အခန်း ၁၈ - ကျင့်ကြံခြင်းအဆင့် တက်လှမ်းခြင်းနှင့် အခွင့်အရေး ပေါ်ပေါက်လာခြင်း

​ဝိညာဉ်ချီစွမ်းအင်များမှာ အဆက်မပြတ် ဆူပွက်လှုပ်ရှားနေခဲ့သည်။ ၎င်းသည် သုံးရက်နှင့် သုံးညတိုင်တိုင် ကြာမြင့်ခဲ့၏။

​ဤအချိန်တွင် မျိုးနွယ်စုဘိုးဘေးအိုကြီးများ သည် ဤမျှလောက်အထိ ကျယ်ပြန့်လှသော နယ်ပယ်အကွာအဝေးကို အာရုံခံကြည့်ရင်း ဆွံ့အမှင်တက်သွားခဲ့ကြရတော့သည်။

​'မိုင်ပေါင်းသန်းပေါင်းများစွာ အကျယ်အဝန်းရှိတဲ့ နယ်ပယ်အတွင်းက ဤမျှလောက် ပြင်းထန်အားကောင်းတဲ့ စွမ်းအင်တွေကို ဒီကလေးငယ်က ဘယ်လိုလုပ် ခံနိုင်ရည်ရှိနေရတာလဲ...'

​"မင်းက ငါ့ကိုမေးတော့ ငါကကော ဘယ်သူ့ကို မေးရမှာလဲ"

​ဒုန်း...

​တီကျွယ်တျန်း၏ ခန္ဓာကိုယ်ပတ်လည်တွင် သွေးရောင်လွှမ်းသော မြူခိုးအချို့ စတင်ဖြစ်ပေါ်လာခဲ့သည်။ 

​"ဝိညာဉ်ချီစွမ်းအင်တွေ အားလုံးကို သူ့ရဲ့ နတ်ဆိုးခန္ဓာကိုယ်ဖွဲ့စည်းပုံက အကုန်စုပ်ယူသွားတာပဲ" ဘိုးဘေးအိုကြီးများ အသက်ရှူမှားမတတ် ဖြစ်သွားကြရသည်။

​"ဒီကလေးငယ်က အံ့အားသင့်စရာကောင်းတဲ့ အသွင်ပြောင်းလဲခြင်းကို ပြီးမြောက်သွားခဲ့ပုံရတယ်"

​"ဒီတစ်ကြိမ်မှာတော့ သူက ထူးခြားတဲ့စွမ်းအား တစ်ခုကိုပါ ဖန်တီးနိုင်လိမ့်မယ်လို့ ခန့်မှန်းရတယ်"

​တီကျွယ်တျန်း နောက်ဆုံးတွင်တော့ မျက်လုံးများကို ဖွင့်လိုက်သည်။ 

သူ၏ မျက်ဝန်းများထဲမှ အလင်းတန်းများ ပျောက်ကွယ်သွားခဲ့ပြီ ဖြစ်၏။ ဘိုးဘေးအိုကြီးများအားလုံး စိုးရိမ်ပူပန်သွားကြရသည်။ 

ယခင်က တီကျွယ်တျန်းသည် မိမိ၏ ခန္ဓာကိုယ်ဖွဲ့စည်းပုံကို ထိန်းချုပ်နိုင်စွမ်း ရှိခဲ့သော်လည်း ယခုအခါ နတ်ဆိုးခန္ဓာက စွမ်းအင် အမြောက်အမြားကို စုပ်ယူထားခဲ့ခြင်း ဖြစ်သည်။ 

တီကျွယ်တျန်းအနေဖြင့် မိမိ၏ ခန္ဓာကိုယ်ဖွဲ့စည်းပုံကို ဆက်လက်ထိန်းချုပ်နိုင်စွမ်း ရှိပါသေးလားဆိုသည်ကို သူတို့ မသိကြချေ။

​"ဘိုးဘေးအိုကြီးတို့ စိုးရိမ်ပူပန်မနေကြပါနဲ့... ကျွန်တော် ဒီခန္ဓာကိုယ်ဖွဲ့စည်းပုံကို ကောင်းကောင်း ထိန်းချုပ်နိုင်‌နေပါပြီ"

