အခန်း ၁၆ - မင်း အခုထိ မထွက်သွားသေးဘူးဆိုရင် ငါကပဲ လိုက်ပို့ပေးရမလား
လက်ရှိအချိန်တွင် ကုန်းရှင်းယွဲ့သည် တီမိသားစု၏ အိမ်တော်သခင်မ ဖြစ်လာခဲ့သည့်အတွက် မျိုးနွယ်စုဘိုးဘေးအိုကြီးများ မှာ အလွန်တရာ ကျေနပ်ဝမ်းမြောက်နေကြသည်။ ထို့ပြင် ဘိုးဘေးအိုကြီးများသည် ကုန်းရှင်းယွဲ့ဘက်မှ အမြဲတမ်း ဘက်လိုက်ကာကွယ်ပေးလေ့ ရှိကြ၏။
တီကျွယ်တျန်းကို မွေးဖွားလာခဲ့သည့် အချိန်ကတည်းကပင် ဤဘိုးဘေးအိုကြီးများသည် အသက်ရှင်သန်ခဲ့ရသည့် သက်တမ်း ရှည်လျားလွန်းလှသဖြင့် အပျင်းပြေစေရန်အတွက် စနောက်တတ်ကြသည်။
အဆိုးရွားဆုံး ဖြစ်ရပ်တစ်ခုမှာ သူတို့သည် တီကျွယ်တျန်းအား နတ်သမီးလေးများ ရေချိုးနေသည် ကို သွားရောက်ကြည့်ရှုခိုင်းခဲ့ခြင်းပင် ဖြစ်သည်။
ဤသည်မှာ တစ်ဆယ့်ခြောက်ယောက်မြောက် ဘိုးဘေးအိုကြီး လုပ်ဆောင်ခဲ့သော ကိစ္စရပ်တစ်ခု ဖြစ်၏။
ထိုအကြောင်းကို ကုန်းရှင်းယွဲ့ သိရှိသွားသောအခါ သူမသည် အလွန်အမင်း ဒေါသထွက်သွားခဲ့ပြီး တစ်ဆယ့်ခြောက်ယောက်မြောက် ဘိုးဘေးအိုကြီး၏ ခေါင်းတလားအဖုံးကိုပင် ရိုက်ခွဲပစ်ရန် ကြိုးစားခဲ့ဖူးသည်။ ကံကောင်းထောက်မစွာဖြင့် တစ်ဆယ့်ခြောက်ယောက်မြောက် ဘိုးဘေးအိုကြီးက သူ၏ခေါင်းတလားကို သံရိုက်ပြီး သေချာပိတ်ထားခဲ့ခြင်းကြောင့် သက်သာရာရခဲ့ခြင်း ဖြစ်သည်။
သို့သော်လည်း ကုန်းရှင်းယွဲ့သည် ထိုမျှနှင့် အားမရဘဲ ကောင်းကင်ပုံဆောင်ခဲ များကို အသုံးပြုကာ တစ်ဆယ့်ခြောက်ယောက်မြောက် ဘိုးဘေးအိုကြီး၏ ခေါင်းတလားကို ချိတ်ပိတ်ပစ်ခဲ့ပြီး ဤအရှက်မရှိသော အဖိုးကြီးအား အပြင်သို့ လုံးဝထွက်ခွင့်မပြုရန် ကြေညာခဲ့သည်။
ထို့နောက်တွင် ကုန်းရှင်းယွဲ့သည် မိမိ၏ ဒေါသများကို သူ၏အပေါ်၌သာ ပုံချတော့၏။ သုံးနှစ်ဆက်တိုက် သူမသည် နေ့တိုင်း ထိုကဲ့သို့ တူညီသောအရာကို လုပ်ဆောင်ခဲ့သည်။ ယခုအချိန်အထိ ပြန်လည်တွေးတောမိလျှင်ပင် သူ၏ ခါးက အနည်းငယ် နာကျင်နေဆဲ ဖြစ်သည်။
