အခန်း (၃၁) - သွေးဝိညာဉ်ဂိုဏ်း ချေမှုန်းခံရခြင်း
"ယောက်ျား... သူက နတ်ဝိညာဉ်အဆင့် ကျင့်ကြံသူ မဟုတ်ဘူးထင်တယ်.. ခုနက ဓားချက်က အနည်းဆုံးတော့ ဝိညာဉ်အသွင်ပြောင်းလဲခြင်းအဆင့် ရဲ့ စွမ်းအားပဲ"
လှပသောအမျိုးသမီးသည် မျက်စိတစ်မှိတ်အတွင်းမှာပင် အလွန်အမင်း ထိတ်လန့်တုန်လှုပ်သွားခဲ့သည်။
ဂုဏ်သရေရှိလှသော နတ်ဝိညာဉ်အဆင့် ပညာရှင်တစ်ဦး ဖြစ်သော်လည်း ယခုအချိန်တွင်မူ ကြောက်ရွံ့မှုကြောင့် တုန်ရင်နေခဲ့ရသည်။
သွေးဝိညာဉ်ဂိုဏ်းချုပ်၏ စိတ်ထဲတွင်လည်း အတိုင်းထက်အလွန် တုန်လှုပ်ခြောက်ခြားနေခဲ့သည်။
"ဒါ... ဒါက ဘယ်လိုလုပ် ဖြစ်နိုင်မှာလဲ ဒီလောက် ငယ်ရွယ်တဲ့ ဝိညာဉ်အသွင်ပြောင်းလဲခြင်းအဆင့် ပညာရှင်တစ်ယောက် မဟာယန်မင်းဆက်မှာ ဘယ်တုန်းက ထွက်ပေါ်လာခဲ့တာလဲ"
"မိန်းမ... မင်းမှာ တားမြစ်ချက်အစီအရင်ကို ဖျက်ဆီးမယ့် နည်းလမ်းရှိလား" သွေးဝိညာဉ်ဂိုဏ်းချုပ်က အလျင်အမြန် မေးလိုက်သည်။
သူ၏ဇနီးသည်မှာ တားမြစ်ချက်အစီအရင် ပညာရပ်ပိုင်းတွင် ကျွမ်းကျင်မှုအချို့ ရှိသည်။ သွေးဝိညာဉ်ဂိုဏ်း၏ မူလမဟာတားမြစ်ချက် အစီအရင်ကြီးမှာလည်း သူမကိုယ်တိုင် စီမံတည်ဆောက်ထားခဲ့ခြင်း ဖြစ်သည်။
"ဒီပိတ်ဆို့ခြင်း တားမြစ်ချက်အစီအရင်က အလွန်ကို နက်နဲလွန်းတယ်.. သေချာပေါက် ထူးခြားဆန်းပြားတဲ့ တားမြစ်ချက်အစီအရင်တစ်ခုပဲ။ အချိန်တိုအတွင်းမှာ ဖျက်ဆီးဖို့ကတော့ လုံးဝ မဖြစ်နိုင်ဘူး" လှပသောအမျိုးသမီးက မျက်နှာပျက်လျက် ခေါင်းခါပြလိုက်သည်။
၎င်းကို ကြားလိုက်ရသောအခါ သွေးဝိညာဉ်ဂိုဏ်းချုပ်၏ မျက်နှာက ပိုမိုဖြူလျော်သွားခဲ့သည်။ "ဒီလိုဆိုရင်တော့... ငါတို့ အသက်နဲ့ရင်းပြီး တိုက်ပွဲဝင်ရုံပဲ ရှိတော့တယ်"
သို့သော် ထိုအချိန်တွင် လှပသောအမျိုးသမီး၏ မျက်ဝန်းများထဲတွင် ရှုပ်ထွေးလှသော အရေအသွေးအချို့ ဖြတ်ပြေးသွားခဲ့ပြီး တစ်ခုခုကို ကြံစည်တွေးတောနေဟန် ရှိပေသည်။
ဝူးဝူး...