​တီကျွယ်တျန်း၏ စကားကို ကြားလိုက်ရသဖြင့် ဘိုးဘေးအိုကြီးများအားလုံး သက်ပြင်းချနိုင်သွားကြတော့သည်။ 

ထို့နောက် ချက်ချင်းပင် သူတို့၏ မျက်နှာထက်၌ ကျေနပ်ဝမ်းမြောက်မှု အရိပ်အယောင်များ ပြည့်နှက်သွားခဲ့၏။

​"မင်းရဲ့ ခန္ဓာကိုယ်ထဲမှာ ဘယ်လိုအပြောင်းအလဲတွေ ဖြစ်သွားလဲ" ဘိုးဘေးအိုကြီးများ အလွန်တရာ စူးစမ်းလိုစိတ် ဖြစ်ပေါ်နေကြသည်။

​"နောင်တစ်ချိန်ကျရင် ဘိုးဘေးတို့ အလိုလို သိလာပါလိမ့်မယ်" တီကျွယ်တျန်းက အကွက်ချချန်ထားလိုက်သည်။

​"မင်း ကောင်စုတ်လေး..."

​"ထားလိုက်ပါတော့... ငါတို့တွေ ဆက်မမေးတော့ပါဘူး… မင်းကိုယ်မင်း ဘေးကင်းအောင် နေနိုင်ရင်ပဲ အဆင်ပြေပါပြီ"

​"ဟုတ်တယ်... ခဏနေရင် မင်း အဖေရှိတဲ့နေရာကို သွားလိုက်ဦး… အဲ့ဒီမှာ ကိစ္စအသေးအဖွဲလေးတစ်ခု ရှိတယ်…. အခု မင်း ကျင့်ကြံခြင်းအဆင့် တက်လှမ်းပြီးပြီဆိုတော့... အပြင်ထွက်ပြီး လောကအတွေ့အကြုံ ရှာဖွေဖို့ အချိန်ကောင်းပဲလေ"

​"အဲ့ဒီအရာက မင်းအတွက် အတော်လေး အသုံးဝင်လာလိမ့်မယ်" တစ်ဆယ့်ခြောက်ယောက်မြောက် ဘိုးဘေးက ရုတ်တရက် ပြောလိုက်သည်။

​တစ်ဆယ့်ခြောက်ယောက်မြောက် ဘိုးဘေး၏ စကားကို ကြားရသောအခါ တီကျွယ်တျန်းက ခေါင်းညိတ်ပြလိုက်၏။

​တီကျွယ်တျန်း ထွက်ခွာသွားသည်ကို ကြည့်ပြီးနောက် ဘိုးဘေးအိုကြီးများ အချင်းချင်း လှည့်ကြည့်လိုက်ကြသည်။

​"ဒီကလေးငယ် အရွယ်ရောက်လာမယ့်အချိန်ကို ငါ တကယ်ပဲ မျှော်လင့်မိတယ်"

​"ဒါနဲ့... ဒီကလေးက ငါတို့ရဲ့ ကျင့်ကြံခြင်းအဆင့်ကို မှီဖို့အတွက် အချိန်ဘယ်လောက်အထိ ကြာမြင့်မယ်လို့ ထင်လဲ"

​"ငါလည်း မသိဘူး... ဒါပေမဲ့ အချိန်အများကြီးတော့ ကြာမှာမဟုတ်ပါဘူး"

​"အသက် တစ်ဆယ့်ခုနစ်နှစ်အရွယ်နဲ့တင် တာအိုနန်းတော် အဆင့် ကို ရောက်ရှိနေပြီဆိုတော့... မသေမျိုးနယ်ပယ်တစ်ခုလုံးမှာတောင် တကယ့်ကို တွေ့ရခဲတဲ့ ပါရမီရှင်ပဲ"

​"မမေ့နဲ့ဦး... အပြင်မှာ ထူးဆန်းတဲ့ လူထူးဆန်းကြီးတွေ ရှိနေသေးတယ်ဆိုတာကို"

​"ဒါပေမဲ့ အဲ့ဒီကောင်တွေအားလုံးက ငါတို့ ထျန်းအာအတွက် ခြေနင်းကျောက်တုံးတွေပဲ ဖြစ်လာလိမ့်မယ်လို့ ငါ ယုံကြည်တယ်" ဘိုးဘေးအိုကြီးက အလွန်တရာ ပြတ်သားအားကောင်းလှသော ယုံကြည်ချက်ကို ထုတ်ဖော်ပြသလိုက်သည်။

