​အခန်း (၄၆) ဖန်းလုံဂိုဏ်းထဲသို့ ရောက်ရှိခြင်း

​"ငါ ဒီကောင်းကင် လှေကားကို ဒီလောက် လွယ်လွယ်ကူကူနဲ့ ဖြတ်ကျော်လာနိုင်လိမ့်မယ်လို့ မထင်ထားခဲ့မိဘူး" လုယွမ်သည် လှေကားထိပ်သို့ ရောက်ရှိသွားပြီးနောက် အလွန်အမင်း စိတ်လှုပ်ရှားစွာဖြင့် အော်ပြောလိုက်သည်။ 

လှေကားတစ်လျှောက်လုံး တက်လာရသည်မှာ အလွန်ပင် လွယ်ကူလွန်းသဖြင့် အလည်အပတ်ခရီးတစ်ခုသို့ သွားရောက်သကဲ့သို့ ခံစားလိုက်ရသည်။ မတက်ခင်က လုယွမ်သည် စိတ်ပိုင်းဆိုင်ရာ ပြင်ဆင်မှုများစွာ ပြုလုပ်ခဲ့သော်လည်း အဆုံးတွင်မူ ၎င်းတို့မှာ လုံးဝ အသုံးမဝင်ခဲ့ပေ

​အထက်ရှိ မြူခိုးများသည် လျင်မြန်စွာ ပျောက်ကွယ်သွားသည်။

ထို့နောက် သူ၏ မျက်စိရှေ့တွင် ပေါ်လာသော မြင်ကွင်းက လုယွမ်ကို ထပ်မံ၍ အလွန်အမင်း တုန်လှုပ်သွားစေသည်။ 

ဧရာမ တောင်ပံတံခါးကြီးတစ်ခုမှာ အပြည့်အဝ ပေါ်ထွက်လာသည်။ တောင်ပံတံခါးအပေါ်တွင် "ဖန်းလုံဂိုဏ်း" ဟူသော စာလုံးကြီးသုံးလုံးကို ရေးထိုးထားသည်။ 

တောင်ပံတံခါးတစ်ခုလုံးမှာ အလွန်ပင် ခမ်းနားထည်ဝါလှသည်။ တစ်ချိန်တည်းမှာပင် တောင်ပံတံခါး၏ ဘေးတစ်ဖက်စီတွင် ချီလင် ကျောက်ရုပ်တုများ ရှိနေသည်။ ဤကျောက်ရုပ်တုနှစ်ခုမှာ အသက်ဝင်နေသကဲ့သို့ ဖြစ်ပြီး အထူးသဖြင့် သူတို့၏ မျက်လုံးများက လုယွမ်ကို စိုက်ကြည့်နေသကဲ့သို့ ခံစားရစေသည်။

​"ဖန်းလုံဂိုဏ်းရဲ့ တံခါးတောင် ဒီလောက် ခမ်းနားနေတာပဲ" လုယွမ်က ဖြည်းညင်းစွာ ခေါင်းညိတ်လိုက်ပြီး "လက်ရှိ ကောင်းကင်မြစ်ဂိုဏ်းကသာ ဖန်းလုံဂိုဏ်း တစ်ချိန်က ရောက်ရှိခဲ့တဲ့ ထိပ်သီးအဆင့်ကို ရောက်ချင်တယ်ဆိုရင်တော့ အနာဂတ်မှာ အတော်လေး ဝေးကွာနေဦးမှာပဲ" ဟု ဆိုသည်။

​ခဏမျှ စောင့်ဆိုင်းပြီးနောက် ဝေယန်ဖုန်းနှင့် ရွှယ်ယောင်တို့ ရောက်မလာသေးသည်ကို မြင်သောအခါ...