မည်သူမျှ သတိမပြုမိခင်မှာပင် ထက်ကောင်းကင်ယံရှိ တိမ်တိုက်များနှင့် လေထုက ရုတ်တရက် အကြီးအကျယ် ပြောင်းလဲသွားခဲ့သည်။ ပိုမိုကြောက်မက်ဖွယ်ကောင်းသော စွမ်းအားတစ်ခုက အရှိန်အဟုန်ဖြင့် ထွက်ပေါ်လာခဲ့သည်။
လုယွမ်သည် ရှည်လျားသော ဓားကို ကိုင်မြှောက်ထားသည်ကို မြင်တွေ့လိုက်ကြရသည်။
"နတ်ဘုရားမိုးကြိုး သက်ဆင်းစမ်း.. ဓားအရှိန်အဝါကို ဓားတစ်စင်းတည်းနဲ့ ဆင့်ခေါ်စေ"
မိုးကြိုးတိမ်တိုက်များ စုဝေးလာခဲ့ပြီး လျှပ်စီးမိုးကြိုးများ တဖျတ်ဖျတ် လက်လာခဲ့သည်။
ထိုအချိန်တွင် ပေါက်ကွဲထွက်လာသော စွမ်းအင်က ထိုနေရာရှိ ကျင့်ကြံသူအားလုံးကို ၎င်းအတွင်း၌ ပါဝင်နေသည့် ကြောက်မက်ဖွယ်ကောင်းသော စွမ်းအားကို အထင်အရှား အာရုံခံမိသွားစေသည်။
ကြောက်မက်ဖွယ်ကောင်းသော မိုးကြိုးလုံးကြီးများက တစ်စင်းချင်းစီသော မိုးကြိုးဓားရှည်ကြီးများအဖြစ်သို့ ပြောင်းလဲသွားခဲ့သည်။ ယခုအချိန်တွင် လုယွမ်သည် စစ်မှန်သော ဓားနတ်မင်းတစ်ပါးအဖြစ်သို့ ပြောင်းလဲသွားသကဲ့သို့ ဖြစ်နေသည်။
"ဒါက ကောင်းကင်မြစ်ဂိုဏ်းက 'ဓားထိန်းနတ်မိုးကြိုးးကျင့်စဉ်' ပဲ မဖြစ်နိုင်တာ... မင်းက တကယ်ပဲ ဘယ်သူလဲ"
သွေးဝိညာဉ်ဂိုဏ်းချုပ် အလွန်ပင် လန့်ဖျပ်သွားခဲ့ရသည်။ သူသည် ကောင်းကင်မြစ်ဂိုဏ်း၏ ဂိုဏ်းချုပ်ကို တခါဖူးမြင်ဖူးခဲ့သော်လည်း သူ၏ရှေ့မှောက်ရှိ လုယွမ်ကတော့ လုံးဝ မဟုတ်ချေ။
သို့သော် ဒီဓားထိန်းနတ်မိုးကြိုးးကျင့်စဉ်မှာ ကောင်းကင်မြစ်ဂိုဏ်း၏ အကြွင်းမဲ့ အစွမ်းထက်ဆုံးသော ဓားပညာရပ်ဖြစ်ပြီး ကောင်းကင်မြစ်ဂိုဏ်း၏ စစ်မှန်သော အမွေဆက်ခံသူများသာ ကျင့်ကြံခွင့် ရှိကြသည်။
သို့သော် သူ၏ရှေ့မှောက်ရှိ လုယွမ်မှာ အလွန်ငယ်ရွယ်နေသေးသည့်အပြင် သူ၏ ကျင့်ကြံခြင်းက ကြောက်မက်ဖွယ်ကောင်းသော ဝိညာဉ်အသွင်ပြောင်းလဲခြင်းအဆင့်သို့ ရောက်ရှိနေရုံမျှမက အထွတ်အထိပ် ဓားကျင့်စဉ်ကိုပါ အသုံးပြုနိုင်နေခြင်း ဖြစ်သည်။
"ပြီးပါပြီ" သူမ၏ဘေးရှိ လှပသောအမျိုးသမီးသည် စိတ်ထဲတွင် အတိုင်းထက်အလွန် စိတ်ပျက်အားငယ်သွားခဲ့ရသည်။
မိုးကြိုးသံများက မြေကမ္ဘာနှင့် ကောင်းကင်ယံတစ်ခုလုံးတွင် ဟိန်းထွက်သွားခဲ့သည်။ လုယွမ်က သူ၏ဓားကို အောက်သို့ လွှဲခုတ်လိုက်သည့်အခါ ထိုမိုးကြိုးဓားကြီးများက ပြင်းထန်သော မုန်တိုင်းတစ်ခုကဲ့သို့ အောက်သို့ သက်ဆင်းကျရောက်သွားခဲ့တော့သည်။
ဝုန်း... ဝုန်း... ဝုန်း...