"တစ်ဆယ့်ခြောက်ယောက်မြောက် ဘိုးဘေး... ဘိုးဘေးအနေနဲ့ ဒီကိစ္စထဲ ဝင်မပါသင့်ဘူး…မဟုတ်ရင် ရှင်းယွဲ့သာ သိသွားလို့ကတော့ ဘိုးဘေးဆီ ပြဿနာလာရှာဦးမှာ"
"ကိစ္စမရှိပါဘူး…ဒါက သူမအတွက် ချွေးမရှာပေးနေတာပဲလေ… တကယ်တော့... ဒီကောင်မလေးက ချွေးမအဆင့်အထိ သတ်မှတ်ဖို့ မတန်ပါဘူး။ သူမရဲ့ အဆင့်အတန်းက မထိုက်တန်ဘူး"
"နှလုံးအာရုံခုနစ်ပါး ထူးကဲခန္ဓာ က အနည်းငယ် လိုအပ်နေသေးတယ်"
ပြောသူက မရည်ရွယ်ဘဲ ပြောလိုက်သော်လည်း ကြားရသူမှာ စိတ်ထဲတွင် အကြီးအကျယ် မှတ်သားသွားခဲ့သည်။
ဝမ်ဖာနတ်ဘုရားဂိုဏ်း ၏ ဂိုဏ်းချုပ်သည် မျက်နှာအမူအရာ ချက်ချင်း ပျက်ယွင်းသွားခဲ့ရ၏။
ယခင်က တီကျွယ်တျန်း မွေးဖွားလာစဉ်တုန်းက ဖြစ်ပေါ်ခဲ့သော ထူးဆန်းသည့် ဖြစ်စဉ်များမှာ အလွန်တရာ ကြောက်မက်ဖွယ်ကောင်းလှသည်။
တီကျွယ်တျန်း၏ ခန္ဓာကိုယ်ဖွဲ့စည်းပုံ က အမှန်တကယ် မည်သည့်အရာ ဖြစ်သည်ကို မည်သူမျှ မသိရှိကြချေ။ ယခုအခါတွင်တော့ အလွန်အစွမ်းထက်လှသည့် 'နှလုံးအာရုံခုနစ်ပါး ထူးကဲခန္ဓာ' ကပင် လိုအပ်ချက် ရှိနေသေးသည်ဟု သူတို့က ဆိုနေကြသည် မဟုတ်ပါလား။
တီကျွယ်တျန်းကတော့ မည်သည့်စကားမျှ မပြောပေ။ သူ၏ ကိုယ်ပိုင်ခန္ဓာကိုယ်ဖွဲ့စည်းပုံကို သူ၏ မိဘများနှင့် ဘိုးဘေးအိုကြီး အနည်းငယ်သာ သိရှိကြခြင်း ဖြစ်သည်။ ဤကဲ့သို့သော ခန္ဓာကိုယ်ဖွဲ့စည်းပုံမျိုး စတင်ထွက်ပေါ်လာစဉ်တုန်းက ဘိုးဘေးအိုကြီးက စကားတစ်ခွန်း ပြောခဲ့ဖူး၏။
"ငါတို့က ဒီလိုမျိုး ခန္ဓာကိုယ်ဖွဲ့စည်းပုံကို အဆုံးအထိ မြေတောင်မြှောက်ပေးဖို့ ဆုံးဖြတ်ထားပြီးပြီ အဆိုးဆုံး အခြေအနေ ရောက်လာရင်တောင် တီမိသားစုက မသေမျိုးနယ်ပယ်တစ်ခုလုံးနဲ့ ရန်သူ ဖြစ်ရုံပဲရှိတာပေါ့"
"ရှေးဟောင်းနတ်ဆိုးခန္ဓာ” ဆိုတာ... သူတို့က ကြောက်ရွံ့တုန်လှုပ်နေကြလို့သာ တားမြစ်ချက် တစ်ခု ဖြစ်လာခဲ့တာ"