​ဤအချိန်တွင် တီကျွယ်တျန်းသည် နောက်ဘက်တောင်တန်းမှ ထွက်ခွာလာခဲ့ပြီးနောက် သက်ပြင်းတစ်ချက်ချကာ နူးညံ့လှသော အပြုံးတစ်ခုကို ပြသလိုက်သည်။ 

တီမိသားစုဝင်များက သူ့ကို မြင်တွေ့လိုက်ရချိန်တွင် ရိုသေစွာ ဦးညွှတ် အရိုအသေပေးကြ၏။

​"နတ်ဘုရားသားတော်က ပိုပြီးတော့ အစွမ်းထက်လာတယ်လို့ ငါ ခံစားနေရတယ်"

​"ငါလည်း အဲ့လိုပဲ ခံစားရတယ်။ ဤမျှလောက် ဝေးကွာတဲ့နေရာကနေတောင် ငါ အာရုံခံမိနေတယ်... သူက တကယ့်ကို အစွမ်းထက်လွန်းလှတယ်" တီမိသားစု အစေခံမိန်းကလေးအချို့က တီကျွယ်တျန်းကို စွဲလန်းရူးသွပ်သော အကြည့်များဖြင့် စိုက်ကြည့်နေကြသည်။

​"နတ်ဘုရားသားတော်... မိသားစုခေါင်းဆောင်က သားတော်ကို တွေ့ချင်နေပါတယ်" အကြီးအကဲ လင်း ထွက်ပေါ်လာပြီး တီကျွယ်တျန်းကို ကြည့်ကာ ပြောလိုက်သည်။

​"ကျွန်တော် နားလည်ပါပြီ"

​လေဟာနယ် လမ်းကြောင်းတစ်ခု ထွက်ပေါ်လာခဲ့ပြီ ဖြစ်၏။ 

တီကျွယ်တျန်းက ၎င်းအတွင်းသို့ လှမ်းဝင်လိုက်သည် တီမိသားစု နယ်မြေသည် အလွန်တရာ ကျယ်ပြောလှသဖြင့် မိမိ၏ မိသားစုနယ်မြေအတွင်း၌ သွားလာလှုပ်ရှားလျှင်ပင် လေဟာနယ် လမ်းကြောင်းများကို အသုံးပြု၍ ဖြတ်သန်းကြရခြင်း ဖြစ်သည်။

နန်းတော်ကြီးအတွင်းသို့ ရောက်ရှိလာခဲ့ချိန်တွင် ဗဟိုချက်မရှိ မြင့်မားလှသော ပလ္လင်ထက်၌ အမျိုးသားတစ်ဦး ထိုင်နေသည်ကို တွေ့လိုက်ရသည်။ 

သူသည် ခန့်ညားထည်ဝါလှပြီး လွှမ်းမိုးချုပ်ကိုင်နိုင်စွမ်း ရှိကာ သူ၏ ချောမောခန့်ညားသော မျက်နှာပြင်ကို ချီစွမ်းအင်များဖြင့် ဖုံးကွယ်ထားခဲ့ခြင်း ဖြစ်သည်။ သို့သော် တီကျွယ်တျန်း ပေါ်လာသည်နှင့် သူ၏ ရုပ်သွင်အစစ်အမှန်ကို ထုတ်ဖော်ပြသလိုက်၏။

​တီကျွယ်တျန်းနှင့် တီဝူရှန်းတို့၏ ရုပ်သွင်မှာ ရှစ်ဆယ်ရာခိုင်နှုန်းခန့် ထပ်တူညီမျှလှပေသည်။ တီကျွယ်တျန်း ရောက်ရှိလာသည်ကို မြင်တွေ့ရသောအခါ တီဝူရှန်း၏ မျက်နှာထက်၌ ကြင်နာယုယလှသော အပြုံးတစ်ခု ပေါ်ထွက်လာခဲ့၏။

​'ထျန်းအာ... အခြေအနေ ဘယ်လိုလဲ...'