လုယွမ်သည် နောက်ထပ် ဆက်မစောင့်တော့ရန် ဆုံးဖြတ်လိုက်သည်။

သူသည် ဖန်းလုံဂိုဏ်း၏ တောင်ပံကဲ့သို့ တံခါးကို တိုက်ရိုက် ဖြတ်ကျော်သွားလိုက်သည်။ သူသည် ဖန်းလုံဂိုဏ်းထဲသို့ ရောက်ရှိသွားပြီ ဖြစ်သည်။

​တံခါးကို ဖြတ်ကျော်ပြီးနောက်။

သူ၏ ရှေ့တွင် အလွန်ကျယ်ဝန်းပြီး ပြားချပ်သော ကျောက်ပြားလမ်းမတစ်ခုရှိပြီး ကျောက်ပြားတိုင်းတွင် အလွန်လှပသော ပုံစံများနှင့် ဒီဇိုင်းများကို ထွင်းထုထားသည်။ နေရာတိုင်းတွင် ခမ်းနားကြီးကျယ်မှုများ လွှမ်းခြုံနေသည်။

ဒီဖန်းလုံဂိုဏ်းရဲ့ ရှုခင်းတွေက တကယ့်ကို ထူးခြားလွန်းတယ်။ ဖန်းလုံတောင် တစ်ခုလုံးက တကယ်တော့ ထိပ်တန်းအဆင့် ဝိညာဉ်သွေးကြော တစ်ခု ဖြစ်နေမယ်လို့ မထင်ထားခဲ့မိဘူး... ပြီးတော့ သူထဲမှာ ပါဝင်တဲ့ ဝိညာဉ်စွမ်းအင်တွေကလည်း မယုံနိုင်စရာ ကောင်းလောက်အောင် ကြွယ်ဝနေတာပဲ လုယွမ်က ဖြည်းညင်းစွာ ချီးကျူးလိုက်သည်။

​"နေပါဦး... ငါသာ ဒီဖန်းလုံတောင် တစ်ခုလုံးကို ကူးယူနိုင်မယ်ဆိုရင်..." 

လုယွမ်သည် ရုတ်တရက် တစ်ခုခုကို တွေးမိသွားသည်။ အခွင့်အရေးတစ်ခုက ဒီဖန်းလုံဂိုဏ်းထဲမှာ ရှိနေတာဆိုရင် သူက ဖန်းလုံတောင်တစ်ခုလုံးကို ကူးယူလိုက်မယ်ဆိုပါက... ထိုထဲရှိ အရာအားလုံးသည်လည်း တစ်ခုချင်းစီ ကူးယူခံရမှာဖြစ်သည်။ သို့သော်လည်း... ဒီလို ကူးယူခြင်းမျိုး အောင်မြင်နိုင်ပါ့မလား။ ခဏတာတွင် လုယွမ်သည် အနည်းငယ် စိုးရိမ်မိသွားသည်။

[စနစ် ... ငါ ဒီဖန်းလုံတောင်ကို ကူးယူ နိုင်မလား]

လုယွမ်က ချက်ချင်း မေးမြန်းလိုက်သည်။ သူသာ ကူးယူနိုင်ပါက ဒီလျှို့ဝှက်နယ်မြေမှ ထွက်ခွာပြီးနောက် ဒီဖန်းလုံတောင်ကို ကောင်းကင်မြစ်ဂိုဏ်းမှာ နေရာချပြီး အေးအေးဆေးဆေး ဖန်းလုံတောင်ပေါ်တွင် စူးစမ်းလေ့လာရန် အချိန်အလုံအလောက် ရရှိမည်ဖြစ်သည်။

[​စစ်ဆေးနေသည်]

[ပစ်မှတ်ကို ကူးယူနိုင်သည်]

စနစ်၏ အကြောင်းကြားသံ ထွက်ပေါ်လာသည်။ လုယွမ် ကြားလိုက်ရသောအခါ သူ၏ တစ်ကိုယ်လုံးမှာ ချက်ချင်းပင် ပျော်ရွှင်သွားပြီး "ကောင်းလိုက်တာ" ဟု ဆိုသည်။

​"ဒါဆို ဘာကို စောင့်နေမှာလဲ ကူးယူ လိုက်တော့" လုယွမ်သည် သူ၏ ခြေအောက်ရှိ ကျောက်ပြားကို ထိလိုက်သည်။

[ဒင် အပြာရောင် ကျောက်စိမ်းကျောက်ပြားကို တွေ့ရှိသည် ကူးယူလိုပါသလား]

