အခန်း (၃၅) - ဖန်းလုံလျှို့ဝှက်နယ် မြေအတွင်းသို့ ဝင်ရောက်ခြင်း
ရက်အနည်းငယ်မှာ လျင်မြန်စွာ ကုန်လွန်သွားခဲ့သည်။
ကြီးမားလှသော လေသင်္ဘောကြီးသည် အောက်သို့ စတင်သက်ဆင်းလာခဲ့တော့သည်။
"အားလုံးပဲ... ကုန်းပတ်ပေါ်မှာ စုဝေးကြ"
တောင်ထွတ်သခင် လျှိုလဲ့၏ အသံက တပည့်တိုင်း၏ နားထဲတွင် ဟိန်းထွက်သွားခဲ့သည်။
၎င်းကို ကြားလိုက်ရသည့်အခါ။
တပည့်များသည် ကုန်းပတ်ပေါ်သို့ အလျင်အမြန်ပင် စုဝေးလာကြသည်။
လုယွမ်သည်လည်း ချက်ချင်းပင် ထွက်လာခဲ့သည်။
ကုန်းပတ်ပေါ်တွင် ရပ်ရင်း။
အပြင်ဘက်သို့ မျှော်ကြည့်လိုက်သည့်အခါ။
သူတို့သည် အလွန်ပင် ခန့်ညားထည်ဝါလှသော တောင်တန်းကြီးတစ်ခု၏ အထက်ယံသို့ ရောက်ရှိနေပြီဖြစ်ကြောင်း မြင်တွေ့လိုက်ရသည်။
ထို့အပြင်။
အဝေးတစ်နေရာတွင်လည်း အခြားသော ကြီးမားလှသည့် လေသင်္ဘောကြီးအချို့ကို မြင်တွေ့နေရပြီး ၎င်းတို့မှာ မဟာယန်မင်းဆက်၏ အခြားသော ထိပ်သီးအင်အားစုများ၏ လေသင်္ဘောများ ဖြစ်ပုံရပေသည်။
၎င်းအပြင် အခြားသော လေသင်္ဘောအငယ်စား အမြောက်အမြားလည်း ရှိနေသေးသည်။
မြေပြင်ပေါ်တွင်လည်း အမြုတေစုစည်းခြင်းအဆင့်နှင့် အမြုတေဖြစ်တည်ခြင်းအဆင့် ကျင့်ကြံသူအမြောက်အမြား စုဝေးရောက်ရှိနေကြပြီ ဖြစ်သည်။
လုယွမ်တို့ စီးနင်းလာသော လေသင်္ဘောကြီးသည် အတိုင်းအတာတစ်ခုအထိ သက်ဆင်းပြီးနောက် ဆက်မဆင်းတော့ဘဲ လေဟာနယ်ထဲတွင် ငြိမ်သက်စွာ ရပ်နေခဲ့သည်။
ဤအချိန်တွင် ပတ်ဝန်းကျင်ရှိ ရှုခင်းအားလုံးကို အထင်အရှား မြင်တွေ့နေရပြီ ဖြစ်သည်။
"ဒါက ဖန်းလုံတောင်တန်း ပဲ ဖန်းလုံလျှို့ဝှက်နယ်မြေက ဒီအထဲမှာ ရှိတာ.. မင်းတို့ရဲ့ နောက်ဆုံးပြင်ဆင်မှုတွေကို လုပ်ထားကြတော့ လျှို့ဝှက်နယ်မြေရဲ့ ဂိတ်တံခါး ထွက်ပေါ်လာတာနဲ့ မင်းတို့ ဝင်လို့ရပြီ"
လျှိုလဲ့သည် သူ့ရှေ့မှောက်ရှိ တပည့်များကို ကြည့်ကာ သတိပေးလိုက်သည်။
"မင်းတို့အားလုံးက ငါ့ရဲ့ ကောင်းကင်မြစ်ဂိုဏ်းက အထူးချွန်ဆုံး တပည့်တွေပဲ မင်းတို့အားလုံး ဖန်းလုံလျှို့ဝှက်နယ်မြေထဲကနေ အသက်ရှင်လျက် ပြန်ထွက်လာနိုင်ကြဖို့ မျှော်လင့်တယ်"
"ငါ အများကြီး ထပ်မပြောတော့ဘူး... သေချာ ဂရုစိုက်ကြပါ"