​"မဆိုးပါဘူး... ကျွန်တော် ခန္ဓာကိုယ်ဖွဲ့စည်းပုံကို အခု ကောင်းကောင်း ထိန်းချုပ်နိုင်သွားပါပြီ"

​ထိုစကားကို ကြားလိုက်ရသဖြင့် တီဝူရှန်း၏ မျက်ဝန်းများထဲ၌ ကျေနပ်ဝမ်းမြောက်မှုများဖြင့် ပြည့်နှက်သွားခဲ့သည်။ တန်ခိုးအာဏာကြီးမားလှသော တီမိသားစု၏ မိသားစုခေါင်းဆောင်သည် ယခုအချိန်တွင်တော့ သူ၏ ခန္ဓာကိုယ်မှာ အနည်းငယ်မျှပင် တုန်လှုပ်ချောက်ချားနေခဲ့ရ၏။ 

ဤအခိုက်အတန့်တွင် တီဝူရှန်းသည် မြင့်မြတ်လှသော တီမိသားစု၏ ခေါင်းဆောင် မဟုတ်ဘဲ ဖခင်တစ်ဦးသာ ဖြစ်ပေသည်။ မိမိ၏ သားဖြစ်သူအတွက် စိုးရိမ်ပူပန်နေရသော ဖခင်တစ်ဦး ဖြစ်၏။

​"အဖေ... ကျွန်တော့်အတွက် နောက်ထပ် စိုးရိမ်ပူပန်မနေပါနဲ့တော့" တီကျွယ်တျန်းလည်း ပြုံးလိုက်မိသည်။ ဤသည်မှာ သူ၏ ဖခင်အပေါ် ထားရှိသော သားသမီးဝတ္တရား (ဝတ်ပြုခြင်း) အနည်းငယ်မျှပင် ဖြစ်သည်။

​"ကောင်းတယ်... တကယ့်ကို ကောင်းတယ်"

​"ငါ မင်းကို ဒီကို ခေါ်လိုက်ရတဲ့ အကြောင်းရင်းကတော့... မင်းကို အောက်ကမ္ဘာ  ဆီ လွှတ်ချင်လို့ပဲ"

​"မိသားစုထဲက လူတစ်ယောက်က အဲ့ဒီနေရာမှာ အားကောင်းလှတဲ့ ကံကောင်းမှု အခွင့်အရေး  တစ်ခု ရှိနေတယ်လို့ ဟောကိန်းထုတ်ထားတယ်"

​"အသေးစိတ် အခြေအနေကိုတော့ ငါ အသေအချာ မသိရသေးဘူး... ဒါပေမဲ့ မိစ္ဆာစွမ်းအင် နဲ့ ပတ်သက်နေတာမျိုး ဖြစ်နိုင်တယ်"

​ထိုစကားကို ကြားရသောအခါ တီကျွယ်တျန်း ခဏမျှ ကြောင်အသွားခဲ့ရသည်။ အဆုံး၌မူ မိစ္ဆာစွမ်းအင်ဟူသည် မည်သို့ ပြောရမည်နည်း။

​မသေမျိုးနယ်ပယ်တွင် လူတိုင်းက မိစ္ဆာဂိုဏ်းသားများကို မုန်းတီးကြပြီး မိစ္ဆာစွမ်းအင်ရှိသူကို မြင်တွေ့ရသည်နှင့် လူမှား၍ သတ်မိပါစေဦး... လွတ်မြောက်ခွင့် လုံးဝမပေးကြပေ။ 

သို့သော်လည်း အချို့သော မိစ္ဆာဂိုဏ်းများတွင် အလွန်တရာ ယုတ်မာရက်စက်သော လူများ ရှိနေကြဆဲ ဖြစ်သည်။ ၎င်းတို့သည် လူသားမျိုးနွယ်စု၏ မုန်းတီးခြင်းကို ခံကြရသော်လည်း အဆုံး၌မူ လူသားမျိုးနွယ်စုဝင်များသာ ဖြစ်ကြပြီး စစ်မှန်သော မိစ္ဆာများတော့ မဟုတ်ကြချေ။

လူအများစုမှာ မိစ္ဆာဂိုဏ်းသားများကို သတ်ဖြတ်ရန် အော်ဟစ်နေကြသော်လည်း မိစ္ဆာလက်နက်များကိုမူ ကိုယ်တိုင်အသုံးပြုရင်း တကယ့်ကို အစွမ်းထက်လှသည်ဟု ဆိုတတ်ကြသေးသည်။ 