ဤခန္ဓာကိုယ်ဖွဲ့စည်းပုံကို အပြည့်အဝ မဖိနှိပ်နိုင်ပါက မိမိ၏ မိသားစုဝင်များကိုပါ ပြန်လည်သတ်ဖြတ်နိုင်ပြီး ကမ္ဘာမြေကြီးကို ဖျက်ဆီးပစ်မည့် သွေးအေးရက်စက်သော မိစ္ဆာခေါင်းဆောင်ကြီး ဖြစ်လာလိမ့်မည်ကို သိရှိထားကြသော်လည်း သူတို့ ဂရုမစိုက်ကြပေ။
ဘိုးဘေးအိုကြီးတွင် စကားတစ်ခွန်းသာ ရှိသည်။
"ဒီအရာကြောင့် တီမိသားစု ပျက်စီးသွားရပါစေဦး၊ မသေမျိုးနယ်ပယ်တစ်ခုလုံး ကမောက်ကမ ဖြစ်သွားပါစေဦး... ဒါက သူ့ရဲ့ ကံကြမ္မာပဲ၊ ပြီးတော့ ငါတို့ တီမိသားစုရဲ့ ကံကြမ္မာလည်း ဖြစ်တယ်"
မျိုးနွယ်စုဘိုးဘေးအိုကြီးအချို့က ဤသို့ လတ်တလော ပြောဆိုနေကြသော်လည်း သူတို့ စိုးရိမ်ပူပန်မှု အနည်းငယ်တော့ ရှိနေကြဆဲ ဖြစ်သည်။ ရက်အနည်းငယ်ကြာတိုင်း သူတို့သည် တီကျွယ်တျန်း၏ အခြေအနေကို လာရောက်စစ်ဆေးလေ့ ရှိကြ၏။ တီကျွယ်တျန်း ဘာမှမဖြစ်ဘဲ အေးဆေးရှိနေသည်ကို မြင်တွေ့ရမှသာ သူတို့ စိတ်သက်သာရာ ရတတ်ကြသည်။
မိမိ၏ စိတ်ထဲရှိ အတိတ်မှတ်ဉာဏ်များကို ပြန်လည်တွေးတောရင်း တီကျွယ်တျန်း၏ စိတ်ထဲတွင် နွေးထွေးမှု ခံစားလိုက်ရသည်။ ဤသည်မှာ သူ၏ မိသားစု... တီမိသားစု ဖြစ်သည်။
တီကျွယ်တျန်း သိသည်မှာ ဘိုးဘေးအိုကြီးများ ယခုတစ်ကြိမ် ပေါ်ထွက်လာခြင်းမှာ သူ၏ နတ်ဆိုးခန္ဓာကို ထိန်းချုပ်နိုင်စွမ်း ရှိမရှိ စောင့်ကြည့်ရန် ဖြစ်ကြောင်း ထင်ရှားလှပေသည်။
အကယ်၍ ၎င်းစွမ်းအင်များ ပေါက်ကွဲထွက်လာပါက သူတို့သည် ဖြစ်ပေါ်လာမည့် ထူးဆန်းသော ဖြစ်စဉ်များကို အလုံးစုံ ဖုံးကွယ်ပေးကြပေလိမ့်မည်။ ထို့နောက်တွင် ဝမ်ဖာနတ်ဘုရားဂိုဏ်းမှာလည်း သေချာပေါက် အမြစ်ပြတ်ချေမှုန်းခြင်း ခံရပေလိမ့်မည်။ ဤသည်မှာ တီမိသားစု၏ အတ္တဆန်လှသော လွှမ်းမိုးချုပ်ကိုင်မှုပင် ဖြစ်၏။
