အခန်း ၁ - ကမ္ဘာကူးပြောင်းခြင်း၊ ကံကြမ္မာ၏ သားတော်က ဗီလိန်ဖြစ်လာသည်...

ခမ်းနားထည်ဝါလှသော ခန်းမဆောင်ကြီးတစ်ခုအတွင်း။

ဘေးတစ်ဖက်တစ်ချက်စီတွင် လူအများအပြားဖြင့် ပြည့်နှက်နေပေသည်။ သေချာစွာ အကဲခတ်ကြည့်လျှင် လူတိုင်း၏ မျက်နှာထက်၌ စိုးရိမ်ထိတ်လန့်နေသော အမူအရာများကို တွေ့မြင်နိုင်ပေသည်။ သူတို့သည် အလွန်တရာ ကြောက်မက်ဖွယ်ကောင်းသော အရာတစ်ခုကို မြင်တွေ့ထားရသည် သို့မဟုတ် ကြားသိထားရသည့်အလားပင်။

ကြောက်ရွံ့ခြင်းတရားက သူတို့၏ စိတ်အစဉ်ကို လွှမ်းမိုးထားသော်ငြား ခန်းမအတွင်းရှိ လူအပေါင်းသည် ခေါင်းများကိုသာ ငုံ့ထားကြ၏။ ပလ္လင်ထက်တွင် ထိုင်နေသော လူငယ်လေးအား မော့ကြည့်ဝံ့သူ တစ်ဦးတစ်ယောက်မျှ မရှိပေ။ ထိုလူငယ်လေးကို တစ်စက္ကန့်မျှ ပို၍ ကြည့်မိခြင်းကပင် သူ၏ အထွတ်အမြတ်ထားရာ ဂုဏ်သိက္ခာကို စော်ကားလိုက်သကဲ့သို့ ဖြစ်သွားမည်ကို စိုးရွံ့နေကြဟန်တူသည်။

ချီလင်ပုံပါရှိသော အဖြူရောင်ဝတ်ရုံကို ဆင်မြန်းထားပြီး သူ၏ ရုပ်သွင်မှာ အလွန်တရာ ခန့်ညားထည်ဝါလှပေသည်။ အလွန်နက်ရှိုင်းသော အနက်ရောင်မျက်ဝန်းတစ်စုံတွင်တော့ ခန့်မှန်းရခက်သော အလင်းတန်းများ စီးဆင်းနေ၏။

သူ၏ အောက်ဘက်တွင်တော့ မိန်းမပျိုလေးတစ်ဦး ရပ်နေသည်။ သူမသည် အပြာနုရောင် ဂါဝန်နှင့် အဖြူရောင် ပိုးဇာဝတ်ရုံကို ဝတ်ဆင်ထားပြီး သူမ၏ သွယ်လျလှပသော ကိုယ်ခန္ဓာကောက်ကြောင်းကို အပြည့်အဝ ပေါ်လွင်စေသည်။ လူ့ပြည်သို့ ဆင်းသက်လာသော ကောင်းကင်နတ်မိမယ်လေးတစ်ပါးအလား သူမ၏ လက်ကလေးများမှာ နုနယ်လှပြီး အသားအရည်မှာလည်း နှင်းဆီပွင့်ဖတ်လေးလို နူးညံ့နေပေသည်။

"အစ်ကို တီကျွယ်တျန်း... ကျွန်မ ရှင့်ကို တကယ့် အစ်ကိုအရင်းတစ်ယောက်လိုပဲ သဘောထားပါတယ်... ဒီနှစ်တွေတစ်လျှောက်လုံး ရှင် ကျွန်မအပေါ် အရမ်းကောင်းခဲ့တယ်ဆိုတာကို သိသလို ရှင့်ရဲ့ အကူအညီတွေကြောင့် ကျွန်မရဲ့ မိသားစုကလည်း လျင်လျင်မြန်မြန် တိုးတက်လာခဲ့တာပါ"

"အစကတော့ ကျွန်မမှာလည်း ရှင့်အပေါ် ခံစားချက်တွေ ရှိတယ်လို့ ထင်ခဲ့ပေမယ့် အခုတော့ အစ်ကိုတစ်ယောက်လို ခံစားချက်မျိုးကလွဲပြီး တခြား ဘာမှမရှိဘူးဆိုတာ သိလိုက်ရပါပြီ"

