အခန်း ၁၁ - နတ်ဘုရားသားတော်ကို စော်ကားရင် ကောင်းကင်နှင့် မြေကြီးကြား သင်ပုန်းရှောင်ရန် နေရာမရှိစေရ
အကြီးအကဲလင်း စကားပြောပြီးနောက် လေထုထဲ၌ပင် ပျောက်ကွယ်သွားတော့သည်။ ထိုစကားကို ကြားလိုက်ရချိန်တွင် အဘွားအို၏ ခန္ဓာကိုယ်မှာ တုန်ရီလာမိတော့၏။
တာအိုစောင့်ရှောက်သူ အကြီးအကဲလင်းသည် တီကျွယ်တျန်း၏ ရှေ့မှောက်သို့ ပြန်လည်ရောက်ရှိလာသည်။
"အကြီးအကဲလင်း... ဘာတွေထူးလဲ"
ကံကြမ္မာ၏ သားတော်ဆိုသည် မှာအခြားသော ပါရမီရှင်များနှင့် မတူပေ။ သူ့ (တီကျွယ်တျန်း)တွင် စနစ် ရှိနေသည့်တိုင်အောင် သတိကြီးစွာဖြင့် ရင်ဆိုင်ရမည် ဖြစ်သည်။
"ယဲ့ချန်ကို ဝန်ထုပ်ဝန်ပိုးမဖြစ်စေချင်လို့ ယဲ့လင်းက ကိုယ့်ကိုယ်ကိုယ် အဆုံးစီရင်သွားပါပြီ"
"အို... အဲ့လိုလား…ဒါဆို သူ့မှာနောက်ဆံတင်းစရာ မရှိတော့ဘူးလို့ သူထင်နေတာပေါ့"
"တကယ့်ကို သနားစရာကောင်းလိုက်တာ"
"နှလုံးသားမဲ့နန်းတော်က လူတွေ ရောက်လာတဲ့အခါမှပဲ ဆက်ပြောကြတာပေါ့... အခုလောလောဆယ် ကိစ္စတွေကိုတော့ လောစရာမလိုပါဘူး။ ဒါနဲ့... ထျန်းယန်နယ်မြေရဲ့ အပြင်ဘက်က အစီအရင်တွေကို ဖွင့်ထားလိုက်… အခြားလူတွေလည်း နှလုံးသားမဲ့နန်းတော်ရဲ့ သန့်စင်သမီးတော် ကို မြင်နိုင်အောင်လို့ပေါ့"
တီကျွယ်တျန်း စကားပြောပြီးနောက် မျက်လုံးများကို ပြန်မှိတ်လိုက်သည်။
'ကံကြမ္မာရဲ့ သားတော်... မင်းကိုယ်မင်း နောက်ဆံတင်းစရာ မရှိတော့ဘူး လို့ ထင်နေတာလား ငါကတော့ မင်းရဲ့ ငယ်ချစ် လေးကို အကွက်ရွှေ့ပြီးပြီ... မင်း ဘယ်လိုတုံ့ပြန်မလဲ ကြည့်ရသေးတာပေါ့'
သူ့ကို ယဲ့ချန်က အခုချက်ချင်း သတ်ပစ်ချင်လောက်အောင် မုန်းတီးနေမည်ကို ကောင်းကောင်းသိသော်လည်း ယဲ့ချန်အနေဖြင့် ဘာတတ်နိုင်ဦးမည်နည်း။
'ဒီကံကြမ္မာသားတော်ရဲ့ ရတနာ က အမှန်တကယ်တော့ ဘာလဲ… ဒီလို ကျောက်စိမ်းဆွဲပြားမျိုးကို ငါတစ်ခါမှမကြားဖူးဘူး... ရှေးဟောင်ကျင့်ကြံသူကြီးတစ်ယောက် ကွယ်လွန်ပြီးနောက် ဖြစ်တည်လာတဲ့ ရတနာတစ်ခု ထင်တယ်'
'မိစ္ဆာသားရဲတွေ ဒါမှမဟုတ် ကျင့်ကြံသူတွေရဲ့ အလောင်းတွေကို စွမ်းအင်အဖြစ် ပြောင်းလဲပြီး မိမိကိုယ်ကိုယ် ပြန်လည်ဖြည့်တင်းပေးနိုင်တဲ့ ပုဂ္ဂိုလ်မျိုး... လက်ရှိအသက်ရှင်နေတာပဲဖြစ်ဖြစ်၊ သေဆုံးသွားတာပဲဖြစ်ဖြစ်... ဘယ်သူလဲဆိုတာကို စုံစမ်းဖို့ တီ မိသားစုဆီ ကို သတင်းပို့လိုက်ဦးမယ်'
တီကျွယ်တျန်းသည် သတင်းစကားတစ်ခုကို ပေးပို့လိုက်တော့သည်။
တီကျွယ်တျန်း၏ သတင်းစကား ပေးပို့ပြီးပြီးချင်း...
