗီလိန်အမှတ် - တစ်သောင်း
ပိုင်ဆိုင်မှုများ - မရှိ
တီကျွယ်တျန်း၏ အချက်အလက်များ ထုတ်ပေးနေစဉ်မှာပင် သူ၏ ကိုယ်ခန္ဓာအတွင်း၌ ကြောက်မက်ဖွယ်ကောင်းသော ပြောင်းလဲမှုများ ဖြစ်ပေါ်နေပြီ ဖြစ်သည်...
သို့သော် ကံကြမ္မာဗီလိန် ရောင်ဝါ၏ အကူအညီကြောင့် ဤပြောင်းလဲမှုများမှာ အပြင်သို့ မထွက်ပေါ်ခဲ့ပေ...
တီကျွယ်တျန်း ကိုယ်တိုင် ထုတ်ဖော်ပြသခြင်းမှလွဲ၍ပေါ့...
ရှေးဟောင်းနတ်ဆိုးခန္ဓာကို ကြည့်ရင်း တီကျွယ်တျန်း တိတ်ဆိတ်သွားသည်...
ယခင် တီကျွယ်တျန်းက လီရှီးကို ပြုစုပျိုးထောင်ခဲ့ခြင်းမှာ အကြောင်းမဲ့ မဟုတ်ကြောင်း သူ နားလည်သွားပြီ ဖြစ်သည်...
၎င်းမှာ သူ၏ နတ်ဆိုးကိုယ်ခန္ဓာကို ဖိနှိပ်ထားရန်အတွက် ဖြစ်၏...
မသေမျိုးနယ်မြေတွင် နတ်ဆိုးကိုယ်ခန္ဓာများစွာ ရှိကြသည်... သုံးဘဝ နတ်ဆိုးကိုယ်ခန္ဓာ၊ နတ်ဘုရားနတ်ဆိုးကိုယ်ခန္ဓာနှင့် ကောင်းကင် နတ်ဆိုးကိုယ်ခန္ဓာတို့တွင် နတ်ဆိုးဟူသော စကားလုံး ပါဝင်နေကြသည်...
သို့သော် ရှေးဟောင်းကမ္ဘာဦးနတ်ဆိုးခန္ဓာတစ်ခုတည်းသာ မသေမျိုးနယ်မြေ၏ တားမြစ်ချက်တစ်ခု ဖြစ်နေသည်...
တီကျွယ်တျန်း၏ မှတ်ဉာဏ်ထဲတွင် ကမ္ဘာဦး နတ်ဆိုးခန္ဓာမှာ နှစ်ပေါင်းတစ်သန်းကျော်အထိ ပေါ်မလာခဲ့သည်မှာ ကြာပြီ ဖြစ်သည်...
ယခင်ခေတ်က နတ်ဆိုးခန္ဓာ ပေါ်လာခဲ့စဉ်အခါက မသေမျိုးနယ်မြေ တစ်ခွင်လုံးရှိ မဟာဧကရာဇ် တစ်ရာကျော်မှာ သေဆုံးခဲ့ကြရသည်...
"အဲ့ဒီခေတ်ကို ဧကရာဇ်များ ကျဆုံးသည့်နေ့လို့လည်း ခေါ်ဆိုကြတယ်"
ထို့ကြောင့် ကမ္ဘာဦး နတ်ဆိုးခန္ဓာသည်လည်း တားမြစ်ချက်တစ်ခု ဖြစ်လာခဲ့သည်...
အဓိကအားဖြင့် ကြောက်ရွံ့ခြင်းကြောင့်သာ ဖြစ်၏...
ဤအရာအားလုံးသည် သူ၏ မှတ်ဉာဏ်ထဲတွင် ကိန်းအောင်းနေသည်...
တီကျွယ်တျန်း လီမိသားစုဆီ ရောက်လာချိန်တွင် သူသည် အဆင့် ၄ ကျင့်ကြံသူ - အထွတ်အထိပ်သို့သာ ရောက်ရှိနေခဲ့သည်...
ယခုတော့ သူသည် အဆင့် ၆ ကျင့်ကြံသူ - အဆင့် သို့ ရောက်ရှိသွားခဲ့ပြီ ဖြစ်သည်...