ဟင်…

လုယွမ်သည် ချက်ချင်း အံ့ဩသွားသည်။ "ဘာဖြစ်တာလဲ ငါက ကျောက်ပြားတစ်ခုတည်းမဟုတ်ဘဲ ဖန်းလုံတောင် တစ်ခုလုံးကို ကူးယူမှာလေ" ဟု လုယွမ်က အလျင်အမြန် ပြောလိုက်သည်။

[ဒင်…ဖန်းလုံတောင် တစ်ခုလုံးကို အပြည့်အဝ ကူးယူနိုင်ရန်အတွက် တောင်တစ်ခုလုံးကို ရွေးချယ်ရမည် ဖြစ်သည်]

စနစ်၏ အသံ ထပ်မံ ထွက်ပေါ်လာသည်။

​"တစ်ခုလုံးကို ရွေးရမယ် ငါဘယ်လို ရွေးရမှာလဲ ဖန်းလုံတောင်ရဲ့ အစိတ်အပိုင်းတိုင်းကို လိုက်ထိရမှာလား" လုယွမ်က အနည်းငယ် စိတ်ညစ်စွာဖြင့် ပြောလိုက်သည်။

[ဒင်... ဖော်ရွေသော ရှင်းပြချက်  - ပိုင်ရှင်သည် သင်၏ ဝိညာဉ်စွမ်းအင်(နတ်ဘုရားအာရုံ)ကို အသုံးပြု၍ ပစ်မှတ်တစ်ခုလုံးကို ရွေးချယ်နိုင်ပါသည်…]

စနစ်က နောက်ထပ် အသေးစိတ် ရှင်းပြလိုက်သောအခါ...

လုယွမ်သည် ချက်ချင်း နားလည်သွားသည်။ 

ရိုးရိုးလေး ပြောရရင် ဥပမာ - ဆေးလုံးတွေကို တစ်လုံးချင်းစီလည်း ကူးယူနိုင်ပေမဲ့ ဆေးလုံးအများကြီးကို ခွက်တစ်ခုထဲ ထည့်လိုက်ရင် အစုလိုက် ကူးယူနိုင်တာမျိုးပေါ့

"ဆိုလိုတာက ငါ့ရဲ့ နတ်ဘုရားအာရုံက ဖန်းလုံတောင် တစ်ခုလုံးကို လွှမ်းခြုံနိုင်ပြီး ဖန်းလုံတောင်ကို ထည့်ထားတဲ့ ကွန်တိန်နာတစ်ခု ဖြစ်လာနိုင်ရင် တစ်တောင်လုံးကို ကူးယူနိုင်မှာအဲဒီလိုလား"

[ဂုဏ်ယူပါတယ် ပိုင်ရှင်... သင် နားလည်မှု ကောင်းမွန်ပါသည်]

​"စနစ်က ဘာလို့ ဒီလိုမျိုး အစကတည်းက ရှင်းမပြတာလဲ" လုယွမ်က အနည်းငယ် စိတ်ဆိုးစွာ ပြောသည်။

[ပိုင်ရှင်က မမေးခဲ့လို့ပါ~~~~]

"ကောင်းပါပြီ... ကောင်းပါပြီ... အားလုံး ငါ့အမှားပါပဲ" လုယွမ်သည် စိတ်ပျက်စွာ သက်ပြင်းချလိုက်သည်။

​လုယွမ်၏ ကျင့်ကြံမှုအဆင့်မှာ အမြုတေဖြစ်တည်ခြင်း အဆင့်သို့ ဖိနှိပ်ခံထားရသော်လည်း... သူ၏ ဝိညာဉ်စွမ်းအင်မှာ မယုံနိုင်စရာကောင်းလောက်အောင် ပြင်းထန်နေသည်။ 

ထို့ကြောင့် လုယွမ်၏ အမြင်အရ... သူ၏ နတ်ဘုရားအာရုံဖြင့် ဖန်းလုံတောင် တစ်ခုလုံးကို ဖုံးလွှမ်းခြင်းမှာ ကြီးမားသော ပြဿနာ မဟုတ်ပေ။ အဆုံး၌ ဖန်းလုံတောင်တွင် ဝိညာဉ်သွေးကြော ရှိနေသည်။ ဤသွေးကြောထဲတွင် ကျင့်ကြံပါက ကျင့်ကြံသူများသည် အဆပေါင်းများစွာ တိုးတက်လာမည်ဖြစ်သည်။

​အပေါ်ကို မော့ကြည့်လိုက်သောအခါ...