လျှိုလဲ့အနေဖြင့် တစ်ကြိမ်နှစ်ကြိမ်မျှသာ သတိပေးနိုင်ခြင်း ဖြစ်ပေသည်။
ထို့နောက်တွင်မူ သူတို့ကို ဤနေရာသို့ ဘေးကင်းစွာ ပို့ဆောင်ပေးရန်နှင့်.. နောက်ပိုင်း သူတို့ ပြန်ထွက်လာသည့်အခါ ဂိုဏ်းဆီသို့ ဘေးကင်းစွာ ပြန်လည်ခေါ်ဆောင်သွားရန်သာ ရှိတော့သည်။
ပုံမှန်အားဖြင့် လျှို့ဝှက်နယ်မြေတစ်ခုခုမှ ပြန်ထွက်လာကြသော ကျင့်ကြံသူများသည် အမြဲတမ်း ပစ်မှတ်ထားခြင်း ခံရလေ့ရှိသည်။
အတိတ်တုန်းက ဤကဲ့သို့သော ဖြစ်ရပ်များစွာ မကြာခဏ ဖြစ်ပွားခဲ့ဖူးသည်။
လျှို့ဝှက်နယ်မြေထဲကနေ အသက်လုပြီး ခက်ခက်ခဲခဲ ပြန်ထွက်လာခဲ့ကြသော ကျင့်ကြံသူများသည် နောက်ဆုံးတွင် အခြားသော ကျင့်ကြံသူများ၏ သတ်ဖြတ်လုယက်ခြင်းကို ခံလိုက်ရတတ်သည်... ဂိုဏ်းအနေဖြင့် နတ်ဝိညာဉ်အဆင့် ပညာရှင်ဖြစ်သူ တောင်ထွတ်သခင်လျှိုကိုယ်တိုင် အဖွဲ့ကို ဦးဆောင်ခိုင်းရခြင်းမှာ ဤကဲ့သို့သော ကိစ္စရပ်များ မဖြစ်ပွားစေရန် တားဆီးရန်အတွက် ဖြစ်ပေသည်။
ကောင်းကင်မြစ်ဂိုဏ်းတစ်ခုတည်း မဟုတ်ပါချေ.. အခြားသော အဓိကအင်အားစုကြီးများကလည်း သူတို့၏အဖွဲ့များကို ကိုယ်တိုင်ဦးဆောင်ရန် အလွန်အစွမ်းထက်သော ကျင့်ကြံသူများကို စေလွှတ်ထားကြခြင်း ဖြစ်သည်။
"နားလည်ပါပြီ "
ကုန်းပတ်ပေါ်ရှိ တပည့်များက ရိုသေစွာ ပြန်လည်ဖြေကြားလိုက်ကြသည်။
"အဲ့ဒီအပြင်... မင်းတို့ထဲက ဘယ်သူမဆို အန္တရာယ်နဲ့ ကြုံရရင် မိမိရဲ့ တပည့်တံဆိပ်ပြား ကို သုံးပြီး အကူအညီတောင်းခံတဲ့ အချက်ပြမှုကို ပို့လို့ရတယ် အကယ်၍ အနီးအနားမှာ ဂိုဏ်းတူတပည့်တွေ ရှိနေရင် ဒီအကူအညီတောင်းခံမှုကို ရရှိလိမ့်မယ်"လျှိုလဲ့က ဆိုသည်…"
ဒါပေမဲ့ မင်းတို့အနေနဲ့ ဂိုဏ်းတူတပည့်တွေကို ကယ်တင်ဖို့ အစွမ်းကုန် ကြိုးစားစေချင်ပေမဲ့... အကယ်၍ မိမိက ကယ်တင်နိုင်စွမ်းမရှိဘူးလို့ ယူဆရင်တော့ အတင်းအကျပ် မလုပ်ပါနဲ့"
"ကယ်နိုင်ရင် ကယ်ပါ... မကယ်နိုင်ရင်တော့ မိမိရဲ့ အသက်ကိုပဲ အဓိက ကယ်တင်ပါ"
၎င်းက အမှန်တကယ်ပင် ရက်စက်လွန်းလှသည်။
သို့သော်လည်း လျှိုလဲ့သည် တပည့်တစ်ဦးက အကူအညီတောင်းခံလာပါက အခြားသော တပည့်များအနေဖြင့် မည်သည့်တန်ဖိုးမျိုးကိုမဆို ပေးဆပ်ပြီး သေချာပေါက် ကယ်တင်ရမည်ဟူ၍ အတင်းအကျပ် အမိန့်ပေးခြင်း မရှိပါချေ။