ယခင် တီကျွယ်တျန်းသည် သူ၏ ကိုယ်ခန္ဓာတွင်းရှိ နတ်ဆိုးချီများကို အမြဲတစေ ဖိနှိပ်ထားခဲ့ရပြီး ပိုမိုကောင်းမွန်သော ထိန်းချုပ်နည်းလမ်း မရှိခဲ့ပေ...
ထို့ကြောင့်ပင် တီကျွယ်တျန်းသည် နှစ်များတစ်လျှောက် အနည်းငယ် သွေးဆာနေခဲ့ခြင်း ဖြစ်သည်...
သို့သော် အပြင်လူများကတော့ ဤအကြောင်းကို သိရှိခြင်း မရှိကြပေ...
ယဲ့ချန်သည် တီကျွယ်တျန်းက သူ့ကို လျစ်လျူရှုထားသည်ကို မြင်သောအခါ အနည်းငယ် စိတ်အနှောင့်အယှက် ဖြစ်သွားရသည်... တီကျွယ်တျန်း၏ အဆင့်အတန်းမှာ မြင့်မြတ်သည်မှာ မှန်သော်လည်း သူ၏ လက်ရှိ အဆင့်အတန်းမှာလည်း နိမ့်ကျသည်တော့ မဟုတ်ပေ...
ထို့အပြင် ဤအလိုလိုက်ခံထားရသည့် ထူးချွန်သူများကဲ့သို့ မဟုတ်ဘဲ သူသည် တိုက်ပွဲပေါင်းများစွာကို ဖြတ်ကျော်ပြီးမှ ဤနေရာကို ရောက်လာခဲ့သူ ဖြစ်သည်...
ငယ်ရွယ်သည့် နေရာလေးတစ်ခုမှနေ၍ ယနေ့ခေတ် ထျန်းယန်နယ်မြေ၏ ပါရမီရှင်တစ်ဦး ဖြစ်လာသည်အထိ သူ ဘယ်လောက်တောင် ဒုက္ခခံခဲ့ရသလဲဆိုတာကို သူတို့ သိကြရဲ့လား...
အရင်က လေ့ကျင့်ရေး ခရီးစဉ်တစ်ခုတွင် နတ်သမီးလေးနှင့် တူသော လီရှီးကို တွေ့ဆုံခဲ့ရသည်ကို သူ ပြန်တွေးမိသည်...
သူမကို မြင်လိုက်သည့် တစ်ခဏမှာပင် ယဲ့ချန်၏ စိတ်ထဲတွင် ဒီမိန်းကလေးက သူ့အတွက်ပဲဖြစ်ပြီး ဘယ်သူမှ လုယူမသွားစေ မရဘူးဆိုသည့် ခံစားချက်မျိုး ပေါ်ပေါက်လာခဲ့သည်.....
မမျှော်လင့်ဘဲ သူမနှင့် လေ့ကျင့်ရင်း ထပ်မံ တွေ့ဆုံခဲ့ရသည်...
သူမ အန္တရာယ်နှင့် ကြုံတွေ့နေရချိန်တွင် ယဲ့ချန်က သူမကို ကယ်တင်ခဲ့သည်...
တစ်လကြာ အတူရှိခဲ့ပြီးနောက် သူတို့နှစ်ဦးမှာ ချစ်သူများ ဖြစ်လာခဲ့ကြသည်...
ဒီမိန်းကလေးကို ယခင်က တီကျွယ်တျန်းက ပြုစုပျိုးထောင်ထားခဲ့မှန်း သိလိုက်ရသည့်အခါတွင် သူ ပို၍ပင် စိတ်လှုပ်ရှားသွားရသည်... သူ ဘာကြောင့် ဒီလို ခံစားရလဲဆိုတာကိုတော့ သူ မသိပေ...
တီကျွယ်တျန်းက သူ့ကို လုံးဝ လျစ်လျူရှုထားသည်ကို မြင်သောအခါ...
ယဲ့ချန်၏ ယဉ်ကျေးမှုရှိသော စိတ်နေသဘောထားမှာ ပြောင်းလဲလာခဲ့သည်...