မသေမျိုးနယ်မြေ… နတ်ဘုရားလောကရှိ တီမိသားစု၏ ခမ်းနားထည်ဝါလှသော နန်းတော်ကြီးအတွင်း၌ ဖြစ်သည်။
ပလ္လင်ထက်တွင် လူရိပ်တစ်ရိပ် ထိုင်နေ၏။ သူ၏ပတ်ဝန်းကျင်တွင် ချီစွမ်းအင်များ လွှမ်းမိုးနေပြီး ကြယ်တာရာကောင်းကင်ယံ မြင်ကွင်းများ ရွေ့လျားပြောင်းလဲနေသကဲ့သို့ ရှိသည်။ သူ၏မျက်နှာကို မြူခိုးအလွှာတစ်ခုဖြင့် ဖုံးအုပ်ထားသဖြင့် သေချာမမြင်ရပေ။
သူ၏လက်ထဲရှိ အသံလွှင့်ကျောက်စိမ်းပြားကို ကြည့်ပြီးနောက်...
"ဒီကလေးကတော့..."
ထိုလူလတ်ပိုင်းအရွယ် အမျိုးသား၏ လေသံတွင် အလိုလိုက်ချစ်ခင်ရိပ်များ ယှဉ်တွဲနေသည်။
ထို့နောက် သူသည် သတင်းအချက်အလက်တစ်ခုကို ပေးပို့လိုက်ရာ ခန်းမဆောင်အတွင်းသို့ လူရိပ်တစ်ရိပ် ချက်ချင်း ရောက်ရှိလာတော့သည်။
"ဒါက နတ်ဘုရားသားတော် စုံစမ်းခိုင်းထားတဲ့အရာပဲ"
နတ်ဘုရားသားတော်ဟူသော အခေါ်အဝေါ်ကို ကြားလိုက်ရချိန်တွင် ထိုလူရိပ်၏ မျက်ဝန်းများ၌ လေးစားသော အရိပ်အယောင်များ ဖြတ်ပြေးသွားသည်။ တီမိသားစုတွင် နတ်ဘုရားသားတော်ဟူ၍ တီကျွယ်တျန်း တစ်ဦးတည်းသာ ရှိပေသည်။
သူမွေးဖွားစဉ်က ကောင်းကင်ဖြစ်စဉ်ထူးများသည် တီမိသားစု၏ ကောင်းကင်ယံထက်တွင် တစ်လတိတိ တည်ရှိနေခဲ့ဖူးသည်။ ထိုလအတွင်းမှာပင် တီမိသားစုဝင် အမြောက်အမြားသည် ထိုဖြစ်စဉ်ထူးများကို အမှီပြု၍ အဆင့်တက်လှမ်းနိုင်ခဲ့ကြပြီး ဤလူရိပ်သည်လည်း ထိုအထဲမှ တစ်ဦးအပါအဝင် ဖြစ်သည်။
"နှလုံးသားမဲ့နန်းတော်က နတ်ဘုရားသားတော်ကို စော်ကားမိထားတာပါ။ လျှို့ဝှက်အစောင့်အရှောက်တွေကို လွှတ်ပြီး နှလုံးသားမဲ့နန်းတော်ကို အမြစ်ပြတ်ချေမှုန်းခိုင်းလိုက်ရမလား။ နတ်ဘုရားသားတော်ကို စော်ကားဝံ့တဲ့သူတွေဟာ ကောင်းကင်နဲ့ မြေကြီးကြားမှာ ပုန်းအောင်းဖို့ နေရာမရှိစေရဘူး"