"နားလည်ပါပြီ "
တပည့်များက ထပ်မံ၍ ခေါင်းညိတ်ပြကြပြန်သည်။
ထိုနောက်ပိုင်း အချိန်များတွင်မူ။
လူတိုင်းက စိတ်ရှည်လက်ရှည်ဖြင့် စောင့်ဆိုင်းနေခဲ့ကြသည်။
အဝေးတစ်နေရာမှလည်း အခြားသော ကျင့်ကြံသူများစွာ ဤနေရာသို့ အရှိန်အဟုန်ဖြင့် တရဟော ဝင်ရောက်လာနေကြဆဲ ဖြစ်သည်။
လုယွမ် အပြင်ဘက်သို့ မျှော်ကြည့်လိုက်သည်။
သူသည် အခြားသော လေသင်္ဘောကြီးများပေါ်တွင် ရပ်နေကြသည့် ကျင့်ကြံသူများစွာကို မြင်တွေ့လိုက်ရသည်။
"တောင်ထွတ်သခင်လျှို... ဟိုဘက်က လေသင်္ဘောပေါ်မှာ ဘာလို့ အမျိုးသမီးကျင့်ကြံသူတွေချည်းပဲ ရှိနေတာလဲ"
လုယွမ်က ရုတ်တရက် စူးစမ်းလိုစိတ်ဖြင့် မေးလိုက်သည်။
"အဲ့ဒါက နတ်သမီးဂိုဏ်း လေ.. သူတို့က အမျိုးသမီးတွေကိုပဲ တပည့်အဖြစ် လက်ခံတာ"
လျှိုလဲ့က အသာအယာ ပြုံးလိုက်သည်။
"ကောင်လေး... မင်း နတ်သမီးဂိုဏ်းက လူတွေနဲ့ တတ်နိုင်သလောက် အဆက်အသွယ် နည်းတာ ပိုကောင်းလိမ့်မယ် နတ်သမီးဂိုဏ်းက အမျိုးသမီးတွေအားလုံးက ညှို့ဓာတ်ကျင့်စဉ် တွေကို ကျင့်ကြံကြတာ"
"မင်း တစ်ခါလောက် ညှို့ယူခြင်း ခံလိုက်ရတာနဲ့ မင်းရဲ့ ယန်စွမ်းအင် တွေအားလုံး သူတို့ရဲ့ စုပ်ယူခြင်းကို ခံလိုက်ရလိမ့်မယ်..."
"ဒါက စုံတွဲကျင့်စဉ် နည်းလမ်းမျိုး မဟုတ်ဘူးလား "
လုယွမ်က အံ့အားသင့်စွာ မေးလိုက်သည်။
"စုံတွဲကျင့်စဉ် ဟုတ်လား စစ်မှန်တဲ့ စုံတွဲကျင့်စဉ် နည်းလမ်းတွေက နှစ်ဦးနှစ်ဖက်စလုံးအတွက် အကျိုးရှိစေတာကွ"
လျှိုလဲ့က ခေါင်းခါပြလိုက်သည်။
"ဒါပေမဲ့ ဒီနတ်သမီးဂိုဏ်းက အမျိုးသမီးကျင့်ကြံသူတွေ ကျင့်ကြံတဲ့ နည်းလမ်းကကျတော့ အမျိုးသားကျင့်ကြံသူတွေရဲ့ ခန္ဓာကိုယ်ထဲက ယန်စွမ်းအင်တွေကို ဝါးမြိုပစ်တာ.. ဒါမှ သူတို့ရဲ့ ကျင့်ကြံခြင်းက ပိုပြီးတော့ အရှိန်အဟုန်နဲ့ တိုးတက်လာနိုင်မှာ ဖြစ်လို့ပဲ"
"ဒီလိုမျိုး ကျင့်ကြံခြင်း နည်းလမ်း ရှိလိမ့်မယ်လို့ ကျွန်တော် လုံးဝ မထင်ထားမိဘူး"
လုယွမ်က ရေရွတ်လိုက်မိသည်။
"ကျင့်ကြံခြင်းလောကက အလွန်ပဲ ကျယ်ပြောလှတယ်.. ငါတို့ မသိသေးတဲ့ အလွန် နက်နဲဆန်းပြားတဲ့ ကျင့်ကြံခြင်း နည်းလမ်းတွေ အများကြီး ရှိပါသေးတယ်။