ဝမ်ဖာနတ်ဘုရားဂိုဏ်းချုပ်သည် နောက်ဆုံးတွင်တော့ သတိပြန်လည်လာခဲ့သည်။ သူသည် တီမိသားစုဝင်များကို ကြည့်ကာ မျက်နှာအမူအရာ အလွန်အကြည့်ရဆိုးနေသော်လည်း တီမိသားစု ဘိုးဘေးအိုကြီးနှင့် တီဝူရှန်းတို့က သူ့ကို သားကောင်ကို ချောင်းမြောင်းနေသည့် ကျားရဲများကဲ့သို့ စိုက်ကြည့်နေကြသဖြင့် သူ၏ လေသံမှာ ပျော့ပြောင်းသွားခဲ့ရတော့သည်။
"ကျွန်တော် သဘောတူပါတယ်"
ထိုစကားကို ကြားလိုက်ရသောအခါ ဆန်ကွမ်းဝမ်အာ၏ မျက်နှာအမူအရာ ချက်ချင်း ပြောင်းလဲသွားခဲ့ရသည်။
ဤသည်မှာ သူတို့ဘက်မှ ပြစ်မှုအတွက် ရှင်းပြချက် လာရောက်တောင်းဆိုရမည့် ပွဲ ဖြစ်သင့်သည် မဟုတ်ပါလား။
သူမအနေဖြင့် ကျင့်စဉ်အဆင့်နိမ့်ပေမယ့် သူတို့က ဤမျှအထိ အနိုင်ကျင့်စော်ကား၍မရပေ။
ပြစ်မှုအတွက် လာရောက်တောင်းဆိုရာမှ နောက်ဆုံးတွင်တော့ မိမိတို့၏ သူတော်စင်မကိုပါ ပေးအပ်ခဲ့ရခြင်း ဖြစ်သည်။
"မင်းက သဘောတူပြီးပြီဆိုမှတော့... အခုထိ ဘာလို့ မထွက်သွားသေးတာလဲ"
"ဒီနေ့ကစပြီး ဒီကောင်မလေးက ငါတို့ တီမိသားစု နတ်ဘုရားသားတော်ရဲ့ အစေခံမိန်းကလေး ဖြစ်လာလိမ့်မယ်"
"မင်း အခုထိ မထွက်သွားသေးဘူးဆိုရင် ငါကပဲ လိုက်ပို့ပေးရမလား"
ဝမ်ဖာနတ်ဘုရားဂိုဏ်းချုပ် မတုံ့ပြန်နိုင်မီမှာပင် တစ်ဆယ့်ခြောက်ယောက်မြောက် ဘိုးဘေးအိုကြီးက သူ၏ လက်ဝါးကြီးကို ဝှေ့ယမ်းလိုက်သည်။
ကောင်းကင်ယံရှိ ကြယ်တာရာများ ပျက်စီးသွားသည့်အလား မြင်ကွင်းတစ်ခု ထွက်ပေါ်လာခဲ့ပြီး အော်ဟစ်ညည်းတွားသံ တစ်သံသာ ကျန်ရစ်ခဲ့တော့၏။
သို့သော်လည်း တီမိသားစုဝင်များကတော့ ၎င်းကို ဂရုမစိုက်ကြပေ။ သူတို့သည် ဝမ်ဖာနတ်ဘုရားဂိုဏ်းနှင့် စစ်ပွဲမဖြစ်ပွားခဲ့ရသည့်အတွက် တကယ့်ကို နှမြောတသ ဖြစ်နေကြဆဲ ဖြစ်သည်။
သူတို့သည် ဘိုးဘေးအိုကြီးကို ကြည့်ကာ စိတ်ပျက်လက်ပျက် ဖြစ်နေကြ၏။ ဘာဖြစ်လို့ ဝမ်ဖာနတ်ဘုရားဂိုဏ်းချုပ်ကို တိုက်ရိုက် မသတ်ပစ်ခဲ့တာလဲ... သတ်ပစ်လိုက်ရင် စစ်ပွဲက ချက်ချင်း ဖြစ်ပွားသွားမှာ မဟုတ်ဘူးလား။