ထိုလူရိပ် စကားပြောလိုက်သောအခါ သူ၏အရှိန်အဝါကြောင့် ပတ်ဝန်းကျင်ရှိ လေဟာနယ်များပင် စတင်ပြိုကွဲလာသည်။
သို့သော် ပလ္လင်ထက်ရှိ ပုဂ္ဂိုလ်၏ ရှေ့မှောက်သို့ ရောက်ရှိလာချိန်တွင် ထိုအရှိန်အဝါများမှာ ချက်ချင်းပင် ပျောက်ကွယ်သွားတော့၏။
"ကျွယ်တျန်းရဲ့ ကောင်းကင်ဖြစ်စဉ်ထူးကြောင့် မင်းတို့အားလုံး အဆင့်တက်နိုင်ခဲ့ကြလို့ ကျွယ်တျန်းအပေါ် အရမ်းကာကွယ်ချင်နေကြတာပဲ... သူ့ကို စိတ်အနှောင့်အယှက် အနည်းငယ်မျှတောင် အဖြစ်မခံနိုင်ကြဘူးပေါ့။ ဒီကိစ္စကို ကျွယ်တျန်းဘာသာပဲ ကိုင်တွယ်ပါစေ။ အကြီးအကဲလင်း ရှိနေတာမို့ နှလုံးသားမဲ့နန်းတော်အနေနဲ့ ဘာပြဿနာမှ အကြီးအကျယ် ရှာနိုင်မှာ မဟုတ်ပါဘူး"
"အမိန့်အတိုင်းပါ "
ထိုလူရိပ် ပျောက်ကွယ်သွားတော့သည်။
တီဝူရှန်းသည် ပျောက်ကွယ်သွားသော လူရိပ်ကို ကြည့်ရင်း...
"အဲ့ဒီမိသားစုက တစ်ကျော့ပြန် ပေါ်လာပြန်ပြီပေါ့..."
"ဒါပေမဲ့ ပေါ်လာရင်တောင် သူတို့က နောက်ဆုံးထွက်သက်ကို ရှူနေရတဲ့အဆင့်ပဲ ရှိပါသေးတယ်…အရင်တုန်းကလည်း ငါတို့ တီမိသားစုကို ရန်လာစကြသေးတာ... အခုတစ်ခါ ထပ်ပြီး ခေါင်းပြူလာရဲရင်တော့ ထပ်ပြီး သွေးချောင်းစီးအောင် သတ်ပစ်ရုံပဲ ရှိတာပေါ့"
တီဝူရှန်း၏ ပုံရိပ်လည်း ပျောက်ကွယ်သွားတော့သည်။
တစ်ဖက်တွင်မူ တီကျွယ်တျန်းသည် ဖခင်ဖြစ်သူထံမှ ပေးပို့လာသော သတင်းစကားကို ကြည့်လိုက်သည်။
"ဝိညာဉ်ဝါးမြိုခြင်းမျိုးနွယ်စု..."