သူမ၏ ကြည်လင်သော လေသံမှာ ကျောက်စိမ်းပြားပေါ်သို့ ပုလဲလုံးလေးများ ပြုတ်ကျသွားသကဲ့သို့ ရှိသော်လည်း မည်သည့် ခံစားချက်မျှ ပါဝင်မနေပေ။ လီရှီး၏ စကားသံ ဆုံးသွားသည်နှင့် တစ်ပြိုင်နက် ခန်းမအတွင်း၌ ကန့်ကွက်သံများ ထွက်ပေါ်လာလေတော့သည်။

"လီရှီး... နင် ဘာလုပ်နေတာလဲ... နတ်ဘုရားသားတော်ကို အခုချက်ချင်း တောင်းပန်လိုက်... နတ်ဘုရားသားတော်က နင့်ကို စိတ်ဝင်စားတာဟာ နင့်ရဲ့ ကံကောင်းမှုဖြစ်သလို ငါတို့ လီမိသားစုရဲ့ ကံကောင်းမှုလည်း ဖြစ်တယ်"

"လီရှီး... လီမိသားစုက နင့်အပေါ် ကောင်းကောင်းမွန်မွန် ဆက်ဆံခဲ့တာပါ... နင် လီမိသားစုအတွက် တစ်ခေါက်လောက်တောင် မစဉ်းစားပေးနိုင်ဘူးလား..."

"နတ်ဘုရားသားတော်ဆိုတာ ကောင်းကင်ဘုံကိုးလွှာအထက်က နတ်နဂါးတစ်ကောင်နဲ့ တူတယ်... အခု နတ်ဘုရားသားတော်က သူ့ကို ခစားဖို့ နင့်ကို အလိုရှိနေတာ... ဒါက ငါတို့ လီမိသားစု နှစ်သောင်းချီပြီး ကျင့်ကြံအားထုတ်ခဲ့ရတဲ့ ကောင်းချီးမင်္ဂလာပဲ... နင်က ဘိုးဘေးကြီး သင်္ချိုင်းထဲကနေ ထပေါက်ကွဲထွက်လာမှပဲ ကျေနပ်မှာလား..."

မိသားစုဝင်များ၏ စကားကို ကြားသောအခါ လီရှီးလည်း စိတ်အနှောင့်အယှက် ဖြစ်သွားရသည်။ ထိုပါးစပ်များမှ ဤမျှ အေးစက်သော စကားများကို မည်သို့ ပြောထွက်နိုင်ကြသည်ကို သူမ နားမလည်နိုင်ပေ။ သူမသာ မရှိလျှင် သူမတို့ မိသားစု၏ အင်အားသည် ဤမျှ လျင်မြန်စွာ တိုးတက်လာပြီး  ထိပ်တန်းမိသားစုတစ်စု ဖြစ်လာမည် မဟုတ်ပေ။

ဤအမည်ခံ ထိပ်တန်းမိသားစုဆိုသည်မှာ အပေါ်ယံမျှသာ ဖြစ်သော်ငြားလည်းပေါ့။

ပလ္လင်ထက်ရှိ လူငယ်လေးက သူမ၏ မိသားစုကို စောင့်ရှောက်ရန် ကောင်းကင်အရှင်သခင် အဆင့်ရှိ ပုဂ္ဂိုလ်တစ်ဦးကို စေလွှတ်ပေးခဲ့သောကြောင့်သာ ဖြစ်သည်။

မသေမျိုးနယ်မြေတွင် ကျင့်ကြံခြင်းအဆင့်များမှာ အနိမ့်မှ အမြင့်သို့ အောက်ပါအတိုင်း ရှိကြောင်း သိထားရမည်။