တစ်ဆယ့်ခြောက်ယောက်မြောက် ဘိုးဘေးအိုကြီးကတော့ ထိုအကြည့်များကို လုံးဝ ဂရုမစိုက်ပေ။
သူသည် သူ၏ လက်ညှိုးကို ခပ်ဖွဖွလေး တောက်လိုက်ပြီး တီကျွယ်တျန်းကို ခေါ်ဆောင်ကာ ထိုနေရာမှ ထွက်ခွာသွားတော့သည်။
တီကျွယ်တျန်း ဘာတွေ ကြံစည်နေသလဲဆိုတာကို သူတို့ မသိကြပေ။ ယခုအခါ သူတို့ စိုးရိမ်ပူပန်နေရသည်မှာ တီကျွယ်တျန်း၏ ရှေးဟောင်းနတ်ဆိုးခန္ဓာ အခြေအနေ ဖြစ်သည်။
တီကျွယ်တျန်းသည် ဘိုးဘေးအိုကြီး၏ နောက်သို့ လိုက်ပါကာ နောက်ဘက်တောင်တန်းရှိ တားမြစ်နယ်မြေ သို့ ရောက်ရှိလာခဲ့သည်။
"ဒသမမြောက် ဘိုးဘေး... တစ်ဆယ့်သုံးယောက်မြောက် ဘိုးဘေး... တစ်ဆယ့်ခြောက်ယောက်မြောက် ဘိုးဘေး..."
ပေါ်ထွက်လာသော ဘိုးဘေးအိုကြီး သုံးဦးကို မြင်တွေ့ရသောအခါ တီကျွယ်တျန်းက ရိုသေစွာ ဦးညွှတ် ဂါရဝပြုလိုက်သည်။
ဒသမမြောက် ဘိုးဘေးအိုကြီး ပေါ်လာချိန်တွင် သူ၏ ခန္ဓာကိုယ်ပေါ်၌ မြေကြီးနံ့များ စွဲကပ်နေဆဲ ဖြစ်သော်လည်း သူ ဂရုမစိုက်ပေ။
သူသည် တီကျွယ်တျန်းကို ကြည့်လိုက်ရာ သူ၏ မျက်ဝန်းများထဲ၌ နတ်ဘုရားအလင်းတန်းတစ်ခု ထွက်ပေါ်လာခဲ့သည်။
"ကလေးငယ်... ငါ အခုဆိုရင် မင်းကို လုံးဝ ထိုးဖောက်မမြင်နိုင်တော့ပါလား"
တစ်ဆယ့်သုံးယောက်မြောက် ဘိုးဘေးနှင့် တစ်ဆယ့်ခြောက်ယောက်မြောက် ဘိုးဘေးတို့ကလည်း ခေါင်းညိတ်လိုက်ကြသည်။
တီကျွယ်တျန်း ပြန်မလာခင်ကတည်းကပင် သူတို့ သတိထားမိခဲ့ကြခြင်း ဖြစ်သည်။ တီကျွယ်တျန်း၏ ခန္ဓာကိုယ်ပတ်လည်တွင် မြူခိုးလွှာတစ်ခုက ဖုံးကွယ်ထားသည့်အလား ရှိနေ၏။
"ဘာမှမဟုတ်ပါဘူး... ကျွန်တော် အချို့သော ကံကောင်းတဲ့ အခွင့်အရေးတွေ ရရှိခဲ့လို့ မိမိရဲ့ ခန္ဓာကိုယ်ဖွဲ့စည်းပုံကို စိတ်တိုင်းကျ ထိန်းချုပ်နိုင်သွားတာပါ"
တီကျွယ်တျန်း စကားပြောပြီးပြီးချင်းမှာပင် နောက်ဘက်တောင်တန်းရှိ တားမြစ်နယ်မြေတစ်ခုလုံး ပြင်းထန်စွာ တုန်လှုပ်ချောက်ချားသွားခဲ့ရသည်။