ပြင်းထန်လှသော တိုက်ခိုက်မှုအောက်တွင် သွေးဝိညာဉ်ဂိုဏ်း၏ ကျင့်ကြံသူများမှာ လုံးဝ မခုခံနိုင်ကြချေ။ မျက်စိတစ်မှိတ်အတွင်းမှာပင် သူတို့အားလုံး တစ်ယောက်မကျန် လုံးဝ ချေမှုန်းခြင်း ခံလိုက်ရသည်။
ဝေါ့..
ပြင်းထန်လှသော ပေါက်ကွဲသံများက ဖြည်းဖြည်းချင်း လွင့်ပြယ်သွားခဲ့သည့်အခါ သွေးဝိညာဉ်ဂိုဏ်းချုပ်နှင့် သူ၏ဇနီးသည်သာ ကျန်ရစ်ခဲ့ပြီး သွေးများအန်လျက် သနားစဖွယ် အခြေအနေသို့ ရောက်ရှိနေကြသည်။
သူတို့ မိမိကိုယ်ကို ကာကွယ်ရန် အသုံးပြုခဲ့သော လက်နက်ရတနာများမှာလည်း တစ်ခုပြီးတစ်ခု အစိတ်စိတ်အမွှာမွှာ ပျက်စီးသွားခဲ့ပြီး မြေပြင်အနှံ့တွင် အပိုင်းအစများအဖြစ် လွင့်စင်နေခဲ့သည်။
"အဟွတ်... အဟွတ်... ငါတို့တွေ သီသီလေးတင် ကာကွယ်နိုင်ခဲ့တာပဲ" သွေးဝိညာဉ်ဂိုဏ်းချုပ်သည် အသက်ကယ်အဆောင်ရတနာများကို ကြည့်ပြီး နှမြောတသ ဖြစ်နေမိသည်။
ဘာပဲဖြစ်ဖြစ် ထိုစဉ်က ဤအစွမ်းထက်သော ရတနာများကို ရရှိရန် သူ အဖိုးအခများစွာ ပေးဆပ်ခဲ့ရခြင်း ဖြစ်သည်။ ယခုအခါ အားလုံး ပျက်စီးသွားလိမ့်မည်ဟု သူ မထင်ထားခဲ့ချေ။
ထိုအကာအကွယ်ရတနာများကို အသုံးပြုလိုက်သဖြင့်သာ သူတို့ သီသီလေး ကာကွယ်နိုင်ခဲ့ခြင်းဖြစ်ပြီး ယခုအခါတွင်မူ သူတို့နှစ်ဦးစလုံး အလွန်ပြင်းထန်သော ဒဏ်ရာများကို ရရှိထားကြသဖြင့် နောက်ထပ် တိုက်ခိုက်မှုများကို ကာကွယ်ရန် လုံးဝ တတ်နိုင်တော့မည် မဟုတ်ချေ။
"စီနီယာ... ကျွန်တော်တို့ ဇနီးမောင်နှံကို အသက်ချမ်းသာပေးလို့ ရမလား" သွေးဝိညာဉ်ဂိုဏ်းချုပ်က အထက်ကောင်းကင်ယံရှိ လုယွမ်ကို ဦးညွှတ်လျက် အသနားခံလိုက်သည်။
ယခုအချိန်တွင် သူတို့ သားဖြစ်သူအတွက် ကလဲ့စားချေရန် မဖြစ်နိုင်တော့ချေ။ ဤကဲ့သို့သော အခြေအနေမျိုးတွင် မိမိတို့၏ အသက်ကို ကယ်တင်နိုင်ရန်ပင် အလွန်ခက်ခဲလှပေသည်။
သို့သော်လည်း နောက်တစ်စက္ကန့်တွင် မိုးကြိုးဓားအလင်းတန်းတစ်ခု ဖြတ်သန်းသွားခဲ့သည်။
ရွှပ်...