အဆင့် ၁ ကျင့်ကြံသူ

အဆင့် ၂ ကျင့်ကြံသူ

အဆင့် ၃ ကျင့်ကြံသူ

အဆင့် ၄ ကျင့်ကြံသူ 

အဆင့် ၅ ကျင့်ကြံသူ 

အဆင့် ၆ ကျင့်ကြံသူ

နှင့် အဆင့် ၇ ကျင့်ကြံသူ (တာအိုနန်းတော်) တို့ ဖြစ်သည်။

ထို့နောက် အဆင့် ၈ ကျင့်ကြံသူ - (တံဆိပ်ခတ်ဘုရင်)၊

အဆင့် ၉ ကျင့်ကြံသူ -  (တံဆိပ်ခတ်ဧကရာဇ်)၊

အဆင့် ၁၀ ကျင့်ကြံသူ -(ကောင်းကင်အသိဉာဏ်)၊

အဆင့် ၁၁ ကျင့်ကြံသူ -(လေဟာနယ်ခွဲဖျက်ခြင်း)၊

အရှင်သခင်နယ်ပယ် ၃ဆင့်မှာ

*******************””

လူသားအရှင်သခင်အဆင့်

ကမ္ဘာမြေအရှင်သခင် အဆင့်

ကောင်းကင်အရှင်သခင် အဆင့်

သူတော်စင်နယ်ပယ် ၃ ဆင့်

**************

သူတော်စင်

သူတော်စင်ဘုရင် နှင့်

သူတော်စင်ဧကရာဇ် ဟူ၍ ခွဲခြားထားသည်။

အဆင့်တိုင်းကို ထပ်မံ၍ အဆင့်သေး အလွှာကိုးလွှာ ခွဲခြားထားသည်။

အဆင့်ကြီးတစ်ခုချင်းစီသည် ‌ချောင်းနှင့်မြစ်ကဲ့သို့ ကွာခြားသည်။

ယခုလက်ရှိ မသေမျိုးနယ်မြေတွင် မဟာဧကရာဇ်အဆင့် ကျွမ်းကျင်သူများသည် လောကကြီးထဲ၌ သွားလာလှုပ်ရှားခြင်း မရှိသည်မှာ နှစ်ပေါင်းသောင်းနှင့်ချီ၍ ကြာမြင့်ခဲ့ပြီ ဖြစ်သည်။

သူတော်စင်များသည်လည်း ပုန်းကွယ်နေကြ၏။

ဤလူငယ်လေးက သူမ၏ မိသားစုကို စောင့်ရှောက်ရန် ကောင်းကင်အရှင်သခင် အဆင့်ရှိ စွမ်းအားရှင်တစ်ဦးကို စေလွှတ်ပေးခဲ့ခြင်း ဖြစ်သည်။

အပေါ်ယံကြည့်လျှင် သူမ၏ မိသားစုကို ကာကွယ်ပေးသည်ဟု ထင်ရသော်လည်း တကယ်တမ်းတွင်မူ သူမကို ကာကွယ်ပေးရန်ဖြစ်ကြောင်း သူမ ခန့်မှန်းမိသည်။

ယနေ့ကိစ္စနှင့် ပတ်သက်၍ မိသားစုဝင်များ ပြောဆိုနေခြင်းမှာ အချည်းနှီးသာဖြစ်ပြီး ပလ္လင်ပေါ်ရှိ လူငယ်လေး၏ ဆုံးဖြတ်ချက်ကသာ အတည်ဖြစ်ကြောင်း သူမ သိထားသည်။

သူသည် အမြဲတမ်း သူမအပေါ် အလွန် အလျှော့ပေးကာ အလိုလိုက်လေ့ရှိသည်။

သူသာ စကားတစ်ခွန်းဆိုလိုက်ပါက မိသားစုထဲမှ တစ်ဦးတစ်ယောက်မျှ ကန့်ကွက်ဝံ့မည် မဟုတ်ပေ။

အောက်ဘက်ရှိ လူများ၏ စကားသံများက ပလ္လင်ပေါ်ရှိ လူငယ်လေး၏ အတွေးများကို လက်တွေ့ဆီသို့ ပြန်လည် ဆွဲခေါ်လာခဲ့သည်။

"ငါ တကယ်ကြီး ကမ္ဘာကူးပြောင်းခြင်း ဖြစ်လာလိမ့်မယ်လို့ မထင်ထားခဲ့ဘူး..."

တီကျွယ်တျန်း သတိပြန်ဝင်လာပြီး သူ၏ မျက်လုံးများက အနည်းငယ် တဖျပ်ဖျပ် လှုပ်ခတ်သွားသည်။

"ကောင်းကင်ဘုံက ငါ့အပေါ် တကယ် ကောင်းမွန်တာပဲ... ငါ မသေဘဲ ရှင်သန်နေဦးမယ်လို့ မထင်ထားခဲ့ဘူး..."