ဒါကြောင့်မို့လို့ ငါတို့ ကျင့်ကြံသူတွေအနေနဲ့ ပိုမိုမြင့်မားတဲ့ အဆင့်အတန်းတွေကို ရောက်ရှိအောင် ကြိုးစားကျင့်ကြံရမှာ ဖြစ်ပြီး... ဒါမှလည်း ပိုပြီးတော့ ထူးခြားဆန်းပြားတဲ့ တည်ရှိမှုတွေနဲ့ ဆုံတွေ့နိုင်မှာဖြစ်သလို မသိသေးတဲ့ အရာတွေကိုလည်း လေ့လာနိုင်မှာ ဖြစ်တယ်"
လျှိုလဲ့က တိုးညင်းစွာ သက်ပြင်းချလိုက်သည်။
"ကျွန်တော် ဗဟုသုတ တိုးပွားရပါတယ် "
လုယွမ်က လက်အုပ်ချီလိုက်သည်။
ဤနေရာသို့ ရောက်ရှိပြီးနောက်။
သူတို့သည် နာရီအနည်းငယ်မျှ ဆက်လက်စောင့်ဆိုင်းခဲ့ကြရသည်။
ဝုန်း...
ရုတ်တရက်ဆိုသလို မြေကမ္ဘာတစ်ခုလုံးကို တုန်ဟိန်းသွားစေသော အသံကြီးတစ်ခု ထွက်ပေါ်လာခဲ့သည်။
ဤအချိန်တွင် ရောက်ရှိနေကြသော ကျင့်ကြံသူအားလုံး မိမိတို့၏ မျက်ဝန်းများကို ချက်ချင်း ဖွင့်လိုက်ကြတော့သည်။
သူတို့၏ မြင်ကွင်းအတွင်း၌။
တောင်တန်းကြီး၏ နက်ရှိုင်းသော နေရာတစ်ခုဆီမှနေ၍ အတုမဲ့ အလင်းတန်းကြီးတစ်ခု ပေါက်ကွဲထွက်ပေါ်လာခဲ့ပြီ ဖြစ်သည်။
ထိုအလင်းတန်းကြီးက ကောင်းကင်ယံထက်သို့ တိုက်ရိုက် ထိုးတက်သွားခဲ့ပြီး မြေကမ္ဘာနှင့် ကောင်းကင်တစ်ခုလုံးကို ချိတ်ဆက်ထားသကဲ့သို့ ဖြစ်နေသည်။
အလင်းတန်းကြီးက အသက်ရှူကြိမ် ဆယ်ဂဏန်းအနည်းငယ်မျှသာ ကြာမြင့်ခဲ့ပြီးနောက် စတင်၍ လွင့်ပြယ်သွားခဲ့သည်။
ကောင်းကင်ယံတစ်ခုလုံးတွင် ကြီးမားလှသော အလင်းရောင်များ ပေါက်ကွဲထွက်ပေါ်လာခဲ့သည်။
ထိုအလင်းရောင်၏ အောက်တွင်။
တောင်တန်းကြီးတစ်ခုလုံး၏ အထက်၌ ဂိုဏ်း၏ တံခါးဝကြီးတစ်ခု အမှန်တကယ်ပင် စတင်၍ ထွက်ပေါ်လာခဲ့တော့သည်။
ထိုဂိုဏ်းတံခါးဝကြီး၏ အထက်တွင် "ဖန်းလုံဂိုဏ်း" ဟူသော စာလုံးသုံးလုံးကို နဂါးနှင့် ဖီးနစ်ငှက်တို့ ကူးခတ်နေသကဲ့သို့ ခန့်ညားထည်ဝါလှသော ဟန်ပန်ဖြင့် အထင်အရှား မြင်တွေ့နေရသည်။
စာလုံးတစ်လုံးချင်းစီတိုင်းတွင် အလွန်ပင် ပြင်းထန်လှသော ဖိအားများ ပါဝင်နေသည်။
ထိုဂိုဏ်းတံခါးဝကြီး လုံးဝ ထင်ရှားပေါ်လွင်လာခဲ့သည့်အခါ။
ဖန်းလုံလျှို့ဝှက်နယ်မြေ၏ ဂိတ်တံခါးဝက တရားဝင် ပွင့်လှစ်သွားခဲ့ပြီ ဖြစ်ပေသည်။
ဝူး... ဝူး... ဝူး...