အချို့သော လူများမှာလည်း မိစ္ဆာကျင့်စဉ် များကို ကိုယ်တိုင် ကျင့်ကြံနေကြဆဲ ဖြစ်၏။

​သို့သော်လည်း လူတိုင်းက ၎င်းကို မျက်ကွယ်ပြုထားကြသည်။ မိစ္ဆာကျင့်စဉ်များကို ကျင့်ကြံခြင်းမှာ မိမိ၏ ကိုယ်ပိုင် သိုင်းပညာရပ်များကို ပိုမိုပြည့်စုံကောင်းမွန်စေရန်အတွက်သာ ဖြစ်သည်။ တီ မိသားစု၏ မျိုးနွယ်စုဘိုးဘေးအိုကြီးများနှင့် တီဝူရှန်းကိုယ်တိုင်ပင် မိစ္ဆာကျင့်စဉ်များကို ကျင့်ကြံဖူးကြပေသည်။ 

အခြားသော အားကောင်းလှသည့် အင်အားစုများတွင်လည်း ရှိနေကြဆဲ ဖြစ်၏။ သို့သော် ၎င်းတို့ကို မှီငြမ်းကိုးကားစရာ ပစ္စည်းတစ်ခုအဖြစ်သာ သတ်မှတ်ထားကြခြင်း ဖြစ်သည်။

​သို့သော်လည်း အကယ်၍ မင်းက ၎င်းကို အပြင်ဘက်တွင် တိုက်ရိုက် ထုတ်ဖော်ပြသမိပါက...  နောက်ကွယ်ရှိ အင်အားစုက အလွန်တရာ အစွမ်းထက်နေခြင်း သို့မဟုတ်  ကိုယ်ပိုင်အင်အားက ခြိမ်းခြောက်မှုအားလုံးကို မျက်ကွယ်ပြုနိုင်လောက်အောင် ကြီးမားနေခြင်းမျိုး မရှိပါက ပြဿနာတက်ပေလိမ့်မည်။ 

ထိုကဲ့သို့သော နောက်ခံမရှိဘဲ မိစ္ဆာကျင့်စဉ်များကို ကျင့်ကြံနေကြသော အားနည်းသူများမှာမူ မိစ္ဆာချီစွမ်းအင်များ ထွက်ပေါ်လာပြီး အခြားလူများ၏ ရှာဖွေတွေ့ရှိခြင်း ခံလိုက်ရသည်နှင့် သေခြင်းတရားတစ်ခုသာ စောင့်ကြိုနေပေလိမ့်မည်။ 

ဤသည်မှာ တောရိုင်းတိရစ္ဆာန်များ၏ ဥပဒေသ (အင်အားကြီးသူက အနိုင်ယူစတမ်း) ကို အပြည့်အဝ ပြသနေခြင်း ဖြစ်၏။

​"ကျွန်တော် ဘယ်အချိန်မှာ စပြီး ထွက်ခွာရမလဲ" တီကျွယ်တျန်းလည်း အတော်လေး စူးစမ်းလိုစိတ် ဖြစ်ပေါ်သွားခဲ့သည်။

​"ဒီနေ့ပဲ... မိသားစုထဲက လူအချို့က အောက်ကမ္ဘာဆီ အရင်သွားနှင့်နေကြပြီ"

​ထိုစကားကို ကြားရသောအခါ တီကျွယ်တျန်း ပြုံးလိုက်မိသည်။ အောက်ကမ္ဘာသို့ သွားရောက်ချိန်တွင် အခြားသော ကံကြမ္မာသားတော်တစ်ယောက်ကို ထပ်မံတွေ့ဆုံနိုင်မလားဟု သူ တွေးတောနေမိ၏။

​"ဒါက အောက်ကမ္ဘာရဲ့ သတင်းအချက်အလက်တွေပဲ…ငါတို့ တီမိသားစုရဲ့ လက်အောက်ခံ မိသားစုအချို့က အောက်ကမ္ဘာမှာ အင်အားအချို့ ရှိနေသေးတယ်.. တစ်စုံတစ်ယောက်က သူတို့ကို ကြိုတင်အကြောင်းကြားထားပြီးပြီ"

​တီကျွယ်တျန်းက ထိုစကားကို ကြားပြီးနောက် ခေါင်းညိတ်ပြလိုက်သည်။

​"အောက်ကမ္ဘာက ကိစ္စရပ်တွေကို အမြန်ဆုံး ရှင်းလင်းပစ်လိုက်ဦး"