ယခင်ဘဝက တီကျွယ်တျန်းသည် အသက်ရှင်ခြင်းနှင့် သေဆုံးခြင်းကို ရင်းနှီးကျွမ်းဝင်နေသည့် ကြေးစားစစ်သားတစ်ဦး ဖြစ်ခဲ့သည်။

တိုက်ပွဲတစ်ခုတွင် တစ်ခဏတာ ပေါ့ဆမှုကြောင့် ချောင်းမြောင်းပစ်ခတ်သူတစ်ဦး၏ ချုံခိုတိုက်ခိုက်ခြင်းကို ခံလိုက်ရသည်။

သူ့ထံသို့ ပျံသန်းလာသော စက်သေနတ်ကျည်ဆန်များကို ကြည့်ရင်း တီကျွယ်တျန်း သူ့ကိုယ်သူ သေချာပေါက် သေရတော့မည်ကို သိလိုက်သည်။

သို့သော် မျက်စိပြန်ဖွင့်လိုက်ချိန်တွင်တော့ သူသည် မသေမျိုးနယ်မြေမှ တီကျွယ်တျန်း ဖြစ်နေခဲ့ချေပြီ။

သူ၏ စိတ်ထဲရှိ မှတ်ဉာဏ်များကို ပေါင်းစပ်လိုက်ပြီးနောက် တီကျွယ်တျန်းလည်း အံ့အားသင့်သွားခဲ့ရသည်။

"ဒီဘဝမှာတော့ ငါ့ဘက်မှာ ကံကြမ္မာရှိနေပြီး မသေမျိုးနယ်မြေရဲ့ အဓိကဇာတ်ကောင် ဖြစ်လာခဲ့ပြီ ထင်တယ်..."

ထိုအမျိုးသမီးကို ကြည့်ရင်း တီကျွယ်တျန်း မရည်ရွယ်ဘဲ ပြုံးလိုက်မိသည်။

၎င်းမှာ ရှင်းလင်းစွာပင် နူးညံ့သိမ်မွေ့သော အပြုံးတစ်ပွင့် ဖြစ်၏။

သို့သော်ငြား လူတိုင်းသည် ခန်းမအတွင်းရှိ အပူချိန်က လျင်မြန်စွာ ကျဆင်းသွားသည်ကို ခံစားလိုက်ရသည်။

နှစ်သောင်းချီ သက်တမ်းရှိသော ရေခဲတုံးကြီးတစ်တုံးကဲ့သို့ပင်။

တစ်ခန်းလုံးရှိ လူတိုင်းမှာ လေးလံသော ဖိအားတစ်ခုကို ခံစားလိုက်ရသည်။

တီကျွယ်တျန်း အမျိုးသမီးကို ကြည့်လိုက်သည်။

သူ၏ စိတ်ထဲရှိ မှတ်ဉာဏ်များအရ ဤအမျိုးသမီးသည် ယင်ကိုးပါး သန့်စင်သောကိုယ်ခန္ဓာကို ပိုင်ဆိုင်ထားကြောင်း သူ သိရှိခဲ့သည်။

သဘာဝ ကျင့်ကြံခြင်း လူသားမီးဖိုတစ်ခုပင် ဖြစ်သည်။

တီကျွယ်တျန်းက သူမကို ပြုစုပျိုးထောင်ပေးခဲ့ခြင်းမှာ သူ၏ ကိုယ်ပိုင် ကျင့်ကြံခြင်းအတွက် သီးသန့်ဖြစ်ပေသည်။

ထို့အပြင် ဤအမျိုးသမီးသည် အပေါ်ယံ ဖြူစင်ဟန်ဆောင်နေသော မိန်းမတစ်ဦး ဖြစ်သည်။

သို့သော် တီကျွယ်တျန်းကတော့ ဂရုမစိုက်ပေ။

ဤအမျိုးသမီး၏ မိသားစုကို ကူညီသည်ဖြစ်စေ၊ သူမကို အလိုလိုက်သည်ဖြစ်စေ အားလုံးသည် သူကိုယ်တိုင်အတွက်သာ ဖြစ်သည်။

အဘယ်ကြောင့်ဆိုသော် တီကျွယ်တျန်း၏ ကိုယ်ခန္ဓာက ထိန်းချုပ်၍မရတော့မည့် အခြေအနေသို့ ရောက်ရှိနေပြီဖြစ်ရာ ဤတားမြစ်ထားသော အသီးလေး မမှည့်သေးလျှင်တောင်မှ သူ ခူးဆွတ်ရတော့မည် ဖြစ်သည်။

ယခုအချိန်သည် သင့်လျော်သော အချိန်မဟုတ်သော်ငြားလည်းပေါ့။

သို့သော် အခြားရွေးချယ်စရာ လမ်းမရှိပေ။

အဆင့်တက်မှသာ သူ၏ ခန္ဓာကိုယ်တွင်းရှိ ကမ္ဘာဦး  နတ်ဆိုးချီများကို ဖိနှိပ်ထားနိုင်မည် ဖြစ်သည်။