ဖန်းလုံတောင်၏ ထိပ်တွင် အလွန်ခမ်းနားသော ခန်းမကြီးတစ်ခုကို ရှင်းရှင်းလင်းလင်း မြင်နိုင်သည်။ ခန်းမကြီးတစ်ခုလုံးကို နတ်အလင်းရောင်များဖြင့် ဖုံးလွှမ်းထားသည်။

​"ဒါက ဖန်းလုံဂိုဏ်းရဲ့ ပင်မခန်းမပဲ ဖြစ်ရမယ်" လုယွမ်က တည်ငြိမ်စွာ ပြောလိုက်ပြီး "နောက်တစ်ခုကတော့ ဒီဖန်းလုံဂိုဏ်းကို အရင်ဆုံး သေချာ စူးစမ်းကြည့်ရမယ်" ဟု ဆိုသည်။

​အတွင်းဘက်သို့ ဆက်လက် လျှောက်လှမ်းသွားရာ...

မကြာမီတွင် ကျင့်ကြံခြင်း ရင်ပြင်တစ်ခုသို့ ရောက်ရှိသွားသည်။ ၎င်းမှာ အလွန်ကျယ်ဝန်းပြီး လူရာပေါင်းများစွာ ကျင့်ကြံနိုင်ရန် လုံလောက်သည်။ 

ထို့ပြင် ဤရင်ပြင်တွင် အထူး 'ဝိညာဉ်စွမ်းအင်စုစည်းမှု အစီအရင်' ရှိနေသည် ၎င်းကို အသက်သွင်းလိုက်ပါက ဝိညာဉ်စွမ်းအင်များ အလွန်ကြွယ်ဝပြီး သန့်စင်သွားမည်ဖြစ်ကာ ကျင့်ကြံသူများအတွက် ပိုမိုကောင်းမွန်စေသည်။

​"ထိပ်တန်းအဆင့် ဖန်းလုံဂိုဏ်းမို့လို့ မျှော်လင့်ထားတဲ့အတိုင်းပဲ... ကျင့်ကြံခြင်း ရင်ပြင်တစ်ခုတောင် ဒီလောက်တောင် ဇိမ်ကျတာ" လုယွမ်က သက်ပြင်းချလိုက်ရင်း ကောင်းကင်မြစ်ဂိုဏ်း၏ ရင်ပြင်ကို ပြန်စဉ်းစားလိုက်သည်။ 

အမှန်အတိုင်း ပြောရရင် ၎င်းမှာ ကျယ်ဝန်းသော နေရာလွတ်တစ်ခုမျှသာ ဖြစ်သည်။ ကောင်းကင်မြစ်ဂိုဏ်းသည် လက်ရှိတွင် မဟာယန်မင်းဆက်၏ ထိပ်တန်းဂိုဏ်းတစ်ခု ဖြစ်သော်လည်း... 

ကျင့်ကြံခြင်း ရင်ပြင်အတွက် ဒီလောက်ကြီးမားတဲ့ ဝိညာဉ် စွမ်းမင်စုစည်းမှုအစီအရင်ကို မတည်ဆောက်နိုင်ပေ။ 

ထို့ပြင် ထိုအစီအရင်မှာ ဝိညာဉ်ကျောက်တုံးများ အများအပြား ကုန်ကျသည်။ နေ့စဉ် အသုံးပြုပါက ကုန်ကျမည့် ကျောက်တုံး အရေအတွက်မှာ မရေမတွက်နိုင်အောင် များပြားလှပြီး ကောင်းကင်မြစ်ဂိုဏ်းမှာ လအနည်းငယ်အတွင်း ဒေဝါလီခံသွားနိုင်သည်။

​ကျင့်ကြံခြင်း ရင်ပြင်ကို ဖြတ်ကျော်ပြီးနောက်...