"တကယ်ကို တိုက်ဆိုင်တာပဲ"
ဖခင်ဖြစ်သူ၏ သတင်းစကားကို ဖတ်ပြီးနောက် တီကျွယ်တျန်း၏ မျက်နှာထက်တွင် အန္တရာယ်ရှိလှသော်လည်း ဆွဲဆောင်မှုအပြည့်ရှိသော ပြုံးယောင်သန်းမှုတစ်ခု ပေါ်လာသည်။
"လွန်ခဲ့တဲ့ နှစ်ပေါင်းသုံးသောင်းတုန်းက ဝိညာဉ်ဝါးမြိုခြင်းမျိုးနွယ်စုကို အမြစ်ပြတ်ချေမှုန်းခဲ့တာ ငါ့အဖေ ဖြစ်နေလိမ့်မယ်လို့ မထင်ထားမိဘူး"
"အဲ့ဒီတုန်းက ဝိညာဉ်ဝါးမြိုခြင်းမျိုးနွယ်စုဟာ သူတို့မျိုးနွယ်စုရဲ့ အင်အားကို အားကိုးပြီး တီမိသားစုကို ကြံစည်ခဲ့ကြတာပဲ... အဲ့ဒီမျိုးနွယ်စု ပျက်စီးသွားချိန်မှာ သူတို့ရဲ့ မျိုးနွယ်စုစောင့်ရှောက်တဲ့ နတ်ဘုရားလက်နက်ဖြစ်တဲ့ ဝိညာဉ်ဝါးမြိုခြင်း နတ်ဘုရားကွင်း က ပျောက်ဆုံးသွားခဲ့တယ်"
"ကံကြမ္မာသားတော်ရဲ့ ကျောက်စိမ်းဆွဲပြားက အဲ့ဒီ နတ်ဘုရားလက်နက် ဖြစ်နေတာပဲ"
"အရာအားလုံးက ကန့်လန့်ကာနောက်ကွယ်မှာ ကြိုတင်သတ်မှတ်ထားပြီးသား ဖြစ်နေတာပဲ။ ငါက ဒီကံကြမ္မာသားတော်နဲ့ မပတ်သက်ခဲ့ရင်တောင် ဒီလိုကံကြမ္မာရဲ့ သားတော်တွေဟာ တစ်နေ့ကျရင် ငါနဲ့ ငါ့နောက်ကွယ်က မိသားစုကို ပြဿနာလာရှာကြမှာပဲ"
"ဒါကြောင့်... မင်းတို့လို ကံကြမ္မာသားတော်တွေဟာ သေသွားတာပဲ အကောင်းဆုံးပဲ"
တီကျွယ်တျန်း၏ မျက်ဝန်းများတွင် သတ်ဖြတ်ခြင်းအရှိန်အဝါများ ယှက်သန်းသွားသည်။
ဤအချိန်တွင် လဲ့ချင်းသည် တံခါးအပြင်ဘက်၌ ဒူးထောက်လျက် ရှိနေဆဲ ဖြစ်သည်။ သူမ၏ မျက်နှာမှာ ဖြူလျော်နေပြီး ခန္ဓာကိုယ်မှာလည်း ယိမ်းထိုးနေတော့၏။ ဒူးထောက်နေစဉ်အတွင်း သူမ၏ စွမ်းအားများမှာ ချိတ်ပိတ်ခြင်း ခံထားရသဖြင့် လက်ရှိတွင် သာမန်လူတစ်ဦးကဲ့သို့ပင် ဖြစ်နေသည်။
တံခါးဝကို ကြည့်ရင်း သူမ၏မျက်ဝန်းထဲတွင် ကြောက်ရွံ့မှုများ ထင်ဟပ်လာသည်။ ထိုတံခါးအတွင်း၌ ကြီးမားလှသော မိစ္ဆာအိုကြီးတစ်ကောင် ရှိနေသကဲ့သို့ပင်။ တီကျွယ်တျန်းကို တွေ့ရလိမ့်မည်ဟု သူမ ထင်မှတ်ခဲ့သော်လည်း တီကျွယ်တျန်း၏ မျက်နှာကိုပင် သူမ မတွေ့ ရပေ။