"ရှီးအာ လှပပြီး ကောင်းကင်နတ်သမီးလေးနဲ့ တူတယ်ဆိုတာ ငါ သိပါတယ်... မင်းတို့လို ကြီးကျယ်တဲ့ မိသားစုက ထူးချွန်သူတွေက သူမကို မြင်လိုက်တာနဲ့ သဘောကျမိတာ သဘာဝပါပဲ"
"ဒါပေမဲ့ တစ်ခါတလေကျရင် ကိုယ့်နေရာကိုယ် သိဖို့ လိုပါတယ်... မင်းတို့က အစွမ်းထက်တဲ့ မိသားစုတွေက ထူးချွန်သူတွေ ဖြစ်တဲ့အတွက် ငါတို့လို စွမ်းအားမရှိတဲ့သူတွေကို အတင်းအကျပ် မလုပ်သင့်ဘူး မဟုတ်လား"
"ဒါ့အပြင် မင်း သူမကို ချစ်တယ်ဆိုရင် သူမရဲ့ ဆန္ဒကို ဖြည့်ဆည်းပေးသင့်တာပေါ့"
"မင်း သူမကို တကယ်ချစ်ရင် သူမကို လွှတ်ပေးလိုက်ပြီး သူမရဲ့ ပျော်ရွှင်မှုကို ရှာဖွေခွင့်ပေးသင့်ပါတယ်... သူမသာ ပျော်ရွှင်နေမယ်ဆိုရင် ဝေးကွာတဲ့ နေရာကနေ ကြည့်နေရရုံနဲ့တင် ကျေနပ်စရာ ကောင်းတယ် မဟုတ်လား"
ယဲ့ချန် စကားပြောပြီးနောက် တီကျွယ်တျန်းကို စိန်ခေါ်သည့် အကြည့်ဖြင့် ကြည့်လိုက်ပြီး လီရှီးဆီသို့ ကြည့်လိုက်သည်...
လီရှီးသည် ယဲ့ချန်ကို ကြည့်လိုက်ရာ သူမ၏ မျက်ဝန်းများတွင် စိတ်လှုပ်ရှားမှုနှင့် ပျော်ရွှင်မှုတို့ ပြည့်နှက်နေသည်...
ယဲ့ချန်က သူမအတွက် တီကျွယ်တျန်းကို တိုက်ရိုက် ရင်ဆိုင်လိမ့်မည်ဟု သူမ မထင်ထားခဲ့ပေ...
တီကျွယ်တျန်းမှာမူ စကားတစ်ခွန်းမျှ မပြောသလို သူတို့ဘက်ကို တစ်ချက်မျှပင် မကြည့်ခဲ့ပေ...
ယဲ့ချန်မှာ ဒေါသထွက်လာသည်...
မည်သို့ပင်ဆိုစေကာမူ သူသည် ယခင်က မကျေနပ်လျှင် လူသတ်သည့်အထိ ရဲတင်းခဲ့သော ကံကြမ္မာ၏ သားတော် ဖြစ်သည်... သို့သော် ဤလူငယ်လေး၏ အဆင့်အတန်းကြောင့် သူ အနည်းငယ် စိုးရိမ်နေမိသည်...
ဟုတ်ပါတယ်... သူသည် သူ့နောက်ကွယ်ရှိ အင်အားကိုသာ ကြောက်ရွံ့နေခြင်း ဖြစ်သည်...
ယဲ့ချန်သည် သူ၏ စွမ်းအားမှာ မည်သည့် ထူးချွန်သူနှင့်မဆို မနိမ့်ကျဟု ယုံကြည်ထားသည်...
အချိန်ပိုရမည်ဆိုပါက ဧကရာဇ်အဆင့်ကို မြင်တွေ့နိုင်လိမ့်မည်ဟု ယဲ့ချန် ယုံကြည်နေသည်...
"သောက်ပြဿနာ... ဒီလို အသိတရားမရှိတဲ့ ကောင်က ဘယ်ကရောက်လာတာလဲ... ဒူးထောက်ပြီး တောင်းပန်လိုက် ပြီးရင် ကိုယ့်ဘာသာ သတ်သေလိုက်"
လီရှီး၏ ဖခင်သည် ယဲ့ချန်ကို ကြည့်ရင်း အော်ဟစ် ဆူပူလိုက်သည်...