တီမိသားစုဝင်များအားလုံး ထိုအခြေအနေကို မြင်တွေ့လိုက်ရသဖြင့် နောက်ဘက်တောင်တန်းဆီသို့ လှမ်းကြည့်လိုက်ကြ၏။ ဘာတွေ ဖြစ်ပျက်နေတာလဲ။
"မင်းပြောတာ တကယ်ပဲလား"
ဤအချိန်တွင် အဘိုးအိုကြီးတစ်ဦး၏ ပုံရိပ် ရုတ်တရက် ပေါ်ထွက်လာခဲ့သည်။ သူ၏ မုတ်ဆိတ်မွှေးနှင့် မျက်ခုံးမွှေးများမှာ ဖြူဖွေးနေပြီး သူ၏ ခန္ဓာကိုယ်ထံမှ ကျင့်ကြံခြင်းစွမ်းအင် လှိုင်းဂယက်အချို့ ရံဖန်ရံခါ ထွက်ပေါ်နေ၏။
လေဟာနယ်ကြီးမှာ ၎င်းကို မခံနိုင်တော့ဘဲ စတင်ပြိုကွဲပျက်စီးလာခဲ့သော်လည်း မျက်စိတစ်မှိတ်အတွင်းမှာပင် မူလအခြေအနေသို့ ပြန်လည်ရောက်ရှိသွားခဲ့သည်။
"အဋ္ဌမမြောက် ဘိုးဘေး..." ပေါ်လာသော ဘိုးဘေးအိုကြီးကို ကြည့်ကာ တီကျွယ်တျန်းက ရိုသေစွာ ဦးညွှတ်လိုက်သည်။
"ထျန်းအာ... မင်းက မင်းရဲ့ ခန္ဓာကိုယ်ဖွဲ့စည်းပုံကို တကယ်ပဲ ထိန်းချုပ်နိုင်သွားပြီလား"
"ဟုတ်ပါတယ်... ကျွန်တော် ထိန်းချုပ်နိုင်ပါပြီ။ ဖြစ်ပေါ်လာမည့် ထူးဆန်းသော ဖြစ်စဉ်များကို ဖုံးကွယ်ပေးထားဖို့ ဘိုးဘေးအိုကြီးကို တောင်းဆိုပါတယ်" ဘိုးဘေးအိုကြီး စိတ်ချစေရန်အတွက် တီကျွယ်တျန်းက ထိုသို့ ပြောဆိုလိုက်ခြင်း ဖြစ်သည်။
ထိုစကားကို ကြားလိုက်ရသဖြင့် အဋ္ဌမမြောက် ဘိုးဘေးအိုကြီးက သူ၏ လက်ညှိုးကို တောက်လိုက်သည်။
'အရပ်ဆယ်မျက်နှာ မသေမျိုးတံဆိပ်ခတ်မှု' ထွက်ပေါ်လာခဲ့ပြီ ဖြစ်၏။ လေဟာနယ်ကြီးတစ်ခုလုံး ချိတ်ပိတ်ခြင်း ခံလိုက်ရပြီးနောက် တီမိသားစုဝင်များအားလုံး အကြီးအကျယ် တုန်လှုပ်အံ့အားသင့်သွားကြရတော့သည်။
"ဘာတွေ ဖြစ်နေတာလဲ... ဘာဖြစ်လို့ 'အရပ်ဆယ်မျက်နှာ မသေမျိုးတံဆိပ်ခတ်မှု' ကို အသက်သွင်းလိုက်ရတာလဲ"
"ငါလည်း မသိဘူး…တစ်စုံတစ်ခုသော အင်အားစုက ငါတို့ တီမိသားစုကို စစ်ကြေညာလိုက်တာ ဖြစ်နိုင်မလား"
"ငါလည်း မသိပါဘူး... ဒါပေမဲ့ အောက်ကမ္ဘာ မှာတော့ တစ်ခုခု ဖြစ်ပျက်ခဲ့ပုံရတယ်"