နဂါးကိုးကောင်ဆွဲသော ရထားလုံးသည် ထျန်းယန်နယ်မြေ၏ ကောင်းကင်ယံထက်တွင် ပျံသန်းမောင်းနှင်နေသည်။ အောက်ခြေရှိ လူအပေါင်းသည် သူတော်စင်အဆင့်ရှိ နဂါးရေသတ္တဝါ ကိုးကောင်နှင့် ၎င်းတို့ဆွဲခေါ်လာသော ကြီးမားလှသည့် နန်းတော်ကြီးကို မော့ကြည့်နေကြရ၏။ 'တီ' ဟူသော စာလုံးတစ်လုံးတည်းကပင် မျိုးဆက်တစ်ခုလုံးကို ဖိနှိပ်ထားနိုင်ပေသည်။
"ဟိုဟာ... နှလုံးသားမဲ့နယ်မြေရဲ့ မင်းသမီးလေး မဟုတ်ဘူးလား"
"ဟား... ဟုတ်တာပေါ့… သူမက တစ်ဖက်သတ်ချစ်မိပြီး အမြဲတမ်း ဒူးထောက်နေဖို့ ပြင်ဆင်ထားတာလား မသိဘူး"
ထိုစကားများကို ကြားလိုက်ရချိန်တွင် လူအုပ်ထဲရှိ လူရိပ်တစ်ရိပ်သည် လက်သီးကို တင်းတင်းဆုပ်လိုက်မိသည်။ သေချာကြည့်လျှင် ထိုလူ၏ ပတ်ဝန်းကျင် နှစ်မီတာအတွင်းမှာ လေဟာနယ်ကဲ့သို့ လူသူကင်းမဲ့နေသည်ကို တွေ့ရမည် ဖြစ်သည်။
လူအများအပြားက သူ့ကို အံ့သြတုန်လှုပ်စွာ ကြည့်လိုက်ကြသော်လည်း ဂရုမစိုက်ကြပေ။ မသေမျိုးနယ်ပယ်သည် အားကြီးသူက အားနည်းသူကို အနိုင်ကျင့်သည့် ကမ္ဘာ ဖြစ်သည်။ ဤနေရာတွင် အသက်သည် တန်ဖိုးအရှိဆုံးအရာ မဟုတ်ပေ။ တစ်ခါတရံတွင် ခွေးချေးသည်ပင် လူ့အသက်ထက် ပို၍ တန်ဖိုးရှိနေတတ်သည်။
ယခင်က ယဲ့ချန်သည် လဲ့ချင်း ထွက်ခွာသွားပြီဟု ထင်မှတ်ခဲ့သည်။ သို့သော် ယနေ့တွင် တီကျွယ်တျန်း၏ ရှေ့မှောက်၌ ဒူးထောက်နေသော အမျိုးသမီးကို မြင်လိုက်ရသောအခါ... သူသည် အရှက်ရမှုကို ပြင်းထန်စွာ ခံစားလိုက်ရတော့၏။ အထူးသဖြင့် ထိုအမျိုးသမီး၏ နွမ်းလျပိန်ချိုင့်နေသော ချောမောလှပသည့် မျက်နှာလေးကို မြင်ရသည်မှာ ဘယ်သူမဆို သနားစရာ ကောင်းလှပေသည်။
"ဟင်း... ဒီလို သစ္စာရှိတဲ့ အမျိုးသမီးမျိုး ရှိလိမ့်မယ်လို့ မထင်ထားမိဘူး"
"အော်... တော်စမ်းပါကွာ" လူအုပ်ထဲမှ အသံတစ်သံ ရုတ်တရက် ထွက်ပေါ်လာသဖြင့် လူတိုင်း လှည့်ကြည့်လိုက်ကြသည်။
"မင်းတို့အားလုံး ရုပ်ပုံကျောက်တုံးထဲက အကြောင်းအရာတွေကို မြင်ပြီးကြပြီ မဟုတ်လား"
"မြင်ပြီးပြီလေ... အဲ့ဒါကို ပြောရင်ပဲ ဒေါသထွက်တယ်…ငါသာ အဲ့ဒီ ယဲ့ချန်ဆိုတဲ့ကောင်ကို တွေ့ရင် သေချာပေါက် သတ်ပစ်မယ်… အမျိုးသမီးတစ်ယောက်က သူ့မိသားစုကို ကယ်ဖို့အတွက် အသက်ပေးသွားခဲ့တာတောင် သူက ဘာအနစ်နာခံမှုမှ မရှိတဲ့အပြင် အဲ့ဒီအမျိုးသမီးရဲ့ မိသားစုဝင်အားလုံးကိုပါ သတ်ပစ်ခဲ့တာလေ"