သွေးဝိညာဉ်ဂိုဏ်းချုပ်၏ ဦးခေါင်းက ချက်ချင်းပင် မြေပြင်ပေါ်သို့ ပြတ်ကျသွားခဲ့ပြီး အကြိမ်အနည်းငယ် လိမ့်သွားပြီးမှ ရပ်တန့်သွားခဲ့သည်။
ခေါင်းပြတ်နေသော ရုပ်အလောင်းက မြေပြင်ပေါ်သို့ လဲကျသွားခဲ့ပြီး သွေးများက အဆက်မပြတ် ပန်းထွက်လာကာ မြေပြင်တစ်ခုလုံးကို နီရဲသွားစေခဲ့သည်။
"မလုပ်ပါနဲ့..." လှပသောအမျိုးသမီးက ချက်ချင်းပင် မြေပြင်ပေါ်သို့ ပုံရက်သားလဲကျသွားခဲ့ရပြီး သူမ၏ မျက်နှာတွင် စိတ်ပျက်အားငယ်မှုများဖြင့် ပြည့်နှက်သွားခဲ့သည်။
ထို့နောက်တွင် ထိုအမျိုးသမီးက အလျင်အမြန် ဒူးထောက်ကာ လုယွမ်ကို အဆက်မပြတ် ဦးချတော့သည်။ "ကျွန်မကို အသက်ချမ်းသာပေးဖို့ စီနီယာကို တောင်းပန်ပါတယ် ကျွန်မ စီနီယာရဲ့ အစေခံအဖြစ် ခံယူပါ့မယ် ကျွန်မမှာ အရည်အချင်းအချို့ ရှိပါတယ်.. စီနီယာကို သေချာပေါက် ကောင်းကောင်းမွန်မွန် လုပ်ကျွေးပြုစုနိုင်ပါတယ်..."
"ဟွန့်... ရွံစရာကောင်းလိုက်တာ မင်း တော်တော်လေး အတွေးလှနေတာပဲ" လုယွမ်က အေးစက်စွာ နှာခေါင်းရှုံ့လိုက်သည်။
ရွှပ်...
အခြားသော ဓားအလင်းတန်းတစ်ခု ဖြတ်သန်းသွားခဲ့ပြန်သည်။ ထိုအမျိုးသမီး သတိပြန်ဝင်လာသည့်အခါ သူမ၏ ဝမ်းဗိုက်တွင် သွေးချင်းချင်းနီနေသော ဒဏ်ရာအပေါက်ကြီးတစ်ခု ထိုးဖောက်ခံလိုက်ရပြီဖြစ်ကြောင်း တွေ့ရှိလိုက်ရပြီး သူမ၏ အသက်စွမ်းအင်များက အရှိန်အဟုန်ဖြင့် လွင့်ပြယ်သွားခဲ့သည်။
သူမ မြေပြင်ပေါ်သို့ လဲကျသွားခဲ့ပြီး ကောင်းကင်ယံထက်က မိုးကြိုးများကို မော့ကြည့်ရင်း... "ငါ့ရဲ့ ကျင့်ကြံခြင်း အဆုံးသတ်ပိုင်းကို ရောက်ခါမှ... ဒီလိုမျိုး ရလဒ်နဲ့ ကြုံရလိမ့်မယ်လို့ မထင်ထားမိဘူး..." ဟု ရေရွတ်လိုက်သည်။
သူမ စကားဆုံးအောင် မပြောနိုင်ခင်မှာပင် မကျေမနပ်ဖြစ်လျက် နောက်ဆုံးထွက်သက် ချုပ်ငြိမ်းသွားခဲ့တော့သည်။ လုံးဝ သေဆုံးသွားခဲ့ပြီ ဖြစ်သည်။
"ဒီအချိန်ကစပြီး... ဒီလောကမှာ သွေးဝိညာဉ်ဂိုဏ်းဆိုတာ မရှိတော့ဘူး" လုယွမ်က တည်ငြိမ်စွာ ဆိုလိုက်သည်။
ဝုန်း...