"အခုဆိုရင် အမွေဆက်ခံသူ အဆင့်ဆင့် ထဲက လူအချို့က အောက်ကမ္ဘာကို သွားချင်နေကြတယ်မလား"
"အောက်ကမ္ဘာဆိုတာ ကိစ္စအသေးအဖွဲလေးပါ... အဆိုးဆုံး အခြေအနေ ရောက်ရင်တောင် ငါတို့ဘက်က အကြီးအကဲတစ်ယောက် စေလွှတ်ပြီး အဲ့ဒီကမ္ဘာကို တိုက်ရိုက် ဖျက်ဆီးပစ်လိုက်ရုံပဲရှိတာ" တီမိသားစု တပည့်တစ်ဦးက ပြောလိုက်သည်။
ဤအချိန်တွင် နောက်ဘက်တောင်တန်းရှိ တားမြစ်နယ်မြေအတွင်း၌မူ ဘိုးဘေးအိုကြီးအချို့မှာ မျက်လုံးများ ပြူးကျယ်လျက် တီကျွယ်တျန်း၏ နောက်ကွယ်တွင် ပေါ်ထွက်လာသော ကောင်းကင်နှင့် မြေကြီးကို လွှမ်းမိုးထားသည့် နတ်ဆိုးကြီး ကို စိုက်ကြည့်နေကြသည်။ သူတို့ကိုယ်တိုင်ပင် စိတ်ထဲ၌ အနည်းငယ် ထိတ်လန့်တုန်လှုပ်မှုကို ခံစားလိုက်ရ၏။
"ဒီလိုမျိုး ခန္ဓာကိုယ်ဖွဲ့စည်းပုံက ဘာဖြစ်လို့ တားမြစ်ချက်တစ်ခု ဖြစ်လာခဲ့ရလဲဆိုတာ အခုမှပဲ ငါ ကောင်းကောင်း သဘောပေါက်သွားတော့တယ်"
"တကယ့်ကို ကြောက်မက်ဖွယ်ကောင်းလွန်းလှတယ်"
"ဒါပေမဲ့ ထျန်းအာက ၎င်းကို အမှန်တကယ် ထိန်းချုပ်နိုင်နေပြီပဲ"
"ငါတို့ တီမိသားစုရဲ့ နတ်ဘုရားသားတော် ပီသပါပေတယ်… ကောင်းတယ်... တကယ့်ကို ကောင်းတယ်"
ဘိုးဘေးအိုကြီးအချို့မှာ ကလေးငယ်များကဲ့သို့ပင် မျက်ဝန်းများထဲ၌ ကျေနပ်ဝမ်းမြောက်မှုများဖြင့် ပြည့်နှက်နေကြတော့သည်။
"ဒါဆိုရင်... အဲ့ဒီပစ္စည်းကိုလည်း သူ့ကို ပေးလိုက်လို့ ရပြီပေါ့" ဤအချိန်တွင် ဒသမမြောက် ဘိုးဘေးအိုကြီးက ရုတ်တရက် ပြောလိုက်သည်။
"ဟုတ်တယ်... သူ့ကို ပေးလိုက်လို့ ရပြီ… ငါတို့တွေ အပိုအလုပ်တွေ လုပ်ခဲ့မိပုံရတယ်"
"ကိစ္စမရှိပါဘူး... ဒီလိုနည်းနဲ့ ငါတို့ နတ်ဘုရားသားတော်ရဲ့ အခြေခံအုတ်မြစ်က ပိုပြီးတော့ အဆမတန် အားကောင်းလာမှာပေါ့"
တီကျွယ်တျန်းသည် မျက်လုံးများကို ဖွင့်လိုက်ပြီး အသက်ပြင်းပြင်း တစ်ချက် ရှူလိုက်သည်။