သိပ်သည်းလှသော ကျင့်ကြံသူ လူအုပ်ကြီးသည် မိမိတို့၏ ဓားပျံများကို စီးနင်းလျက် ထိုဂိတ်တံခါးဝဆီသို့ အရှိန်အဟုန်ဖြင့် လျင်မြန်စွာ ပျံသန်းဝင်ရောက်သွားကြတော့သည်။
သူတို့ရှေ့မှောက်က မြင်ကွင်းတစ်ခုလုံးမှာ အလွန်ပင် ခန့်ညားထည်ဝါလှပေသည်။
၎င်းက လုယွမ်ကို မျက်လုံးများ ကျယ်ပြန့်သွားစေခဲ့ပြီး သူ၏စိတ်ထဲတွင် တိတ်တဆိတ် တွေးတောမိစေသည်။
"အကယ်၍ ဒီမြင်ကွင်း.. ဒီပုံရိပ်ကိုသာ ရုပ်ရှင်အဖြစ် ရိုက်ကူးလိုက်မယ်ဆိုရင် ရုံဝင်ငွေတွေကတော့ သေချာပေါက် အများကြီးမှာပဲ.. နှမြောစရာကောင်းလိုက်တာ"
ဤကဲ့သို့သော အရာမျိုးကတော့ ဘယ်တော့မှ အမှန်တကယ် ဖြစ်လာလိမ့်မည် မဟုတ်ပါချေ။
မရေတွက်နိုင်သော ကျင့်ကြံသူများသည် အရှိန်အဟုန်ဖြင့် ပေါ်ထွက်လာသော ဖန်းလုံဂိုဏ်း၏ တံခါးဝကြီးအတွင်းသို့ တရဟော တိုးဝင်သွားကြသည်။
သူတို့ ဝင်ရောက်သွားပြီးနောက်တွင် သူတို့၏ ပုံရိပ်များ ချက်ချင်း ပျောက်ကွယ်သွားခဲ့သည်။
သူတို့ ဖန်းလုံလျှို့ဝှက်နယ်မြေအတွင်းသို့ အောင်မြင်စွာ ဝင်ရောက်သွားကြပြီ ဖြစ်ပုံရသည်။
"ကဲ... ဂိတ်တံခါးဝက လုံးဝ ပွင့်သွားပြီ မင်းတို့လည်း ထွက်ခွာကြတော့"
လျှိုလဲ့သည် အခြားလူများ ဘေးကင်းစွာ ဝင်ရောက်သွားကြသည်ကို မြင်တွေ့ပြီးနောက် သူ့ရှေ့မှောက်ရှိ တပည့်များကို ကြည့်ကာ ဆိုလိုက်သည်။
ဤဖန်းလုံလျှို့ဝှက်နယ်မြေအတွင်းမှာ မည်သူက အရင်ဆုံး ဝင်ရောက်နိုင်သည်ဆိုသည်အပေါ် မူတည်၍ အခွင့်အရေးကို အရင်ဆုံး ရှာဖွေတွေ့ရှိနိုင်ခြင်း မျိုး မဟုတ်ပါချေ။
ထို့ကြောင့် ဂိတ်တံခါးပွင့်ပြီးနောက် အနည်းငယ် နောက်ကျမှ ဝင်ရောက်ခြင်းကလည်း ကြီးမားသော ကွာခြားမှု မရှိပါချေ။
ထို့နောက်တွင်…
ကောင်းကင်မြစ်ဂိုဏ်း၏ တပည့်များအားလုံးသည် ထိုဂိတ်တံခါးဝဆီသို့ ပျံသန်းထွက်ခွာသွားကြတော့သည်။
"စီနီယာအစ်ကို... ကျွန်တော် အရင်သွားနှင့်ပါ့မယ်"
ဝေယန်ဖုန်းက လုယွမ်ထံသို့ လက်ယှက်ကာ နှုတ်ဆက်လိုက်ပြီးနောက် အလွန်လျင်မြန်သော အရှိန်အဟုန်ဖြင့် ပျံသန်းထွက်ခွာသွားခဲ့သည်။