ထို့နောက်တွင် လုယွမ်သည် သွေးဝိညာဉ်ဂိုဏ်း၏ အရာအားလုံးကို အကြွင်းမဲ့ ဖျက်ဆီးပစ်လိုက်သည်။
တောင်ထွတ်တစ်ခုလုံးကိုပင် မြေပြန့်အဖြစ်သို့ ဖြိုချပစ်လိုက်သည်။ အကယ်၍ သူ ဤသို့ မလုပ်ဆောင်ခဲ့ပါက အခြားသော ကျင့်ကြံသူများ ဤနေရာသို့ ရောက်ရှိလာပြီး သွေးဝိညာဉ်ဂိုဏ်း၏ မိစ္ဆာကျင့်စဉ်အချို့ကို ရှာဖွေတွေ့ရှိသွားပါက သွေးဝိညာဉ်ဂိုဏ်းအသစ်တစ်ခု ထပ်မံထွက်ပေါ်လာနိုင်ခြေ ရှိသည်။ ထိုကဲ့သို့သော ကိစ္စရပ်များကို တတ်နိုင်သမျှ ရှောင်ရှားရမည် ဖြစ်သည်။
သို့သော်လည်း လုယွမ်က ဤလောကတွင် မိစ္ဆာကျင့်ကြံသူများနှင့် အချို့သော မိစ္ဆာအင်အားစုများကို လုံးဝ အမြစ်ပြတ်အောင် သတ်ဖြတ်ရန် မဖြစ်နိုင်ကြောင်းကိုလည်း ကောင်းစွာ နားလည်ထားသည်။
မိစ္ဆာကျင့်စဉ်များကို ကျင့်ကြံရန်အတွက် မည်သည့်တန်ဖိုးမျိုးကိုမဆို ပေးဆပ်ရန် အမြဲတမ်း တလိုတလား ရှိနေကြသော လူများ ရှိနေစမြဲ ဖြစ်သည်။
ဘာပဲဖြစ်ဖြစ် အချို့သော လူများအတွက်မူ မိစ္ဆာကျင့်စဉ်များကို ကျင့်ကြံခြင်းဖြင့်သာ ပိုမိုအစွမ်းထက်လာနိုင်သောကြောင့် ဖြစ်သည်။
ကိစ္စရပ်များကို ဖြေရှင်းပြီးနောက် လုယွမ်သည် မီးကောင်းကင်မြို့တော်၏ တည်နေရာဘက်သို့ လျင်မြန်စွာ ပျံသန်းထွက်ခွာသွားခဲ့သည်။
သွေးဝိညာဉ်ဂိုဏ်း တည်ရှိခဲ့သော နေရာသို့မူ မကြာမီအချိန်အတွင်းမှာပင် အခြားသော ကျင့်ကြံသူများစွာ အသီးသီး ရောက်ရှိလာခဲ့ကြသည်။ ဘာပဲဖြစ်ဖြစ် လုယွမ်၏ ခုနက တိုက်ပွဲလှုပ်ရှားမှုက အလွန်ပင် ကြီးမားလွန်းလှပေသည်။ ၎င်းက အဝေးမှ အခြားသော ကျင့်ကြံသူများကိုပါ ဆွဲဆောင်လိုက်သကဲ့သို့ ဖြစ်သွားခဲ့သည်။
"ဘုရားရေ... ဒါက ဘယ်လိုမျိုး ပညာရှင်ကြီးရဲ့ လက်ချက်လဲ"
"ကျန်ရစ်နေတဲ့ စွမ်းအင်တွေက တော်တော်လေး ကြောက်ဖို့ကောင်းတာပဲ.. အသာလေး ထိမိရုံနဲ့တင် လုံးဝ ပြာကျသွားနိုင်တယ်"
"သေချာပေါက် နတ်ဝိညာဉ်အဆင့် ကျင့်ကြံသူတစ်ဦး တိုက်ခိုက်သွားတာပဲ ဖြစ်ရမယ်"