လီရှီးသည် သူမ၏ ဖခင်ကို ကြည့်လိုက်ရာ သူမ၏ အမူအရာမှာ ပြောင်းလဲသွားရသည်...
အဘယ်ကြောင့်ဆိုသော် ယခုအချိန်တွင် သူမ၏ ဖခင်က သူမကို သတ်လိုသော စိတ်ဖြင့် ကြည့်နေသောကြောင့် ဖြစ်သည်...
ဤအရာမှာ တစ်ခါမှ မဖြစ်ခဲ့ဖူးပေ... ယခင်ကဆိုလျှင် သူမ၏ ဖခင်သည် သူမကို ကြည့်တိုင်း ကြင်နာတတ်ပြီး သူမ၏ သဘောထားကိုပင် အမြဲ ထည့်သွင်းစဉ်းစားလေ့ ရှိသည်...
"ညီမလေး... ဒီလို လုပ်ဖို့ သေချာပြီလား... မိသားစုကို သစ္စာဖောက်တော့မှာလား"
လီမိုသည် လီရှီးကို ကြည့်ပြီး မေးလိုက်သည်...
တကယ်တမ်းတွင် သူသည် အနည်းငယ် ဝမ်းသာနေမိသည်... မိသားစုမှာ ယခင်က လီရှီးကိုသာ ဗဟိုပြုနေခဲ့သော်လည်း ယခုတော့ လီရှီးက ရူးသွပ်သောကိစ္စများလုပ်နေပြီဖြစ်ရာ သူ၏ အခွင့်အရေး ရောက်လာပြီ မဟုတ်ပါလား...
"ငါ တီကျွယ်တျန်းရဲ့ အကြိုက်ကို ရသွားရင် နောင်တစ်ချိန်မှာ အများကြီး တိုးတက်လာမှာ မဟုတ်ဘူးလား... ဒါက မိသားစုရဲ့ လူငယ်သခင် ဖြစ်နေတာထက်စာရင် ပိုကောင်းပါတယ်"
"ကျွန်မ ဘာလုပ်လုပ် ရှင်နဲ့ မဆိုင်ဘူး... ရှင် ကိုယ့်ဘာသာ ကိုယ်ပဲ ဂရုစိုက်ပါ"
လီမိုကပါ သူ့ကို ထပ်ပြီး ဖိအားပေးနေသည်ကို မြင်သောအခါ လီရှီး ချက်ချင်းပင် ပြန်ပြောလိုက်သည်...
သူမ၏ မျက်လုံးထဲတွင်တော့ သူမ၏ အစ်ကိုဖြစ်သူမှာ အသုံးမကျသူသာ ဖြစ်သည်...
"ကောင်းတယ်... အရမ်းကောင်းတယ်... မိသားစုကို လုံးဝ အရေးမစိုက်တော့ဘူးပေါ့"
"မင်း သူ့ကို ကြိုက်နေတာ မဟုတ်လား"
"ဒါဆိုရင် ငါ သူ့ကို အရင် သတ်လိုက်မယ်"
လီမို စကားပြောပြီးနောက် သူ၏ ကိုယ်ခန္ဓာမှ အားကောင်းသော စွမ်းအားများ ပေါက်ကွဲထွက်လာပြီး အစိမ်းရောင် အလင်းတန်းများဖြင့် ဖုံးလွှမ်းသွားသည်...
"အဆင့် ၅ ကျင့်ကြံသူ နင်… အဆင့်တက်သွားတာလား"
လီရှီး၏ မျက်လုံးများတွင် အံ့သြမှု အရိပ်အယောင်တစ်ခု ဖြတ်ပြေးသွားသော်လည်း တစ်ခဏသာ ဖြစ်သည်... သူမကိုယ်တိုင်လည်း လွန်ခဲ့သော ခြောက်လကပင် အဆင့်တက်ထားခဲ့သောကြောင့် ဖြစ်သည်…