သူ၏ ခန္ဓာကိုယ်ဖွဲ့စည်းပုံက ဤမျှအထိ ကြောက်မက်ဖွယ်ကောင်းသော အဆင့်သို့ ရောက်ရှိလိမ့်မည်ဟု သူ မထင်ထားခဲ့မိပေ။
ကောင်းကင်နှင့် မြေကြီးကို လွှမ်းမိုးထားသည့် မဟာနတ်ဆိုးကြီးကို မြင်တွေ့လိုက်ရချိန်တွင် သူကိုယ်တိုင်ပင် အနည်းငယ် ကြောက်ရွံ့တုန်လှုပ်သွားခဲ့ရသည်။
ချီစွမ်းအင်များမှာ သူ၏ ခန္ဓာကိုယ်ပတ်လည်တွင် ဝေ့ဝဲနေကြပြီး အနားသို့ တိုးကပ်ရန်ပင် မဝံ့မရဲ ဖြစ်နေကြ၏။
သူ၏ မျက်ဝန်းများဖြင့် တစ်နေရာရာကို ခပ်ဖွဖွလေး လှမ်းကြည့်လိုက်ရုံမျှဖြင့် ကမ္ဘာတစ်ခုလုံးကို ဖျက်ဆီးပစ်နိုင်လောက်သော စွမ်းအင်မျိုး ရှိနေပေသည်။
"ထျန်းအာ... မင်း ဒီပစ္စည်းနဲ့ ပေါင်းစပ်လိုက်ဦး"
တီကျွယ်တျန်း မျက်လုံးများကို ဖွင့်လိုက်သည်နှင့် ဒသမမြောက် ဘိုးဘေးအိုကြီး၏ လက်ထဲရှိ တာအိုအရိုး ကို မြင်တွေ့လိုက်ရသဖြင့် ခဏမျှ ကြောင်အသွားခဲ့ရသည်။
"ဘိုးဘေးအိုကြီး... ဒါက ဘာလဲ"
"ဒီကိစ္စက အတော်လေး ကြာခဲ့ပါပြီ။ အရင်တုန်းက မင်းကို မွေးဖွားလာခဲ့တဲ့ အချိန်မှာ မင်းရဲ့ ခန္ဓာကိုယ်ဖွဲ့စည်းပုံက ထိန်းချုပ်ရ ခက်ခဲလိမ့်မယ်ဆိုတာ ငါတို့ သိထားခဲ့ကြတယ်။
မိသားစုက သတင်းတစ်ခုရခဲ့ပြီး နေရာတစ်ခုကို ရှာဖွေခဲ့ပြီး အဲ့ဒီနေရာမှာ တာအိုအရိုးတစ်ချောင်းကို ရှိတဲ့ ကလေးငယ်လေးတစ်ယောက် ရှိနေတာကို မမျှော်လင့်ဘဲ တွေ့ရှိခဲ့ရတယ်"
"အဲ့ဒီတုန်းက ငါ အဲ့ဒီနေရာတစ်ခုလုံးကို အမြစ်ပြတ်ချေမှုန်းခဲ့ပြီး ဒီအရိုးကို လုယူလာခဲ့တာပေါ့"
"ပြီးတဲ့နောက်မှာတော့ ငါတို့တွေက ၎င်းကို ချီစွမ်းအင်တွေနဲ့ အမြဲတမ်း မွေးမြူပေးခဲ့ကြတယ်။ မူလကတော့ မင်းရဲ့ အသက် တစ်ဆယ့်ရှစ်နှစ်ပြည့် အရွယ်ရောက်ခြင်း အခမ်းအနား ကျရင် မင်းကို ပေးဖို့ စီစဉ်ထားခဲ့တာ။ အခု မင်းက မင်းရဲ့ ခန္ဓာကိုယ်ဖွဲ့စည်းပုံကို ထိန်းချုပ်နိုင်နေပြီဆိုတော့... ဒါကို စောစောပေးလိုက်တာလည်း ပြဿနာမရှိပါဘူး"