သေးငယ်သော အဆောက်အအုံများစွာကို တွေ့ရသည်။ ခဏတာ စူးစမ်းပြီးနောက်...

သူသည် တပည့်များ နေထိုင်ရာ နေရာသို့ ရောက်ရှိလာပုံရသည်။

​"အရင်က ဖန်းလုံဂိုဏ်း တပည့်တွေအားလုံးက သီးခြား အဆောင်တွေမှာ နေကြတယ်... နေထိုင်ရာ နေရာတိုင်းမှာလည်း သေးငယ်တဲ့ ဝိညာဉ်စွမ်းအင်စုစည်းမှု အစီအရင်လေးတွေ ရှိတယ်..." လုယွမ်သည် ထပ်မံ၍ အံ့ဩမိသည်။ ဒီအရာက လုယွမ်ကို မြို့ထဲသို့ ဝင်လာသော တောသားတစ်ယောက်သကဲ့သို့ ခံစားရစေသည်။ သူမြင်သမျှ အရာတိုင်းမှာ သူ့ကို အံ့အားသင့်စေသည်။

​အချိန်များ တဖြည်းဖြည်း ကုန်လွန်သွားသည်။

လုယွမ်သည် ကြည်လင်သော ကြာကန်တစ်ခုကို မြင်လိုက်ရသည်။ 

ကန်ထဲတွင် အရောင်စုံ ဝိညာဉ်ကျောက်တုံးများ ပြည့်နေပြီး ထိုထဲမှ ပေါက်နေသော ရောင်စုံကြာပန်းများမှာ အလွန်ရှားပါးသော ဝိညာဉ်ဆေးဝါးများ ဖြစ်သည်။ 

ဒီလိုရှားပါးသော ဝိညာဉ်ဆေးဝါးများကို ဖန်းလုံဂိုဏ်းတွင် အများအပြား ပျိူထောင်နိုင်လိမ့်မည်ဟု သူ မထင်ထားခဲ့မိပေ လုယွမ်သည် ထိုကြာပန်းများကို ချက်ချင်း မခူးဆွတ်ခဲ့ပေ။ 

သူက ဖန်းလုံတောင် တစ်ခုလုံးကို ကူးယူမှာ ဖြစ်သည့်အတွက် ခူးစရာ မလိုပေ။ နောင်တွင် သူသည် ကြာပန်းများကို အစုလိုက် ကူးယူနိုင်မည်ဖြစ်ကာ အဆုံးမရှိသော အရေအတွက်ကို ပိုင်ဆိုင်နိုင်မည်ဖြစ်သည်။

​ဆက်လက်၍ စူးစမ်းလိုက်ရာ...

အချိန်အကြာကြီး မကြာလိုက်ပေ။

ခမ်းနားထည်ဝါပြီး ကြီးမားသည့် အဆောက်အအုံတစ်ခု လုယွမ်၏ ရှေ့တွင် ပေါ်လာသည်။

​"ကျမ်းစာတိုက် ဖန်းလုံဂိုဏ်းရဲ့ ကျင့်စဉ်အမွေအနှစ်တွေအားလုံး ဒီကျမ်းစာတိုက်မှာပဲ ရှိနေမှာပဲ" လုယွမ်က ဖြည်းညင်းစွာ ခေါင်းညိတ်လိုက်ပြီး "ဂိုဏ်းတစ်ခုအတွက် အရေးအပါဆုံး နေရာကို နောက်ဆုံးတော့ ရောက်လာပြီ" ဟု ဆိုသည်။

​ကျမ်းစာတိုက်တစ်ခုလုံးကို ‘မင်’ကျောက်စိမ်းနှင့် ကောင်းကင် ဝိညာဉ်သစ်သားများဖြင့် တည်ဆောက်ထားပုံရသည်။ အလင်းရောင် ထွန်းလင်းတောက်ပမှုအောက်တွင် ကျမ်းစာတိုက်၏ မျက်နှာပြင်မှာ ရွှေရောင်အလင်းတန်းများဖြင့် လင်းလက်လျက်ရှိသည်။