ဖိနှိပ်ထားနိုင်မည် မနိုင်မည်ကိုမူ သူ၏ ခန္ဓာကိုယ်ပိုင်ရှင်ဟောင်းပင်လျှင် သိမထားခဲ့ပေ။

တီကျွယ်တျန်းက သူ့ရှေ့ရှိ အမျိုးသမီးကို သူ့အား ခစားစေချင်ခဲ့သော်လည်း ရလဒ်အနေဖြင့် သူမက ပွင့်ပွင့်လင်းလင်း ငြင်းဆန်လာခဲ့သည်။

သူမ သူ့ကို မနှစ်သက်ကြောင်း ပြောလာခြင်း ဖြစ်သည်။

တီကျွယ်တျန်းသည် ပြီးခဲ့သည့် ရက်အနည်းငယ်က သူ၏ ခန္ဓာကိုယ်တွင်းရှိ ကမ္ဘာဦး နတ်ဆိုးချီများကို ဖိနှိပ်ထားခဲ့သော်လည်း ယနေ့တွင် သူ ကျရှုံးသွားလိမ့်မည်ဟု ထင်မထားခဲ့ပေ။

သူ သေဆုံးသွားခဲ့ပြီး ယခုအခါ ကမ္ဘာမြေမှ တီကျွယ်တျန်းက ရောက်လာခြင်း ဖြစ်သည်။

"အစ်ကို တီကျွယ်တျန်း... အစ်ကိုက ကျွန်မအပေါ် အကောင်းဆုံးဆိုတာ ကျွန်မ သိပါတယ်... ပြီးတော့ ကျွန်မ ပြောသမျှကိုလည်း သဘောတူပေးမှာပါ... အရင်ကလည်း ကျွန်မ ရှင့်ကို ပြောခဲ့ဖူးပါတယ်"

"ရှင် ကျွန်မကို အချစ်ရဆုံး ညီမလေးတစ်ယောက်လို သဘောထားလို့ ရပါတယ်..."

"ကျွန်မလည်း ရှင့်ကို ကျွန်မ အချစ်ရဆုံး အစ်ကိုကြီးတစ်ယောက်လို သဘောထားမှာပါ"

ဤစကားများကို ကြားသောအခါ တီကျွယ်တျန်းက အပေါ်ယံတွင် တည်ငြိမ်နေသော်လည်း ရင်ထဲ၌မူ ရယ်ချင်နေမိသည်။

"ဘာမှမရင်းနှီးဘဲ အလကားလိုချင်နေတာပဲ... နာမည်အပျက်မခံဘဲ အကျိုးအမြတ်ကိုတော့ လိုချင်နေတယ်ပေါ့..."

တီကျွယ်တျန်း ဤသို့သော လူမျိုးများကို များစွာ မြင်တွေ့ခဲ့ဖူးသည်။

"ငါ သဘောမတူဘူးဆိုရင်ရော..."

တီကျွယ်တျန်းက တိုးညှင်းစွာ ဆိုလိုက်သည်။

အသံက မကျယ်လောင်သော်လည်း ခန်းမအတွင်း၌မူ မိုးခြိမ်းသံတစ်ခုအလား ဟိန်းထွက်သွား၏။

ခန်းမအတွင်း ထိုင်နေသူများသည် ဆက်လက်၍ ငြိမ်မထိုင်နိုင်တော့ဘဲ လီရှီးကို မျက်စပစ်ပြနေကြသည်။ လီရှီး၏ အမူအရာကလည်း ပြောင်းလဲသွားသည်။ ယခင်က သူမ ဘာပဲပြောပြော တီကျွယ်တျန်းက အမြဲတမ်း သဘောတူခဲ့သည်။

ထို့ကြောင့် သူမ ဘာပဲပြောပြော ဘာပဲလုပ်လုပ် တီကျွယ်တျန်း သဘောတူလိမ့်မည်ဟု သူမ ထင်ယောင်ထင်မှား ဖြစ်နေခဲ့ခြင်း ဖြစ်သည်။

"အစ်ကို တီကျွယ်တျန်း... ရှီးအာကို ဆက်ပြီး နောက်နေဦးမယ်ဆိုရင် ရှီးအာ စိတ်ဆိုးတော့မှာနော်..."