"ဒီလိုလူစားမျိုးကို ဖမ်းမိရင် ဝက်လှောင်အိမ်ထဲထည့်ပြီး ရေနှစ်သတ်ပစ်ရမယ်"
"ဝက်လှောင်အိမ်ထဲထည့်တာက သူ့အတွက် သက်ညှာလွန်းပါသေးတယ်… သူ့ကို ယောက်ျားအင်္ဂါ ဖြတ်ပစ်တာက အကောင်းဆုံးပဲ"
ယခင်က သူတို့သည် ရုပ်ပုံကျောက်တုံးထဲတွင် အမျိုးသားတစ်ဦးအတွက် အသက်ပေးသွားခဲ့သော အမျိုးသမီးတစ်ဦးကို မြင်တွေ့ခဲ့ရသည်။ သို့သော် ရလဒ်မှာ ထိုအမျိုးသားက အမျိုးသမီး၏ မိသားစုဝင်အားလုံးကို သတ်ဖြတ်ခဲ့ခြင်းပင်။
"ဒါဆို... နှလုံးသားမဲ့နန်းတော်ရဲ့ မင်းသမီးလေးက ဘာလို့ တီ မိသားစုရဲ့ နတ်ဘုရားသားတော်ရှေ့မှာ ဒူးထောက် တောင်းပန်နေရလဲ သိလား"
"အခုမှပဲ ငါ စိတ်ဝင်စားလာပြီ... ပြောပြပါဦး"
ထွက်ခွာတော့မည့် ယဲ့ချန်သည်လည်း သူ၏ခြေလှမ်းများကို ရပ်တန့်လိုက်မိသည်။
"ဟင်း... မင်းတို့အားလုံး သိတဲ့အတိုင်း ဒီအမျိုးသမီးရဲ့ အဆင့်အတန်းက မြင့်မြတ်ပါတယ်… သူမက နတ်ဘုရားသားတော် တီကျွယ်တျန်းကို စော်ကားမိတာကတော့... စောစောက ရုပ်ပုံကျောက်တုံးထဲမှာ မင်းတို့မြင်ခဲ့ရတဲ့ အမျိုးသားအတွက်ကြောင့်ပေါ့"
"ဘာ..."
"အဲ့ဒီကောင် နောက်တစ်ခါ ထပ်ပါလာပြန်ပြီလား… အဲ့ဒီကောင်မှာ ဘာကောင်းတာရှိလို့လဲ"
"သူ့ရဲ့ 'ပစ္စည်း' က အကြီးကြီးမို့လို့ ထင်တယ်"
"ဟား... အဲ့ဒါလည်း ဖြစ်နိုင်တာပဲ"
"ဒါပေမဲ့ သူ့ရဲ့ အထောက်အထားလည်း ပေါ်သွားပြီလေ… သူက မြို့လေးတစ်မြို့က ပါရမီရှင်တစ်ယောက်ပဲ... ထျန်းယန်သန့်စင်နယ်မြေကလည်း သူ့ကြောင့် ပျက်စီးသွားခဲ့တာ"
"လီမိသားစုလည်း သူ့ကြောင့် မျိုးတုံးသွားခဲ့ရတယ်"
"အခုတော့ နှလုံးသားမဲ့နန်းတော်ရဲ့ သူတော်စင်မက ဒူးထောက်ပြီး ကရုဏာသက်ဖို့ တောင်းပန်နေရပြီ"
"နောက်ဆုံးတော့ အဲ့ဒီကောင်က လိပ်လို ခေါင်းလျှိုပြီး ထွက်မလာရဲတော့ဘူး"
"ငါသာ အဲ့ဒီ ယဲ့ချန်ဆိုရင် တိုဖူးတုံးနဲ့ ခေါင်းနဲ့ဆောင့်ပြီး သေလိုက်တာ ကြာပြီ"
"ဘာလို့ လက်နက်မသုံးတာလဲ"
"စိတ်မရှိပါနဲ့... ငါက နာမှာကြောက်လို့ပါ"