"မဟုတ်ဘူး... ငါ့အမြင်အရတော့ ဝိညာဉ်အသွင်ပြောင်းလဲခြင်းအဆင့် ပညာရှင်ကြီး ဖြစ်ရမယ်"
"ဝိညာဉ်အသွင်ပြောင်းလဲခြင်းအဆင့် ပညာရှင်ကြီး ဟုတ်လား" လူတိုင်း အံ့အားသင့်သွားကြသည်။
"မှန်တယ်... ဝိညာဉ်အသွင်ပြောင်းလဲခြင်းအဆင့် ပညာရှင်ကြီးတစ်ယောက်ပဲ ဒီလိုမျိုး ကြောက်မက်ဖွယ်ကောင်းတဲ့ စွမ်းအားကို ပိုင်ဆိုင်နိုင်တာ"
"ဒါပေမဲ့ ဒီမဟာယန်မင်းဆက်မှာဆိုရင် အဲ့ဒီ ထိပ်သီးဂိုဏ်းကြီး အနည်းငယ်မှာပဲ ဝိညာဉ်အသွင်ပြောင်းလဲခြင်းအဆင့် ပညာရှင်ကြီးတွေ ရှိကြတာလေ"
"ဝိညာဉ်အသွင်ပြောင်းလဲခြင်းအဆင့် ပညာရှင်ကြီးကိုယ်တိုင် လာရောက်တိုက်ခိုက်ရတယ်ဆိုတော့ တစ်ယောက်ယောက်က ဒီပညာရှင်ကြီးကို သွားပြီး ရန်စမိလို့ ဖြစ်ရမယ် ငါတို့တွေ အခြားလူတွေရဲ့ ကိစ္စမှာ ဝင်မပါတာ ပိုကောင်းပါတယ်"
"ဒီလောက် အချိန်အကြာကြီးအတွင်းမှာ ဝိညာဉ်အသွင်ပြောင်းလဲခြင်းအဆင့် ပညာရှင်ကြီးတစ်ယောက် လှုပ်ရှားတာမျိုး တစ်ခါမှ မကြားဖူးဘူး.. ဒီနေ့ တွေ့ရလိမ့်မယ်လို့ မထင်ထားမိဘူး"
"ဒါက ငါတို့ရဲ့ ဘဝသက်တမ်းတစ်လျှောက်မှာ ဝိညာဉ်အသွင်ပြောင်းလဲခြင်းအဆင့် ပညာရှင်ကြီးတစ်ဦးနဲ့ အနီးစပ်ဆုံး ဆုံတွေ့ရတာပဲ ဖြစ်နိုင်တယ်"
"သွားကြစို့ ငါတို့ ဒီနေရာမှာ ကြာကြာနေလို့ မဖြစ်ဘူး"
"အားလုံးပဲ နှုတ်ဆက်ပါတယ်"
မကြာမီမှာပင် ထိုကျင့်ကြံသူများ ဤနေရာတွင် ကြာကြာမနေဝံ့ကြတော့ဘဲ မိမိတို့၏ လမ်းကြောင်းအသီးသီးသို့ ပြန်လည်ထွက်ခွာသွားခဲ့ကြပြီး သူတို့၏ အမြန်ဆုံး အရှိန်အဟုန်ဖြင့်ပင် ထွက်ခွာသွားခဲ့ကြသည်။
သူတို့၏ စိတ်ထဲတွင် အကယ်၍ ထိုဝိညာဉ်အသွင်ပြောင်းလဲခြင်းအဆင့် ပညာရှင်ကြီးက မထွက်ခွာသေးဘဲ လမ်းခရီးတွင် သူတို့ကို သတ်ပစ်လိုက်ပါက မည်သို့လုပ်မည်နည်းဟူ၍ ကြောက်ရွံ့နေကြခြင်း ဖြစ်သည်။
ထိုသို့ဆိုလျှင် သူတို့အနေဖြင့် မကျေမနပ်ဖြစ်လျက် ယမမင်းထံသို့သာ သွားရောက် တိုင်တည်နိုင်တော့မည် မဟုတ်ပါလား။