လီရှီးက ထိုသို့ပြောပြီးနောက် မူနွဲ့ကာ ခေါင်းကို တစ်ဖက်သို့ပင် လှည့်သွားသေးသည်။

တီကျွယ်တျန်းကတော့ တုန်လှုပ်ခြင်း မရှိပေ။

"ငါ ဖတ်ခဲ့ဖူးတဲ့ ဝတ္ထုတွေအရ ငါ ကမ္ဘာကူးပြောင်းခြင်း ဖြစ်လာကတည်းက ကမ္ဘာတစ်ခုရဲ့ ဇာတ်လိုက်ဖြစ်နေသင့်တာ... နင့်လို ဟန်ဆောင်ကောင်းတဲ့ မိန်းမကို ငါက ဘာလို့ ဂရုစိုက်နေရမှာလဲ..."

ကမ္ဘာဦး နတ်ဆိုးချီနှင့် ပတ်သက်၍မူ တီကျွယ်တျန်း ဂရုမစိုက်ပေ။

ထိုဝတ္ထုများတွင် မည်သည့်ဇာတ်လိုက်က ကံဆိုးခြင်းကို ကံကောင်းခြင်းအဖြစ်သို့ မပြောင်းလဲနိုင်ခဲ့လို့လဲ...

တီကျွယ်တျန်း အတွေးလွန်နေစဉ်မှာပင်။ လူရိပ်တစ်ခု ဝင်လာခဲ့သည်။

ခန့်ညားသော မျက်နှာသွင်ပြင်၊ တည်ငြိမ်သော ခြေလှမ်းများနှင့် သူ၏ မျက်လုံးများအတွင်းရှိ နတ်ဘုရားအလင်းတန်းတို့နှင့်အတူ။

အားကောင်းသော ယုံကြည်ချက်တစ်ခုက ဤလူငယ်လေး၏ ခန္ဓာကိုယ်အနှံ့ လွှမ်းခြုံနေ၏။ ဤလူရိပ် ဝင်လာသည့် အခိုက်အတန့်မှစ၍ လီရှီး၏ အကြည့်များ ပြောင်းလဲသွားပြီး အံ့အားသင့်မှုများ ပြည့်နှက်သွားကာ ထို့နောက်တွင်တော့ ဝမ်းသာမှုနှင့် ရှက်သွေးဖြာမှုတို့ အစားထိုး ဝင်ရောက်လာသည်။

ထိုအမျိုးသားက လီရှီးကို ကြည့်လိုက်ပြီး သူ၏ မျက်လုံးများတွင်လည်း ချစ်ခင်ကြင်နာမှုများ ပြည့်နှက်နေ၏။

"ကျန်တာကို ကိုယ့်ဆီသာ လွှဲထားလိုက်ပါ..."

အမျိုးသားက လီရှီးအား ပြောလိုက်သည်။ ထို့နောက် သူ ရှေ့သို့ လှမ်းလာပြီး တီကျွယ်တျန်းနှင့် ခြေလှမ်းတစ်ရာအကွာတွင် ရပ်တန့်လိုက်သည်။ သူတို့နှစ်ဦး အကြည့်ချင်း ဆုံသွားကြသည်။

"မင်းက ရှီးအာ ပြောတဲ့ တီကျွယ်တျန်း ဖြစ်ရမယ်... ရှီးအာကို စောင့်ရှောက်ပေးခဲ့တဲ့အတွက် ကျေးဇူးတင်ပါတယ်... မင်းအတွက် အများကြီး အလုပ်ရှုပ်ခဲ့ရပြီ... အခုကစပြီး ရှီးအာကို ငါပဲ စောင့်ရှောက်သွားပါ့မယ်..."

စကားပြောနေသော ဤလူငယ်လေးသည် အားကောင်းသော ယုံကြည်ချက်နှင့်အတူ ကျေနပ်ဂုဏ်ယူနေသည့် အရိပ်အယောင်တစ်ခုကိုပါ ထုတ်လွှင့်နေပေသည်။ တီကျွယ်တျန်း စကားပြောရန် ဟန်ပြင်လိုက်စဉ် ခမ်းနားကြီးကျယ်ပြီး အေးစက်လှသော အသံတစ်ခုက သူ၏ စိတ်ထဲ၌ ပေါက်ကွဲထွက်ပေါ်လာ၏။

【ကံကြမ္မာ၏ သားတော်ကို ရှာဖွေတွေ့ရှိပါသည်... ကံကြမ္မာဗီလိန်စနစ် နိုးထလာပါပြီ…】