​"လွန်ခဲ့တဲ့ ရက်အနည်းငယ်တုန်းက မင်းရဲ့ မိခင်က သတင်းစကားတစ်ခု ပို့ထားတယ်။ မင်းကို မင်းရဲ့ အဘိုးအိမ်ဆီ လာခဲ့ဖို့ ပြောထားတယ်... 'ယင်ယန် နတ်ဘုရားသစ်သီး' တွေက မကြာခင် ရင့်မှည့်တော့မှာမို့လို့ပဲ"

​ထိုစကားကို ကြားရသောအခါ တီကျွယ်တျန်း ခေါင်းညိတ်လိုက်သည်။ တီကျွယ်တျန်း ထွက်ခွာသွားသည်ကို ကြည့်ပြီးနောက် တီဝူရှန်း၏ ပုံရိပ်သည်လည်း ပျောက်ကွယ်သွားခဲ့တော့၏။

​ဤအချိန်တွင် တီကျွယ်တျန်းသည် မိမိ၏ အခန်းအတွင်းသို့ ပြန်လည်ရောက်ရှိလာခဲ့သည်။ 

သူသည် အခန်းတွင်းရှိ အမျိုးသမီးကို မြင်တွေ့လိုက်ရချိန်တွင် ချက်ချင်းပင် တိုက်ခိုက်ရန် ပြင်ဆင်လိုက်မိသော်လည်း သူမ၏ မျက်နှာကို သေချာမြင်လိုက်ရချိန်တွင်မှ ရုတ်တရက် သတိရသွားခဲ့တော့၏။ 

(ခေါ်ထားပြီးမေ့နေတာ တဲ့)

ဤသည်မှာ သူ ခေတ္တခဏ ငှားရမ်းလာခဲ့သော ကံကြမ္မာသမီး‌တော် မဟုတ်ပါလား။ သူသာ အနည်းငယ် အသိ၀င်နောက်ကျသွားပါက ဤအမျိုးသမီးကို တိုက်ရိုက် သတ်ဖြတ်မိတော့မည် ဖြစ်သည်။

​ဆန်ကွမ်းဝမ်အာလည်း ရင်တထိတ်ထိတ် ဖြစ်သွားခဲ့ရသည်။ ရက်အနည်းငယ်မျှသာ ရှိသေးသော်လည်း ဤလူက သူမကို လုံးဝ မေ့လျော့နေခဲ့ခြင်း ဖြစ်၏။ 

မူလက သူသည် သူမ၏ ခန္ဓာကိုယ်ကို လိုချင်တက်မက်နေခြင်း ဖြစ်လိမ့်မည်ဟု သူမ ထင်မှတ်ခဲ့သော်လည်း သူက သူမကို လုံးဝ ဂရုမစိုက်ဘဲ ပစ်ထားလိမ့်မည်ဟု သူမ မထင်ထားခဲ့မိချေ။

​"ဒီနေ့ကစပြီး... မင်းက ငါ့ရဲ့ အစေခံမိန်းကလေးပဲ" တီကျွယ်တျန်းက အမိန့်ပေးလိုက်သည်။

​"နားလည်ပါပြီ..." ဆန်ကွမ်းဝမ်အာက ပြောလိုက်၏။

​တီကျွယ်တျန်း အနည်းငယ် အံ့အားသင့်သွားခဲ့ရသည်။ ဆန်ကွမ်းဝမ်အာအနေဖြင့် ၎င်းကို လုံးဝ ငြင်းဆန်ခြင်း မရှိလိမ့်မည်ဟု သူ မထင်ထားခဲ့မိခြင်းကြောင့် ဖြစ်သည်။

​"နောင်တစ်ချိန်ကျရင်... ငါ့ကို 'သခင်လေး' လို့ ခေါ်ရမယ်"

​"သခင်လေး..."