"မင်းကတော့ ကောင်လေး... လုံးဝကို မလောဘူးနော်"
လျှိုလဲ့သည် လုယွမ်တစ်ယောက်တည်းသာ ကျန်ရစ်ခဲ့သည်ကို မြင်တွေ့ရသည့်အခါ တည်ငြိမ်စွာ ပြုံးလျက် ဆိုလိုက်သည်။
"ဒီလောက် အချိန်အနည်းငယ်လေး နောက်ကျတာက ကြီးကြီးမားမား ကွာခြားမှု မရှိပါဘူး"
လုယွမ်က ရယ်မောလိုက်သည်။ "တောင်ထွတ်သခင်... ကျွန်တော် သွားပါဦးမယ်"
စကားပြောပြီးနောက်။
လုယွမ်သည်လည်း နောက်မှနေ၍ လျင်မြန်စွာ လိုက်ပါပျံသန်းသွားခဲ့သည်။
သူသည် မကြာမီမှာပင် ဂိတ်တံခါးဝ၏ ရှေ့မှောက်သို့ ရောက်ရှိလာခဲ့သည်။
"ငါ့ရဲ့ ကျင့်ကြံခြင်း အဆင့်အတန်းက အမြုတေဖြစ်တည်ခြင်းအဆင့်ရဲ့ ပြည့်စုံခြင်းအဆင့် အထိ ဖိနှိပ်ထားတာပဲ…ငါ ဒီဂိတ်တံခါးဝကို သေချာပေါက် ဖြတ်သန်းနိုင်မှာပါ"
လုယွမ် အသက်ပြင်းပြင်းတစ်ချက် ရှူလိုက်ပြီး ဂိတ်တံခါးဝအတွင်းသို့ ခြေလှမ်းလှမ်းလိုက်တော့သည်။
ဝူး...
သူသည်လည်း အဆင်ပြေချောမွေ့စွာ ဝင်ရောက်သွားခဲ့ပြီ ဖြစ်သည်။
လေသင်္ဘောပေါ်တွင်မူ လုယွမ် ဝင်ရောက်သွားသည်ကို မြင်တွေ့လိုက်ရသည့်အခါ လျှိုလဲ့က အသာအယာ ခေါင်းညိတ်ပြလိုက်သည်။
"နောက်ကျရင်တော့... ငါ သေချာ စိတ်ရှည်လက်ရှည် စောင့်ဆိုင်းဖို့ပဲ ကျန်တော့တယ်"
"ကျင့်ကြံဖော်လျှို... မျိုးဆက်သစ်တွေအားလုံး လျှို့ဝှက်နယ်မြေထဲ ဝင်သွားကြပြီပဲ…ငါတို့ နတ်ဝိညာဉ်အဆင့် ကျင့်ကြံသူတွေ စုဝေးပြီးတော့ အရက်လေးသောက်.. စကားလေးပြောရင်း ပျင်းစရာကောင်းတဲ့ အချိန်တွေကို ကုန်လွန်စေမလား"
ဤအချိန်တွင် အဝေးတစ်နေရာမှ နတ်ဝိညာဉ်အဆင့် ကျင့်ကြံသူတစ်ဦးက အသံလွှင့်၍ လှမ်းမေးလိုက်သည်။
"ကောင်းသားပဲ"
လျှိုလဲ့က ၎င်းကို ကြားလိုက်ရသည့်အခါ ချက်ချင်းပင် သဘောတူလိုက်သည်။
အဓိက ဂိုဏ်းကြီးများအကြား ဆက်ဆံရေးမှာ တော်တော်လေး ရင်းနှီးဖော်ရွေမှု ရှိကြဆဲ ဖြစ်သည်။
ဤမျှရှည်လျားသော အချိန်ကာလအတွင်း သူတို့ ငြိမ်းချမ်းစွာ အတူတကွ ရှင်သန်နေထိုင်ခဲ့ကြခြင်း ဖြစ်ပေသည်။