​တီကျွယ်တျန်း စိတ်ကျေနပ်စွာဖြင့် ခေါင်းညိတ်လိုက်သည်။ သူ၏ ရှေးဟောင်းနတ်ဆိုးခန္ဓာ သည် မူလကတည်းကပင် လူသားများကို ထိန်းချုပ်ရန်အတွက် 'နတ်ဆိုးမျိုးစေ့' ကို ဖန်တီးနိုင်စွမ်း ရှိပေသည်။ 

ယခင်က တီကျွယ်တျန်းသည် ၎င်းကို အသုံးမပြုဝံ့ခဲ့ဘဲ မိမိကိုယ်မိမိ အမြဲတမ်း ပြန်လည်ဖိနှိပ်ထားခဲ့ရခြင်း ဖြစ်၏။ 

သူသည် ကမ္ဘာကူးပြောင်းလာပြီးနောက် သူ၏ ခန္ဓာကိုယ်ဖွဲ့စည်းပုံကို အပြည့်အဝ ထိန်းချုပ်နိုင်သွားခဲ့သည့်အတွက် ယခုအခါ မည်သည့်အချိန်တွင်မဆို မိစ္ဆာမျိုးစေ့ကို အလွယ်တကူ ဖန်တီးနိုင်ပြီ ဖြစ်သည်။

​သို့သော်လည်း တီကျွယ်တျန်းသည် ၎င်းကို ဆန်ကွမ်းဝမ်အာအပေါ်၌ အသုံးမပြုခဲ့ပေ။ အောက်ကမ္ဘာသို့ သွားရောက်မည့် ခရီးစဉ်က ပျင်းစရာကောင်းမလား၊ မကောင်းဘူးလားဆိုတာကို သူ မသိသေးသဖြင့် မိမိ၏ ဘေးနားတွင် အပျင်းပြေစေရန်အတွက် ဇာတ်လိုက်မ တစ်ဦး ရှိနေခြင်းကလည်း အတော်လေး ကောင်းမွန်လှပေသည်။ 

အကယ်၍ သူက သူမကို နတ်ဆိုးမျိုးစေ့ဖြင့် ထိန်းချုပ်ကာ ကြိုးဆွဲရုပ်သေးရုပ်တစ်ရုပ် အဖြစ် ပြောင်းလဲပစ်လိုက်ပါက ပျင်းစရာကောင်းသွားပေလိမ့်မည်။ 

အကယ်၍ အခြားသော ကံကြမ္မာသားတော်တစ်ယောက် ပေါ်ထွက်လာမည်ဆိုပါက ထိုအရာက တစ်မျိုးတစ်ဖုံ ပြောင်းလဲသွားပေလိမ့်မည်။

​တီကျွယ်တျန်းသည် ကျောက်စိမ်းပြားတစ်ခုကို ထုတ်ယူလိုက်သည်။ 

၎င်းအတွင်း၌ အောက်ကမ္ဘာ၏ သတင်းအချက်အလက်များကို မှတ်တမ်းတင်ထားခဲ့ခြင်း ဖြစ်၏။ 

၎င်းသည် အောက်ကမ္ဘာတွင် ကံကောင်းမှု အခွင့်အရေးများ ပေါ်ပေါက်လာမည့် နေရာများကို ဟောကိန်းအရ အမှတ်အသားပြုထားခဲ့သည်။ 

မသေမျိုးနယ်ပယ်တွင် အားကောင်းလှသော အင်အားစုအများစု၌ မိမိတို့ မိသားစု၏ အခြေခံအုတ်မြစ်ကို ပိုမိုတောင့်တင်းစေရန်အတွက် ကောင်းကင်နှင့် မြေကြီးကို ဟောကိန်းထုတ်နိုင်စွမ်းရှိသော လူများ ရှိကြပေသည်။ 

မိသားစုတစ်ခုလုံးကို စိတ်ဝင်စားသွားစေလောက်သော အခွင့်အရေးဟူသည် သေချာပေါက် အလွန်တရာ ကြီးမားလှသော ရတနာတစ်ခု ဖြစ်ရပေမည်။

​"အဇူရာ လျှို့ဝှက်ဆန်းကြယ် နယ် မြေဟုတ်လား..." တီကျွယ်တျန်းက တိုးတိုးလေး ရေရွတ်လိုက်သည်။

​"သခင်လေး... သခင်လေး အခုပြောလိုက်တာ 'အဇူရာ လျှို့ဝှက်ဆန်းကြယ် နယ်‌‌ မြေ' အကြောင်းလား" ဆန်ကွမ်ဝမ်အာက ရုတ်တရက် လှမ်းမေးလိုက်တော့သည်။