လျှိုလဲ့သည် သူ၏ လေသင်္ဘောကြီးကို သိမ်းဆည်းလိုက်ပြီးနောက် လျင်မြန်စွာ ပျံသန်းသွားခဲ့သည်။
သူသည် အခြားသော လေသင်္ဘောတစ်စင်းပေါ်သို့ ရောက်ရှိသွားခဲ့သည်။
ဤအချိန်တွင် ရောက်ရှိနေကြသော နတ်ဝိညာဉ်အဆင့် ကျင့်ကြံသူများအားလုံး ဤနေရာ၌ စုဝေးနေကြပြီ ဖြစ်သည်။
နတ်ဝိညာဉ်အဆင့် ကျင့်ကြံသူတစ်ဦးက သူ၏လက်ကို ဝှေ့ယမ်းလိုက်ရာ မြေပြင်ပေါ်တွင် စားပွဲများ ထွက်ပေါ်လာခဲ့ပြီး ၎င်းတို့အထက်တွင် အရက်များနှင့် အစားအစာများ ပြည့်နှက်နေခဲ့သည်။
"ငါ့အမြင်အရတော့ ဒီအတိုင်း အရက်သောက်နေရုံနဲ့တင် မပြည့်စုံသေးဘူး…ငါတို့ ဂိုဏ်းအသီးသီးကနေပြီးတော့ ဘယ်ဂိုဏ်းရဲ့ တပည့်တွေက ပိုပြီးတော့ အသက်ရှင်လျက် ပြန်ထွက်လာနိုင်မလဲဆိုတာကို လောင်းကြေးထပ်ကြမလား"
နတ်ဝိညာဉ်အဆင့် ကျင့်ကြံသူတစ်ဦးက ရတနာတစ်ခုကို တိုက်ရိုက်ပင် ထုတ်ယူလိုက်သည်။ "ဒါက မြေကမ္ဘာမီးလျှံပုတီးစေ့ ပဲ.. ရှားပါးတဲ့ ရတနာတစ်ခုပေါ့ ငါ ဒါကို လောင်းကြေးအနေနဲ့ အသုံးပြုဖို့ လိုလားတယ်"
"ပျော်ရွှင်မှုအတွက် လောင်းကြေးအနည်းငယ် ထပ်တာပေါ့… ငါကတော့ ဒီ လိပ်နက်ဒိုင်းကို ထုတ်ပေးမယ်"
ထို့နောက်တွင် အခြားသော နတ်ဝိညာဉ်အဆင့် ကျင့်ကြံသူတစ်ဦးကလည်း ရတနာပစ္စည်း တစ်ခုကို ထုတ်ယူလိုက်ပြန်သည်။
လျှိုလဲ့က ၎င်းကို ကြည့်ပြီး အားရပါးရ အော်ဟစ်ရယ်မောလိုက်သည်။
"မင်းတို့အားလုံးက တော်တော်လေး ယုံကြည်ချက် ရှိနေကြတာပဲ တိုက်တိုက်ဆိုင်ဆိုင်ပဲ... ငါကလည်း ငါ့ဂိုဏ်းက တပည့်တွေအပေါ် ယုံကြည်ချက် ရှိတယ်… ငါကတော့ ဒီ ပြီးပြည့်စုံသော အခြေခံတည်ဆောက်ခြင်းဆေးလုံး ကို ထုတ်ပေးမယ်"
ပြီးပြည့်စုံသော အခြေခံတည်ဆောက်ခြင်းဆေးလုံး ထွက်ပေါ်လာခြင်းက။
အခြားသော နတ်ဝိညာဉ်အဆင့် ကျင့်ကြံသူများ၏ မျက်ဝန်းများကို ချက်ချင်းပင် တောက်ပသွားစေခဲ့သည်။
ဒီဆေးက သူတို့အတွက်မူ မည်သည့်သက်ရောက်မှုမျိုးမျှ မရှိသော်လည်း သူတို့တွင် မိမိတို့၏ သားသမီး မြေးမြစ်များ ရှိကြပေသည်။
"ကောင်းကင်မြစ်ဂိုဏ်းကတော့ ထုံးစံအတိုင်းပဲ အဲ့ဒီ ဆေးလုံးဖော်စပ်သူ ရှိနေတာဆိုတော့... မင်းတို့ဆီမှာ ပြီးပြည့်စုံတဲ့ အခြေခံအုတ်မြစ်တည်ဆောက်ခြင်းဆေးလုံးတွေက လိုချင်သလောက် ရှိနေမှာပဲ"
နတ်ဝိညာဉ်အဆင့် ကျင့်ကြံသူတစ်ဦးက ရယ်မောလိုက်သည်။
"ဒါကတော့ သဘာဝကျတာပေါ့ ငါ့ရဲ့ ကောင်းကင်မြစ်ဂိုဏ်းမှာ မုချန် ရှိနေတာဆိုတော့ ဆေးလုံးတွေ လိုအပ်ချက် မရှိတာကတော့ အမှန်ပဲ"
လျှိုလဲ့က ရယ်မောလိုက်သည်။
"ဒါပေမဲ့ မင်းတို့လည်း သိကြတဲ့အတိုင်းပဲ.. ဒီအခြေခံအုတ်မြစ်တည်ဆောက်ခြင်းဆေးလုံးအတွက် လိုအပ်တဲ့ ဆေးဘက်ဝင် အပင်တွေကလည်း အလွန်ပဲ ရှားပါးလှတာလေ"
"ငါ့ရဲ့ ကောင်းကင်မြစ်ဂိုဏ်းမှာ ဆေးလုံးဖော်စပ်သူ ရှိနေပေမဲ့လည်း ဆေးဘက်ဝင် အပင်တွေကတော့ အလွန်ပဲ ရှားပါးလွန်းလှတယ်"
"ဒီပြီးပြည့်စုံတဲ့ အခြေခံအုတ်မြစ်တည်ဆောက်ခြင်းဆေးလုံးကို ငါလွန်ခဲ့တဲ့ နှစ်ပေါင်း ဆယ်ဂဏန်းကျော်တုန်းကမှ ရရှိခဲ့တာ ဖြစ်ပြီး... ဒီနေ့တော့ လောင်းကြေးအဖြစ် အသုံးပြုလိုက်တာပဲ"
"ကျင့်ကြံဖော်လျှိုက ဒီလိုမျိုး ဆေးလုံးကိုတောင် ထုတ်ပေးထားမှတော့ ငါလည်း တကယ့် အကောင်းစား အရာတစ်ခုကို ထုတ်ပေးရတော့မှာပေါ့။ ဒါကတော့ မြစ်ပြင် တောင်တန်း ပန်းချီကားချပ် ပဲ..."
ထိုအချိန်အတွင်းမှာပင်။
ထိုနတ်ဝိညာဉ်အဆင့် ကျင့်ကြံသူများအားလုံး။
မိမိတို့၏ လောင်းကြေးပစ္စည်းများကို အသီးသီး ထုတ်ယူလိုက်ကြတော့သည်။
၎င်းတို့အားလုံးမှာ အလွန်ပင် ထူးခြားဆန်းပြားသော အရာများ ဖြစ်ကြပေသည်။
ယခုတစ်ကြိမ် လောင်းကစားပွဲတွင်မူ။
လူတစ်ယောက်တည်းသာ လောင်းကြေးအားလုံးကို အနိုင်ရရှိမည် ဖြစ်သည်။
အနိုင်ရရှိသူက အခြားလူအားလုံး ထုတ်ပေးထားသော လောင်းကြေးပစ္စည်းအားလုံးကို သိမ်းပိုက်ရရှိမည် ဖြစ်သည်။
မည်သူက အနိုင်ရရှိမည်ဆိုသည်မှာမူ မိမိတို့ဂိုဏ်းက တပည့်များ၏ ကြိုးစားအားထုတ်မှုနှင့် အခွင့်အရေး ကံတရားအပေါ်တွင်သာ မူတည်ပေလိမ့်မည်။